Tonda, im tam ap, im noutam ulul ning babye, yatanye birye, el mikip weik taruk deice arye kwepdeibukba, aning nirya aubuk do? Tonda, yata tonye, elcuk tukwak noutam bukni, weik laut mekwen kwepdeibukba, mek kait ara, welebina, koulukuka binapna kiptuba, anye birye, aning nirya yaniptuba, kum uptu do? Aning nirya ara Allah elcuka!
Yeremia 10:12 - Eipomek12 Allah el mikip weik deice arye, tukwak mutuku nirya kwepdeibuk. Allah el weik kel deice arye, tukwak mutuku ara, urasin teleb kipdeibuk. Tonda, el weik kel deice arye, tukwak mutuku nirya, teleb kipdeibukce, asukum kat kipdeibukba, asukumuk unamle. Kum long-long apnamle. Tonda, Allah arye, weik deiyok ning noutam nirya, weik kel bikamuknye birye, im alip tam ap, im noutam ulye ning nirya ap, kintinibuka, teleb kipdeibuk. Gade chapit la |
Yeremia 10:12
38 Referans Kwoze
Na Allah ara, im deice weik bun ning deice bukamsirye, tukwak mutuku nirya bola urasin atonun kibuka kwepdeipsirye, elinune. Tukwak mutuku kwepdeipsirye, tukwak ninye ton kwepdeibuka deipseba, sikce deibikba, dadeipdanin yangalamik ninye nirya ara, pia mitike. Talye kwising atonun unyake. Ninye arye pala baju dobuka, mitik tonun lelilongolamak touk, nara Allah arye, im deice ap, im deice ulul ning nirya ap, kwepdeibuka tonok talak aniryuk deipse. Ninye arye, ‘Cang kain bol arye, doltakna tenda aik unamap’ tenen, pala kain dobuka delilamak touk, na Allah arye, im deice ulul ning nirya, kanam asa aniryuk kwepdeipse.
Aning-aning deice tam ulirye, pia weik mambulnye ulula ati ara, lilibuka nyapnusiname. Yata ulye ning do yuk-yuk yala nirya ara, elcuk kwepdeiyamuk. Im deice ulul ning nirya ap, tukak mutuku noutamak ulul ning ap, ninye asing arye elinyak ning nirya ap, aupmal bukni, ninye asing arye kum eipmanto ning ap, aning-aning nirya ara, elcuk kwepdeiyamuk. Tonda yata mikip ulye ning do nirya, ninye weik nang deiyok nang, Sisinanye Raja nang nirya ap, deice tam weik nang unyak nang ap, sik amutamukirye, mitik pil talibuka donyak nang ap, talye nang bukni, yuk nang arye anang ati, ‘Nun ni yapu,’ tenebuka, deiyok yupu nyanyak nang ap, anang-anang nirya babye, Allah el Mi Koprop arye kwepdeiyamuk. Yata ulye ning do, yuk-yuk yala nirya ara, elcuk aning nirya kwepdeiamukce, ‘Aning talipnibuk, aning ap, aninye nirya ap, sikce na si erebuka kinamniyak’ tenen, kwepdeiyamuk.
Yupu nyanyapnye, elce aning-aning nirya kwepdeibuk. Yata ning do nirya, Allah arye kwepdeibuk ning nirya ara, Yupu nyanyapnye, pil dobuk deice arye aning-aning nirya kwepdeibuk. Aulul ning yala-yala nirya ara, Yupu nyanyapnye, elcuk aning-aning nirya kwepdeibuk. Yuknye birye, tonok ning babye kum kwepdeibuke.
Aning ara, talye ati kum nyapne. Deiyok ara, Allah el dem arye, tukwak mutuku nirya dobuka, weik laut mekwen deice deibukba, tukwak mutuku amu tam mutuku yangan keil ara, laut mekwen pum tam deibukba aulule. Tukwak mutuku ulul amu tam yangan keil, amu duk-duk mekwen pum tam, ikuka deibuka anya arye, pia aulyeba, lokuka yukak kum binmanto ulule.
Na nio, anda Allah Yahweh, aning-aning nirya talibuka, deice tam erebuka, pia mikip weik ulyama ati, an tenelalam touk, adiparyuk winilyame. Ati, Allah an mikip weik taruk deice arye, im noutam ap, mutuku sirya, im sirya nirya ap, kwepdeiplume. Yata ning nirya do, tonok ning babye, an ikin upkiliba, kum winipmanto ning ton, pia kum ukulule. Anda, pia mikip weik ulyamnye biti, aning-aning nirya ara, kanam aryuk pil dopra ulyame.
Allah elce, “Aning ara, winipnule,” nyaplyeura, im deice tam arye, long-long aplirye, weik mek lelim nyalamle touk, lelim nyalule. Allah elcuk, Tukwak mutuku kup-kup arye, dua weleptue,’ tenebuk talak ara, adiparyuk, dua weleplirye, tukwak mutuku nirya siknilongolule. Tonda, Allah elcuk, ‘Weik mok cepnulirye, bebeya lakalamle touk winipnamleʼ tenen, nyaplye talak aryuk, yo ceplirye perenglang an ning babye nyalule. Tonda, ‘Allah arye min dobuka, ‘Naʼ tenen deibukak arye, banamle teneplye talak ara, minopce dobuka deiplyeba, tukwak mutuku deice balule.
Na Allah Yahweh arye na mapu Israel ninye ati nyapsine. “Narye tenyamse talak akunum yalyopura, anggunce moryamnulum ning ara kekepsinirye, melinamsine. Tonda narye tenyamse talak akunum kiplyopura, anggun melibuka lyepnamsine. Winipsinirye, anggunda na amu tam ulamunyeba, narye tuba kalikuka melinamsine. Winipnamsina deice arye, doryanamle talak unamak Israel ninye babye, aning eibuka kel bikikirye, ‘Nun babye dipkoprob lyepropnamsile’ tenen, kel biknamake. Ati na pil donamsina deice arye, yuk mutuku nang arye anggun mutuku nirya alabuka dopropsik ning ara, tamubuka arepnamsine. Winipsinyopura, narye anggun minop talak aik dobuka ulamlumak bukni, aik oldemuk upsukak ara, tamubuka arepsiniba, aik dopmunce amutuku ara pia talibuka unamlume. Aning ara, na tenepse talak akunum uplyopura, winipnamle.”
Na mikip weik taruk arye, tukwak mutuku amu tam ara, mutuku yuk ning keil deiamse, aning nirya baribuka talipse. Na mikip weik sirik taruk arye, im noutam ap, im deice tam ap, ulye ning nirya ara, naryuk lilibuka deiamse. Tonda, im deice tam awamuk ning nirya babye, narye yukupnirye, sik si, si sibuka, ‘Yalulume!’ nyaptinyopura, sik adiparyuk bikbik abuka yakirye, ‘Yata nyapnusil do?’ tenen, kintinibikirye, tunim abuka tikinyake.
Na Allah Yahweh arye nyapsine. “Allah naryuk im babye, im deice ulul ning babye kwepdeipse. Nara Allah tonok unune. Winipsirye, tukwak kwepdeipsiba pia darabuka abukuk. Atukwak mutuku, mutuku-mutuku nirya kwepdeipsa ara, ‘Talya urdemuk aunamle’ tenen, kum kwepdeipse. Aning kum bukni, ‘Aning-aning ayala-yala nirya unamle’ tenen, kwepdeipse. Winipsinye bira, Allah na tonok unune. Yuknye ton kum ulule nyapne.
Ura, na Allah Yahweh arye, anggun nin yapu min kum deiamsik talak arye, mun pum tam tuba ulamlum talak, kintinip deibuka wiamsise. Winyamsisa ati, tuba melisunune. Nara, anggun Lyena Deiyoknye usunune. Na Allah Yahweh arye aning-aning nirya kwepdeiamse. Winilamsirye, naryuk im deice ulul ning nirya kwepdeibuka lilipdeiamse. Aning atonun, naryuk tukwak mutuku noutam ulul ning nirya babye, kwepdeibuka lilipdeiamse. Yuk nang arye ton kum meliamnike. Na aryuk apil dolamse.
Nara Allah na si Yahweh unune. Narye nyapkine. Im ap, im noutamak ulul ning ap, im deice ap nirya ara, naryuk kwepdeipse. Tonda, naryuk, tukwak im sirya, mutuku sirya nirya ap, tukwak mutuku ulul ning ap, tuku deice arye butukuka palamle ning aning-aning nirya ara, narye kwepdeipse. Na aryuk tukwak ninye ara, anggun isin aresunune. Areneba kam unyake. Tonda, anggun dib kanye babye, naryuk anggun talima noutam dongosunune.
Se, nun ni Allah Yahweh, ance pil dolyam ning aning-aning nirya ara, pia weik awinilyam ning ara, ninye arye kum nuktibye. Anda dipkoprob weik kel bikna deice arye, aning-aning nirya kwepdeiamsulume. Winibuka winipsulumba, tukwak mutuku noutamak nirya, ance kwepdeiamsulum ning, ayala-yala nirya weik aulule.
Yatanye birye, im deice welepmatu ani, tamubuka kolukuka yatu do? Aning atonun, yatanye birye kumanya balamle ning nirya, el taruk arye talipturye tonokak bulubuka deiptu do? Aning atonun, yatanye birye weik laut mekwen nirya, el baju arye kitibuka deiptu do? Yatanye birye mutuku sirya, im sirya ap, tukwak mutuku noutamak ulul ning ap, im noutamak ulul ning ap nirya ara, kwepdeiamuk do? Aning-aning Kwelina Deiyoknye ap, el mi koprop ap, sik si arando? Yatanye birye aning bikamuka deice arye, nati laka lebuka peterepnutu do?
An pia teleb ubuka uminya deice arye, ance nyasiminye touk, dipkoprob usulule. Ninye arye mapu deibikiba, dadeipdanin banamak ninye babye, ance aninye ati, bico tenepsimince, teleb ubuka melisilyame. Pia kum bataknamsilyame. Tonda, ance tukwak mutuku nirya kwepdeiplumce, moubuka talilyama deice arye, wini talak babye, tuba kat ulule.
Allah arye Sion mutuku wibukopura, elce, ‘Winipnulyame,’ nyabukba, sikce el si eren aik ara, amutuku noutamuk domik. Ara, im deice nirya teleb kipdeiamukba, pia deice tam aunamle touk, el si eren aik babye, Sion mutuku kon deiceuk tuba aunamle. Tonda, tukwak mutuku im sirya, mutuku sirya, nirya kwepdeiamuka ara, min kum kum danamle. Apia aunamle touk, el si eren aik ara, Sion mutuku kon deice, pia aunamle. Aminyan talak ara, aning babye min kum kum datue.
Aning-aning min kum uamuk talak ara, deice tam lo weik ubukce, lo ubukba, Allah elcuk, itam ara, im kwepdeibukce, itamuk bibikdeibukba, tuba aulule. Aning atonun, minop talak weik lo ubukak ara, tonok ning babye, kum uamuk bukni, anoutam ara, Allah arye tukwak mutuku, im sirya, mutuku sirya nirya kwepdeibukce, asukum ara, tuba aulule.
Allah el si Yahweh arye, aning-aning deice tam ulirye, aning nirya talibuka weik deiyoknye ulule. Winipmanto ara, tukwak mutuku ninye deiyok nang, Raja weik nang arye, pia urasin teleb baju ongobikiba, ninye eibikirye, “Se, elda telebe,” nyalamak touk, Allah elda, pia teleb ulirye, pia mikip weiknye ulule. Winibuka ulula ati, ninye mutuku-mutuku nirya unyak ninye arye, ‘Elda weik mambulnye ulule’ tenen, unyake. Allah Yahweh arye, aning-aning nirya ap, tukwak mutuku nirya ap, kwepdeiamukce, talibuka, aning nirya, pia darapdongobuka unamle.
Aning-aning nirya talibuka, Weik Deiyoknye Allah arye, im noutamak ap, tukwak mutuku ap kwelilamuk talak noutamak ara, ninye ton kwepdeiamuk. Ara, yata yala ning do, tuku deice arye talye palamle ning ap, wa win dam palamle ning yala nirya ap, min kum pamuk. Deiyok ara, aning-aning nirya talibuka Weik Deiyoknye Allah, el si Yahweh arye, min kum nyapdeibuka arye, mok ton kum celamuk. Tonda, atalak ara, ninye min kum kwepdeibuka ati, wa wina ap, tuku palibuka yala ning koulamak ning ap, pil dopmantonye ton kum uamuk.
Tonda, Allah elce dua ara, tabakuka deipdanin biyukce, welebuka, im deice ap, im alip tam ap, urasin kat atonun kipdeipliba, elinyap ning ara, ance ton, atonun kibuka deiptum do? Winipmanto ara, im alip tam ulye dua nirya ara, pia kat ning, el si ara logam ap, tonda ninye urasin dina ati, el si ara kaca muka ap, aning atonun kipdeipliba, elinyap ning ara, ance ton atonun kipdeiptum do? Kume, aning nirya ara, an walwal ati, kum winiptume.
“Se, Nun ni Allah Yahweh, anda aning-aning nirya deice tam erebuka umince, pia mikip weiknye uminye birye, im deice yin talin malaikat nirya ara, sik deiyoknye ulyame. Nun Israel nang nirya ara, Allah an mapu ubirye, an siuk erekinyabe. Tonda, na nie, anda Peti Perjanjian bublan deice malaikat urasin atonun ning, el si Kerub, bitinye puturubuka deibubak, deice tam ara, bukmince tuba asukumuk ulyame. Nun ni Allah, an tonok aryuk erebuka uminyeba, atukwak mutuku ninye deiyok kibuka talinyak nang nirya ara, an amu tamuk unyake. Allah ance im ap, tukwak ap wepdeiplumce talilyame. Mutuku sirya im sirya nirya talinyaka deiyok nang ara, an amu tamuk unyake. An tonok ulyame.
Allah el si Yahweh arye, aning-aning nirya kwepdeibuka Deirina Deiyoknye ulule. Allah arye sik Israel yala nang nirya ati, nyabuk. “Yakub birye deibukba, deipdanin balamik nang nirya ara, ‘Naʼ tenen, nanguk unamake. Na mapu koproba unamak tenen, wipdeiamse,” nyabuk. Allah Yahweh, el si ara, “Im deice unyak yin talin malaikat nirya ara, sik deiyoknye ulule,” nyabuka nyanyabe.
“Yuknye kume. Na Allah aryuk, na mikip weik talibuka unye ning ap, tonda na mikip weik unilye taruk ap deice arye, tukwak mutuku ubuk ning nirya kwepdeiamse. Tonda, tukwak mutuku nirya unyak nang ap, tonda tukwak mutuku noutam kam ulye ning yala-yala nirya ap ara, naryuk kwepdeipse. Akwepdeipse ning nirya ara, na kanye aryuk, yatanye biti do, ‘Anye bira mikip weik deiyok ning arepkinun,’ tenepninye bira, narye atenepnye touk arenune.
Ninye mutuku sirya im sirya nirya arye, sik taruk deice arye puturubuka deibikirye, ‘Nun ni koprop ara aniʼ tenen, aninguk talibuka, elti, si erenyake. El si erenyak ning ara, tukwak mutuku noutam talibuka ukirye, isa si erenyak ning nirya ara, talye ninguk ulula ati ara, apil tonok babye pia kum doptinge. Bukni, nun ni koproba Allah Yahweh ara, mikip weik ululnye, elcuk im tam ulul ning nirya kwepdeiamuk.
Nun ni Allah, nun kele. Mutuku-mutuku nirya arye, kwemdina ning Isa Mutuku Dongonye si erenyak ning ati, ‘Mok arepsilyame,’ nyabuka moroptibye babye, mok kintinibuka kum arepsutue. Tonda, im noutamak ulul ning aryuk, mok tukwak mutuku kum dopkweteptue. Aning nirya kum bukni, Allah ancuk, nun patapsilye ning nirya arisilyame. Ati ara, nunce an deiceuk, nun kanye delinyabe. An dem aryuk, aning-aning nirya arisilyame.” Israel ninye arye, Allah ati ayupu nyabik.
Piblisite