Nun ni Allah, yuk-yuk kum ulule. Elda keil pala yangalamla atonunuk ulule. Weik keil pia aulye touk, Allah babye, pia aulule. El tenena ap, el winilye ning ap ara, yuk-yuk kum ulule. El pil dolye ning ara, pia telebuk winilule. Tonda, el winilul ning nirya ara, dipkoprob kibuka diksukumuk winilule. Allah el pil dolul ning ara, ‘Ton tam nang, teleb kipnirye, ton tam ara, namin kipnamne,’ kum tenelirye, el nyalul touk, nirya pil dolule. Malye ning tonok babye, ton kum winiptue. El winilul ning nirya ara, yamubuka diksukumuk winilule. Ninye winilamak touk, elce teleb kibuka, yupu diksukumuk bokolisulule. Ati ara, el si erenyabe.
Yeremia 10:10 - Eipomek10 Sik pia walwal nang arye, wininyak bukni, dipkoprob Allah, el si Yahweh ulule. Elda kam una deiyoknye ulule. Allah el tonok ara, kam pia ulule. El Allah Yahweh ara, aning-aning talibuka, pia ati, Ninye Deiyoknye Raja unamle. El ap, elce talilul ning nirya ap, pia kume, kum danamle. Pia aupnamle. Tonda, Allah elce, tukwak mutuku ap, tukwak nang ap ati, yu uplyeura, tukwak mutuku nirya ara, weik arye onamle. Tonda, Allah elce, tukwak mutuku unyak nang nirya ati, yu upturye, wenepsutu ura, tukwak mutuku unyak nang nirya ara, darapdongobuka uptinga babye, kum upnamake. Gade chapit la |
Yeremia 10:10
69 Referans Kwoze
Nara Allah, aning-aning nirya deice tam erebuka ununye birye, nyapsine. Tonda, aning-aning nirya deice tam ununa ati, na siuk weik tonun ereninyaknye birye, nyapsine. Nara min talak akunum kam ulamsirye, aminyan doyanamle talak babye, na pia Kam Una Deiyoknye unune. Na ap, na si ap, Pia Teleb, Lek Ululnye unune. Nara, pia weik erenak, im deice unune. Na ununak ara, dipkoprob malye ning tonok babye kum ulula ati, pia teleb kurunak unune. Bukni, nara yata nang do nirya, sik talima amu tam kibikirye, sikce, ‘Se, nun malye unyap ning ati, alye dakdanuka unyaba ati, aning nirya batakabe,’ tenebikirye, talima erena kumce, malye kanye bobuka, sik kanye talima namin unyak nang ap, neika unamne. Na ap, sik epdanuka neika unamap deiyok ara, narye sik malye kanye bobuka talima lamapdongobuka unyak nang ara, mikip arepnyeba, sik kanye deipnamake. Tonda, sikce, ‘Se, nun malye unyap ning ati, alye dakdanuka unyaba ati, aning nirya batakabe,’ tenebikirye, engenyak nang ati, sik talima kwa dipnyeba, sikce kanye deibuka teleb unamake. Sik ato unyak nang, sik dam ara, na aunamne, nyapsine.
Allah Yahweh el yu tenepnamle talak ara, yata nang nirya, ilil kumce, el dam yanuka tikting do? Kume, el yu upliba, kanye imun weik wenen ning, uku weik tonun dinmaliba, keil lyeiplirye butuklamle touk ubuka, atu buklopnamle. Winiplye talak ara, yata nang ton, el yu upnamle talak, el dam yanuka tikting do? Kume, ara kum winipmanto. El yu weik uplyopura, kat weik keil babye, el dam arye, atu butbuta atonun kipdeipnamle.
Ara, talye ati kume. Deiyok ara, Allah Yahweh ara, telebuk ulirye, nun ninye ati, bico tenepsilirye, pia tuba melisilya ara, pia kum bataknamsile. Allah arye, “Wininamsine,” nyabuka, nyalina yupu deice nyasilye touk, pia dipkoprob winilule. Minop talak dorapce deibikba, dadeipdanin yanganyap ninye nirya ati, tuba-tuba tenesilirye, melisulule.
Aning nirya eipsopura, aning ton eipse. Ara, weik ninye deiyoknye kurun ning deice bunlulak eipse. Ara, pia weik kurun bun ning ap, aning deice bukmoknye ap eipse. Anye laka ubukba, im ap, im noutamak ulul ning nirya ap, tukwak ap, tukwak mutuku noutamak ulul ning nirya ap, aweik deiyoknye dam kum yanmanto ati ara, aning nirya kum dayukba eipse.
Tonda, yu nang arye nati, ‘Anye bira, opnuyap’ tenen, ninye onak akunum kintibikce, ninye on ning, el si jaring, dungnubuka deibika noutam arye, ‘Ance lobuka lyepnamnilam’ tenen, moropkine na nio! Aning ara, talye ati, kum morokunune. Kume, ‘Na on nang arye, opnikcak’ tenen, an damuk yanuka unune. Tonda, anda, na Lyena Deiyoknye unilyama ati, antibuk morokunune na nio.
‘Atalak ara, na mal olan nang arye, opnuniyak’ tenen, dipkoprob pia imun kanye bobuka ulamsa ati, narye anda Allah Yahweh ati, “Melibuka lyepnilyame!” nyabuka, moropkise. Diba, na si erekunun Allah ati, “Naio ancuk yanuka melipnilyame!” nyabuka moropkise. Anti moropkise talak ara, an si eren aik pum tam arye, na ngalukuka moropkise yupu kekepnulume. Ara, narye engebuka moropkise yupu akunum nyapsopura, an amul arye kunum kekepnulume.
Ton kel kibupu ning, ton nyapnusine. Ara, ‘Sikda Pia Dib Koprop Allah, diba tenebuka talipnamake’ tenen, Allah el Mi Koprop Yesus yayukce, kel kina deiyok ning akunum arepsuke. Pia Dib Koprop Allah ap, nun ap, talima dukdongopsukba neika unyabe. Aninguk kume. Allah el Mi Yesus Kristus el bidamnye ap, nun ap, talima dukdongopsukba, neika unyabe. Yesus Kristus elda, Dib Koprop Allah el nong tonok ulule. Tonda, elda, Pia Kam Una Deiyoknye ulule.
Aning ati ara, nun ni Allah, elda Weik Ninye Deiyoknye, Sisinanye minop dorapce dipdongobuka noutam talak ap, wini talak ap, aminyan do unamle talak ap nirya, pia unamle. Elda, pia kam ulul anya arye, kum diptue. Ninye asing arye pia kum eiptinge. Dipkoprop Allah ara, el tonoka, yuk ton kum ulule. Ati ara, ninye nirya arye, adiparyuk atalak babye, aminyan talak nirya babye, ‘El ti si erebuka, el si weik arye erepnamak’ tenen, Allah moronune. ‘Aning ara, dipkoprop unamle’ tenen, pia patanulul anya arye, Amin nyapne. Akunuma.
Anyapmap mutuku-amutuku nang nirya arye, akunum kel bikamika anya arye, sikce laka nyanyake. Ara, nunce anggun dam yapubuk, kanye deibuka yukulamsulum ning ap, Allah yupu kekebuka dololamlum ning ap laka nyanyake. Sikce laka nyasinyak yupu ara, ani. Ara, “Sik Tesalonika ninye arye, ‘Allah el ara, pia dipkoprop Kam Unanye, el tonoka’ tenen, diba tenebikirye, ‘Eluk talibuka, el piluk donamape’ tenen, sik mem ning isa si erebuka, talyamik ning nirya ara, akunum batakik.” Yuk nang arye nyabuka laka nyaninyake.
“Anggun awininmalum ara, yata ati do? Nunda talye ulamak ninye atonun unyame. Nun talye tukwak nanguk unyame. Nunce anggunti, ‘Yesus arye ninye lyesulule,’ nyabuka, Yesus el laka teleb yupu boyanmasiname. Anggun amutuku ninye, talye ning si eremunya ara, batakmunce, donga ibuka, ‘Allah dipkoprop ululnye si erenamluma’ tenen, nyapsiname. Allah dipkoprop, elce im tam ap, tuku tam ap, laut mekwen ap, aulye ning noutamak ulul ning nirya ap, kwepdeibuknye bira, el uka. Ati, el siuk erenamlulume.”
Bukni, nara Allah Yahweh yanamne sum ara, yatanye birye, pia darapdongobuka tikturye, na eipnutu do? Na yanamne sum ara, kat weik ning uku dana deiyok nang arye, uku dongobikiba, mil paraplirye, malye ning nirya diplirye, teleb ninguk laka nyelelamle touk, narye malye un ning, aning-aning nirya, pia kum daneipnamne. Winipmanto ning ara, sabun mikip ning memena deiyok nang arye, memebuka deibikirye, nininga palepmalye baju, asabun arye mek likikiba, pia teleb kibuka liklamak touk, narye malye ning nirya kum kipdeipniba, diksukum ninguk tuba unamle.
Na nio, an Allah arye, mutuku deice tiklumba, amutuku ara, weik arye lulukamuk. Tonda, yata mutuku ninye do nirya, ance aninye sik wenena ati, pia pirilelalum talak ara, ninye nirya elilamekce, ilil ubukba, imun kanye bolamikce, ‘Se yata wiripnamsil do?’ tenen, sirim talilamukba ulamik. Minop talak bukamuk mutuku ara, ance areplumba, weik arye lulukunmok deice arye, sakukba, kum kipdeiplume. Tonda, minop talak elilamupu mutuku dup ara, ance areplumba, ila tokna dobukce, pia kum kibuka deiplumopura, lyu weik ubuke. Na nio, ance winiminye ning nirya ara, pia aunamle.”
Winibuka tikilyanganamla talak ara, amutuku nirya, weik arye luluklirye, mutuku nirya, atu atonun kiplopnamle. Winipmanto ara, lilin dobuka, uku dinipdongobikiba, uku buk dilirye, mek balamle touk upnamle. Ara, nun ulamepye mutuku deice tikilyaliba, mek kutuklirye, tokna donamle. Tonda, mutuku deice arye, mek kutuklirye, tokna pakuka balirye, opnin banamlya ani, lu mutuku obuka, dalalbalamle touk, upra binamle.
Allah ance aning-aning nirya talibuka, Weik Erenanye ulyamnye, wini talak arye diprongobuka, doryanamle talak nirya ara, pia ati aunamle. Aning nirya kum kum danamle. Pia ati aupnamle. Allah ance aning-aning nirya talibuka unalam ning ara, keting tamun pia weik arye unamle. Ninye arye mapu deibikirye, dadeipdanin, banamak ninye babye, ancuk aninye ap, aunamle ning nirya ap, talimince, Weik Deiyoknye unalame. Allah Yahweh ance tenelyam ning ara, asum-asum nirya, pil teleb ubuka, dopnin banamlame. Allah Yahweh, ance “Winipnamsine,” nyabuka nyalina yupu deice arye nyapdeiamsulum yupu ara, pia sirya dakanamle. Tonok ning babye, kum batakalyame. Ara, Allah ance, ‘Wininamne,’ tenelyam ning nirya ara, dipkoprob an tenyamsulum touk, winilyame. Tukwak ninye nirya ap, yuk kam ulul ning nirya ap, Allah ance kwepdeialum ning ayala-yala nirya ati, Allah ance pil dosilyam ning nirya ara, bico tenesimince, pia teleb ubuka melisilyame.
Tonda, anggun ton tenipdelulume! Yatanye birye, ‘Weik bukamuk mutuku ara, mutuku tobuka pouptue,’ teneplyeba, amutuku nirya ara, lulukulul do? Tonda, tukwak mutuku unyaba amu tam, weik ayukumna yo atonun deibukba, atunim abuka ubuk ning nirya babye, yatanye birye, ‘Aning luluknamle,’ teneplye talak ara, adiparyuk lulukulul do? Aning nirya ara, Allah elcuka! Ninye ara, pia kum winiptinge.
Pia minop talak arye, Allah elda diksukumnye, dipkoprob el tonok ulul bukni, sik minop talak ulamik Israel nang ara, elti, moubuka kum bikamik. El yupu moubuka kum taleamika ati, el ap sik ap, epdanuka neika kum ulamik. Atonun ton, el Allah ap, ninye ap elana ati, pil dona deiyok nang, imam-imam nang ton pia kum ulamika ati, sikce kum perelamik. Tonda, Allah arye, ‘Aning ara wininamlume, aning ara kum wininamlume nyapdeiamuk yupu moubuka kum tenelamikce, talebuka bita kum ulamik. Ati, anggun apu yapu ara, talye-talyeuk ulamik.
Ati ara, na an pil melinanye birye, bai ulamle kam do, weik yu kuse do, yuk yu ning do, naryuk aning nirya onune. Ati, anye Goliat bira, talye bai tam, yu ning oltakalamse atonun oploptinye. Elda, Pilistinye anya arye, sik den bam bol kum sekenyak nang ara, talye nang ati ara, elti, oploptinye. Deiyok ara, ani. Ara, elce aning-aning nirya, deice tam ulul Allah, Kam Una Deiyoknye ulirye, Israel sik yin talin nang nirya wiamukce, kalikuka melilule. Bukni, Goliat birye, Allah el ‘Naʼ tenen, ninye ati, malye yupu tanmalce, Israel yin talin nang ati, ‘Obuka, sirya daknamne’ tenen, yanmala ati ara, Allah melipnilaba, anye oploptinye.
Ura, Daud birye, asum sik dam tikilbiyukce, sik dam atikilyanmek nang ati asipdeyuk. “Se, sik Pilistin nang ara, pia teleb ning ton kum wininyake. Allah arye, ‘Aning ara, wininamlume, aning ara, pia kum wininamlume,’ nyapsuk yupu, pia kum kekekirye, Allah arye nyapdeipsuk touk, sik mapu den bam bola deice tam, kum sekenyaka anya arye, Allah dam kum bitinge. Nun ni Allah ara, pia kamuk ululnye binya arye, yata deiyok ati, amalye ning Goliat bira, nun si erenyap Allah ap, elce wipdeiamsuk ninye ap atibuk, ngalukuka nyalirye, malye kibuka, malye yupu nyapsutu do? Aning ara, pia malye ulule,” nyabuk. Nyabukopura, Daud birye atikmok yin telenanye tonok ati, asipdeyuk. “Raja Saul birye, Pilistin nang oplinye biti, yata dengna arepnamle do? Tonda, anye birye, Israel ninye ati, ‘Likʼ tenen, yupu nyamuk ning ara, anye opmalya deice arye, malye nyasulul yupu kilipnamle. Ati, Goliat oplinye doproptu dengna ara, nun ninye deiyoknye, Raja Saul birye, yata ning arepnamle do?” nyabuka asipdeyuk.
“Nun ni koproba Allah, Anda Yahweh arye, minop talak nunti lyepdomsulum talak ara, nun Israel ninye bobuka ninye ap mek ap kum mutuku noutamak boyanamsulume. Aminyan talak ara, nun mal olan nang ona ati, Seir mutuku arye bilum talak ap, Edom mutuku arye bilum talak ap ara, mutuku im sirya, mutuku sirya nirya lulukamuk. Tonda winiplum talak ara, im laka kibukba, mok weik cebuk. Tonda dua weik kunukukba, mok weika arye celamuk.
Aning ara, talye ati kum nyabape. Deiyok ara, yata nang do, yata kam unyak ning yala-yala nirya do? Allah Kam Una Deiyoknye birye, weik uku buk kan-kan noutam arye, el yupu nyapliba, ninye kekebikirye, kam upting do? Kum, ati, nun babye, ‘El yupu ton nyapliba, kekebipyopura, nun ton adiparyuk dibibyakʼ tenen, ilil upmasila ati, nyapkiyabe.
Wini talak tukwak mutuku unyakce, aning-aning nirya, weik talikirye, bona weik talin nang atonun unyak ninye ati, nyanamlyame. “Anggunda maknya kanyeuk, kintinina ap, dina ap, meme. Bona ap, yo bok ap, tukwak bona weik nang nirya ap ara, anang deice anggun kanye delina kume. Aning arye kum lyepsutue. Aning nirya ara, pia unamle ning kume. Yata wiribuka talakuk aupmalya ani, aminyan talak tukwak ning nirya kum danamle. Tukwak ning ara, ‘Yata talak kum danamsil do?’ Nun walwal anya arye, aning ati kanye delina meme. Aning kum bukni, ‘Allah elcuk melipsilirye, lyepnamsil’ tenen, el deiceuk anggun kanye delinamlulume. Nun kanye deibuka, teleb una ati, arisilya deiyoknye bira, Allah elcuk aning-aning nirya weik arye arisulule.” Ayupu nyapnamlyame.
Ura, bol koplobuka pia kam una ara, talye winina kum bukni, ara na areamnulum ninye ap, an ap, ance dopdeipnulumnye Yesus Kristus ap, nun nirya talima dukdongobuka neika una ati nyapne. Aninye nirya arye, nunti diba tenepsikirye, nun bitinye ap, aninye ap, talima dukdongobuka neika ubibya deice arye, pia kam unamake.
Asipdeyuk bukni, Yesus ara yupu tonap tamubuka kum nyabukce, tunim abuk. Winibukopura, ila tonap Allah arena ati, aweik deiyoknye, Kayapas birye, Yesus ati asipdeyuk. “Allah arye dinmasilak unmalama ati, talya yupu nyana kum, dipkoprop ninguk nyapnusilame. ‘Ninye weik lyeplirye, sik kanye talima talinamle’ tenen, Allah arye wipdeiyamuknye, Mesias bira, an aulyam do? Tonda, Pia Teleb Etekdopnye Allah ara, anuk el Mi Koprop ulyam do?” nyabuka asipdeyuk.
Winiplum talak ara, Allah an yalumopura, mutuku-mutuku nirya luluklamukba, amutuku arye elilamik. Tonda, tukwak mutuku balamuk mek ap, laut mekwen ap nirya ara, anti ilil ubukba, mek nirya longteng-longteng abuk. Winilamuk talak ara, mek nirya obuka balamukce, weik lelim nyabuka balamuk. Laut mekwen deice tam ara, anti dilamkukce, mekwen longteng-longteng abuka, mek keit weik arye welebuk.”
Atalak, Allah Yahweh el yupu ara, liman oplirye, lelim lelamle atonun, lelim weik leplirye, el mapu mal olbanuce nang ati, ‘Winiplulume,’ nyabuka, yupu arepnamle. Ninye olbinamak nang ara, yupa pia weik, nukmanto kum upnamaka anya arye, sik anang ara, Allah elce nyaplye touk, ubuka mal olbinamake. Dipkoprop nyapne. Allah Yahweh arye, ‘Yehuda tam ninye malye ulamik ning dekna ati wenepnamne,’ tenebuk sum, akunum uplyopura, tonoknye babye, kum darapdongobuka dakeiyam asa, kum uptinge. Ara, pia kanye imun sum kipnamla ati, nyapsine. Nabi Yoel birye nyabuk.
Winibukba, pia minop talak donirye, Kam Ulamuka ani, Pia Tuba Kam Unamle Deiyoknye, abukmoknye birye, el anye bira, Ninye Mi Atonunye ati, weik mambul ning weik arebuk. Elti arebuk ning ara, ani. Ara, ‘El mikip weik arye, aning-aning nirya talinamle’ tenen, deiyok ning ap, weik dirina ap arebuk. Tonda, ninye im sirya, mutuku sirya nirya ap, aminyan winipnamle ning nirya ap, ‘Elcuk tenelye touk unamle’ tenen, deiyok ning ton arebuk. Tonda, anyarepnya deice arye, ninye ayala-ayala nirya ap, yupu yuk-yuk nyanyak nang nirya ap, tonda im sirya, mutuku sirya nirya unyak ninye nirya arye, ‘El siuk erenamak’ tenen, adeiyok ning ton dobuka, Ninye Mi Atonunye biti arebuk. Tonda, el anye mikip weik arye talinamle ning ap, talibuka pia unamle ning ap nirya ara, ninye yuk nang arye, pia kum kum kipdeipnamake. Elce aning nirya talinamla ara, apia unamle.” Daniel birye nyabuk.
Tonda, ayupu ton nyabuk. “Na taleamsiseba, ninye mutuku-mutuku nirya ululum nang ati, nyapsine. Nun nirya arye, Daniel birye si erelye Allah uka, el si erebibirye unamabe. Elda Kam Una Deiyoknye, pia tuba ulula ati, pia aunamle. Winiplirye, elcuk talisiliba unamabe. Tonda, Allah arye talipnamsil ning ara, pia kum kum danamle. Deiyok ara, Allah ara, mikip weiknye ulula ati, elda kum kum danamle.”
Anyapdeiamuk touk, keting tamun tekbarye akunum mabukopura, Nebukadnesar Allah ati morobukba, el kanye ara, ninye kanye bolamak atonun tamubuka, arebukba doprobuk. Doprobukce, Allah ati morobuk. “Se, na ni Allah, ance teleb kel kin ning arepmanilame. Winipmanilama ati, narye an kam pia unamlamnye, siuk erepkinirye, antibuk kinamkine. Na ni Allah, anda ninye deiyoknye Raja umince, taliplum ning nirya ara, pia kam tuba aupnamle. An babye, pia kam unamlame. Aning nirya ara, pia kume kum danamle,” nyabuka morobuk.
Anggun nirya arye, anyapmasin atonun yupu nyana ara, teleb uka. Bukni, anggun Israel ninye nirya arye, anyapnukin yupu ara, tonap kum nyanamlulume. Ara, ‘Allah Yahweh arye, dotalak winipnamle ning ati, duknuna yupu deice arye, el yupu yanuka nyapdeipmanilba, nyapnusine,’ kum nyanamlulume. Ayupu tuba kum nyanamluma deiyok ara, ani. Ara, sik Israel ninye arye, sikce nyanyak yupu nirya ara, dipkoprop, sik kanye talima noutamak aryuk, teninmace ninguk, yuk ninye kekenak laka nyalbanyake. Anyanyak yupu ara, na Allah Yahweh arye tenebuka, sikti, kum nyalinun bukni, sikcuk talye nyaltakanyake. Ara, yuk nang dam binuka, ‘Allah arye nyaipmanil yupu ani,’ nyabibibuk, ‘Anang arye dib tenepsikirye, ‘Se, anang ara, weik mambul nang unyake,’ tenenamsiyak’ tenen, talye-talye yupu nyalbanyake. Sikcuk tenepmace ninguk, nyanyaka deice arye, na Allah arye nyanun yupu ara, tamubikirye, yaninyake. Ati ara, talye ati kum nyapsine. Ayupu nyanyak nang, sik nong deice ara, weik ikin ning deipnamne. Na Allah arye, pia Kam Una Deiyoknye birye nyapsine. Tonda, nara sik im deice yin talin malaikat nirya, sik weik deiyoknye birye nyapkine. Na Allah Yahweh arye, sik Israel ninye nirya talibuka, deice tam mikip weik ap, weik erena ap ununye birye, an Yeremia biti nyapkine.
Ati nun ni, ance ebuka kel bikinamsilame. Nunce an morona ati, nyapnukiyap yupu nirya ara, ance moubuka kekepnusilyame. Tonda, yata un ning do nirya, nun dam unamsil ning ara, ance eipnulyame. Nun ni Allah anti, Raja Sanherib birye, anda Kam Una Deiyoknye ulyam bukni, elce, ‘Allah ati ara, malye-malye yupu nyapnirye, elti, nalipnamne,’ tenebukce, ninye dopdeibukba, sikce amalye yupu yanuka nyapsike.
Se, nun ni Yesayao, ance Allah moropsilyame! Nun mitik tonun tuba kam unmap nang ati ara, ance, ‘Allah melipsilyame!’ nyabuka moronamlume. Ara, nun walwal bukni, nun kanye ara, an ap, nun ap arye, si erenyap Allah ara, Asyur mutuku talilulnye birye, el amu tam pil dolulnye, Rabseka dopdeibukba, nun dam yanuka, Allah ati malye yupu nyapsuk ning ara, akunum kekebuk do? Anye birye, Pia Kam Ulul Allah, el si Yahweh ati, nalin deice yupu Allah ati malye weik nyabuka anya arye, nunda, ‘Allah arye, Asyur mutuku nang nirya ati, weik tonun wenebuka opnamlarya,’ tenepmabe. Anye Rabseka birye, Allah Yahweh ati, malye yupu nyapmok ning ara, kekepmoka anya arye, ‘Sik Asyur mutuku nang ati wenebuka opnamle,’ tenepmabe. ‘Winiptue,’ tenen, ance Allah ati, nun amutuku unyap nang ati, Allah moronamlume.”
Tonda, winipmanto ara, ance weilyam domba basam ara, nun Israel yala nang, teleb kipdeipsiminyeba, amutuku noutam ara, ‘Nun pia unamap mutuku ara, anyeʼ tenen, akunum ebuka talebupu. Aninguk kum bukni, tonda, Allah ance aning-aning yala-yala nirya, talilyama noutam arye, nun bona talena kum ati, talye kankan nang ulamupu buk, aning nirya patanauk ulamsuk bukni, aning nirya weik areamsulume.
Dipkoprop nyapsine. Tukwak im sirya, mutuku sirya nirya unyak ninye, ayala-ayala nirya, pia weik daunyak bukni, sik nirya ara, mek kwepmakibuk makau pum tam arye, bitik-bitik abuka saklamle atonun unyake. Atonun tonok mek durumna miklamle tuku deice poulbiliba palilamle touk ulule. Tonda tukwak mutuku unyak ninye ayala ninye, ayala ninye nirya buluptingce, weik timbangan deice deiptinga, ara, talye uku sice butbuta atonun uptinge. Sik ikin ara pia kume. Allah el mikip ap, mambul ap ulya ara, pia weik atia. Laut mekwen noutamak ululba, dana-dana tam nirya mekwen arye sekdongobuk mutuku pia kum nukmanto daulul bukni, Allah arye amutuku nirya tuku butbuta atonun bulubuka doptue.
Aning nirya akunum winipnyopura, amutuku noutam unamak ninye ara, ‘Yatanye birye melipsutuba, nun un ning nirya teleb kipdeipsutu do?’ teninamak talak nirya ara, na Allah pia diksukum yupu nyanunye biti moronamniyake. Narye, ‘Wininamne’ nyanun touk, batakna kumce aninguk wininunye biti moronamniyake. Aning atonun, amutuku unamak ninye arye, yuk nang ati, ‘Wininamsiyabe,’ nyabuka nyalin yupu nyanamak talak nirya ara, na Allah pia diksukum yupu nyanunye, na si deice arye nyalin yupu nyanamake. Wininamaka deiyok ara, minop talak malye ululum ning nirya ara, akunum kum kipdeipsinirye, tuba tonap pia kum teninamne. Aning nirya kum kipreipnirye, bataknamne.” Allah arye Israel ninye ati nyabuk.
Winimunce, na Allah si deice arye, “Dipkoprob uk unamabe,” nyapmunce, Nun ni koproba Allah, pia kam ulye touk, elce nyapsilye yupu nirya babye, pia dipkoprob uk ulule. Ati nun babye teleb diksukum una ap, tonda tilila yupu nyana ap, kum nyanamabe,” nyabuka, antonun winipmunyopura, yuk mutuku nirya unyak nang arye, anggunti eibuka biksikceura, sikce nati, “Naio, nun ton melipsilyame,” nyabuka moropnamake. Winibuka morobikceura, na Allah arye sik ayuk mutuku nang ati, melibuka teleb kipdeipnamne. Winipnyeba, sikce nati, na si pia erenamniyake. Allah arye nyabuk.
Aning akunum winipnamne talak ara, sik Babel mutuku nang nirya arye, weik yupu arye ngalukuka, engenamak ning ara, yuk mutuku unyak nang nirya arye, kekenamake. Babel mutuku nang sakikceura, sik yupu weik tonun nyalanamak ning lelim ara, yuk mutuku nang nirya kekepnamake. Tonda, weik yupu deice arye, ngalukuka malye nyanamak ning ara, alelim yuk mutuku nirya unamak nang arye kekenamake. Allah arye ayupu nirya nyabukba, nabi Yeremia birye sekuke.
Dana tam, dana tam yanganamak nang arye, lulukunamle talak ara, Babel mutuku nirya lokukaplirye, dou banamle. Ara, na Allah arye, Babel mutuku noutam malye mutuku kipdeipniba, ninye nirya tunim abuka unamake. Ati, narye tenepse talak, akunum uplyopura, Babel mutuku noutam nirya ara, oldemuk kipnamle. Ninye pia una kum sukum, buta mutuku oldem ulamle touk, upnamle.
“Anggun nirya ara, ‘E, nun ni Allah, kam ululnye bira, dipkoprob nun noutamak tiklirye, bobinamsil’ tenen, kel biknamalume. Tonda, ‘Nun omutuku bibyopura, Allah elce melisilya deice aniryuk, amutuku unyak ninye obuka, sirya daknamabe’ tenen, ‘Kel biknalum’ tenen, nyapne. Ara, sik Kanaan mutuku tam unyak ninye, Het nang ap, Hewi nang ap, Feris nang ap, Girgasi nang ap, Amori nang ap, Yebus nang ap nirya ara, Allah melipsilya deice arye, obuka sirya daknamabe. Tonda, Allah melipsilya deice arye, sik ilil weik upliba, bikbik abuka bindopnamake. ‘Aning biknamlum’ tenen, lak nyalin ning laka nyapnusine,” Yosua birye nyabuk.
Nyabukopura, ayupu ton nyabuk. “Anda pia diba, weiknye ulyame. Tonda anda aning-aning deice tam umince, pia mikip weiknye ulyame. Se, anda dipkoprob mambul weiknye Ulyama anya arye, tukwak nang nirya arye, an si kel bikamikce, ‘Seʼ tenebuka winikinyake. An mikip deice arye, yuk mutuku nang nirya ap, yuk mikip ulul ning nirya ap ati, malye kibuka deice tam ulyame. Anda pia diksukumnye, umince weik ninye deiyoknye erebuka, ulyama anya arye, yuk Raja nang nirya ara, an amu tamuk unyake. Aning ara, talye ati kum nyapkine. Winimince, im tam ulul ning babye, tukwak mutuku noutam ulul ning nirya babye, an ninguk ulule. Anda Yahweh arye aning-aning nirya ap, ninye mutuku sirya im sirya nirya ap, talilyamce, weik deiyoknye ulyame. Sik nirya ara, an amu tam unyak bukni, anda pia deice tamuk umince, aning-aning nirya talilyame. Ati, na ni koproba Allah Yahweh, anda aning-aning nirya ap, yata nang do nirya ati, ancuk ninye deiyoknye kibuka delilyame. Ati na nio, anda mikip weik nirya ara, anuk taliplumce, aning-aning nirya kwepdeiplumce, talibuka ulyamnye biti, teleb nyapkine.
Tonda, nun moubuka tenepnamnyabe. Allah el si Yahweh ululnye bira, Allah tonok ulule. Allah elcuk, nun tukwak mutuku ninye nirya kweipdeipsuk. Kwepdeipsukce, nun nirya ara, Allah el ninguk unyaba ati, elcuk moubuka talisulule. Domba deiyok nang arye, sik domba basam bobuka, mutmuta palamle mutuku, telebak deibikirye, kalikuka dilamak touk, Allah Yahweh arye, nunti, bico tenepsilirye, melibuka kalikisulule.
Anggunda yata ati bita kel kum kilulum do? Anggunda yata ati kum kekeplum do? Anggunda yata ati walwal asa ululum do? Nara Allah, na si Yahweh unune. Nara Kam Pia unune. Minop talak arye dipdongobuka, doryanamle talak ara, pia aunamne. Mutuku sirya ap, im sirya ap, anoutamak mutuku nirya kwepdeipsa deiyoknye bira, na uka. Nara Allah ara mikip kum upniliba dikdik sena ton kumnye unune. Weik mambul pil donun bukni, ikin kum upnutuba, dikdik kum senune. Tonda, narye weik mambul ning nong noutam ning nirya akunum kel kiamse ning nirya ara, talye tukwak ninye nirya arye, pia dipkoprob kum teneptinge. Tonda na kel kipse ning sik ton bita kel kum biktinge.
“Allah aniryuk lyepsilirye, melinamsile. Ikin upsilye ning lyebuka, kanam asa ulisulule. Tonda, ninye arye kum winipmanto ning ap, laka kilin ning ap, pil dosulule. Ara, im deice ap, tukwak mutuku ap nirya, elce ulisulule. Ara, dipkoprob Daniel, singa kuse ulamika pum tam, dobuka dopkwetepsiba, Allah arye melibukba, singa arye, el nong ton dila si kum tobikak, dila kum eipse. Aning ati nyapsine.”
Allah Yahweh, mutuku kon dam yalyopura, mutuku kon lulukdanamle. Tonda, el dam yalyopura, mutuku kon nirya ara, mek atonun upliba, tokna doplirye binamle. Allah Yahweh yangalyopura, mutuku nirya lokukaplirye, lulukdanamle. Winipnamle talak ara, mutuku sirya, im sirya nirya ap, amutuku sirya, im sirya nirya unyak nang nirya ara, ilil upliba, yok sirim talipdanamake.
Piblisite