Tonda, narye Gog el kwang dakna ati, el malye ulamuk ning ati yupu bokdeipnirye, wenepnamna deice arye, kanye imun weik uk dina deiyok ning arepnamne. Tonda ninye weik opdakiba, sik ining weik binamle. Tonda weik lim lumtai mok ap, weik uku buk ap, uku dilamle keil, tong weik nyalamle ning, el si ara belerang ap, na Allah arye dobuka, el Gog ap, el yin talen nang ap, el melinyak nang, yuk-yuk mutuku nang ap, yanuka tikamikirye, el ap neika onamak nang ap, sik deice deipnamne.
Yehezkiel 5:17 - Eipomek17 Anggun kwaning patan li arepnamsin bukni, aninguk kume. Narye lo ton arepnyopura, bai tam kam ulamle ning, yu weik ulamle ning ara, singa kus atonun ning do, yu kam do? Anggun dam yanuka, si topsikirye, olyanganamsiyake. Winipsikcopura, anggun mapu weik obuka dibikiba, anggun mapu kumdanin banamake. Tonda, yuk kanye imun weik ning ton, arepnamsine. Ara, kanye imun uk, yala-yala nirya ap, tonda yuk mutuku yu nang arye, parang ya arye dobuka olyanganamsiyak ning ap, anggun deice dobuka deipsikcopura, anggun Yerusalem mutuku noutam ululum nang ara, opsinirye, sirya daknamsine. Nara anggun ni koproba, Allah Yahweh arye, ayupu ara, akunum nyapmasina anya arye, dipkoprob anyapman touk upnamle. Allah Yahweh arye, nyabuk. Ara Allah arye, ‘Yerusalem mutuku unyak nang arye malye weik ulamika ati, sikti wenepnamneʼ tenen, aminyan talak, sik nong deice kanye imun weik ning delinamle ati, na Yeheskiel dam yanuka lak nyapnuke. Gade chapit la |
Yehezkiel 5:17
28 Referans Kwoze
Ati ara, anda Yeheskiel birye, sik Israel nang ati nyapnamlame. “Na Allah Yahweh, aning-aning nirya talibuka, deice tam erebuka, mikip weik ununye birye nyapsine. Nara Allah, dipkoprob kam pia unune. Aning dip ulamle touk, narye nyapnusin yupu ara, ‘Se, dipkoprob yupu nyapmasileʼ tenen, kekepnululume. Ara, dan mutuku do nirya, pia weik asik ap, mitik asik ap dolamika ara, wini talak oldem mutuku unyak nang nirya ara, yu nang arye olyakirye, opsikiba, dipnamake. Tonda, ninye weikak kum bukni, pera pata mutuku noutam unyak nang nirya ara, bai tam talye kam ulye yu ning dopdeipniba, anggun dam yanuka, anggun nirya obuka dipnamsile. Tonda, mutuku dup bukukak ap, keil deiya pum tam duknulbiyik nang ap nirya ara, narye kanye imun weikuk dina deiyok ning arepnyeba, anang diplyopura, sik nirya dipnamake.
Ura, na Allah arye, sik mutuku imun kanye bona uk areptinyeba, ninye nukmanto kum dipting bukni, aning ara, mitik tonun winiptue. Bukni, ninye ara, yupa pia weik, nukmanto kum dipnamtinga ara, ani. Ara, na Allah Yahweh arye, weik tonun erebuka, aning-aning nirya talibuka, Pia Mikip Weik Deiyoknye ununa ati, narye kanye imun wenen ning, dumbarye dopdeiptinyeura, ninye nukmanto kum diptinge. Ara, pia kanye imun ning ara, Yerusalem mutuku noutam adumbarye wenen ning arepnyeba, amutuku noutam unyak nang ap, sikce weinyak kam ning ap, nirya kum kipdeiptinye. Awenen ning ara, ani. Ara, yuk mutuku yu nang wibuka, sik dam arepnyeba, anggunce Yerusalem mutuku noutam ululum nang ati, adiparyuk olyasitinge. Tonda, weik din patana deice arye, ninye weik diptinge. Tonda, yu weik talye bai tam daulul ning arye, ninye weik ton obuka diptinge. Tonda, imun kanye bobuka, Yerusalem mutuku noutam dobuka, deiptinyeba, ninye weika arye diptinge. Winiptinye deice arye, ninye nukmanto kum ap, kam ulye ning ap, weika arye opnirye, kum kipdeiptinye. Dipkoprob ning ara, sik Yerusalem mutuku noutam tuba unyak nang, malye weik wininyaka ati, sik wenena ati, imun kanye nirya bobuka, sik deice deipnamle!
Winipmanto ning ton nyapnusin. Diba ato mutuku ati ara, na adiparyuk bai tam, yuk kam ning yu weik ning ton, sik si ara binatang buas, dobuka deiptinyeba, ayu weik kam ulul ning ara, yu kam do, yu singa kus do, yuk yala ning do yatingce, amutuku noutam unyak nang nirya, obuka diptinge. Amutuku nang nirya, obuka diptingba, yuk mutuku nang, dana-dana unyak nang, tonoknye babye, amutuku noutam kum binmanto uptingba, amutuku ara, tuba ton teleb kum uptue. Amutuku ara, pia asik oldem uptue.
Bukni, Samaria mutuku wekelyangalamik Asyur tam ninye ara, Allah el mapu koproba kum, yuk mutuku yala ninye daulamika anya arye, Samaria mutuku yayik talak ara, sikce Allah Yahweh ati, kum bikamika ati, el si kum erelamik. Winilamika anya arye, Allah Yahweh elce, talye bai ulamle kus atonun ning ara, yu ning el si ara, singa kus dopdeibukba, Samaria mutuku binuka ulamik ninye bukni, ton nang weik tonun yanuka olamuk.
Winilamunya ani, narye arepneba, wa win dam kipmanto ning kum kiplyopura, sik din pataplya deice arye, sik nong mitang upliba, uk diplya deice arye dibinamake. Tonda, narye arepneba, weik kanye imun uk talilamlye buk, narye batakniba, dibinamake. Tonda, narye arepneba, yuk-yuk ning, bai mutuku unyak ning arye, anang obuka dipnamake. Tonda na arepneba, kel-kel an tuku deice balamle yu kwatima arye, si topliba, ninye weika arye dibinamake.
Na Allah arye, bai tam pia yu ulamle ning, kam ning nirya dobuka deipneba, anggun dam olyanganamsiake. Aning boyakirye, anggun mapu weika tonun, yanuka obuka sirya daknamsiake. Tonda, anggunce talibuka weinamlum ning ayala-yala nirya, yanuka obuka sirya dakanamsiake. Atonun, anggun wisi nang babye onamsiake. Winipsikce bukni, ninye weik dibikcopura, anggun yupa ara, mitik tonunuk unamlume. Ninye weik dibikceba, kum danin bacopura, anggun unamlum mutuku nirya babye, anggun banalun bisik babye, dipdemunyeba, talye louk uplyeba, banmamunce eipmunba, yuk-yuk ning kum dalya arye, amutuku nirya ara, din bulanguk, walang yo uk unalume.
Tonda, narye anggun nong noutam pupsinyopura, na Dib Kanye anggun nong noutam deipsinyopura, isin weksilirye, kam bukdopnamlume. Winipsinirye anggun mutuku koproba uk tamubuka bobisiniba, binamle. Winipsinyopura, anggunce na Allah Yahweh ati dib tenebuka biknamnulume. Ara, se, nun ni Allah Yahweh ara, dipkoprop, ‘Wininamsine,’ nyapsuk touk, akunum wininmasile anya arye, ‘Aminyan talak babye, nun melina ati, pil donamsile’ tenen, biknamnulume.” Allah arye nyabuk.
Narye, nyapniba, Nil mek nirya ara, cepdeipnamne. Winipnyopura, sik din mek ap, sik koulamak ning, mek dikilongon ning ap ara, kum kipnin banamle. Winiplyopura, sik din ning babye, kum kipnin banamle. Nil mek lilun noutam ulul wa tuku nirya ara, yu weik nang dopdeipniba, atuku nirya alubuka dopropnamake. Winipnirye, Mesir mutuku nirya ap, amutuku noutam unyak nang ap ara, malye weik kipdeipnyeba, Mesir mutuku nirya ara, malye weik upnamle. Nara, Allah Yahweh arye, ayupu nyapmasina anya arye, aning nirya ara, dipkoprob nong upnamlarya!
Na Allah arye, anggun mutuku ning nirya, kum kipdeipnirye, bataknamne ning ara, talye keil yo uk beleplirye, tuku dem uplyeba, ikan don nang arye, sik ikan don ning, el si jala ara, akeil deice mikinamake. Amutuku weik asik ara, tonap ton tamubuka, kum dopnamake. Anyapmasin yupu ara, dipkoprob nong upnamle. Aning ara, talye kum nyapsine. Deiyok ara, na Allah, mikip weik ununye birye nyapsine. Tonda, na Allah Yahweh, aning-aning nirya deice tam erebuka, Pia Mikip Weik Deioyoknye birye, akunum nyapmasina ati, aning nirya dipkoprob nong kunupnamle.
Batakyeba, ayupa weik yanganamak nang arye, sik akilapu ati, keil cobuka, akilapu sik nong deice dobuka opnamake. Tonda, ninye on parang ya arye, dobuka seknamake. Tonda, sik abitinye kilapu arye, deiamdik mapu nirya ara, adiparyuk, obuka bataknamake. Tonda, sik domdik aik nirya ara, uku dongopnamake.
Allah arye nyabuk. “Narye sik malye unyak ning nirya ati, akunum wenepnye talak ara, sik mikip una ap, sik taruk mikip una ap ara, tonap kum winipnamsile. Na Allah Yahweh arye, aning-aning nirya deice tam erebuka, Pia Mikip Weik Deiyoknye ununye birye, akunum nyapsin ati, narye anggun wenena ati, aning ara, dipkoprob nong kunupnamle,” nyapsine.
Anggun wenena ati, winipnamsina ati ara, winipmanto ara, winirye kouamuk yo dibuka sirya dakalul touk, ayu weik nang arye, anggunti onauk unamsiyake. Opsiceura, anggun ining ara, anggun mutuku noutamuk saknamle. Obuka, sirya daksikceura, aminyan talak tonoknye babye, anggunti ton tuba kum tenenamsiake. Aning nyapmasin yupu nirya ara, dipkoprob nong upnamlarya. Nara, Allah Yahweh, aning-aning deice tam erebuka, Pia Mikip Weik Deiyoknye birye, ayupu akunum nyapdeipmasina ati, anyapdeiapmasin touk, dipkoprob nong kunupnamle.
Tonda, sik Israel mutuku noutam unyak nang ati, ayupu nyapnulyame. “Na Allah Yahweh ara, wini talak anggun olana atonunye winipnusine. Winipmanto ara, na ninye on parang ya libukadeipse ning ara, kupdopnirye, talibuka malye ninguk, talibuka wininyak nang babye, pia diksukum wininyak nang babye, anggun nirya wenena ati, anggunda, oltaknauk upnamsine.
Ati ara, dan mutuku do nirya, amutuku-amutuku noutam upnamle yo yala-yala nirya arye, nati bikuka tenenamniyake. Ara, dipkoprob nati, sikce, ‘Se, Allah elda, dipkoprob Yahweh aulule,’ tenebikirye, nati moubuka biknamniake. Ati naryuk, weik cang arye pabuka tiknamle yo nirya ara, naryuk webuka, amu tam deipnamne. Tonda, yata yo do nirya, el bumang arye papnamle yo ara, naryuk dopropnirye, cang weik yo kipdeipnamne. Tonda, teleb kibuka tilirye palamle yo ara, sekdobikceba, lyubuka koululamle yo atonun kipdeipnamle. Tonda, naryuk kouamnye yo nirya ara, tuba tamubuka koupneba, teleb kibuka panamle. Ara, talye yupu kum nyapsine. Nara, Allah Yahweh arye, ayupu ara, akunum nyapmasina ara, ayupu yala nirya nyapdeipman ning ara, dipkoprob wininauk upnamne. Ton pia kum bataknamne ati ayupu ara, akunum nyapdeipsine. Allah Yahweh arye nyapdeibukba, Yeheskiel kekebukce, sekdeibuk.
Anye wenebuka opnamne talak ara, narye lo arepyeba, sik Babel mutuku yin talin nang arye, el dam yakirye, el yin talin pia teleb nang babye, yu parang ya arye, opnamake. Ninye weik tam nang ara, opmakcebuk, tuba kam unamak nang ara, bai sakuka bendobikirye, im sirya, mutuku sirya ara, yuk-yukak bindopnamake. Aning nirya akunum winiplyeura, anggun nirya arye, nati biknamnululume. Ara, ‘E diba, nun ni koproba Allah, aning-aning talibuka, deice tam erebuka, pia mikip weiknye birye, ‘Winipnamneʼ',’ nyapsuk touk, akunum upmal atia,’ tenepmunce, moubuka biknamnulume. Ayupu ara, akunum nyapdeipsine.
Aning atonun ton. Winipmanto ara, na Allah arye, yu weik upnilyeba, imun kanye bona ara, amutuku noutam arepnyeba, ninye weik nukmanto kum dipmakcebuk, tuba tamubuka, amutuku noutam, ninye ap, sikce talibuka weinyak kam ning ap nirya ara, diptingba, aning nirya kum kipdeiptinye. Winiptinyeba, sik min talak, pia diksukumuk winilamik nang winilye, Nuh ap, Daniel ap, Ayub ap, amutuku noutam ubtinga babye, sikce yuk nang nirya, pia kum lyepdeiptinge. Tonda, sik mining mapu babye, kum lyepdeiptinge. Akum bukni, sik pia diksukum unyak deice arye, sik nong atibuk lyepdatinge. Dipkoprob ning ara, sik nong atibuk, naryuk lyepdeiptinye. Nara, aning-aning nirya talibuka, Pia Mikip Weik Deiyoknye unune. Tonda, na Kam Pia Una Deiyoknye ununa ati, akunum nyapmasin yupu, ‘Winiptue,’ tenipnyopura, dipkoprob aninguk upnamle!
Anggun anang nirya ara, yu kanye tenepsinirye, anggun deice ikin weik ning deipnamsina deice arye, kel biknamake. Winibikirye, yata nang do nirya, yuk pera mutuku noutam daunyak Israel nang ara, kanye imun weik uk, dinamla deice arye dipnamake. Yerusalem mutuku tuba sik damuk unyak Israel yala nang ara, yuk mutuku yu yin talin nang arye, sik dam yakirye, parang ya bopmaca arye oplopnamake. Sik Israel yala nang bukni, akanye imun ning bitinye deice arye, biknamak bukni, sik kum dipnamak nang arye biknamake. Ara, batakniba, sik tuba kam unamak nang ati, sik mutuku noutam kanye imun weik din patana deice arye, dibinamake. Aning-aning ikin ning nirya ara, na yu weik upnamnila deice arye, sikti wenen ning arepnamne.
Ati ara, narye wenepsiniba, anggun nong nirya ikin deipnamsile Tonda, wenebuka ikin ning deipsiniba, obuka kum kipdeipsiceura, yuk dana-dana tam unyak nang eipsikirye, “Se, sikda dipkoprob malye weik ulamika arye, merekuka Allah arye weneple,” nyapsikirye, nalinamsiyake. Tonda, anggunce, ‘Yo, anggunda malye winin ning, pia weik kum winilamtum toura, Allah arye wenebuka, kum opsutu bukni, malye ululama arye, deiyok ara, anggunca nyabuka nalinamsiyake. Anggun mutuku antanap dongopsikirye, mutuku dana-dana tam nirya unyak nang ara, anggunti ilil pia weik upliba, anggunti, pia malye nyabuka nalipsikirye, yuk-yuk nang ati nyanamake. ‘Anggunda moubuka biklulume! Israel nang malye weik winilamik touk, anggun babye malye upmunyopura, Allah arye, kanye imun weik ning arepnamsile,’ nyabikirye, wenenamake. Sik dana-dana tam unyak nang arye, anggun Yerusalem mutuku ululum nang eipsikirye, anggun dina lik ati, dukna pirinamake.
Na Allah arye nyapne. “Narye sik Israel ninye wenena deiyok ning, dumbarye ning ara, sik nong deice deipnamne. Ara, ninye nirya obuka sirya daknamne ning ara, ani. Sik yu nang arye parang ya dobuka, aninye olanmakcak arye, aninye obikiba, dipnamake. Allah Yahweh arye oplopliba, adipmakce ninye, sik nong ara, kam arye dobuka bobinamake. Kam arye dobuka dabobinuka deiplomikiba, talye lakuka balamak maka ap, talye bai tam kam unyak ning nirya ap yakirye, adipmakce ninye, sik nong yanuka dinamake.
Winipnamlum bukni, sik amutuku unyak ninye ara, tonok keting tamun aryuk kum yakdononamne. Deiyok ara, amutuku noutamak, ninye kum ukceura, bai tam kam unyak ning yuk-yuk ning nirya yakirye, anggun unamlum sukum yanuka langdibikiba, anggunce aning nirya kum optume. Tonda, amutuku noutam, tonok talak aryuk ninye nirya kum ubicopura, pia pata mutuku, ninye kum ulamice sukum atouk, ‘Amutuku nirya tunim apsilyakʼ tenen, sik anang ara, adiparyuk kum yaknamne. Ati ara, amutuku ninye nirya ara, tonok keting tamun deice arye, kum yakdonoknamne. Tonok keting tamun deice arye, ton ninye yakdonoknamne, ton keting tamun deice arye, ton yala ninye yakdonokname.
Dinmasiba, tonok kuda basam tonap yayukba, el urasin ara, bol ekamuk kuda basam unmokba, eipse. Akuda deice bukmoknye, el si ara Ninye Dipna Deiyoknye bukmok. El menekuka banmokba, el aminyan tam meneng dam yanganmok ning ara, akunum diblamice ninye unyak aik talibuka, ulye deiyoknye yanganmok. Ayanganmarik nang bitinye ara, Allah arye, ninye dipna deiyok ning aribukba, doproprik. Ara tukwak mutuku im sirya, mutuku sirya nirya unyak ninye noutamak bukni, anirya dobuka yupa dumbarye wilibuka deiprikirye, yupa winilye batakuka, ‘Tukwak ninye yupa tonok weik arye oplopnamrak’ tenen, dipna deiyok ning aribukba, doproprik. Dipna deiyok ning doproprikce, sik mikip deice arye pil dopricopura, ninye weika arye dipnamak ara, ani. Ton tam nang arye, ton tam nang ati ya ap, yin ap arye pia olanamaka deice arye, ninye weik dibinamake. Tonda din ning aning-aning nirya kum daliba, din patapliba, din dina kum deice arye, ninye weik dibinamake. Tonda, kanye imun uk, weika arye dilamlyani, ninye weik tonap sakdanin balirye, weika arye dibinamake. Ton ning ara, ninye kum unyakak, bai mutuku noutamak kam ulul ning nirya arye, yu weik upliba, ninye weik olyanganamake.
Ati ara, na Allah ati, anggunce kintinibuka deipnamlum din ning nirya ara, anggun wenena ati, kum kipdeipniba, anggun din ning nirya ara, kum daneipnamne. Weik din patana akunum upsilyopura, winipmanto ara, ninye arye mal lubikiba, urup tatce ulamle ning arye, yuk nang el mun luklamak touk, upnamsile. Winipmanto ara, mal doplyopura, ara talye ati kum bukni, dipkoprob anggun oltakana ap, kum kilina ap ati, winipnamsine. Ati ara, anggunce taliplum mutuku nirya ara, bataknirye, anggun din ning kum kipdeipnyopura, dipkoprob kwaning patan ning weik yanamle. Wininamle talak ara, anggun amutuku ululum nang nirya ara, kwaning patana deice arye, ‘Se’ tenena ap, kwaning patana ap, unamlume.
Aning ara, talye ati kum nyapne. Deiyok ara, sik dam ara, kanye imun weik uk ton, dopdeipnamna atia. Tonda, sik mal olan nang ara, dana-dana tam arye yakirye, obikiba, sik ining ara, bisikak uk, sakuka poupnamle. Ninye ara, mal olan ning ara, pia yu weik ya arye, obikceba, ninye weik tonun, sik weik asik noutam dipnamake. Aning nirya winipnamne deice arye, nara Allah Yahweh, na mikip deice aryuk, ninye mutuku sirya, im sirya nirya, sik weik deiyoknye unune. Aning ara, sikce biknamake.
Piblisite