Yehezkiel 47:8 - Eipomek

⁸ Eipseura, malaikat birye nyapnuk. “Amek ara, pu dobuka, keting panalyangan tam mutuku balule. Ara, amutuku noutam arye deiyok koubukce, outam ara, mutuku si Araba mutuku biyuke. Ara, Yordan mek koubuka, otam arye, atam ara, weik asik Yerusalem mutuku domik sukum ubuk. Anoutam arye, amek kebuka balamukce, Yordan mek dukdongamukce, karin sukum outam (arah selatan) ara, weik laut mek, el si Laut Mati, akunum min arye deibuk mek damuk balamukak eipse. Ura, aminyan min arye deibuk laut mek, Laut Mati noutam akunum balamuk ning ara, amek Laut Mati mek deiamukak, yu min-min nyalamuk ning ara, tonap tamubuka, teleb mek kipdeipnamlarya,” nyapnuk.

Yehezkiel 47:8 Referans Kwoze

Yosua 3:16

Winibukopura, mek deice yaribuka balamuk ning ara, baprongobukba, itam arye yangalamuk mek ara, eitam mutuku kilbiyuk. Mutuku si Adam bukni, ton mutuku si ara, Sartan mutuku dam ara, pia cang weik tonun tikukabukce, asukumuk tunim abuk. Winibukura, ton ning ara, utam mek ara, mekwen si ara, Garam Laut mekwen dam balamuk mek ara, bokukabukce, outam kilon, eitam kilon kibuk. Amek nirya ceprobukba, Israel nang nirya, amek balamuk bisik bukni, mikdopmok deice uk, keting yangan tam arye, Yordan mek koubuka, otam keting wekelbalamle tam, Yeriko mutuku tam biyik.

Ulangan 3:17

Sik mutuku ara, Araba tam ton nyalamik ning arepse. Ara, weik laut mekwen el si Laut Mati outam mutuku (ara selatan) uamuk. Amutuku wilinak pia eitam, deice tam ara, Laut Mati keting kumulban tam uamukak, anyapce dipdongobuka, binamuka ani, deice tam ara (ara utara), Yordan mek dara tam yangalirye, Laut Mati wekelule. Tonda, anyapce ubuka, keting panalyangan tam ara, weik mutuku dup, el si Pisga mutuku bukamuk, tonda amutuku uk bukni, el si ati Nebo mutuku ton nyalamik mutuku bukamuk. Asukum bukni, utamna (ara selatan) uamuk mutuku, atam nirya dipdongobuka balamuka ani, Laut Mati dara tam, anyaba ubuka, outam ton (ara selatan) uamuk mutuku nirya ara, aning ton bokuka arepsiba doprobik.

Ulangan 4:49

Tonda, sik Israel nang arye talibuka ulamik mutuku bukni, Yordan mek koubuka, otam keting panalyangan tam nirya ap, anyapce dipdongobuka, outam (arah selatan) tam ara, weik laut mekwen deiamukak, el si Laut Mati, asukum arye dipdongobuka, otam keting panalyangan tam ton, Pisga mutuku dana-dana arye yanuka, dipdongamuk mutuku biyikce, amutuku nirya talibuka ulamik.

Yesaya 43:20

Narye mek kumak ati, ninye kum unyak mutuku, pata mutuku noutam mek kintinibuka delinune. Tonda mek kumce talye bukamlye mutuku noutam ara, mek arepneba, mek kutukuka balule. Amambul pil donuna ara, ‘Na wipdeiamse ninye, Israel ninye, ‘Naʼ tenen, ninye unamak,’ tenelamse ninye arye, ‘Amek dibuka, teleb ulamikirye, na si erebuka, nati si erenamniyak’ tenen, wininune. Wininuna ati, ninye arye talibuka kum weilamak ning, bai tam talye ulul ning ayala-ayala nirya ap, bai kam ap, bai ulamlirye lukunyan noutam balamle kupmana obuka dilul maka ap arye, nati si ereninyake. Amek balyopura, na wiamse ninye ati arepneba, dinamake.

Yesaya 35:7

Mek wenenga tuku uk wamliba keting deiplirye, keting tin weik ting-ting alamlak nirya ara, Allah arye mok arepliba mek uk deipnamle. Mok cena kumce tuku kel-kel abuka kat uamlye tuku nirya ara, Allah arye mek arepliba mek pu dobuka banamle. Mok cena kumce, pata mutuku noutamak ara, talye bai kam balamuk bukni, aminyan talak ara, Allah arye mok arepliba, lye atonun ning ser lye weik panamle.

Maleaki 1:11

Anggun Israel ninye arye, na si ati, ‘Elda mambul kume,’ tenenululum bukni, yuk pera mutuku ninye, im sirya, mutuku sirya nirya unyak ninye arye, natibuk ‘Se, Allah ara, mambul weiknye’ tenen, sikce nati si pia erekirye, nati kininyake. Ara, beren tam talak arye dipdongobuka, lukunyan noutamak babye, nati kibuka si ereninanyake. Wininyaka ara, dan mutuku do nirya, ninye mutuku-mutuku nirya arye, na si erena ati, nintong teleb ning, uku dongobikirye, si erenyake. Tonda, sik malye winin ning kilina ati, kam ning pia teleb ninguk, obuka arelyanganinyake. Na Allah Yahweh aning-aning nirya talibuka, im deice yin talin malaikat, sik deiyok ununye birye nyapsine.

Yeremia 31:9

Sik bisik yanganamak talak ara, pia teleb ubuka melipniba, kanye deibuka engepnin yanamake. Pin-pin kanye bobuka, engepnin yanamak talak ara, narye sikti, melipnirye, lyu teleb bisikuk bobuka yanamne. Winipniba, sik yan dum keil kum duknamle bisikuk yanganamake. Tonda, pia teleb mek weik ubukakuk boyanamne. Winipniba, Israel ninye ara, teleb kibuka yanganamake. Ara, urdem ati kume. Nara, sik ni koprop Allah ununa anya arye, Israel yala ninye ati ara, ‘Na mapu koprop,’ tenenune. Tonda, Efraim yala ninye ati ara, narye, ‘Sikda, na minop talak deipse mi atonun, weik mambul mi ululume,’ tenesunune. Ati, na mapu du nang atonun unamake. Allah arye nyabuk. Nyabukba, Yeremia birye nyabuk.

Yesaya 35:1

Ura mok cena kum pia pata mutuku ap, tuku kel-kel alamle mutuku noutamak ulamikce ninye ara, kanye deibuka pin-pin asa arye unamake. Amutuku ara ket-keta on ning weik onamle.

Matius 13:15

Sik awininamaka ara, talya ati kume. Sik kanye talima pum tam lik upliba, ‘Kekena nun lik’ tenen, akunum batakanyake. Wininyaka anya arye, aninye ara na yupu ‘Lik’ tenen, mitik anunuk kekenyake. Sik talima pum tam lik upliba, ninye asing arye bita kum elilamak atouk akunum wininyake.’ ‘Aning-aning nirya kum winilamtingopura, asing arye teleb kibuka eipnamtinge, tonda amul arye teleb ubuka kekenamtinge. Sik kanye talima ayupu nong noutamak ‘Deiyok ning ara, anye’ tenen, teleb ubuka kel biknamtinge. Sik kanye talima teleb ubuka kel biklamtingtoura, sik malye wininyak ning batakuka, balye tamubuka, na tam kipnitingba, narye sikti, teleb kipdeiptinye.’ (Yesaya 6:9-10) “Yesaya birye nyalamuk touk anang ara, wininyake nyapsine.” Yesus arye el mapu ati nyabuk.

Yesaya 49:9

Ninye wenebuka dongolamak aik bunyak nang ara, lopdeipnirye, ‘Bai tam bilulume,’ nyapniba binamake. Tonda kunuknak unyak ninye ara, dirin dam dobuka deipnamne. Winipnirye sik aninye ara, dobuka yo pata mutuku aning-aning nirya teleb kibuka pana kum mutuku deipniba, unamak bukni, sik unamakak nirya ara, din ton pia kum patapnamle. Auna uk upnamle. Sik weinyak ning babye, bisik lilunak palamle maning ap, mutuku kon palamle maning ap, talye lukparabuka dinamake.

Keluaran 15:25

Malye nyanmekopura, Musa birye ikin kanye bobuka, engebukce Allah el si Yahweh ati morobukba, Yahweh arye Musa biti, yo kama tonok lake kipdeibukce, arebuk. Ayo arebukce nyabuk. “An boplum yo, mekwen pum bisik dongobuka dopropminyopura, amek ara teleb upnule.” Nyabukura, Musa ayo dobuka, amek noutamak dongobukba, amek ara pia teleb kibuk. Winibukba, sik nirya amek dibik. Dibikura, atalak ara Allah el si Yahweh arye sik winipra banamik ning ati, ikin yupu nyapdeibuk. Ara, ‘Winipnamlume’ nyapdeibuk yupu atia. Tonda, Yahweh arye aninye ati asilen yupu ton arebuk.

Yesaya 35:6

Kum binmanto wamliba, tonokak uk bulamikce ninye ara, kanye deibukabikirye rusa basam im kurukuka balamak touk wininamake. Luba danamliba yupu kum talamice ninye ara, kanye deibuka mot senamake. Winibikirye, pin-pin kanye bobuka ubikirye, mot senamak ning ara, urdem ati kume. Ara, mok cena kumce, pata mutuku noutamak, Allah arye mek arepliba, mek oplirye banamle. Ninye una kumak babye, mek pu dobuka banamle.

Yohanes 5:4

Amekwen damuk anyuk ninye, sikuk din ninye malilyangalamik deiyok ara aubuk. Ara, asum ton, asum ton Allah el im deice pil don nang, malaikat arye, amekwen deice yanuka mek bol pipmanbuk, amekwen lulukuka lonting-lonting anopura, minopce amek kwen wekelbinanye bira, minopce kwetepdeipnaba, adiparyuk teleb kilamuk. Yata yalauk do nirya, amekwen minopce wekelbinanye bira, eluk dilamuk ning, adiparyuk kum danalamuk.