Yehezkiel 47:14 - Eipomek

¹⁴ Aning ati ara, na dipkoprob Allah, na si deice arye nyapsine. Ara minop talak, na nyalin yupu deice arye, akunum nyapdeipsise. Ara, narye anggun apu yapu nang ati, ‘Amutuku tuku noutam ara, boknirye dobuka arepnamsine. Arepsinyeura, anggun ap, anggunce deipmunyakarye, dadeipdanin, binamak nang nirya ara, atuku doprobikirye, daunamnyake nyabuka, nyalin yupu deice arye nyapsise. Aning ati ara, atuku ara, ance dopropnulyame. Tonda, dipkoprob teleb kibuka bokmunce, anggun neika ululum nang ati, arepnalume.

Yehezkiel 47:14 Referans Kwoze

Kejadian 12:7

Abram bira More mutuku biyukba, Allah el si Yahweh arye, Abram dam yanuka tikukce, ayupu nyabuk. “Abram, ance deipminyeba, dadeipdanin balamica ani, dadeipdanin binamak mapu ati, amutuku nirya arepnamne,” nyabuk. Amutuku ara, Allah arye, Abram dam yanuka tikukce, ayupu nyabuka ati, Abram birye, Allah el si Yahweh ati, el si erena ap, el arena ap ati, pala keil dobukabukce, keil yangapdeibuk.

Yehezkiel 48:29

Na Allah Yahweh, aning-aning nirya talibuka, deice tam erebuka, mikip weik ununye birye nyapsine. Aning lak nyapmasin touk, amutuku tuku noutam nirya ara, anggun adiparyuk, Israel ninye yala-yala nirya unyak nang ara, sik talibuka unamakak ati, amutuku tuku yuk-yuk bokdeipmunce, arepmunyopura, Israel yala nang arye, atuku pia ati talinamake. Sik yala yuk-yuk aunyak touk, bokuka arepmunyeba, asukumuk unamnyake.

Yehezkiel 20:42

Tonda, min talak, narye anggun apu yapu nang ati, nyalin yupu deice arye, “Pia teleb mutuku arepnamsine,” nyabuka, nyalin yupu deice kintinyamsise mutuku noutam, akunum boyanuka bulup deipsinyeura, anggun Israel yala ululum nang nirya arye, nati biknamnulume. Ara, ‘Se, nun ni Allah, elda dipkoprob Yahweh ulule,’ tenen, biknamnulume.

Yehezkiel 20:28

Ara, narye sik anang ati, “Narye anggun dobuka, pia teleb mutuku bobinamsine,” nyabuka, nyalin yupu deice arye nyapdeiamse mutuku noutam bobinamse. Amutuku noutam arye bobinuka deipsopura, sikce, ‘Naʼ tenen, kumce, amutuku noutam arye dilamikak, weik cang mutuku kon bukamukak eibikce, adiparyuk isa si erena ati, kam ning obuka, arelbalamikak, eipseura, yu weik ulamnukba, ‘Na pia lik,’ tenyamse. Tonda, atonun, yata yala tikamuk yo do nirya, taruk ap, pia weik tonun uamuk yo eibikopura, sik adiparyuk amutuku dam kam ning obuka, beyanarye uku dongobuka, isa si erelamik. Tonda, atalye si erena ati, siltong teleb ning ton dobuka, uku dongolamikce, isa ati morolamikce, ‘Nun arenamap ning ati, weik arye kanye deipnamsilʼ tenen, anggur duk purubuka kintinibik mek dobuka, aning deice dikiltaklamik.

Amsal 16:33

Ton nang ara, ‘Aminyan unamap ning tenena ati ara, aning wininamap do, aning batakuka yuk ning wininamap do?’ tenen, lak kilin ning, el si ara, undi deice arye winildenyake. Bukni, dipkoprob upnamle ning nirya ara, Allah Yahweh elcuk, ‘Wininamake,’ tenebuka kintinip deiamuk ning tonok ara, dipkoprob unamle.

Ulangan 1:8

“Teneipdelulume. Amutuku-amutuku nirya ara, narye akunum arepmasina ati nyapsine. Allah, na si Yahweh arye anggun apu yapu Abraham ap, Isak ap, Yakub ap ati, ‘Aminyan talak, amutuku nirya arepnamsine,’ nyapdeipsa ati nyapne. Tonda, nyapse. ‘Anggunce deipmunba, anggun mapu arye, dadeipdanin balamica ani, aminyan deipnamak mapu ati, amutuku nirya arepnamsine,’ nyapdeipse. Ati, narye, ‘Anggunda amutuku binuka unamlulume,’ nyapdeipse mutuku uk, wini talak anggun bimunce, talibuka unamlulume,” nyapsine. Allah arye, Musa biti nyabukba, Musa birye Israel ninye ati, laka nyabuk.

Bilangan 14:30

Bukni, Yefune el mi Kalep ap, tonda Nun el mi Yosua ap, sik uk ara, Kanaan mutuku birikirye eipnamdake. Na taruk erepsirye, sik apu yapu ati, ‘Teleb mutuku arepneba, anggun talibuka unamlume,’ nyabuka nyalamse mutuku ara, abitinye nang sik ap, binuka weknamak bukni, sik yuk Israel kili sal nirya ara, Kanaan mutuku kum weknamake. Sik nirya ara, dipnamake.

Bilangan 14:16

Ara, “Allah el si Yahweh arye Israel kili sal ati, ‘Dipkoprop teleb mutuku arepnamsine,’ nyabuka, nyalin yupu deice nyalilamuk bukni, el mikip kum upmanto kibuka ati, Israel kili sal dobuka boyanmanto kum ubukba, pata mutuku ninye una kumak arye, aninye nirya talye oplobuke.” ‘Winibuka nyapsicak’ tenen ati, na nio, ance sik Israel ninye ona meme. Musa arye Allah ati, nyabuka morobuk.

Kejadian 28:13

Tonda, ayo moromna lilun tam ara, Allah el si Yahweh arye, ei tikukce, nyabuk. Nara, an apu koproba Abraham ap, an ni koproba Isak ap arye, na si erenurudaknye, Allah, na si Yahweh aunune. Anda amapmalam sukum arye, otam nirya arepnamkine. Tonda, ance deipminba, dadeipdanin banamak nang babye, atuku talipnamake.

Kejadian 26:3

Ati, Gerar mutuku, asukum unmalamakuk, mitik anun ton tuba unamalyame. Narye melipkinya deice arye, telebuk unalame. Deiyok ara, narye an ni koproba Abraham biti, ‘Dipkoprop winipnamkine,’ nyabuka, nyalin yupu nyapdeipse touk, dipkoprob winipnamne. Ara, an ap, ance deipminyeba, dadeipdanin balamica ani, dortalak nirya unamak ninye ati, mutuku-mutuku nirya arepnamsine.

Kejadian 17:8

Ati, pia dipkoprob nyapkine. “Kanaan mutuku nirya ara, narye arepneba, ance deipminyeba, dadeipdanin banamak nang ara, amutuku pia talinamake. Narye anti, arekinye touk, arepneba sik aminyan talak unamak ninye babye talinamake.” Allah arye, Abram biti nyabuk.

Kejadian 15:7

Abram biti teleb kipdeibukopura, Allah el si Yahweh arye, ayupu ton dukdongopbuka nyapdeibuk. “Nara, an Weik Deiyoknye ukunune. Sik Kaldea ninye ulamik mutuku arye, Ur-Kasdim mutuku noutamak arye dobuka, wini talak ulyam mutuku boyakuknye bira, yuknye kume. Ara, na uka. Wini talak uminye mutuku ara, ‘Amutuku arepneba, talinamle’ tenyamkisa ati, Ur-kasdim mutuku noutamak arye, dobuka amutuku noutamak boyanuka deipkise.” Allah arye, Abram biti nyabuk.

Kejadian 13:15

Anyaka arye, eipmalam mutuku nirya ara, an ap, ance deipminyeba, dadeipdanin banamak nang nirya ap ati, arepnamsine. Arepsiniba, amutuku anggun pia talinamlume.

Yehezkiel 36:12

Na mapu koproba Israel ninye, ayala-ayala nirya ara, anggunda anggun minop talak ulamlum mutuku, ila tuba tamubuka bobinamsine. Winipsinyopura, anggunce amutuku noutamakuk, talibuka unamlume. Unamlum talak noutamak nirya ara, anggunce delinamlum mapu nirya babye, din patana deice arye, ton pia kum dibinamake. Tonda, yuk mutuku ninye arye, anggun mapu kum onamake. Amutuku arepsinyopura, pia telebuk ubuka unamlume.

Keluaran 6:8

Tonda, na taruk erepsirye, Abraham ap, Isak ap, Yakub ati, ‘Amutuku dipkoprob arepnamsine,’ nyabuka nyalin yupu mikip deice arye nyapdeiamse ning ara, anggun Israel nang nirya dobuka, amutuku bobinamsine. Winipnirye, amutuku nirya arepsinyeba, anggun mutuku pia upnamlume. Angguncuk, amutuku nirya talinaluma ati, anggun ninguk pia aunamle. Deiyok ara, na anggun ni koproba Allah Yahweh unirye, ayupu nyapmasina ati, dipkoprob nong upnamle.” Allah el si Yahweh arye, Musa biti nyabuk.