Tonda, anggun Israel nang kan-kan bukni, ninye asik nang tikilyayikba, anggun ap neika ululum nang arye, weinamak kam ning, domba basam ato ning nirya babye, bol malye ning bobuka, anggun Israel nang ati arebikcopura, aning ara, bol malye wamlula ati, na Allah Yahweh ati, pia kum arenamnulume. Ninye asik nang, yuk mutuku nang arye talibuka, weilamice domba ato ning babye, bol malye uplye ning ara, na Allah si erena ati, mesba deice uku kum dongonamlume. “Aning ara, malye ning,” nyabuka, laka nyapmasin ato ning, bol malye ning dobuka, na si erebuka kina ati arepmunya babye, na Allah Yahweh arye, na kanye deibuka kum dolonamne. Bol malye ning arepnumunye deice arye, anggun malye ning kum kilipnamsine. Teleb ninguk talye arenamnulume. Allah arye Musa biti, ayupu nirya nyabukce, yupu ton dukdongobuka, ayupu ton nyabuk.
Yehezkiel 44:7 - Eipomek7 Sik anang ara, malye winin ning, pia weik wininyaka deice arye, na si eren aik pia malye weik kililanyake. Na si erena ap, na si erebuka kina ap ati, sikce domba basam opnarye, abasam el meta ap, ining ap tuba arepnulum bukni, anggunce apia malye-malye weik ululuma deice arye, aning nirya, pia malye kililulume. Tonda, sik Israel yala nang arye, yuk yala nang, talye-talye daunyak nang ara, sik den bama mouse kum sekenyak bukni, sikce, ‘Kume, Allah el si eren aik dam talye mangkau asa wektume,’ nyaluluma deice arye, pia malye ululume. Aning atouk, anang ara, yuk mutuku ninye asik nang unyakce, narye, ‘Aning ara, wininamlume, aning ara, pia kum wininamlume,’ nyapdeiamsise yupu ati, diba kum tenebikirye, yanininyake. Tonda, na siuk kum ereninyaka ati, na dam pia kum yanmanto nang unyake. Sikda, den bama mouse kum sekikirye, sik kanye talima ap, sik nong nirya ara, malye tuba unyaka ati, na dam kum yatinge. Ati, sik Israel nang arye, na si erena ati, kam ning nirya obuka, ining ap, meta ap dobuka, nati arelyanganinyak talak ara, sik aninye asik nang ap ansinipmunce, na si eren aik dam kum yatume. Amalye ning weik winimunya deice arye, na si eren aik, pia malye kipdeipnuluma deice arye, na pia like unulule. Narye sik Israel nang ati, ‘Aninguk wininamlume, aning ara, pia kum wininamlume. Winipmunyopura, naryuk, winibuka kaliksinirye, pia melinamsine,’ nyabuka, nyalin yupu deice arye nyapdeiamsise ning nirya ara, anggunce akunum yaniltanauk ululume. Gade chapit la |
Yehezkiel 44:7
38 Referans Kwoze
Tonda, narye, ‘Winina kume,’ nyapdeisise bukni, anggun amul dam kisok potong akunum koplirye, Mesir mutuku ap, Yudea mutuku ap, Edom mutuku ap, Amon mutuku yala nang ap, Moab mutuku noutam ululum nang ap ati, nyapsine. Tonda, anggun mek kum ati, ninye kum unyak mutuku bukni, pala weik pata mutuku noutam ululum nang arye, ‘Nun isa mer arye, kanye deipsiting’ tenen, anggun amul deice tam, kisok potong kolulum nang babye, anggun Israel nang yala nirya, amutuku noutam nirya ululum nang babye, anggun nirya ati, weik tonun wenepnamsine. Deiyok ara, anggunce, ‘Yuk nang arye nunti, ‘Allah el mapu koproba unyake, tenenansiak’ tenen, anggun mapu den bol mouse ning sekelulum bukni, dipkoprob anggun talima noutam ara, malye winin ning pia tuba upsuka ati, nyapsine. Aning atonun, anggun Israel yala nang nirya babye, anggun mapu den bol mouse ning sekelulum bukni, dipkoprob anggun talima noutam ara, malye winin ning pia tuba aupsukba, malye ululume. Anggun nirya ati, wenepnamsinarya, nyapsine.” Allah arye nyabuk.
Ati ara, na Allah Yahweh arye nyapsine. Nara, aning-aning nirya talibuka, deice tam erebuka, mikip weik deiyoknye birye nyapsine. Anggun Israel nang umumnya kan-kan noutam ara, yuk mutuku ninye asik nang, yuk-yuk nang weik ton, anggun ap ansinibuka unyak bukni, ato nang ara, na si erena ati, pil pia kum doptinge. Tonda, na si eren aik dam ara, pia kum yatinge. Deiyok ara, na Allah ati, diba kum teneninyakce, na yupu moubuka kekebikirye, kum talinyak nang ati, sik kanye talima ap, sik nong ap ara, malyeuk tuba unyake. Sikda, yuk mutuku ninye asik nang ara, den bama mouse sekna kum nang unyaka ati, na dam pia kum yantinge. Ati, na si eren aik dam ap, anyaik pum tam ap ara, pia kum wekelyanganamake. Na pia teleb lek aik, na si eren aik ara, pia kum wekmanto nang unyaka atia. Allah Yahweh arye, na Yeheskiel biti, ayupu nirya nyapnuke.
Anggunce na anggun ni koproba Allah dam, nyalin yupu nyapdeiamuk ning moubuka talipnamlume. Tonda se, sik Yehuda yala nang ap, Yerusalem mutuku ululum nang ati, ayupu nyapsine. Anggunce, ‘Nara Allah el ninguk wininune,’ tenenamlume. Aning kum winipmunyopura, na yu, uku buk dilamle touk unilye ning ara, anggun deice deipnamsine. Winipsinyeba, uku buk dilamle touk unamle ning ara, ninye yuk nang arye, tangapmanto kum upnamake. Winipnamak ning nirya ara, anggun malye un deice aryuk, ikin anggun dam yanganamsile.
Tonda, anggun ap, anggun apu yapu nang ap, punun deiyok nang ap, malye weik winilamlumba, narye min talak ulamik nang ap, anggun wini talak ululum nang nirya ap, anggun wenena ati, lo arepsinyeba, yuk pera mutuku yu nang arye, malye kipsikirye, dobuka yuk pera mutuku delilbinamsiake. Winilamsikiba, sik mal olan nang ulamik mutuku ak daulamik. Winilamika ati, anggun apu yapu nirya ati, sikce deiamikba, dadeipdanin banamak nang nirya ara, atonun malye winina ap, na yupu malye kina ap, aninguk winilamik. Yuk pera mutuku ak daulamikce buk, aminyan talak ara, anang arye sik malye winilamik ning ap, na Allah arye nyapdeiamse yupu yanibuka, mandipna kanye bobuka ulamikce ning nirya ap, tamubuka tenebikirye, ‘Se, nunda dipkoprob malye winilamupu,’ tenebikirye, ‘Winida diksukum kibuka, wininamapʼ tenebikirye, ‘Winida moubuka unamapcaʼ tenen, na si erebikceura, narye ton, tamubuka tenenamsine.
Talibikce yupu weik arye nyanmek. “Anango, anggun Yahudi yala nang nirya melipsululume! Anye bira nun Yahudi yala nang ap, Allah arye, ‘Wininamlulume, aning kum wininamlulume,’ nyapdeibukura, Musa arye sekeiyamsuk yupu, mem yupu ap, ton anyaik, nun Allah el si erenyapce elti, kam ning obuka arinyap aik ati, anye Paulus birye, ‘Anirya ara, malye,’ nyabuka peterelya deice arye yanilule. Tonda, Yahudi yala kum ninye, Yunani ninye dobuka, nun Allah si erenyap aik dam delilyasuk deice arye, nun Allah si erena ati wibuka deibupu aik, ateleb aik ara, malye kipdeipsuke.” Nyabikce yupu weik tonun nyanmek.
Stefanus arye, Yesaya sekamuk yupu nyabukopura, ayupu tonap nyabuk. Anggun mandipna weik ninye ululume. Anggun talima ap, anggun amul ap, Allah arye nyasilye yupu pia kum kekelulum ninye ululumade! Anggun apu yapu ulamik touk anggun babye, winilulume. Ara, Allah Dib Kanye arye nyasulul bukni, anggun kum kekebuka dolomunyak arye yanilulume.
Ura, anggun apu yapu Mesir mutuku noutamak ikin ulamikba, narye anggun taruk talibuka yuk mutuku bobinamsise talak nyapsise yupu atonun, kum unamle. Kume. Anggun apu yapu arye, na nyalilamsise yupu yanilamikce, bataklamnikba, anggunti narye urasin tamubuka, bataksise. Ati, minop talak nyalilamsise yupu atonun, aminyan talak kum nyalinamsine. Winiryuk nyalin yupu nyalinamsine. Na Allah Yahweh arye dipkoprop nyapsine.
Narye nyapsine. “Anggunce na si eren ati, kam un ning opmunce, aning bobuka, na arena ati, na si eren aik dam keil yangapdeiplumak, adeice uku dalulum bukni, yata deiyok ati, kam un ning malye ninguk bobuka, na dam boyangamunce, nati arenululum do? Winimunya deice arye, na si ati malye nyanumunce, yaninululume. Bukni, anggunce nati, asinululume. “Ara yata wininyaba deice arye, ‘Allah elda mambulnye kume,’ tenebuka an si ati yanikinyap do?” nyabuka asinululume. Narye tamubuka nyapsine. Kume, ara minop talak arye, narye anggunti, ‘Kam un ning pia teleb ninguk arenamnululume,’ nyapdeiamsise bukni, anggunce kam un ning, nong malye ninguk bobuka, na si eren ati kintinip deibik sukumuk boyanganululume. Winimunya deice arye, na si yaninumunce, ‘E, Allah el ap, el arena ati keil lelepdeibupu sukum ap ara, mambul kume,’ tenemunce, malye ululume, nyapsine.” Allah arye nyabuk.
Tonda, Israel mutuku noutam talibuka, na si eren pil donyak imam nang arye, “Aning wininamlume, aning ara, pia kum wininamlume,” nyapdeiamse ning ara, sikce moubuka kum talinyake. Narye nyapdeiamse yupu atonun, kum peterenyak bukni, aning yaniplobuka, yuk ninguk peterenyake. Tonda, na si eren aik pum tam noutam una ati, ‘Aning ara, ‘Naʼ tenen, ningʼ tenen, wipdeiamse teleb ning nirya ara, malye kilinyake. Sik imam nang arye, ‘Aning ara malye ning, aning ara teleb ning,’ nyabuka, teleb kibuka lakak arye, kum peterenyake. Tonda, yuk-yuk wibuka kum delinyake. Tonda sik anang arye, Israel nang anggunti, ‘Allah el kanye ara, awinin ning ara, malye kilisulul, bukni, aning winina ara, teleb kililsulu,’ nyabuka kum peterenyaka ati, sik Israel nang ara, walwaluk unyake. Tonda, sik imam nang arye, ‘Asum ara, Allah el si eren sum, Sabat sum akunum yanmasila ati, talye pil kum dopnuyabe. Dikdik sebuka, Allah atibuk tenenamabe,ʼ moubuka kum tenenyakce batakanyake. Wininyaka deice arye, sik anang ap, sik daunyak Israel yala nang nirya babye, na Allah ati, si kum ereninyake. Tonda, malye kininyake.
Israel yala nang ara, sikce memebuka deiamikce, talilamik urasin pia teleb kwerya ara, cicin do, gelang do, permata do, aning nirya ati, sikce, ‘Se, aning nirya ara, urasin pia teleb ning ululule,’ tenelamik. Tonda, ato ning boyanuka, talye ning bukni, sikce, ‘Nun ni bira aniʼ tenen, isa si erena ati, urasin teleb ning ton, memebuka delilamik. Winilamik bukni, na Allah arye, ‘Aning ap, aning dobuka malye ning, sikce puturubuka delinyak ning nirya ap ara, na pia like,’ tenenune. Ati ara, na Allah arye, aning sik talinyak urasin teleb ning emas ap, perak ap ati, ‘Aning nirya ara, na pia like,’ tenenune. Aning talinyaka ara, na dam ton boyakirye, nati telebe nyabuka, na si kum ereninyak diparyuk, nati ton kanye kum delininyake.
Bukni, narye minop talak, sik deiyok nang, Mesir mutuku ulamikba, melibuka boyangalamse talak ara, nyalina yupu nyapdeiamse atonun yupu, aminyan talak kum nyapnamsine. Nyalina yupu winiryuk ning, anggun dam nyapnamsin ning ara, el nong yuk upnamle. Minop talak ara, anggun deiyok nang ati, nara anggun akanye atonun ulamsirye, ‘Wininamlume, aning ara kum wininamlume,’ nyabuka, nyalin yupu nyalyangalamse. Bukni, atalak ulamik ninye arye, na nyalilamse yupu ara, kum kekelamnik. Sikce nati, batakamnik. Winipmanto ara, kilapu sik akanye yapu ati, deiyok kum upmalye babye, batakanyak touk, Israel ninye arye, sik akanye atonunye, na unun bukni, sikce nati bataknike.
Ura, min talak anggun apu yapu arye, na nyapdeiamse yupu moubuka kum taleamikce, malye kanye doubuka, malye-malye winilamik touk, sik asukum unyak nang babye, atonun akunum malye wininyake. Ara, sik anang arye talye ning ati, ‘Nun ni koproba ani,’ nyabuka, isa si erenyaka deice arye, narye sik apu yapu ati, ‘Aninguk winilnamlume,’ nyapdeiamse nyalin yupu ara, akunum yaniltaknuk wininyake. Sik ayupu moubuka talibikirye, kum dobolyanganyake. Ara, sik Israel yala nang babye, Yehuda yala nang babye, sik apu yapu ati, “Aning-aning talibuka, wininamlume,” nyapdeiamse yupu ara, sik asukum unyak nang arye, akunum batakuka yanilongonyake. Wininyaka deice arye, narye nyapdeiamse yupu akunum yanibuka bataknike.
Tukwak mutuku nirya ara, malye kipdeipnamle. Akunum winiplyopura, tukwak mutuku unyak nang nirya, amalye kipdeiplye mutuku tuku deice uk unamake. Ikin weik unamakak ara, talye ati kume. Deiyok ara, Allah arye, “Anggunda, na nyapdeipsise ning ara, ‘Aninguk pia talibuka unamlume. Aning ara, pia kum wininamlume. Tonda, teleb winin ning ara ani, malye winin ning ara ani,’ nyapdeiamse yupu ara, tukwak mutuku nang nirya arye, aning batakuka unyake. Narye, ‘Aning ara pia ati talibuka unamluma ati, tonoknye babye kum bataknamlume. Tuba talibuka upnamlume nyapdeiamse yupu ara, tukwak mutuku nang nirya arye, aning batakuka wininyake. Wininyaka deice arye sik unyak mutuku nirya ara, mining dam arye, malye kipdeipnamne.” Allah arye nyabuk.
Winipnamak ning laka nyapnusine. Ara, narye anggun apu yapu nang ati, ‘Pia teleb mutuku arepnamsine,’ nyamse mutuku wekelbana ati, aninye bobuka bobinamne. Amutuku ara, aning-aning weik mutuku, pia teleb mutuku ati, ninye wein ning weik ulul mutuku anya arye, sapi basam ap, kambing basam ap, domba basam ap, aupmala ati ara, moum yung susu mek weik ulule. Tonda, mong ulul anye arye, mong mek ap pia weik ulule. Teleb ning yamubuka arepneba, sik patalamle touk weik dibikiba, bouplyopura, sik nong kalimna weik unamle. Bukni, kanye deibuka telebuk akunum ubicopura, sikce nati batakukba, Isa Mutuku Dongonye siuk erebikirye, kinamake. Isa siuk erenamake. Winibikirye, narye, ‘Wininamsine, wininamsine,’ nyabuka nyapse ning yupu ara, yanibikirye, nati like tenepnamniyake,” Allah arye nyabuk.
Winibuka noutamak arye, Allah el si Yahweh arye, yupu tonok Musa biti nyabuk. “An dipnalam talak, akunum dam kipmala ati ara, an apu yapu diamik touk dipminba, sik ton weiamik sukumuk, tuku lukicopura, sik ap dikdik senamlume. Dipminyopura, Israel ninye talipluma batakminyopura, sikce nati, ton bataknikiba, sik binamak mutuku unyak ninye arye si erenyak Isa Mutuku Dongonyeuk, talibuka si erenamake. Na atibuk, ‘Nun ni koproba Allah,’ kum tenenamniyake. Winibicopura, narye sikti, ‘Dipkoprop wininamsine, aning ton wininamsine,’ nyapdeiamsise yupu ara, batakuka yanipnamake. Yuk ning siuk erepnamake atia.
Winipmunye talak ara, anggun ni Allah, el si Yahweh arye, anggun talima pum tam mambul pil donamsile. Ara, mitik mapu, ‘Allah el ninguk wininamak’ tenen, sik den bam bol sekenyak touk, Allah arye anggunti, winiryuk kanye talima arenamsile. Ara, anggun ap, anggunce deipnamlum mapu ap nirya ati, Allah el si Yahweh arye, elti, pia dib tenen kanye arepnamsile. Arepnamsil ning deiyok ara, ‘Anggun kanye talima ap, anggun nong ap, na Allah ati tamubuka arepnamniyake. Tonda, pia unamak’ tenen, winiryuk kanye talima arepnamsile.
Tonda, narye anggunti, “Aning ara, winipnamlume,” nyapdeipsise yupu ap, “Aning, aninguk, teleb kibuka wininamlume,” nyapsise yupu ap, kum talipmunce, narye, “Winibuka, winibuka, wininamlume,” nyapdeipse ning nirya ati, ‘Nun like,’ tenepmunce, na yupu yanibuka, malye kipmunyopura, dipkoprob wenepnamsine. Aning atonun, narye, “Wininamlume. Winipmunyopura, narye anggunti, winibuka melinamsine,” nyalin yupu deice nyapsise yupu ton, kekena kum arye, ayupu ati yaniplopmunyopura, dipkoprob wenepnamsine.
Aning nirya deiyok ara, ani. Harun elce deiamukba, dadeipdanin banamak nang, sik imam nang nirya ara, sik nong bol malye wamlye nang nirya ara, na Allah Yahweh arena ati, din ning boyanuka, na dam kum arelyanganamniake. Atonun nang nirya ara, na aren ning boyanuka, uku kum dongolyanganamake. Deiyok ara, sik nong bol deice, malye ning wamlula ati, sik ni koproba Allah, na dam kum yanganamnyake. Na si erena ati, din ning boyanuka, kum arelyanganamniyake.
Anyapdeipnun yupu ara, ance Harun biti, laka nyapdeipnulyame. Yatanye do nirya, ance deipminyeba, dadeipdanin yanganyak nang bukni, tonoknye ton el taruk do, yan do, tonda el nong bol deice nirya ara, malye wamlinye birye, na si erena ati aren ning ara, kum arelyanganamnulule. Aning nyapmakin yupu ara, wini talakuk kum bukni, wini talak arye dipdongobuka, doupnin banamak talak nirya babye, malye wamlye nang arye, pia kum arelyanganamnilule.
Israel nang nirya ara, bikinamake. ‘Imam nang nirya ara, Allah arye wibuka deibuk nang unyaka ati, sikda malye winin ning pia kumce, pia teleb ninguk wininyake. Ati sikda, nong teleb, lek nang unyake,’ tenenamake. Deiyok ara, sik imam nang arye, din ning bobuka, na Allah si erena ati, arelyanganamniyake. Nara, Allah Yahweh unune. Nara, Pia Teleb, Lek Weiknye unune. Tonda, naryuk, ‘Naʼ tenen nang, na mapu Israel nang anggunti, pia teleb ubuka, lek nang kilisunune.
Deiyok ara, sik imam nang ara, na Allah ap, ninye ap, elana aik noutam pil don nang unyaka ati, nyapne. Sikda ‘Naʼ tenen, nanguk unamake. Tonda, Israel nang, ‘Allah arye, nun malye winipmap ning, kilibuka lyepnamsilʼ tenen, domba ato ning dobuka obikirye, uku dongolbanyake. Din ning, ayala-yala weike, na Allah, na si erena ati, arelyanganinyake. Ati ara, malye ning dam una do, talina do, ubikce deice arye, nara Allah, na si malye kum kilinamniyake. Tonda, sikce na si erena ati, mambul pil donyakce, nara pia teleb, ektedopnye, leknye biti, si ereninyak ati, ara sikce malye ning, bol pina kum aryuk, pia telebuk unamyake.
Ayupu nyapman ara, talye ati kum nyapsine. Deiyok ara, ani. Domba ato ning ayala-yala nirya ara, ining deice aryuk, kam unyake. Ati ara, na Allah Yahweh arye, ‘Iningʼ kum dinamlume,’ nyapsise ninguk kekebuka wininamlume. Tonda, domba ato ning nirya opmunye ning ara, “Aining ning nirya, boyamunba, Allah si eren aik dam, yanuka arebikceba, uku dongolulumak, el si mesba deice, aining likeipmunya deice arye, anggun malye winilulum ning nirya ara, kilibuka kum kum daneipnirye, kum kilinamsile. Ining arenamluma deiyok ara, ining noutam ara, kam una deiyok ning aulule. Ati, ining arepnumunya deice arye, anggun malye winin ning nirya pununa ati, aning nirya kilipnirye, kum kipdeipsinirye, lyepnamsine.
Bukni, den bol mouse sekna kum nang ara, na Allah Yahweh si erena ati Kaplin Kwalina kwalipmamunye din ning nirya ara, pia kum dinamake. Bukni, anggun mutuku noutam tia ati, anggun ap neika ulamunye ninye asik nang kan-kan arye, tonoknye ton, ‘Na ap, sik ap, neika aKaplin Kwalina neika diptibye teneplyopura, el ap, el mapu ap, sik nirya ara, den bol mouse ning akunum sekmunyopura, anggun ap dipnamlume. Ara, den bol mouse seknamak nanguk dinamake. Ara, sik den bol mouse akunum sekmunyopura, narye anang ati, ‘Wini talak ara, anang ara, anggun Israel yala nang koprop atonun unmake’, tenepnamne. Bukni, den bol sekna kum nang ara, aPaskah kwalina pia kum dinamake. Ara, meme nyapsine.
Allah Yahweh arye, Musa ap, Harun ap ati nyabuk. “Kaplin Kwalina (Paskah) noutam wininamlum ning ara ani. “Domba basam obuka, Allah si erena ati, boyanmakirye, Kaplin Kwalina dam yanuka kwalipmunce, Allah ati arenamlum domba basam tup ara, yuk mutuku arye yanamak ninye asik nang ap nirya ara, abasam tup pia kum dinamake.
Nara, Allah Yahweh, aning-aning nirya talibuka, deice tam erebuka, mikip weik deiyoknye birye, ayupu nyapkine. Israel yala nang, talye daulamik nang weik tam ara, minop talak bataklamnikce, malye weik ulamik bukni, Lewi yala nang kan-kan, ton tam nang ara, kum bataklamnikce, na si eren aik pum tam, pil tuba melilamik. Ara, ninye el si Sadok, elce deiamukba, dadeipdanin yangalamika ani, deibikba unyak nang ara, na si erena ati, Israel nang arye arebikceba, kam ning dobuka obikirye, Israel nang, sik malye winin ning kum danalina ati, mesba deice uku dongonamake. Ara Lewi yala nang bukni, sik tuba teleb unyak imam nang ati nyapne. Minop talak, sik Sadok tam nang ara, Israel yala nang nirya arye, nati batakamnikce, malye weik ulamik talak ara, anang arye tuba teleb ulamikce, na si eren aik pum tam uamuk ning nirya kaliklamik. Ati ara, wini talak ara, sik Sadok tam imam nang arye, na dam yanuka, na si eren aik noutam pil donamake. Ara, Israel yala nang, ‘Nun malye unyap ning, Allah arye namin kibuka kilipsutueʼ tenen, kam ning arebikceba, Sadok yala imam nang arye, opnopura, sikcuk mesba deice uku dongonamak pil talibuka donamake. Israel nang arye, akam ning arebikceba, Sadok yala imam nang arye, aning kalebuka, meta ap, ining ap, doprobikirye, na Allah ati, arenamninyake.
Nyabukopura, ayupu ton dukdongobuka nyabuk. Nara, Allah Yahweh arye nyapsine. “Na dipkoprob nyapsine. Aminyan talak ara, sik tuba malyeuk wininyak nang nirya ati, weik tonun wenepnamsine. Sikda, yuk nang arye, nunti, ‘Allah el ‘Naʼ tenen nang unyake, ‘Tenenansiak’ tenen, min arye nyalamsise touk, anggun ninye den bol mouse tam sekelulum bukni, anggun talima noutam ara, malye winin ning, aupmasili buk winilulume. Aning atonun winilulum nang ara, aminyan talak anggun dengna dopropnalume.
Winipsinyopura, narye anggunti, ‘Aning ara wininamlulume, aning ara kum wininamlulume,’ nyapdeiamsise ning ara, biknamlume. Ara, ‘Se, nunce, aning ara mambul kume, tenebupue bukni, dipkoprob Allah Yahweh arye, ayupu nyapsuka ati, nun malye winibupue,’ tenenamlume. Narye, ‘Anggun malye winilulum ning batakmumce, telebuk unamlume. Kumopura, weik arye wenepnamsine,’ nyapdeiamsise yupu ara, narye anggun Lewi yala nang ati, ‘Aninguk wininamlulume,’ nyabuka, nyalin yupu nyapdeiamse ning ara, ‘Sikce moubuka talinamak’ tenen nyapsise. Nara, Allah Yahweh im deice yin talin malaikat nirya, sik deiyoknye nyapsine.
Na tenelamse touk kum bukni, wini talak ara, anggun imam-imam nang ara, narye, ‘Wininamlulume, abisik banamlulume,’ nyapsise ning ara, diksukum bisik bataklumce, malye una bisikuk dobolbaluluma deice arye, anggunce yuk ninye ati, ‘Wininamlulume,’ nyabuka peterelulum ning ara, teleb ning ton kum peterelulume. Malye ninguk petereluluma deice arye, ninye nirya bobuka, malye una bisikuk bobalulumba, malyeuk wininyake. Winiluluma deice, narye anggun Lewi yala deiyok nang ati, nyalin yupu nyapdeiamsisirye, ‘Aning ara wininamlulume, aning ara kum wininamlulume,’ nyapdeiamsise ning ara, pia moubuka talibuka, kum winimunce, yaniltalulume. Narye Allah Yahweh, im deice yin talin malaikat, sik deiyoknye birye nyapsine.