“Seʼ', anggun malye winipmarume. Yata deiyok ati, Israel nang arye, ‘Nun malye winipmapu ning pununa ati, Allah arye biklirye, namin kubuka, kum daneipnamsilʼ tenen, boyanmangu kambing basam nirya ara, uku dongopmarumba, uku dipmale. Awinipmarum ning ara, teleb kume. Teleb ning ara, anggun ton bokuka dopropmatumce, pia teleb sukumuk, Allah el si eren aik urasin tam, pia teleb lek sukum dam bobinmatumce, aning dipmatuma. Deiyok ara, ani. Akambing basam arepmangu ning ara, Allah el kanye ara, ‘Aning ara, pia teleb lek ning ulule,’ tenelule. Tonda, Allah arye, alek ning ara, sik imam nang dinamake. Imam-imam nang arye, akambing tup dipmak deice arye, ‘Israel nang, sik malye wininyak ning kilibuka, sikti, teleb kipdeipnamleʼ tenen, arisulule. Israel nang, aning arepmangua deice arye, ‘Allah arye, nun malye ning ati, wenebuka oplopsutu bukni, aning arebikcopura, punupnamsile. Allah arye nun malye winin ning kilibuka, teleb kipsilirye, lyepdopnamsilʼ tenen, arepmangue.
Yehezkiel 42:13 - Eipomek13 Anye birye nyapnuke. “Adana-dana tam domik tingkat aik bitinye nirya ara, Teleb Lek Aik ulule,” nyapnuk. Atingkat aik pum tam ara, Allah si eren aik pum tam, pil dona deiyok nang, sik imam-imam nang aryuk wektinge. Tonda, sik imam-imam nang aryuk, Allah el si eren aik pum tam yanuka wekikirye, Allah Yahweh ap, neika epdakirye, sik Israel yala nang ati, Allah moronyake. Tonda, Allah ati aren ning, pia teleb lek ning ara, anoutam arye dopropnarye, bokuka anyaik pum tam boyanuka dinyake. Allah arena ati, kam ning boyanuka, kalipnarye, pia teleb lek ninguk, anyaik pum tam babye, dokola delinyake. ‘Allah el si erena ati, aminyan talak arepnamapʼ tenen, anyaik dokola delinyaka ara, ani. Ton ning ara, Allah si erebuka kina ati, gandum duk boyanuka delinyake. Tonda, Israel nang malye upnaba, ‘Allah arye aning nirya namin kipsilirye, kum daneipnamsilʼ tenena ap, tonda amalye ning pununa ap ati, kam ning opnarye, kalebuka dan tam ara, boyanuka anyaik dokola delinyake. Ton ning ara, Israel nang arye malye winipnarye, ‘Se, nunda dipkoprob pia malye winipmabe,’ tenen, ikin kanye bobuka, teninyak ning ara, Allah arye atenenyak ning ara, kum kipdeipsutuʼ tenen ati, aren ning boyanuka, anyaik dokola delinyake. Ara, Aminyan talak ton aning ara, dinamabe, ton ning ara, Allah ati arenamabe,’ tenena ati, aning-aning boyanuka, anyaik pum tam dokola delinyake. Asukum domik aik ara, Pia Teleb Lek Aik ulula ati, Allah el aren ning dan tam ning ara, boyanuka anyaik pum tam dinyake, tonda, dokola delinyake. Gade chapit la |
Yehezkiel 42:13
27 Referans Kwoze
Imam-imam nang ap, sikce deibiceba, dadeipdanin, banamak sal mapu ap, wisi nang ap nirya ara, ayanuka arepmace dina, pia teleb mingne teleb lek ning ara, sik ap dobuka, dina telebe. Bukni, talye nang nirya ara, aning pia kum dinamnyake. Imam-imam yala nanguk, aning dinamak bukni, adin ning dobuka, bobinuka dinak ara, yuk talyak, kum dinamnyake. Dinamakak ara, pia teleb sukum, lekto sukum bobinuka dinamnyake. Talya sukum dina kume. Deiyok ara, Allah el kanye ara, ‘Aning ara ‘Naʼ tenen, ning ati, pia teleb lek ning atonun ulule,’ tenelula atia.
Tonda, otam wilibuka domik aik, el urasin ara, dobuka dabu tam (arah utara) kipdeibikce domik ning ara, sik imam-imam nang kan-kan bukni, sikda Allah ati aren ning, kam ning opnarye, uku sekuka dongolamakak, aning el si ara mesba, aning talibuka, pil dona deiyok nang unyaka ati, ‘Sikda anyaik unamakʼ tenen, domik. Sik imam-imam nang nirya ara, Lewi yala nang kan-kan bukni, ninye si Sadok, el yala nanguk unyake. Ara, Sadok birye deiamukba, dadeipdanin yangalamika ani, deiamik yala nanguk unyake. Ati, sik Sadok yala nang aryuk, Allah dam bitingce, Allah el si eren aik pum tam ap, anyaik dam nirya ara, sik amambul pil talina deiyok nanguk unyake. Yuk Lewi yala nang nirya ara, apil pia kum taliptinge. Tonda, Lewi yala nang, yuk nang nirya ara, Allah el si eren aik pum tam ap, anyaik dam ara, pia kum yatinge. Sadok el yala nang koproba uk yatinge.
Ayim domba basam mi dobuka, adiparyuk, ‘Allah arye, nun malye winipye ning namin kibuka kilipnamsilʼ tenen, keil pala yangapdeibikce, kintinip deibikak, el si mesba bikirye, aning nirya obuka sekikirye, uku dongobikceura, ‘Nun malye winin ning nirya namin kibuka, kum kipnamsilʼ tenen, uku dongonamle. Adomba basam ara, adiparyuk, malye winin ning namin kilina ati bobikiba, amalye winilamice ning pununa ati, obuka arenamake. Tonda, aning nirya winibicopura, Pia Teleb Lek Aik, anyaik pum tamuk arenamlule. Deiyok ara, sik malye weik winibikce ning kanye imun tenen ning kilina ati, sik malye ning pununa ati arena ning ap, abitinye ara, Imam nang, sik ning ulule. Tonda, aning nirya ara, Allah el ninguk ulula ati, malye un ning kumura, pia teleb lek ninguk ulule.
‘Harun ap, el mapu ap, sik nirya na Allah si eren aik, dipkoprob pil donamakʼ tenen, wipdepmunye sum ara, akunum nyapdeipmakin touk, yim domba basamuk onalyame. Aopminye domba basam el tup ara, pia malye un ning nirya ara, bobana meme. Pia teleb ninguk, dobuka kintineip deimamunye ninguk, bobimunce, abasam tup nirya ara, danamlyame. ‘Aning ara, malye ning pia kumak, telebak unamleʼ tenen, akunum kintineip deiamunyakuk, adomba tup dabuka kintinip deipnalyame.
Aning winipnuce talak ara, Lewi yala nang, imam pil dolamice nang arye, melibikiba, sik neika asukumuk binamnyake. Ara, sik anang arye, malye winipmace ning ara, bikikirye, “Aning ara, winipnamlume,” nyabuka, lipsisikin nang unyake. Sik Lewi yala nang ara, anggun ni koproba Allah Yahweh arye, ‘Na si eren aik pum pil donamakʼ tenen, wipdeiamuk nang unyake. Tonda, Allah arye, ‘Sik anang ara, na talinun ninye, sik teleb ulina ati, sik aLewi yala nang arye, na si deice arye teleb yupu nyanamnyake. Tonda, ninye arye yu yupu deice arye walana ap, ura olana ap, ura yu upliba, derelana arye malye yupu nyalana ap ati, ‘Apil donamakʼ tenen, Allah arye, teleb kibuka kintinip deibuk nang, unyaka anya arye, anang aryuk alilsisikin pil donamnyake.
Aroti kwaning dabuka delinamak ning ara, Harun ap, Harun birye deiplyeba, dadeipdanin banamak nang nirya ara, sik din ning upnamla atia. Sik imam nang arye, aroti kwaning dinamak sukum ara, pia teleb aik pum tam aryuk dinamake. Aroti ara, pia teleb lek mingne ning ulula ati, pia teleb sukumuk dinamyake. Tonda, yuk ning, Allah Yahweh si erena ati, imam nang dam boyakirye, arenamak ning ara, sikce doprobikikirye dinyak ning ara, mitik mambul ulul bukni, aroti kwaning ara, mambul weik ning ulule. Tonda, aning nirya ara, Allah Yahweh, el si erena ati, uku dongolamak atonun ning upnamlule.
Winibuka ati, Musa birye, Harun biti nyabuk. Atonun ning ara, ‘Anggun dam ikin weik yasilyakʼ tenen, min talak Allah Yahweh arye, akunum nyapdeiamsuk. Allah arye nyabuk yupu ara, ani. “Na si eren aik pum tam pil donamak nang nirya ara, ‘Se, Allah ara, dipkoprob pia weik etekdopnye. Malye una ning pia kum ulula ati, Allah elda, pia teleb etekdopnye, leknye ulule, tenebuka, kel biknamakeʼ tenen, na wininye ning lake kibuka, eipnamake. Nara, malye ning tonok babye, kum unulula ati, nara weik leknye unun ati, sik babye biknamake. Na weik mikip lake kipdeipniba, adeice arye, sik Israel ninye nirya babye, eibikirye, sikce, ‘Se, Allah elda, dipkoprob pia teleb, weik leknye ululeʼ tenen, kel biknamniyake. Na mikip weik tukwak winipdenyeba, adeice arye, sik Israel nang nirya babye, eibikirye, ‘Se, Allah elda, dipkoprob pia teleb, weik etekdopnye ululeʼ tenen, biknamniyake.” Allah arye nyabuk yupu ara, Musa birye Harun ati, nyabuk. Musa birye Harun ati, “Allah arye, ayupu nyapdeiamsuk,” nyabuk bukni, Harun birye tamubuka, yupu ton kum nyabuk. Tunim anauk ubuke.
Tobia ap, dukdongobuka ulamdika anya arye, Elyasib birye weik kamar aik ton Tobia biti nukuk. Minop talak ara, ‘Anyaik ara Allah ati arenamak ning bulubuka delinamak’ tenen, kintinip deiamik. Ara, Allah el aik pum tam pil don nang ap, Allah ati arelamik gandum ap, nintong teleb ning el si ara, kemenyan ap, delina ati anyaik kintinip deiamik. Tonda, ‘Lewi yala nang ati arenamap’ tenen, persepuluan ning gandum ap, anggur tapu duk mek ap, zaitun yo duk mek ap, bulubuka anyaik delilamik. Tonda, aning noutam arye bokuka, sik pong-pong ana talibuka, mot sena deiyok nang ap, Allah el aik pum tam wekelban bisik bublan dam kalikna deiyok nang ap, sik yuk imam-imam nang ap ati, aning bokuka arelamik. Winilamika ati, aning-aning nirya dobuka, delinak ati anyaik kintinibuka delilamik. Bukni, Elyasib birye el kwit Tobia biti, anyaik nukuk.
Sik Lewi yala nang arye, na si eren aik bai tam, pil dona teleb bukni, anyaik noutam pil dona ara, imam pil dona ati arepse ning ara, ‘Naʼ tenen aik, Pia Teleb Lek Aik wekuka pil dona ap, tonda kam ning obuka, na arena ati, mesba deice uku dongon pil dona ap ara, an ap, an mapu ap aryuk, angguncuk apil donamlume. Ara, sik yuk nang arye, kum pil donamnyake. Apil ara, anggun pil anya arye, angguncuk donamlume. Deiyok ara, anggunce apil dona ati, na kanye aryuk, anggunti, imam nang kipdeipsise. Ati yatanye do nirya, narye apil dona deiyok ning ati, kum arepsinye birye, el kanye aryuk, “Nara, apil dopnunʼ tenen, anyaik noutam weklirye, pil doplinye bira, el wenena ati, sik Israel nang arye, el obikiba dipnamle.
Amoupdeibik ning ara, Israel ninye eibikirye, asum Allah arye, Korah yala nang ati wenebukce, tuku likdobukba, tuku pum bisik biyikce, diplamik nang unyakak sukum biyik ning ap, Allah arye uku dopkwetebukba, Korah tam nang nirya dibuk ning ap, tuba tamubuka tenebikce, bikik. ‘Ara, emas teikuka, mitik pala kibukba, amesba deice deibik ning eibikce, bikinamakʼ tenen, bikilina ati, aning kintinipdeibik. Tonda, Harun tam nanguk, Allah dam yakirye, siltong teleb nyan ning ati, arepnamting bukni, Harun yala kum nang arye, yuk ninye yala-yala nirya ara, apil pia kum dopnamtinge. ‘Aning babye biknamakʼ tenen, aning kintinip deibik. Ura, yuk yala ninye nirya ara, ‘Allah el si erena ati, uku ap, siltong teleb nyan ning ap, el dam yanuka areptibye,ʼ tenebikce nang ara, asum winibuk ning tuba tamubuka tenibikcopura, ‘Ilil weik upnamleʼ tenen, bikilin ning deibik. Yuk yala ninye arye, malye kibikirye arebikcopura, Korah ap, el melin nang ap, obuka kum daneibuk touk, unamake. Ayupu nirya ara, Allah Yahweh arye, Musa el kekenak nyapdeibukba, elce Eleasar biti, binuka ayupu nyabukba, kekebukce, anyapdeipmok touk, ubuka pil dobuk.
Musa birye Allah ati, akunum morobukopura, Musa birye Korah ap, elti melibuka yanmek nang nirya ati, nyabuk. “Mapmapya bereklyopura, beren tam talak aryuk, Allah elce dipkoprop, ‘Nara atia, na unye ning ara, ani. Tonda, na pil donya deiyoknye bira atia,’ nyana ap, ‘Na dam yanmanto nang ara, ani. Sikda na mapu koproba ara, ani,’ nyabuka, laka nyan ning ara, nyapsilyopura, kekepnamabe,” nyabuk. “Nyabuka, wipsilya deice aryuk, ‘Allah el pil dopnarye, el dam bobinmantonye bira, aniʼ tenen, kel bikikuka unamabe,” Musa birye nyabuk.
Bukni, Harun birye deiamukba, dadeipdanin banamak nang, el yala nang bukni, anyapmasin uk yala taleamlye nang ara, yuk imam nang arye, nati boyanuka arelyanganamniak teleb din ning ara, sik nong bol malye wamlye nang arye, adin ning ton dobuka, sik ton dina telebe uka. Ara, pia teleb lekto din ning ap, tonda pia teleb din ning ara, “Sik ato nang arye, dobuka dina telebe,” nyapsine.
Allah arye Musa biti nyabuk. Ninye malye winipmalya ati, anye birye, ‘Se na malye winipseʼ tenen ning, kum kilina ap, pununa ap ati, punubuka kam ning obikirye, boyanuka arelyanganamlum ning ati, “Wininamlume,” nyapnusine. Boyanuka onamlum kam ning ara, nara Allah, na kanye ara, ‘Aning ara, na tenena ati, malye una kumnye, pia teleb lek ninguk ulule,’ tenelule.
Tonda, anoutam ara, lake bikilin ning akunum doproplirye, uku dongoplyeura, Allah si erena ati, bobuka yanmace ning, weik tam tuba aupnamle ning ara, Harun ap, el mapu ap dolonamnyake. Ara, Allah ap, ninye ap, ansinilina ati, Allah el si eren aik pum tam, pil dona deiyok nang, sik imam nang aryuk, aning dobuka dinamnyake. Ara, ‘Aroti kwaning ara, Allah el ninguk ulule ati, aroti kwaning ara, pia teleb lek ninguk ulule,’ tenenamlume. Deiyok ara, Allah Yahweh el arena ati, akunum kintinibuka, uku dongonyaka atia.
Ura, Allah si erena ati, atepung boyanmakce bukni, Imam nang arye, Allah ati akunum arebikiba, aning tuba aupnamle ning nirya ara, weik tam ara, Harun ap, elce deiamuk nang ap, ara el mapu ap dopropnamake. Ara, sik Allah ap, ninye ap, ansinilina aik pil don nang, sik imam nang unyaka ati, sikcuk aning dobuka dinamake. ‘Adalamak din ara, pia teleb lek ninguk, Allah el ning ulule,’ tenamlame. Deiyok ara, Allah Yahweh el arena ati, uku dongonamaka ati, pia teleb, lekuk ulula atia.
Awekelbana ati bisik bublan, el si ara, gapura, cang keil arye deibuka domik aik, el bai tam bisik, atolonga dam ara, mitikto aik ton wilibuka domik ning dinmasiba, anyaik atolonga ap, balai nyalamak aik ap, bisik bublan botopdeiamikak eipse. Amitik aik domik ning deiyok, ara, Allah el si erena ati, ‘Ining ning opnarye, aning tup kalebuka, uku dongopnamakʼ tenen, atup mek likdeipnarye, memebuka deiamikakuk eipse.
Allah el si eren ati domik aik kaplibuka otam ara, weik aik ton domik. Allah si eren aik atam ap, otam ap domik aik anoutam ara, lo mitik tonun ton batakamik. Anoutam lo el pala ara, 10 meter kibuk. Anoutam batakamik lo kaplibuka, keting kumulban tam domik aik ara, anye bopmuk pina arye deibuka, kiklipdeyukura, anyaik bai kwanim tam kiklinak arye dipdongobuka, sirik tam kiklinak el pala ara, 45 meter kibuk. Tonda, anyaik urasin tam arye dipdongobuka, anyaik dong tam, el cang ara, 35 meter kibuk. Tonda anyaik bai tam antanap dongobuka piamik abilinga, el bukam ara, dua setengah meter (2.5) kibuk.
Ura, aning nirya akunum winibukopura, anye elcuk, na bobuka, Allah si eren aik dam bukni, dabu tam uamuk gapura noutam arye kirikuka, otam lo weik batakamika noutam binuka tiknumu. Asukum arye, tuba tamubuka, iknapye tam dinmasiba, Allah si eren aik dam bukni, keting kumulban tam domik aik eipse. Anyaik dam arye dinmasibuk, dabu tam domik aik outam upmokak eipse.