Anyaik domikce, el urasin deiamik tam, lo el pala ara, sepuluh meter (10) kibuk. Anyaik bukni ton tam ara, el urasin deibuka domik tam ara, bai tam arye ninye yanibuka yangana ati, keil pala yangap deiamikce, domik tam ara, lantai batu dam, anyaik urasin bai tam kipdeiamikce, domik. Anyaik domik ning, tonok minyuma domik ning ara, tuku deice amu tam domik. Anyapce ubuka, bitinye ning ara, noutam domik. Anyapce ubuka winilye ning ara, eitam domikce, tiga tingkat aik nyabuka dolamaka atonun, ubuka domik. Atiga tingkat aik domik ning, el urasin ara, Allah si eren aik iknapnye tam kipdeiamikce, domik tamuk kiamik.
Yehezkiel 41:15 - Eipomek15 Winibukopura, anye birye, keting kumulban tam domik aik, ‘El nong nirya ara, yata barye meter upnul do?’ tenen, dabu tam deibuka, piamik abilinga dukulongonak arye dipdongobuka, iknapnye tam piamik abilinga dukulongonak, kiklipdeyukura, el pala ara, 50 meter kibuk. Amitik weik aik domikak arye, otam Allah el si eren aik domik ning atam, anoutam batakamik lo mitik tonun ara, kiklipdeyukura, el pala ara, 10 meter kibuk. Gade chapit la |
Yehezkiel 41:15
13 Referans Kwoze
Ura, aning nirya akunum winibukopura, anye elcuk, na bobuka, Allah si eren aik dam bukni, dabu tam uamuk gapura noutam arye kirikuka, otam lo weik batakamika noutam binuka tiknumu. Asukum arye, tuba tamubuka, iknapye tam dinmasiba, Allah si eren aik dam bukni, keting kumulban tam domik aik eipse. Anyaik dam arye dinmasibuk, dabu tam domik aik outam upmokak eipse.
“Yosuao, nara im deice unyak yin talen malaikat nirya ara, sik deiyoknye ununa ati, narye nyapkine. Ara, narye, ‘Aning ara, wininamlume. Aning ara, pia kum wininamlume,’ nyapdeipse yupu nirya ap, tonda narye, ‘Teleb winin ning ara, ani. Winibuka diksukumuk unamlume,’ nyabuka, laka nyapkise ning nirya ati, ance moubuka diba tenepmince, aninguk talibuka umunyopura, narye teleb kipdeipnamkine. Ara, narye anti, arepkise imam pil yala-yala nirya, na si eren pil nirya ati, narye, ‘Winipnamlyame,’ nyabuka laka nyapkise touk, teleb kibuka dopmunyopura, anyapce ubuka otam nirya ara, ance imam deiyoknye kibuka taliptumce, na si eren aik ap, anyaik dana-dana tam uamuk tuku ap, aning nirya talibuka, pil donamlame. Tonda, anyapce dipdongobuka dounamle talak ara, narye lo arepkinirye, ‘Telebeʼ nyapkinyopura, adeice arye, asukum tikmakce malaikat arye, na dam yakirye, yupu nyanyak touk, an babye, na dam yatumce, yupu nyaptume. Winiptumce, nati moropnamnutum ning nirya ara, kekepnamkine. Winipmanto ara, narye sik malaikat nang ap, na ap, neika ubirye, moronikiba, kekelamne atonun, anti winipnamkine.
Anye birye, Allah si eren aik bukni, aik pum tam akunum kiklipdeyukopura, na bobuka, cang keil arye deibuka domik aik, el si ara gapura, bukni keting panalyangan tam bisik bublan arye kirikuka, lo weik batakamikak bobinuk. Ara, Allah el si eren aik, bai tam lilun lo uamukak ap, awamuk ning nirya ap, ‘Kiklipnunamʼ tenen, bobinuka deipnuke.
Anyaik noutam alip tam wilibuka domik aik ara, el lo pia mitik tonun kibuka domik. Bukni, yuk amu tam domik aik noutam nirya ara, mitik tonun, pala weik kibuka domik. Deiyok ara, pia mitik bisik el si ara, lorong-lorong dam domik aik, el pala ara, weik tonun domik. Anyapce amu tam domik aik ara, mitik tonun domik.
Allah el si eren ati domik aik kaplibuka otam ara, weik aik ton domik. Allah si eren aik atam ap, otam ap domik aik anoutam ara, lo mitik tonun ton batakamik. Anoutam lo el pala ara, 10 meter kibuk. Anoutam batakamik lo kaplibuka, keting kumulban tam domik aik ara, anye bopmuk pina arye deibuka, kiklipdeyukura, anyaik bai kwanim tam kiklinak arye dipdongobuka, sirik tam kiklinak el pala ara, 45 meter kibuk. Tonda, anyaik urasin tam arye dipdongobuka, anyaik dong tam, el cang ara, 35 meter kibuk. Tonda anyaik bai tam antanap dongobuka piamik abilinga, el bukam ara, dua setengah meter (2.5) kibuk.
Winipmanto ara ton, nun unamap mutuku noutam, pia weik mutuku bukukak ara, amutuku aning-aning nirya ara, deice tamuk lak ulule. Amutuku si ara, Karmel mutuku tuba nyanyake. Aning atonun, an nong deice tam ara, an kisok deice ukulule. An kisok erebuka baminba, amutuku nang nirya, eipkikirye, ‘Se, akil ara, mambul weik kile,’ tenenamkiake.’ Aning babye, urasin pia teleb ukulul ati nyapne. Anda, dana-dana tam balamlumba, an kisok deice uamuk cang potong ara, welepmana, koulukmana kiltolule. ‘Apotong ara, pia teleb, mirin weik ulirye, mildang-dang alul bukni, cang weik ulula ati, ninye deiyoknye Raja babye, apotong noutam tomopkutua babye, pia lopdaturye, kum bitue,’ tenepne.
Anye bira, ‘Allah si eren aik el cang ara, yata barye meter do?’ tenen, el bopmuk pina arye, deibuka kiklipdeyukura, el cang ara, 50 meter kibuk. Ara, anyaik urasin tam arye dipdongobuka, donga tam ati, kiklipdeyuk. Tonda, Allah el si eren aik domik ning, donga tam arye dipdongobuka, keting kumulban tam mitik weik aik domik ning kaplibuka, anyaik donga tam binuka kiklipdeyukura, el cang babye, 50 meter kibuk.
Allah el si eren aik urasin tam ara, keting panalyangan tam kiamik. Ati, anyaik urasin tam bukni, dabu tam domik keil poka arye dipdongobuka, iknapnye tam domik keil poka, anoutam batakamik lo nirya ara, ‘Yata barye meter upnul do?’ tenen, anye bopmuk pina arye deibuka, kiklipdeyukura, alo el pala ara, 50 meter kibuk.
Allah el si eren aik noutam, yuk-yuk wilibuka domik aik bukni, minyuma ning ara, el si Teleb Lek Aik ap, tonda, Allah si eren aik bisik bublan dam lapdeiamik atolonga domik ning ap eipse. Ura, minyuma domik aik bublan dam bukni, tikuka otam dinmasiba, mambul ning, ‘Naʼ tenen delina ati, mitik marikna memebuka, abilinga taram deice deiamik ning eipse. Amarikna, el lelilongon ning, teleb kain lapkwecamikba, lelyamuk ning eipse. Amarikna deice tam ara, ‘Anyaik abilinga taram urasin, pia teleb upnamleʼ tenen, mitik yo winilye, el si ara bingkai, abilinga taram deice lelepdeiamikce, taplak dongamik. Tonda, alo weik aik, el abilinga taram deice nirya ara, ‘Urasin teleb upnamleʼ tenen, pala yo lakase, el bukam pia mitik uamuk ning, el si ara tripleks, atonun taplak dongamik. Aning ara, amsuna deice utam arye dipdongobuka, jendela botopdeiamika dam amu tam domik. Tonda, mitik jendela botopdeiamika ara, el lelin ning, el si ara kain tirai arye, lapkwecamik.
Piblisite