Yehezkiel 37:25 - Eipomek

²⁵ Minop talak, narye na pil donanye Yakub biti areamsibuk, elce deibukba, dadeipdanin balamik ninye ulamik mutuku uk pia ati binuka unamake. Ara, sik apu yapu ulamik mutuku uk, binuka unamake. Sikce deibikiba, dadeipdanin banamak ninye nirya babye, amutuku uk talibuka pia aunamake. Ara, wini talak ululum ninye ap, aminyan talak sik mapu ap, tonda sik mapu arye deipdanin, banamak mapu ap, doyanamle talak deibikiba, dadeipdanin banamak ninye nirya ap, sik nirya amutuku noutamuk teleb ubuka unamake. Unamak talak ara, Daud el yalanye birye, ninye deiyok kibuka aninye pia talinamle. Sik Sisinanye el tonok unamle.

Yehezkiel 37:25 Referans Kwoze

Amos 9:15

Winipmanto ara, ninye arye koulamak ning tonok, wa noutam kouamikibuk, tup-tupa bongolamle touk, na Allah arye, na mapu ati, sik minop talak areamse mutuku uk, tamubuka arepneba, pia aunamake. Winipnye talak ara, tonap tamubuka, kum dopropnamne. Tonda, yuk mutuku ninye arye, na mapu Israel nang ati obikirye, amutuku noutam arye, pia kum bobinamake. Narye sikti, areamse mutuku noutamuk, pia unamake. Dipkoprop nara, anggun deiyoknye, na Allah si Yahweh arye nyapsine.” Allah arye nyabuk.

Yehezkiel 37:24

Tonda, na pil donanye Daud el yalanye wibuka deipnebuk, sik nirya talibuka ninye deiyoknye unamle. Winipmanto ara, domba basam weik unyak bukni, sik domba weina deiyoknye tonok ulirye, el domba nirya tonok kibuka deiplirye, teleb ubuka weilamle atonun, Israel ninye ayala-ayala nirya ara, sik deiyoknye tonok dem unamle. Elce Israel ninye nirya talinamle talak ara, sikce teleb un ninguk wininamake. Ara, na Allah arye, ‘Aning ara wininamlume, aning ara kum wininamlulume,’ nyapdeiamse ninguk talibuka unamake. Na yupu nirya moubuka kekenamake.

Yehezkiel 36:28

Winipmunyopura, narye anggun apu yapu nang ati, areamse mutuku talibuka unamlume. Wini talak arye, dipdongobuka doryanamle talak noutamak nirya ara, anggunda na mapu koproba, ‘Naʼ tenen, kili sal umunba, nara anggun ni koproba Allah, anggun weik deiyoknye unamsine.

Yehezkiel 28:25

Nara Allah, na si Yahweh arye nyapsine. Nara, aning-aning nirya talibuka, deice tam erebuka, Pia Mikip Weik Deiyoknye ununa anya arye, narye nyapsine. Minop talak, narye Israel nang, yuk-yuk mutuku donoksiba, sik mal olan nang arye, tapu koubuka bobinamik bukni, narye sik biyik nang bulubuka, sik mutuku uk boyanuka, tuba asukumuk deipnirye, na pia teleb lek ning ap, telebuk kunuknak ap, sik talima pum noutam deipniba, telebuk ubicopura, yuk-yuk yala nang, dana-dana tam nirya arye, eibicopura, bikinamake. Na mikip ara, sik dam akunum pil dopnamna deice arye, biknamake. Tonda, winipyopura, na si erebuka, na amu tam pil donanye Yakub biti, ‘Amutuku dobuka arepnamkine,’ nyabuka, nyalin yupu deice elti, arepse mutuku uk, elce deiamukba, dadeipdanin yangalamika ani, wini talak unyak Israel nang ati, amutuku nirya arepnyopura, tuba tamubuka, sik mutuku uk, yanuka unamake.

Yoel 3:20

Bukni, Yehuda mutuku unyak ninye ara, pia, Yehuda tam noutamak tuba aunamake. Tonda, Yerusalem mutuku noutamak ara, ‘Naʼ tenen, ninye babye pia, tuba aunamake.

Yehezkiel 37:26

Na Allah ap, sik Israel ninye nirya ap, ansinibuka telebuk una ati, nyalina yupu tonok ning nyapdeipnamne. Ayupu ara, pia min kume kum danamle yupu anya arye, pia aunamle. Winipnyopura, narye sikti, pia melibuka kaliklamniba, pia telebuk unamake. Nara, sik dam unirye, sikti, melinamna deice arye, sik yupa weik arye, tonap tabakuka upre banamke. Aunamak mutuku noutamuk, na si eren aik dopdeipniba, pia ati asukumuk unamle. Na siuk pia erenamniyake.

Yehezkiel 37:21

Allah el si Yahweh arye, aning nirya talibuka, deice tam Weik Erenanye birye nyasulule. Na mapu Israel ninye yala nirya ara, yuk-yuk mutuku ninye noutamak biyikce, dabinuka ulamica ani, aninye nirya tonokak, bulubuka deipnirye, anggunti areamsise mutuku tamubuka delilyanamsine. Tonok mutuku noutamuk unamlume.

Yeremia 32:41

Aminyan talak nirya ara, narye sikti, kanye deipnirye, teleb kipdeipnamne. Tonda, narye sikti, batakna pia kumce, ‘Amutuku noutamuk, pia teleb unamakʼ tenen, kintinip deipyeba, telebuk wininamake. Aning akunum nyapdeipsina ati, aning ara, pia kum bataknamne. Na nyasinye touk, dipkoprob pia wininamsinarya! Na kanye tenen ning ap, na talima ap deice arye, nyalin yupu arye nyapsine. Aning nirya ara, dipkoprob winipnamsine!

Yeremia 31:24

Na Allah arye aninye ap, sik mutuku ap, akunum teleb kipdeipnyopura, sik Yehuda yala ninye nirya ara, amutuku noutamak, asik dobuka, pia aunamake. Sik nirya ap, tonda wa win ninye ap, domba basam ap, kambing basam ap, sapi basam ap, wein nang nirya ap, neika amutuku noutamak unamake.

Yeremia 30:3

Aning nyapmakina deiyok ara ani. Ara, dipkoprob doyanamle talak ara, na mapu koproba Israel nang ap, Yehuda yala nang ap ara, narye sikti, tuba tamubuka teleb kipdeipnamne. Ara, wini talak sikda, yuk pera mutuku noutam unyak bukni, narye sik apu yapu nang ati areamse mutuku uk, sik wini talak kam unyak nang babye, tamubuka boyanirye, amutuku noutamuk deipnamsine. Boyaniba, sikce amutuku tuku uk talibuka unamake. Ayupu ara, na Allah Yahweh arye akunum nyapdeipsine.” Allah arye nyabuk.

Yesaya 66:22

Dipkoprob nyapsine. Narye winiryuk im kwepdeipnamne ning ap, tonda, winiryuk tukwak mutuku kwepdeipnamne ning ap, aning kwepdeipniba, pia aupnamle touk, ‘Naʼ tenen, nang, sik Israel nang, sik ap, sik si ap, anggunce deipmunba dadeipdanin binamak nang ap, nirya ara, na dam pia aunamlume. Anggunda, min kum kum danamlume! Na Allah Yahweh arye, ayupu nyapmasina anya arye, aning ara dipkoprob winipnyopda, nong upnamlarya!

Yesaya 60:21

Yerusalem mutuku talibuka unamlum ninye nirya ara, pia telebuk ukirye, diksukumuk unamake. Tonda sik unamak mutuku ara, min kum kum danamle, bukni pia atuba wamliba talibuka unamake. Ara, talye ati kume. Ninye arye ‘Nun koun ning koubikiba, aminyan paplirye, weik papnamle’ tenen, mitik yala ning doklamak touk, narye anggun Israel ninye ara, na bidamang Allah aryuk koulamakto wamsa atia. Anggunda pia teleb-teleb unamluma ara, na bidamang taruk ap, na bidamang mikip deice ap arye, mambul pil dolamseba, sirya talak ara, pia teleb unamlume. Aning nirya pil dolamse ning deiyok ara, ‘Ninye mutuku-mutuku nirya arye, na siuk erenamniyak’ tenen, pil dolamse. Ati, aning ara dipkoprob nong upnamlarya.

Yesaya 11:1

Minop talak ulamuk ninye deiyoknye Raja Daud, el li koproba Isai ulamukce, deibukba, dadeipdanin banamak ninye noutam arye, weplomice yo sirika tupto, tamubuka kwapu winiryuk ning, youbuka paplirye, duk moulamle touk, Daud el yala nang deice arye, ninye deiyoknye yanamle.

Ibrani 7:21

Narye nyapmasinye, nun winiryuk ansilina deiyoknye Yesus ara, Allah arye ayupu nyalilamuka deice arye deiyok kilamuk. Allah arye anye biti nyabuk. ‘Nara, Allah arye anti, akunum nyapdeipmakin ati, na kanye tonap kum tamupnamne. Narye akunum nyapkine. Anda Allah ap, ninye ap dana-dana ansinilina deiyoknye pia unamlame, nyapkine. Allah arye nyabuk.’ (Mazmur 110:4)

Ibrani 7:2

Teleb yupu nyapdeibukba, Abraham arye yuk mutuku deiyok nang obukabukce, sik bona ning weik dalubuka yayuka noutam arye, sepuluh persen (10%) bokukabikce, Melkisedek el si erena ati aribuk. Melkisedek el si deiyok ara ani. Malye una kum arye diksukum una deiyoknye ulamuka ati, el si Melkisedek nyalamik. Tonda, mutuku si Salem nyalamika deiyok ara ani. Ara, olana kum arye kanye deibuka telebuk una ati, asi ara Salem mutuku nyalamik. Ati Melkisedek bira, Salem mutuku deiyoknye ulamuka anya arye, el si Raja Salem nyalamika deiyok ara, elda kanye deibuka, teleb una deiyoknye ulamuka ati asi nyalamik.

Yohanes 12:34

Yesus arye ayupu nyabukura, awekmek nang arye nyabik. “Allah arye nyapdeibukura, Musa arye sekeiyamsuk yupu noutamak arye peterelamsikba, kekelamupe. Ara, Allah arye, ‘Ninye Lyepnamle’ tenen, wipdeibukce, dopdeipsuknye, ‘Kristus ara, elda pia kam unamlanye,’ nyabuka peteresinyake. Ati ara, ance, ‘Ninye Mi Koprop Atonunye adiparyuk ereipnamniyake,’ nyapsilam ning ara, yata deiyok ati ayupu nyapmasilam do? Tonda, ‘Ninye Mi Koprop Atonunye,’ nyapsilamnye bira, yatanye biti nyapsilam do? Elda yatanye ulul do?” nyabuka asipdeyik.

Zakaria 14:11

Minop talak ara, Yerusalem asik domik ning obuka, sice buklobik bukni, Allah Yahweh tamubuka yanamle talak ara, Israel nang arye tamubuka amutuku yanuka unamake. Amutuku noutam unamak nang nirya ara, pia namin asa arye yanuka unamake. Ara, atalak arye dipdongobuka, doupnamle talak nirya ara, ninye arye amutuku yanuka, kum kilina ati nirya babye, sik anang dam ton pia kum unamake. Atalak arye dipdongobuka dounamle talak nirya, Yerusalem mutuku ara, pia telebuk unamle.

Yesaya 30:19

Anggun Yerusalem mutuku weik asik noutam ululum ninyeo, anggunda tuba-tuba kum engenamlume. Anggunce Allah ati, “Se na nie, anda melipsilyame,” nyabuka moropmunyopura, elce anggun moropmamunye ning ara, kekepsilirye, amoropmamunye touk ubuka, melipnamsile. Deiyok ara, Allah arye anggun malye winilamlum ning ati, talye kanye bobuka oplopsutu bukni, anggunti weik tonun bicoe, tenesulula anya arye, talima namin aryuk, kekepsilirye, lyepnamsile.

Yesaya 55:4

Narye, ‘Dipkoprop Daud bira, Israel ninye, anggun ninye deiyoknye Raja unamle’ tenen, wipdeiamse. Tonda ‘Yin talin nang, sik weik deiyoknye unamle’ tenen, wipdeiamse. Ara, talye ati kume, Daud erepdeipsiba, aning nirya winilamuk ning deiyok ara ani. Ara, Daud erepdeipsiba, el winilamuk ning ara, ‘Ninye nirya eibikirye, na si ap, na mikip ap, moubuka kel biknamniak’ tenen, winyamse.

Yeremia 30:9

Sikce na Allah Yahweh ati, pil donamniyake. Tonda, Raja Daud birye deiamukba, dadeipdanin, yangalamik nang kan-kan arye, narye ninye deiyok nang ton wipdeipyopura, aRaja nang aryuk, na mapu Israel nang talibikiba, sik amu tam teleb pil dopra wininamake.

Yeremia 32:39

Wini talak ara, narye sikti, kanye tenen ning ap, talima ap, deiyok tonok ninguk arepniba, teleb winin ninguk talibuka wininamake. Ara, talye ati kum bukni, ‘Sikce nati, ilil upliba, pia si erenamniake. Na siuk pia erenamniake. Aning winibikca deice arye, sik winina ara, pia telebuk wininamake. Pia telebuk ukirye, sikce mapu deibikcopura, dadeipdanin banamak mapu nirya babye, teleb kipdeipniba, pia telebuk winipnin banamake.

Yehezkiel 34:24

Atalak ara, nara Allah, na si Yahweh ara, anggun ni koproba Allah unamne. Tonda, ninye deiyoknye Raja Daud, na amu tam pil donululnye bira, wibuka anggun deice deipniba, elda ninye deiyoknye ulirye, aninye nirya talibuka, sik yupu nyana deiyoknye, pia unamle. Aning nirya ara, na Yahweh arye, Pia Mikip Weik Deiyoknye ununye birye, akunum nyapmasina ati, aning nirya, dipkoprob nong upnamlarya! Aning ara, na Allah Yahweh arye, ayupu akunum nyapdeipsine.

Yehezkiel 44:3

Bukni, Israel nang, sik ninye deiyok kibuka, yupu nyana deiyoknye, Raja birye abisik bublan wekturye, abublan dam biturye, asukum ara din diptue. Ara, anye eluk ara, Israel nang, sik Raja ulula ati, na si erena ati, kam ning obikirye, nati arepnamniak ning ara, atup kan-kan arye kalebuka, pia teleb lek din ning kintinipnamak ning ara, binuka asukum dina telebe. El anye birye, abisik bublan, el si gapura weklirye dipnulyopura, abublan dam lo weik tam arye wekenamlule. Atonun, akunum diplyopura, anyaik pum noutam arye tamubuka, bai tam binulye talak ara, ayanmalye bisikuk, abublan lo weik tam arye tamubuka binamlule.

Zakaria 10:7

Na tenen ninye lyepnirye, sik mining ulamik mutuku koproba tamubuka boyanyopura, sik Israel ninye ara, mal olan deiyok nang arye mikip ulamak touk unamake. Tonda, anggur mek teleb ning dibikirye kanye delilamak touk, wininamake. Wini talak ara, sikce deibikiba, dadeipdanin banamak mapu nirya arye, sik ni yapu lyepropnamake. Akunum winipneba, aminyan talak eibicopura, sikce nati, pia weik kanye deibuka unamniyake. Winibikirye, aninye, ‘Se nun ni Allah Yahweh arye lyesulule’ tenen, na si erebuka, kinamniyake.

2 Samuel 7:13

Winipnyopura, anye birye, na aik dopnamnile. Anyaik dopnilyopura, Israel nang arye, anyaik pum bisik, na si erepnamniake. Tonda an deipnalam mi, el talinamle mutuku ara, narye yuk talak nirya, pia una ati, mikip kipnamne. Winipniba, yuk yala nang arye, elti, kum bisibuka opnamake.

2 Samuel 7:16

An deipmin mapu ap, ance dipminbuk, dadeipdanin banamak nang ap, na damak pia unamake. Aning atouk, an talipnalam mutuku ap, talinalam nang ap, an mapu nirya talinamak ning nirya ap, narye mikip arepnibuk, keting tamun weik arye talipnamake. Winilaminya, ance deipnalam mi arye, an taliplum mutuku, elce anti punubuka, aning nirya talinamle. Ance dipminbuk, dadeipdanin banamak nang nirya ara, an yala nang ati, ‘Weik ninye deiyok nang unamak’ tenen, pia ereipnamne.” Allah arye nabi Natan ati, laka nyabuk. Laka nyabukce, “Anda, Raja Daud laka nyalbilyame,” nyabuk.