Biblia Todo Logo
Bib sou entènèt

- Piblisite -




Yehezkiel 34:27 - Eipomek

27 Narye mok arepnyopura, mok cepliba, amutuku noutam tiknamle yo, yuk-yuk ning nirya ara, duk mounauk unamle. Sikce wa wibuka kounyak ning nirya ara, pabukablirye, teleb kibuka nonguk unamle. Winiplyopura, sik anang nirya, dakeiam asa arye dakuka, ilil una kumce, teleb kanye deibuka, sik mutuku tuku noutam unamake. Winilamikca ani, na mapu koproba Israel nang, ninye arye tapu koun ati tapu, el si rantai bulukulamak touk, narye sik yuk ninye asik nang mutuku binuka deiamikiba, adiparyuk loplopniba, kanye pia deipnamake. Anggun mal olan nang obuka, sirya daknamne atia. Winapnamne deice arye, akunum winipnyopura, sik anang nirya arye nati, ‘Se, diba elda dipkoprob Allah Yahweh ululeʼ tenen, biknamniake.

Gade chapit la Kopi




Yehezkiel 34:27
39 Referans Kwoze  

Nara Allah, mikip weiknye unirye, im deice yin talin malaikat nirya ara, sik deiyoknye ununa ati ayupu nyapsine. Na mapu, anggun Israel nang ati, ayupu nyapdeipsine. Na tenepse sum akunum kiplyopura, yuk nang arye, ikin ning anggun nong deice deiamik ning ara, narye dobuka loplopnamsine. Tonda, kat ning el si besi arye, besi rantai tapu arye, na mapu tapu koulamik ning babye, narye dobuka loplopnamne. Wini talak arye dipdongobuka, doyanamle talak ara, yuk-yuk mutuku ninye asik nang arye, anggun deice ikin ning tonap kum deibikcopura, anggun amu tamuk, pil kum donamake.


Nara, Allah Yahweh, anggun ni koproba Allah unune. Anggunda, Mesir mutuku noutam ulamlum talak nirya ara, sik amu tamuk ulamlume. Sik Mesir mutuku nang arye, ikin ning weik, anggun nong deice delilamikba, anggun talye pil don nanguk ulamlume. Bukni, narye anggunti, lyebukapsinirye, dobuka boyanamsise. Ati anggunda, tuba tamubuka, Mesir mutuku nang, sik talye pil melin nang ton, kum unamlume. Tonda, Mesir mutuku taleamsik nang arye, anggun Israel nang ati, ‘Sikda talye nang ati dauaplye,’ tenebuka, ikin ning deililamsuk ning ara, narye akunum malye kibuka, kum kipdeipsa ati, anggunce, ‘Seʼ tenen, kisok kanupdongobuka, kum banamlume. Wini talak arye dipdongobuka, doupnamle talak ara, anggunda kanye deibuka, telebuk unamlume. Allah arye Israel nang ati, nyabuk.


Tonok ning ara, narye, ‘Mok cen wala ani,’ tenelamse talak ati, mok aren talak akunum uplyopura, mok arepsinyeba cenamle. Winipniba, mok ceplya deice arye, tuku deice arye, talibuka kounamlum ning, yuk yala nirya ara, tuku namin kibuka, pia weik tonun teleb kibuka panamle. Winiplyopura, yo duk ayala-yala weik tonun mounamsile. Aning nirya ara, pia telebuk unamle.


Ninye tukwak mutuku nang nirya ara, Allah arye, pia teleb kilisulul ning bikikceura, sikce Allah ati, diba tenebikirye, pia kum batakanamake. El siuk erenamake. Aning atonun, Allah ara, pia diksukumuk kibuka ulinye birye, im deice arye, nun tukwak mutuku nang ati, disululce, pia melinauk usulule.


Allah arye Israel ninye ati nyabuk. Minop talak ara, Mesir mutuku ninye arye, anggun nirya opsikce, tapu koubukapsikce, sik mutuku tamubuka bobinamsikba, ikin weik pil dilamsikba, imun kanye bobuka ulamlum bukni, na Allah arye, lyepropsisirye, teleb mutuku boyanamsise. Bukni, anggunce nati, ‘Kume, Allah nyasilye yupu ara, kum kekenamabe. Allah el piluk dobibirye, el amu tamuk kum unamabe,’ tenelamlumce, nati batakanululume. Tonda, dan mutuku do nirya, anggunda weik arye erebuka, bukuk mutuku konak nirya ap, tonda weik yo dam nirya ap bimunce, talye Isa Mutuku Dongonye ati binuka si erepna arye morolulume. Winipmanto ara, ninye domikce kilapu, sik akanye yapu akilapu lik ati, batakmakibuk, talye nang ap ubula yoldalamak touk, anggunda na anggun ni koprop Allah, nati batakanululume.


Allah arye tenyamuk talak akunum kiplyeura, Allah arye, Yerusalem mutuku noutam winipnamle ning nirya ara, tuba tamubuka, pia teleb kipdeipnamlarya! Tonda, sikce kouamik ning yala-yala nirya ap, yo duk moulamle ning yala nirya ap ara, weik arye paplirye, pia teleb uplye ning ara, duk weik moupnamle. Atalak ara, sik Israel yala nang lyepdoplirye, amutuku noutam kam unamak nang ara, kanye teleb kipnamle. Tonda, sik koun ning weik nong uplyeba, libuka dikirye, ‘Se, wini talak ara, aning nirya ara, pia telebuk usulule,’ tenen, kanye dipnamake.


Mitik mekwen sukum ara, garam aupnamle bukni, amitik mek balamlye lilun arye, yo yala-yala nirya pabukaplirye, duk weika arye pia mounamle. Ayo bok dakalsakna ap, ninye arye deklamak ning nirya ap ara, ton kum mounamle. Tonda ayo duk mounamle ning babye, ton kum sirya dakmanto unamle. Ayo yala-yala nirya ara, atikinamle ning nirya ara, el duk pia teleb ning ara, awala-awala deice nirya ara, mounauk unamlarya. Winipnamle deiyok ara, ayo duk mek kilamuk mek ara, Allah Yahweh el si eren ati, tenda aik tam arye, mek bukna bukuka yanganamle. Ayo el duk moulamuka nirya ara, ninye arye dina atia. Bukni, ayo el bok ara, uk dinman nang, sik obat dina ati, ayo bok nyalamuk. Atonun, tonda, ninye arye dakuka dibikceura, sikuk lopnamle.


Winipnyopura, na mapu sik Israel nang arye, ‘Se, Allah Yahweh ara, aning-aning talibuka, deice tam erebuka, pia mikip weiknye ululeʼ tenen, biknamniake. Atalak ara, na siuk erenamniake. Aning deiyok ara, narye sik dobuka, yuk pera mutuku nang ulamika kan-kan donoknamse. Bukni wini talak ara, narye sik anang tamubuka, sik mutuku uk boyanuka deipnamne. Sik anang ara, tonoknye babye, yuk mutuku nang kan-kan, bataknyeba, kum unamake.


Anggun kanye mouplulume! Ara, na Allah Yahweh, aning-aning nirya talibuka, deice tam erebuka, Pia Mikip Weik Deiyoknye ununye birye, anggunti nyapsine. Ara, nara anggun Israel nang ati, ninye deiyok kibuka ululum nang ara, nara anggun mal olananye akunum ununa ati, anggunti wenepsinirye, weik ikin ning, anggun deice deipnamsine. Ati, na domba basam nirya ara, adiparyuk, anggun dam arye tamubuka dopropnamake. Tonda winipnirye, na domba basam atonun nang ara, yata wiribuka talak arye ikin ulamika ati, anggun ninye deiyok nang arye, malye winilamunya deice arye winibuka ati, anggun dekna ati, wenepnamsine. Anggun Israel tam deiyok nang arye ton, na domba basam atonun nang, tuba kum kalikuka weinamlume. Anggunti ton, akunum bataknamsine. Anggun bidamnye arye, anggun patan ning ati, kum arelanamlume. Anggun ninye deiyok nang arye, na domba atonun nang, malye kipdeipluma ati, narye anang lyepropnirye, tuba tonap teleb kipdeipnamne. Winipnyopura, anggun ninye deiyok nang arye, anggun din ning atonun ubuka, tuba kum obuka dinamlume.


Narye, ‘Aning ara, na pia lik ning ati, winina ara, pia meme,’ nyapse ning bukni, amalye ninguk talibuka winilamika ati, adeice arye sik mutuku noutam unyak nang ap, amutuku teleb ning ap, sik asik ap nirya ara, obuka sirya daknyopura, oldemuk kipdeipniba, tunim anauk upnamle. Winipnye deice arye, amutuku nang nirya wenepnamne talak ara, sik nirya arye, ‘Se, aning nirya ara, dipkoprob Allah Yahweh, elcuk winibukaʼ tenen, nati biknamniake.


Ati, amutuku noutam unyak nang mutuku nirya ara, Babel mutuku talibuka, ulul Raja Nebukadnesar, el amu tamuk ukirye, el pil melibuka donamake. Tonda, elce deipnamle mapu ap, el mapu arye deibikceba, dadeipdanin banamak mapu ap, sikce talibikceba, ulamikca ani, amutuku-amutuku unyak nang arye, Babel mutuku talinyak deiyok nang ati, sik pil melibuka donamake. Winibuka daulamikce bukni, na tenyamse talak akunum uplyeura, akunuma, yuk mutuku nang biti, lo arepnyeba, anang arye, Babel mutuku ninye obuka malye kibiceba, amutuku nirya alubuka dopropnamake. Atalak ara, sik yuk-yuk mutuku nang biti, lo arepnyeba, Babel mutuku nang nirya ati, obuka malye kibiceba, sik Babel mutuku nang arye talinyak ning nirya alubuka doronamake. Atalak ara, anggun Babel mutuku ululum nang nirya arye, sik yuk mutuku nang amu tamuk unamlume. Ara, anggun Babel mutuku ululum nang nirya ara, yuk mutuku Raja ninye deiyok nang arye, tapu koupsikirye, ikin pil arepsiceba, sik amu tamuk umunce, apil ara talyeuk donamlume.


Ara, sik Babel mutuku unyak nang arye, Yehuda mutuku noutam unyak nang, yuk-yuk nirya, sik deice malye-malye kibuka, ikin weik ning delilamsik ning ati, na Allah arye, sik deice tamubuka, kwang daknamne. Winipnyopura, Babel mutuku nang arye, amalye unamsiaka ati, lo arepniba, yuk-yuk mutuku nang arye, Babel mutuku unyak nang nirya, opnamake. Obicopura, sik yuk-yuk mutuku nang nirya ap, sik talinyak pia weik Raja-Raja nang ap arye, Babel mutuku nang nirya talibikirye, anggun amu tam deipnamsiake. Winipsikcopura, Babel nang arye, sik yuk mutuku nang ati, sik piluk donamake. Aning winipnamla deiyok ara ani. Ara, na Allah arye, sik Babel mutuku nang arye, pia malye-malye weik winilamik ning wenena ati, narye kwang daknamnarya! Sik taruk arye, malye winiun ning, winilamik ning atonun ubuka, narye ikin weik ning, sik nong deice deipnye deice arye, kwang daknamne. Allah arye nyabuk.


Elce tenepnukce kintinipnuk ning ara, ani. Ara, ‘Se yata ati upnuk do?’ tenen, ikin kanye bobuka unyak ninye ap, imun kanye bobikirye, malye nyabuka unyak ninye ap ati, ‘Pin-pin kanye bona ap, kanye deibuka teleb kina ap, Allah arye aninye ati winibuka aning arenamla ati, laka nyalbanamle’ tenen, wipdeipnuke. Tonda, Allah arye ninye ati, teleb kipdeipnyopura, sik aninye ukirye, ikin kanye boki bukni, batakuka, telebuk unyakce, kanye lon mot senamake. Winipmanto ning ara, aninye arye Allah tenelye touk pia diksukumuk winibikcopura, yuk nang eibikirye, nyanamake. ‘Se, aninye ara, weik yo tiklirye, taruk leklamle touk unyake. Sik aninye ara, Allah Yahweh elce koubuk yo atonun ninye unyake,’ nyanamake. Winibikirye, teleb kibuka ukirye, diksukum ninguk ukiba, yuk nang eibikirye, ‘Dipkoprop Allah Yahweh ara, weik teleb ulule,’ nyabuka el si erebuka kinamake.


Allah arye, sik Asyur mutuku nang opnamle talak ara, sik Israel nang loplobuka lyepdopnamle. Ara, Asyur mutuku nang arye weik ikin ning, sik takunya deice deiamsik ning ap, sik nong deice ikin ning deibuka, darapdongamsik ning ap ara, Allah arye anggunti, melibuka lyepropnamsile. Winipsiliba, sikce ton ap talepsikirye, ikin ning kum delinamsiake.


Winipmanto ning ara, yu weik nang arye, sik obuka, sirya dakice ninye ati, kama arye debuka olamak touk, nun obuka sirya daksik ninye arye, ikin weik, nun nong deice delilamsik ning nirya ara, Allah an mikip deice arye, akunum kum kipdeipmasilama ati, kanye deibabe. Minop talak, Gideon ap, el yin talin nang ap, ninye mitik tonunuk ulamik bukni, an meliamluma deice arye, sik Midian tam ninye mikip weik ulamik bukni, anang nirya obuka, sirya dakik touk, wini talak ara, ance nunti akunum melipmasilamba, telebuk unamabe.


Mutuku im sirya, mutuku sirya nirya, unyak ninye nirya arye, eibuka kel bikikirye, antibuk, pia si erenamkiyake. Winibuka sikce, “Se, nun ni Allah, pia teleb ulule,” nyabuka, ‘An tibuk si erenamkiyake’ tenen, moronyabe. Diba, im sirya, mutuku sirya nirya, unyak ninye arye, antibuk, “Nun ni Allah, elda pia telebuk ululnye,” nyabuka, an siuk erenamkiyake.


Nara Allah, na si Yahweh arye nyapsine. Nara, aning-aning nirya talibuka, deice tam erebuka, Pia Mikip Weik Deiyoknye ununa anya arye, narye nyapsine. Minop talak, narye Israel nang, yuk-yuk mutuku donoksiba, sik mal olan nang arye, tapu koubuka bobinamik bukni, narye sik biyik nang bulubuka, sik mutuku uk boyanuka, tuba asukumuk deipnirye, na pia teleb lek ning ap, telebuk kunuknak ap, sik talima pum noutam deipniba, telebuk ubicopura, yuk-yuk yala nang, dana-dana tam nirya arye, eibicopura, bikinamake. Na mikip ara, sik dam akunum pil dopnamna deice arye, biknamake. Tonda, winipyopura, na si erebuka, na amu tam pil donanye Yakub biti, ‘Amutuku dobuka arepnamkine,’ nyabuka, nyalin yupu deice elti, arepse mutuku uk, elce deiamukba, dadeipdanin yangalamika ani, wini talak unyak Israel nang ati, amutuku nirya arepnyopura, tuba tamubuka, sik mutuku uk, yanuka unamake.


Mesir mutuku nang arye, ‘Asia tam arye, nun mal olan nang, mal piyanamsiyakʼ tenen, Nil mek lilun bukni, keting panalyangan tam domik asik, el si Tapanes mutuku, keting noutam talak bukni, weik dua arepnyeura yalyopura, amutuku nirya kunuknamle. Mesir mutuku nang ara, mikip weik unyak bukni, narye sik mikip kum kipdeipnirye, mitang nang dem unamake. Atalak arye dipdongobuka, dounamle talak ara, Mesir mutuku nang ara, mikip weik nang tuba kum unamake. Sik mikip ulamika ati, kanye deiamikce, maknya kintinibuka ulamik bukni, narye sik mikip kum kipdeipnamne. Tahpanes mutuku ara, mirin dua arye kunukmiting alulak ara, na Allah arye arepnyeura, inipdongopnamle. Aning winiplye talak ara, sik mal olan nang yakirye, anyasik dana-dana tam ulamle mitik asik nirya ara, obuka sirya dakikirye, amutuku-amutuku kam tuba unyak nang, sal ap, kilapu ap nirya ara, tomobikirye tapu koubuka, sik pera mutuku tamubuka bobinuka, pia wenen aik dongolbinamake.


Ati ara, nara pia mikip weiknye birye, sikda na amu tam mitang nang unyaka ati, na kanye aryuk, sik kalikuka melina ati, ‘Winipnamsine,’ nyabuka, nyalin yupu deice arye, anggunti teleb kipdeipnamsine. Winipnyopura, sikda olana kumce, kanye deibuka, pia teleb kibuka unamake. Ara, amutuku noutam, sikce talibuka wininamak ning nirya ati, teleb kipdeipnamne. Tonda, amutuku noutam bai tam yu unyak kam ning nirya, kum kilina atonun, narye anggun mal olan nang, dana-dana tam nirya yakuka dopkwetepnirye, kum kipdeipyopura, anggun ‘Naʼ tenen nang ara, dan mutuku do nirya, bai tam do, pata mutuku noutam do, weik asik tam do, kanye deibuka, pia telebuk unamake. Amutuku-amutuku noutam nirya babye, ilil una kumce, teleb aryuk manamake.


Tonda, ‘Sik nirya ara, din patana pia kum unamakʼ tenen, narye sik wa wina ati, tuku nirya, pia sukun tuku noutam arepnamne. Winipniba, sik wa wibuka koubikiba, nong weik upnamlarya. Sik ti, din patana talak ton, pia sik dam, amutuku noutam kum yanganamle. Aning atonun, dana-dana tam nang, sik yuk mutuku noutam daunyak nang ton yakirye, ‘Israel nang ara, nun like. Sikda malye nang dem unyaka ati, bona patan nanguk unyake,’ nyabuka, nalibuka malye yupu ton, pia kum nyanamake.


Narye anggun malye ululum ning nirya ara, kum daneipsinirye, teleb kibuka un ninye uk, kipdeipnamsine. Winipsinyopura, anggun wa wibuka kounamlum ning, jagung atonun ning, el si gandum ara, narye nyapniba, pia teleb kibuka bongobuka paplirye, duk weik mouplibuk, weika arye libuka dinamlume. Duk pia telebuk mounamla ati ara, na mapu anggunda, din ning ton pia kum patanamsile. Kwaning patana li ton kum arenamsine.


Tonda, naryuk anggun unamlumak ati, teleb tuku tonap tabakuka arenamsine. Winipsinyopura, anggun wa wibuka kounamlum ning, ayala-ayala nirya ara, teleb ubuka paplirye, duk weik mounamle. Tonda, anggunce duk moulamlye yo, ayala-ayala nirya koupmunba, teleb ubuka bongoplirye, duk weika arye mounamle. Ara, na melinamsina deice arye, nong kipdeipniba, bongoplirye duk mounamle. Winibuka melinamsina deice arye, din ning kanye imun ning ton, pia kum patanamsile. Narye wininamsin ati, sik amutuku-amutuku nirya unamak kili sal nirya arye, anggunti tuba tonap, malye yupu kum nyanamsiyake. Anggun ti ila tuba tonap, kum nalina unamsiyake.


Asum-asum ap, wala ap, yata wiribuka do, mitik tonun ton akunum mapminyopura, narye anti ‘Wini talak winipnamlume, yuk mutuku binuka anang obuka sirya daknamlume,’ nyapnamkine. Aminyan dounamle talak ara, nyapkiniba, atalak ton tonok weik asik dam binamlume. Ara, amutuku ulamak nang ara, minop talak, anggun mal olan nang arye mal olamikak arye inipdobikce, obuka bobinamikba, pera mutuku noutam daulamika ani, keting tamun weik akunum ubukura, lopdeipsiba, tuba tamubuka sik mutuku yayikba, narye teleb kipdeipse. Ara dana-dana tam mutuku noutam, yuk nang ap ansinibuka, daulamepya ani, narye tuba sik weik asik ol dem uamuk bukni, tamubuka yanuka anyasik dobukabikce, Israel mutuku noutam daulamikce, yanuka kanye deibuka tunim abuka, telebuk ulamik. Minop talak ara, anang ara sik mutuku noutam kum ulamik. Pera mutuku noutam yuk-yuk ulamika ani, sik mutuku koproba ara asik oldemuk ulamuk bukni, narye anang bobuka, sik mutuku boyanuka deipseba, sik asik lipsisikuka dobikce daulamika ani, wini talak babye amutuku noutamuk tuba ukirye, talye kanye deibuka telebuk unyake. Wini talak ara, anggun mal olan nang ton kum yanganyake.


An talima noutam arye nyapnamlame. “Ara, yuk mutuku nang ara, weik asik domikce, daunyak mutuku bukni, ‘Nun mal olan nang yanuka opsicakʼ tenen, sik weik asik domik sukum antanapdongobuka dana-dana tam, cang keil poka kum dobuka unyak mutuku ara, nara binuka weknirye oplopnamne,” nyabuka, laka nyalanamlame. Utenepmince, ayupu ton nyalanamlame. “Ura amutuku ara, keil poka dobuka una ap, bublan tirikdongobuka una ap, pia kum unyaka ati, sik ning ara, ‘Kume nunda teleb diparyuk tunim nyabuka unyabe. Tonda nun ninye on ning nirya ara, akunum kintinibuka unyabe,’ tenenyake. Bukni, ance anang ara, sik dam binuka opnamlame.


Winipmanto ara, talye daulamle maka arye, ilil weik upliba, nong nirya lukulalamle touk, na mapu ara, Mesir mutuku noutam arye, na dam tamubuka yanganamake. Winibuka yangace talak ara, sik nong nirya sirim talinamle. Aning atouk, Merpati maka nyalamak atonun, tonda yalma maka mer weik arye, neika balamak touk, na mapu koprop Israel ninye arye, Asyur mutuku noutam arye batakuka, sik nong nirya sirim talinamleba, na dam tamubuka yanganamake. Winibuka yace talak ara, narye anggun aik ap, anggun mutuku ap, tamubuka yanuka deipnamsine. Na Allah Yahweh arye nyapsine ati, anyapmasin yupu ara, dipkoprob nong upnamle ati, nyapsine. Allah arye nyabuk.


Anggun unamlum mutuku nirya ara, narye melibuka kaleksiniba, pia telebuk unamlume. Amutuku noutam, pia teleb kibuka umunce, talye mangkau asa manamlume. ‘Se, yata ning arye do, yata mutuku nang arye, yanuka opnusiak do?’ tenen, ilil pia kum unamsile. Tonda, yuk talye bai tam yu ulamlye kam ning ara, ninye opmanto kum ulye ning nirya ara, bai basam do, yu kwatima do, yu weik kuse harimau do, aning nirya ara, anggun mutuku noutam arye dopropnirye, kum kipdeipniba, anggun dam kum olyanamsile. Aning atonun, naryuk melibuka kaleksiniba, yuk mutuku yu nang nirya arye, parang ya donogobikirye, ‘Sik Israel nang opnuyapʼ tenen, anggun mutuku noutam kum olyanganamsiake. Narye kaleksiniba, mal olan nang ton pia kum olyanamsiake.


Ilil kum unamkila deiyok ara ani. Allah arye kalikuka melisilya deice arye, nun wa win dam keil weik wamlya babye, ikin kum upnamsile. Tonda, bai tam ulul yu kam ning nirya arye, nun kum olyanganamsiyake. Ara, winipmanto ara, ton tam nang arye, yuk mutuku nang ati, ‘Teleb asa arye neika unamabe,’ nyabuka, nyalin yupu nyalalamak touk, unamaba ati nyapkine.


Ati, anggun binuka mapnumunye talak ara, ton lukdamunce, ilil kum upnamsile. Tonda, alukunyan noutamak nirya ara, talye mangkau kanye bobuka, maplukuna uk unamlume.


Abisik dam ara, bai kam yu ning do, bai singa kuse yu ning do, ninye olamle ning aning-aning nirya ara, pia kum unamake. Amalye ning nirya pia abisik noutamak kum unamak bukni, Allah arye lyepdeibuk ninye uk abisik banamake.


Anggun malye winilamlum deiyok nang ara, Israel ninye ton kum kalikinamlulume. Narye, winiryuk nang wipdeipnirye, sik deiyok kibika talipnamak nang deipniba, sikce Israel ninye talibikirye, kalikinamake. Ara, domba weina deiyok nang arye, sik domba basam ati, teleb ubuka weilamak touk, anang arye Israel ninye ati, teleb ubuka kalikikirye melinamake. Atalak ara, na mapu tonoknye babye, kum wangapnamake. Tonda, ‘Se, yata wiriptibye do?’ tenen, ilil kum unamle. Aning ara, dipkoprob winipnamne. Na Allah Yahweh arye nyapsine anya arye, aning ara nong upnamle.” Allah arye nyabuk.


Bukni, anggun Israel yala ninye ati ara, teleb daulamunya ani, aminyan talak, na melipsinya deice arye, anggun mutuku koproba, tamubuka yanuka unamlume. Ati ara, amutuku noutamak ulul mutuku ap, mutuku kon ap, lyu mutuku nirya ap, tonda anggun yo ap, tapu ap aning-aning nirya ara, bongobuka paplirye, kwapu youbuka, duk pia weik moupnamle. Wininamla deiyok ara, ani. Na ninye Israel yala ninye nirya ara, tamubuka yakirye, amutuku noutamakuk unamak ati, nyapne.


Aning nirya akunum winipnyopura, sik Israel nang yuk-yuk nang nirya ara, sik teleb aryuk, ninye olana kumce, tunim abuka, sik mutuku noutam kanye deibuka unamak talak ara, tonoknye babye, sik dam yalirye, sik deice ikin ning ton kum deipnamle! Aning nirya deice arye, sik Israel nang arye, minop talak na dam malye ulamik ning ap, sik bidamang arye, sik bidamnye atibuk, alye dakdanamaka ara, luba kibikba, narye aning nirya kum kipdeipnamnarya! Tonda, yuk mutuku nang arye anggun dam, ilil kum kililnamsiake. Teleb kanye deibuka unamake.


Na Allah arye anggunti, na kil atonun dopsinirye, tuba melinamsine. Winisiniba, anggunce na Allah Yahweh ati, dipkoprob teleb kibuka, na ap, na wininye ning ap, moubuka kel bikinamlume.” Allah arye, Israel ninye ati nyabuk.


Na Allah arye anggunti, teleb kipdeipsinyopura, winipmanto ara, sik amutuku nang nirya arye ansinibuka, teleb yala ning nemalyap arye, doknin banamlume. Winipmunyeura, anggun anggur tapu duk nirya ara, duk mounauk upnamle. Atonun, amutuku wa tuku noutam ara, anggunce kouamunye ning nirya nonguk unamle. Tonda, winiplyeba amutuku noutam nirya ara, mok weik ceplirye, pia weik tonun saknamle. Ateleb ning nirya ara, narye arepsinya deice arye, anggun tuba amutuku noutam kam unamlum ninye arye, aning-aning nirya ara, arepsinyeba, dobuka talipmunce, kanye deibuka telebuk unamlume.


Swiv nou:

Piblisite


Piblisite