Allah Yahweh elce, mok kintinibuka, im noutam deibuk ati, anggun mutuku mok cen li kiplyeura, Allah arye areplirye, mok dopkwetepsilye ura, cenamsile. Adeice arye, anggun pil donamlum ning yala-yala nirya ara, telebuk unamsile. Winipsilyopura, anggunce winimlum ning ap, talinamlum ning ara, pia weik tonun unamla ati, tia talak ati, yuk mutuku nang ati arenamlume. Anggunce yuk mutuku nang ati, arena ara, telebe uka. Bukni, anggunce yuk nang ati, “Nun ti, anggun weilulum ning ton, tia talak ati, arepsululume,” nyana ara, pia kum nyanamlume. Awinin ning ara, pia malye atia.
Yehezkiel 34:26 - Eipomek26 Ati ara, narye sik amutuku unamak nang ap, sik unamakak ap ara, pia teleb kipdeipnamne. Winipnirye adiparyuk narye, ‘Asukumuk unamne,’ tenyamse mutuku konak ara, pia teleb kipdeipnamne. Amutuku unamak talak arye, mek pataplyopura, narye mok li arepnyeura, mok weik tonun cenamle. Winipnamne deice arye, anggun ap, anggun mutuku ap ara, telebuk unamle. Gade chapit la |
Yehezkiel 34:26
30 Referans Kwoze
Ati, an unamlam mutuku selal selamle tukwak nirya ara, narye mek dikeipkiniba, mek balamlirye telebuk unamle. Tonda, selal selamle tukwak mek arepneba banamle. Na Dib Kanye ara an deice deipkiniba, ance deipminba dadeipdanin banamak ninye sik deice deipnamne. Na mikip sik deice deipniba, teleb kipdeipnamsine. Winipnya deice arye, sik un ning nirya telebuk upliba, sik aninye ara yupa pia weik upra banamake.
Tonok ning ara, narye, ‘Mok cen wala ani,’ tenelamse talak ati, mok aren talak akunum uplyopura, mok arepsinyeba cenamle. Winipniba, mok ceplya deice arye, tuku deice arye, talibuka kounamlum ning, yuk yala nirya ara, tuku namin kibuka, pia weik tonun teleb kibuka panamle. Winiplyopura, yo duk ayala-yala weik tonun mounamsile. Aning nirya ara, pia telebuk unamle.
Anda amutuku noutam balamuk talak ara, tukwak mutuku nirya, luluklamukba, im deice arye, weik mok ton celamuk. Winibuka deiyok ara ani. Ara, weik mikip Allah, Sinai mutuku deice yanuka, mambul yupu nyapdeiamsulum Allah ulyama ati, ance tukwak mutuku noutam yanulum talak ara, mutuku nirya lulukamuk. Diba, Israel yala nang nirya ati, melibuka kaliksilyam Allah, ance tukwak mutuku yalumba, mutuku nirya luluklamuk.
Nyabukce, anyalin yupu tonap dukdongopbuka nyabuk. Allah arye, Abram biti nyabuk yupu ara, ani. “Narye anti, pia teleb kipkinirye, narye melilamkiniba, ance deipminyeba, dadeipdanin balamica ani, deipnamak nang, pia weik upnin banamake. Aninye nirya ati, sik apu koproba kibuka unalame. Na mikip deice arye, an si weik arye, ereipkiniba, ninye nirya arye, anti kekepnamake. Narye melipkineba, an deice arye, yuk nang weika arye, teleb updeipnamne.
Minop talak arye, nyapdeiamsise touk, ila tuba tonap nyapsine. Ati ara, anggun talibuka umunye ning ton aupmasilyopura, ‘Aning bokuka, winibuka-winibuka arenamnulume,’ nyapsise touk, weinye kwaning ap, kam un ning ap, min yuma teleb arin ning ap, dobukapmumce, na Allah si eren aik bobuka arelyanganulume. Winipmunba, na si eren aik koproba pum tam ara, din ning weik upnamle. Kum suknamle. Narye anggunti, ‘Winibuka arenamnululume,’ nyapdeiamsise touk, winipnumunya deice arye, anggun din ning nirya ara, pia weik upnamsile. Kume kum danamsile. Na Allah Yahweh ati, ton yanuka nyapnululume. Anggunce na nyapmasin touk, winipnumunyopura, narye im deice din ning yangan bisik bublan kukeipniba, anggun dam din ning ap, yuk teleb ning ap, pia weik upliba, anggunce dopman kumce, pia weik upnamsile. Anggunce, ‘Dib do, tilila do,’ tenena kume. Piripmunyopura, eipnamlume. Aning-aning nirya weika arye, arenamsine. Na Allah Yahweh, im deice yin talin malaikat nirya, sik weik deiyoknye birye, narye nyapsina ati, dipkoprob winipnamle.
Dipkoprob nyapsine. Na Allah arye, anggun Yehuda mutuku ululum nang ap, Israel mutuku noutam ululum nang ap ara, anggun wenena ati, pia kanye imun ning areamsisiba, ikin weik ulamlume. Winibuka ulamluma ati, yuk mutuku nang nirya arye, sik elilamsikce, yuk nang ati, sulana ati nyalalamik. “Se, sik Yehuda nang ap, Israel yala nang ap ati, Allah arye subukba, kanye imun weik ning, yangalamukba, ikin weik ulamik ning ara, anggun deice ton, pia ikin ning yanamsile!” nyabuka, sulanauk ulamik. Bukni, atalak arye dipdongobuka, dounamle talak ara, na Allah arye, anggun amutuku ululum nang ati, pia teleb kibuka lyepnamsine. Winipsiniba, pia telebuk unamluma ati, sik dana-dana tam unyak yuk mutuku ninye asik nang arye, sik kayapu nang ati nyapnamake. Ara, “Se, sik Yehuda tam nang ap, Israel nang ap ati, Allah arye lyebukabukce, tuba pia teleb kipdeibukba, pia teleb wininyak touk, ‘Anggun babye teleb kipdeipsutuba, telebuk wininamlumʼ tenen, Allah moronamsiyabe,” nyabuka, teleb yupu nyapdanamake. Ati ara, na Allah arye, anggun amutuku ululum nang ati, nyapsine. Anggunda, adiparyuk talima mikip kipdopmunce, ilil kum unamlume. Kanye deipmunce, telebuk unamlume, nyapsine.
Tonda, atalak ara, Israel nang mutuku unyak nang ara, Mesir mutuku nang ap, Asyur mutuku nang ap ara, neika weik mambul tenebuka unamake. Sik nirya arye, Allah el si erena ati ansinipnamek. Sik awinilye mutuku unyak nang ara, tonok keprobikirye, neika ubica deice arye, Allah Yahweh elce, sik yuk mutuku im sirya, mutuku sirya nirya, unyak nang babye, teleb kipdeipnamle.
Tonda, aning atonun, ninye ara neika ukirye, kanye deipdatingce, teleb kibuka neika ulamting toura, pia telebe. Winipmanto ara, cang weik mutuku, el si ara, Hermon mutuku kon bukuk tam ara, beren tam talak, mok purye weik saklyopura, amutuku unyak nang eibikirye, kanye delinyake. Atonun, tukwak nang arye, neika uptingce, kanye deipdatingce, ulamting toura, pia telebe. Sion mutuku deice, beren tam talak, mok purye saklyopura, amutuku unyak nang eibikirye, kanye delinyake. Ara, talye ati kume. Deiyok ara, ani. Minop talak ara, Allah Yahweh arye, “Sion mutuku noutam unamak nang ara, pia teleb kilinamsine,” nyabuka, nyalin yupu deice arye, nyapdeiamuk. Ara, “Israel yala nang ara, aminyan doyanamle talak nirya ara, kam pia una deiyok ning arenamsine. Sikda, min kume, kum danamake,” nyabuk.
Na Allah Yahweh, aning-aning nirya talibuka, deice tam erebuka, Pia Mikip Weik Deiyoknye ununye birye, im deice tam unyak yin talen malaikat nirya, sik deiyoknye ununa ati, narye nyapsinye yupu ara, dipkoprob nong upnamlarya! Ara, aminyan talak ara, Yahudi yala nang kum bukni, mutuku-mutuku im sirya, mutuku sirya nirya arye, sik yupu koproba yuk-yuk nyanyak nang arye, Yahudi yala nang eibicopura, sik baju talibikirye, moronamake. Ara, “Se, anggun ton melipsululume! Yuk nang arye, ‘Allah ara, dipkoprob sik Yahudi yala nang ap, neika ulirye sikti, pia melilule,’ nyalamikba, kekelamupa ati, anggunda Yerusalem mutuku binumunye talak ara, ‘Nun ap ansinibuka bitibyeʼ tenen, moropsiyabe!” nyabuka moronamake. Atalak ara, winipmanto ning ara, ani. Ara, asum-asum nirya ara, Yahudi yala kum nang arye bulubuka yakirye, Yahudi yalanye tonok, el dam yakirye, ‘Bataksilirye bilyakʼ tenen, el baju talibikirye, ayupu nyanamake. Ara, “Amio, anda Yerusalem mutuku binuka, Allah Yahweh ati, el si erepnuminye talak ara, nun ap ansinibuka neika bitibyeʼ tenen, moropkiyabe. Anggunce Allah Yahweh ati, el si eremunye touk, nun babye atouk ubirye, Allah el si erenamabe,” nyabuka moronamake.
Narye aninyasik nang nirya dobuka, Sion pia lek teleb aik bobinamne. Na aik ara, ‘Ninye nirya arye, na Allah ati, anyaik yanuka moronamniakeʼ tenen, deipsa ati, narye lo arepniba, anyaik wekuka moronamniak talak ara, pia teleb kanye kipdeipsiniba, pin-pin kanye bobuka unamake. Tonda, na si erena ati, sikce domba ato ning obikirye, ‘Allah arye, nun malye winin ning kum kibuka deipnamsilʼ tenen, na mesba deice arye, uku dongobikirye, arenamniak ning ap, tonda sikce nati teleb aren ning ap, arepnicopura, sik ninye nirya arye, nati morolyangana ati wininamle,’ tenyamse. Akunum tenyamsa ati aning ara, dipkoprob nong kunupnamlarya nyapsine!
Allah arye anggun ap, anggun mutuku ap ila tuba tamubuka teleb kibuka deiplyopura, pia telebuk unamlume. Ara, sik yala ning kounamak sukum nirya ara, mek aulyeba teleb kibuka papnamle. Tonda dan mutuku do nirya, anggun weinamlum ning nirya babye maning bok dibuka unamake. Tonda, anggun weinamlum ning aning-aning nirya ara, ‘Yukak biliba ubula opsicak’ tenen, poka kum dopnamlume. Talye mole kwapmunba, banamake. Allah arye nyapnukba, na Yesaya birye nyapsine.
Anggun ulamlum mutuku ara, malyeuk dauamlya ani, Allah arye el Dib Kanye im deice weika arye arepnamsile. Arepsiliba, mek pia una kum mutuku nirya, tuku teleb kiplirye, wa tuku pia teleb upnamle. Teleb upliba, wa wibuka koubikiba, paplirye, duk moun ning ayala-ayala nirya pabuka duk mouplirye, pia weik upnamle anya arye, talye bai mutuku palamla atonun unamle.
Allah el si Yahweh arye nyapnamle. “Sion mutuku pia telebak, pia telebnye ulul mutuku noutamak ara, narye wipdeiamsinye amutuku deipne. Ara, ‘Amutuku noutamak ara, na si pia erenamniyak’ tenen, Yerusalem mutuku noutamak deipne. ‘Anye bira, tukwak im sirya, mutuku sirya nirya unyak ninye, sik ninye deiyoknye, Raja unamle’ tenen, wipdeipse.” Allah arye nyabuk.
Aning ara, talye kum nyapsine. Deiyok ara, ani. Dipkoprob, ‘Naʼ tenen mutuku, pia teleb lek mutuku deice ara, Israel mutuku kon koproba ara, na mutuku ulula ati, pia lek diamuk teleb mutuku bukukak kon ara, sik Israel yala nang, diksukum unyak nang nirya arye, natibuk si erenamniake. Na amu tamuk ukirye, na piluk dolamnikirye, na siuk erenamniyake. Amutuku noutam ara, narye sik nirya ati, ‘Naʼ tenen nang, ‘Pia unamakʼ tenen, anggunti kanye pia delinamsine. Tonda, anggun arye, ‘Allah el si erenamapʼ tenen talak nirya ara, narye, “Winamlume,” nyapsiniba, anggunce, sik pia teleb aren ning bobuka, na si erena ati arelyanganamnulume. Atonun, anggun arye kam ning obuka, uku dongobuka, arelyanganalum ning ap, anggun kanye aryuk, ‘Allah ati arepnamabe,’ tenepmunce, nati arelyanganamnulum ning nirya ara, narye dopropnamne. Winipnamluma ati ara, narye anggunti, kanye deibuka, ‘Pia teleb tenenamsine.
Winilamuk bukni, ‘Elda yatato Allah ulul do?’ tenen, laka lena ati ara, kum bataksuke. Elce nun bico ati teleb kwepdeipsuk ning ara, ani. Dua noutamak arye mok aresulule. Tonda, nun dinyap ning ara, atalak-atalak dina ati, yuk-yuk wibuka aresulule. Tonda, nun dinyap ning weika arye arisulule. Tonda, nun talima kanye delinyap ning nirya arisilibuk, ‘Kanye langdipsilyeura, pin-pin arye unyabe,’ nyalamabe. Aning-aning nirya arisilya deice, ‘Allah arye dipkoprop bico tenesulule’ tenen, kel kinyabe,” Paulus ap, Barnabas ap arye, awekmek nang ati nyaprik.
Aning ara, asipdenmanuluma ati, laka nyapsine. Kume, keting tamun nakub barye (6) akunum uplyopura, na Allah arye, anggun wa tuku nirya, pia teleb kipdeipnamne. Winipnamna deice arye, amutuku tuku nirya ara, din ning pia weik tonun panamle. Ati, din ning yala-yala nirya, pia weik tonun linamlume. Anggun wa tuku ati, pia teleb kipdeipsiniba, winibuka arepsinyopura, anggunce, tekbarye (7) keting tamun noutam ara, yala yuk-yuk ning yala nirya, kum kounamlum. Bukni, atalak ara, keting tamun winilye deice arye, dinamlum ning arepsiniba, linamlume. Ati ara, keting tamun winilye deice arye, libuka delinamlume. Adeice arye, keting tamun winilye noutam ara, aninguk dinamlume.
Dipkoprop nyapne. Ara, narye sik aninye unamakak ara, pia maning teleb ubuka palul mutuku noutamuk, binuka kintinip deipnamne. Tonda, iknapye tam ap, Israel mutuku lilun tam ap, kintinip deipnamne. Abobinuka deipnamne mutuku ara, teleb ubuka, namin arye, dikdik sebuka unamake. Tonda, sik adomba basam, Israel mutuku kon deice arye, maning teleb namin arye dinamake.
Tonda, ‘Sik nirya ara, din patana pia kum unamakʼ tenen, narye sik wa wina ati, tuku nirya, pia sukun tuku noutam arepnamne. Winipniba, sik wa wibuka koubikiba, nong weik upnamlarya. Sik ti, din patana talak ton, pia sik dam, amutuku noutam kum yanganamle. Aning atonun, dana-dana tam nang, sik yuk mutuku noutam daunyak nang ton yakirye, ‘Israel nang ara, nun like. Sikda malye nang dem unyaka ati, bona patan nanguk unyake,’ nyabuka, nalibuka malye yupu ton, pia kum nyanamake.
Bukni, anggun Israel yala ninye ati ara, teleb daulamunya ani, aminyan talak, na melipsinya deice arye, anggun mutuku koproba, tamubuka yanuka unamlume. Ati ara, amutuku noutamak ulul mutuku ap, mutuku kon ap, lyu mutuku nirya ap, tonda anggun yo ap, tapu ap aning-aning nirya ara, bongobuka paplirye, kwapu youbuka, duk pia weik moupnamle. Wininamla deiyok ara, ani. Na ninye Israel yala ninye nirya ara, tamubuka yakirye, amutuku noutamakuk unamak ati, nyapne.
Ati manusinamnya ara, dua noutamak lak uplye talak nirya ara, narye dipkoprob eipnamne. Eipnyopura, Allah arye, anggun tukwak mutuku ululum kam un ning ayala-yala nirya ati, “Mekwen arye, tonap kum opnamsine,” nyabuka, nyalin yupu nyapmasin ara, pia tenenamne. Anyapmasin yupu ara, pia kum winipnamle. Allah arye, nyabuk.
Allah an si erena ati, sik anang bisik kabul deiyok koubuka, banmakca ani, minop talak Israel nang arye, engelamik mutuku, Baka mutuku bisik bikirye, amutuku noutam bikca babye, ance anang melipminyeba, amutuku urasin tamuplirye, mek pukuka balamle atonun kibuka, deipnamlame. Tonda, amutuku noutam bacebuk, Allah arye mok areplyeba ceplirye, aminyan datalak, amutuku mekwen weik deipnamle.
Aning atonun, anggun Sion mutuku ululum ninye nirya, weik kanye deipmunce, pin-pin asa arye unamlume. Ara, anggun malye winin ning nirya kum kipdeipniba, teleb kibuka winimunya deice arye, na Allah disinirye, anggun nong deice kanye deibuka, teleb kilisunune. Tonda, narye li ning arisinye touk, dou arepmasinya ani, ton talak ara, mok aresunune. Aning atonun, ton talak ara, mok arepmasinye touk, dou li ton aresunune. Ara, min yuma talak, narye melibuka arelamse touk, wininamsine.
Na Allah arye anggunti, teleb kipdeipsinyopura, winipmanto ara, sik amutuku nang nirya arye ansinibuka, teleb yala ning nemalyap arye, doknin banamlume. Winipmunyeura, anggun anggur tapu duk nirya ara, duk mounauk upnamle. Atonun, amutuku wa tuku noutam ara, anggunce kouamunye ning nirya nonguk unamle. Tonda, winiplyeba amutuku noutam nirya ara, mok weik ceplirye, pia weik tonun saknamle. Ateleb ning nirya ara, narye arepsinya deice arye, anggun tuba amutuku noutam kam unamlum ninye arye, aning-aning nirya ara, arepsinyeba, dobuka talipmunce, kanye deibuka telebuk unamlume.
Kwapu youbuka bongon li talak kiplyopura, anggunce Allah Yahweh ati, “Mok arepsilyame,” nyabuka moropmunyopura, Allah el si Yahweh arye, dua kunukna ning arepsiliba, kunuklirye, weik mok ceplirye, tukwak mutuku saklibuk, ninya wa wibuka koulamak ning nirya bongoplirye, bok teleb ubuka palule. Winiplyopura, Allah arye tukwak im sirya, mutuku sirya nirya, unyak ninye nirya ati, bongobuka palamle ning aning-aning nirya bokeipliba, talibikirye, teleb kanye bobuka unyake.
Piblisite