Yehezkiel 33:7 - Eipomek

⁷ Aning atouk, se anda Yeheskiel, ninye sirika arye deipkiknye ulyam bukni, narye anti, ‘Israel yala nang, sik kalikina deiyoknye unamleʼ tenen, akunum wipdeipkine. Dan talak do nirya, na yupu an deice yanuka, ‘Nyapnulyame,’ nyapdeipkiniba, kekepminye talak ara, ancuk sik Israel nang dam bimince, ‘Allah arye ayupu nyapdeipnasile,’ nyabuka, laka nyanamlyame.

Yehezkiel 33:7 Referans Kwoze

Yeremia 26:2

Na Allah Yahweh arye nyapkine. Na Allah Yahweh ati, na si erena ap, na kina ap ati, aik domikcak bimince, anyasik dam tikuka ayupu nyanalyame. Ara, sik Yudea tam noutamak unyak ninye nirya ara, ‘Nun ni Allah, el si erenamap’ tenen, na si eren aik yakce ninye ati, narye, ‘Winibuka nyanamlyame,’ nyapdeipnukin yupu nirya, laka nyapnalyame. Tonok yupu babye, ‘Se, ayupu ara, bataknun,’ tenena kume. Tonok yupu babye, kum bataknalyam bukni, na nyapmakin yupu nirya ara, aninye kekenak binuka, laka nyapnulyame.

Rasul 5:20

Bobiyukura, ayupu nyabuk. “Anggun Yahudi yala nang Allah ati arilbalulum akarye el si erelulum aik damak binuka tikmunyak akarye sik awekmakce nang ati, Allah arye winiryuk kam una deiyok ning arepnamsila ati, ayupu nirya peterepnamlulume. Tonok yupu babye, ton kum bataknamalume,” nyabuk.

Ibrani 13:17

Ura, Allah diba tenena ati, ninye deiyok nang atonun usinyak ninye arye, nyasinyak yupu moubuka kekepmunce, sik amu tam bukuka, dakeiyam asa arye unamlulume. Sikce, ‘Nun amu tam unyak ninye ara, diba tenebuka teleb unyak do, kum do?’ tenen, kalikuka disinyaka ara, urdem ati kum unyake. Aminyan talak Allah arye adeiyok nang ati, asipdeliba, sik pil nirya ati, “Winilamubu, winilamubu,” nyabuka laka nyabikiba, Allah arye anang ati, yupu lipsisikuka bokeipnamle. Kekena kumce mandipna dopmunyopura, anggun deiyok nang ikin kanye bobicopura, anggun babye anggun bidamang ati, malye winililanamlume. Ati, anggun deiyok nang arye melibuka dosinyak pil noutamak nirya ara, ‘Telebuk unyabe, nun deiyok nang arye, kanye deibuka unamak’ tenen, anggun deiyok nang arye nyasinyak touk, kekebuka dobolbanamlume. Sik yupu yanina meme.

Yeremia 1:17

“Ati ara, Yeremia an adiparyuk kintinipnamlyame. Aninye sik unyakak bimince, na nyapmakin yupu nirya binuka laka nyapnulyame. Ance sikti, ilil una kume. An baju ongopdopmince, yaribuka, ayupu nirya sik kekena ak binuka nyapnulyame. Abinuka nyapnuminye talak ara, na mikip weik an deice arepkiniba, binuka nyanamlyame. Bukni, ance sik aninye ati, ilil upkilyeura, narye alye un deiyok ning arepkiniba, amutuku ninye elinamakak arye, alye dakanamlyame. Ati, sik Yerusalem mutuku unyak ninye ati, ilil tenena kume.

Yesaya 62:6

Na Allah arye, Yerusalem mutuku weik asik warikdongobuka cang keil poka dobik deice, ‘Nun mal olan nang arye, yanuka opsicakʼ tenen ati, kalikna deiyok nang ton wipdeipniba, anggun amutuku noutam ululum ninye ati, kalikinamsiake. Sik anang ara, keting noutam babye, lukunyan babye, talye mangkau asa kibuka, tunim abuka kum unamake. Bukni, pia tuba-tuba, na Allah Yahweh atibuk tenebikirye, “Nun ni Allaho, ance nunti, nyalin yupu deice arye, ‘Winibuka teleb kipdeipnamsine,’ nyamsulum ning ara, tuba teninauk unamlulume,” nyabuka, unamake.

Kidung Agung 5:7

‘Na kanye delinunye bira, dan mutuku binmal do?’ tenen, aik batakuka binmasirye, anyaik dolamika nirya ara, banmasirye dinmasiba, amutuku kalikna deiyok nang arye, eipnik. Eipnikce, ‘El akil ara, yata ati, lukunyan noutam arye, yanuka nun mutuku kalikinmalce banmal do?’ tenen, yu upmoka ati, sikce na nong deice onmanike. Diba, nun mutuku dana-dana tam aknapdongobuka domik keil poka, deice tam banmekce, kalikna deiyok nang arye talipnikce, na nong deice kulabuka, opmanikce, na kisok kaluna ati, kwatipmase cang baju kwiribuka doprobik.

Efesus 4:11

El Kristus aryuk, ‘Apil, yala-yala nirya donamak’ tenen, el mikip deice arye, pil dona deiyok ning yala yuk-yuk bokuka, tukwak ninye ati arepsuk ning ara, ani. Allah yupu dobuka peterelbana ati, deiyok koupnamik Rasul nang ap, “Allah yupu ani,” nyanyakce, aminyan winipnamle ning lak lena nabi nang ap, Allah ati dib kum tenenyak ninye, ‘Dib tenepnamak’ tenen, peterelbana nang ap, Allah ati dib akunum tenebik ninye, sik deiyok nang ap, Allah yupu sekik ning peterena nang ap, apil dona deiyok ning nirya, el mikip deice arye, bokuka yuk-yuk arepsuke.

1 Korintus 15:3

Aning ati ara, Allah el laka teleb yupu weik mambul deiyoknye bira, elce nyapdeipnukba, anggun kekena ati peterepsise touk, tonap nyapnusine. Minop talak Allah el yupu laka nyalamik nang arye, sekeiyamsik touk, Yesus Kristus arye, nunti, ‘Sik malye winina ap, tenena ap ati, kum kipdeipnirye lyepnamne’ tenen, nun pununa ati dibuk.

1 Korintus 11:23

Paulus arye, nyabuk. Nun Deiyoknye Yesus arye, nyapdeipnukba, anggun kel bikna ati, peterepsise yupu ara, aupmala anya arye, anggun winimunye ning ara, “Malye winilulume,” nyabuka, talye kum nyapsine. Bukni, Yesus arye, nyapdeipnukba, peterepdongopsise ning ara, tonap nyapnusine. Yesus arye, winibuk ning ara, ani. ‘Malye nang arye opnamak’ tenen, Yudas Iskariot arye, ninye yupu laka nyalbiyuk lukunyanuk, Yesus arye, roti kwaning doptalibuk.

Rasul 20:20

Anggun kele. Yata yupu do anggun melipsutuba kel bikmanto yupu duknubuka kum winilamse. ‘Yata nyapniting do?’ tenen, na nong dipdongobuka kum winilamse. Kume. Ninye nirya kekelamikak ap, tonda, sik aik yuk-yuk nirya wekra balamsirye, lakauk peterelamse.

Mika 7:4

Ati, sik amalye weik wininyaka deiyok nang arye, yuk nang nirya ati, malye winilinyake. Winipmanto ara, taca ning luksiliba, lik ulamsil touk, malye winilisinyake. Tonda tace ning, weika arye papliba, cang weik akunum upliba, tilib weik uplirye, ninye arye abisik kum binmanto ulamap touk, sikce teleb ban bisik sekelongosinyake. Mitik teleb ubuka unyak deiyok nang babye, pia kwanim bisik banyaka ati, sik nirya ara, dipkoprob malyeuk wininyake. Winimunya ati, Allah arye anggunti. weik arye wenepnusile. Anggun malyeuk winimunya dekna ati, Allah arye yupu bokeipsilirye, wenebuka oplopnamsile. Wini talak akunum dam uple nyapsine. Ara, Allah arye, “Sik amalye unyak ninye ati, malye kipdeipnamle,” nyapdeiamuk talak akunum dam uple.

Yeremia 31:6

“Aning nirya wininamlume,” nyapmasina ara, urdem ati kum nyapsine. Deiyok ara, dipkoprob na tenepse talak akunum uplyopura, amutuku kalikina ninye noutamak, tonoknye birye, Efraim mutuku noutamak yukupnamle. Ara, nyapnamle. “Anggun nirya yangalulume. Nun nirya tuba tamubuka, Sion mutuku binamabe. Ara, nun ni koproba Allah, el si Yahweh, el si eren aik dam bibirye, el si erenamabe,” nyabuka yukupnamle.

Yeremia 23:28

Ati nyapsine. Sik tilila nabi-nabi nang arye, ‘Lengdar mapsa deice, Allah arye yanuka nyapmanu yupu ara, ani,’ tenebikirye, nyapnamak nang ara, danyanamakca. Bukni, ton nabi-nabi nang ara, dipkoprob narye yupu nyapdeipniba, laka nyapnamak nabi-nabi nang ara, ‘Narye, nyanamlyame,’ nyapdeiamse touk, kum bataknamaka ati, sikce diksukum yupu uk nyalamtinge. Winipmanto ara, ninye arye dipmanto ning, el si gandum ara, talye palamle ning mutmuta atonun kum ulule. Aning bitinye atonun kum ulule. Atouk, narye nyasinye yupu ap, tilila nabi-nabi nang arye talye nyaltakanyak yupu ap, atonun kum ulule. Ati, ‘Sikce nyasikce yupu ara, dipkoprob do, tilila ning do?’ tenen, pia moubuka teninamlume. Na Allah Yahweh arye nyapsine.” Allah arye nyabuk.

Yeremia 6:27

Allah arye Yeremia biti, ayupu nyabuk. Yeremia, winipmanto ara, ninye arye, ‘Uang logam, keil duk pia teleb ning eiptinye’ tenen, asilelamak touk, narye na mapu koprop Israel ninye ati, asipdenamne. Ara, ‘Sik malye wininyak ning ara, aning nirya bataktingirye, telebuk winin ning ara, dan do?’ tenen, winipnamne. Winipnamna ati, an wibuka deipkine. An dopdeipkinirye, Israel ninye, sik kanye noutamak tenenyak ning ara, yata tenenyak do? ‘Yata wiripnamak do?’ tenen, ance sikti, asipdenamlyame. Ati, Yeremia anuk dopdeipnamkine.

Kidung Agung 3:3

Na dopnamnilanye kum eipse bukni, amutuku weik asik noutam dipra balamse talak ara, amutuku nirya kalikna deiyok nang arye, na dam yanmek ati narye, ‘Amapo, nara weik tonun bico tenenunye bira, anggun ton eipmalum do, kum do?’ nyabuka, asipdese.

2 Tawarikh 19:10

Anggunce apil talebuka yupu bokolinamlum talak nirya ap, yupu lipsisikuka bokonamlum talak nirya ap, anggun kayapu nang, amutuku unyak nang ati, nyanamlume. Ara, anggun nirya arye, Allah Yahweh ati malye-malye kum wininamlume. Elce, ‘Aning ara wininamlume, aning ara kum wininamlume nyaipsuk yupu ara moubuka wininamlume. Ati, yata ning do nirya, ninye arye opdakceba, ining saklamle ning ap, wenen yupu deice arye mem nyalin ning ap, Aning winina meme, aning ara winina telebe nyan ning ap, Aning-aning nirya ati akunum nyapdeibuk ning ap nirya ara, aning nirya moubuka wininamlume. Nun mutuku noutam unyak nang nirya ati, nyanamlume. Sik nirya arye, Allah Yahweh ati malye kilina ara, pia meme. Malye ning winipmunyeura, ‘Allah el yu ara, anggun deice ap, anggun kayapu nang deice ap, ikin ning deipsilyak arye, wenepsilyakʼ tenen ati nyapsine. Bukni, narye, ‘Winipnamlume,’ nyapdeipsin yupu, moubuka winipmunyeura, anggunce malye un ning talebuka, kum wininamlume.

1 Raja-Raja 22:14

Nyapdeibuk bukni, sik bitinye min kum yanaprik talak ara, Mikha birye el yupu bobinmoknye biti nyabuk. “Nara yuk ning ton kum nyapnune. Allah el si Yahweh ara, pia Kam Una Deiyoknye dipkoprob ulule. Ati, Yahweh elce nyapdeipnunil yupu uk, dipkoprob aninguk, binuka nyapnuna,” nyabuk.

Yesaya 21:11

Dumah mutuku ati, Allah arye, “Winipnamne,” nyabuka, na Yesaya dam nyapnuk. Ara tonoknye, Edom mutuku noutam ululnye birye, nati yukupnukce ayupu nyamnuke. “Se, na kalikinanye, alukunya ara, tuba inipmal do? Berekna ati ara, yata barye talak uplyeba, bereknamal do?” nyabuka asipnuke.

Habakuk 2:1

Nara, ‘Allah arye nati, yata yupu tamubuka nyapnamnil do?’ tenen, dinirye kekepra unamne. Winipmanto ara, ninye kalikna deiyoknye birye, ninye dina ati, kalikna aik, cang aik domica, dup weleplirye, ‘Yuk nang pera mutuku arye yanamak do?’ tenen, dana-dana tam kalikuka dilamle atonun, unamne. Dipkoprop ara, narye Allah ati, ‘Yata deiyok ati, sik Kasdim mutuku ninye wiplumba, amalye nang arye, nun Israel ninye ati, wenepnamsiyak do?’ nyabuka asisinyak ning ara, ‘Allah arye, yata yupu nyapnamnil do?’ tenen, kekenmanirye dinune.