Yehezkiel 33:11 - Eipomek11 Nyapminyopura, an Yeheskiel birye, sikti, ayupu ton tabakuka nyapnalame. “Na Allah ara, dipkoprob pia kam unune. Aning ara, dip ulamle touk, adeice arye, adipkoprop yupu ton nyapsine. Na Allah Yahweh, aning-aning nirya talibuka, deice tam erebuka, mikip weik ununye birye nyapsine. Sik malye wininyak nang ara, sik tuba malyeuk unyak talak aryuk, dekenyak nang ara, na kanye kum delinune. Kanye teleb unulul ning ara, ‘Sik malye unyak nang arye, sik malye winin ning ara, bataktingirye, tamubuka na dam yakirye, teleb aryuk ubikirye, kam unamakʼ tenen, kanye deibuka teninune. Ati ara, “Se, anggun Israel yala nango, anggun tuba malye winilulum ning ara, adiparyuk batakmunce, tamubuka na damuk yalulume! Yata ning deiyok ati, malye winipmunye deice aryuk, anggunda dipnamlum do?” nyabuka laka nyapnalame. Gade chapit la |
Yehezkiel 33:11
35 Referans Kwoze
Tonda, el malye ninguk winilamlye, adiparyuk diplirye biti, na Allah arye kanye deilinun do? Kume, malye wininyak ninye dibicopura, na kanye kum delinune. Aning ara, ‘Se sik bicoe,’ tenenune. Kume, narye tenenun ara, ani. ‘Sik malye unyak ninye nirya ara, sik malye ning bataktingce, dipkoprob pia diksukumuk ubicopura, kam ulamtinge,’ tenenune. Nara Allah Yahweh, aning-aning nirya talibuka, deice tam Pia Mikip Weik, Erena Deiyoknye unirye, ‘Winipnamne,’ tenepnye touk wininuna anya arye, na nyanye yupu, nong dipkoprob ulule. Nara, Weik Erenanye birye nyapsine.
Aning ati ara, ‘Yesus tukwak mutuku tamubuka yanamle,’ nyalilamuk yupu ara, yuk nang arye, ‘Kume, Allah arye nimalya ap asa aryuk, pil donamsile,’ tenenyak atonun, anggunce aning kum tenenamlulume. Yuk nang ara, ‘Allah arye nimalyap asa pil dolule,’ tenenyak touk, pia kum tenenamlume. Aning kum bukni, Allah arye, sik nirya ati, ‘Se, aninye mutuku sirya, im sirya nirya, sik malye wininyak ning nirya, bataktingce, tamubuka diksukum bisikuk, binuka utingura, tonoknye babye, sik malye winina deice arye, nirya dibuka, kum danana kume,’ tenesulule. Utenesulula ati, tenepce adiparyuk, wenena kumce, aning-aning nirya kum kum danipmasile. Ati, elce nunti eibuka, ‘Yata wiripnamak do?’ tenen, nimalyap arye, dinauk usulule.
Bukni, yatanye do nirya, ‘Kel pia weik kina deiyok ning, na walwal’ tenen, na ap kum epdanimnyopura, elce el mining nong ati, malye kililalule. Aning atonun, nara pia weik kel bikna deiyok ning ati, ‘Aning ara na like’ tenen, nati batakaninyak ninye nirya ara, dipkoprob dipna deiyok ning atibuk, kanye delinyake. Aning atibuk, kanye delinyak ninye ara, ‘Dibina deiyok ning doproptibye’ tenen, patalibuk sik bidamnye arye, kintinilinyake. Kel weik kina deiyok ning arena deiyoknye birye, ninye tukwak ninye nirya ati nyabuk.
Narye anggunti, “Aning ara malye winipmalame,” nyabuka, wenepsise ning ara, kum kekenululume. Narye, anggunti, “Aning ara, malye umunye ning ara batakso,” nyabuka wenelamse ning, akunum kekepnutum toura, narye anggunti bico tenebuka, pia weik kel kiamsa deice arye, na kanye talima pum tam tenenun ning nirya laka nyapsitinyeba, akunum bikamtume. Bukni, na nyasinye yupu nirya ara, pia kum kekenululume.
Se, anggun nirya, Allah dam akunum bataklum nang ara, tuba tamubuka, el damuk yanamlume. Elce anggun teleb kipdeipsilirye, malye ning nirya ara, lyepdosilirye, kum kipdeipsilyeba, el yupu moubuka talipmunce unamlume. Winipmunyopura, anggunce nyanamlume. “Diba, winida nun akunum tamubuka, Allah Yahweh, el dam yayabe. Ati, dipkoprob elda nun ni koproba Allah,” nyanamlume.
Nyabukopura, ayupu tonap dukdongobuka nyabuk. Allah arye, ‘Se, anggun malye winimunye ning ati, wenenamsine,’ tenesunun bukni, na kanye mitik anun teniltona tuba unulule. Ara, narye anggunti utenesunune. Se, Efraim yala ninye ara, yata wiribuka narye sikti, bataktinye do? Bataksineba, yuk pera mutuku unyak yu nang arye obuka, sirya daknamsiyak do? Aning atouk, anggun Israel yala ninye babye, yu arye bataksineba, yu nang arye obuka, sirya daknamsiyak do? Tuba bico tenesununa ati nyapsine. Tonda, sik wenena ati, Adma mutuku ulamik ninye ap, Zeboim mutuku ulamik ninye ap ati, weik arye wenebuka oplopse touk, anggun babye aning batakuka wenepnamsin do? Narye, ‘Diba malye weik wininyaka anya arye, weik arye wenepnamne,’ tenenye deice arye, na kanye bokoltonulule. ‘Aning winipnamne do, kum do?’ tenen, kanye bokoltonulule. Ara, urdem ati kume. Na Allah arye, anggun Israel ninye ayala-yala nirya ati, weik arye bico tenesununa ati, nyapsine. Bico tenesununa deice arye, na talima noutamak ara, tamunulule. ‘Malye weik winibikirye, anggun ati batakuka wenepnamsine,’ tenepse bukni, weik arye bico tenesununa anya arye, wini talak ara, na kanye tuba ton yuk tenepne.
Ati ara, anda Yeheskiel birye, sik Israel yala nang nirya ati, lak nyapnalam yupu ani. Anggun ni koproba Allah Yahweh, pia deice tam erebuka, aning-aning nirya talibuka Pia Mikip Weik Deiyoknye ulirye, anggunti nyapsile. Ara, anggun malye weik winilulum ning nirya ara, adiparyuk batakmunce, amnyok kanipdongobuka, tamubuka na damuk yanamlume. Winipmunce, anggun si erelulum isa ap, patung memebuka, deilulum ning ap, aning ati, pia malye weik winilulum ning, pia weik tonun talye winilulum ning nirya ara, adiparyuk batakmunce, na dam tamubuka yanganamlume.
Na nio, na dipkoprob nyapkine. Nun tukwak nang nirya ara, aminyan dipnamabe. Winipmanto, nunda mek tukwak deice diksaklirye, balibuk tamubuka, tonam kwebikirye, kum diklamaka atonun upnamsile. Bukni, Allah elce, ‘Anang ton optinye,’ kum tenelule. Aning kum bukni, yatanye do nirya, el dam tuba kum unyak nang, malye winipbikceba, elce yakliba, pera mutuku binuka unyak nang ati ara, elce, ‘Se, yata wiriptinyeba, anang nirya, na dam ton tamubuka yanganamak do?’ tuba tenesulule. Allah el pil dosilya deice arye, anang tamubuka boyangalule. Ati ara, na deiyoknye, ance yaklumba, yuk mutuku biyuknye bira, ‘Tamubuka yalule,’ nyaptumura, el adiparyuk tamubuka, an dam yanamle,” nyabuk.
Aning ara, Musa sekamuk buku noutamak arye, “Anggunda, malyeuk tuba winipmunyopura, dipkoprob weik kanye imun ning dopropnamlume,” nyapdeiamlumba sekamuk. Ayupu nyapdeiamsulum touk, wini talak ara, Allah ance nun wenena ati, ikin ning, nun deice delinmasilame. Wininmasilambuk, nunce nun ni koproba Allah, an Yahweh ati, ‘Diba aning ara, nun bidamang malye winilamupa dekna ati, ikin ning dopropmabe,’ tenena kumce, tamubuka an dam malyeuk updeipkupu. Ara, nunce, ‘Nun malye wininyap ning nirya ara, batakibirye, Allah el dipkoprob yupu uk talipnamabe,’ kum tenebupe. Tonda, Allah ance, ‘Aning ara, wininamlulume. Aning ara, pia kum wininamlulume,’ nyapsulum ning ara, moubuka kum talibupu.
Ati ara, diba nara, anggun ni koproba Allah Yahweh, aning-aning nirya talibuka, deice tam erebuka, pia mikip weiknye unirye, ayupu ara nyapsine. Na dipkoprob pia kam unye touk, anyapnusin ning ara, dipkoprob upnamle. Dipkoprop wenepnamsila deiyok ara, ani. Anggunce na si eren aik pum tam, Pia Teleb Lek Aik ati, pia malye updeipnamlume. Anggunce, pia malye weik ning, talibuka winilulum ning ap, talye ning ati, ‘Nun ni koprobaʼ tenen, isa si erebuka moromunye ning ap deice arye, na si eren aik, akunum malye kilinamlume. Winimunya ati ara, narye anggun nirya ati, pia bico tenena kumce, wenebuka oplopnamsine. Tonda, narye anggunti, ‘Se, anggunda ‘Naʼ tenen, nang umunya anya arye, bico tenepsinirye, anggunti teleb kibuka melilamsise touk, tuba kum wininamsine. Aning kum bukni, oplopsinirye, kum kipdeipnamsine.
Ara, minopce Damsyik mutuku ulamik ninye ap, anyapce Yerusalem mutuku ulamik ninye ap, Yudea tam nang ap, tonda Yahudi Yala kum ninye ap ati, ayupu peterelamse. “Anggun nirya anggun malye ululum ning batakuka, anggun kanye yuk punupmunce, balye tamubuka, Allah el tamuk kipdopnamlulume. Anggun kanye tenena winiryuk ning punupmaluma atonun, yuk talak babye, anggun winin ning nirya pia funguk unamlume. Ara, yata nang do, nirya eipsikirye, ‘Sik malye ulamik ning nirya akunum batakika ati, wini talak nirya ara, diksukumuk unmak ani,’ tenepsikirye, kel kipnamsinyak ati, ayupu nyapne.” Ayupu nyapsirye peterelamse.
Winipnaman bukni, sik kan-kan arye, na weik dirina ap, narye pia weik mambul pil dolamse ning ap, elilamik bukni, nati dib kum teneninyak kili sal nirya ati, wenepnamne. Deiyok ara ani. Dipkoprop nara, Kam Una Deiyoknye unune. Tonda mutuku sirya, im sirya nirya dipkoprob na weik mambul pil donun deice arye, na weik dirina ap, mikip ap, lak kiliba ninye arye elinyake. Abitinye ning arye, dipkoprob nyapsine. Min arye Mesir mutuku noutamak ap, mok cena kum ati ninye kum ulamik mutuku noutamak, Israel kili sal balamik sukum, ninye winipmanto kum pil ap, pia mambul pil ap, dolamsibuk, elilamnik ninye ara, anang dipkoprob wenebuka opnamnarya, nyapkine.
Ati, tikukapmunce, sik ulamikak dana-dana tam ton dipdenamlulume. Anggun mapu nirya ara, tamubuka anggun dam anyuk akunum yanganmake. Aning ara, dipkoprob nyapsine. Na Allah Kam Una Deiyoknye birye, dipkoprob nyapsine. Anggun mapu anggun dam anyuk yacopura, kanye pia weik deipnamlume. Winipmanto ara, ninye dopnamalye kil kwerya dobuka bukmaliba, eibikirye kanye delilamak touk, anggun mapu tamubuka yacopura, anggunce kanye deibuka unamlume.
Nara Allah Yahweh, nara pia erebuka, deice tam ununa ati, aning-aning nirya talibuka, Pia Mikip Weiknye ununa anye arye, nara Raja unune. Tonda, im deice unyak yin talin malaikat nirya ara, sik deiyoknye unune. Tonda, na Allah Yahweh ara, Kam Deiyoknye ununa ati, ayupu ara, dipkoprob nyapsinye touk, na nyapnusin yupu babye, dipkoprob nong upnamlarya. Ara, winipmanto, yuk-yuk mitik mutuku kon erebuka, amutuku noutam bukuk bukni, Tabor mutuku kon ara, pia weik tonun erebuka bukuk touk, pia mikip weik nang yanganamake. Tonda, weik laut mekwen adeibuk bukni, Karmel mutuku kon aning deice tam belebuka bukuk touk, yuk mutuku yu nang mikip arye, amutuku nang dam yanuka opnamsiake. Akunum yangopura, sik mikip deice arye, amutuku nang nirya ati, opnamsiake.”
Nara Allah Yahweh arye, pia kam ununa ati, na si deice arye, pia dipkoprob nyalin yupu uk nyapdeipsine. Ara, Yehuda yala nang talibuka ulamuknye, Raja Yoyakim, el mi Raja Yoyakhin biti nyapne. Lak kilina ati, na sirik taruk duk deice, cincin dongolamsiba, ninye nirya aning eibikirye, ‘E, anye bira, dipkoprob weik deiyoknye Raja ulule,’ tenenyake. Anda, acincin atonun dongoptumce, na taruk duk deice dongopnutuma babye, aning dobuka donoknamtinye. Deiyok ara, anda Raja weiknye ulyam bukni, wini talak ara, aning ara, an dam arye dopropnirye, donoknamkine.
Ati ara, ‘Musa ance sik amalye winin ninye kekepnamak’ tenen, nyapnamlyame. Allah arye nyapsile. Amalye nyanyak nang arye nati, ‘Se malye upnamsil do? Ikin weik unamap do? Amalye mutuku noutamak dipnamap do?’ nyabuka, nati asilelamnik ning ara, anyalamnik atonun ati, dekna arepnamsine. Sikce nati nyalamnik touk, aning dobuka, sik nong deice deipnamne. Tonda, ‘Aning dipkoprob winipnamsil do kum do?’ tenena meme. Dipkoprop nyapsine. Nara, Allah Kam Una Deiyoknye ununa ati, ayupu dipkoprob nyapdeipsinye touk, upnamlarya nyapsine.” Allah arye nyabuk. Nyabukce, ayupu ton tabakuka nyabuk.
Na Allah Yahweh, aning-aning talibuka, deice tam erebuka, Pia Mikip Weik Deiyoknye ununye birye, im deice yin talin malaikat nirya ara, sik deiyoknye unune. Narye dipkoprob nyapsine. Nara Allah, anggun Israel nang yala-yala nirya talinirye, anggun deiyoknye unune. Narye anggunti, melibuka kalikisiniba, anggunce, nati si erenululume. Nara dipkoprob kam pia ununye. Na si deice arye dipkoprob nyapsine. Moab mutuku unyak nang ap, Amon mutuku unyak nang ap, narye obuka, pia kum kipdeipnamne. Ara, minop talak, Sodom mutuku ap, Gomora mutuku ap, amutuku pia malye weik ulamik nang, sik wenena ati, obuka kum kipdeiamse touk, winipnamne. Sik mutuku noutam unyak nang nirya ap, aik ap, akunum wenebuka kum kipdeipnyeura, oldemuk upnamle. Aminyan talak ara, talye garam ulamla atonun upnamle. Tonda, bai tam talye palamle taice palamle atonun kibuka upnamle. Amutuku nirya ara, dakuka bataknyeba, pia malye mutuku upnamle. Winiplyopura, na mapu koproba, sik Israel nang ara, mitik tonun tuba kam aunamak nang ara, sik Pilistin nang taleamik mutuku nirya, alubuka doprobikirye, asukum unamake.
Allah yupu noutamak nabi Yesaya birye sekiamuk yupu ton laka nyapnusine. Ayupu ara ani. ‘Allah arye nyabuk, “Na dipkoprop unye touk, anyapnusin yupu ara aminyan talak dipkoprop wininamle. Aminyan talak yata mutuku ninye do, sik nirya arye na si erena ap, na amu tam unyak ninye nirya ap ati, gutam tuku dipdongobuka na siuk erenamniyake. Sik nirya winikirye, nati, nyanamake. ‘Dipkoprop anye bira, Allah ulule. Nun nirya ara malye nanguk unyabe,’ nyabuka, na si erenamniyake.” Allah arye nyabuk.’ (Yesaya 49:18; 45:23)
Nara pia dipkoprob yupu nyapsine. Na Allah Yahweh aning-aning nirya talibuka, deice tam erebuka, Pia Mikip Weik Deiyoknye birye nyapsine. Ara, an kwitcapu kilapu atonun nang, sik Sodom mutuku ulamik nang ap, sikce deiamik nang nirya ap, pia malye weik winilamik touk, an babye aning atonun winilyame. Tonda, sikce kum wininyak ning ara, an ap, ance deiplum nang ap, angguncuk malye weik ton ap, tabakuka winilulume.
Dipkoprob nun ni Allah elda, pia deice tam erebuka, aning-aning nirya talibuka, mikip weiknye ulule. Nun tukwak mutuku nang arye, ‘Se, Allah el weiknye ululak binuka eiptinyeʼ tenen, pia eptibya babye, Allah el dam ara, nunce binmanto kum usulule. Allah elda pia diksukum telebuk ulule. Elda mikip weiknye ulirye, ninye tukwak nang ati, yupu bokosulul bukni, talye yupu nyaltakana kum bukni, pia diksukum kibuka yupu nyasulule. Allah elce nun tukwak mutuku unyap nang ati, deiyok kum upmalye ning ati, ton ikin ning ara, nun deice ton pia kum delisulule. Diksukum un ning ara, pia kum batakalule.
Allah Yahweh arye, ayupu ara, na dam yanuka nyapdeipnuke. “Ance Israel mutuku nang, kekenak binuka nyapnamlyame,” nyapdeipnuke. Ayupu ara, ani. Se, Israel nango, pia ikin kanye bobuka kum ululum nang ati nyapsine. Tamubuka na damuk yanamlume. Nara anggunti, pia bico tenenanye unune. Tonda, anggunti tuba yu pia kum teninamsine.
Ton wini talak ara, anggun Israel yala nang arye, Nun ni koproba,’ nyabuka, na si erenululum Allah ara, im deice unyak yin talin malaikat nirya, anggun deiyoknye ununa ati, na mikip weik unune. Nara, Allah Yahweh arye anggunti, asipdenmasine. Yata deiyok ati, anggun bidamang nang ati, malye kilin ning dobuka, anggun nong deice delilalulum do? Winipmanto ara, anggun bidamang arye, olilan ning dobuka, anggun deice deipdalumce, kanye imun usulul do? Malye weik tuba winipluma deice arye, wenepsiliba, anggun Yehuda mutuku noutam ululum nang ara, sal babye, kilapu babye, tonda anggun mapu babye, sik pia mitik mapu babye nirya ara, kum danamle. Anggunce, ‘Kume, nun yala nang kum daliba, tonok babye kum unamabe,’ teneplumce, malye weik tuba winilulum do?
Allah Yahweh arye, “Yehuda tam unyak ninye, weik arye wenepnamne,” nyabuk bukni, ayupu nyabuk talak ara, nyabuk. “Anggun malye winilulum ning nirya, batakmumce, anggun kanye talima nirya, na deiceuk deipmunce, ‘Se nunda malye winilamupu ninye’ tenen, din dina kum arye, si tebuka umunce, nati ngalukuka engepnumunce, moropnumunyopura, kekepsinirye, lyepropnamsine,” nyabuk. Nyabukce ayupu ton nyabuk.
Tonda, anggunda yata ati, na yu kilinululum do? Anggun Mesir mutuku yanuka, akunum aumunya ara, ninye asik nang yanuka ululum bukni, sik amutuku nang arye, talinyak isa si erena ati, anggun Israel nang arye, domba ato ning obuka, arelyangalamlumce, talye ning ati, si erelulume! Anggun mining deiceuk, malye kipdalumba, aminyan talak sik mutuku sirya, im sirya nirya unyak nang arye, anggun Israel yala nang ati, ‘Se, sikda pia malye nang unyake,’ nyabuka, akutubuka nalinamsiyake. Tonda, yuk nang arye, anggun si ati ara, ‘Sikda subuk nang,’ nyapnamsiaka ati winilulum do?’ nyabuka, malye yupu nyanamake.
Piblisite