Yehezkiel 32:24 - Eipomek

^24-25 Tonda, Elam mutuku yin talin nang ap, sik amutuku ulamik nang babye, min arye ninye olanak arye obikba dipneura, weilamikak, asukumuk yayikce aunyake. Asukum manyaka dana-dana tam, dukdongobuka deipmekak, diamik nang ton, asukumuk unyake. Sik anang nirya ara, mal olanmeka ani, obikura diamik. Sik nirya ara, Allah ati diba tenena kum nang ati, deiamikba, asukumuk Sheol mutuku yayik. Sik Elam mutuku diamik nang ara, tuku palibuka wiamik bukni, sikda pia malye-malye weik ulamik nang ati, Sheol mutuku pia amu noutam binuka deiamik. Sik anang kam tuba ulamik talak ara, amutuku-amutuku noutam ulamikce, yuk ulamik nang ati, yu kibuka, malye weik ulamika ati, sik dana-dana tam ulamik nang nirya ara, sik anang ati, ilil pia weik ulamukba, sik nong sirim talilamuk. Bukni, sik yuk nang mal olanak arye opniura, dipnarye, wekelbalamikakuk, Sheol mutuku biyik. Ati ara, Elam mutuku nang ap, amutuku akunum min arye yayik nang ap, sik nirya babye, alye dakdayik.

Yehezkiel 32:24 Referans Kwoze

Yehezkiel 32:30

Asukumuk, dabu tam, (arah utara) mutuku ulamikce, ninye deiyok kibuka taleamik nang ap, tonda Sidon mutuku ulamik nang ap, sikce talibuka ulamikak, min talak sik yu weik ulamik nang ati, sik mikip deice arye, malye winilamik ning ati, yuk nang nirya arye, ilil ulamuk. Bukni, wini talak ara, sikda asukumuk unyaka ati, sikda alye weik dakalanyake. Ara, Allah ati diba tenena kum nang ap, ninye olan talak, ninye on parang ya arye oplobikce, tuku deice deliltakalamik nang ap, tonokak ukirye, alye dakalanyake.

Yehezkiel 32:18

Se, Yehezkiel anda ninye sirika arye deipkiknye ulyame. An ap, yuk mambul weik mutuku unyak nang, sik kilapu ap, anggunce Mesir mutuku nang ap, sik yin talen nang yupa kum nukmanto nirya ap ati, tenipmunce engenamlume. Ara, sik Mesir mutuku nang nirya ati, sik nirya babye dibuka, akunum diamik nang arye tuku pum tam mutuku, el si Sheol, wekelbanyak nang damuk, boyanuka dopkwetepniba, wekelbanamaka ati, nyapsine.

Yehezkiel 26:20

Atalak ara, narye winipnamne. Anggun nong ara, dopdeipsinyeba, minop talak akunum dibilamik nang, sik kanye binuka ulamlye ak deipnyeura, unamlume. Narye anggun nong dobuka, ninye dibin nang, sik mutuku pia tuku pum tam binuka bataksinyeba, asukumuk pia daunamlume. Anggun mutuku ara, ninye arye aik ulubuka batakikceura, pia lo dem ulamle atonun mutuku upnamle. Anggunce talibuka ulamlum mutuku ara, ila tamubuka, lipsisikuka kum dopnamake. Anggunda, ila tamubuka, yamunce, kam kum unamlume. Tonda, kam tuba unmakce nang arye, anggun urasin ton, pia kum eipnamsiake.

Yehezkiel 16:54

Narye, Yerusalem mutuku nang nirya ati, tamubuka teleb kipdeipnamsine deiyok ara, ani. Ara, anggun mening nong ilil uplyeba, weik tonun alye daknamlume. Tonda, sik Samaria mutuku nang ap, Sodom mutuku nang ap, sik Yerusalem mutuku nang eibicopura, ‘Se, nunda mitik malye winilamupu bukni, sik Yerusalem mutuku nang ara, dipkoprob malye weik ning talibuka winilamik. Nunda mitik tonun uka,’ tenebikirye, anggunti yanibuka nalipsikceba, anggunda, pia alye dakalanamlume.

Yehezkiel 16:52

Anda, pia malye weik ulyama ati, anda pia ilil tenena ap, alye una ap, unamlyame. Anggunce pia malye weik winilamlum ning ara, pia weik ati, yuk nang arye eibikcopura, adeice arye, ‘Se, sik Samaria mutuku nang arye, malye winilamik ning ara, mitik tonun uka,’ tenenyake. Ati, diba, anggun Israel nang ara, alye weik dakdanalume! Yuk nang nirya arye, anggunti, ‘Sikda pia malye weik wininyake,’ tenebikirye, nyek-nyek anamaka ara, talye kekepmunce, tunim abuka unamlume! Yupu tamubuka nyana kume. Allah arye nyabuk.

Kejadian 10:22

Sem birye deiamuk mapu sik si ara, ani. Elam ap, Asyur ap, Arpasad ap, Lud ap, Aram ap ulamik.

Yehezkiel 44:13

Sik minop talak malye winin ning talibuka, ulamik Lewi yala nang ara, tonap na dam pia kum yanganamake. Tonda, Israel yala nang melina ati, imam pil talibuka, kum donamake. Israel nang arye, na si erena ati, kam ning opnarye, areninyak ning babye, anang arye, na dam pia kum boyanganamake. Tonda, na pia malye una kumce, pia teleb unamak ninguk, na si eren aik ap, anyaik pum tam domik ning ap, pia teleb lek ning nirya babye, pia kum talibuka pil donamake. Anang arye malye-malye pia weik winilamik ning ati, alye dakalanamake. Tonda, amalye winilamik ning dengna ara, sik wenena ati, ikin weik ning, sik deice deipnyopura, ikin ning arepniba, bobikirye, ‘Seʼ tenen, mambul kanye bobuka unamake.

Yehezkiel 39:26

Aning nirya akunum winipnyopura, sik Israel nang yuk-yuk nang nirya ara, sik teleb aryuk, ninye olana kumce, tunim abuka, sik mutuku noutam kanye deibuka unamak talak ara, tonoknye babye, sik dam yalirye, sik deice ikin ning ton kum deipnamle! Aning nirya deice arye, sik Israel nang arye, minop talak na dam malye ulamik ning ap, sik bidamang arye, sik bidamnye atibuk, alye dakdanamaka ara, luba kibikba, narye aning nirya kum kipdeipnamnarya! Tonda, yuk mutuku nang arye anggun dam, ilil kum kililnamsiake. Teleb kanye deibuka unamake.

Yehezkiel 34:29

Tonda, ‘Sik nirya ara, din patana pia kum unamakʼ tenen, narye sik wa wina ati, tuku nirya, pia sukun tuku noutam arepnamne. Winipniba, sik wa wibuka koubikiba, nong weik upnamlarya. Sik ti, din patana talak ton, pia sik dam, amutuku noutam kum yanganamle. Aning atonun, dana-dana tam nang, sik yuk mutuku noutam daunyak nang ton yakirye, ‘Israel nang ara, nun like. Sikda malye nang dem unyaka ati, bona patan nanguk unyake,’ nyabuka, nalibuka malye yupu ton, pia kum nyanamake.

Yeremia 25:25

Tonda, Zimri mutuku ap, Elam mutuku ap, Madai mutuku ap, Raja kibuka talinyak ninye deiyok nang nirya ati, anggur mek arepsiba, dibik.

Kejadian 14:1

Abram bira, Hebron mutuku binuka ulamuk talak ara, ton tam deiyok nang arye, yuk tam nang deiyok nang ati, yu ubukba olalamik. Sik ninye deiyok nang si ara, ani. Ara, Sinar mutuku taleamuknye, Amrafel ap, Elasar mutuku taleamuknye, Ariok ap, Elam mutuku taleamuknye, Kedolamer ap, Goyim mutuku taleamuknye, Tideal ap, sik nirya neika bulubukabikce, yuk mutuku nang ati olbiyik.

Habakuk 2:16

Anggun malye winin ning awinimunya deice arye, ‘E, nunda pia telebe, nun akunum teleb unyabe,’ tenelulume. Winibuka tenelulum bukni, narye dipkoprob nyapsine. Nara Allah, na si Yahweh arye, anggunti weik arye wenebuka opnamsine. Wini talak ara, yuk ninye arye sikti, ‘Se, sik Kasdim nang ara, mikip weik nang, sikda mambule’ tenen, sikti ilil ulul bukni, na Allah Yahweh arye anggunti, wenepnamsine. Anggun kanye deibuka, pia bona weik talilalum touk, wenepsinyopura, imun kanye weik bobuka, ikin weik unamlume. Winipsiniba, alye weik dakalanamlume. Yuk ninye nirya arye sikti, ‘Se, sik Kasdim nang ara, pia malye nanguk unyake,’ tenenamsiyake. Deiyok ara, anggun malye winilulum ning nirya ara, na Allah Yahweh, na mikip deice arye, dekna arepnamsine.

Daniel 8:2

Aning like bitinye talak, lengdar mapsirye eipse ning ara, ani. Na una ati dopropse mutuku ara, Persia mutuku noutam bukni, provinsi si ara, Elam unmase. Anoutam ara, Susan mutuku uk, lak kibukba eipse. Ara, Susan mutuku noutam tikmasirye, natikmase mekin, el si ara, Ulai mekin tikmase.

Yehezkiel 36:15

Wini talak arye, dipdongobuka doryanamle talak noutamak nirya ara, sik yuk mutuku nang arye, amutuku unamlum ninye ati, akutubuka kum yep-yep anamsiyake. Yuk mutuku ninye arye, ‘Se, sik Israel ninye ap, sik unyak mutuku ap ara, talye mutuku uk ulule,’ nyabuka kum nalinamsiyake. Atonun yupu tuba nyapsikiba, kum kekenamlume. Amutuku noutamak unamle ning deice arye, Israel ninye ati, malye kum ulinamsile. Tonda, melipsiniba, malye unyak nang arye amutuku noutamak unamlum ninye ati, ton yanuka kum onamsiake. Ayupu nirya ara, na Allah Yahweh, aning-aning nirya deice tam, talibuka Weik Erena Deiyok ununye, narye tenenye touk dipkoprob wininune. Aning ara, dipkoprob nong upnamle ati, nyapsine.

Yehezkiel 32:21

Pia malye kibuka, mikip weik ninye olamik deiyok nang ap, sikti, melilamik yin talen nang ap arye, Mesir mutuku nang obikiba, dibikirye wekelbanyakak, el si Sheol binamak mutuku bicopura, atalak ara, sik eibikirye yupu talipnamake. Sikce nyapnamak yupu ara, ani. Ara, ‘Allah ati diba kum tenelamik nang ara, mal olanak arye parang ya arye obikba, akunum dipmakirye, wini talak sikda asukumuk mapnamake. Ati akunuma.

Yehezkiel 31:14

Aning nirya winipnamle deice arye, aminyan talak ara, ayo el nong weik nemukce, weik cang im dup tekamuka atonun, yuk yo ton aminyan talak, ton kum tiknamle. Tonda, mek weik aupnamle bukni, atouk yo ton, amek dam weik tonun, kum nepnamle. Ayo sik deice tam ara, dua kan-kan noutam welebuka, pia kum upnamle. Aning kum winipnamla deiyok ara, ani. Ara, ayo nirya ara, talye tukwak nang dibikceba, tukwak poulbalamak atouk, tuku pum tamuk poulbinamle. Tonda ninye dibiceura, dibin nang unyakak, el si Sheol, asukumuk banyaka atonun, wininamake.

Yesaya 11:11

Aning nirya lakak upnamle talak ara, Allah ara, aning-aning nirya talibuka, mikip weik ululnye birye, el taruk bibiklirye, tupa ton ap bitinye talak deice, Israel yala nang taliplirye, el mapu koproba lyeplirye, sik dana-dana tam unamakak arye, sik mutuku tamubuka bobanamle. Ara, Asyur mutuku ap, Mesir mutuku ap, Patros mutuku noutam ap, Sudan mutuku ap, Elam mutuku ap, Babel mutuku ap, Hamat mutuku ap, tonda weik laut mekwen lilun ap, daunyak mutuku, pia lowak ap, tuba ton aunamak Israel nang ara, tamubuka, sik mutuku koproba, noutam bobanamle.

Ayub 28:13

Weik kel bikina deiyok ning, nong ululak ara, tukwak nang arye, ‘Amutuku bitibyopura, adeiyok ning eibuka biknamabe,’ kum tenipmanto unyake. Dipkoprob na kanye ara, ‘Ninye unyap mutuku, im sirya, mutuku sirya nirya noutamak ara, adeiyok ning kum ulule,’ tenepne.

1 Tawarikh 1:17

Sik deipkirikropnye Nuh, elce deibuknye bira, Sem ulamuk. Sem birye mapu ton deiamuk nang, sik si ara, ani. Elam ap, Asyur ap, Arpaksad ap, Lud ap, Aram ap, Us ap, Hul ap, Geter ap, tonda Mesek ap, deiamukak ulamik. Sik anang ara, Sem birye deiamukba, dadeipdanin yangalamikce, ulamik nang, sik nirya, sik deipkirikrop nang ulamik. Ati ara, Sem birye deiamukba, dadeipdanin yangalamik nang nirya ara, sik deipkirikrop nang si atonok dolamik.

Matius 11:23

Anggun Kapernaum mutuku ninye ara, ‘Nun teleb nang anya arye, Allah arye erebuka im deice deipnamsile,’ tenelalulum do? Kume, Allah arye wenebuka uku din mutuku donoksiliba, uku arye dibuka sirya daknamsile. Anggun Kapernaum mutuku nang ara, anggun dilamlumba, anggun mutuku noutamak narye ninye kum winipmanto ning, mambul pil dolamse bukni, diba kum tenenululume. Bukni, amambul pil ara, Sodom mutuku noutamak apiluk dolamtinyeba, eipmanitingopura, Sodom mutuku ulamik ninye arye, “Se, nun dipkoprop malye unyabe,” nyabuka, sik malye ning bataktingce, nati diba tenelamnitingopura, kam tuba unamtinge.

Mazmur 142:5

‘Yatanye birye yanuka melipnamnil do?’ tenen, na diksukumuk wininirye, anti pia dinauk unune. Aning nirya ara, patapniliba, pia dinauk unun bukni, na melipmantonye ton, na dam pia kum ulule. ‘Yu nang arye opnikca’ tenen, na duknupmanto babye, pia kum ulule. Tonda, na tam nang babye, yuk mutuku daunyak nang babye, nati, bico tenepnikirye, kum melinamsile.

Yesaya 38:11

Tonda, nyapse. “Kume, tukwak mutuku unirye, Allah Yahweh ati ton ap pia kum dinamne. Deiyok ara, na minop dipnamne anya arye, tukwak mutuku tuba kam unyak nang ap, na ap neika kum unamabe. Tukwak mutuku noutam nirya ara, tuba kam unyak nang ara, na ton ap pia kum eilinamne.

Yeremia 11:19

Allah arye, na onin nang ati, yupu min kum yanuka nyapdeiamnuk talak, na Yeremia bira, anang arye malye tenelamik ning kum bikamsa ati, walwal asa ulamse. Winipmanto ara, ‘Domba basam, mangkau aryuk unmalibuk, bobuka opnamapʼ tenen, bobalamak touk winipnike. ‘Na bikna kum, mangkau aryuk, nati opnamapʼ tenen, yupu sisiklamnik ning ara, kum bikamse. Sik anang arye, nati nyalamnik. “Winipmanto ara, duk moulul yo ara, atalak arye webuka batakikceba, kum danalamle touk, anye bira obibyeba, kum danamle. Tonda, el anye bira obuka batakikceba, amutuku nang ara, el si ton ap, pia kum sisinamake. “El ti ara, pia luba kipmabe,” nyabuka, yupu taleamik.

Yehezkiel 31:18

Se, anda weik cang keipyal yo atouk ulyamnye, Firaun bira, yuk nang ton, an pia mikip weik ulamlum touk ulamik do? Kume, an tonok, pia mikip ap, urasin teleb ap, ulamlum touk, yuk nang ton kum ulamik. Winipmanto ara, aweik keipyal yo ara, el tonok, pia cang ap, urasin pia teleb ap, kat ap ulamuk touk, Eden mutuku noutam babye, ayo atonun ning ton, kum uamuk. Eden mutuku uamuk yo yuk-yuk ning nirya ara, mitik tonun teleb uamuk bukni, Lebanon mutuku weik cang keipyal yo atouk ara, kum uamuk. Bukni, wini talak ara, anda weplobikiba, ninye dipnarye banyak mutuku uk, Sheol mutuku uk binuka, pia ati daunamlame. Eden mutuku noutam uamuk yo babye, akunum kum dayuka anya arye, ayo babye, Sheol mutuku uk aulule. Tonda, asukum ara, Allah ati, diba tenena kum nang, sikda Allah ap, neika kum upting nang anya arye, akunum deiamikba, sik babye Sheol mutuku uk unamaka anya arye, sik ap, an ap, neika amutuku unamlume. Tonda, ninye olalamik talak ara, ton yin talin nang oltakalamikba, ‘Aning ara, nun likʼ tenen, sik nong kum weilamik bukni, talye deliltakalamik nang ara, sik babye, Sheol mutuku, pia amu tamuk, unyaka anya arye, adiplamik nang ap, an ap neika unamlume. Ura, na Allah Yahweh, aning-aning nirya talibuka, deice tam erebuka, Pia Mikip Weik Deiyoknye ununye birye nyapne. Winipmanto yupu ara, ‘Weik cang Libanon mutuku keipyal yo,’ nyapmana ara, nong noutam ning ara, Mesir mutuku ninye deiyok ulamuknye ap, el yin talen nang, yupa kum nukmanto nang ap ati, nyapsine. Sik nirya ara, ninye dipnarye, binuka unyak mutuku, Sheol mutuku uk, pia ati daunamake. Na Allah Yahweh arye, ayupu akunum nyapdeipsine.

Yehezkiel 32:19

An Yeheskiel birye, sik Mesir mutuku nang ati, nyabuka asipdenulyame. Anggun bidamnye arye, anggun bidamnye ati, ‘Nunda pia urasin teleb nang unyabe,’ tenelalulum do? Dipkoprob, yuk mutuku noutam ara, urasin teleb nang ton, daunyak bukni, sikda mitik tonun uka. Anggun Mesir mutuku nang ara, urasin pia teleb-teleb ululume. Bukni, wini talak ara, ninye dibikiba, tuku pum tam banyak mutuku, el si Sheol, asukumuk binuka unamlume. Winipminyeba, Allah ati diba kum tenenyak nang, el dam yanmanto kum unyaka ati, sik adiamik nang unyakak ara, anggun Mesir mutuku nang ap, diba kum tenebik bukni, mince akunum diamik nang ap, neika unyakak binuka unamlume.