Yehezkiel 32:18 - Eipomek

¹⁸ Se, Yehezkiel anda ninye sirika arye deipkiknye ulyame. An ap, yuk mambul weik mutuku unyak nang, sik kilapu ap, anggunce Mesir mutuku nang ap, sik yin talen nang yupa kum nukmanto nirya ap ati, tenipmunce engenamlume. Ara, sik Mesir mutuku nang nirya ati, sik nirya babye dibuka, akunum diamik nang arye tuku pum tam mutuku, el si Sheol, wekelbanyak nang damuk, boyanuka dopkwetepniba, wekelbanamaka ati, nyapsine.

Yehezkiel 32:18 Referans Kwoze

Yehezkiel 31:14

Aning nirya winipnamle deice arye, aminyan talak ara, ayo el nong weik nemukce, weik cang im dup tekamuka atonun, yuk yo ton aminyan talak, ton kum tiknamle. Tonda, mek weik aupnamle bukni, atouk yo ton, amek dam weik tonun, kum nepnamle. Ayo sik deice tam ara, dua kan-kan noutam welebuka, pia kum upnamle. Aning kum winipnamla deiyok ara, ani. Ara, ayo nirya ara, talye tukwak nang dibikceba, tukwak poulbalamak atouk, tuku pum tamuk poulbinamle. Tonda ninye dibiceura, dibin nang unyakak, el si Sheol, asukumuk banyaka atonun, wininamake.

Mika 1:8

Nabi Mika birye, ayupu nirya kekebukce, ayupu nyabuk. Se, Allah arye, Yehuda yala ninye ap, Israel yala ninye ap ati, weik tonun wenepnamla ati, na nabi Mika bira, weik kanye imun upmanile. Ara, se tenen, na kanye talima uk dinilya ati, na nong ara, baju ongona kum, talye bananguk banamne. Tonda, na yan ongon ning sandal babye, kwiribuka, urdem yan bananguk, yanibuka banamne. Engena ap, alye dakna ap deice arye, pia malye kanye bobuka banamne talak ara, nara bai kam ninye eiplirye, lukulalamla atonun unamne. Weik yupu arye, malye nyabuka ngalukunamne. Winipmanto ara, bip maka wena tapu youpliba, yupu weik arye ngaluklamle touk, engebuka malye nyanamne.

Yehezkiel 32:16

Atalak ara, ninye dibikiba, sik kayapu nang arye, imun kanye bobuka, weik tonun engebikirye, ninye weibikce talak nyanyak mot atonun, mikip weik deice mot nyanamake. Ati ara, amutuku kilapu, sik neika ansinibikirye, amot ara nyanamake. Amutuku kilapu, sikcuk kum bukni, yuk-yuk mutuku noutam, daunyak kilapu nirya ara, amot neika ansinibuka nyanamake. Ara, Mesir mutuku ap, Mesir mutuku unyak nang ap, sik yin talen nang yupa pia weik ati, ‘Se, bicoe,’ tenebikirye, anang wein mot nyanamake. Tonda, amutuku-amutuku noutam unamak kilapu nirya ara, Mesir mutuku noutam unyak nang ati ara, amot nyanamake. Ura, na Allah Yahweh, aning-aning nirya talibuka, deice tam erebuka, mikip weik ununye birye, ayupu ara nyapdeipsina ati, dipkoprob nong kunupnamle, nyapsine.

Yehezkiel 32:2

Se anda ninye sirika arye deipkiknye ulyame. Ance Mesir mutuku ninye deiyoknye, Raja Firaun biti, ‘Se, Allah arye wenepnamkila ati, opkiliba, ninye arye tuku palibuka weipkikirye, kanye ikin mot nyanamaka ati, anda bicoe,’ nyabuka, yupu mikip arye nyabuka, wenepnulyame. Na yupu nyapdeipkin ning ara, ance Raja Mesir dam binuka nyapnulyame. Ara ani. Firaun ance, ‘Ninye mutuku sirya, im sirya nirya daunyakba, anggun kan-kan arye, nara yu weik pus, el si singa mikip weik ulamle touknye ununeʼ tenen, kanye erelanyakce, mutuku sirya, im sirya nirya unyak nang ati, ‘Sikda na amu tamuk unamake,’ tenelulume. Bukni, winipmanto ara, anda buaya bal, laut mekwen lilun ulamle ning, el si ara buaya, mekwen pum bisik balamak touk ulyame. An yan arye mekwen pum tam yanibuka baminba, amnyok mek nirya bol pilamle touk ulamle. Anda aning atonunye ulyame.

Yeremia 1:10

“An kel biklyame. Asum arye, na Allah mikip dobuka an deice deipkine. Ati ance na mikip dobuka, mutuku-mutuku nirya unyak ninye ap, ninye deiyok yuk-yuk talibuka unyak weik deiyok nang ap, anang arye talinyak nang ap, an bimince na nyapkinye yupu nyapminyopura, ayupu nong upnamlarya. Ati, narye nyapdeipkiniba, ikin ning arena ap, koulamak ning kwinina ap, ninye arye donyak ning ululona ap, kum kilina ap, ninye malye kibuka ona ap, tonda, teleb ubuka lipsisikuka dona ap, winiryuk yala ning kouna ap, aning nirya, narye tenelamse touk winipnalama anya arye, ‘Ance ayupu laka nyalbinamlam’ tenen, na mikip an deice deipkine,” Allah arye nyapdeipnuk.

Hosea 6:5

Ati ara, narye anggunti, na yupu lak nyan nang, nabi-nabi nang, sik dam nyalilamse yupu deice arye, anggunti weik arye wenyamsise. Na nyalilamse yupu deice arye, anggun Israel yala ninye ap, Yehuda yala ninye ap, weik arye oltaklamsise. Winipmanto ara, liman lepnulya ati, bebeya laklamle atonun, minopce narye anggunti, weik ikin wenen ning areamsisiba, olamsise.

Yehezkiel 43:3

Weik dirina eipse ning ara, Allah Yahweh arye, ‘Yerusalem mutuku nirya opnirye, sice buklopnamneʼ tenen, yayuk talak dirina weik winyamukba, eiamse touk, atalak babye winibuke. Tonda, lengdar mapmasa deice arye eipmase ning ara, min talak Babel mutuku noutam bukni, Kebar mek kin dam unmase talak eipse ning atonun, pia dirina weik ap, weik lelim ap, winibuk. Tonda, Allah Yahweh yanmoka ati, ilil weik upnukba, ‘Allah si erepnunʼ tenen, na nong nirya, tuku deice mapsirye, kisok tuku kanupdongopse.

Yehezkiel 31:16

Tonda, ayo webikba, ninye diplamaka atonun ubukce, poulbinamuk talak ara, tukwak nang mutuku sirya, im sirya nirya ara, akeipyal yo, el tukwak sakuk talak, lelim nyabukba, kekebikce, ‘Seʼ tenen, yok birbir abuk. Ara, narye ninye dibikceba, akunum dibice nang, tuku pum tam unyakak, el si Sheol noutam, ayo ap, akunum diamik nang ap, atuku pum tam dongosiba, neika ulamik. Tonda, Eden mutuku noutam tikamuk yo ap, Libanon mutuku tikamuk yo ap nirya ara, mek weik aubuka deice arye, telebuk ulamik bukni, sik babye ninye diplamaka atonun ubuka, tukwak poulbinamikak arye, keipyal yo akunum kum kibuka anya arye, engelamikba, narye sik talima melipsiba, tuba ton ap kanye deibik.

Yehezkiel 26:20

Atalak ara, narye winipnamne. Anggun nong ara, dopdeipsinyeba, minop talak akunum dibilamik nang, sik kanye binuka ulamlye ak deipnyeura, unamlume. Narye anggun nong dobuka, ninye dibin nang, sik mutuku pia tuku pum tam binuka bataksinyeba, asukumuk pia daunamlume. Anggun mutuku ara, ninye arye aik ulubuka batakikceura, pia lo dem ulamle atonun mutuku upnamle. Anggunce talibuka ulamlum mutuku ara, ila tamubuka, lipsisikuka kum dopnamake. Anggunda, ila tamubuka, yamunce, kam kum unamlume. Tonda, kam tuba unmakce nang arye, anggun urasin ton, pia kum eipnamsiake.

Yesaya 16:9

Ati ara, na nabi Yesaya babye, anggunti, ‘Bico,’ tenepnirye engenmane. Ara, Moab tam noutam bukni, Sibna mutuku ap, Yaezer mutuku ap, anggur tapu wa wiamik ning ara, akunum kum kipdeibikba, anggunce engelamlum touk, na babye engenmane. Aning atonun, sik Hesyebon mutuku nang ap, Eleale mutuku nang ap ati, engenmanyeba, na asing maka sakanamnile. Ara, anggun mutuku noutam koulamlum ning ap, libuka delilamlum ning ap nirya ara, ninye olana deice arye, akunum kum kipdeipsike. Anggur duk moun li kiplyeba, kanye deibuka linmakirye, yupu ton kum nyapdenamake. Sik mal olan nang aryuk akunum libuka dibike.

Roma 12:15

Sik kanye deibuka pin-pin asa arye unyak ninye ati ara, anggun ap neika kanye deibukap unamlulume. Sik imun kanye dobuka engenyak ninye ati ara, anggun ap neika engebuka unamlume.

Lukas 19:41

Yesus arye ayupu nyabukce, bisik banmoka ani, Yerusalem mutuku asik dolamik dam biyukopura, amutuku dipdeyukce, bico ubuk ati, engenmok deice arye ayupu nyabuk.

Yehezkiel 32:21

Pia malye kibuka, mikip weik ninye olamik deiyok nang ap, sikti, melilamik yin talen nang ap arye, Mesir mutuku nang obikiba, dibikirye wekelbanyakak, el si Sheol binamak mutuku bicopura, atalak ara, sik eibikirye yupu talipnamake. Sikce nyapnamak yupu ara, ani. Ara, ‘Allah ati diba kum tenelamik nang ara, mal olanak arye parang ya arye obikba, akunum dipmakirye, wini talak sikda asukumuk mapnamake. Ati akunuma.

Yesaya 14:15

Utenebuka ulamlum bukni, wini talak ara, anda Allah arye akunum dobukapkukce, tuku pum tam akunum dokwepkuke. Ara, tuku amu tam, akunum diamik nang kanya unyakak, amutuku si ara, Sheol, akunum dokwetepkukba, asukumuk ulyame.

Mazmur 63:9

Bukni, yuk nang arye nati, ‘Anye bira, nun like ati ara, el opnamabe’ tenen, dobolbaninyak nang, sik nirya ara, ance aninye ati, wenebuka oplopnamlyame. Opminyopura, amalye ninguk talibuka wininyak ninye ara, tukwak ninye dipmakibuk, binuka unamakak, anang babye nyapdeipnamlume.

Mazmur 30:9

Atalak noutam arye, narye anti, ‘Se, na ni Allaho, na melipnilyame,’ nyabuka, ngalukna deice arye, malye nyabuka moropkise. Ara, narye Allah ati, pia mikip weiknye ulula ati, elce aning-aning nirya talibuka, deice tam ulirye, elce teniplye touk winilula ati, narye elti, ‘Melibuka lyepnilyame,’ nyabuka moropse.

Matius 11:23

Anggun Kapernaum mutuku ninye ara, ‘Nun teleb nang anya arye, Allah arye erebuka im deice deipnamsile,’ tenelalulum do? Kume, Allah arye wenebuka uku din mutuku donoksiliba, uku arye dibuka sirya daknamsile. Anggun Kapernaum mutuku nang ara, anggun dilamlumba, anggun mutuku noutamak narye ninye kum winipmanto ning, mambul pil dolamse bukni, diba kum tenenululume. Bukni, amambul pil ara, Sodom mutuku noutamak apiluk dolamtinyeba, eipmanitingopura, Sodom mutuku ulamik ninye arye, “Se, nun dipkoprop malye unyabe,” nyabuka, sik malye ning bataktingce, nati diba tenelamnitingopura, kam tuba unamtinge.

Yehezkiel 32:12

Na Allah arye, ‘Winipnalyame,’ nyapniba, Babel mutuku pia yu weik unyak yin talen nang, pia malye nang ati yakirye, anda Mesir mutuku Raja ap, an mapu silip ap, an tam nang yupa pia weik daunyak nang ap, an yin talen nang nirya ap ara, ninye on ya bonyak nang ara, yanuka alupdopnamsiyake. Yuk mutuku yin talin nang, sik yu ara, mitik tonun bukni, Babel mutuku yin talen nang ara, sik yu pia weik unyake. Winibikirye, an taleamlum nang nirya opnamake. Tonda, anggun Mesir mutuku nang arye, ‘Nunda bona utotoa weik talen nang unyakce, mikip weik nang unyabe,’ tenen, dipdanuka maknya kintinilalumce, taleamlum ning nirya ara, anang arye aning-aning nirya, malye kibikirye, kum kibuka, sice buklopnamake!