Yehezkiel 30:18 - Eipomek

¹⁸ Mesir mutuku nang arye, ‘Asia tam arye, nun mal olan nang, mal piyanamsiyakʼ tenen, Nil mek lilun bukni, keting panalyangan tam domik asik, el si Tapanes mutuku, keting noutam talak bukni, weik dua arepnyeura yalyopura, amutuku nirya kunuknamle. Mesir mutuku nang ara, mikip weik unyak bukni, narye sik mikip kum kipdeipnirye, mitang nang dem unamake. Atalak arye dipdongobuka, dounamle talak ara, Mesir mutuku nang ara, mikip weik nang tuba kum unamake. Sik mikip ulamika ati, kanye deiamikce, maknya kintinibuka ulamik bukni, narye sik mikip kum kipdeipnamne. Tahpanes mutuku ara, mirin dua arye kunukmiting alulak ara, na Allah arye arepnyeura, inipdongopnamle. Aning winiplye talak ara, sik mal olan nang yakirye, anyasik dana-dana tam ulamle mitik asik nirya ara, obuka sirya dakikirye, amutuku-amutuku kam tuba unyak nang, sal ap, kilapu ap nirya ara, tomobikirye tapu koubuka, sik pera mutuku tamubuka bobinuka, pia wenen aik dongolbinamake.

Yehezkiel 30:18 Referans Kwoze

Yehezkiel 30:3

Anggun moubuka teninamlume. Kanye imun weik sum akunum dam upmale. Ara, talye sum kum bukni, Allah Yahweh arye tenyamuk sum yanamle ati nyapsine. Aning ara, moubuka teninamlume. Winira weik ikin ning deipnamle sum ara, ninye mutuku sirya, im sirya nirya, sik malye ulamik ning ati, wenebuka opnamle anya arye, asum ara, ‘Dua kunukmiting,’ nyaplyopura, adiparyuk dua arye pia kunuknamle.

Yehezkiel 29:15

Tukwak mutuku noutam, yuk-yuk mutuku nang arye, weik deiyok talibuka, mikip unamaka nirya ara, Mesir nang anggunda, mikip mitang nanguk kipdeipsiniba, amu tam atouk unamlume. Tonda, anggunce deiyok kibuka, yuk mutuku nang ati, kum malye kibuka talepnamlume. Aning atouk, anggun talima erebuka, maknya kintinipmunce, sik yuk nang ati, pia kum talinamlume. Ara mitik kipdeipsinyopura, yuk mutuku nang kum talibuka unamlume. Amu tamuk unamlume.

Yeremia 2:16

Anggun Israel ninyeo, ninye deiyok nang, sik kisok deice pia teleb ning kalubuka kalulamak ning, dobuka batakmakibuk, malye ulamle touk, sik Mesir mutuku yin talen nang arye, sik mutuku si Memfis mutuku ap, Tapanes mutuku ap yakirye, anggun Israel ninye arye talibuka umunce, dolamlum mutuku keil nirya ara, uluplopmasiake.

Yesaya 10:27

Allah arye, sik Asyur mutuku nang opnamle talak ara, sik Israel nang loplobuka lyepdopnamle. Ara, Asyur mutuku nang arye weik ikin ning, sik takunya deice deiamsik ning ap, sik nong deice ikin ning deibuka, darapdongamsik ning ap ara, Allah arye anggunti, melibuka lyepropnamsile. Winipsiliba, sikce ton ap talepsikirye, ikin ning kum delinamsiake.

Matius 24:29

Aikin talak noutamak bukni, anyapmasin kanye imun ning akunum uplyopura, ‘Aning winipnamle,’ nyabuka nabi Yesaya arye sekamuk yupu atonun winipnamle. Ati, Yesaya sekamuk yupu deice nyapnusine. Ayupu ara ani. ‘Keting ara, kunuknamle. Tonda, wala babye dirina kum upnamle. Tonda, kurya nirya, im deice arye tukwak saknamle. Tonda, im alip tam ulye ning nirya luluklirye, bindaknamle.’ (Yesaya 13:10) “Ayupu ara, nabi Yesaya arye sekamuk yupu nyapsine,” Yesus arye nyabuk. Nyabukce, ayupu tonap nyabuk.

Yoel 3:15

Atalak ara, keting ap, wala ap ara, kunuknamle. Tonda kurye nirya ara, dirina kum danamle.

Yehezkiel 31:18

Se, anda weik cang keipyal yo atouk ulyamnye, Firaun bira, yuk nang ton, an pia mikip weik ulamlum touk ulamik do? Kume, an tonok, pia mikip ap, urasin teleb ap, ulamlum touk, yuk nang ton kum ulamik. Winipmanto ara, aweik keipyal yo ara, el tonok, pia cang ap, urasin pia teleb ap, kat ap ulamuk touk, Eden mutuku noutam babye, ayo atonun ning ton, kum uamuk. Eden mutuku uamuk yo yuk-yuk ning nirya ara, mitik tonun teleb uamuk bukni, Lebanon mutuku weik cang keipyal yo atouk ara, kum uamuk. Bukni, wini talak ara, anda weplobikiba, ninye dipnarye banyak mutuku uk, Sheol mutuku uk binuka, pia ati daunamlame. Eden mutuku noutam uamuk yo babye, akunum kum dayuka anya arye, ayo babye, Sheol mutuku uk aulule. Tonda, asukum ara, Allah ati, diba tenena kum nang, sikda Allah ap, neika kum upting nang anya arye, akunum deiamikba, sik babye Sheol mutuku uk unamaka anya arye, sik ap, an ap, neika amutuku unamlume. Tonda, ninye olalamik talak ara, ton yin talin nang oltakalamikba, ‘Aning ara, nun likʼ tenen, sik nong kum weilamik bukni, talye deliltakalamik nang ara, sik babye, Sheol mutuku, pia amu tamuk, unyaka anya arye, adiplamik nang ap, an ap neika unamlume. Ura, na Allah Yahweh, aning-aning nirya talibuka, deice tam erebuka, Pia Mikip Weik Deiyoknye ununye birye nyapne. Winipmanto yupu ara, ‘Weik cang Libanon mutuku keipyal yo,’ nyapmana ara, nong noutam ning ara, Mesir mutuku ninye deiyok ulamuknye ap, el yin talen nang, yupa kum nukmanto nang ap ati, nyapsine. Sik nirya ara, ninye dipnarye, binuka unyak mutuku, Sheol mutuku uk, pia ati daunamake. Na Allah Yahweh arye, ayupu akunum nyapdeipsine.

Yeremia 46:14

“Yeremiao, anyapdeipkin yupu ara, ance Mesir mutuku tam, asik donyakak nyalbinulyame. Ara, Memfis mutuku ap, Mikdol mutuku ap, tonda Tahpanes mutuku ap, unyak nang ati, “Anggunda, kintinibuka deipmunyakarye, unamlume,” nyabuka, laka nyapnulyame. Ara, anggun ninye olana ati, talibuka ululum ning nirya ara, dobuka, anggun mutuku dana tam ati, domlumak ara, bikbik abuka binamlume. Deiyok ara, ani. Ara, Allah arye lo arepliba, yuk mutuku yu nang arye, anggun mutuku bukni, dana-dana tam unyak nang olyanamsiake! Winipsicopura, mal olana deice arye, anggun mutuku dana-dana tam unyak nang nirya, kum kipdeipnamake!

Yesaya 19:1

Ayupu ara, Mesir mutuku unyak nang ati, Allah arye, na Yesaya dam yanuka ayupu nyapnuke. “Na Allah Yahweh ara, sike pia kum bukni, pola balamle dua deice welebuka buknirye, Mesir mutuku dam bikbik abuka yanamne. Mesir mutuku nang arye, isa urasin atonun kibuka memebuka deibikirye, isa si erenyak ning nirya ara, na Allah ati ilil weik uplyeba, sirim talipnamle. Tonda, sik Mesir mutuku unyak nang nirya ara, pia ilil weik uplyeba, sik talima dakalsakanamle.

Yesaya 14:25

Narye, ‘Winipnamne,’ nyapdeipse ning ara, ani. Asyur mutuku nang bukni, na kanye deipse mutuku, Yudea tam mutuku noutam unyak nang ara, opnirye kum kipdeipnamne. ‘Naʼ tenen mutuku, Yudea tam noutam unyak Asyur nang ara, Yudea mutuku deice opnirye, bataklopnamne. Asyur mutuku nang arye, na mapu koproba, Israel nang ati, obikirye ikin ning weik, sik nong deice delinyak ning nirya ara, kum kipdeipnamne. Tonda, sik Asyur nang opnamne deice arye, sikce ikin ning dobuka, Israel nang deice deibikce, ikin pil dilamik ning ara, aning babye dopropnirye, kum kipdeipnamne.

Yesaya 14:11

Min talak ara, ninye arye anti, kecapi bung-bung ana bopnarye, si erelamikba, anda kanye deibuka kwalilamlume. Bukni, wini talak anda ninye dibin nang unyakak, pia tunimanak akunum yalame. Ati, an manak kipnulyame. An amsuna kalubuka mapnamlamak ara, an nong deice selimut atonun upnamkil ning ap, an amu tam amsuna atonun deice mapnalamak ap ara, akunum diamik nang, sik nong lyuplyeba, kuluma amulul ning ara, an nong deice ap, amu tam ap, pia aupnamkile.

Yesaya 13:10

Malye unyak nang nirya, wenepnamne talak ara, kunauk upnamle ati, kurya tonok-tonok tikilul ning ap, tonokak bulubuka, deiyok tikinyak kurya nirya ara, daksaknamle. Tonda, dirina ara, pia kum eipmanto upnamle. Tonda, keting puruplye talak beren tam, keting dirina ton kum uplirye, kunuknamle. Atonun wala dirina babye, kum eipnamake. Kunuknamla atia.

Yesaya 9:19

Allah Yahweh ara, aning-aning nirya eitam ulirye, im deice unyak yin talin malaikat nirya talibuka, sik deiyoknye ulule. Allah elce, sik Israel yala nang ati, pia yu weik ubukba, anang wenebuk. Yu weik ubukba, amutuku ulamik Israel nang, sikti, wenebuka deice arye, weik uku buk dilamle touk ubukba, sik taleamik mutuku nirya, uku dibuk. Sik amutuku ulamik nang nirya babye, uku buk dinmalibuk, adeice yo webuka dongolamak touk ubikba, uku arye dibuka, sirya dakuk. Tonye birye, el kwit ati obuk. Tonoknye babye, ton kum bico tenepdayik. Sik nirya arye, olanauk ulamik.

Yesaya 9:4

Winipmanto ning ara, yu weik nang arye, sik obuka, sirya dakice ninye ati, kama arye debuka olamak touk, nun obuka sirya daksik ninye arye, ikin weik, nun nong deice delilamsik ning nirya ara, Allah an mikip deice arye, akunum kum kipdeipmasilama ati, kanye deibabe. Minop talak, Gideon ap, el yin talin nang ap, ninye mitik tonunuk ulamik bukni, an meliamluma deice arye, sik Midian tam ninye mikip weik ulamik bukni, anang nirya obuka, sirya dakik touk, wini talak ara, ance nunti akunum melipmasilamba, telebuk unamabe.

Yesaya 5:30

Tonda, winipmanto ara, sik yin talin nang, yu weik arye, Israel nang ati olyanamak talak ara, singa kus arye, weik yupu nyalamle touk, sikce weik yupu deice arye nyanamake. Yehuda mutuku unyak nang arye, kekelamikcak, mal olanmakirye, ngaluklamak ning ara, winipmanto ara, weik mek laut mekwen ombak weleplirye, lelim weik lelamle atonun kibuka, ngaluknamake. Tonda, yata nang do nirya, sikce amutuku noutam nirya, singa kus yupu kamuna arye, inipnamlya ati kunuklamle atonun, winipnamle. Ara, keting kumuplye talak bukni, kunuknamle. Tonda, amutuku unamak nang nirya ara, imun kanye bobikirye, ikin weik unmacak eipnamake. Keting deiplyeba, dirina weik upnamle bukni, asum ara, weik mutuku dup, kunuklirye dua palibuka winilamle touk kibuka, amutuku nirya ara, kunuknamle. (Ara kereta ap, kuda ap deice bukuka banmaceba, tuku butbuta arye, weleplye deice arye, dua winilamle touk kibuka, tuku butbuta arye lipdongopliba, amutuku nirya kunuknamle. Winiplyeura, Yehuda mutuku nang nirya ara, imun kanye bopnamake.)

Imamat 26:13

Nara, Allah Yahweh, anggun ni koproba Allah unune. Anggunda, Mesir mutuku noutam ulamlum talak nirya ara, sik amu tamuk ulamlume. Sik Mesir mutuku nang arye, ikin ning weik, anggun nong deice delilamikba, anggun talye pil don nanguk ulamlume. Bukni, narye anggunti, lyebukapsinirye, dobuka boyanamsise. Ati anggunda, tuba tamubuka, Mesir mutuku nang, sik talye pil melin nang ton, kum unamlume. Tonda, Mesir mutuku taleamsik nang arye, anggun Israel nang ati, ‘Sikda talye nang ati dauaplye,’ tenebuka, ikin ning deililamsuk ning ara, narye akunum malye kibuka, kum kipdeipsa ati, anggunce, ‘Seʼ tenen, kisok kanupdongobuka, kum banamlume. Wini talak arye dipdongobuka, doupnamle talak ara, anggunda kanye deibuka, telebuk unamlume. Allah arye Israel nang ati, nyabuk.

Keluaran 10:15

Tukwak mutuku sul kwising pia weika arye langdibukce, amutuku tukwak nirya miribukba, anoutamak sul kwising arye, amutuku uamuk ning nirya dibuk. Ara, yata ning do nirya, maning ap, yo duk ap, yo ap, wa kouamik ning nirya ap, dekne duk-duka purwu mok arye cebuka bisibukba, tuba uamuk ning nirya babye, dibuk. Imbik ning pia mitik anun babye ton kum ubuk. Mesir mutuku noutamak imbik palamuk ning nirya dibikce, sirya dakik.

Yeremia 27:2

Allah Yahweh arye, nati nyapnuke. “Tukwak kam ulye ning obuka, el bola kokmince, tapu kintinibuka deipnulyame. Tonda an un dam delina ati, ikin yo dobuka koulongon ning ton, moubuka kintinipmince, an un dam arye deipnulyame. Aning ara, an Yeremia un dam koulongona ati, nyapnuke.

Yeremia 28:10

Nyabukura, atalak aryuk, nabi Hananya birye, Yeremia el un dam, ikin yo koubuka deiamuk ning ara, dobukce aikin ning ara, cebuka batakukce, donokuk. Ara, ninye arye, ‘Sapi basam arye, aikin ning el un dam deibibyeba, aning libuka balirye, nun wa tuku palipnamsilʼ tenen, kintininyak ning atonun, cebuka batakukce, donokuk.

Yeremia 28:13

“Ara ani. Yeremia anda, Hananya dam bimince, ayupu nyapnulyame. “Allah Yahweh arye, nyapmakila ara, ani. Ara, ‘Ance yo koundam koupdongobuk ning ara, akunum ceploplum bukni, Allah arye dipkoprob kat besi ning arye, punubuka deipnamle.

Yeremia 30:8

Nara Allah, mikip weiknye unirye, im deice yin talin malaikat nirya ara, sik deiyoknye ununa ati ayupu nyapsine. Na mapu, anggun Israel nang ati, ayupu nyapdeipsine. Na tenepse sum akunum kiplyopura, yuk nang arye, ikin ning anggun nong deice deiamik ning ara, narye dobuka loplopnamsine. Tonda, kat ning el si besi arye, besi rantai tapu arye, na mapu tapu koulamik ning babye, narye dobuka loplopnamne. Wini talak arye dipdongobuka, doyanamle talak ara, yuk-yuk mutuku ninye asik nang arye, anggun deice ikin ning tonap kum deibikcopura, anggun amu tamuk, pil kum donamake.

Yeremia 44:1

Allah Yahweh arye, Mesir mutuku noutam bukni, Migdol mutuku ap, Tahpanes mutuku ap, Memfis mutuku ap, tonda iknapnye tam, (arah selatan) mutuku noutam asik dobuka ulamik Israel nang ati tenibukce, na Yeremia dam yanuka nyapdeipnuke. Allah arye nyapdeipnuk yupu ara, ani.

Ratapan 2:1

Se, Allah arye nun Yerusalem mutuku ulamupu nang ati, pia yu ubukba wenepsuke. Winipmanto ara, Allah el yu ara, weik dua bum arye lilongolamle touk ubuka, nun dam yanuka lelipdongopsuba, pia alye usulule. Min talak Yerusalem weik asik ara, urasin pia teleb mutuku ulamuk bukni, wini talak ara, Allah arye amutuku ara, urasin pia malye kipdeibuk. Ara winipmanto, im deice pia teleb ning auptuba, im deice arye tukwak mutuku dopkweteptu atonun, pia amu tamuk deipsuk. Ara, Allah el yan dikdik sena uamuknye, aning ati, ‘Na like,’ tenen, bataktu atonun kipsuke. Deiyok ara, Allah aning-aning nirya talebuka, pia mikip weiknye birye, nun Israel nang ati, yu ubukura, uapsuka deice arye, amu tam nang atonun kipdeipsuke. Atalak aryuk, elce wibuka deibukba, el si erena ati dolamik aik ap, Yerusalem mutuku nirya babye bataksukce, pia el balye tam kepsuke.

Yehezkiel 30:23

Mesir mutuku nang nirya ara, narye inibuka donokniba, yuk mutuku nang ulamice mutuku uk, binuka unamake. Tonda, Mesir mutuku nang nirya bokdeipniba, yuk nang unyak mutuku-mutuku, sikce dabinuka unamake.

Yehezkiel 32:7

Narye an opkinirye, kum kipdeipnamkin talak ara, im tam arye, siknipdongopnamne. Tonda kurya nirya ara, singipdongopniba kunuklirye, dirina ton kum danamle. Narye keting ara, dua weik arepnyeba, dua arye lipdongopnamle. Wala dirina babye, kum danamla ati, ninye arye kum eilinamake.

Yehezkiel 34:27

Narye mok arepnyopura, mok cepliba, amutuku noutam tiknamle yo, yuk-yuk ning nirya ara, duk mounauk unamle. Sikce wa wibuka kounyak ning nirya ara, pabukablirye, teleb kibuka nonguk unamle. Winiplyopura, sik anang nirya, dakeiam asa arye dakuka, ilil una kumce, teleb kanye deibuka, sik mutuku tuku noutam unamake. Winilamikca ani, na mapu koproba Israel nang, ninye arye tapu koun ati tapu, el si rantai bulukulamak touk, narye sik yuk ninye asik nang mutuku binuka deiamikiba, adiparyuk loplopniba, kanye pia deipnamake. Anggun mal olan nang obuka, sirya daknamne atia. Winapnamne deice arye, akunum winipnyopura, sik anang nirya arye nati, ‘Se, diba elda dipkoprob Allah Yahweh ululeʼ tenen, biknamniake.

Yehezkiel 38:9

Aminyan talak narye, ‘Mal olalbilulume,’ nyapkinyeba, an ap, an yin nang ap, tonda sik yuk mutuku yin talen nang ap, ara an dam yanuka melipnamkiyak nang ap, anggun nirya neika ansinipmunce, weik kumanya yangalamle touk ubuka, Israel nang unyak mutuku yamunce olbinamlume. Winipmunce, an tam nang ap, anggunti melipnamsiyak nang ap, anggun yin talen nang nirya ara, yupa pia weik, nukmanto kum ubuka binamluma ati, kiklina ara, amutuku nirya ara, dua bum yalirye, kitipdongobuka lilongolamle touk ubuka, amutuku nirya langdipnamlume.