Aning kum bukni, tonda, sik Israel nang arye, ‘Allah el si erebibirye, elti, si erebuka kinamapʼ tenen, kam ning obuka, boyanuka arelyanganinyake. Tonda, kam ning boyanuka, Allah ati yanuka arepnikirye, atup kalinyaka noutam arye, bokuka dinyake. Wininyaka babye, na Allah Yahweh ara, ‘Pia na lik,’ tenenuna ati, sikce areninyak ning ara, ‘Na likʼ tenen, kum dolonune. Ati wini talak ara, narye sik malye wininyak ning nirya ati, tenepnirye wenepnamane. Adeiyok ara, sik malye unyaka ati, weik tonun wenepnamne. Ati naryuk sik tamubuka, Mesir mutuku uk dopkwetepnamne!
Yehezkiel 29:16 - Eipomek16 Israel mutuku nang ara, aminyan talak ikin uplyopura, ‘Se, sik Mesir mutuku nang, sikcuk nun ton yanuka melipsiktingce, lyepdopsitinge,’ nyabuka, tuba ton ap, pia kum moronamake. Deiyok ara, aminyan talak ara, Israel nang arye, tamubuka tenebikirye, ‘Se, nun mal olan nang yangalamik talak ara, nunce, ‘Se, Mesir mutuku nang aryuk, melibuka lyepdopsitinge,’ tenebupu talak ara, malye weik ububa anya arye, aning ara ton ap kum winipnamabe. Atalak ara, yata ning deiyok ati, ‘Mesir nang, sikce nun ton yanuka melipsululume,’ nyabuka, morolamupu do? Aning ara, walwal arye wamupube,’ tenenamake. Atalak ara, Israel nang arye, ‘Kume, Allah Yahweh elda aning-aning talibuka, deice tam erebuka, pia mikip weiknye ululeʼ tenen, nati, pia moubuka biknamniake. Gade chapit la |
Yehezkiel 29:16
30 Referans Kwoze
Asyur mutuku deiyoknye birye, amutuku bitinye obuka tomoplirye, karin mutuku bobinamle talak ara, sik yuk mutuku nang arye, Mesir mutuku nang ap, Sudan mutuku nang ap ati, ‘Se, anggunda sikcuk melipnamsiakcaʼ, tenebupu nang bukni, ‘Se akunum bobinmak atia tenebuka, malye kanye bopnamake. Malye kanye bobuka unamak nang ara, amutuku nang bitinye bobiceba, eibikirye, ‘Se yata wiriptibye do? Nun mambul upsile. Sikce, nun melipnamsiake,’ tenelampu nang ara, ‘Akunum kum kiple,’ tenen, kanye ikin upnamle.
Bukni, sik Yerusalem mutuku unamak nang arye, aning nirya eibikcopura, ‘Kume, aning ara, tilila ati unmale. Ara, kanye imun ning yanamsila ati, kum uple. Raja Babel birye, el si erena isa, asipdenamle ning ap, elce mirye nyanmalye ning ap, adeice arye winipmalba, el deice lakakipmal ning ara, talye ati winilule,’ tenenamake. Tonda, sikce, ‘Kume, nun ap, Raja Babel ap, pia mikip nyalin yupu deice arye, Raja Babel an ap, nun israel nang ap ara, kum olanamabe. Teleb arye unamabe. Akunum nyapdapu ati, Raja Babel birye nunti, kum yanuka opnamsile. Weik ikin ning ara, nun dam ton kum yasutue,’ tenenamake. Bukni, na Allah arye, sikce malye-malye weik ulamik ning ati, tonap laka nyapnamne deice arye, aminyan kanye tenebikirye, moubuka bikinamake. ‘Se, dipkoprop, nun malye weik ulamupu bukni, wini talak ara, Allah arye wenebuka opnusileʼ tenen, moubuka bikinamake. Anggunce, ‘Se, aning nirya ara, Allah arye nun wenena ati, akunum winipmasilʼ tenen, moubuka bikinamake. Aning nirya winiplyeura, Babel mutuku Rajanye birye, Yerusalem mutuku bilirye, amutuku nang nirya, malye kiplye ning ara, binuka tomoplyeura, elce anggun tapu koupsilirye, el mutuku bobinuka deiplyeura, ikin ning weik, anggun nong deice delinamsile.
Imun kanye bobuka ulamupu talak ara, nun tuba kam ulamupu Israel yala nang arye, ‘Yuk mutuku nang ati, nun melipnamsiak do?’ tenen, tuba-tuba kalikuka dinauk ulamupubuk, nun asinguk dilamsuke. Bukni, talye atibuk kalikuka dilamupu. Deiyok ara, ‘Sik melibuka lyepropnamsik ca,’ tenelamupu mutuku nang nirya ara, nunti kum yanuka melilamsike. Yuk-yuk mutuku nang, tonok nang babye, “Tonda yuk nang arye, nunti yanuka melipnamsiak ca,” nyanyap bukni, sikce ton kum yanuka melilamsike.
Nyabukce, ayupu ton dukdongobuka nyabuk. Allah el si Yahweh arye nyapmasile. Anggun amutuku ululum Israel ninye ara, na dam arye batakuka, yukak tuba-tuba balulume. ‘Malye una ati, yukak bipyak’ tenen, anggun babye anggun bidamang ati, kel bikuka kum kalikildalulume. Talye luba kibuka, malyeuk winiluluma anya arye, anggunti, kanye kum deilisunune. Anggun malye winiluluma ati, lik unulula anya arye, na dam ton kum yanamlume. Ati ara, narye anggun malye winilulum ning nirya ara, namin kibuka kum batakdongopnamsine. Tuba tenenuna arye, anggun malye winimunye ning ati, wenebuka opnamsine. “Allah arye nyapdeipnuke,” Yeremia birye nyabuk.
Ati, nun ni Allah Yahweh, ance nun malye winilamap ning ati, pia yu weik upkiliba derepnirye, ‘Wenepnamne’ tenen, ‘Aning ara, tuba kum tenenamsilyam’ tenen, moropkinyabe. Nunda ance wiamsulumce, an mapu koproba una ati, kintinip deiamsulumba, unyaba anya arye, nun malye wininyap ning ara, ‘Tuba kum tenenamsilam’ tenen, morokinyabe. Aning kum bukni, ‘Ance nunti tamubuka kanye deipsimince, nun ikin usilye ning ati, melinamsilam’ tenen, morokinyabe, na nio.
Ati ara, ‘Na wel ulamse talak ara, malye ning talibuka ulamse ning ap, tuba kum teneninamnilam’ tenen, moropkine na nio. Ance nunti, ‘Aning ara, wininamlume, aning ara, pia kum wininamlume,’ nyapdeiamsulum yupu yanipsirye, malye ulamse ning nirya ara, tuba kum teneninamnilam’ tenen, moropkine na nio. Winipsiminyopura, yuk nang nirya eipsikirye, ‘Se, Allah Yahweh, elda pia diksukum koprop unanye ulule,’ nyabuka, bikinamake.
Mutuku lulukna weik arye lulukukba, adiparyuk weik asik domik mutuku, el si ara Babel mutuku noutamak arye, tuku nirya dilikukce, bokuka winilye kibuk. Tukwak mutuku im sirya, mutuku sirya nirya noutamak arye, weik asik domikak nirya adiparyuk lokuka biyukce, atu atonun kiplobuk. Deiyok ara, Allah arye weik mutuku si Babel mutuku ninye arye, pia malye ulamik ning nirya ati, tuba tenebukce, amutuku ninye wenena ati, yu pia weik ulamuka ati, asirya dakne talak, yu pia weik ubukba, weik mikip arye oplobuk. Allah el yu upmanto ning ara, yu weik arye kanye wangalamak mek kwebuka, tonok mek makau pum tam weika arye dikdongobikirye, yuk nang ati, mikip arye sik si bam bol pum tam dikdongobicopura mek si amubuka lupdonokmanto kum winiptingopura, Ara, Allah arye weik wenena ning arebuk ati, sik Babel mutuku tam ninye lyepdanmanto kum unmekak eipse.
Wini talak ara, nun akunum kel kipmabe. Asyur mutuku yin talin nang arye, nunti kum lyepdopnamsiyake. Tonda, nun kuda basam deice bukuka batipya babye, aning arye kum lyepdatibye. Tonda, minop talak ara, nun taruk arye puturubuka deiamupu ning ati, ‘Nun ni yapu ani,’ nyabuka, talye ning ati, si erelamupu bukni, aminyan dounamle talak ara, aning tuba tonap pia kum wininamabe. Aning ara, akunum batakabe. Ara, talye ati kum nyapmabe. Nun ni Allah ancuk, mutuku-mutuku daunyak ninye nirya ap, kwaknan mapu nirya ap, bico tenesimince, melipsilyame. Ati, nun melipmantonye ton kum ulule, an tonoka.” “Nyabuka moronamlume.” Hosea birye, Israel ninye ati nyabuk.
Allah Yahweh arye, na nabi Hosea biti, yanuka nyapnuk. ‘Sik Israel yala nang nirya arye, malye yupu nyana ap, talye yupu nyaltakna ap, ninye walana ap, olana ap, pia weik tonun winipdanin banyake. Winibika ati, na Allah ara, Pia Teleb Lek Deiyoknye unune. Tonda narye, ‘Winipnamneʼ nyabuka, nyalin yupu deice arye nyanye touk, aninguk dipkoprob unune. Ati, sik Yehuda yala nang ara, na lik ati, na dam ton, tuba kum yanganamake.
Anggunce malye winilulum ning nirya ara, pia malye weik winilulume. Ara, sik Gibea mutuku nang arye, malye winin ning weik talibuka winilamikce, malye kipdeipdayik touk, anggun amutuku ululum Israel nang babye, atonun winilulume. Winiluluma ati ara, Allah arye anggun malye winilulum ning nirya ara, tuba tenipsilirye, wenepnamsile. Ara anggun malye winimunye ning atonun, dengna arepsilirye, wenepnamsile. Nabi Hosea birye, sik Israel yala nang ati nyabuk.
Israel mutuku noutam unyak nang bukni, Efraim birye deiamukba, dadeipdanin yangalamik nang, sik dabu tam (arah utara) unyak Israel yala nang nirya arye, ‘Yata mutuku nang arye melipsiting do?’ tenen, otam binapna, atam yanamana kinyak nang unyake. Ara, mitik maka el si merpati maka arye, ‘Dan binuyap do?’ tenen, kanye tenina kumce, talye lukparabuka lakuka, otam lakuka binapna, atam lakuka yanamana kilamle touk, sik Israel nang babye atonun kiltonyake. Wininyaka ara, walwal arye unyake. Dipkoprob aning atouk, ‘Yu nang arye yanuka opsicakʼ tenen, anggunce Mesir mutuku nang ati, ‘Se nun kayapu, anggunda yanuka melipsululume,’ nyabuka morolamike. Atonun ton, Asyur mutuku unyak nang ati, binuka ‘Se nun kayapu, anggunda yanuka melipsululume,’ nyabuka morolamik. Winibuka morolamik bukni, sik yuk mutuku nang arye, kum melilamike.
Winipmanto ara, uk dilamle ninye ap, suse dilamle ninye ap, sik nong bol malye upliba, ‘Yata kwetenanye birye, melipsutu do?’ tenen, el balamaka atonun, sik Efraim tam ninye ap, Yehuda tam ninye arye, sik malye wininyak ning moubuka tenebikirye, ‘Se, nun malye winina ati, Allah arye wenen ning arepnusil’ tenen, kel bikikirye, adiparyuk Asyur mutuku morolbinamake. Bikirye, Asyur mutuku ninye deiyoknye biti, ‘Se na nio, yuk pera mutuku nang arye olyanamsiyaka anya arye, ance an mutuku yin talin nang wibuka deiptumba, lyepnamsiyake,’ nyabuka moropnamake.” “Nyabuka moronamak bukni, na Allah arye dipkoprob nyapsine. Asyur mutuku yin talin nang ap, sik ninye deiyoknye ap, moroptum babye, anang arye kum melibuka lyepdsitinge. Tonda uk ap, suse ap dilamlye ninye ati, kwetena walwal nang arye, moubuka kum kwetepmanto ulamak touk, Asyur mutuku ninye arye anggunti, pia teleb ubuka kum melipsitinge.
Aning nirya akunum winipnamne talak ara, atalak dam uplyopura, na pil dopnamna deice arye, Israel nang nirya ara, mikip kipdeipnamne. Winipmanto ara, sapi basam kisok deice taice ning belelamlarye, cang belepnin balamle touk, Israel nang ati, mikip kipdeipnamne. Tonda narye melipkiniba, Yeheskiel anda, Israel nang dam, yupu talye mangkau nyaminyeba, sikce an yupu kekenamkiyake. Aning nirya winipnye deice arye, sik anang nirya arye, ‘Se, dipkoprob, aning-aning nirya talibuka, deice tam erebuka ulirye, pia mikip weik ululnye bira, ara Allah Yahweh el uka,’ tenepnikirye, nati moubuka biknamniake.
Aning winipnyeba, sik amutuku nang arye, anggun ning nirya, akunum kum kipdeipsicopura, anggun Mesir mutuku noutam nirya ara, ninye yupu ton, kum kekepnamake. Pia tunim anauk upnamle. Winipliba, Mesir mutuku nang arye, na Allah Yahweh ati, ‘Se, Allah Yahweh elda, aning-aning talibuka, deice tam erebuka, Pia Mikip Weik Deiyoknye ululeʼ tenen, nati biknamake. Aning ara, talye ati kume. Deiyok ara, an Mesir mutuku ninye deiyoknye Firaun ap, an amu tam ulamik nang ap arye, ‘Kume weik balamle mek, el si Nil mek ara, naryuk kwepdeipse. Amek ara, na ninguk ulule. Naryuk amek talenune,’ nyabuka, kwalipluma ati, weik tonun wenebuka, oplopnamsine.
Israel nang amutuku unamak talak nirya ara, olana kumce, kanye deibikirye, pia telebuk ukirye, sik aik dobuka ukirye, sik anggur wa wibuka unamake. Minop talak, anggunti, ‘Israel yala nang ara, malye nanguk unyake, dakwapye,’ nyabuka, amutuku dana-dana tam ulamikce, mal olyangalamik nang nirya ara, narye wenebuka oplopnamne. Winipnamna ati, Israel nang, sik amutuku unamak talak nirya ara, ninye ilil una kumce, kanye deibuka, pia telebuk unamake. Atalak ara, Israel yala nang nirya arye, nati, ‘Se, Allah el si Yahweh, dipkoprob el mikip deice arye, aning-aning nirya talibuka, el mikip weik deice arye, nun ninye deiyoknye ulule,’ tenenamniyake. Utenepnikirye, ‘Allah el akunumaʼ tenen, biknamniake.
Se, na ni Allaho, nun wini talak unyap nang arye, anti moropkiabe. Ara, ‘Nun apu yapu arye, an yupu yanilamikce, pia malye weik ulamik ning nirya ara, ance tuba tenipmince, nun wini talak unyap nang ati, weik tonun kum wenamsilam’ tenen, moropkiabe na nio. Aning kum bukni, ance weik tonun bico tenepsimince, minop yaminyak arye melibuka lyepnamsilam’ tenen, moropkiabe na nio. Deiyok ara, ani. Sik yuk-yuk mutuku nang arye, yanuka opsikce, nunda dobuka, pia amu tamuk deipsikce, pia malye akunum kipdeipsika ati, imun kanye bobuka ulamupu ati, moropkiabe na nio.
Winibukopura, ayouwak kil arye Elia biti nyabuk, “Anda Allah el pil dolyamnye binya arye, ance nati yata tenepmanilamce, malye kipmanilam do? Tonda ance na malye unye ning ati, ‘Tuba tonap, moubuka tenepnutue’ tenen, na dam yanmalam do? Tonda, na mi ona ati, yanmalam do? Yata deiyok ati yanmalamba na mi dipmanil do?” nyabuka malye yupu nyanmok.
Anye birye, el kil bobuka, Allah ap, ninye ap, elana ati, tia ati doltakna tenda aik, talibuka pil don nang, sik dam boyanganamlule. Imam deiyoknye dam bobinulye talak ara, apil donamlule. Ara, ‘Allah arye, na kil malye winipmal ning ati, namin kiplirye, kum daneipnamleʼ tenen, Allah arin ning ton boyanamlule. Boyanamle ning ara, ani. Gandum duk tekikirye, sice atonun delinyak ning, el si terigu gandum 2.2 liter, memebuka boyanamlule. Atepung ara, minyak zaitun ap, tonda siltong teleb nyalamle ning, el si aram kemenyan ap, min kum taplak deipmace, diparyuk bobuka arelyanamlule. Deiyok ara, anye birye gandum dobuka, Allah ati arepnamle ning ara, el kil malye winyamlye ninguk, tamubuka teninauk, ‘Malye winiplume,’ nyanamle ning ati winipnamle. Aning deiyok ara, akil arye, pia malye winipnamle ning ara, tamubuka tenen ning ati, winipnamle.
Piblisite