Aminyan talak ara, Israel yala nang ara, sik dam dana-dana tam unamak nang nirya arye, anggunti kum mal pinamsiyake. Winipmanto ara, taice ning nong noutam wekmalirye, lebum-lebum alamle touk, sik dana-dana tam unyak nang arye, ton ap mal pibikiba, ilil weik upnaba, talima uk, dilamsuk ning ara, tuba tonap, uk kum dinamsile. Min arye, sik dana-dana tam ulamik nang arye, ‘Sik Israel nang ara, malye ninguk wininyake,’ tenebuka nalibuka malye weik ulamikba, ‘Naʼ tenen nang, ikinuk ulamik bukni, narye aning nirya winipnamna deice arye, sikce, ‘Se, dipkoprob Allah Yahweh, el mikip deice aryuk, ninye mutuku sirya, im sirya nirya, sik weik deiyoknye ulule,’ tenen, biknamake.
Yehezkiel 28:26 - Eipomek26 Israel nang amutuku unamak talak nirya ara, olana kumce, kanye deibikirye, pia telebuk ukirye, sik aik dobuka ukirye, sik anggur wa wibuka unamake. Minop talak, anggunti, ‘Israel yala nang ara, malye nanguk unyake, dakwapye,’ nyabuka, amutuku dana-dana tam ulamikce, mal olyangalamik nang nirya ara, narye wenebuka oplopnamne. Winipnamna ati, Israel nang, sik amutuku unamak talak nirya ara, ninye ilil una kumce, kanye deibuka, pia telebuk unamake. Atalak ara, Israel yala nang nirya arye, nati, ‘Se, Allah el si Yahweh, dipkoprob el mikip deice arye, aning-aning nirya talibuka, el mikip weik deice arye, nun ninye deiyoknye ulule,’ tenenamniyake. Utenepnikirye, ‘Allah el akunumaʼ tenen, biknamniake. Gade chapit la |
Yehezkiel 28:26
41 Referans Kwoze
Tonda, na Allah Yahweh, aning-aning nirya talibuka, deice tam weik tonun erebuka, Pia Mikip Weik Deiyoknye birye, anyapkin yupu ara, ance, Sidon mutuku nang ati, nyapnulyame. Ara, Sik Sidon mutuku nang ara, nara sik mal olananye ununa anya arye, sikce biknuninyake. Sik dam yanukam laka kipnirye, sik wenena ning dobuka, sik nong deice deipnyopura, winipnamna deice arye, dipkoprob sikce biknikirye, ‘Se, Allah ara, dipkoprob aning-aning nirya ara, el mikip deice arye, talilula anya arye, elcuk ninye mutuku sirya, im sirya nirya, sik weik deiyoknye ulule. Tonda, amutuku unyak nang nirya arye, na mikip weik ununa ap, na malye una pia kumce, pia teleb leknye ununa ap ara, moubuka biknamake. Ara, narye sik dam kanye imun weik ning deipnamna deice arye, atalak arye biknamake.
Asum-asum ap, wala ap, yata wiribuka do, mitik tonun ton akunum mapminyopura, narye anti ‘Wini talak winipnamlume, yuk mutuku binuka anang obuka sirya daknamlume,’ nyapnamkine. Aminyan dounamle talak ara, nyapkiniba, atalak ton tonok weik asik dam binamlume. Ara, amutuku ulamak nang ara, minop talak, anggun mal olan nang arye mal olamikak arye inipdobikce, obuka bobinamikba, pera mutuku noutam daulamika ani, keting tamun weik akunum ubukura, lopdeipsiba, tuba tamubuka sik mutuku yayikba, narye teleb kipdeipse. Ara dana-dana tam mutuku noutam, yuk nang ap ansinibuka, daulamepya ani, narye tuba sik weik asik ol dem uamuk bukni, tamubuka yanuka anyasik dobukabikce, Israel mutuku noutam daulamikce, yanuka kanye deibuka tunim abuka, telebuk ulamik. Minop talak ara, anang ara sik mutuku noutam kum ulamik. Pera mutuku noutam yuk-yuk ulamika ani, sik mutuku koproba ara asik oldemuk ulamuk bukni, narye anang bobuka, sik mutuku boyanuka deipseba, sik asik lipsisikuka dobikce daulamika ani, wini talak babye amutuku noutamuk tuba ukirye, talye kanye deibuka telebuk unyake. Wini talak ara, anggun mal olan nang ton kum yanganyake.
Nyapsopura, ayupu ton dukdongobuka nyapse. “Awinipnamlam ning ara, talye ati kume. Deiyok ara ani. Ara, Israel nang nirya arye, si erenyap Allah, elda Yahweh ulule. Nun ni koproba Allah Yahweh ara, im deice yin talin malaikat nirya talilyak arye, sik deiyoknye ulula ati, mikip weiknye ulule. Allah elce, ayupu nyapdeipsuke. ‘Babel mutuku nang opsikirye, anggun bobinuka, pera mutuku deipnamsiak bukni, aminyan doyanamle talak ara, amutuku noutam ubuk tuku ap, atuku deice asik dolulum ning ap, tonda anggur wa wilulum ning ara, sik Israel nang arye tamubuka yakirye, tuba dekdopnamake,’ nyabuka, akunum laka nyapdeipmasile,” nyapse.
Yata nang do nirya, sik ni koprop Allah Yahweh ati, ilil tenebuka ukirye, el siuk erenyak ninye ara, kanye lamapdongobuka telebuk unamake. Tonda, Allah Yahweh arye, aninye ati, pia melibuka kalikinamle. Aning atonun, anang sik mapu silip nirya ara, Allah arye melibuka kalikilirye, aning-aning weik tabakuka sikti, arenamle.
Tonda, nara sik yuk-yuk mutuku nang, pia dakeiam asa arye, nimalyap asa mutuku-mutuku nirya unyak nang nirya ara, ‘Nunda pia telebe,’ tenen, maknya kintinibuka, kwalinyaka ati, narye sikti, pia lik ubuka, malye kanye bopse. Deiyok ara, mince na mapu koproba, sik Israel nang arye malye winilamik ning ati, na mitik tonun talima noutam yu upnukba, ‘Anang wenepnamne,’ tenepse bukni, nati diba kum teneninyak nang, yuk-yuk mutuku unyak nang arye, na mapu koproba Israel nang ati, pia weik tonun yu ubukba, ikin ning pia weik tonun dobuka, sik nong deice delilamik. Na mapu koproba deice arye, kanye imun weik ning, pia weik tonun boyanuka delilamika ati, narye sikti, malye kanye bonune. Ati, anang wenepnamnarya!
Minop talak, anggun Kasdim mutuku ninye arye, yuk mutuku ninye ati, olamlumce, sik ning nirya, ubula dololamlume. Tukwak mutuku noutam nirya arye, anggunce yuk ninye mitik asik arum ap, weik kota mutuku ap, uluplopna arye, sik ning ubula dololamlume. Amutuku ulamik ninye weik arye, obuka sirya dakmanto ulamlume. Bukni, wini talak ara, yuk mutuku nang oplumce, mitik anun batakalum ninye arye, anggun dam yanuka bisibuka malye kipsikirye, adiparyuk, obuka sirya daknamsiyake.
“Atalak ara, ‘Bai mutuku yo kan-kan unyak ning ap, maka im deice laklamle ning ap, tonda tukwak ulul ning aning-aning nirya ara, ton kum olyanganamsiyak’ tenen, narye akunum yupu seknamne. Aning ayala-yala nirya ara, talye kanye bobuka unamake. Tonda, sikti, yu kanye bobuka, opdanmanto ninye nirya ara, kum kipdeipnamne. Ati, anggun mal ap, yin ap, parang ya ap, yo taice ap nirya ara, kum daneipnamne. Ati ara, anggun Israel ninye ara, ‘Dan mutuku ninye arye olyanamsiyak do?’ pia ton kum teninamlulume. Teleb kanye bobuka, unamlulume.
Ati ara, sik Israel nang arye uku dongona ati yo ara, bai kum dolbinmake. Tonda, ‘Nun aik yo patapsilʼ tenen, yo kan-kan ton kum wepnamake. Tonda, sik wa win dam kum bol banamake. Sik mal olan nang arye, ninye ona ati bomikce ning nirya, pia weik aupnamla ati, Israel nang arye, aninguk bulubuka, deibikca deice aryuk, sik asik yo ati, uku donamake. Tonda, God mutuku nang ap, sik melilamik nang ap arye, Israel nang, sik ning nirya alubuka dololamik ning, ara Israel nang, sik bona nirya ubula dopromik ning ati, kwang daknamsiyake. Ara, Gog ap, el yin nang ap, sik ning nirya ara doropnamak bukni, atalak ara, Israel nang arye, sik Gog tam nang taleamik ning nirya, tamubuka alubikirye dopropnamake. Na Allah Yahweh, aning-aning nirya talibuka, deice tam erebuka, pia mikip weik ununye birye, akunum nyapdeiamsa ati, aning nirya dipkoprob nong upnamlarya!
Bukni, asum ara, lukunyan talak ara, anggun mutuku yanamak yin talin nang ara, anggun mutuku tuba ulamice talak ara, sik anang dam ara weik ilil un ninguk winipbikceba, sik ilil weik upnamle. Bukni bereklyeura, sik ayin nang nirya akunum kum kipdopnamle. Awinipnamle ning nirya ara, nun ning alubuka dolosinyak nang, Allah arye sik deice deipnamle. Tonda, nunti, sice buklopnamsiak nang ara, Allah arye sik nong deice weik kanye ikin ning arepnamle.
Bukni, anggun Yordan mek koubuka otam mutuku bimunyopura, Yordan mek otam ulul mutuku nirya ara, Allah el si Yahweh arye, amutuku nirya arepnamsile. Ara, Allah arye melipsilyopura, amutuku talibuka, pia unamlume. Amutuku wekuka unamlum talak ara, sik dana-dana tam unyak ninye, anggun mal olan nang ati, tuba kum tenenamlulume. Talye kanye bobuka umunce, dikdik sebuka, telebuk unamlulume. Ara, Allah arye melibuka talipsiliba, dakeiyam asa unamlume.
Winibuka uniba, sik Israel ninye arye na ati, ‘Dipkoprop, nun ni Allah Yahweh ara, el tonok ululeʼ tenen, biknamniake. Tonda, ‘Allah Yahweh el aryuk, nun Mesir mutuku noutamak ulamupu, ikin pil dilamsikba, weik imun kanye bobuka ulamupu bukni, el mikip weik deice arye, dobuka yanamsukaʼ tenen, kel kinamake. Mesir mutuku noutamak arye boyanamsa deiyok ara, talye ati kume. Ara, ‘Nara, sik deiyoknye Allah Yahweh, sik kan-kan noutamak uniba, sikda na mapu koprop unamake. Nara, sik ni Allah Yahweh unamne,’ tenyamse ati, Mesir mutuku noutamak arye, Israel ninye lyebuka boyase. Nara, dipkoprob sik ni Allah Yahweh unune. Sikda, na mapu koprop unamake. Allah Yahweh arye, Musa ati nyapdeibukba, Musa arye sik Israel ninye ati, lak nyabuk.
An talima noutam arye nyapnamlame. “Ara, yuk mutuku nang ara, weik asik domikce, daunyak mutuku bukni, ‘Nun mal olan nang yanuka opsicakʼ tenen, sik weik asik domik sukum antanapdongobuka dana-dana tam, cang keil poka kum dobuka unyak mutuku ara, nara binuka weknirye oplopnamne,” nyabuka, laka nyalanamlame. Utenepmince, ayupu ton nyalanamlame. “Ura amutuku ara, keil poka dobuka una ap, bublan tirikdongobuka una ap, pia kum unyaka ati, sik ning ara, ‘Kume nunda teleb diparyuk tunim nyabuka unyabe. Tonda nun ninye on ning nirya ara, akunum kintinibuka unyabe,’ tenenyake. Bukni, ance anang ara, sik dam binuka opnamlame.
Na Allah arye nyapsine. Diba, anggunda na domba basam atonun nang ululuma ati, na mapu koproba ululume. Winibuka umunyeba, narye anggun patanmasilye ning nirya aresunune. Ati, anggunda dipkoprob anyak arye, nara anggun ni koproba, Allah unune. Ati nara, Allah Yahweh, aning-aning nirya talibuka, deice tam erebuka, Pia Mikip Weik Deiyoknye ununye birye, anggunti ayupu akunum nyapdeipsine.
Yerusalem mutuku unyak ninye nirya ara, sik nong deice malye updeipnamake. Winibikirye, pia malye una ap, yu kanye bona ap, unyake. Minop talak ulamik ning nirya ara, elti, si erelamikce ulamik touk, winina telebe. Wini talak ara, nong bananguk eipmaba deice arye, ‘Nun like’ tenen, batakanyake. Wininyaka babye, el asok nirya lelipdoplye talak ara, ‘Bico,’ teneplyopura, el talima uk dipliba batakalule.
Atalak noutam ara, Yehuda mutuku noutam unyak nang, anggun mal olan nang oplopniba, anang ap, tonda, Yerusalem mutuku weik asik noutam unyak nang ara, lyepropniba, sik anang nirya ara, teleb kanye deibuka unamake. Sikce, ‘Se, nun mal olan nang arye olyasicakʼ tenen, tuba kum teninamake. Atalak ara, amutuku nang arye, Yerusalem mutuku weik asik ati, “Amutuku el si ati ara, ‘Allah Yahweh nunti lyepsilirye, pia melibuka kalikinamsile,’ “nyabuka, si erenamake.
Bukni, wini talak ara, anggun ati dobuka alupdomsik nang nirya ara, narye sikti, alubuka dopnamne. Tonda, anggun mal olan nang arye, ‘Israel nang nirya obuka, sice buklopnamabʼ tenen, olyangalamsik nang nirya ara, narye obuka, sice buklopnamne! Aning atonun, narye lo arepninyeba, anggun mal olan nang nirya ara, yuk mutuku nang arye obikirye, tapu koubuka, sik pera mutuku bobinuka deipnamake. Naryuk, anang yakuka donoknamne. Tonda, anggun mutuku yanuka opsikce, anggun talilamlum bona nirya alubuka doprobikce, bobinamik nang nirya ara, yuk mutuku nang arye, anang obikirye, sik talinyak bona nirya, alubuka bobinamake. Atonun, yata mutuku nang do nirya, sik Israel nang ati, ‘Ayala nang ara, opnamabe,’ tenyamse nang nirya ara, narye lo arepniba, yuk-yuk mutuku nang arye, anang ati, sik dam yanuka opnamake. Deiyok ara, anggun deice ikin ning delisinyak nang nirya ara, na Allah arye, sik deice tamubuka ikin ning delinamne.
Aning ara, talye ati kum nyapkine. Deiyok ara, Yeremia birye, nun Yehuda yala nang bukni, Babel mutuku noutam tuba unyap nang ati, surat sekuka dopkwetepsuke. Asekuk surat noutam ara, ayupu nyabuka sekuke. “Anggun Babel mutuku unamluma ara, keting tamun yupa pia weik mapnamluma ati, amutuku noutamuk, anggun unamlum aik ara, dopnamlume. Tonda, anggun din dipmunce, unamluma ati, wa wipmunce, din yala kounyak ning kounamlume. Wa wiamica lin talak ara, awa wiamica linamlum ning boyanuka dinamlume,” nyabuka, surat sekeipsuke. Anye Semaya birye, asurat sekuka, imam Zefanya biti arebuk.
Allah arye nyapdeibukba, nabi Yesaya birye sekeibuk. Se, nun mal olan nang, sik Asyur mutuku ninye arye, sik yuk mutuku unyak ninye ati, sik mutuku dakuka uku sice kiploplum bukni, yuk mutuku ninye arye, anggun talilulum ning nirya babye, dakuka kum uku sice kiplopsulume. Anggunce, yuk mutuku ninye sik nong deice, pirilen ning delilulum bukni, yuk mutuku ninye arye sik Asyur mutuku ninye nong deice pirilen ning kum delinyake. Ati ara, wini talak anggunce ‘Naʼ tenen, ninye ati, sik mutuku ulubuka uku sice kiploplum bukni, aning winibuka akunum sirya dakmunyopura, aminyan talak, yuk mutuku ninye arye, anggun talilulum ning nirya babye atonun, ulubuka uku sice kiplopnamsiake. Tonda, anggunce, yuk mutuku ninye, sik nong deice, pirilen ning delilulum bukni, aning winibuka akunum sirya dakmunyopura, aminyan talak yuk mutuku ninye arye, anggun Asyur mutuku ninye ati, anggun nong deice pirilen ning delinamsiake.
Winipnamaka deiyok ara, ani. Ara, Allah arye, “Aning ara, wininamlume. Aning ara, pia kum wininamlume,” nyapdeiamsuk yupu nyasilye touk, sik yuk yala nang arye, malye winilamik ning moubuka dipdekirye, awinilamik touk, Allah el yupu deice arye, yupu lipsisikuka bokeibikirye, wenepnamake. Allah el ‘Naʼ tenen nang arye, yuk mutuku nang ati, wenepnamaka ara, sik si erebuka kina ap, deiyok koubuka si erena ati, apil donamake. Ara talye wininyak nang ati kum bukni, Allah arye nyasilye yupu moubuka talibikirye, batakna kumce, ayupu uk dobolbanyak nang arye, sik malye wininyak nang ati, yupu lipsisikuka bokeibikirye, wenepnamake. Nun Israel yala nang nirya arye, nun ni Allah, el si Yahweh ati, “Se, anda pia teleb ulyame,” nyabuka, el si ukerenamabe!
Ura, wini talak ara, anggunce malye kanye bobuka, ‘Se, nun mutuku ara, pia oldemuk upmasile! Nun mutuku ara, Allah arye lo arebukba, sik Babel mutuku yin talin nang arye yanuka, obuka malye kipsikce, nun mutuku alubuka doprobikce, talibikba, nun mutuku ara, kata sukum atonun ubuk. Ati ninye babye, bai tam talye kam ulamle ning babye, amutuku kum unyake! Wini talak ara, anggunce ayupu nyalulum bukni, narye anggunti nyapsine. Doyanamle talak ara, amutuku nirya tuba tonap, teleb kipdeipnamsine! Wa wibuka koupnamlum ning ara, teleb aryuk libuka dekelamunce, dinamlume.”
Dipkoprop nyapne. Ara, narye sik aninye unamakak ara, pia maning teleb ubuka palul mutuku noutamuk, binuka kintinip deipnamne. Tonda, iknapye tam ap, Israel mutuku lilun tam ap, kintinip deipnamne. Abobinuka deipnamne mutuku ara, teleb ubuka, namin arye, dikdik sebuka unamake. Tonda, sik adomba basam, Israel mutuku kon deice arye, maning teleb namin arye dinamake.
Sik malye wininyak ning dekna ati, akunum wenepnirye, aminyan talak ara, narye sik Israel ninye ati, anggur duk wa winak ap, yo duk moulamle yo noutamak ap ara, tuba tamubuka arepnamsine. Winipnamna deice arye, Akhor mutuku dam ara, winiryuk bublan atonun kipnibuk, amutuku ati tenebikirye, ‘Se, aminyan talak ara, telebuk unamabe,’ tenebikirye, kanye deibuka unamake. Ara, minop talak ara, malye winilamikba, Akhor mutuku noutam, weik wenebuka opse bukni, aminyan talak ara, tuba tamubuka, Akhor mutuku teleb kipdeipnamne. Minop talak ara, Israel ninye wel nang atonun ulamik talak ara, Mesir mutuku noutam pia ikin ulamikba, narye lyebuka lopdeipsiba, Mesir mutuku arye, batakuka bindobik talak ara, Israel ninye arye, ‘Nun ni Allah, el siuk erenamabe,’ tenebikce, sik kanye talima, na deiceuk deipnik. Winibuka, na siuk erelamnik touk, aminyan talak babye, tuba tamubuka, na dam yangakirye, teleb kanye bobuka, na siuk erepnamniake.
Winipmanto ara, talye daulamle maka arye, ilil weik upliba, nong nirya lukulalamle touk, na mapu ara, Mesir mutuku noutam arye, na dam tamubuka yanganamake. Winibuka yangace talak ara, sik nong nirya sirim talinamle. Aning atouk, Merpati maka nyalamak atonun, tonda yalma maka mer weik arye, neika balamak touk, na mapu koprop Israel ninye arye, Asyur mutuku noutam arye batakuka, sik nong nirya sirim talinamleba, na dam tamubuka yanganamake. Winibuka yace talak ara, narye anggun aik ap, anggun mutuku ap, tamubuka yanuka deipnamsine. Na Allah Yahweh arye nyapsine ati, anyapmasin yupu ara, dipkoprob nong upnamle ati, nyapsine. Allah arye nyabuk.
Allah arye tonap, na Yeremia dam yanuka nyapnuk. Na Allah arye Israel yala nang, sik dana-dana tam unyak yu nang, ara yuk negara-negara kibuka unyak nang ara, narye wenebuka opnamanarya! ‘Sik ayuk-yuk yala nang arye, na mapu koproba, Israel yala nang ati areamse mutuku ara, sik yuk tam nang arye, ‘Nuncuk amutuku ubula doprobibirye, talibuka unamapʼ tenen, pirinyake. Winipmanto ara, ninye arye kounyak ning, tukwak kouamikceba, aminyan, ‘Aning ara, nun likʼ tenen, tuba kwenilamak touk, narye sik amalye nang dobuka, Israel nang, sik mutuku nirya ara, dobuka donoknamne. Winipnyopura, Yehuda yala nang babye, sik amalye nang kan-kan noutam arye unyak nang ara, sik mutuku noutam arye dopropnirye, yuk pera mutuku noutam deipnamsine.
Narye sik amutuku unyak nang nirya, sik wenena ati, yakdonokniba, yuk mutuku nang unyak mutuku tikilbinuka, ikin weik daulamica ani, aminyan doyanamle talak ara, sik nirya, narye tamubuka, anggun mutuku uk boyanuka deipnamsine. Wini talak ara, na yu weik uniliba, lik unilya ati, narye sikti, yakuka donokamniba, yu nang arye, sik tomobuka, tapu koubuka, pera mutuku yukak bobinamake. Bukni, doyanamle talak ara, narye tamubuka boyanirye bulubuka, asukumuk deipnamne. Narye sik tamubuka, sik mutuku koproba, asukumuk boyanuka, teleb kipdeipnamne. Boyanirye, sik anang teleb kipdeipniba, olana kumce, kanye deibuka, talye dakeiam arye, pia amutuku uk unamake.
Piblisite