Winipnamkiyaka ati ara, yuk pera mutuku nang arye, an opnukice ning ati, ance, ‘Kume, nara Allah atonunye unune,’ nyapnalam do? Kume, sikce anti, akunum bikika ati, anti opnamkiyak nang ati, ance, ‘Kume, nara Allah atonun unune,’ nyaptuma babye, sik anang arye dipkoprob akunum bikike. Ara, ‘Elda, Allah atonunye kum bukni, talye tukwaknye ululeʼ tenen, moubuka akunum bikike.
Yehezkiel 28:2 - Eipomek2 “Se, anda ninye sirika arye deipkiknye, ance Tirus mutuku ninye deiyoknye biti, laka nyapnulyame. Ara, “Nara Allah Yahweh, aning-aning nirya talibuka, deice tam erebuka, weik erebuka mikip ununye birye, nyapdeipnun yupu ara, ninye deiyoknye Tirus mutuku Raja ati, ayupu laka nyapnulyame. Ara, Tirus mutuku Raja anda, an kanye pum tam erepluma deice arye, nyaplume. Nara, Allah atonunye unune. Narye weik laut mekwen noutam, mekwen dana-dana tam antanap dongobuk mutuku, pulau deice tikniba, talye ninye arye, na si erenamniyake,’ teneplumce, nyapmalum ning ara, talye yupu deice arye nyaplume. Bukni, dipkoprob ning ara, anda, Allah atonunye pia kume, anda talye tukwaknye dem ulyame. Aning moubuka tenipnulyame. Gade chapit la |
Yehezkiel 28:2
40 Referans Kwoze
Allah el winin ning Yanina Deiyoknye birye, ninye mutuku-mutuku nirya, ‘Nun deiyok ning’ tenen, Allah atonun si sisibuka, si erenyak ning nirya ati ara, elce yanilule. Elce, Allah winin ning nirya ati ara, ‘Na aryuk deice tam unirye, aning nirya ara, na amutamuk upnamle’ tenen, elce el bidamnye ati, erepdanamle. Aninguk kume, anggun Yahudi yala ninye arye, Allah el si erena ati, weik mambul deiyok aik dolulum ning ara, anye birye anyaik wekuka, ‘Ninye mutuku-mutuku nirya kekenamak’ tenen, “Nara, Allah unune,” nyabuka, elce el bidamnye siuk erelilanamle.
Anggunce, ‘Se, sik Mesir mutuku nang ara, pia mikip weik nang unyake,’ tenelulum bukni, na dipkoprob nyapsine. Sik Mesir mutuku nang ara, talye tukwak ninye koproba uka. Sikda na Allah ununa atonun nang kum unyake. Sik talibuka unyak kam ning kuda nirya ara, talye ninguk ulule. Sik kuda basam ara talye kam ninguk, na talima mikip ulul touk kum unyake. Mikip kumce mitang ninguk unyake. Ati, na Allah taruk deice arye, ikin pil dobuka, anggun malye winilulum ninye nong deice ikin ning deipsinye talak ara, na wenepsinirye anggun nirya obuka sirya dakanamsine. Ara, pia malye ululum ninye ap, anggunti melisinyak ninye ap, anggun nirya wenebuka opnamsine. Winipmanto ara, ninye bakirye keil yan dum dukliba, saklamak touk, narye obuka sirya dakanamsine. Anggun nirya adiparyuk dipnamlume. Allah arye sik Israel yala ninye ap, Yehuda yala ninye ap ati nyabuk.
Ninye ton el kam ulul talak nirya, kanye talima erebuka kwalilulnye bira, aminyan yuk talak, Allah arye anye biti wenepliba, sakuka opliba, kanye imun weik unamle. Aning atonun, yata ninye do nirya, sik kanye talima erebuka unyak ninye ara, aminyan talak ara, Allah arye aninye nirya ati, weneplirye kum daneipnamle.
Ati ara, nun ni Allah Yahweh anti moropkiabe. Ara, ‘Talye tukwak mutuku, im sirya, mutuku sirya nirya unyak nang arye, ‘Winipnamabe,’ tenenyak ning arye, ‘Yuk ning nirya ara, bisiplyak’ tenen, an Yahweh arye, anang wenepmince, sikti, yupu sekenalame. Tonda, yala yuk-yuk nang nirya ara, mutuku sirya, im sirya nirya, yuk-yuk daunyak nang ara, an dam yakcopura, an Allah aryuk sikti, yupu lipsisikuka bokeipmince, wenepnalame.
Aning ara, talye ati kum nyapsine. Allah arye akunum tenyamuk touk, asum akunum uplyeura, Allah Yahweh aning-aning nirya eitam erebuka, im deice yin talin malaikat nirya, sik weik deiyoknye ulula ati, sik kanye erebuka, kwalibuka unyak nang nirya ara, amu tam kipdeipnamle. Tonda, tukwak nang mutuku sirya, im sirya nirya arye, ‘Se aning ara, weik mambul, aning tonok ara, pia telebeʼ tenen, dipdakirye, kwalibuka talima erenyak nang nirya ara, Allah arye aning nirya yaniplirye, pia amu tam kipdeipnamle. Tonok ning babye, kum bataknamle.
Asurat deice arye, “Yuk nang ati, nimalye arye sik amutamak unamlulume,” nyapmasin touk, anggun wisi danana kum arye, kam nang atonun nang ati, ayupu nyapsine. Ara, sik wisi nang amutamak umunce, sik yupu kekebuka nimalye arye unamlulume. Buku Amsal yupu noutamak sekeipsik yupu aupmala ati nyapsine. Ayupu ara ani. ‘Sik kanye erebuka, dildanyak ninye ara, Allah arye aninye ati bataklirye, sik yupu sekelule. Bukni, sik kanye darabuka, talima nimalye arye amutamak unyak ninye ati ara, bico tenepsilirye, talye luba kibuka melisulule.’ (Amsal 3:34) Ayupu tuba awamsuka ati, anggunce yuk ninye nirya ati, anggun bidamnye kanye darabuka, talima nimalye arye teleb ubuka unamlulume.
Ara, Allah yupu peteren nang ap, Allah ati dib tenen ninye ap ati, deiyok kipmanto nang ara, winiryuk dib tenenyak nang ara, wibuka delina meme. Winiryuk dib tenepmak nang wibuka deipminyopura, aminyan sikce, ‘E, nunda weik nang akunum unyabe’ tenen, dilakcopura, Isa Mutuku Dongonye arye, ‘Na weik deiyoknye unamne’ tenen, malye ubukura, ‘Allah arye wenebuk touk, winibicak’ tenen, nyapne.
Habakuk ance, sik Kasdim mutuku ninye ati, moubuka dimince, tenipnamlyame. Sikda, sik kanye talima erebikirye, ‘Nuncuk nun bidamnye arye, teleb ulilanamabe,’ tenenyake. Sik kanye talima pung unyak ninye kum unyake. Bukni, kanye talima noutam dib tenebuka, moupropnamak ninye ara, nati dib tenekirye, diksukum ninguk wininamake. Ara, sikce na Allah ati, ‘Elcuk nunti kalikuka melinamsile’ tenen, dib tenenyak deice arye unyake.
Ati ara, na Allah Yahweh, aning-aning nirya talibuka, deice tam erebuka, Pia Mikip Weik Deiyoknye ununye birye, nyapne. Libanon keipyal yo, el nong weik tonun nelamla deice arye, el nong deice tam ara, dua kan-kan ap, deice tam ap, tikilule. El kamo teleb uplirye, el cang ara, pia cang weik ulula anya arye, ayo el kanye talima ereplirye, ayo deiceuk, maknya kintiniplirye, kwalibuka dilalule.
An nong bol urasin pia teleb upkuka deice arye, kanye pum tam erebuka kwalilyame. Tonda, an kanye pum tam erebuka, kwalilyama deice arye, ‘Pia urasin teleb ton tabakuka winipnamnarya,’ tenyamlum bukni, malye kipdeipdaluma deice arye, an pia moubuka, kel bikamlum ning nirya ara, akunum pia malye kipdeipdalume. Ati ara, narye an nong tukwak dopkwetepkisiba saklumba, sik mutuku sirya, im sirya nirya unyak Raja ninye deiyok nang, sik asing dinak arye winipkisiba, sik nirya arye, an malye winilamlum ning ara, akunum eibuka bikike.
Ninye ton sik kanye talima erebikirye, kwalibuka ukirye sikce tenebuka, ‘Se, nunda weik teleb nang unyabe,’ tenebuka unyaka deice arye, dipkoprob aminyan talak ara, saknamake. Yuk ninye amu tamuk unamake. Bukni, ninye ton mitang asa arye, kanye talima dakdongobuka ululnye bira, telebuk upnin baliba, yuk ninye nirya eibikirye, elti, kanye delinamake.
Uzia birye, amutuku noutam mikip weik tonun ton ap tabakdeibukce, amutuku taleamuk ati, el talima erebukce, maknya kintinildalamuk deice arye, el winilamuk ning nirya ara, pia malye kipdayuk. Elce Allah Yahweh arye, “Wininamlume, aning ara, pia kum wininamlume,” nyapdeiamuk yupu atouk talebuka kum ulamuk. Ati, Raja Uziah bira, imamnye kum ulamuk bukni, el kanye aryuk, Allah Yahweh si eren aik pum tam, Teleb Lek Aik wekuka, Allah el morona ati, kinggin tong teleb len ning uku dongona ati, uku dalamik sukum binuka, elcuk uku dongobuk. Winibuka deice arye, malye weik ubuk.
Aning-aning nirya teleb upsilyopura, anggun kanye talima erebuka, kwalina pia meme. Aning kum bukni, ‘Nun ni Allah luba kibibyak’ tenen, moubuka kalikdamunce, namin asa arye unamlulume. Kumopura, anggun talima pum tam erepdamunce, ‘Nunda pia teleb ninye,’ tenepmunyopura, anggun ni Allah luba kipnamlume. Ara, Mesir mutuku ulamlum talak ara, ikin pil weik, anggun nong deice delilamsikba, talye piluk dobuka, kanye imun kanye bobuka ulamlum bukni, Allah arye lyepsuke. Ati, anggunce pia tenenamlume, ‘Nun ni Allah, el si Yahweh arye, lyebuka boyanamsuke,’ tenebuka, pia unamlume. El ti, luba kina pia meme.
Ura, Allah el kele. Ayo duk dakuka dipminyopura, anggun kanye tenen ning ap, anggun asing ap, dirina upliba, laipsilyopura, Allah elda, ‘Malye ning ani, teleb ning ani’ tenen, moubuka kel kibuka ulye touk, anggun babye upnamdume. Adeiyok ati, ‘Dina meme,’ nyapsuke,” kwatima arye, akil Hawa ati, nyabuk.
Amalaikat arye ayupu nyapnukba, Allah El Dib Kanye talipnuka deice arye, amalaikat arye dopropnukce, yukak bobenuk. Ara, mek ap, ninye ap pia kumak bobinukba, aning eipse. Eipse ning ara, nyapnune. Ara, pia malye kam ulul ning, el nong ara ining bi uamuk ning bukmokak, eipse. Amalye kam ulul ning el nong bol deice nirya ara, si sekamuk ning lak kibuk. Ninye arye asi nirya nyaptingba, Allah kekepturye, ‘Na like’ tenen, yu uptue. Ara, Allah el si yanina yupu ubuka ati nyapne. Asi nirya ara, Allah el yanina ati aning nong bol deice sekuka deiyamuk. Akam ning ara, el kisok tekbarye ubuk bukni, el kisok deice ara, sapi basam yang atonun ning sepuluh (10) ubuk. Malye Kam Ulul Ning balye tam ara, ninye nirya biklamikce, talye yolalamik kil bukmokak, eipse.
“Minop talak Babel mutuku ninye arye bona uto-uto talin ning ap, dekna weik ning ap, weik dololamikce arilalamikba, nukmanto kum ulamuk. Bona talin nang weik ulamikba, yuk mutuku ninye arye, ‘Se, sikda pia telebuk unyake,’ tenelamikce, amutuku ninye ati si erelamik. Ati, bona talin nang weik ulamik touk, wini talak ara, Allah arye kanye imun ning pia weika arye, sik nong deice deipliba, pia weika arye engebuka donamake. Babel mutuku unyak ninye sik talima pum tam ara, utenyake. ‘Kume, sik youwak kilapu arye, malye kanye bobuka engelamak touk, kum unyabe. Nunda weik ninye deiyok nang, Raja nang arye talye kanye bobuka pin-pin asauk ulamak touk pia unamabe,’ tenelamik. Winibuka tenelamik bukni, wini talak ara, Allah arye sikti, weik arye wenepnamle.
Minop talak, anggun yuk-yuk mutuku nang nirya arye, sik Tirus mutuku dekna deiyok kibuka taleamlum nang ati, ‘Se, sikda dipkoprob pia mambuleʼ tenen, sikti, si erelamik. Tonda, sik Tirus mutuku nang dekna deiyok talibuka dekenyak nang ara, yuk mutuku sirya im sirya nirya unyak nang arye anggunti, ‘Se, sikda Raja atonun nang unyake tenelamik. Tonda, anggunda pia mikip weik nang ulamluma ati, yuk mutuku noutam arye, Ninye deiyok nang unamak tenen, ninye wibuka erepdeiamlumba, Raja nang ton, deiyok nang ton kibuka ulamik. Winibuka pia teleb ulamlum bukni, wini talak ara, yatanye birye, ‘Tirus mutuku nang ara, wenebuka opnamne tenyamukce, aning akunum winipto do? Anggun moubuka tenidenamlulume!
Anggunce, ‘Aminyan talak yata winipnamsil do?’ tenen, pia kum tenilamluma ati ara, anggun Babel mutuku nang ara, na Allah arye ayupu nyapnusin ning ara, moubuka kekepnamnulume. Se, anggun Babel mutuku ululum nang ara, anggun kanye arye, “Nun kanye deipsilye ninguk teninamabe,’ tenebuka ululume. Anggunda, talye tunim abuka bukmunce anggun asik dobuka ulamlum mutuku ara, ‘Nunda pia mikip weik mutuku nang unyabe,’ tenebuka ulamlume. Tonda, ‘Kume sik yuk mutuku unyak nang nirya ara, nunti kum olyasitinge. Nunda pia telebuk unamabeʼ tenen, anggun talima erepdamunce, ulamlume. Aninguk kum bukni, anggunda, ‘Kume, nunda Allah atonun unyabe. Mikip pia weik unyak nang ton, kum unyaka anya arye, nun uk ara mambul weik nang pia unamnyabe. Anggunce kanye arye, ‘Kume, nunda, yukwak kilapu, sikce deiamik mapu nirya dibikiba, pia utotoa kum kilapu ulamak touk, nunda aning pia kum upnamsile. Nunda pia telebuk unamapca!’ tenelamlume.
Sik Sodom mutuku noutam ulamik nang nirya arye, malye winilamika deiyok ara ani. Ara, diltaknauk ulamik. Tonda, sik din ning yala-yala nirya ara, pia weik tonun, kintinip deiamik ning arye dilamikce, maknya kipdanuka ulamikce, namin arye, talye tunim abuka, kanye deibuka, teleb aryuk, pia dukdongobuka, neika ulamik. Bukni, sik aning-aning nirya, kum uamuk nang, sik pia talye kankan nang ap, aning-aning kum uamukba, pia patanauk ulamuk nang ati, ‘Sik anang ara, dauplye’ tenebuka, bataklamikce, pia kum melilamik.
Aning winiplyeura, sik Raja-Raja nang arye ninye dipmakceba, deipmakirye, malye kanye bobuka nyalamak mot, anggun Tirus mutuku nang ati nyapnamsiake. ‘Se, Sikda, weik laut mekwen deice balamlum nang arye, laut lilun, weik teleb asik domlumak, yuk mutuku nang nirya arye, bikamikce, se, sikda weik mambul mutuku nang. Amutuku ara, pia telebe,’ tenelamsik bukni, anggun ulamlum mutuku ap, dolalum asik ap, weilamlum ning nirya ap ara, akunum kum kipmale. Anggun weik laut mekwen deice arye, mek bukna yo, el si weik kapal laut domlum ning nirya wekuka, laut mekwen pum tam balamlumak, yuk mutuku nang arye anggunti, ilil ulamuk. Ara, anggunce laut mekwen deice balamluma deice arye, sik yuk mutuku-mutuku daulamik nang nirya ara, anggun Tirus tam nang ati, ilil weik ulamuk.
Minop talak, Niniwe mutuku noutam ara, ninye weik bulubikce, weik asik dobuka ulamikce, maknya kintinipdanuka ulamik. Sikce nyalalamik, “Kume, nunda, pia teleb aryuk unyabe. Nunda, pia dakeiam asa unyabe. Yuk mutuku nang nirya ara, kum olyanganamsiaka ati, nunda amutuku nun yuk unyabe. Nunda pia weik asik dobupa atonun, yuk mutuku nang nirya ara, nun teleb weik asik atonun ton, kum doptinge,” nyabuka nyalalamik. Winibuka nyalalamik bukni, amutuku pia teleb asik weik awamuk ning ara, wini talak ara, dan sukum ton ulul do? Niniwe mutuku weik asik domika ara, wini talak akunum kum dayuke. Talya bai tam kam ulamle ning, yala-yala nirya, ilil tenena kumce, talye mangkau arye, amutuku bulubuka wekelbikirye, dikdik senyake. Yata nang do nirya, amutuku bisik banamak nang ara, asik oldem ubuka ati, amutuku eibikirye, ‘Se, amutuku ulamik nang, yata deiyok ati, Allah arye, obuka sirya dakuk do?’ tenen, ilil upnamle. Allah arye, ayupu nirya nyabuk.
Allah Yahweh arye, Hamat mutuku babye, talilule. Ara, Hadrak mutuku ap, wilibuka dana-dana bokolanak unyak ninye nirya babye, Allah arye, talilul ninye unyake. Aning atonun, amutuku nang arye, weik kel kina deiyok ning nirya, kel bikamik nang unyak mutuku, Tirus mutuku ap, Sidon mutuku ap nirya ara, Allah arye talilule.
“Allah el si Yahweh, aning-aning talibuka, deice tam erebuka, Pia Mikip Weik Deiyoknye birye, ayupu ton nyapkile. Ara, ninye deiyoknye Raja Mesir biti, ayupu binuka nyapnulyame,” nyapdeipmanile. An Firaun bira, an kanye talima noutam ara, utenelyame. ‘Kume, na mikip pia weiknye, ununa anya arye, weik laut mekwen pum tam ulamle mikip weik ning, Nil mek pum tam malamle yu weik buaya atonun, unune. Nara, aninguk tenebuka nyanune. ‘Kume, weik balamle mek, el si Nil mek ara, naryuk kwepdeipse. Na kanye delina ati, Nil mek kwepdeipse. Nil mek deiyoknye bira natia,’ nyabuka ance nyabuka, an talima erelalyame.
Aning winipnyeba, sik amutuku nang arye, anggun ning nirya, akunum kum kipdeipsicopura, anggun Mesir mutuku noutam nirya ara, ninye yupu ton, kum kekepnamake. Pia tunim anauk upnamle. Winipliba, Mesir mutuku nang arye, na Allah Yahweh ati, ‘Se, Allah Yahweh elda, aning-aning talibuka, deice tam erebuka, Pia Mikip Weik Deiyoknye ululeʼ tenen, nati biknamake. Aning ara, talye ati kume. Deiyok ara, an Mesir mutuku ninye deiyoknye Firaun ap, an amu tam ulamik nang ap arye, ‘Kume weik balamle mek, el si Nil mek ara, naryuk kwepdeipse. Amek ara, na ninguk ulule. Naryuk amek talenune,’ nyabuka, kwalipluma ati, weik tonun wenebuka, oplopnamsine.
Winibikcopura, Mesir mutuku taleamlye Raja, el mal olan dam yin talen nang arye, Siria tam nang weik akunum opmaliba, dipnamak ning ati, el kanye ereplirye, ‘Nara pia mikip weiknye ununa ati, na yin talen nang arye, ninye weik akunum opmakce, sirya dakmakeʼ tenen, maknya kintinibukaplirye, unamle. ARajanye, el yin talen nang arye, ninye pia weik obikiba dipnamak bukni, aminyan talak ara, aning atonun tuba kum wininamake. Ati ara, aRaja elce, ninye deiyoknye kibuka, unamle talak ara, lo mitik tonunuk talinamle. Keting tamun weik tonun, ton kum mapnamle.
Bukni, aning-aning min kum kipdeipnamle talak ara, Siria tam mutuku talipnamle Raja birye, el kanye aryuk tenipnamle touk, aninguk wipnin banamle. Tonda, el talima eren deice arye, maknya kintiniplirye, nyanamle. “Kume nara, pia deice tam ulinye unune. Ninye arye si erenyak ning, dewa-dewa ap, ninye arye, ‘Nun ni koproba ani’ tenen, si erenyak talye ning nirya ap, tonda aning-aning nirya, deice tam erebuka ululnye, Allah Yahweh ara, na amu tamuk ulule. Ninye arye, si erenyak ning nirya ara, mambul kume. Na uk ara, mambul weiknye unune. Na tonok ara, weik deiyoknye unune,” nyapnamle. Utenepdalirye, el siuk weik tonun erenamle. Tonda, elce Allah Yahweh ati, pia malye-malye yupu weik tonun nyanamle. Ura, amutuku deiyoknye, Raja Siria bira, elce aning winipnamla ara, Allah arye, ‘Anye winipnamle,’ akunum tenyamuk touk ati, aning winipnin balamlya ani, Allah arye, ‘Atalak akunum,’ tenyamuk touk, akunum uplyopura, Raja malye weik ulamuka ati ara, Allah arye anye el deice, ikin weik ning deipnamle. Adeice arye, Allah el yu tenyamuk ning ara, sirya daknamle. Allah arye, akunum tenyamuk ning nirya ara, dipkoprob nong upnamle!
Bukni, aning-aning min kume, kum danamle talak ara, Raja, el si ereipnamlanye bira, Siria mutuku ninye deiyoknye, el apu yapu nang ap, el li yapu ap arye, si erelamik ning nirya babye, ‘Sikda mambule,’ tenena kumce, aning babye, sik si kum erenamle. Aning nirya ara, yaninauk unamle. Atonun, kilapu arye si erenamak isa babye, ‘Elda mambul pia kume,’ tenena deice arye, atalye isa el si babye, kum erenamle. Raja birye aning-aning nirya ara, si ton kum erenamle. El dem atibuk, ‘Nara weik mambulnye, Allah unune,’ tenepdalirye, maknya kintininamle. Ati, el siuk erelanamle.
Piblisite