Yehezkiel 27:13 - Eipomek

¹³ Aning atouk, anggunce Yunani mutuku nang ap, Tubal mutuku nang ap, Mesek mutuku nang ap nirya ara, anggun Tirus mutuku nang dam yangalamikce, dekelana uk ulamlume. Ara, sik amutuku noutam ulamik nang arye, sik bona yuk-yuk ning nirya boyanarye, dekman ning nirya ap, sik talye pil don nang ap, dobuka yanarye, menenga arepne ning nirya arelamikba, anggun Tirus mutuku nang delilamlum bona yala-yala nirya deklamikba, anggun Tirus mutuku nang arye, deken ning yo bok weik dololamlume. Tonda, urasin pia teleb kat ning, el si perunggu boyanaba, anggunce dekuka dololamlume.

Yehezkiel 27:13 Referans Kwoze

Kejadian 10:2

Yapet elce deiamuk mapu si ara, ani. Gomer ap, Magog ap, Madai ap, Yawan ap, Tubal ap, Mesek ap, Tiras ap ulamik.

Yesaya 66:19

Na Allah arye abulubuka deipnamne nang ara, unamak noutam ara, ‘Na mikip kel biknamakʼ tenen ati, ton lak kilin ning kintinibuka deipnamsine. Winipniba, anggun anang kan-kan arye, ton nang kum oplopniba, tuba kam unamak nang ara, wibuka deipnyopura, sik anang nirya arye, na yupu ap, na unye ning ap ati, bobikirye, aning nirya min kum kekelamik nang dam binuka, lak nyalbinamake. Dopdeipniba, lak nyalbikcopura, na pia teleb unye ning ap, mikip weik arye pil dolamse ning ap, na weik eren unun ning ap nirya ara, sikce eibikirye, kekebuka kel biknamake. Ara, narye dopdeipnamne nang arye, sik dana-dana tam unyak nang dam binuka, na pia teleb unye ning nirya lak nyalbinamake. Sik nyalbinamakak ara, ani. Ara, Tarsis mutuku ap, Pul mutuku ap, Lud mutuku ap, Mesek mutuku ap, Rosh mutuku ap, Tubal mutuku ap, Yawan mutuku ap, Spanyol mutuku ap, Yunani mutuku ap, binuka lak nyalbinamake. Amutuku-amutuku nirya unyak nang dam lak nyabikiba, na pia teleb unye ning ap, na mikip weik unilye ning ap ara, kekebikirye, moubuka kel biknamake.

Wahyu 18:13

Tonda, to len ning, el si kulit kayu manis ap, nintong teleb ning aning-aning nirya ap, sik si ara, mur ap, kemenyan ap, anggur mek ap, Ara yo duk teikuka dololamik minyak ap, roti dana deiyok ning terigu pia teleb ning ap, tonda ninye arye weilamak ning sapi basam ap, domba ap, kuda ap, tuku deice balamle ning yala nirya ap, ninye arye ‘Sik yo bok deice dekikirye, ikin pil arukikiba, talye pil donamak’ tenen, ninye nong tapu koubuka bobalamik ninye ap, aning-aning nirya, sik Babel mutuku unyak kili sal ila tonap kum dekenamak ati, abona dekelbalamik deiyok nang arye, ‘Se,’ tenen, engenamake.

Yehezkiel 39:1

Allah arye, na Yeheskiel biti nyapnuk. “Anda ninye sirika arye deipkiknye, Mesek mutuku ap, Tubal mutuku ati, ninye deiyok kibuka, taleamuknye, el si Gog biti, ‘Kanye imun ning an dam upnamkile,’ binuka laka nyapnulyame. Tonda, Allah, el si Yahweh, aning-aning nirya talibuka, deice tam erebuka, Pia Mikip Weik Ululnye birye, nyapkile. ‘Na Allah Yahweh, an onanye akunum winipkine. Anda, Mesek mutuku ap, Tubal mutuku ap ati, ninye deiyok kibuka, taleamlumnye bira, narye anti wenebuka opnamkine!

1 Tawarikh 1:5

Yafet birye, mapu ton deiamuk. Anang sik si ara, ani. Gomer ap, Magog ap, Madai ap, Yawan ap, Tubal ap, Mesek ap, tonda Tiras ap, sik winibuka nang deiamukak ulamik. Sik anang nirya ara, sik ni koproba si ara, Yafet ulamuk. Ati Yafet birye, anang nirya deiamukba, ulamik.

Yoel 3:3

Tonda, sik malye winin nang aryuk, na mapu koproba, ‘Naʼ tenen, ninye Israel nang malye kibikce, tapu koubuka, sik wenen aik binuka deiamikce, win ning, el si ara undi, pil dopna arye, ‘Awena aik unyak nang kan-kan ara, yatanye dopropnamal do?’ tenen, winilelamikce, aninye dobuka, weik ikin pil aruklamikba, talye piluk dolamik. Winilamikce, wel nang doprobikce, ‘Talye-talye yolan kilapu dopropnun’ tenen, akilapu dekna ati, akilapu sik deiyok nang ati, dekna ning arelamik. Aning atonun, Israel yala wel kilapu doprobikce, yuk nang ati arebikba, yo bok dobukapna arye, sikce ayo bok deice arye, yu mek dekuka dilamik. Winibuka pia malye weik winilamika ati, amutuku-amutuku ninye weik arye wenepnamne. Allah arye nyabuk.

Yehezkiel 32:26

Mesek mutuku ap, Tubal mutuku ap, sik yin talin nang ap, sik amutuku bitinye ulamik nang babye, min arye dipneura, weilamikba, asukumuk yayikce, aunyake. Asukumuk manyaka, dana-dana tam dukdongobuka, diamikak weiamik nang ton, asukumuk unyake. Sik anang nirya ara, mal olanmeka ani, obikak diamik. Sik diamik nang ara, tuku palibuka wiamik bukni, sikda Allah diba kum tenelamikce, pia malye-malye weik winilamik nang ati, Sheol mutuku pia amu noutam binuka deiamik. Sik anang kam tuba ulamik talak ara, amutuku-amutuku noutam ulamikce, yuk ulamik nang ati, yu ubuka, malye weik winilamika ati, sik dana-dana tam ulamik nang nirya ara, sik anang ati, ilil pia weik ulamukba, sik nong sirim talilamuk.

Daniel 11:2

Narye anti nyapnukin yupu ara, dipkoprob nong upnamle ninguk nyapnukine. Ara, ani. Yuk-yuk arye yanuka, deiyok kibuka, Persia mutuku talinamak bukni, winilye Raja ap arye, Persia mutuku talibikirye, Raja kibuka unamake. Sik yuk-yuk bukni, winilye nang arye, Persia mutuku talibuka daulamikca ani, aminyan ara, Raja dumunye ton tiklirye, anang punuplyopura, Persia mutuku uk talipnamle. Min yuma talak, Persia mutuku talinamaka deiyok nang, sik winilye Raja nang ara, mitik bona talin nang unamak bukni, el adumunye Raja bira, bona weik talinanye unamle. Anye el talinamle ning, pia weik uplya deice arye, aminyan talak ara, mikip ton ap upliba, elce, ‘Winipnamabe,’ nyapnamle yupu deice arye, deiyok kiplyeba, yuk mutuku nang, dana-dana tam unyak nang weik tonun, el yupu kekebikirye, sik ap, el ap, Yunani mutuku talipnamle Raja ati, obuka sirya daknamake.

Daniel 10:20

Nyapsiba, elce tamubuka nyapnuk, “Nara, yata deiyok ati, an dam yanman do? An tenepmalamce, bikmalam do? Na yanmana deiyok ara, Allah el dipkoprob, buku noutam sekdeibuk ning ara, ‘Nong noutam ning biknalamʼ tenen, an dam laka nyalyanmakine. Bukni, wini talak nara tamubuka binirnye, Persia mutuku ap, amutuku unyak nang ap, talilul isa ara, narye obuka, sirya daknune. Aisa obuka sirya daknyopura, Yunani mutuku ap, Yunani nang ap, talilul isa ton yanamlarya. Atalak ara, yuk nang arye nati, ton kum melipnamniake. Bukni, malaikat Mikhael, an mutuku nang, Israel nang melilulnye, el tonok aryuk nati melinamnile,” nyabuka, amalaikat arye, na Daniel biti laka nyapnuke.

Daniel 8:21

Tonda, yim kambing basam, el nong bol deice potong weik uamukba, eipmalam ning ara, winipmanto ning ati eipmalame. Aning el nong ara, Yunani mutuku talibuka, ninye deiyoknye unamlanye biti eipmalame. Akambing, el asing dana-dana noutam arye, tonok taice ning pia belebuka tikmauba, eipmalam ning deiyok ara, ani. Ara, minop ninye deiyok kibuka, Raja kipmalirye, Yunani mutuku talipnamlanye bitia.

Yehezkiel 27:19

Tonda, Uzal mutuku arye, anggur mek ton dekelyangalamik. Anggun ti dekelyangalamika deice arye, anggun mutuku kintinip deiamlum bona yala-yala nirya, dekelyangalamsike. Ara, kat ning, el si besi tempa ap, kwei ap, yuk din ning ap, dekelamikba, anggunda yo bok pia weik dololamlume.

1 Tawarikh 1:7

Tonda, Yafet elce deiamuknye Yawan ulamuk. Yawan birye deibuk nang, sik si ara, ani. Elisa ap, Tarsis ap deibuknye bira, (el si ton Spanyol nyalamik). Tonda, Kitim ap, Dodanim ap, deiamukak daulamik.

Kejadian 10:4

Yafet el mi Yapan birye deiamuk mapu ara, Elisa ap, Tarsis ap, Kitim ap, Dodanim ap deiamukba, amapu nirya sik babye, mapu weik delilamikce, ninye weik ulamik.

Mazmur 120:5

Se, nara, bico tenena kumce, pia yu upliba, yuk nang ati, oltakanauk wininyak ninye noutamak ununa anya arye, na malye kanye bonune. Ara, sik yu weik ninye, Mesek mutuku nang ap, Kedar mutuku nang ap atonun, ubuka wininyak ninye noutamak neika ununa ati, na malye kanye bobuka unune.

Yehezkiel 27:12

Aning winilamik talak ara, sik Tarsus mutuku ulamik nang arye, anggun dam yanuka, anggun deiamlum bona yuk-yuk ning nirya ara, dekelalamlume. Ara, Spanyol mutuku weik tonun uamukba, anggunce yamubuka boyangalamlume. Ara, sikce menenga weik arelamsikce, anggun bona weik dololamik ning ara, perak ap, kat ning besi ap, timah kurun ning ap, timah mirin ning ap, dololamik. Sik amutuku-amutuku nang arye, anggun Tirus mutuku dengna weik ning yala-yala nirya, dekuka, sik mutuku tamubuka bobalamik.

Yoel 3:6

Tonda, Yehuda mutuku ulamik ninye ap, Yerusalem mutuku ulamik ninye ap ara, malye kiplumce, sik mutuku koproba batakuka, pia pera weik mutuku bobinamlume. Na tenen ninye akunum bobuka bilum ning ara, sik Yunani ninye un dam bobuka, yo bok binuka dekamlume.