Se, anda ninye arye deipkiknye ulyame. Anda akunum kintinipmalam do? Kum do? Ara, Yerusalem mutuku noutam ara, ninye pia weika arye olamika ati, ining weik ubuk mutuku ulule. Ninye on nang amutuku unyakak ati, sik wenena ati, yupu bokolina ati, yupu nyana ara, akunum kintinipmalamce, nyapnulam do? Ance kintinipmaminyopura, sik Yerusalem mutuku noutam malye wininyak ning ara, laka kibuka nyapminyopura, adeice arye sik malye ulamik ning nirya, tuba tonap tamubuka biknamake.
Yehezkiel 24:6 - Eipomek6 Aning nirya winipnamlama deiyok ara, ani. Na Allah Yahweh, aning-aning nirya deice tam erebuka, mikip weik ununye birye nyapsine. ‘Anggun Yerusalem mutuku ululum nang kan-kan arye, ninye weika tonun, akunum omluma ati, anggunda bicoe. Se, anggun kanye mouplulume,’ nyapsine. Sikda ninye on nanguk unyake. Bita merekuka, ikin upmal nyapmasile! Amutuku asik dobuka ululum nang ara, tuku arye tilibuka memenyak mek makau, sisilya ulamle atonun upsuka ati, asisilya ara, kum kiploptinge. Domba basam kalipdoba tup, amek makau pum tam dongopmamunye ning ara, tup kalipdoba tonok-tonok lukuka dongonmamunya ani, sirya oplyeura, dopropnululume. Amakau pum tam ton, kum bataknamlume. Bukni, ‘Atuba upmalye tup ara, yatanye birye dopropnul do?’ tenena ati, ninye si sekuka undi ning kum dopnamlume. Talya luparabuka lukmunyak arye, bokuka arepnalume. Gade chapit la |
Yehezkiel 24:6
33 Referans Kwoze
Se, sik Niniwe mutuku noutam unyak nang nirya arye, talye minin yupu nyana ap, ninye weik tonun ona ap, yuk mutuku nang ning ubula alubuka dopromlumce, bona yuk-yuk ning nirya delilulum nang ara, na Allah Yahweh arye opnamsine. Anggunce, bona pia weik alubuka dopromlumce, delilamlum ning yala nirya ara, nukmanto kum ulule.
Bukni, sik Tebe mutuku noutam ulamik nang nirya ara, sik mal olan nang arye, obuka sirya dakikce, anang dobuka, tapu koupdongobikce, sik pera mutuku noutam bobinuka, wenen aik dongamikce, ikin pil aruklamik. Dabinuka bobinuka deiamikba, ikin arye daulamik buk, sik mapu nirya babye, dobuka tuku deice pouklobikba, kalibuka mitik-mitik kibukce, nirya diamike. Tonda, sik mal olan nang arye, ‘Yatanye ton dopropniba, na talye pil melinanye unamle do?’ tenen, mitik keil deice, ninye si sekikce, tukwak dopkwetebikba, tukwak poubukopura, Tebe mutuku weik deiyok-deiyok nang nirya ara, doprobikce, kat tapu el si ara, rantai arye tapu koulamik. Tonda koupnopura, yuk nang dam bokukapnarye, dopdeipniba, yuk nang sik talye pil don nang ulamik.
Aning ara, talye kum nyapne. Ayupu nong ara, ani. Minop talak ulamik ninye nirya ara, Allah arye nyapdeiamuk ninguk, diba tenelamikce, talibuka diksukumuk ulamik bukni, wini talak ara, aninye atonun, tonoknye babye kum ululume. Diksukum unyak ninye ara, akunum kum dayike. Ati, wini talak ara, diksukum winin ninye nirya ara, pia kum anya arye, el kwit birye el kwit biti, ‘Yata winiptinya deice arye optinye do?’ tenen, wena tapu webuka kaliklamak touk, winililanyake. Adeice arye amutuku noutam ara, malye winin ning akunum panaple.
Minop talak ara, weik asik, Yerusalem mutuku wekelban bisik bublan dam ara, yuk karin mutuku yu nang arye dakuka uluplobikce, abisik wekuka, Yerusalem mutuku ulamik nang obik talak ara, anggun Edom mutuku nang ara, karenak aryuk tikuka, asing aryuk dililamlume. Tonda, Yerusalem mutuku nang, sik dekna weik bona, ‘Naʼ tenen, deiamik ning nirya ara, sik yu nang arye alubuka dorobikce, abona bokona ati pil donmek talak ara, anggun Edom nang ara, asing aryuk eibuka batakalulume. Ati, na Allah arye anggunti tenepsisa ara, ‘Anggun babye, ayu nang pia malye nang atonunuk ululume tenepsise. Ara, anggun Edom tam ululum nang, anggunce anggun apu koproba, Yakub birye deiamuk nang ati, kum meliamlume.
Aninguk kum bukni, sik Israel nang unyak mutuku noutam, ninye deiyok kibuka, taleamikce ulamik touk, tuba unyak deiyok nang babye, pia malye weik wininyake. Winipmanto, bai tam ulamle yu kam arye, ulamle ning obuka, si tobuka dilamle touk, unyake. Ara, sikce ‘Se, nunda yo bok pia weik ton doproptibnye’ tenen, malye winina ap, tilila yupu nyana ap, ninye ona ap, ikin ning dobuka, yuk nang nong deice delina ap, wininyaka deice arye, ubula dolokirye, bona talin nang unyake.
Tonda, Raja Manasye birye, weik malye uamuk ning ara, sik malye kum ulamikce, talye kanye bobuka ulamik ninye, Yerusalem mutuku noutam daulamik ninye, weik tonun obuka, batakamuk ning, deken ati ara, Allah arye, lo arebukba, sik pera mutuku yu nang arye yanuka, Yehuda tam ulamik ninye yakuka, dokwetebik. Allah Yahweh arye, Raja Manasye birye, Raja kiamuk talak noutam arye, malye ulamukopura, ‘Luba kipnirye, kum lyepnamne,’ tenebuka ati, Yehuda tam ulamik ninye nirya ara, adiparyuk batakuk.
Babel mutuku tam ulamik ninye arye, sik mutuku noutamak, Allah el yupu laka nyana deiyok nang, nabi nang ap, Allah el mapu ap, yuk ninye weik tonap, oltakalamikba, aninye sik ining balamukba, Babel mutuku noutamak lakak ulamuk. Ati, Allah arye Babel mutuku ulamik ninye nirya oplopmalaba, amutuku ap, aninye ap, kum danmale.” Amalaikat arye nyabukba, na Yohanes arye kekepse.
Akil dipdesirye, kel bikse. Akil ara, diba tenen nang pia weik olamukba sik ining balamuka kwebuka dilamukba adeice arye, kanye deibukce, el kanye wangamuk. Ara, ninye arye kanye wangan mek weika arye dinyakba, sik kanye wangabikirye, teleb kanye bona kumce, malye winin ning talye luparabuka winilamak touk, akil ton winipmokba, eipse. Akil arye ninye olamuka ara, talye nang kum bukni, akil arye nyamukba, yu nang arye, Allah wiamukba, elti, diba tenelamikce, Yesus el yupu dobuka peterelamik ninye ati olamik. Yesus el yupu kekelamik ninye pia weik olamika ati, akil ara kanye deibuka ulamuka deice arye, el kanye wangamuk. Winibukba, epsirye, na kanye pia lukdase.
Wininamluma ati, yata nang do nirya, sik diksukum ulamik bukni, oltakalamik nang nirya ara, Habel anyapce opnin yangalamika ani, wini talak Berakia el mi Zakaria, anggun apu yapu arye, Allah arena ati delilamika dam obiknye ap, anang nirya sik ining ara, anggun wini talak ululum nang, anggun taruk deice upnamsile.
Nyabukura, amek liya yo talina deiyoknye ap, Yunus ap, im alip aik akunum weleprikopura, mek lia yo talibuka pil don nang arye, sik mining nanguk nyapdayik. “Weik teleb ning ara, lak bikilin ning, tonda win ning, el si undi, aning deice arye winipdeibibibuk, ‘Yatanye deice bol piplyopura, nun imun upmasil ning ara, anye akunuma. Anye birye, malye upmalba, winimasila ati, deiyok ara elce,’ tenebibirye, kel biknuyabe,” nyapdayik. Nyabikce, undi winipderikbuk, bikilin ning ara, Yunus binyak lak kibuke.
Tonda, sik malye winin nang aryuk, na mapu koproba, ‘Naʼ tenen, ninye Israel nang malye kibikce, tapu koubuka, sik wenen aik binuka deiamikce, win ning, el si ara undi, pil dopna arye, ‘Awena aik unyak nang kan-kan ara, yatanye dopropnamal do?’ tenen, winilelamikce, aninye dobuka, weik ikin pil aruklamikba, talye piluk dolamik. Winilamikce, wel nang doprobikce, ‘Talye-talye yolan kilapu dopropnun’ tenen, akilapu dekna ati, akilapu sik deiyok nang ati, dekna ning arelamik. Aning atonun, Israel yala wel kilapu doprobikce, yuk nang ati arebikba, yo bok dobukapna arye, sikce ayo bok deice arye, yu mek dekuka dilamik. Winibuka pia malye weik winilamika ati, amutuku-amutuku ninye weik arye wenepnamne. Allah arye nyabuk.
Ati ara, na Allah Yahweh, aning-aning nirya deice tam erebuka, Pia Mikip Weik Deiyoknye ununye birye, nyapsine. ‘Anggun Yerusalem mutuku ululum nang kan-kan arye, ninye weik tonun akunum omluma ati, anggunda bicoe. Se, kanye mouplulume,’ nyapsine. Anggunda, ninye on asik nang ululum mutuku nang ati ara, bita merekuka, ikin upnamsile! Winipmanto ara, narye, anggun wenen ning ati, uku dana ara, yo weik tonun ton ap, kintinip deipnirye, ayo deice deibuka, uku dongopnamsine.
Aninguk kum bukni, yuk nang, anggun Yerusalem mutuku ululum nang kan-kan arye, “Ninye opdeipsululume,’’ nyabuka, dekenyak uang arebikceba doprobikirye, ninye ton onyake. Tonda, yuk nang arye, yo bok patan nang ati, “Anggun yo bok tia arepnusiap, bukni, min yuma ara, winibuka yo bok ton tabakuka arepnamnilyame,” nyabuka arinyake. Winyamikca ani, anye el uang kum upmalye buk, tamubuka min kum areptu talak ara, ila tamubuka, anggunce “Ati, wini talak aryuk, yo bok ton ap, weika tabakuka areplulume,” nyabuka, mikip arye moronyake. Tonda, anggun yala nang atibuk, “Uang ton arepsilyame. Kum arepsiminyopura, ikin ning weik, anggun nong deice arenamsine,” nyabuka, mikip arye moronyake. Winiluluma deice arye, anggun nirya arye, na Allah ati, akunum lubakinululume. Nara Allah Yahweh, aning-aning nirya deice tam erebuka, Pia Mikip Weik Deiyoknye ununye birye akunum nyapsine.
Ati ara, anyasik Yerusalem mutuku noutam ara, anggun talye kanye bobuka, kum unamlume. Anggunce, ‘Kume, anyasik noutam ara, weik besi makau pum tam atonun ululuma ati, nunda ninye arye, ‘Naʼ tenen, delinyak tup ning, besi makau pum tam ulamle touk, unmaba ati, ikin nun dam kum yasetue,’ tenelulume. Bukni, na Allah arye, dipkoprob nyapnusine. Anggunda, amutuku noutam ara, pia teleb dakeiam asa arye kibuka, kum unamlume. Besi mek makau pum tam, tup moubuka deibikiba ulamle touk, pia kum unamlume. Narye, anggun wenena ati, pia dobolyasinirye, adiparyuk yupu bokdeipsinirye, opnamsine.
Winipmanto ara, kat ning emas do, perak do, dekna pia weik ning deice, malye ning ton palyamlya ati, narye, ‘Weik uku deipniba, apalyamlye ning, uku arye dipnamle’ tenen, asilen ning arepnamne. Ara, ninye arye, kat ning ap, ton malye ning palyamlya ati, weik uku noutamak dongobikiba, malye ning nirya dipdopliba, pia kat ning ara, uku kum dilamle touk, sik Israel ninye aning atonun unyake. Ati narye, ‘Sik malye wininyak ning ara, bataknamak do?’ tenen, sik dam wenena ati ikin ning deiptinya babye, teleb kum wininamake. Deiyok ara, sik kanye noutam arye, teleb diksukum ning tonok ning babye, kum ulula anya arye, asilen ning weik arye, sik nong deice deiptinya babye, teleb kum winiptinge. Ati, talye atibuk, sik dam winilden ning tuba-tuba kum delinamne. Sikda pia dipkoprob kat kanye bobuka, weik malye ning wininyaka anya arye, sik malye wininyak ning ara, kum batakanyaka ati, nyapne.
Aning kum bukni, tonda yuk nang arye, malye un ning benelamikba, Yehuda yala ninye nirya ara, isa siuk erelamikce, sik ni Allah dam malye winilamnik. Atonun, tonda Raja Manasye birye, malye winin ning, pia kum ulamik nang ton, weik tonun olamukopura, weik mek balamle touk, Yerusalem mutuku noutam nirya ara, ninye ininguk pia weik tonun uamuk. Ati, sik dam arye wenebuka, kanye imun weik ning deipnamne. Allah arye nyabuk.
Tonda, ninye deiyoknye Raja Daud ap, el yin talin nang ap arye, Moab mutuku ulamik nang ton, obuka sirya dakuk. Obuka sirya dakukopura, elce, “Sikda tuku deiceuk mapnamalume,” nyabukura mabik. Nyabukura, tuku deice mabik talak ara, sik winilye nang amapmik kan-kan arye, ninye bitinye-bitinye nang wibuka, opnin banmokba dibinmek. Ati ara, sik awinilye nang kan-kan arye, bokuka bitinye nang obik bukni, tonoknye bira, batakikba kam tuba unmok. Winipnin banmoka ani, ninye weik tam ara, obuk bukni, ninye mitik tam ara, kam tuba unmek. Ninye tonok-tonok wibuka batakaldongonmok, abatakdongopmok nang anyuk, kam tuba ulamik. Ati, sik Moab nang ara, ninye deiyoknye Raja Daud, el amu tam tamubuka ulamikce, el dekna ati ara, elti, yo bok weik tonun arelyangalamik.
“Dipkoprop aning ara, winipnamsiyake,” nyabuka, Allah Yahweh, elce akunum nyapdeiamuka anya arye, aning atonun winibik. Ara, Yehuda tam ulamik ninye, sik malye una ati, Allah Yahweh arye, “Narye wenena ati, lo arepniba, pera mutuku yu nang arye yanuka, Yehuda tam unamak ninye nirya ara, sikti, areamse mutuku noutam arye, yakuka donoknamake. Winipnamaka deiyok ara, Raja Manasye birye, ninye deiyok kibuka, taleamuk talak arye, malye-malye ning pia weik ulamuka ati, Yehuda tam unamak ninye ati, yakuka dokwetepnamake,” nyapdeiamuk touk winibik.
Ara, sik abitinye nang arye nyarurake. “Kume, minopce nun mal olan nang arye, anyasik-anyasik nirya ulubuka, sice buklobik bukni, nun kanye ara, wini talak aryuk, anyasik-anyasik nirya ara, minpola tamubuka doptibye. Ara, Yerusalem mutuku weik asik, dana-dana aknapdongobuka, cang weik keil poka domik noutam unyaba ati, winipmanto ara, weik besi mek makau pum atonun unmabe. Ati, winipmanto ara, ninye arye, pia teleb tup dobuka, ‘Na tenen deipnamap’ tenen, besi makau yunmaka pum atonun, nunda amutuku noutam akunum aunmaba ati, nunda pia teleb unyabe. Asukum noutam ara, ikin ton, nun dam kum yasetue,” nyabuka, tilila yupu nyanyake.
Ance sik anang ati binuka nyapnulyame. “Ayupu ara, Allah Yahweh, aning-aning deice tam talibuka, mikip weiknye birye nyapsuke.” Anggun Yerusalem mutuku ululum nang, anggun kan-kan noutam unyak nang bukni, anggunce olulume. Winiluluma ati ara, narye oplopnamsine. Aning atonun ton, anggunce talye ning ati, ‘Nun ni,’ teneplumce, aisa ati, ninye urasin atonun memebuka delilulum ning, si ereluluma deice arye, anggun nonguk malye kilalulume. Aning ati, weik arye wenepnamsine.
Na kayapu Israel nang, Babel mutuku ululum bukni, sik batakamlumba, Israel mutuku noutam, tuba unyak nang ati, nyapsine. Sikce na yupu kum kekenyakce, nati lik uplyeba, batakaninyake. Ati, anda Yeheskiel, domon yupu tonok ton, na Allah arye, anti nyapkinyeba, ance sik Israel nang ati, nyalbinulam yupu ara, ani. Na Allah Yahweh, aning-aning nirya deice tam erebuka, Pia Mikip Weik Deiyoknye ununye birye, anggunti, winipmanto yupu deice arye, laka nyapnusine. Ara, din yun makau pum tam, mek kwebuka dikdongopmunce, amek makau ara, uku deice deipnamlume.
Tonda winipmanto, akintinip deiamunye asik dam binuka, unmalinye bira, el adiparyuk boban ning ara, kama atonun ning ton bobanamlule. Deiyok ara, lin do, dei do, yukak binuka dongoplyopura, ‘Yuk nang arye do? Allah arye do? ‘Amalye ning eibikcakʼ tenen, tuku paliplirye, dongoplya deice tam, tuku arye dobuka, sinipdongopnamla atia.
Ati ara, anggunce, ‘Se, malye winipmapa anya arye, mek keknamabe’ tenen, mek kekne ning sabun ap, yu ning ap, weik arye bobuka, mek kektuma babye, anggun malye ululum ning ara, anggun nong deice tuba palenamsile. Aning ara, kume kum kipdeipmanto upsile. Aning tuba upsilyeura, na bataknamsine. Pia dinamsine. Nara, Allah Yahweh Weik Erena Deiyoknye arye nyapsine.
Piblisite