Ara, talye ati kume. Nara, Ninye Mi Koprop Atonunye, na ni el urasin pia teleb ulirye, dirina weik ulya atonun, na babye atonun upyopura, Allah arye kwepdeibukba, el im deice pil don nang, malaikat ap, ansinibibyopura, tukwak yanamabe. Yanamap talak ara, tukwak ninye nirya wenebuka lipsisikuka bokeipnamne. Yata ninye do nirya, sik winilamikce ning atonun, narye moubuka dipdebuka nuknirye lipsisikuka bokeipnamne. Ara malye winin ninye ati wenebuka opnamne. Teleb winin ninye ati dekna ning arepnamne. Yesus arye awekmek nang ati nyabuk.
Yehezkiel 24:14 - Eipomek14 Na Allah Yahweh, aning-aning nirya deice tam erebuka, Pia Mikip Weik Deiyoknye ununye birye, akunum nyapsine. Ati, na nyapmasin touk, dipkoprob winipsinyeura, aning dipkoprob upnamlarya. Na tenyamse talak akunum kiplyeura, aning nirya winipnamnarya. Anggun malye umunye ning ara, narye kum lubakipnamsine. Tonda, anggun wenen noutam ara, ‘Se, daupmalye, aning ara, akunum bataknulume,’ pia kum nyapnamne. Tonok malye winilamlinye babye, kum bataktinye, anggun nirya wenepnamsine. Tonda kum lyepdopnamsine. Tonda, ‘Se, anggunti ara, bicoe,’ kum tenepnamsine. Anggun malye winilulum ning yala-yala nirya, awininamluma atonun, anggunti wenebuka opnamsine. Nara, Allah Yahweh, aning-aning nirya deice tam erebuka, Pia Mikip Weik Deiyoknye ununye birye, akunum nyapsina ati, aning nirya dipkoprob nong upnamle. Allah arye, na Yeheskiel biti, nyapnuke. Gade chapit la |
Yehezkiel 24:14
30 Referans Kwoze
Ati ara, na Allah Yahweh, aning nirya talibuka, deice tam Pia Mikip Weik Erena Deiyoknye uninye birye, ‘Winipnamne,’ tenepnye touk, wininuna anya arye, narye nyapsine. Se, anggun Israel yala ninye nirya ati, narye yupu bokdeipsinirye, wenepnamsine. Narye dipdesinirye, anggun malye winilamunye ning aupmasilye touk, wenepnamsine. Diksukumuk winilamunye ning aupmasilye touk, teleb kipdeipnamsine. Yatanye do, yata kil do nirya, anggun winilamunye touk, yupu bokeipnamsine. Anggunda, ‘Se nun malye wininyap ning deice arye wenepsilirye, opsilyak’ tenen, anggun malye winilulum ning nirya ara, batakmunce, aminyan tamubuka, yuk teleb bisikuk binamlulume. Winipmanto ning ara, keil yan dum duklirye, opsilyopura, kote saklamak atonun, anggun malye winilulum ning dekna ati, ‘Wenepsinirye, opsinyak’ tenen, nyapsine.
Bukni, sikce malye ninguk, talibuka winilamice nang ara, nyapnamlulume! “Anggunda bico, anggun wenena ati, ikin ning ton dopropnamlume. Anggunce yuk nang ati, ikin ning delilalum touk, anggun babye, ikin ning anggun dam yalyopura, dopropnamlume. Tonda, anggunce malye-malye pil dolamlum touk, anggun dam ara, ikin pia ning yanuka, anggun nong deice deipsilyeura, doropnamlume,” nyabuka wenepnamlyame.
Anang arye, nyanyaka ati ara, na Allah arye, sik anang nirya ati, eipnyopura, sikti bico pia kum tenepnamne. Kume, sik Israel nang nirya ara, yuk nang ati, pia malye-malye weik wininyak touk, narye sik anang ati, sik malye unyak ning ara, sik nong deice deipnamne. Winibuka pia wenebuka opnamne” Allah arye, na Yeheskiel biti, lengdar mapsa deice arye nyapnuke.
Dipkoprop anggun Israel yala nang nirya ati, narye, ‘Pia bico, anang ara, ikin ning sik nong deice kum deipnamne,’ kum tenepnamsine. Tonda, ‘Daupmalyeʼ tenen, anggunti pia kum bataknamsine. Ati, narye dipkoprob, anggun malye winilamunya atonun, tamulina ara, aning atonun wenebuka opnamasine. Tonda, narye, ‘Awinimunye ning ara, na pia lik ati, aning nirya ara, pia kum wininamlume,’ nyapdeiamsise ning bukni, anggunce talye kanye bobuka, malye winilamlum ning ati, wenebuka opnamasine. Winibuka wenepsinya deice arye, anggun kanye aryuk, ‘Se, Allah Yahweh ara, aning-aning nirya talibuka, el deice tam ulirye, dipkoprob Pia Mikip Weiknye ululeʼ tenen, bikinamlume.
Ati ara, diba nara, anggun ni koproba Allah Yahweh, aning-aning nirya talibuka, deice tam erebuka, pia mikip weiknye unirye, ayupu ara nyapsine. Na dipkoprob pia kam unye touk, anyapnusin ning ara, dipkoprob upnamle. Dipkoprop wenepnamsila deiyok ara, ani. Anggunce na si eren aik pum tam, Pia Teleb Lek Aik ati, pia malye updeipnamlume. Anggunce, pia malye weik ning, talibuka winilulum ning ap, talye ning ati, ‘Nun ni koprobaʼ tenen, isa si erebuka moromunye ning ap deice arye, na si eren aik, akunum malye kilinamlume. Winimunya ati ara, narye anggun nirya ati, pia bico tenena kumce, wenebuka oplopnamsine. Tonda, narye anggunti, ‘Se, anggunda ‘Naʼ tenen, nang umunya anya arye, bico tenepsinirye, anggunti teleb kibuka melilamsise touk, tuba kum wininamsine. Aning kum bukni, oplopsinirye, kum kipdeipnamsine.
Allah Yahweh ara, el yu ubukba, ‘Amalyeuk wininyak ninye ara, wenebuka opnamne’ tenen, kintinibuk ning ara, pia kum bataknamle. Kume, Allah arye, ‘Winipnamne,’ tenelamuk touk, aning nirya ara, akunum uplirye, sirya daklyeura, bataknamle bukni, aning nirya min kum winipmalye talak ara, dipkoprob kum bataknamle. Wini talak ara, moubuka kel kum biknamlum bukni, doyanamle talak, sirya talak ara, Allah el mapu nirya ara, ‘E, deiyok ani,’ tenen, pia moubuka kel biknamake.” Yeremia birye nyabuk.
Ati ara, na Allah arye tonoknye dopropnirye, tonye deice dobuka donoknyeba, pia malye kibuka opnamle. Tonda, sik wisi nang ap, mapu ap nirya ara, dopropnirye, sik deice donoknamne. Na Allah arye sikti, bico tenepnirye, kum bataknamne. Narye anggunti, bico kum tenepnamsine. Pia kum kipdeipnamsine. Ayupu ara, na Allah arye, akunum nyapdeipne.
Awinilul atonun, na Allah arye anggunti nyalisinye yupu ara, talye urdemuk tamubuka na dam kum yanamle. Aning kum bukni, narye, ‘Winipnamle, aning ara nong upnamlarya,’ tenebuka nyalisinye ning ara, dipkoprob atenenirye nyanun touk nong unamle. Tonda narye, ‘Ayupu dopkwetepniba, nong ara winipnamle,’ tenenye touk dipkoprob nong unamle.
Ara, talye ati kume. Deiyok ara, Allah elce, “Aning-aning nirya, wini talak winipnule,” nyabukba, adiparyuk, aning-aning nirya anyapmok touk, kikliman kibuk. Aning atonun, elce ayupu nyabuk talak aryuk, aning-aning nirya, lakak kibukce, pia darabuka winilule. El yupu nyabuka, deice aniryuk, aning ayala-ayala nirya, kwepdeibukba, lakak kibuk.
Ara, urdem ati kume. Israel ninye talibuka ululnye Allah ara, pia weik mambulnye ulule. Elda pia telebuk ululnye ati ara, Israel ninye nirya ara, el si erenyake. Tonda, ‘Winipnamne, winipnamne,’ tenelye ning nirya ara, teniltona babye pia kumnye. Elda, ninye arye tenelamak atonunye kume. Elda, tilila yupu, pia ton kum nyalule. Dipkoprop yupu uk nyalule. Tonda, ninye arye, ton ning tenebuka, aning batakuka, yuk ning tenelamak touk, pia kum winilule. El tenelye touk, aninguk winilule,” Samuel birye nyabuk.
Allah elda, nun ninye unyaba atonun kum ulula ati, tilila yupu tonok ning babye, kum nyalule. Tonda, ninye arye, el kum deibika ati, el minopce tenelye ning nirya ara, aning nirya adiparyuk wininulule. Aning batakuka, ila tuba ton, yuk ning kum tenelule. El teneplirye ‘Winipnamne,’ nyalul touk, aninguk tenebuka winilule. El nyalul yupu, pia kum batakalule. Nun ninye sirika ara, ‘Aning winipnamasine,’ nyabuka, nyalilamepye bukni, batakuka bibirye, yuk ning nyanyabe. Wininyaba atonun, Allah elda pia kum winilule.
Narye sik anang obuka, wenelamse ning deiyok ara ani. Sik babye malye pil dolamik ning ati, malye weik ulamik touk, ikin ning weik, sik nong deice delilamse. Ati, lo areamseba, yuk mutuku ninye arye, Israel ninye yanuka olyangalamik. Tonda, Israel ninye ati malye kilamikce, sik nirya tapu koubuka, sik mutuku koproba bobinamikba, sikda amutuku noutamak daulamikce, pera mutuku noutam yuk-yuk ulamik. Sik nirya yuk-yuk mutuku noutam bobinamikba, ninye asik nang atonun, binuka ulamik.
Sik deice arepkiniba, sik anang arye anti, pia yu uplya ati, adeice arye, an mikip arye pia pil domince, delilyam bona nirya ara, ubula dopropnamake. Adeice anda, talye yon kil nong banang kiplobikceba, ulamle touk unamlame. Winipminyeura, yuk nang nirya arye, eibuka bikinamkiake. Awinipnamkiak ning ara, ance ‘Dana-dana tam mutuku noutam arye, yuk mutuku nang ap maptibyeʼ tenen, pia patalamkukba, neika ulamluma ati, aning el menenga aren ningto, upnamkiake.
Sik yin talin nang yupa weik, an dam yanuka warikuka ona ati, unamake. Ara, (arah utara) tam arye, Kuda basam bukuka, bobanyak kereta perang ap, tonda yin talin nang, sik bona libuka deibikceba, bobuka tuku deice balamle ning deice, bukuka yanamake. Ninye olan talak, sik nong deice lelina ati, weik ning ap, mitik ning ap boyakirye, ninye on parang ap, kisok lelina kat ning ap, ongobuka mutuku dana-dana tam arye, an dam yanuka wareknamake. Narye sik anang ati biknyeura, sikce anti, ‘Aning-aning winiptinye,’ tenenyak ninguk, yanuka winipnamake.
Ati wini talak ara, narye anggun Israel tam ululum nang ati, yu unulul ning ara, dobuka, sik deice aryuk, dipkoprob deipnamne. Winipmanto ara, sik anang unyak ning nirya ati, na yu uku buk dilamle atonun unulul ning ara, sik deice deipnyeba diplyeura, sik nirya kum danamake. Sik malye-malye weik winilamik atonun kibuka, ikin ning weika arye, sik kisok deice deipnamnarya. Nara Allah Yahweh, aning nirya deice tam erebuka, Pia Mikip Weik Deiyoknye ununa ati, naryuk ayupu akunum nyapmasina ati, aning nirya ara, dipkoprob nong kunupnamle.
Bukni, wini talak ara, ayupu nyapsine. Narye anggun ikin ning deibuka wenepnamsin ning ara, deiyok talye ati kume. Ara, anggun min wel ulamlum talak arye, ‘Nun ni Allah arye, weik tonun melilamsuk,’ tenena kumce, pia malye weik ninguk talibuka, pia weik tonun winilamlum ning ara, na yu arye wenepnamsine. Anggunce moubuka tenina kum, pia malye un ninguk talibuka, winilamluma deice arye, wenelamsise. Anggunce malye weik winiluluma atonun, narye weik ikin ning, anggun deice deipnamsine. Nara Allah Yahweh, aning-aning talibuka, deice tam erebuka, Pia Mikip Weik Deiyoknye birye, nyapsine ati, aning ara, dipkoprob nong upnamle! Se, anggun ton tenipdelulume! Anggun pia malye un ninguk, talibuka winilamlum ning nirya ara, aupmal bukni, aninguk kume! Tonda, anggunce ton tabakuka talye yolana weik ulamlume! ‘Aning-aning nirya ara, narye pia lik’ tenen, lik weik unulule. Aning nirya ara, pia malye un ning ati, na pia like. Allah arye, sik Israel nang ati nyabuk.
Wininyaka ati ara, nara, na yu weik tuba unilya ati, sik nong deice, ikin weik ning deipnamne. Tonda, narye sik anang ati, ‘Se sikda bicoe, ‘Naʼ tenen, nang unyaka ati, sik malye wininyaka ara dauaplye’ tenen, talye kanye bobuka, namin kipnamane, kum nyapnamne. Tonda, narye sik anang ati, kum namin kipnamne. Sikti, weik tonun wenepnamne. Tonok nang babye, kum bataknamne, sik nirya ati, pia ikin weik ning, sik deice deipnirye, wenepnamne. Wenebuka opnyopura, sik Israel nang arye, yupu weik tonun, nati moronmaniyak talak ara, mikip arye yukubuka, engenamaka babye, dipkoprob na pia kum kekepnamne! Allah arye, na Yeheskiel biti, nyapnukba, kekepse.
Dipkoprop sik Israel yala nang nirya ati, narye, ‘Pia bico kum tenepnamne. Anang ara, pia ikin ning, sik nong deice kum deipnamneʼ tenen, kanye kum tenepnamsine. Tonda, kanye talima kum arepnamsina ati, ‘Sik daupmalyeʼ tenen, anggun malye winilulum ning ati, dipkoprob kum bataknamsine. Aning kum bukni, narye dipkoprob, anggun malye winilamlum ning, akunum eibuka kel bikamsisa ati, awinilamluma atonun, dekna dolona atonun wenebuka opnamasine. Tonda, narye, ‘Awinin ning ara, na pia lik ati, aning nirya ara, pia kum wininamlume,’ nyapdeiamsise ning bukni, anggunce talye kanye bobuka, malye winilamlum ning ati, wenebuka opnamsine. Winibuka wenepsinya deice arye, anggun damnye, ‘Se, Allah Yahweh ara, elcuk nun wenena ati, akanye imun ning, akunum arepmasileʼ tenen, bikinamnulume.
Nyanmokopura, Allah el si Yahweh arye, Musa biti nyabuk. “Na taruk ara, bumang upniliba, apil kum doptinye ati, ayupu nyapmalam do? Na mikip kumce, mitanguk unulul ati, ayupu nyapmalam do? Na mikip ara, kum sukmantonye ununa ati ara, anyapmakin ning ara, atonun upliba eipnamalame. Ati, anda, ‘Dib do, kum do?’ tenen, teniltona kume. Dipkoprop nyapmakina ati, adiparyuk eibuka, kel biknamlame,” Allah arye, Musa biti nyabuk.
Allah arye sik anang ati, tuba bico kum tenelula ati, elce mikip weik kumanya areplyopura, akumanya mikip weik arye doplirye, anang ara, tomobuka donoknamle. Sik anang arye, ‘Se, mikip weik kumanya arye opsilyakʼ tenen, sik anang ara, ‘Adibaryuk yukak bikbik abuka bindopnuyapʼ tenen, ilil weik upliba, yuk ning ton tenina kumce, sik lyelana ati, bikbik abuka, yuk pera sukum bindopnamake.
Diba, na Allah Yahweh, im deice yin talen malaikat nirya, sik deiyoknye unirye, mikip weik ununa ati, narye ayupu nyapmasina ara, dipkoprob nong kunupnamle! Ati, anggunda ilil ton kum unamsile. Deiyok ara ani. Ara, anggun apu yapu nang arye malye weik ulamikba, yu upnuka ati, narye anang ati, ‘Sik wenena ati, imun kanye bon ning arepnamsina deice arye, supnamsine,’ tenyamse touk, dipkoprob batakna kumce, narye aning dobuka, sikti, wenelamse. Bukni, wini talak ara, anggun atalak noutam amutuku ululum nang ati, yuk ning winipnamsine.
Se, anggun Israel nang, wini talak ara, anggunti kum kipdeipnamsin talak ara, akunum dam uple. Ati, na Allah yu weik upnilyopura, anggun deice deipnamsine! Ati, narye, ‘Awinimunye ning ara, na pia lik ati, aning nirya ara, pia kum wininamlume,’ nyapdeiamsise ning bukni, anggunce talye kanye bobuka, malye winilulum ning ap, anggunce malye-malye winin ninguk weik winilamlum touk, dekna ati, yupu bokeipsinirye, weik tonun wenepnamsine.
Wini talak ara, na yu weik unilya deice arye, anggunti kanye imun weik ning arepnusine! Dipkoprop, yu weik unilye ning nirya ara, anggun nong deice deipsinirye, wini talak wenepnusine! Winipsinyopura, anggunda ‘Se tenen, imun kanye bopnamlume. Ati, narye, ‘Awinin ning ara, na pia song ati, aning nirya ara, pia kum wininamlume,’ nyapdeiamsise ning bukni, anggunce talye kanye bobuka, malye winilamlum ning ati, wenepnamsine. Tonda, anggunce malye-malye winin ninguk, weik talibuka winilamlum touk, anggun tamulina ati, yupu bokeipsinirye, weik tonun wenepnamsine.
Ati ara, dan mutuku do nirya, amutuku-amutuku noutam upnamle yo yala-yala nirya arye, nati bikuka tenenamniyake. Ara, dipkoprob nati, sikce, ‘Se, Allah elda, dipkoprob Yahweh aulule,’ tenebikirye, nati moubuka biknamniake. Ati naryuk, weik cang arye pabuka tiknamle yo nirya ara, naryuk webuka, amu tam deipnamne. Tonda, yata yo do nirya, el bumang arye papnamle yo ara, naryuk dopropnirye, cang weik yo kipdeipnamne. Tonda, teleb kibuka tilirye palamle yo ara, sekdobikceba, lyubuka koululamle yo atonun kipdeipnamle. Tonda, naryuk kouamnye yo nirya ara, tuba tamubuka koupneba, teleb kibuka panamle. Ara, talye yupu kum nyapsine. Nara, Allah Yahweh arye, ayupu ara, akunum nyapmasina ara, ayupu yala nirya nyapdeipman ning ara, dipkoprob wininauk upnamne. Ton pia kum bataknamne ati ayupu ara, akunum nyapdeipsine. Allah Yahweh arye nyapdeibukba, Yeheskiel kekebukce, sekdeibuk.
Atalak kanye imun ning, akunum uplyopura, narye yupu nyalbana ati, ninye weik dopdeipniba, weik balamle mek deice balamle kapal, mek bukna yo deice arye, Sudan mutuku bikiba, sik Etiopia nang eibicopura, sik laka nyapnamak yupu kekebikcopura, sikda, ‘Se, aminyan talak yata upnamsil do?’ tenen, ilil pia weik upnamle. Tonda, na dopdeipnamne nang arye, ‘Mesir mutuku unyak nang ara, akunum obukabikce sirya dakik,’ nyabuka laka nyabicopura, sik Sudan mutuku unyak nang ara, pia imun kanye bobikirye, ilil ati yok birbir apnamle. Anggun kekeplulume! Anyapmasin yupu ara, dipkoprob nong upnamla anya arye, anggun moubuka kekepnamlume! Narye atalak winipnamle ning, akunum kintinipsa ati, na tenepse talak kunum uplyopura, aning nirya dipkoprob upnamlarya nyapsine.
Piblisite