Yehezkiel 24:13 - Eipomek

¹³ Ura, adomon yupu nong ara, nyapnusine. Anggunda, moubuka kekepnululume! Yerusalem mutuku ululum nango, anggunda pia malye un ning weik, malye winilamlum bukni, ‘Anang ara, tonap teleb kipdeipnamne,’ tenepsirye, pi dobuka piripdese bukni, anggunda mandipna kanye bobuka, umunya deice arye, anggun nong deice akunum malye kililamunyeba, narye anggunti kum teleb kipdeipsitinye. ‘Aning kum winipmanto,’ tenepse ati batakse. Bukni, anggun nong deice tuba malye dem usulule. Winisulula ati, sik malye ulamika ati, na weik yu arye, pia weik tonun wenepnamne. Ikin deice arye wenelamnya ani, na yu arye, ‘Winibuka anang wenepnamne,’ tenyamse ning, anggun deice deipnirye, ayu ning akunum kum kipyeura, sirya tam ara, narye tamubuka tonap, teleb kipdeipnamsine.

Yehezkiel 24:13 Referans Kwoze

Yehezkiel 22:24

Se, anda ninye arye deipkiknye ulyame. Ance sik Israel nang ati, ayupu nyapnulyame. Sik unyak mutuku noutam ara, malye wininyak nang unyaka ati, na yu unululce sik wenena ati, anggun ululum mutuku noutam ara, mok ton pia kum cenamle.

Yehezkiel 5:13

Akunum oplopsicopura, narye anggunti, yu weik upnilyopura, kum danamle. Narye anggun malye ululum ning ati, kanye imun weik wenen ning akunum arepsiniba, ninye weik akunum opnyopura, wini talak yu weik upnilyopura, aminyan talak kum daniliba, na kanye lopnamnile. Bukni, na yu weik upmanilya deice arye, sik tibuk, akunum wenebuka opnyopura, adeice arye, sik moubuka biknamake. Aning nirya akunum winipnyopura, anggun Yerusalem mutuku ululum nang arye, nati utenepnamnulume. Ara, ‘Se, elda Allah Yahweh, aning-aning talibuka, pia mikip weiknye birye, deiyok kum uamukba wenepsuka kuma. Deiyok ara, nun bidamnye malye ulamupu ning ati, yu weik ulamuka deice arye wenepsuke. Wenepsuka deiyok ara, elce, ‘Se, sikda yata deiyok ati, malye-malye unyak do?’ tenepsukce, kanye imun kanye bobukce, wenena weik ning dobuka, nun deice uk deipsukeʼ tenen, anggunce moubuka bikinamlume.

2 Korintus 7:1

Na kayapu, Allah arye nun nirya ati, ‘Wininamsine,’ nyabuka, arup nyapmasin yupu nyalilamsukba, aupmasila anya arye, yata malye winin ning ap, malye tenen ning ap do nirya, nun nong malye winisilye ning ap, nun kanye talima malye winisilye ning ap, adiparyuk batakibirye, diksukum ninyeuk unamabe. Ara, ‘Nun Ni Koprop Allah ara, pia mambule’ tenen, el si erena ati diksukumuk unamabe. Aning wininamaba ati, na Paulus arye nyapsine.

Zefanya 3:2

Aweik asik donyakak unyak nang nirya ara, Allah arye do, ninye arye do, ‘Aning ara, wininamlume Aning ara, pia kum wininamlume,’ nyabuka, wenena yupu nyaptinga babye, amutuku ninye arye, ayupu pia kum kekenyake. Atonun, Allah arye, ‘Aning ara, malye wininmaluma ati, aning ara, pia bataknulume,’ nyaptua babye, mandipna ubikirye, ‘Dauplye,’ tenen, pia kum kekebikirye, kum bikmanto unyake. Tonda, amutuku noutam unyak nang ara, sik kanye nirya dobuka, Allah el deice pia kum delinyake. Tonda, sikce, ‘Allah Yahweh aryuk, melibuka lyepropnamsileʼ tenen, diba kum tenenyaka ati, elti kum moronyake. Tonda, sikce, ‘Nun si erenyap Allah, el dam ton tamubuka yanamabe,’ pia kum tenenyake.

Yehezkiel 16:42

Aning-aning nirya akunum winipyopura, narye anggun malye winilamlum ning wenena ati, yu weik upnuka ara, adiparyuk mitang upnamnile. Akunum wenebuka opsinyopura, wini talak, na tuba tamubuka, talye kanye deipnirye, tunim abuka, namin aryuk unamne. Ati wini talak, narye anggunti, yu upnuk ning ap, ‘Se, sikda, ‘Naʼ tenen nang unyake bukni, yata deiyok ati, yuk talye ning si erenyak do?’ tenen, malye kanye bopsise ning ap, kum dalyeba, aning ton pia kum unamne.

Yehezkiel 8:18

Wininyaka ati ara, nara, na yu weik tuba unilya ati, sik nong deice, ikin weik ning deipnamne. Tonda, narye sik anang ati, ‘Se sikda bicoe, ‘Naʼ tenen, nang unyaka ati, sik malye wininyaka ara dauaplye’ tenen, talye kanye bobuka, namin kipnamane, kum nyapnamne. Tonda, narye sik anang ati, kum namin kipnamne. Sikti, weik tonun wenepnamne. Tonok nang babye, kum bataknamne, sik nirya ati, pia ikin weik ning, sik deice deipnirye, wenepnamne. Wenebuka opnyopura, sik Israel nang arye, yupu weik tonun, nati moronmaniyak talak ara, mikip arye yukubuka, engenamaka babye, dipkoprob na pia kum kekepnamne! Allah arye, na Yeheskiel biti, nyapnukba, kekepse.

Wahyu 22:11

Bukni, pia malye wininyak ninye ara, tuba malyeuk wininamake. Allah el ulul ning nirya ati, ‘Nun like’ tenen, yanibikirye, malye winin ninguk talibuka unyak ninye ara, apia unamake. Teleb winin ninguk talibuka diksukum wininyak ninye ara, tuba teleb ninguk wininamake. Malye ning pia kum ululba, diksukumuk wininyak ninye, Allah el mapu koprop ara, diksukumuk wininamake,” nyapnukba, kekepse.

Zefanya 3:7

Wini talak, narye winibuka tenepse. Ara, ‘Kume, na mapu koproba ara, sikce natibuk, ‘Se, nun ni Allah atibuk, mambul weiknye ululeʼ tenen, ilil uplyeba, nati si erenamniake,’ tenepse. Tonda, narye sik malye winin ning ati, ‘Aning ara, bataknamlume. Teleb winin ning ara, ani,’ nyabuka, sik amutuku nang wenepnyopura, adeice arye, ‘Sikce na nyanun yupu moubuka kekenamniakeʼ tenepse. Tonda, na nyanun yupu nirya kekebikceura, nati ilil upnamle. Aning atonun, narye sik wenena ati, arepnamne ning ara, tenebikirye, ‘Se, kume. Ara, nun malye upmaba ati wenepmasile’ tenen, ‘Biknamake,’ tenepse. Winibuka tenyamse bukni, wini talak ara, malye winin ning ara, pia lake upmale. Sik Yerusalem tam unyak nang ara, min talak mitik malye dem winilamik bukni, wini talak ara, pia malye winin ninguk, luparabuka tabakikirye, pia malye weik wininyake.

Hosea 7:1

Allah Yahweh arye, sik Israel nang ati nyabuk. Ara, na mapu sik Israel nang ati, ‘Ikin ulamikbuk, wini talak ara, tuba pia teleb kipdeipnamne,’ tenepse bukni, akunum ‘Winipnamne,’ tenepse talak ara, sik iknapye tam (arah selatan) unyak Israel nang, Efraim yala nang ap, tonda sik dabu tam (arah utara) unyak Israel nang ap, weik asik si ara, Samaria mutuku unyak nang ap ara, pia malyeuk winilamik bukni, duknulamik ning ara, akunum lak kibukba bikse. Ati ara, na pia elinun ning ara, sik malye winin ning ara ani. Ara, sikda talye yupu nyanyake. Wininyak touk ton, yuk nang, sik bisik noutam bakibuk, anang arye, sik bona ubula dolonyake.

Yehezkiel 24:11

Winipminyopura, domba basam tup akunum lukuka yukak deipmince, yun mek makau ara, dobuka uku buk deice uk deipnulyame. Adeiplopmaminye buk, uku dinmalya ani, tin pia weik akunum uplyeura, yaruk-yaruk apnamlule. Ara, ‘Amek makau deice sisilya ulamle ning, akunum uku diplyeura, ayun mek makau tamubuka, urasin teleb upnamleʼ tenen, winipnamlame.

Yeremia 31:18

Nyabukce, ayupu ton dukdongobuka nyabuk. Na mapu Israel ninye, sik kanye imun upliba, moronyak ning ara kekenune. Ara, nyanyake. “Se, nun ni Allah, nun malye ulamupuba, ance nun wenena ati, ikin ning weik arelamsulumba, awenen ning nirya dololamupu. Winipmanto ara, nunda ninye arye delina kum ning, bai tam talye kam ulamak ning atonun ulamupu. Bukni, winira ance, ‘Diksukum winin ninguk winilamting’ tenen, peteresilyame. Adeice, ‘Nun malye wininyap ning batakuka, an damuk tamubuka yanamap’ tenen, kintininyabe. Ati ara, nun ni koproba Allah, anda Yahweh, ancuk nun dobuka, an dam boyasilyame,” nyabuka morobik.

Yesaya 22:14

Allah Yahweh, aning-aning nirya talibuka, deice tam erebuka, mikip weik ululnye, elce im deice yin talin malaikat nirya talilule. Elcuk, na Yesaya dam yanuka laka kibuka yayukce nyapnuke. “Dipkoprob nyapne, Yehuda mutuku nang, anggun malye upmalum ning ara, kum lyepdopnamsine. Batakyeba, anggunda adiparyuk dipnamlume. Ayupu ara, na Allah Yahweh, aning-aning nirya talibuka, deice tam erebuka, mikip weik ununye birye, im deice yin talin malaikat nirya talinune. Naryuk ayupu nyapsine,” Allah arye nyabukura, na Yesaya birye kekepse.

Ratapan 1:9

Malye winin ning lakak kipliba, bakanyake. Bukni, ninye ton aminyan el nong noutam ap, baju bol deice palipnamle ning ap ara, el pia moubuka kum tenelula deice arye, amuak weklirye, sakalule. Anye elti, ara winilul koproba melibuka, ‘Bico,’ kum teneptinge. Na Allah Yahweh ati ara, ‘Se, anye birye bico nyapnutua’ tenen, moropnutua babye, narye anye biti, kum meliptinye. Aning ara, el ap mal olan nang ara, akunum bisilula ati, narye anye biti, pia kum melipnamne.

Zakaria 6:8

Winibuka bindobik talak ara, el amalaikat arye, na Zakaria biti, tamubuka nyapnuke. Ara, “Mirin kuda basam, Babel mutuku noutam binmala deice arye, Allah Yahweh el yu uamuk ning nirya ara, adiparyuk kanye namin kipdeipnamale,” nyapnukba, kekepse.

Imamat 13:55

Like tekbarye sum akunum mabiceura, asumuk, Imamnye dam boyakiba, dilenamlule. Dipdelyeba, ton tabakna kum wamlirye, min arye awamlye urasin touk tuba aupmalye bukni, min bol sukamlye ning kilina kumce, tuba upmalyak eiplyeura, “Kume, abaju deice ara, malye barye suse bol sukamuk ning ara, tuba aubuka ati, aning ara, pia malye weik ulule. Ati, adiparyuk uku dongopnulyame,” nyanamle. Ara, pukle suse malye una ning ara, abaju deice do, abaju kain pum tam do, tuba aubuka ati, winibuka uku dongopnulyame,” nyabuka, laka nyanamlule.

Imamat 14:43

Winibuka min arye lyulamlye ning ton, dakuka bai tam akunum dobikcopura, aik taramak taplakne ning, el si pelester winiryuk ninguk, akunum taplak deibikcak arye, aning nirya, winibuka sirya dakiceura, anyaik talye daupmalya ani, aminyan talak Imamnye birye, anyaik tamubuka dipdenamle.

Yeremia 13:27

Na Allah arye, anggun malye winilulum ning ara, akunum elisunune. Anggunda narye ‘Na likeʼ tenen, yu unulul ning ara, tuba yu unulule. Anggunda, na bataknulumce, ‘Isa si erepnuyapʼ tenen, mutuku deice welena ap, wa windam ap bimunce, isa mer ati, ‘Na niʼ nyabuka, aisa si erelulume. Winipmanto, ninye arye, el kwit domlye kil ati, ‘Se, naryuk akil doproptinyeʼ tenen, pitin-pitin nyabuka, ubula yolamak touk winilulume. Tonda winipmanto, kuda basam yim arye, ‘Kil kuda basam burum nepmaliba yoptinye,’ teneplirye, pitin-pitin nyapliba, burum kwaklamle touk, anggun Yudea mutuku nang babye, winilulume. Ati, anggun Yerusalem mutuku ululum nang nirya ara, anggun wenena ati, ikin ning yalyeba, dopropnamlume. Ati, anggunda pia ati, malye winin ninguk talibuka tuba wininamlum do? Yata wirbuka talak ton, akunum winipliba, anggunce amalye ning batakmunyeba, narye tamubuka, teleb kipdeipnamsin do? Allah arye nyabuk. Ayupu ara, Allah arye akunum laka nyapdeipnukba, na Yeremia kekepsirye sekse.

Ratapan 5:22

Aninguk kum bukni, ance nunti pia bataknamsilam do? Ance nunti, yu weik ukululce, wasilyam ning ara, bataknamsilam do? Pia yu unamkil do?

Yehezkiel 5:12

Narye anggunti, kanye imun weik ning arepsinyopura, anggunce talibuka ululum mutuku nang bokuka, winilye uplyopura, ton ning sepertiga ton, kanye imun weik uk yalanye yalirye, anggunti talibuka dinmasilya ani, ninye weik toun arye dipnamlume. Tonda, aning atonun, kanye imun weik din patana ton, anggun Yerusalem mutuku noutam yaliba, din kum daliba, din ning ton dina kumce, talye daunamluma deice arye, anggun kan-kan ara, ninye pia weik ton ap dipnamake. Aning atonun ton, anggun aumunye nang noutam bukni, sepertiga nang ton, sik mutuku batakuka, cang weik keil poka domlum ning, bai tam unamlum nang ara, sik yu yin talin nang arye, yu weik parang ya dobuka yakirye, anggunak sekuka oplopnamsiyake. Tonda, aning atonun, anggun amutuku ululum nang kan-kan arye bokuka, sepertiga nang ara, ‘Ninye arye opsikcakʼ tenen, Yerusalem mutuku batakuka, bai sakuka, dana-dana tam bikbik abuka binamak nang babye, sik mal olan nang arye, ‘Anang opnamakʼ tenen, bikbik abuka dobolbikirye, sik dam yanuka, yu parang ya arye, sekuka opnamake. Ara, kumanya dana-dana tam arye dolamle touk, narye sik wenena ati, mutuku sirya, dana-dana tam nirya ara, yakuka dopkwetepnamsin bukni, anggun mal olan nang arye, adopkwetepnamne nang nirya ati, yu parang ya boyanuka dobolbikirye, anggun Israel nang weik tonun opnamsiyake.