Yehezkiel 23:14 - Eipomek

^14-15 Oholiba tuba pia malye winilamukce, malye un ning ton, tabakuka winilamuk. El akil ara, ninye taruk arye, aik pum tam abilinga deice memebuka, sekdeiamik ning ton eililamukce, anang babye, el kanye delilamuk. Ara, Babel mutuku ninye urasin atonun sekuka deimik ning, sik ongolamik baju, ining bi ning atonun ning arye, taplakuka deimik ning ati, elilamukce, el kanye deibuka, tuba tenelamuk. Ara, Babel mutuku yin talin deiyok nang arye, ongolamik ikat pinggang (deiyatinga atonun) urasin teleb ning ap, tonda kisok koun ning teleb ning ap, el si serban ongolamik ning ap ati, atonun cat arye sekuka, deiamik ning atibuk, elce pia tuba tenelamuk.

Yehezkiel 23:14 Referans Kwoze

Yehezkiel 8:10

Nyapnukba, narye abisik bublan binuka, weksirye eipse. Asukum ara, tonok aik pum tam ara, anyaik abilinga piamik ning nirya ara, ninye arye gambar puturubuka sekamik ning weik eipse. Eipse ning ara, Allah arye, ‘Akam ning yala-yala nirya ara, pia na like,’ akunum nyapdeiamnuk bukni, ninye arye, aning urasin atonun akunum memebuka deiamik. Ara, yata ning do nirya, sik mun ap, yan ap deice arye, tuku butbuta noutamak balamle kam ning urasin atonun sekdeibik ning ara, bal ap, tonda Allah arye, ‘Akam ning ara, na lik ati, anggunce aning ara, dina pia meme,’ nyapdeipsuk ning, abapye eipse. Tonda, sik Israel nang arye, ‘Nun ni koproba ara aniʼ tenen, talye isa mer si eren ati, aning urasin atonun puturubuka, abilinga deice sekuka deiamik ning ton eipse.

Yeremia 22:14

Raja Yoyakim elce nyabuk. “Narye istana Raja, urasin pia teleb ap, aik pia weik ning ap, alip tam aik ap, pia teleb kibuka dopnirye, aik lo weik kipdeipnamne,” nyabuk. Nyabukce, anyaik dobuk talak ara, Libanon mutuku, urasin pia teleb wa mutmuta yo arye, aik abilinga ton memepdeibuk. Winibukce, bai tam ton el lina ati, aik abilinga dobukce, jendela bisik ton moubuka botobuka, kintinip deibuk. Ajendela memepdeibuk yo deice ara, ‘Urasin pia teleb upnamleʼ tenen, cat merah likdeibuk.

Yehezkiel 16:29

Aning atonun, aminyan talak ara, anggunce, ton Babel mutuku nang, sikda bona weik tonun, deklamikce nang ati, ‘Amutuku nang babye, ton melipsiting’ tenen, anggunce amutuku nang ton, moryamlulume. Anggunce wininyamluma deice arye, talye yolanauk ulamikce kilapu wininyak atonun, ulamlume. Winibuka ulamlum bukni, anggunda mun kum bulamsuke.

Yeremia 50:2

Ara, tukwak mutuku im sirya, mutuku sirya nirya unyak nang, sik yala yuk-yuk nang nirya ara, ‘Sik ton kel biknamakʼ tenen, na nyapnukin yupu bobinuka, laka nyalbinamlyame! Tonda, Babel mutuku noutam awamuk ning nirya ara, amutuku unyak nang ap, Allah arye obuka sirya daknamle,’ nyabuka, laka nyan yupu ara, kum duknunamlyame. Ayupu uk, laka nyana ati, lak kin ning, el si spanduk sekuka erepdeipmince, lak sukumak deipminyeba, dana-dana tam unyak nang nirya eibikirye, bikinamake. Ara, ‘Yuk mutuku yin talin nang yakirye, Babel mutuku nirya ap, Babel tam umunye nang nirya ara, opsikiba, anggun nirya dipnamlume. Anggun isa kil, el si Bel, erenyak isa babye, alye weik dakdanamle,’ nyalbinamlame! Ati, aning ara dungnuna kume! ‘Anggun olyanamsiak nang arye, Babel nang arye, si erenyak isa kil, el si Merodak babye, anggun mal olan nang arye, aning dakuka, atu atonun buklopnamake. Tonda, aisa kil bukni, el si bitinye ning ara, dewa Bel, ninye urasin atonun kibuka deiamikce, si erenyak patung nirya ara, sik olyanamak nang arye, aning coplobikiba, yuk-yuk kipnamle. Ati ara, aisa kil Bel ap, el si erena ati, patung talinyak nang nirya ap, alye weik dakdanamake. Aisa atibuk, ‘Nun deiyok kil,’ nyabuka, si erenyak nang nirya ara, imun kanye bobuka ukirye, ‘Se, yata wiripnamsil do?’ tenen, teniltonamake. Dipkoprop aisa si erena deiyok ning nirya ara, sice buklopnamake.

Yesaya 46:1

Wini talak ara, Babel mutuku ninye arye, isa si ara, Bel Isa ap, isa si ara Nebo Isa ap, si erelamik ning ara, akunum mikip kum upliba, nimalyap arye bobanyake. Bukni, aisa nirya ara, dobukabikirye, talye kam ulamle ning keledai basam balye deice deibikiba, ikin weik uplibuk bobalule.

Yehezkiel 23:13

Na Allah arye dilamsebuk, dipkoprob el dukul Ohola birye, pia malye ning taleamukce winilamuk atonun, Oholiba babye, aninguk winilamuk. Akil ara, pia malye weik winilamnukak, eipse.

Yehezkiel 23:23

Nara, an min arye, ‘Se’ tenelamlum nang, Babel mutuku nang ap, Pekod mutuku nang ap, Soa mutuku nang ap, Koa mutuku nang ap, Asyur mutuku nang ap, Kaeldea mutuku nang ap, yanuka opnamkiake. Tonda sik nirya ara, urasin pia teleb nang buk wel ukirye, sik weik pil dona deiyok nang ap, Bupati-Bupati ap, Gubenur ap, kuda basam balye deice bukuka, ban yin nang ap, sik deiyok nang ap nirya ara, narye bulubuka, an dam boyanamkine.

Nahum 2:3

Wini talak ara, anggun Niniwe mutuku noutam ululum nang, anggun ninye olyanganamsiak nang ara, ninye olban talak ongobuka bana ati, tonda, ‘Mal opsicakʼ tenen, kalikna ati talinyak ning, el si ara perisai, bi ning aupmale. Tonda, sik ayin talin nang baju ara, bi ninguk ulule. Tonda, sik mal olan nang bukuka ban ning, el si kereta-kereta perang ara, banmanba, uku buk dilamle touk unmale. Aning atonun, sik kuda basam yan nirya babye, mal olbinamak talak ati, kintininmakce, ‘Adibaryuk bikbik abuka bitibyeʼ tenen, sik yan bibikuka tikikirye, sirim talilule.