Yehezkiel 21:7 - Eipomek

⁷ Winiminye ati, sik Israel nang wekmakirye, yupu kekebikceura, sikce anti asipdenamkiake. Ara, ngalukuka malye nyabuka engepminyeba, Israel nang arye, ‘Se, yata deiyok ati, ngalukuka malye nyanmalam do?’ nyabuka asipkikceura, ance sik anang ati, nyapnulyame. Kume, dotalak ara, kanye ikin yupu ton boyasikceura, kekepnamaba atia. Ayupu nirya yanuka nyabikceura, kekepnamak nang ara, ‘Se, yata wiriptibye do?’ tenen, ikin kanye bobuka, sik talima dakalsanamle. Tonda, sik anang nirya ara, taruk mitang uplyeba, daksaknamle. Sik kanye bobuka unyak nang nirya ara, kum kipnamle. Tonda, sik anang yok sirim taliplya deice arye, sik yok babye, sirim talibuka, mikip kum upnamle. Sik kanye tenen ning ap, sik kisok yung ap ara, mek atonun uplyeba, pia mikip kum upnamle. ‘Weik ikin ning yanamle,’ nyapmasina ara, pia dipkoprob yanamle. Anggun dibinauk unamlume. Aning yalyopura, aning nirya ara, winipnamle. Na Allah Yahweh, aning-aning deice tam erebuka, Pia Mikip Weik Deiyoknya ununye birye, akunum nyapdeipsine. Allah arye, na Yeheskiel biti nyapnuke. Nyapnukopura, yupu tonap dukdongobuka nyapnuk.

Yehezkiel 21:7 Referans Kwoze

Yehezkiel 7:17

Israel yala nang, sik awinibuka unamak talak ara, sik taruk mikip nirya ara, pia mitang upliba deresekenamle. Tonda, sik kutam nirya babye, duklam-duklam abuka banamake.

Ibrani 12:12

Aning ati ara, dikdik upsilirye, uk disilye taruk ap, gutamuk disululce lyulamsil ning ap, mikip kililanamlulume. Kanye teniltona kum arye, batakana kumce, pia talibuka unamlulume.

Nahum 2:10

Niniwe mutuku noutam nirya ara, sice bukuka bataknamake. Winibikirye, amutuku noutam uamuk ning nirya ara, pia kum kipdeibikiba, asik oldemuk upnamlarya! Amutuku nang domik ning nirya babye, pia sice buklobikirye, amutuku noutam nirya ara, malye kipdeipnamake. Winipnamak talak ara, sik amutuku unyak nang nirya, sik talima noutam arye asilana ap, teniltona ap, kanye talima dakalsakna ap, upnamake. Winipnamaka deiyok ara, sik ilil weik atia. Tonda, sik kutam nirya, mitang uplirye, yok sirim birbir apnamle. Sik amutuku nang nirya, sik urasin ara, uk weik dilamle nang, sik urasin malye delilamle touk, ubuka malye kanye bobikirye, unamake.

Yehezkiel 7:26

Atalak nirya ara, yu ning tenen kanye ap, imun kanye bobuka, talima daksaknaba, malye yupu nyana ap ara, pia tuba-tuba yanganamle. Tonda, ton nang arye, ‘Se, kanye imun ning ton, asukum akunum upmale, asukum ton yanamle,ʼ nyabuka, talye yupu nyanamak bukni, aning nirya ara, talye-talye yupu nyabikiba, kekenamlume. Winipliba, anggun Israel yala nang arye, ‘Se, nabi nang ati, morobibiba, lengdar deice arye, teleb un ning ton eibikirye, nun melibuka lak nyapsitingʼ tenen, sikce morolbinamak bukni, aning babye, kum danamle. Tonda, aning atonun, imam-imam nang anggun deiyok nang ati, moronamlum bukni, sik imam nang babye, Allah yupu tuba kum peterenamsiyake. Allah arye, ‘Aning ara, wininamlume, aning ara, pia kum wininamlume,’ nyapdeiamsuk yupu ara, pia kum danamle. Atouk anggun ninye deiyok nang nirya ap, yupu bokolina deiyok nang ap babye, ‘Winibuka wininamlume,’ nyabuka, kum peterenamsiyake. Aning nirya, akunum sirya tunim apnamle

Yeremia 50:43

Na Yeremia birye, ayupu nirya akunum laka nyapsiba, Babel mutuku taleamuknye, Nebukadnesar birye, akunum kekebukopura, aninye deiyoknye Raja ara, ‘Se, yata wiriptibye do?’ tenen, pia imun kanye bobukce, el nong nirya mitang ubuk. Winibuk talak ara, el urasin nirya ara, kilapu mi bomikca ani, mi deiyok dinmaliba, bolamak urasin atonun ubuk. Winibukce, imun kanye bobuk.

Yesaya 13:7

Ati ara, anggun wenebuka oplopnamsin nang nirya ara, pia ilil weik upsilyeura, anggun nong nirya ara, mitang upnamsile. Tonda, ilil weik upsilyeura, anggun kanye uk dipsilirye, talima daksaknamsil ara, aning-aning nirya ara, pia kum winipmanto upnamlume.

Lukas 21:26

Im deice tam ulul ning nirya ara, lonting-lonting anamle ati ara, ninye mutuku sirya im sirya nirya, ‘Yata winipnamsil do’ tenen, ilil pia weik uplibuk, gisok biri-biri ablirye, dipmanto unamake.

Yehezkiel 24:19

Winipseba, sik amutuku ninye arye nati, “Naio, ance yata deiyok ati, aning ara, winipnalam do? Ance domlum kil, winiryuk dipmal bukni, engena kumce, tuba banmalame. Ati, awinipmalam ning deiyok, yata ati do? Nun ton laka nyapsilyeme,” nyabuka asipnike.

Yehezkiel 20:49

Nyapnukura, na Yeheskiel birye, ikin kanye bopsirye, narye tamubuka nyapse. “Se, na ni koproba Allah Yahweh, anda aning-aning nirya talipmince, deice tam erebuka, Pia Mikip Weik Deiyoknye ulyamnye, yuk nang arye nati, ‘Se,’ tenepnikirye, nyaninyake. Sikce, ‘Anda aning ara, winibuka nyana ara, meme! El anye Yeheskiel bira, winipmanto yupu deice aryuk, tuba nyasulule! Ayupu deiyok ara, nun kum teneptibye ati, dauplyeʼ nyabuka, nyek-nyek aninyake, na nio. Yeheskiel birye, Allah ati nyabuk.

Ratapan 5:17

Sion mutuku, nang ton kum unyak ati, akunum batakikba, asik oldemuk ubukce, pia tunim nyabuk. Winibukba, bai tam ulamle yu kamuk ukirye, banauk unyake. Winiceba, nun talima pia uk disulule. Tonda, nunda enganauk upyeba, nun asing maka balosilirye, nun asing nirya ara, akunum kupsuke.

Yeremia 49:23

Allah Yahweh arye, Damsyik mutuku noutam unyak nang ati, nyapdeibuk yupu ara, ani. Ara, Damasyik mutuku dam bukni, Hamat mutuku noutam unyak nang ap, tonda Arpad mutuku unyak nang arye, engen yupu kekebiceura, sikce, ‘Se, aning ara mambule,’ tenena ap, ilil una ap, unamle. Ara, yuk nang arye, Damsyik mutuku nang, akunum opnamake,’ nyabuka, engen yupu ton nyabikiba, kekebikirye, malye kanye bobuka, teniltonauk unamake. Sik anang talima noutam ara, nemalyap arye, dakeiam asa kum unamake. ‘Se, yata wiripnamap do?’ tenen, imun kanye bona ap, ilil una ap, kanye windung-wandung ana ap, unamake. Winipmanto ara, kumanya mikip arye dopliba, weik laut mekwen deice, mek kait mikip weik arye welelamle touk, upnamake.

Yeremia 8:18

Ura, Allah arye ayupu nirya laka nyapnukba, kekepsirye, na talima noutam arye, pia uk dinilye ning ara, min kum winiptue. Ati, na kanye delinulula ning ara, dipkoprob akunum kum kipnuke. Imun kanye weik bobuka ununa ati, na kanye talima noutam ara, uk weik dinulule. Winipmanto ara, ninye dibikceba, aning ati tenebuka, tuku luklamak atonun, na kanye arye, tuba tenenun ning ara, na talima uk dinulul ning ara, kum kwetepmanto unulule.

Yesaya 35:3

Ati ara, taruk sekamliba, mitang ulamle ninye mikip kilina ap, gutam uk dilamlirye, milmil koulamle ninye ap, gutam uk dilye ninye ap mikip kilinamlulume.

Yesaya 28:19

Sik aolyanaganamsiyak nang ara, pia tuba-tuba anggun dam yanganamake. Yanuka opsikce talak nirya ara, ninye weik tonun oplopnamake. Ara asum-asum nirya, anggun anang arye, keting Noutam babye, lukunyan talak babye, tuba yanuka ona uk unamsiyake. Wininamle talak ara, anggun Yudea tam ululum nang nirya ara, anggun ni koproba Allah arye nun nabi nang ati nyapdeiamuk ning, nyabibiba, anggunce aning kekepmunce moubuka tenelulum ning ara, dipkoprob weik tonun ilil pia upliba, yok sirimtalipsilirye, talima malye upnamsile.

Yesaya 7:2

Atalak ara, yuk nang arye, Daud el yala ninye dam yupu nyalbiyikce, “Kume, sik Aram mutuku ninye ap, Efraim yala ninye ap ansinibuka, ‘Yehuda yala ninye opnamap’ tenen, warikil yanmasiake,” nyabuka, laka nyanmek. Nyabikba, sik deiyoknye Raja Ahaz birye kekenmokce, el ap, el tam ninye nirya ap, ikin kanye bobikce, sik ilil ubuk. Ara, Israel tam ninye arye, sik mutuku warikilyanganmeka ati, Yehuda tam ninye nirya ara, sik deiyoknye Ahaz ap, ilil ubukba, kanye talima nirya sirim talibukce, yo tikamli bukni, kumanya yanuka dopliba, loklamle touk winibuk.

2 Raja-Raja 21:12

Ati ara, na anggun ni koprop, Allah Yahweh arye, anggunda ‘Naʼ tenen, kanye deiamse ninye, yala-yala nirya ara, anggun Yehuda tam ululum ninye babye, Israel tam ululum ninye babye, nara anggunce, na si erenamnulum, na Yahweh arye nyapsine. Weik ikin ning dobuka, sik Yehuda yala ninye deice ap, Yerusalem mutuku unyak ninye ap ati, sik deice deipnamne. Winipniba, aning eibikirye, ninye arye, yuk ninye ati eibikiba, kekebikirye, ilil weik upliba, imun kanye bobuka unamake.

2 Samuel 17:10

Aning nyabikiba, an tam yin talin nang, ilil pia kum unyak nang babye, ayupu kekepnamakopura, pia malye kanye bobuka, teniltonauk unamake. Ilil weik uplyopura, ninye ton mikip weik arye, itam kibuka unanye babye, singa bai tam, kam ilil pia kum ulamle tonye bira, adiparyuk ilil upliba, talima mitanguk unamake. Ara, urdem ati kume. Israel nang nirya, kel bikamik ning ara, ‘Absalom el li koproba Daud, mikip weik ninye olananye ulule. Tonda, el ap unyak yin talin nang babye, lik tenebuka unyake’ tenen, akunum kel bikamik.

Yosua 5:1

Ura, Yordan mek duman, keting kumulban tam ulamik ninye ara, Amori yala deiyok nang, Raja nang ap, tonda, Kanaan tam bukni, weik laut mekwen kup-kup, pantai dam ulamik ninye deiyok nang ap arye kekebik. “Allah el si Yahweh arye, Israel ninye amutuku yanamaka ati, Yordan mek cepromalaba, koubuka yanganmake,” nyabikura, kekebikopura, pia ilil weik ubuk. Ara, sik Israel ninye ati, sik yuk yala ninye pia ilil ubukce, sirim talibuk. Sik kanye talima daksakukba, ‘Israel ninye obuka sirya daknamap,’ tenelamik ning ara, batakik. Sik ilil weik ubuk atia.

Ulangan 20:8

Tonda, yin talin nang, sik deiyok nang arye, sik amu tam yin talin nang nirya ati nyanamake. “Anggun aunmalum nang noutamak arye, yatanye ton ilil una ap, talima mitang upmasilce, sirim talina ap unmasil do? Atonye bira, el aik koproba tamubuka bana telebe. Anye birye, el kwit capu, yuk yin talin nang, el ilil unmalye ning eibikirye, ilil una kum kanye bopmace nang ara, ‘Mitang kipdeiplyak’ tenen, ilil upmalinye bira, el aik koproba tamubuka banamlule.” Sik yin talin deiyok nang arye, sik amu tam yin talin nang nirya ati nyanamake.

Imamat 26:36

Sik yuk mutuku nang, yu weik yin talen nang arye, anggun Israel nang weika tonun opnamsiak bukni, ton nang ara, mitik tonun aryuk batakikiba, kam tuba unamake. Kam tuba unamlum nang ara, yuk mutuku nang arye, sik mutuku delilbisikceba, daunamlum talak ara, anggun ap neika unamlum nang nirya ati, ilil deiyok ning ton, arepsinyopura, anggunda pia ilil weik unamsile. Winibuka daulamunye buk, narye kumanya mikip weik ning arepnyeba, pu aplirye, lelim weik nyalirye, yo nirya lokukaplirye, yo bok ton saklya deice arye, lelim mitik tonun aryuk nyapnamle deice arye, anang nirya kekebikirye, ‘Se, yu nang arye, parang ya bobuka olyanmasiak do?’ tenen, ilil weik upsilyeba, anggun bikbik abuka bendopnamlume. Winipmanto ara, ninye arye olanukce talak, bikbik abuka perak balolamak atonun, upnamlume. ‘Bikbik abuka balamunyak ton, sakmunyopura, nun mal olan nang arye opnusiak do?’ tenebuka, ilil kum unamsile. Ara, anggun mal olan nang ton, dam kum dobolbanmasiki bukni, ilil weik upsilyeba, bikbik abuka banamlume.

Keluaran 15:15

Tonda, Edom mutuku deiyok nang ara, ilil weik upliba sirim talipnamle. Moab mutuku deiyok nang babye, ilil ati sirim talipnamle. Tonda, anti ilil upliba, sik Kanaan mutuku ninye ara, sik talima mitang upliba bindopnamake.

1 Peterus 4:7

Aning-aning nirya sirya daknamle talak akunum dam upsil ati, pia moubuka tenepmunce, teniltona kum arye, ‘Malye ubibyak’ tenen, moubuka kalikilanamlulume. Winibuka upmunyopura, Allah ati moronamlulume. Moubuka kum kalikdamunyopura, Allah ati teleb nyabuka kum moroptume.

Yosua 7:5

Bikbik abuka yanmek bukni, sik Ai mutuku yin talena nang arye, sik Israel nang nirya ati, dobuka opnin yanganmekce, Ai mutuku weik bisik bublan dam arye kupsakuka, kat ning, logam ena ati ulamik mutuku, Syebarim mutuku dam yayik. Yayikopura, amutuku taram anyapce, kiklina ara, ninye tiga puluh enam (36) nang ara, sik Israel tam nang, amutuku taramak arye oplobik. Winibikba, sik Israel nang nirya, ‘Seʼ tenen, ilil pia weik ubukba, ‘Nunda dipkoprob kum winiptibyeʼ tenen, malye nyanmekce, engebuka batakik.

Mazmur 58:7

Ati na ni Allah, ance sik wenena ati, opminyakarye, amu tamuk deiptumopura, tonap malye kum uptinge. Winipmanto ara, ‘Ance sik si duk lukminba, sik si nirya lukuka saktuʼ tenen ati, nyapne. Se, na ni Yahweho, winipmanto ara, yu weik pus, el si singa ara, mitik tonun winiryuk nepmalye ninguk, tomobuka, el si ara yang tiklamle ning, lukuka bataklamaka atonun ubuka, ‘Amalye una deiyok nang ati, ance wenebuka opminyopura, sikce tuba malye kum kipdeipnamsiak’ tenen, moropkine na nio.

Yehezkiel 21:6

Tonda, ninye arye deipkiknye, an Yeheskiel bira, ‘Se,’ nyabuka, malye nyabuka ngalukunamlyame. Ara winipmanto, ninye ton weik kanye imun upmalya ati, talima daksakmalyeba, ‘Se,’ nyabuka, ngaluklirye, malye nyalamle atonun, an babye atonun winipmince, sik dam malye nyabuka ngalukuminyakarye, pia engenauk unalame.

Yehezkiel 21:8

Allah, el si Yahweh arye, na Yeheskiel dam yanuka nyapnuk ning ara, ani.

Yehezkiel 21:15

Ninye on nang arye, sik warikdongobuka yakceura, aparang ya arye, na mapu koproba, deiyok koubuka, opnin banmaceura, sik Israel mutuku unyak nang mikip-mikip unyak nang ara, mitang kipdeiplyeba, talima daksaknamle. Atalak ara, ninye weika arye obikceba, tukwak sakuka poulbikirye, dipnamake. Anggun nirya eipnalume! Anggun ululum mutuku nirya ara, anggun weik asik wekelbana ati bisik, cang keil poka bublan dam ara, narye yu yin nang deipnyeba, ninye on nang kintinipnamake. Amutuku nang, weika arye opnamak ati, sik yin nang arye, na ninye on ya erebuka talibiceba, aya si ara, perereng alamle touk upnamle. Ara, aparang ya, narye kintinip deiamseba, pereng-pereng alul ning ara, ninye opnamak ati, winipse.

Yehezkiel 22:14

Allah arye nyabuk. “Narye sik malye unyak ning nirya ati, akunum wenepnye talak ara, sik mikip una ap, sik taruk mikip una ap ara, tonap kum winipnamsile. Na Allah Yahweh arye, aning-aning nirya deice tam erebuka, Pia Mikip Weik Deiyoknye ununye birye, akunum nyapsin ati, narye anggun wenena ati, aning ara, dipkoprob nong kunupnamle,” nyapsine.

Daniel 5:6

Asekna ning eibukopura, ninye deiyoknye lukdayukce, ilil ubuk. El urasin ara, yuk kibukce, el kanye walwal ubukce, kanye talima ikin ubukopura, kutam dam ap, ber yok dam ap nirya, bukmaka tilikuka, yok sirim talibuke.

Yeremia 26:12

Nyabikopura, Yeremia birye, sik ninye deiyok nang ap, anyaik bulubuka wekmek ninye ap ati, tamubuka nyabuk. “Kume, Allah el si eren aik ap, Yerusalem mutuku ap, amutuku ululum ninye ap ati, malye yupu nyapman ning ara, naryuk tenebuka, kum nyapmane. Nun ni Allah, el si Yahweh arye nati, ‘Ayupu laka nyalbinamalyame,’ nyapdeipnuk touk nyapnopura, kekepmalume. Narye tonok yupu babye, na kanye aryuk kum nyapmasine,” nyabuk.

Yehezkiel 6:2

Se, Yehezkiel anda ninye koprop arye, deipkiknye ulyame. An urasin erepmince, Israel mutuku noutam bukuk mutuku-mutuku dupak dipdemince, narye aminyan arye winipnamne ning ati, lak nyapnukine. Ara narye, ‘Sik amutuku unyak nang arye, malye weik ulamikce, tuba malye unyaka anya arye, narye sik wenena ati, kanye imun weik ning dobuka, amutuku deice deipnamne,’ nyapdeipne yupu ara, sik kekena ati, lak nyalbinulyame. Ance nyapnalam yupu ara, anyapnukine.