Biblia Todo Logo
Bib sou entènèt

- Piblisite -




Yehezkiel 21:22 - Eipomek

22 Adeice arye, Yerusalem mutuku tam ati, sirik taruk arye bokuka, talipmalye ning deice lakakipnamle! Awinipnamle ning ara, Raja Babel birye, Yerusalem mutuku olbinulya atia. Winiplyeba, Raja birye, “Mal olalbinuyabe,” nyaplyeba, sik yanganamaka, yan lelim ara, weik nyabice kekepnamake. Atalak ara, Raja birye, el yin talin nang ati, sikda, anyaik dobuka ukirye, bai tam bisik arye domik bublan (pintu gerbang), tirikdongobik ning, binuka dakuka donokon ning ap, cang poka deice welena ati, cang yo moromna welen ning ap, poka dam tuku palibuka delinamak ning ap ati, “Anggunda aning-aning moubuka kintinip deipnululume,” nyapnamle. Winiplyeba, sik anang arye, anyasik domikirye, cang keil poka dopdongomikce ning ara, tuba libuka yan deibikiba, langdiplye deice arye, akeil poka deice welebuka bikirye, ninye olbinamake.

Gade chapit la Kopi




Yehezkiel 21:22
17 Referans Kwoze  

Winipminyopura, Yerusalem mutuku weik asik dolamik sukum ara, yuk mutuku yu nang arye yanuka, warikuka olyanamake ati, Yerusalem mutuku nirya, dana-dana tam aknapdongobuka wareknamake. Ati, sik yin talin nang, urasin atonun puturubuka, akeil deice deipnulyame. Tonda, Yerusalem mutuku dana-dana tam domik cang keil poka dam, tuku weik tonun arye palibuka bukdeipnamlyame. Sik yin talin nang arye, atuku deice welebikirye, apoka deice tam bisibuka koulukikirye, Yerusalem mutuku wariknamak ning ati nyapne. Tonda, sik yanamak yin nang arye, tia ati dopnamak tenda aik urasin ato ning ap, anamin keil urasin deice, gambar sekuka deipnamlame. Tonda, Yerusalem mutuku keil poka bublan pakuka uluplopnamaka ati, cang kat yo kintinip deipnamak ning ap, urasin atonun puturubuka, akeil deice seknulyame. Aning nirya ara, tuku arye memelamak keil urasin deice, puturubuka kintinipmince, deipnulyame.


Ninye deiyoknye Raja Babelnye birye nyaplyeba, el yin talin nang arye, anggun Tirus mutuku weik cang keil poka doplum ning nirya ara, akeil poka dolulum ning, weik ikin ning arye bobikirye, sik keil poka dam lokdokikirye, ulubuka bataknamake. Tonda, ‘Yu nang mal olyasikirye, minop arye eipnamapʼ tenen, sik poka deice weik cang keil aik ton, doplum ning nirya ara, kapak ya ap, besi ning ap arye, ulubuka bataknamake.


Winibuka ati, Babel mutuku ninye deiyoknye Nebukadnesar ap, el yin talin nang ap, sik neika, ‘Yerusalem mutuku unyak ninye opnamap’ tenen, yanuka warikmek. Ara, Zedeikia birye, Yehuda tam ninye talibuka ulamukba, keting tamun yupa toupne barye (9) akunum kibuk talak ara, sik Babel mutuku yin talin nang nirya, Yerusalem mutuku yayik. Keting tamun ara, topne barye (9) bukni, wala tagu barye (10), tanggal tagu barye deice arye, Yerusalem yanuka warikmek. Babel mutuku weiknye Nebukadnesar ap, el mapu yin talin nang nirya yayikce, ‘Yerusalem mutuku unyak ninye bikicak’ tenen, weik cang poka yanuka, wibuka antanap dongamikak, sik Babel nang ara, apoka bai tam tia doktakne tenda aik, cang kain arye domik aik ara, el si doltakne tenda aik nirya dobuka ulamik. Ara, ‘Yerusalem mutuku ninye nirya, bai tam kupsakuka bindobicak’ tenen, pia kaliklamika ati, Yerusalem ninye nirya ara, sik wa win dam ap, bai tam ap pia kum binmanto ulamikce, ikin asa ulamik.


Allah Yahweh im deice unyak yin talin malaikat nirya ara, sik deiyoknye ulula ati, elda pia mikip weik ulule. El si deice arye, anggunti nyalin yupu akunum nyabuk. Ara, “Babel mutuku nang olbana ati, yuk mutuku yin talin nang nukman kumto, yupa pia weik dobuka deipnamna ara, sul kwising nukman kumto yangalamaka atonun upnamake. Ayin nang dobuka deipnyopura, Babel mutuku olyakirye, sik Babel mutuku nang nirya obuka sirya dakikcopura, kanye deibikirye weik yupu deice arye, ‘Akunuma, Babel mutuku nang akunum obuka sice buklopmabe,’ nyanamake.


Aning ara, talye ati kum nyapkine. Deiyok ara, na Allah Yahweh arye anti, nyapkine. Nara, Israel nang nirya melibuka kalikisununa ati, anggunce na si erenululume. Narye amutuku talibuka, ninye deiyok nang, Yehuda tam Raja-Raja nang arye domik asik ap, tonda amutuku Yerusalem weik asik domik mutuku noutam, ninye asik weik tonun uluplomik ning ati, ayupu ton nyapnukine. Ara mince, anggun mal olan nang arye, amutuku warekdongobuka olyayikba, anggun amutuku noutam ululum nang arye, ‘Se, nun mal olan nang arye opsicak ati, amutuku mikip kipdeipnuyap,’ tenen ati, anggun asik weik tonun, akunum uluplopmunce, akeil ap, ayo ap dobuka, anggun mutuku dana-dana tam antanap dongobuka doamlum keil poka ati, tonap tabakuka, mikip kibibirye, dopnamabe. Ara, anggun mal olan nang, sik Babel mutuku yin talin nang arye, ‘Yerusalem cang keil poka dam, tuku lukuka deipmaba deice welebikirye, poka deice tam welebuka, amutuku noutam weknamapʼ tenen, tuku lubuka, Yerusalem cang keil poka dam deibik. Winibikba, anggun Yerusalem mutuku ululum nang arye, ‘Kume, nun mal olan nang arye, ninye on parang arye opsicakʼ tenen, anggun aik ap, Raja nang, sik aik ap uluplopmunce, aning dobuka, anggun poka mikip kipnamle ati, tonap tabakuka dopnamlume.


Babel mutuku yin talin nang yayikce, nun weik asik dana-dana tam, keil poka dobuka antanap dongamupu dam ara, tuku weik tonun, lukuka deipmaka deice arye, aning deice welebuka, nun mutuku noutam wekikirye, opnamsiake. Apil ara, akunum kintinibuka dobik. Ati sik Babel mutuku nang arye, nun mutuku ara, malye kibikcak arye, alubuka dopropnamake. Wini talak ara, sikce amutuku akunum warekdongopmake. Winibikiba, din patana deice ap, dakdanin ban uk dina deice ap arye, nunda mitang nang unyaba ati, sik Babel nang taruk deice, amutuku asik dopropnamake. Ati na ni Allah, ance, ‘Winipnamne,’ tenyamlumce, nyamsulum yupu nirya ara, atalak akunum lak upmalba, eipmabe. An babye, akunum eibuka bikmalame.


Kuda basam daulamlye bukni, pong-pong ana, el si terompet nyakiba, lelim kekeplirye, si bam bol pum tam arye, kaksuruk alule. El yupu weik arye nyalule. Tonda, ninye oldanmace nang, sik dam kabul banmalye talak ara, pera mutuku unmatinga babye, sik yin bisik ana nintong, minopce el u pum bisik biliba, kekelule. Tonda, yukak arye, mal oldana deiyok nang arye, opnin yanganmace lelim ara, akuda minopce kekelule.


Isai birye, ayupu nirya nyabukba, mapmeka berekopura, asum beren tam arye, Daud mapmoka bukukabukce, el li nyapdeipmok domba basam ara, melibuka kalikinamnye dam dobuka, deibukce, ‘Adibaryuk, Ela mutuku binunʼ tenen, kintinibuk. Ara, Daud binamoka ati, agandum ap, adin el si keju ap, dobuka libukce, bisik banmoka ani, Ela mutuku biyuk. Aning nirya ara, el li Isai birye, Daud biti nyapdeiamuk touk winibuk. Daud adiparyuk Israel ninye, sik yin talen nang arye, tia aik dobuka, tia ulamikak, yayuk talak ara, sik Israel yala yin talen nang ara, ‘Pilistin nang olbinuyapʼ tenen, akunum kintinipmekce, olal balamikak, akunum binuka tikmek. Atalak ara, sik yin talen nang, yuk-yuk nirya arye, kanye pia deibuka, yupu weik tonun nyanmekce, ‘Anggunda opnusiyabe,’ nyabuka, yupu weik tonun nyanmek.


Ara, ayupu nirya akunum nyabukopura, sik imam nang arye, yim domba yang bisik pong-pong abik. Pong abikura, Israel ninye nirya, apong-pong ana kekebikopura, adiparyuk sik yupu weik arye nyabik. Winibuka nyabikopura, atalak aniryuk, Yeriko mutuku asik dana-dana tam, weik keil arye deibuka, poka domik ning dakuka sakuk. Daksakukopura, Israel ninye nirya ap, sik yin talin nang nirya ap, abisikuk welebuka, amutuku wekelbiyikce, Yeriko mutuku nang obuka, sirya dakdongobik.


Winibuka banmek bukni, Yosua birye aninye nirya ati, nyabuk. “Wini talak ara, narye anggunti nyapsine. Anggun kanye aryuk, tonok yupu babye nyana kume. Anggunce yupu talye-talye weik arye, si akuka kum nyanamlulume. Aning kum bukni, aminyan talak ara, tonok sum narye, ‘Winira nyaplulume,’ akunum nyapsinyopura, ara telebe, weik arye nyanamlulume. Narye nyapsinye talakuk nyanamlulume,” Yosua birye, Israel ninye sik nirya ati, nyabuk.


Yehuda yala nang, sik deiyoknye Zedekia birye, amutuku taleamuk talak noutam bukni, keting tamun toupne barye bukni, wala tagu barye kibuk. Tonda awala noutamak ara, tagu barye sum arye, Babel mutuku ninye deiyoknye birye, Yerusalem mutuku olyayik. Babel weik deiyoknye, el si Nebukadnesar ap, el yin talin nang nirya ap arye, ‘Yerusalem mutuku nang opnamap’ tenen, yayikce Yerusalem mutuku yanuka warikik. Warikikce, Nebukadnesar ap, el mapu ap, nirya arye, Yerusalem mutuku dam bukni, buru tam sik tenda cang kain aik dopmekce aunmek. Tonda, amutuku aik dana-dana nirya weik cang keil poka antanap dongobuka domik ning dam, tuku weik arye, palibuka poka dam tuku welebuka deilinmek.


‘Sik amutuku-amutuku noutam nirya, daunyak yala yuk-yuk nang nirya kekenamak’ tenen, yupu boyanuka nyanamlyame. Ara, sik Yerusalem mutuku unyak nang ap, tonda sik Yudea tam unyak nang nirya ap, anggun kanye moubuka unamlulume. Anggun mal olan nang ara, pia pera mutuku arye, anggun nirya ona ati yanganmak talak ara, akunum dam upmal atia.


Ninye yupa weik, laut mek lilun kum bukni, Tirus mutuku lu tam, weik asik dobuka ululum nang nirya ara, opdanamak talak arye, ninye weik obikceba, dipnamlume. Anggun mal olan nang arye, amutuku antanap dongobuka, dolulum cang poka dam ara, tuku palibuka deibikirye, aning deice welebikirye, parang ya ap, mal ap arye opnamsiake. Tonda, weik keil poka domlum ning babye, tuku palibuka erepdeibikirye, aning arye welebuka, anggun kilmapu opnamsiake. Tonda, sik Babel mutuku yin talin nang arye, ‘Mal dobikceba, taramak biksilyakʼ tenen, lelin ning, el si ara perisai kintibikirye, ongopnamaka ati, anggun Tirus nang arye, mal dopmunya babye, kum biknamle.


Ati, na Allah arye, mutuku si Raba mutuku poka domika ap, weik cang poka dobuka antanap dongobik ning ap, uku dopkwetepniba, diplirye kum danamle. Tonda, sik Raba mutuku nang arye, ‘Nun olan ninye arye yanuka opsicak’ tenen, weik keil poka dobuka, antanap dongamik ning nirya ara, uku dopkwetepniba, sikce domik aik nirya, uku arye dipnamle. Winibuka aninye opnamne talak ara, mal olan talak, weik lelim nyalamle touk, nyanmaliba kekepnamake. Tonda, mal olan talak ara, like tonok uku buk dingaplirye, dilamle touk winipnamle. Tonda, weik kumanya mikip arye dopliba, aik ap, aning-aning nirya ap, ulubuka, sirya daklamle touk winipnamle.


Narye anggunti, kanye imun weik ning arepsinyopura, anggunce talibuka ululum mutuku nang bokuka, winilye uplyopura, ton ning sepertiga ton, kanye imun weik uk yalanye yalirye, anggunti talibuka dinmasilya ani, ninye weik toun arye dipnamlume. Tonda, aning atonun, kanye imun weik din patana ton, anggun Yerusalem mutuku noutam yaliba, din kum daliba, din ning ton dina kumce, talye daunamluma deice arye, anggun kan-kan ara, ninye pia weik ton ap dipnamake. Aning atonun ton, anggun aumunye nang noutam bukni, sepertiga nang ton, sik mutuku batakuka, cang weik keil poka domlum ning, bai tam unamlum nang ara, sik yu yin talin nang arye, yu weik parang ya dobuka yakirye, anggunak sekuka oplopnamsiyake. Tonda, aning atonun, anggun amutuku ululum nang kan-kan arye bokuka, sepertiga nang ara, ‘Ninye arye opsikcakʼ tenen, Yerusalem mutuku batakuka, bai sakuka, dana-dana tam bikbik abuka binamak nang babye, sik mal olan nang arye, ‘Anang opnamakʼ tenen, bikbik abuka dobolbikirye, sik dam yanuka, yu parang ya arye, sekuka opnamake. Ara, kumanya dana-dana tam arye dolamle touk, narye sik wenena ati, mutuku sirya, dana-dana tam nirya ara, yakuka dopkwetepnamsin bukni, anggun mal olan nang arye, adopkwetepnamne nang nirya ati, yu parang ya boyanuka dobolbikirye, anggun Israel nang weik tonun opnamsiyake.


Akunum oplopsicopura, narye anggunti, yu weik upnilyopura, kum danamle. Narye anggun malye ululum ning ati, kanye imun weik wenen ning akunum arepsiniba, ninye weik akunum opnyopura, wini talak yu weik upnilyopura, aminyan talak kum daniliba, na kanye lopnamnile. Bukni, na yu weik upmanilya deice arye, sik tibuk, akunum wenebuka opnyopura, adeice arye, sik moubuka biknamake. Aning nirya akunum winipnyopura, anggun Yerusalem mutuku ululum nang arye, nati utenepnamnulume. Ara, ‘Se, elda Allah Yahweh, aning-aning talibuka, pia mikip weiknye birye, deiyok kum uamukba wenepsuka kuma. Deiyok ara, nun bidamnye malye ulamupu ning ati, yu weik ulamuka deice arye wenepsuke. Wenepsuka deiyok ara, elce, ‘Se, sikda yata deiyok ati, malye-malye unyak do?’ tenepsukce, kanye imun kanye bobukce, wenena weik ning dobuka, nun deice uk deipsukeʼ tenen, anggunce moubuka bikinamlume.


Swiv nou:

Piblisite


Piblisite