Yehezkiel 20:46 - Eipomek

⁴⁶ Allah Yahweh arye nyapnuk. Se Yehezkiel anda, ninye sirika arye deipkiknye ulyame. Anda an nong tamubuka iknapye tam, arah selatan dinulyame. Winipmince, sik iknapye tam, arah selatan unyak nang ati, na nyapnukin yupu dobuka, weik yupu deice arye nyapnulyame. Ara, aminyan winipnamle ning ati, lak nyapnulyame. Tonda, mek mitik uamuk mutuku, el si Negeb mutuku noutam unyak nang ati, na wenen yupu bobuka, lak nyapnulyame.

Yehezkiel 20:46 Referans Kwoze

Amos 7:16

Nyabukce, ayupu ton dukdongobuka nyabuk. “Allah arye wipdeipnukce, ‘Israel ninye ati laka nyalbilyame,’ nyapdeipnuke. Ati, Allah Yahweh arye, anggunti nyapdeipsuk yupu ara, moubuka kekenamlulume. Ara, ance nati, ‘Nun Israel ninye dam ara, Allah arye nyapmakil yupu laka nyana kume. Israel ninye sik wenena ati, aminyan talak ara, ikin ning sik nong deice yanamle ning ara, tuba tamubuka tonap laka nyana kume. Aning atonun, Isak birye deibukba, dadeipdanin yanganyak ninye, sik wenena ati, yupu ton kum laka nyapnamsilyame,’ nyapnuluma ati, nyapkine.” Amos birye, Amazia biti nyabuk.

Yehezkiel 21:2

Se, anda ninye arye deipkiknye ulyame. Ance Yerusalem mutuku domik tam dipdemince amutuku ati, wenen yupu nyapnulyame. Ara, narye sikti, ikin ning arepyeba, Israel nang ap, Israel nang dam unyak tam nirya ap, na si erena ati domik aik ap ati, sik wenena ati, malye kipdeipnamne. Winipnamne ati, yupu laka nyanamlyame. Aning ara, ance nyapnulyame. ‘Allah arye wenepnamsileʼ nyabuka, laka nyapnulyame. Winipminyeura, sik Israel mutuku noutam unyak nang nirya bikinamake.

Yeremia 13:19

Yudea tam bukni, iknapnye tam (arah selatan), el si Negeb mutuku noutam, weik asik domikce unyakak nirya ara, cang keil poka dobuka, bublan botopdeibikak ara, akunum tirikdongopmake. Deiyok ara, anggun mal olan nang arye, akunum yanuka antanap dongobuka warekmasiakce, onamasiaka atia. Ati, ‘Nun mal olan nang arye, obuka sirya daksicakʼ tenen, atirikdongopmak bisik bublan ara, tonoknye babye, amutuku binuka, sik weik bisik bublan kum kukdeiptue. Anggun mal olan nang arye, anggun Yehuda tam umunye nang nirya opsikirye, tapu koubuka, sik mutuku bobinuka deipnamsiake. Yuk lo mutuku noutamuk donoknamsiake. Amutuku noutam ululum nang nirya ara, adiparyuk bobuka, yuk lo mutuku uk, bobinuka donoknamsiake.

Mika 2:6

Ninye nirya arye, na nabi Mika biti nyaninyake. “Kume, ayupu ara, nun dam lak nyabuka peterena meme. ‘Aminyan talak, nun wenena ati, Allah arye ikin weik ning, nun nong deice delinamsile,’ nyabuka peterena bataklyame. Ayupu atonun yupu nirya ara, nun dam tuba laka nyabuka, nukna meme. Ance peteresimince, anyasilyam ning nirya ara, dipkoprop, nun dam pia kum yanamsile. Ikin ning, nun dam weik kum upnamsile. Akanye imun ning nirya ara, nun dam kum upsiliba, nunce alye kum unamsile. Anyasilyam ning ara, kum winipmanto,” nyaninyake.

Yehezkiel 6:2

Se, Yehezkiel anda ninye koprop arye, deipkiknye ulyame. An urasin erepmince, Israel mutuku noutam bukuk mutuku-mutuku dupak dipdemince, narye aminyan arye winipnamne ning ati, lak nyapnukine. Ara narye, ‘Sik amutuku unyak nang arye, malye weik ulamikce, tuba malye unyaka anya arye, narye sik wenena ati, kanye imun weik ning dobuka, amutuku deice deipnamne,’ nyapdeipne yupu ara, sik kekena ati, lak nyalbinulyame. Ance nyapnalam yupu ara, anyapnukine.

Yehezkiel 4:7

“Tuku arye, pinibuka memelamak keil deice, Yerusalem mutuku asik donyaka ara, yin talin nang arye wariknamak talak urasin atonun kibuka deipnamle. Ara, gambar kintinibuka deipnamak tam dinulyame. Winipminyopura, yin talin nang arye, ‘Ninye olbinuyap’ tenen, sik taruk deice, ongolamak ning nirya batakikirye, kintinilamak touk, an babye, an taruk deice ongolayam baju kwiribuka bataknalyame. Winipminyopura, narye sik amutuku nang nirya, sik wenena ati winipnamne ning ara, min kum winipmanye talak bukni anda, ‘Allah arye winibuka-winibuka wenepnamsileʼ nyabuka, lak nyapdeipnalame.”

Yeremia 22:7

Na nyapmasin yupu yanipmunyopura, na Allah arye, anggun on nang kintinibuka dopdeipniba, sikce amutuku yanuka, malye kibuka, sice buklopnamake. Aning-aning nirya, dam sukum pia telebak ara, yanuka dakuka bataknamake. Ara, kapak ya boyakirye, Libanon mutuku noutam arye, pia urasin teleb kurun yo webikirye, uku dongonamake. Mince anggunda, ‘Kume, apia teleb yo boyabirye, ‘Urasin pia teleb aik dopnamabe,’ teneplum ning nirya ara, webikirye, uku dapnamake.

Yesaya 30:6

Allah arye nyabuk. “Na Allah arye anggun Yehuda yala ninye arye, dekna weik ning unta basam deice arye, libuka bobilum ning ati nyapnusine. Anggun dekna weik ning libuka, unta basam deice deiplumce, mek pia kumak Negeb mutuku noutam bamunye talak ara, ikin ning ap, imun kanye bon ning ap, ayala-ayala nirya usulule. Ara, amutuku noutam ara, bai singa kus yim ning ap, kil ning ap, weik unyake. Tonda, ninye on kwatima, el si ara kobum kwatima ap, yuk yu weik kwatima ton ninye ona ati, bikbik abuka kaplibalamle kwatima ap unyake. Amalye ning weik aupmalebuk, ‘Mesir mutuku ninye dekelbinamap’ tenen, anggunce sik dekna weik ning nirya, dobuka keledai basam ap, unta basam ap, balye deice deibuka bobalulume. Aning winilulum bukni, aninye ara anggunti kum melipmanto ninye unyake.

Ayub 29:22

Na yupu akunum nyapne talak ara, sik yuk nang arye ton, yupu tabakuka kum nyalamik. Na nyalamse yupu ara, sik deice ara, mok purye saklamle atonye ulamse. Sikda teleb kanye bobuka kekenauk ulamik.

Ulangan 32:2

Na peterepnusin yupu ara, weik melinamsila anya arye, mok purwu saklamla atonun upnamsile. Tonda, kurye dei saklirye, maning deice palilamla atonun upnamsile. Tonda, winiryuk koupmakce maning tuku deice, mok purwu saklamla atonun upnamsile. Tonda, na peterepnusin yupu ara, winipnamsile. Winipmanto ara, din yala kouamikiba, mok weika arye cepliba, aning bongoplirye, pabuka duk teleb moulamle touk, na peterepnusin yupu ara, melinamsile.

Yehezkiel 20:45

Ura, aminyan talak ara, Allah Yahweh arye, na Yehezkiel dam yanuka nyapnuk yupu ton ani.

Yehezkiel 21:4

Ara, talye ati kum nyapsine. Kume, Israel mutuku unyak nang nirya kan-kan arye, malye wininyak nang babye, diksukum kibuka, teleb wininyak nang babye, weika arye opnamne. Winipnamne ati, na ninye on parang ya dopropnirye, dabu tam (arah utara) unyak nang arye dipdongobuka, iknapye mutuku tam (arah selatan) unyak nang nirya ara, opnirye sirya daknamne.

Yehezkiel 11:4

Abitinye nang arye, amutuku nang kekenmacak arye, talye yupu nyaruraka ati ara, na Allah arye aminyan talak, amutuku nang ati, ikin weik ning arepnamaka ara, wenen yupu nyapdeipkin yupu nirya ara, ance kekepmince, amutuku nang ati, lak nyalbinulyame. Yeheskiel anda ninye sirika arye, deipkiknye ulyama ati, ance atalye yupu nyarurak nang ati, wenen yupu lak nyapnamlyame,” nyamnuk.