Nyapse bukni, wini talak, sik wel nang arye winilamik. Sik atalak wel Israel nang nirya arye, aweik kata mutuku noutam, padang pasir mutuku noutam arye, tuba ulamik talak nirya ara, ‘Allah nyapsilye yupu, nun like,’ tenelamikce, na yupu moubuka kekena kumce, yaniltanauk ulamik. Tonda narye, “Aning ara, winina teleb ning, aning ara, winina malye ning,” nyapdeipse yupu nirya ap, “Anggun nirya arye, ayupu moubuka taliplumak arye, moubuka tenipmunya deice arye, anggun pia kam tuba unamlume,’ nyapdeiamse yupu nirya ap ara, batakanauk ulamik. Tonda, narye, “Amambul sum, Sabat sum noutam ara, talye pil dona kumce, dikdik sebuka, na siuk erenamnulume,” nyapdeipse sum ati ara, ‘Aning ara, mambul weik,’ tenena kumce, asum noutam arye, malye pia weik winilamikce, malye ulalamik. Malye weik ulamika ati ara, narye, ‘Ura akunuma, akata mutuku noutam aryuk, sik malye winin ning ati, yu weik upnilye ning ara, sik nong deice deipnirye, sikti, weik tonun wenebuka oplopnirye, sirya daknamne,’ tenipsirye, akunum kintinipse.
Yehezkiel 20:13 - Eipomek13 Aning-aning nirya nyapdeipse bukni, sik Israel nang nirya ara, aweik kata mutuku noutam, padang pasir mutuku noutam arye balamik talak nirya ara, ‘Allah nyasilye yupu, nun like,’ tenelamikce, na yupu moubuka kekena kumce, yaniltanauk ulamik. Tonda narye, “Aning ara, winina teleb ning, aning ara, winina mem ning,” nyapdeipse yupu nirya ara, “Anggun nirya arye, ayupu moubuka taliplumakarye, moubuka tenipmunya deice arye, anggun pia kam tuba unamlume,” nyapdeiamse yupu nirya ara, batakanauk ulamik. Tonda, narye, “Amambul sum, Sabat sum noutam ara, talye pil dona kumce, dikdik sebuka, na siuk erenamnulume,” nyapdeipse sum ati ara, ‘Aning ara, mambul weik,’ tenena kumce, asum noutam arye, malye pia weik ulamikce, malye winilamik. Malye weik winilamik ati ara, narye, ‘Ura akunuma, apata mutuku noutam aryuk, anggun malye winin ning ati, yu weik usilye ning ara, sik nong deice deipnirye, sikti, weik tonun wenebuka oplopnirye, sirya daknamne,’ tenipsirye, akunum kintinipse. Gade chapit la |
Yehezkiel 20:13
43 Referans Kwoze
Ayupu nirya, mikip arye nyapse bukni, sikce na nyapse yupu kekena pia kumce, ‘Allah arye nyapsilye yupu kum wininamabeʼ tenen, nati bataknike. Winipnyopura, anggun kan-kan noutam arye, tonoknye babye, sikce si erelamik isa si, patung-patung pia malye winilamik ning ara, kum batikik. Tonda, sikce, ‘Aisa si erenamapʼ tenen, kanye deibuka, delilamik patung-patung nirya babye, pia kum batakamik. Sikce Mesir mutuku noutam ulamik talak arye, isa mer si erelamik ning, el si berhala-hala nirya ara, kum batakamik. Atalye ning kum batakamika ati, narye, ‘Ura, sik Mesir mutuku noutam tuba unmak talak ara, narye sik Israel yala nang wenebuka, pia ikin ning, sik nong deice deipnamne. Sik malye wininyak ning ati, na yu weik unilye ning ara, sik nong deice deipnirye, sikti, weik tonun wenepnamne,’ tenipsirye kintinip deiamse.
Ara talye ati kume. Aning nyapsa deiyok ara, ani. Sik Israel nang nirya ara, ‘Allah arye nyasilye yupu ara, nun like,’ tenelamikce, na yupu moubuka kekena kumce, yaniltanauk ulamike. Tonda narye, “Aning ara, winina teleb ning, aning ara winina mem ning,” nyapdeipse yupu ap, “Anggun nirya arye, ayupu moubuka taliplumak arye, moubuka tenipmunya deice arye, anggun pia kam tuba unamlume,” nyapdeiamse yupu nirya ara, bataklamik. Tonda, narye, “Amambul sum, Sabat sum noutam ara, talye pil dona kumce, dikdik sebuka, na siuk erenamnulume,” nyapdeipse sum ati ara, ‘Aning mambul weik,’ tenena kumce, asum noutam arye, pia malye weik winilamikce, malye ulamik. Tonda, anggun apu yapu arye, talye ning ati, si erelamik isa si eren ning, patung-patung dobuka, si erelamik ning atibuk, sik babye, ‘Aisa aryuk melipnamsiakʼ tenen, dilamikce, aning siuk erelamik.
Tonda, aning atonun, sik ninye asik nang babye, sik kan-kan ara, ton nang arye, ‘Allah Yahweh ati, diba tenepnarye, el ap, el mapu ap, sik tam yanuka kipnyopura, sik ap neika unamne,’ nyaplinye birye, elda na tenenanya akunum ulule. Sik anang arye, ‘Kume, nunda Allah el tam akunum yanuka unamaba ati, nunce Allah ati, diba tenebuka, kanye deibikirye, el amu tam piluk donamabe. Tonda nunce, ‘Kume, Allah arye arepsuk Sabat sum deice arye, talye pil dona kum aryuk, el si erenamnyabe,’ tenena ap, tonda Allah arye, ‘Aning ara, wininamlume, aning ara, kum wininamlume. Na kanye delinun ning ara, ani. Teleb winin ning ara ani,’ nyapsuk ati, aninguk talibuka unamak ning ap, tonda Allah arye, ‘Anggunda winipmunyeura, narye aning-aning ton tamubuka arenamsine,’ nyabuka, nyalin yupu deice arye nyapdeiamsuk ning nirya, moubuka talibibirye, unamabe,’ nyabikirye, aninguk wininyak ninye ara, narye sikti, pia teleb kipdeipnamne.
Anggunce na dam malye-malye yupu nyalulum kili sal ara, mok cena kum ati, ninye kum unyak mutuku noutamak dipnamlume. Winipmunyeba, anggun nong amutuku dipmunyeba, lyupnamsile. Ara, sik umur 20 sekdongobuka eitam ulamik nang, anirya dipnamake. Keting tamun umur 20 anyapce, outam kili sal uk ara, tuba kam unamake nyapne.
Ara, ‘Allah arye melipnamsilʼ tenen, kel biknamak’ tenen, Mesir mutuku noutamak ulamik talak ap, mek kum ati ninye kum ulamik mutuku noutamak ap, narye sirya dakne pil ap, ninye winipmanto kum pil dolamse ning ap, na dirina arelamse ning ap, sik asing koproba arye elilamik nang bukni, kum dib tenenyak kili sal nirya ara, wenebuka opnamne. Na mambul ning elilamik bukni, dib kum tenenyak ati ara, anang ara tonok ton kum bataknamne. Sik nirya wenebuka opneba dipnamake. Deiyok ara, sikce nati yanilamnikce, ‘Allah bira dipkoprob mikip weiknye ulul do, dib ulul do, kum do?’ tenen, teniltolamnike. Ila tuba tonap tagu barye (10) kali deice arye yaniplopnikce, winilelamnike ati nyapne.
“Ati ara, anda na dam batakuka yuk mutuku binamlyame. Amalye wininmak ninye ati, na yu weik upnile. Ati, ‘Anang nirya obuka sirya daknune,’ tenenmane. Amalye ninye obuka, sirya daknaman bukni, Musa anda, mapu deipminba, dadeipdanin, balamikca ani, deipnamak ninye ara, weik kipra balamlya ani, kum nukmanto unamake. Narye anti teleb kipdeipkiniba, telebuk unamlyame,” Allah arye Musa biti nyabuk.
Allah Yahweh arye, ayupu ton dukdongobuka nyabukba, Amos birye kekebuk. “Sik Yehuda yala ninye arye, tuba-tuba weik arye malye wininyaka ati, dipkoprob narye, sik amutuku unyak ninye ati, wenebuka opnamne. Sik malye ulamik ning namin kiamsirye, adiparyuk wenebuka kum omse bukni, wini talak ara, sik malye winin ning weik wininyaka ati, aninye ara, opnamne. Aninye ati opnamne ning ara, pia dipkoprob kum bataknamne. Deiyok ara, sik Yehuda yala ninye ara, na Allah Yahweh arye, ‘Aning wininamlulume. Aning ara, kum wininamlulume,’ nyapdeiamse yupu nirya, batakuka yanilamikce, sikda asum-asum nirya, akunum pia malyeuk wininyake. Narye, nyapdeiamse yupu nirya ara, ‘Nun lik’ tenen, batakanauk ululuma ati, dipkoprob narye wenebuka opnamsine. Ara, talye ati kume. Sik deipkirikdop nang, si erelamik ning kwemdina ap, ninye arye puturubuka delinyak ning anyuk, si erenyaka deice arye, tilila yupu uk kekebuka talinyake. Na Allah arye nyapdeiamse ning ton kum tenekirye, malye winin ninguk tenenyaka ati, Yehuda yala ninye nirya wenebuka opnamne.
Narye, “Apia teleb mutuku kum binamlume,” nyapse deiyok ara, ani. Ara, sik Israel nang nirya arye, ‘Allah nyasilye yupu, nun lik,’ tenelamikce, na yupu moubuka kekena kumce, yaniltanauk ulamnike. Tonda narye, “Aning winina ara, teleb ning, aning winina ara, pia mem ning. Anggun nirya arye, ayupu moubuka talipmunce, moubuka tenipmunya deice arye, anggun pia kam tuba unamlume,” nyapdeiamse yupu nirya ara, batakanauk ulamik. Tonda, narye, “Amambul sum, Sabat sum noutam ara, talye pil dona kumce, dikdik sebuka, na siuk erenamnulume,” nyapdeipse sum ati ara, sikce, ‘Aning ara, mambul weik,’ tenena kumce, asum noutam arye, malye pia weik winilamikce, malye ulamik. Winilamika deiyok ara, sik kanye talima noutam ara, talye ning isa si erenauk tenelamikce, aning atibuk, kanye deibuka, malye weik winilamika atia.
Yata ninye do nirya, yuk pia weik kel bikamik nang arye, sikti, “Teleb una ara ani, malye una ara ani,” nyabuka lipsisikuka teleb yupu nyabikiba, ayupu kekena kumce, ‘Kume, lipsisikuka nyan yupu ap, wenen yupu ap ara, nun like,’ tenebikirye, batakanyak ninye ara, aminyan talak, sik dam anyuk ikin ning weik yaliba dopdobikirye, ikin kanye bobuka unamake. Bukni, dan ninye do nirya, wenen yupu ap, lipsisikuka peteren yupu ap ati, ‘Kume ayupu ara, nun dam peterenamsulume,’ nyabuka pia weik kel bikna ning patalibuk, unyak ninye ara, telebuk upre banamake. Sikce, ‘Aning wininamabe, apil ara donamabe’ tenen, piribuka donamak ning ara, nong upnamle.
“Yata deiyok ati, na nyapdeiamkise yupu ati, yu upkukce, na yupu yaniplobuka, na dam pia malye winipmom do? Awinipmalam ning nirya ara, na kanye ara, ‘Aning ara, pia malye,’ tenekunune. Aninguk kum bukni, tonda winiplume, Het yalanye Uria ton, ance nyaplumba, sik Amon yala yin talin nang arye, Uria obikba dibuk. Ance nyapluma deice arye, anye bira obikopura, anda Uria, el kil ubula doplume.
Nyabukabukce, ayupu ton nyabuk. “Aning nyapmasina ara, talye ati kume. Na kele, anggunda ilil pia kum nang weik ap, ninye deiyok nang, yupu kekena kum ap ninye ululume. Tonda, na kam ulamne talak arye, anggun talilamse talak babye, anggun ni koproba Allah, el si Yahweh ati, malya kibuka el yupu kekena kumce, yanilamlume. Ati ara, na kele, na akunum dipnyopura, atalak babye, pia weika arye tonap, ilil pia kum nang kibuka, malye weik wininamlume.
“Anggun bitinye ati derepmasiyak ninye ara, sik Israel yala ninye dam arye, an ap, Harun ap, minop kisikdakuka, yukak binuka unamdurume. Sik aninye nirya ara, bulupmakce wekmakak aryuk, yanuka opnune. Like tonok aryuk, malye ninye nirya opniba, kum unamake,” nyabuk. Nyabukba, Musa ap, Harun ap ayupu kekepdikce, tuku deice sakuka malbirikce, kisok tuku tam kanupdongobuka, Allah ati moropdik.
Deiyok ara, na mapu, na ‘Naʼ tenen nang nirya ara, narye nyapdeipse yupu nirya ara, moubuka kum kekelamikirye, yanilamikce, malye winilamik ning ap, narye, “Aning talipmunyakarye, winibuka unamlulume,” nyapdeipse ning ara, sikce, ‘Kume, ayupu nirya ara, nun like. Aning kum wininamabe,’ tenelamik ning ap ati ara, ikin ning, sik nong deice delilamikce, sik taleamik mutuku dobuka, yuk mutuku nang ati areamse. Winipsa ati, amutuku nirya ara, Sabat sum deice, dikdik sena atonun unamle. Anggun apu yapu arye, amutuku nirya taleamik talak noutam ara, Sabat sum deice, dikdik sena atonun una ati, keting tamun ton, kum arelamik ati, wini talak ara, yuk mutuku nang arye, sik biti obuka, sirya dakikce, yuk pera mutuku delilbalamikba, yuk pera mutuku noutamuk unyaka ati, atalak ara, narye arenamsise mutuku ara, dikdik sena atonun keting tamun una ati, talye louk upnamle. Talya daunamle. Israel nang, sik malye winilamikce ning dekna ati ara, yuk pera mutuku noutam unamake. Atalak ara, malye kanye bobikirye, nati, “Naio melibuka lyepsilyame,” nyabuka, moropnamniak do, kum do, dinauk unamne.
Tonda, narye anggunti, “Aning ara, winipnamlume,” nyapdeipsise yupu ap, “Aning, aninguk, teleb kibuka wininamlume,” nyapsise yupu ap, kum talipmunce, narye, “Winibuka, winibuka, wininamlume,” nyapdeipse ning nirya ati, ‘Nun like,’ tenepmunce, na yupu yanibuka, malye kipmunyopura, dipkoprob wenepnamsine. Aning atonun, narye, “Wininamlume. Winipmunyopura, narye anggunti, winibuka melinamsine,” nyalin yupu deice nyapsise yupu ton, kekena kum arye, ayupu ati yaniplopmunyopura, dipkoprob wenepnamsine.
“Narye, ‘Aning ara wininamlulume, aning ara kum wininamlulume,’ nyabuka nyalamse yupu ara, sikce akunum batakuka, yuk bisik akunum banmaka anya arye, na nyamse touk kum winibikirye, sik dem aryuk, sapi basam urasin atonun ning, emas arye memebuka, aning si erenmakce, aning ati si erebuka, kam ning obuka aning ati arenmake.” Allah arye nyabuk.
Minop talak Musa birye, nyabuk. ‘Allah arye, “Aning ara wininamlulume, aning ara kum wininamlulume,” nyabuka mem yupu arepsuk ning moubuka kekeplirye, dobolbalinye bira, kam pia unamle. Yatanye do nirya, amem yupu moubuka talilirye, dobolbalya deice, Allah arye anye biti, “Elda diksukum ulule,” nyabuka teleb ulinamle, Musa birye nyabuk.’ (Imamat 18:5)
Ton ap ayupu ton nyapsine. Anggunda, na amu tam unmunce, narye anggunti, “Aning wininamlume. Aning ara, pia kum wininamlume,” nyapdeipsise yupu, aninguk moubuka talipmunyakarye, aninguk wininamlume. Anggunce anyapmasin yupu nirya, kekebuka wininmunce, aninguk talibuka umunyopura, anggun teleb kibuka unamlume. Anggun unamlumak nirya ara, telebuk unamlume. Nara Allah Yahweh arye, ayupu nyapdeipsine.
Anggun apu yapu nang, malye ulamik touk winina kume. Tonda, yuk Israel yala nang arye anggun ni Allah Yahweh arye, ‘'Winipnamlulume, aning ara, pia kum winamlume,” nyapdeiamuk yupu, moubuka kum talibuka ulamik. Sik malye ulamik touk, anggun babye winina kume. Allah arye anang wenena ati, weik kanye imun ning, sik deice deibukba, ikin weik ulamikba, yuk nang nirya eibikce, ‘Se aning ara, pia ikin weik unyakeʼ tenen, mambul kanye tenelamikce, lukulana uk ulamik. Anggun wini talak ululum nang babye, aning akunum eiplum ati, anggun babye winina pia meme.
Bukni, anggun apu yapu arye, na nyalamse yupu kekebuka, kum dobolbalamik. Narye nyapdeiamse touk, kum winilamik. Narye nyalamse yupu talibuka, yangalamting toura, pia telebuk winipnin yangalamting bukni, sikce sik bidamang kanye tenepman touk, winipnin yangalamik. Sikda pia mandipna kanye dobuka, kekena kumce, kat kanya bon nang winilamikce, malye-malyeuk winipnin yangalamik. ‘Sik anang ara, telebuk wininamak,’ tenelamse bukni, tuba tamubuka, malye winin ninguk tenelamikce, malye winin ninguk talibuka, malye winipnin yangalamik. Aminyan teleb upnamle ninguk tenipting bukni, aning batakuka minop talak malye ninguk winipnin yangalamik. Winibuka winilamika ati, aminyan talakuk, “Aning wininamlulume. Aning ara, pia kum wininamlume,” nyabuka, mem yupu ton tabakuka, sik deice deiamse.
Israel nang bobuka, padang pasir noutam delilbisopura, naryuk sikti, “Aning ara, wininamlume. Aning ara, pia kum wininamlume,” nyapsirye yupu arepse. Tonda aning atonun, narye, ‘Anggunda winipnamlume, winipnamlume. Aning talibuka umunyopura, narye melipsinyeba, teleb kibuka, tuba kam unamlume,’ nyapdeipse yupu, ton lak kipdeipse.
Utenebuka kintinipse bukni, atenepse ning nirya ara, kum kipsirye, batakse. Ara, ‘Na si malye kipdakcakʼ tenen, batakse. Aning nirya batakse deiyok ara, ani. Ara, ‘Kume, ‘Naʼ tenen, nang ati, yu weik arye wenepnyopura, sik Mesir mutuku noutam, neika unyak nang ap, amutuku dana-dana unyak nang nirya ap, aning eibikirye, na si malye-malye nyapnikirye, nalipnamnicakʼ tenen, batakamse. Mesir mutuku nang ap, amutuku dana-dana tam ulamik nang ap ara, narye ‘Naʼ tenen, nang, sik Israel nang lopdeipnirye, Mesir mutuku noutam arye dobuka, bobinirye, teleb kibuka lyepdeipnamne ning ara, eibikca deice arye, ‘Se, Allah ara dipkoprob mambul weiknye ululeʼ tenebikirye, nati biknamniakʼ tenen, batakse.
Aning ara, narye anggun apu yapu nang arye, malye ulamik ning ati, Mesir mutuku dam bukni, ninye kumak, weik pata mutuku ulamik ati, Sinai mutuku noutam, anggun ninye yupu lipsisikuka bokeipsise touk, annggun atibuk, yupu bokdeipsinirye, wenepnamsine. Nara, Allah Yahweh, aning-aning nirya talibuka, deice tam erebuka, Pia Mikip Weik Deiyoknye ununye birye nyapsine ati, aning nirya ara, dipkoprob nong upnamle nyapsine.
Tonda, na Allah, si erena ati, teleb kibuka kintinip deipse ning, ‘Naʼ tenen, ning nirya ara, anggunce, ‘Kume, aning ara, mambul kume, talye ning uka,ʼ teneplumce, aning moubuka kum taliplumce, nati si kum erelulume. Tonda, na Allah arye, ‘Asum ara, talye pil dona kum aryuk, na si erena ati, dikdik senamlume,’ nyapdeipsise bukni, na si ren sum,’ nyabuka, wipdipse sum, Sabat sum babye, anggun dikdik sena kum aryuk, asum deice arye nati, kum si erenululume.
Musa birye Israel ninye ati, nyabuk. Anggunda, luba kina meme. Tuba teninamlulume. Mesir mutuku arye batakuka yangalalumce, ninye kum mutuku noutamak balalumce, Yordan mek dam yanuka, keting yangalamle tam, tuba ulalum talak nirya ara, malya kibuka malye-malye winilalumce, Allah el si Yahweh ati, malye kilalumba, anggunti lik ubukba, el yu weik ulamuk. Atalak ara, Musa birye, Yordan mek otam batakuka, Yordan mek koubuka, keting wekelbalamle tam, min kum binamlum tam ati, nyapne. Anggunce Allah el si Yahweh, el yupu yaniptabuka, malye ulamsuk buk, anggun kanye talima erelalumce, el yupu kum kekelalume.
Wininmeka ati, narye, ‘Yata deiyok ati, Sabat sum deice arye wininmak do?’ tenen, Yudea tam talibuka ninye deiyok nang ati yu upnukba, “Yata deiyok ati malye wininamlum do?” nyapse. “Anggun aninye wininamlum deice arye, pia malye-malye weik wininmalumce, Sabat sum yanibuka malye kipdeipmalume,” nyapse.