Narye, nyapniba, Nil mek nirya ara, cepdeipnamne. Winipnyopura, sik din mek ap, sik koulamak ning, mek dikilongon ning ap ara, kum kipnin banamle. Winiplyopura, sik din ning babye, kum kipnin banamle. Nil mek lilun noutam ulul wa tuku nirya ara, yu weik nang dopdeipniba, atuku nirya alubuka dopropnamake. Winipnirye, Mesir mutuku nirya ap, amutuku noutam unyak nang ap ara, malye weik kipdeipnyeba, Mesir mutuku nirya ara, malye weik upnamle. Nara, Allah Yahweh arye, ayupu nyapmasina anya arye, aning nirya ara, dipkoprob nong upnamlarya!
Yehezkiel 19:7 - Eipomek7 Ura, pia mikip yim singa kus ara, yu ubukba, yupu weik tonun nyanmok ning ara, anoutam ulamik nang nirya ara, kekebukabikce, ilil weik ulamik. Ara talye ati kuma. Asinga kus arye, amutuku-amutuku noutam nirya ara, ninye arye domik mikip keil asik ara, el si benteng-benteng donyak ning nirya ara, aninye deiyoknye birye, adiparyuk, sik keil arye dolamik aik ulubuka, weik asik akunum uluplobukba, amutuku-amutuku dana-dana tam, mitik tonun asik noutam ulamik nang babye, ‘Se’ tenen, ikin kanye bobuka ulamikba, anye birye, sik mitik asik babye, sirya obuka, ulultaknauk ulamukce, sice bultaklamuk. Ati ara, atam mutuku noutam ulamik nang nirya ara, ilil weik kibuka, sik yok sirem talilamuk. Gade chapit la |
Yehezkiel 19:7
14 Referans Kwoze
Allah el si Yahweh arye, nyapnukba nyapsine. Se, na mapu mutuku-mutuku nirya umunye ninye ara, anyapmasin yupu ara, moubuka kekeplulume. Ayupu kekepmunce, kel biknamlulume. Tonda, anggun tukwak im sirya, mutuku sirya, nirya noutamak ululum ninye babye, anggun ululum ning nirya ara, Allah Yahweh aning-aning nirya talibuka, deice tam im deice, Pia Mikip Weik Deiyoknye ulirye, pia telebakuk ululnye birye, disulula ati, anggun Israel yala ninye ap, Yehuda yala ninye ap arye, malye weik winilulum ning dekna ati, wenebuka opnamsila ati, Allah im deice arye nyasilye yupu nirya ara, moubuka kekenamlulume.
Allah el si Yahweh arye nyabuk. Nara, Allah Yahweh Pia Mikip Weik Deiyoknye unune. Narye aning-aning nirya talibuka, deice tam Weik Erenanye ununye birye, na si deice arye, pia dipkoprob nyapsine. Ara, anggun apu koprop Yakub birye, deiamukba, dadeipdanin yangalamikce, wini talak unyak Israel ninye arye utenenyake. ‘Nunda dipkoprob pia teleb ninye unyabe,’ tenekirye, sik talima erenyake. Wininyaka ati, na Allah arye pia yu weik unulule. Sik kanye erelanyaka ara, na like. Tonda sikce, ‘Nun mal olan nang wekuka, kum opnamsiyak’ tenen, weik cang keil poka ap, keil aik ap domik ning nirya babye, naryuk dinirye, yu unulule. Ati sik deiyok kibuka unyak mutuku ap, amutuku noutam unyak ning, ayala-yala nirya ap, amutuku noutam unyak ninye nirya ap ati, na Allah arye dopropnirye, sik mal olan nang taruk deiceuk deipnamne.
Sik mutuku noutam, deiyok kibuka talinyak nang arye, malye un nang ara, ani. Sik kanye aryuk, ‘Aning ara, winiptinye,’ tenenyak ninguk, sik Israel yala nang noutam ara, aninguk talye lubparabuka wininyake. Sik adeiyok nang ara, winipmanto, weik yu singa kus arye, el dina obuka, si tobuka boplirye, weik yupu nyalamle atonun unyake. Deiyok ara, sik Israel yala ninye deiyok nang arye, sik tam nang ton onyake. Oplobikirye, sik obikce nang arye talilamikce bona nirya ara, ubula alubuka dolonyake. Winibice deice arye sik obice nang domikce kilapu ara, youwakuk unyake.
Winipkilyopura, ance amutuku noutam tuba kam unyak Israel nang nirya ati, sik dam binuka, ayupu lak nyapnalyame. Ara, Allah Yahweh, pia deice tam erebuka, aning-aning nirya talibuka, Pia Mikip Weik Deiyoknye ulirye, sik Yerusalem mutuku, weik asik domika noutam tuba ululum nang ati, nyapsile. Ara, anggun anang nirya, din dinamlum talak nirya ara, ilil pia weik upsilyeba, anggun nong nirya sirem talinamsile. Atonun, anggun mek kwebuka dinamlum talak nirya ara, ‘Se, ikin weik ning, nun dam yanamsila ati, yata winiptibye do?’ tenen, kanye teniltonauk upsilyeba, anggun nong bol nirya ara, bol tililing apsilyeba, anggun nong nirya sirem talinamsile. Winipnamaka ara, talye ati kum bukni, deiyok ara ani. Ara, aminyan talak ara, sik unamak mutuku ap, amutuku noutam ulye ning ap nirya babye, pia malye unamle. Deiyok ara, wini talak sik mutuku noutam unyak nang nirya arye, pia yu weik uplirye, ‘Nun lik,’ tenelanauk ubikirye, pia tuba-tuba malye unamake. Wininamaka ati, ninye mal olana ap, walana ap, malye kililana ap, ubula dona ap, upnamaka deice arye, amutuku teleb ulye ning nirya ara, pia kum danamle.
Pia bona utotoa talina kum nang bukni, yuk ninye arye anang erepdeipnikiba, bona utoto talina kum nang arye, ninye deiyok nang kibikirye, amutuku nirya talinyak bukni, sikce sik amu tam ulamice, bona utotoa talina kum ninye ati, weik ikin ning sik nong deice deibikcopura, ara pia malye weik ulule. Winipmanto ara, mok ceplirye, ninye arye koulamak ning deice saklyopura, aning ayala-yala nirya ara teleb ubuka palule. Bukni, mikip weik mok celamlirye, weik arye saklyopura, ninye arye koulamak ning ayala-yala nirya ara, nirya oplobuka atu kilule. Bona utotoa talina kum ninye bukni, ninye deiyok ning talibikirye, sik amu tam bona utotoa talina kum ninye ati, ikin ning weik sik nong deice delilamak nang ara, aning atonun unyake. Sikda pia malyeuk ubuka unyake.
Tonda, ninye deiyoknye Raja, weik arye yu upliba wana ati, weik arye nyalul yupu ara, weik yu kus, el si ara singa arye, weik yupu nyapliba, ninye nirya ilil weik ulamle touk, ulule. Raja arye yu upliba, ninye talye lukparabuka olula ati nyapne. Bukni, ninye deiyoknye Raja arye, yuk nang ati kanye deiplyopura, winipmanto, mutmuta deice, mok dumduma sakmalirye, palipmaliba, teleb ulamle touk, winilule. Raja arye, el kanye delilul ninye ati, teleb kibuka melilula ati nyapne.
Asinga mi ton akunum nebukce, akunum wisi dayukura, el kwitcapu, yuk-yuk singa ap, neika nebik. Winibikopura, mikip akunum ulamik talak ara, sik din ning ati, yuk talye kam ulamuk ning, bai neika eipdanuka, dipnin balamik. Tonda, aninguk kum bukni, amikip weik wel ning ara, ninye babye, obuka dilamuk.
Asinga kus ara, yu weik ubukba, malye weik ulamuka ati, amutuku noutam antanapdongobuka, ulamik mutuku nang, dana-dana tam ulamik nang nirya arye, ayu singa kus atonun ulamuk ninye deiyoknye biti, warekuka tomobik. Ara, amutuku-amutuku nang nirya arye, ayu singa kus atonun ulamuknye tomona ati, cang tapu dopkwetebuka tomobik. Winibikopura, ikan youna, el si jaring, pia cang tapu dopkwetebuka, adiparyuk atapu dopkwetebuka, adiparyuk awel singa kus akunum tuku pum tam tomobik.
Atuku nirya ara, sik Israel mutuku talebuka unamaka deiyok nang arye talepnamake. Tonda narye, wipdeipneba, Israel nang nirya talebuka, unamaka deiyok nang arye, sik amu tam unamak nang, na mapu koproba ati, sik nong deice, ikin ning kum delinamake. Aning kum bukni, amutuku noutam weik tonun arelnunyeba, Israel yala nang arye, atuku talibikirye, talye mangkau asa teleb arye unamake. Sik ninye deiyok nang arye malye ton, kum kipdeipnamake.
Yoahas elce ninye deiyoknye kibuka, talipmok talak aryuk, Mesir mutuku ninye deiyok kibuka taleamuknye, Firaun Nekho, elce Yoahas tomobukabukce, Hamat mutuku noutam bukni, mutuku si Ribla mutuku noutam binuka, dobuka wenen aik pum tam deiamuk. Winibukopura, Mesir mutuku ninye deiyoknye, Firaun bira, Yehuda mutuku ulamik ninye ati, “Anggunda, na si erebuka kina ati ara, anggun dekna weik ning weik tonun, natibuk arepnamnulume,” nyapdeiamukce, sik deice ikin deiamukba, sik amutuku ulamik ninye nirya ara, aning dekna ati, arebik ning yupa ara, tiga ribu empat ratus (3.400) kilogram perak ap, tonda tiga puluh empat (34) kilogram emas ap, aning nirya boyanuka arebik.
Bukni, anda Raja Yoyakimo! An winiminye ning ara, pia urasin yuk ulule. Ance teniminya ara, ‘Kume, tilila yupu nyaptinya deice arye, aning-aning nirya ara, naryuk bona weik doproptinirye, bona talinanye uptinye,’ tenelyame. Tonda, ninye malye kum winipmakibuk, talye olyame. Winibuka ance talilyam mutuku nang nirya ati, sik deice ikin ning ap, yu weik ning ap, malye kililyame. Yuk daunyak nang ati, yaninauk winilyame!
Domba basam mitang ning ara, anggunce moubuka kum weimunce, tuba ton ap, mikip kum kipdeiplume. Tonda uk dinmalye domba basam, pia kum kwetelulume. Atonun, suse dilamle domba basam, moubuka el suse ara, moubuka kum kwetelulume. Tonda, saklyeba, yan cepliba, uk dilamle ning ara, yan cepmalye ning kitibuka, kum kwetelulume. Atonun ton, domba basam balirye, bisik kirikilul ning ara, anggunce, ‘Se, nun domba basam, dan sukum ulul do?’ tenen, dawangamlye ning ara, moubuka eibukapmunce, tamubuka kum boyangalulume. Tonda, domba basam tunim apmalye ning ara, ‘Dan sukum unmal do?’ tenen, pia kum elbalulume. Aning kum bukni, sik adomba basam nirya ara, yu deice ap, domba nong on deice ap, malye kanye bobuka unaryuk, adomba basam ati, malye ubuka weilulume.
Piblisite