Ara, talye ati kume. Nara, Ninye Mi Koprop Atonunye, na ni el urasin pia teleb ulirye, dirina weik ulya atonun, na babye atonun upyopura, Allah arye kwepdeibukba, el im deice pil don nang, malaikat ap, ansinibibyopura, tukwak yanamabe. Yanamap talak ara, tukwak ninye nirya wenebuka lipsisikuka bokeipnamne. Yata ninye do nirya, sik winilamikce ning atonun, narye moubuka dipdebuka nuknirye lipsisikuka bokeipnamne. Ara malye winin ninye ati wenebuka opnamne. Teleb winin ninye ati dekna ning arepnamne. Yesus arye awekmek nang ati nyabuk.
Yehezkiel 18:30 - Eipomek30 Ati ara, na Allah Yahweh, aning nirya talibuka, deice tam Pia Mikip Weik Erena Deiyoknye uninye birye, ‘Winipnamne,’ tenepnye touk, wininuna anya arye, narye nyapsine. Se, anggun Israel yala ninye nirya ati, narye yupu bokdeipsinirye, wenepnamsine. Narye dipdesinirye, anggun malye winilamunye ning aupmasilye touk, wenepnamsine. Diksukumuk winilamunye ning aupmasilye touk, teleb kipdeipnamsine. Yatanye do, yata kil do nirya, anggun winilamunye touk, yupu bokeipnamsine. Anggunda, ‘Se nun malye wininyap ning deice arye wenepsilirye, opsilyak’ tenen, anggun malye winilulum ning nirya ara, batakmunce, aminyan tamubuka, yuk teleb bisikuk binamlulume. Winipmanto ning ara, keil yan dum duklirye, opsilyopura, kote saklamak atonun, anggun malye winilulum ning dekna ati, ‘Wenepsinirye, opsinyak’ tenen, nyapsine. Gade chapit la |
Yehezkiel 18:30
44 Referans Kwoze
Yohanes peterelamuk ning ara, ani. “Anggun nirya, anggun kanye talima malye tenelulum ning ap, anggun malye winimunye ning ap batakuka, kanye dangupmunyeura, Allah arye amalye ning nirya kum daneiplirye, namin kipnamsile. Winipnamlum ning, ara Allah arye ninye weike lyeplirye, sik kanye talima talinamle talak, akunum dam upmala ati, anggun malye winimunye ning nirya bataknululume,” nyabuk.
Bukni, sik malyeuk unyak nang arye, ‘Se aning ara, malye ulula ati, bataknuyap’ tenen, bikikirye, sik malye winin ning batakikirye, diksukumuk winibicopura, kam pia unamake. Ara, na Allah arye nyapdeiamsise touk, ‘Aning wininamlulume. Aning ara, pia kum wininamlulume’ nyabuka, nyapdeiamse yupu talibikirye, dipkoprob teleb winin ninguk, winibicopura, aning ara, na eipnirye, yupu bokeipnamsine. Malye winilamik ning batakikce, diksukumuk wininyak ninye ara, kum wenepnamne. Sikda kam pia unamake.
Se, anggun Israel nang, wini talak ara, anggunti kum kipdeipnamsin talak ara, akunum dam uple. Ati, na Allah yu weik upnilyopura, anggun deice deipnamsine! Ati, narye, ‘Awinimunye ning ara, na pia lik ati, aning nirya ara, pia kum wininamlume,’ nyapdeiamsise ning bukni, anggunce talye kanye bobuka, malye winilulum ning ap, anggunce malye-malye winin ninguk weik winilamlum touk, dekna ati, yupu bokeipsinirye, weik tonun wenepnamsine.
Ati ara, anda Yeheskiel birye, sik Israel yala nang nirya ati, lak nyapnalam yupu ani. Anggun ni koproba Allah Yahweh, pia deice tam erebuka, aning-aning nirya talibuka Pia Mikip Weik Deiyoknye ulirye, anggunti nyapsile. Ara, anggun malye weik winilulum ning nirya ara, adiparyuk batakmunce, amnyok kanipdongobuka, tamubuka na damuk yanamlume. Winipmunce, anggun si erelulum isa ap, patung memebuka, deilulum ning ap, aning ati, pia malye weik winilulum ning, pia weik tonun talye winilulum ning nirya ara, adiparyuk batakmunce, na dam tamubuka yanganamlume.
Aning ara, Musa sekamuk buku noutamak arye, “Anggunda, malyeuk tuba winipmunyopura, dipkoprob weik kanye imun ning dopropnamlume,” nyapdeiamlumba sekamuk. Ayupu nyapdeiamsulum touk, wini talak ara, Allah ance nun wenena ati, ikin ning, nun deice delinmasilame. Wininmasilambuk, nunce nun ni koproba Allah, an Yahweh ati, ‘Diba aning ara, nun bidamang malye winilamupa dekna ati, ikin ning dopropmabe,’ tenena kumce, tamubuka an dam malyeuk updeipkupu. Ara, nunce, ‘Nun malye wininyap ning nirya ara, batakibirye, Allah el dipkoprob yupu uk talipnamabe,’ kum tenebupe. Tonda, Allah ance, ‘Aning ara, wininamlulume. Aning ara, pia kum wininamlulume,’ nyapsulum ning ara, moubuka kum talibupu.
Winipnamle bukni, sik Israel mutuku noutam unyak nang arye, ayupu nyanyake. “Kume, Allah Yahweh, elce yupu bokeipsilirye, wenebuka osulul ning ara, teleb winin ning kume. Nun tenenyaba atonun ning, kum winisulule,” nyaninyake. Ati, na Allah arye, anggun Israel nang nirya ati, anggun winilamlum touk, moubuka dipdenirye, yupu bokeipnirye, wenepnamsine.
Nyapminyopura, an Yeheskiel birye, sikti, ayupu ton tabakuka nyapnalame. “Na Allah ara, dipkoprob pia kam unune. Aning ara, dip ulamle touk, adeice arye, adipkoprop yupu ton nyapsine. Na Allah Yahweh, aning-aning nirya talibuka, deice tam erebuka, mikip weik ununye birye nyapsine. Sik malye wininyak nang ara, sik tuba malyeuk unyak talak aryuk, dekenyak nang ara, na kanye kum delinune. Kanye teleb unulul ning ara, ‘Sik malye unyak nang arye, sik malye winin ning ara, bataktingirye, tamubuka na dam yakirye, teleb aryuk ubikirye, kam unamakʼ tenen, kanye deibuka teninune. Ati ara, “Se, anggun Israel yala nango, anggun tuba malye winilulum ning ara, adiparyuk batakmunce, tamubuka na damuk yalulume! Yata ning deiyok ati, malye winipmunye deice aryuk, anggunda dipnamlum do?” nyabuka laka nyapnalame.
Ayupu nirya ara, urdem ati kum nyapsine. Nun tukwak ninye nirya arye, pil donyap ning ap, tenebuka duknunyap ning aning-aning nirya ap ati, Allah eipsilirye, kel kisulula anya arye, aning nirya ati wenebuka yupu lipsisikuka bokeipnamsile. Ara, ‘Malye winilamik ning ara ani. Teleb winilamik ning ara ani,’ tenen, wipsilirye, nun pil erebirye winilamepya touk, Allah arye dekna arepnamsile. Ayupu ara, abuku Penghotba sekamuka deiyoknye birye nyabuk.
Bukni, na kayapo. Anggunce, anggun malye umunye ning nirya ati, batakmunyopura, Allah arye namin kipsilirye, kum wenepnamsile. Bukni, anggun ilil pia kum kanye dobuka, anggun kanye talima kat upliba, anggun malye ning kum batakmunyopura, malye ninguk tuba winimunya deice arye, Allah weika arye tonap tabakuka wenepnamsile. Tuba-tuba malye winimunya deice arye, anggun bidamang arye anggun bidamang ati, malye ulilalulume. Ninye arye sik mambul ning ati, ‘Tonap weik unamsil’ tenen, dokola delilamak touk, anggun malye-malye winiluluma deice arye, anggun bidamang arye, anggun bidamang nong deice ikin ning weik delilanmalume. Allah tenyamuk talak akunum uplyopura, lakak aniryuk ninye nirya ati, lipsisikuka yupu bokeipsilirye, wenepnamsile. Wini talak ara, anggun tuba malye winilulum ninye ati, weik arye wenepnamsile. Anggun malye winin ning batakna kumce, talima kat kibuka, ‘Malye wininupyap tenena kum deice arye, malye umunya ati ara, Allah weik arye wenepnamsile.
Ayupu kekepseura, Yesus arye ayupu nyapnuke. “Anggun kanye mouplulume. Nara, minopce anggun dam yanamne. Narye tukwak ninye sik dekna ati, menenga ning ap wenen ning ap ara, akunum kintinipse. Ninye im sirya, mutuku sirya nirya ati ara, sik wininyak ning aupmalye touk, anirya dipdenirye, anggunti yupu lipsisikuka bokeipsenirye, wenepnamsene.
Dipdesiba, sik akunum diamik ninye mambul nang babye, mambul kum nang babye yanganmekak eipse. Sik nirya aweik kurun bun ning urasin tam tikilyanganmek ak, im deice tam ulul buku-buku nirya ara, yokeibik. Tonda, tonok buku ton, el si ara Kam Pia Unamak Ninye Si Sekna Buku ton yokeibmekbuk eipse. Abuku noutamak seklamik yupu nirya dipdeyikba, sik akunum diamik ninye nirya ara, sik kam tuba ulamik talak aning-aning nirya winilamik touk, sekuka delilamika ati ara, abuku sekeiyamika noutamak awamuk touk, sik akunum diamik ninye nirya ati, yupu lepsisikuka bokeibukce, wenebuk.
Ati, anggun moubuka tenenamlulume. Minop talak nati kanye deiyamnulum ning ara, pia teleb bukni, wini talak ululuma ara, pia yuk tenebuka ululume. Mitika aryuk kanye delinululume. Amalye winiplum ning ati, batakmunce, urasin tamubuka, minop tam pia teleb ulamlum touk, ila tuba tonap winipmunyopura, telebe nyapsitinye. Wini talak anggun malye winiplum ning ati, kum batakmunyopura, narye anggun dam yanirye, anggun weisa delina deiyok ning deipsa ara, dopnamsine.
Anggun Allah morolulum talak arye, nun Ni nyalulumnye Allah ara, ninye tukwak ninye nirya, sik wininyak ning dipdesilirye, sik wininyak ning atonun yupu bokeipsilirye, wenesulule. Ninye yuk-yuk ulamak touk, yupu bokuka kintinilisulule. Allah arye ninye urasin dipdebuka, ‘Na ka,’ tenena kum aniryuk, nun wininyap touk, yupu yuk-yuk bokuka kintinilisulul anya arye, anggun tukwak mutuku tia unamlum talak nirya ara, ‘Allah elda weik mambule. Malye winibibyopura wenepnamsile’ tenen, ilil uplibuk,pia leibuka diksukumuk unamlulume.
Aning nirya akunum winipnyeba, na mapu anggun nirya arye eipmunce, kel biknamlume. Ara, sik telebuk unyak nang ara, sik urasin laka upliba, eibuka kel biknamlume. Aning atonun, malye ninguk talibuka unyak nang babye, sik urasin laka upliba, eibuka kel biknamlume. Ara, na si erepnikirye, na amu tam unyakce, na piluk donyak nang ap, tonda na si kum ereninyak nang ap ati, narye yupu lipsisikuka bokeipnamsin talakuk, eibuka kel biknamlume. Na Allah Yahweh arye nyapsine.” Allah arye nyabuk.
Ati ara, naryuk, Allah Yahweh aning-aning nirya talibuka, deice tam erebuka, Pia Mikip Weik Deiyoknye ununye birye, anggunti nyapne. Se, domba basam pia teleb ning ara, na adiparyuk yanuka bokeipnirye, domba basam nong teleb ubuka mikip wamlye ning yuk, nong bol malye wamlye ning ap, wipnirye yuk-yuk deipnamne.
Bukni, ance sik pia malye ulamice nang ati, “Anango, kanye mouplulume! Anggun malye ulamlum ning batakmunce, tuba tamubuka, Allah dam yamunce, teleb un bisikuk umunyeba, elce lyenamsile,” nyabuka, laka nyapminbuk, amutuku nang kum kekebikirye, malye tuba winilamikiba, dopdeipnamne yu nang arye, obikib, dipnamake. Dibikcopura, deiyok ap, sik ining ap ara, sik deiceuk upnamle. Narye ikin ning, sik nong deiceuk deipniba aupmale. Bukni, an kalikna deiyoknye deice, ikin ning kum deipnamkine. Ance, “Sik kanye mouplulume, malye winilulum ning ara, bataklulume,” nyabuka, laka nyapminya deice arye, akunum lyepdopnamlame.
Tonda, winipnamlula ati, anggun mutuku talibuka, ninye deiyok nang Raja ara, ‘Se, yata wiriptibye do?’ tenen, pia engenamake Aning atonun, Raja el mi babye, el talima sakliba, ‘Se, nun mutuku noutam ara, ila ton ap, teleb kum unamle,’ tenepnamle. Tonda, amutuku noutam unyak nang nirya ara, ilil weik upliba, ‘Se,’ tenebikirye, sik taruk ap, yok ap, serem talipnamle. Ati ara, narye anggun malye ulalum ning eipnirye, awamuk atonun, narye kanye imun yu ning deipsinirye, wenepnamsine. Tonda, sik nirya ati, weik wenen ning arepnirye, anggunti kum kipdeipnamsine. Ara, minop talak anggunce, anggun kayapu nang ati, wenemunce, kum kipdeiamlum atonun, anggunti, narye winipnamsine. “Winipnamsina deice arye, anggun nirya arye, nati ara, ‘Se, kume, dipkoprob el Allah Yahweh ara, Pia Mikip Weiknye dikoprop ulule,’ tenepnamnulume. Allah arye nyapdeibukba, Yeheskiel kekebukce, sekuk.
Unyap ati ara, na talima pum tam tenenuna ara, ‘Allah aniryuk wibuka, malye nang arye malye unyak ning ara ani, teleb nang arye, diksukum unyak ning ara ani, tenebuka lipsisikuka bokeipanamsile,’ tenepse. Aning tenepsa deiyok ara, talye ati kume. Deiyok ning ara, nun tukwak ninye wininyap ning ap, nun pil donyap ning ap nirya ara, Allah arye, ‘Atalak ani,’ tenyamuk touk, el dem arye nunti yupu lipsisikuka bokeipsilirye, teleb ning ati dekna arepnamsilirye, malye ning ati, wenepnamsile.
Ara, minopce Damsyik mutuku ulamik ninye ap, anyapce Yerusalem mutuku ulamik ninye ap, Yudea tam nang ap, tonda Yahudi Yala kum ninye ap ati, ayupu peterelamse. “Anggun nirya anggun malye ululum ning batakuka, anggun kanye yuk punupmunce, balye tamubuka, Allah el tamuk kipdopnamlulume. Anggun kanye tenena winiryuk ning punupmaluma atonun, yuk talak babye, anggun winin ning nirya pia funguk unamlume. Ara, yata nang do, nirya eipsikirye, ‘Sik malye ulamik ning nirya akunum batakika ati, wini talak nirya ara, diksukumuk unmak ani,’ tenepsikirye, kel kipnamsinyak ati, ayupu nyapne.” Ayupu nyapsirye peterelamse.
Allah el mikip arye, tukwak mutuku tamubuka yanamle talak ara, Yakub birye deiamukba, dadeipdanin yangalamik nang, el mapu koproba ati nyapnamle. “Na Yerusalem mutuku weik asik noutam tamubuka yanamna ara, ninye Lyena Deiyoknye kipnirye yanamne. Ara, na mapu, anggun nirya malye winimunye ning batakmunce, tamubuka na tam kipnumunye nang lyepnamne ati, yanamne,” nyapnamle. Nara, Allah Yahweh arye, ayupu nyapsina ati, dipkoprob aning nirya nong upnamle!
Ara, sik nabi nang arye, anggun dam nyapdeiamsik ning ara, “Malye ning nirya talibuka winilulum ning ap, tenelulum ning nirya ara, adiparyuk batakmunyopura, na Allah Yahweh arye, lo arepsinye deice arye, amutuku tuba unamlume. Ara, anggun apu yapu nang ati, ‘Ateleb mutuku arepnamsine. Arepsinyeba, dopropmunyopura, amutuku talipmunce, pia aunamlume,’ nyapdeiamuk yupu deice arye, nyapdeiamse ning ati nyapne. Ara, amutuku ara, na Allah Yahweh arye, anggun apu yapu nang ap, anggun asukum ululum nang ap ati, akunum arepsise mutuku ati, ‘Amutuku uk pia talibuka uptingʼ tenen, nyamsise.
Tonda, tuba-tuba na Allah arye, na amu tam pil donyak nang, ara na yupu laka nyana ap, aminyan winipnamle ning, laka nyanyaka deiyok nang, sik nabi-nabi nang ara, sik dam dopdeipyeba, anggun dam yanarye, anggunti laka nyalamsik. ‘Anggun malye winilulum ning batauka, Allah dam tamubuka yalulume,’ nyabuka, yupu nyasinyake. Tonda, anggun malye dekna ning ara, batakuka, diksukum winin ninguk talibuka telebuk unamlume. Tonda, sik nirya ara, talye ning ati, ‘Nun ni koproba ani,’ nyabuka, isa si erelulum ning ara, adiparyuk bataklulume! ‘Allah arye nyasilye yupu, moubuka talipmunyeura, elce melipsilyeba, anggun apu yapu ap, anggun ap ati, akunum areamsuk mutuku, teleb mutuku noutam ara, keting tamun yupa weik deice arye, asukum teleb kibuka unamlume,’ nyasinyake. Bukni, na Allah arye, anggun Israel nang ati, nyapdeiamse yupu ara, kum kekenululumce, ayupu moubuka kum talilulume. Tuba malye ninguk talibuka winilulume.
Aning nirya ara, narye anggun Israel ninye ati, laka nyasunun bukni, anggun Israel yala nang arye, nati nyanululume. ‘Se, Allah arye nyasulul yupu ap, yupu bokolisulul ning ap ara, nun like. Aning ara, diksukum una kume, tenenyabe,’ nyabuka, malye nyanululume. Nyanululum bukni, narye nyapsine. Nara, malye winin ning, tonok ning babye kum wininune. Pia diksukumuk wininune. Malye ululum ninye ara, anggun atia! Se, anggun Israel ninye ara, yuk nang ati, diksukum ubuka, yupu kum bokolilulume.
Na Allah Yahweh, aning-aning nirya deice tam erebuka, Pia Mikip Weik Deiyoknye ununye birye, akunum nyapsine. Ati, na nyapmasin touk, dipkoprob winipsinyeura, aning dipkoprob upnamlarya. Na tenyamse talak akunum kiplyeura, aning nirya winipnamnarya. Anggun malye umunye ning ara, narye kum lubakipnamsine. Tonda, anggun wenen noutam ara, ‘Se, daupmalye, aning ara, akunum bataknulume,’ pia kum nyapnamne. Tonok malye winilamlinye babye, kum bataktinye, anggun nirya wenepnamsine. Tonda kum lyepdopnamsine. Tonda, ‘Se, anggunti ara, bicoe,’ kum tenepnamsine. Anggun malye winilulum ning yala-yala nirya, awininamluma atonun, anggunti wenebuka opnamsine. Nara, Allah Yahweh, aning-aning nirya deice tam erebuka, Pia Mikip Weik Deiyoknye ununye birye, akunum nyapsina ati, aning nirya dipkoprob nong upnamle. Allah arye, na Yeheskiel biti, nyapnuke.
Pia malye weik ulamik bukni, wini talak arye deiyok koubuka, sikce isa mer si erenyak ning ara, adiparyuk batakanamake. Tonda, sik ninye deiyok nang, Raja-Raja dipniba, na aik dam poka kup-kup ak, tuku lukuka weilamik ning ara, adiparyuk dobuka, pera otam bobinamake. Anyapman touk, dipkoprob winibikcopura, nara sik kan-kan pia ati aunamne.
Ati ara, malye umunye ning ara, duknuna kum bukni, lakakibuka, laka nyanamlume. Nun apu yapu, sikce si erelamik Allah, el si Yahweh dam aryuk, ‘Se, dipkoprob nun malye wininyabe,’ nyabuka, laka nyanamlume. Aninguk kum bukni, winipmunyopura, Allah elce, ‘Winipnamake,’ tenesilye ninguk, el kanye delin piluk talibuka donamlume. Ara, nun dana-dana tam unyak nang ap, nun mutuku noutam unyak ninye asik nang ap, sik Israel yala nang arye, yuk mutuku kilapu dobuka boyamunce, neika umunye kilapu nirya ap ara, yukak yakdonoknamlume. Anang nirya yakdonoknamlume,” Esra birye nyabuk.
Se, anggun nirya, Allah dam akunum bataklum nang ara, tuba tamubuka, el damuk yanamlume. Elce anggun teleb kipdeipsilirye, malye ning nirya ara, lyepdosilirye, kum kipdeipsilyeba, el yupu moubuka talipmunce unamlume. Winipmunyopura, anggunce nyanamlume. “Diba, winida nun akunum tamubuka, Allah Yahweh, el dam yayabe. Ati, dipkoprob elda nun ni koproba Allah,” nyanamlume.
Ayupu nyapdeipsilanye bira, Israel ninye ati kalikuka melilulnye, anggun ni koproba Allah, mikip weik ulirye, aning-aning nirya talibuka deice tam, Weik Erenanye birye nyapsile. Elda, im deice unyak yin talin malaikat nirya talibuka, sik weik deiyoknye ulule. Elce nyapsile. Anggunce malye-malye weik winilulum ning nirya batakmunce, telebuk winimunyopura, anggun ap, na ap anyaik ansinipdabirye, teleb ubuka neika utibye. Kumopura, kume.
Narye sik anang obuka, wenelamse ning deiyok ara ani. Sik babye malye pil dolamik ning ati, malye weik ulamik touk, ikin ning weik, sik nong deice delilamse. Ati, lo areamseba, yuk mutuku ninye arye, Israel ninye yanuka olyangalamik. Tonda, Israel ninye ati malye kilamikce, sik nirya tapu koubuka, sik mutuku koproba bobinamikba, sikda amutuku noutamak daulamikce, pera mutuku noutam yuk-yuk ulamik. Sik nirya yuk-yuk mutuku noutam bobinamikba, ninye asik nang atonun, binuka ulamik.
Anggun wini talak ululum Israel nang ara, anggun apu yapu minop talak ulamik touk, kum unamlume. Minop talak ara, narye nabi-nabi nang dopdeipsiba, sikda, narye, ‘Winipnamlume,’ nyapdeipse yupu ara, anabi nang, sik apu yapu dam binuka laka nyalamik. Ara, ‘Narye im deice unyak yin talen malaikat, sik weik deiyoknye kibuka ununye birye, na Allah arye nyapsine. Wini talak ara, anggunce pia malye weik winilulum bukni, aning nirya batakmunce, na Allah dam tamubuka yamunce, diksukumuk wininamlume,’ Nyapdeipse bukni, sikce ayupu nyapdeiamse ning ati, ‘Nun like,’ tenelamikce, dipkoprob kum winilamik. Ati ara, na Allah Yahweh arye nyapsine.
Piblisite