Bukni, Amazia bira, el li biti omik deiyok nang nirya ara, obuk bukni, sik adeiyok nang arye deiamik mapu ara, pia kum obuk. Amapu kum obuka deiyok ara, Allah Yahweh arye, Musa biti, “Aning ara, wininamlume, aning ara, pia kum wininamlume,” nyabuka, Musa deice nyapdeiamukce, keil pala deice sekeiamukba, laka nyalamuk. Allah arye nyapdeiamuk yupu ara, ani. “Sik ni yapu malye wamice ning ati, sikce deipnin banamak mapu ati, wenebuka kum opnamlume. Tonda, yate nang do nirya, sikce deibikce mapu malye unyak ning ati, sik ni yapu ati, kum wenebuka opnamlume,” nyapdeiamuk. Allah arye aning nyapdeiamuk touk, Raja Amazia birye winibuk. Tonda, Allah arye nyapdeiamuk touk winibuk. Ara, “Yata nang do nirya, el malye unmalinye binyuk, elak malye upmalinye biti, wenebuka opnamlume. Talye nang ara, wenebuka ona kume,” nyabuka, Allah arye nyapdeiamuk. Ati, Allah arye anyapdeiamuk touk, Amazia bira, winibuka anya arye, el li omik nang arye deiamik mapu nirya ara, kum obuk.
Yehezkiel 18:20 - Eipomek20 Bukni, yatanye do nirya, ninye ton malye winin ninguk, weik winiplinye bira, wenebuka opnyopura, dipnauk upnamle. Tonda, sik ni yapu ap, sik nin yapu ap, malye winilamikibuk, sik mapu teleb winilamicopura, sik ni yapu ap, sik nin yapu ap, mince malye winilamikce ning ati, sik mapu ara, kum wenepnamne. Winipniba, sik kum dipnamake. Atouk, yatanye do, yata kil do, sikce deibice mapu, malye winibicopura, amalye winina dekna ati, sik ni yapu ap, sik nin yapu ap ati, kum wenepnamne. Sik mapu malye wininyak ning ati ara, sik ni ap, sik nin ap ara, kum dipnamake. Aning kum bukni, narye dipkoprob nyapsine. Diksukumuk wininamak nang ara, sik teleb un ning, sik deiceuk unamle. Atouk, malyeuk wininyak nang ara, sik malye wininyak ning ara, sik deiceuk unamle. Ninye nirya winilamikce touk, eipnirye, yupu lipsisikuka bokeipnamsine. Na Allah arye nyapne. Gade chapit la |
Yehezkiel 18:20
34 Referans Kwoze
Nyabukce, ayupu ton nyabuk. “Anggun ni yapu, malye winibice ning ati, anggun mapu arye ona meme. Tonda, anggun mapu malye winibice ning ati, sik ni yapu ona meme. Bukni, weik malye ning winibikiba, ‘Mikip asa wenebuka opnuyabe,’ tenenyap ning ara, wenebuka olamap ning ara, amalye winipmalinye binyuk wenepmunce, opnamlulume. Sik malye winibice ning ati, yuk nang kirikuka, kum onamlulume. Amalye winipmalinye uka,” Musa birye nyabuk.
Bukni, el amu tam pil dolamikak, oplomuk deiyok nang, sik mapu ara, kum obuk. Ara, Allah arye Musa dam nyabukba, buku noutam sekeiamuk ning ara, ani. “Sik ni yapu arye malye winibikce ning ati, sik mapu kum onamlume. Aning atouk ton, sik mapu arye, malye winibikce ning ati, sik ni yapu kum onamlume. Yatanye do nirya, el babye malye winipmalinye uk, elcuk malye ning winipmalinye ati, wenebuka onamlume,” nyapdeiamuk touk, Amazia birye winibuk.
Ara, talye ati kume. Nara, Ninye Mi Koprop Atonunye, na ni el urasin pia teleb ulirye, dirina weik ulya atonun, na babye atonun upyopura, Allah arye kwepdeibukba, el im deice pil don nang, malaikat ap, ansinibibyopura, tukwak yanamabe. Yanamap talak ara, tukwak ninye nirya wenebuka lipsisikuka bokeipnamne. Yata ninye do nirya, sik winilamikce ning atonun, narye moubuka dipdebuka nuknirye lipsisikuka bokeipnamne. Ara malye winin ninye ati wenebuka opnamne. Teleb winin ninye ati dekna ning arepnamne. Yesus arye awekmek nang ati nyabuk.
Aning atonun nang, an aik dam yakirye morobicopura, an im deice arye kekepnamsilyame. ‘Kekepsimince, yupu bokeipnamsilam’ tenen, ati nyapkine. Allah im deice arye kekepsimince, kel bikuka ‘Anye bira dipkoprob malye winipmale. Anye bira malye kum winipmale,’ tenepsimince, amalye winipmalinye bira, el malye winipmalye touk wenen ning arenamlyame. Tonda malye kum winipmalinye bira, talye batakanamlyame. Winipminyopura, nunce, ‘Teleb ning ani, malye ning ani’ tenen, kel biktibye,” Raja Salomo nyabukce morobuk.
Dipdesiba, sik akunum diamik ninye mambul nang babye, mambul kum nang babye yanganmekak eipse. Sik nirya aweik kurun bun ning urasin tam tikilyanganmek ak, im deice tam ulul buku-buku nirya ara, yokeibik. Tonda, tonok buku ton, el si ara Kam Pia Unamak Ninye Si Sekna Buku ton yokeibmekbuk eipse. Abuku noutamak seklamik yupu nirya dipdeyikba, sik akunum diamik ninye nirya ara, sik kam tuba ulamik talak aning-aning nirya winilamik touk, sekuka delilamika ati ara, abuku sekeiyamika noutamak awamuk touk, sik akunum diamik ninye nirya ati, yupu lepsisikuka bokeibukce, wenebuk.
Sik anang atonun yuk nang ton, an aik dam yakirye, yupu nyabikirye morobikcopura, an im deice arye kekenamsilame. ‘Kekepsimince, yupu bokeipnamsilamʼ tenen, nyabuka moropkine. Allah im deice arye bikuka kekepsimince, ‘Anye bira, dipkoprob malye upmale. Anye bira, malye kum upmale,’ tenepsiminyopura, amalye upmalinye bira, amalye winipmalye touk, el wenena ati arenamlame. Tonda, malye kum upmalinye bira, el teleb ninguk winipmalye touk, ‘Teleb kipdeipnamlamʼ tenen, moropkine. Talya kum batakanamlyame.” Raja Salomo birye nyabuka, Allah ati morobuk.
Allah Yahweh arye, Harun biti nyabuk. An ni koproba arye, deiamsuk mapu nirya ap, an ap, an mapu ap, tonda, sik Lewi yala nang nirya ap ara, na si erena ati, doltakne tenda aik noutam bukni, pia teleb aik, ninye arye malye-malye weik winibikcopura, sik amalye winipmakce ning ati dekna ara, sik Lewi yala nang nirya arye, ikin ning weik dolonamlume. Bukni, na si eren aik pum tam, pil don ning ara, yuk ninye arye, malye ning weik winibiceura, amalye winipmakce ning ati dekna ara, an ap, ance deiamlum mapu ap, narye wenepsiniba, anggun dem, ikin ning dolonalume.
Akil arye deiyamuk mapu nirya ara oplopnamne. Winipniba, amutuku-amutuku diba tenenyak ninye nirya arye, moubuka kel kipnamake. Ara, ‘Se, ninye kanye tenen ning ap, ninye talima pum tam usilye ning nirya ap ara, elce kel kisulule. Nun nirya arye ulamap touk, yupu bokeipsilirye, wenesulule,’ tenebikirye, kel kipnamake.
Tonda, Allah Yahweh arye, “Wininamlume, aning ara, pia kum wininamlume,” nyapdeiamsuk yupu, danuotam arye tonok ning babye, tonoknye mangkau arye, ayupu yaniptapmalya deice arye, malye ulule. Ura, amalye winipmalye ning ara, mangkau arye winipmalye bukni, malye akunum winiplyopura, amalye winipmalye ning ati dengna ara, ikin ning yalyeba dolonamle. Allah arye elti, ‘Kume, el malye winipmala ati, wenepnamne,’ tenenamle.
Ura, Allah Yahweh arye, na Yehezkiel biti yanuka nyapdeipnuk yupu ara, ani. Se, anda ninye sirika arye, deipkiknye binya arye, sik Israel nang ati nyapnamlame. Ayupu ara, ani. Anggun Israel yala nang arye, nyalulume. “Se nunda, Allah arye, ‘Winipnamlume, aning ara kum winipnamlume,’ nyapdeipsuk yupu ara, moubuka kum kekelamuburye, yaniltanauk unyaba ati, nun kanye talima noutam ara, ikinuk usulule. Nunda, ‘Se yata deiyok ati, malye-malye wininyap do?’ tenen, ikin kanye bobuka unyabe. Tonda adeice arye, nunda pia bol malye dem upnin banyabe. Ikinuk usulula ati, yata winibuka tuba kam uptibye do?’ nyabuka, anggun mamun asilalulume,” nyapnalame.
Allah el si Yahweh arye, wipdeibukba, pil donamlanye bira, imun kanye bobuka, ikin deice aryuk ulamikca ani, akunum obikiba dipnamle. Aning akunum winiplyopura, kam bukuka kanye deiplirye, imun kanye bomuk ning, nong upnamle ning eilyopura, elce, ‘Na akunum upne,’ tenen, kanye deipnamle. El imun kanye bobuka unamla deice arye, ninye tukwak ninye weik, elce sikti, ‘Akunuma, narye aninye ati, akunum teleb kipdeipmane,’ nyapdeipnamle. Adeice sik kanye talima teleb ulinamle. Na Allah ati pil donamnilnye birye, ninye mutuku-mutuku nirya malye wininyak ning wenena ati, el nong deice uk dobuka deipdanamle. Winipnamla deice arye, na Allah arye ninye mutuku-mutuku nirya noutam arye ninye weik namin kipnirye lyepropnamne.
Allah arye Musa biti, laka nyabuk yupu ara, ani. Winipmanto, ninye tonoknye birye, yuk nang ati, malye winipmakiba, tonye birye, aning eipmalul do, yuk nang arye laka nyapmakba, kekebuka bikmalul do? Bukni, ninye malye winipmakiba, yupu lipsisikuka teleb kilina deiyok nang arye, el anye biti, “Ance, nun dam yamince, amalye winipmek ning nyapmalume. Tonda, eipmalume. Ati, ance eibuka kekeplumce, bikmalum ning nirya ara, yanuka lak nyapnusilyame,” nyabice buk, el anye, sik dam kum yalye do? Yalye bukni, “Anang ara, dipkoprob malye winipmangue,” nyabuka, kum laka nyaplirye, kwinisa dobuka duknuplyopura, Allah arye anye biti, ‘Kume, elce dipkoprob malye winipmal buk, wenepnamne,’ tenepnamle. Awiniplye ning ati, dengna ara, ikin ning el deice, weik yalyeba dolonamle.
Allah arye nunti, dalubuka opsutu bukni, nun opsutu ning nirya ara, Yesus Kristus arye dobuka, el nong deice deipdayukce, wanwanun yo deice delil bisukce dibuk. Nun malye un ning ati dipsuk ning ara, talye ati kume. Ara, sik yupa ninye malye un ning kum teneptingce, kum pataptu touk, nun babye, malye ning patana ap, malye winina ap, pia kum arye, ‘Diksukumuk unamak’ tenen, dibukce lyepsuke. Sikce Yesus ati obikak, dibuk deice arye, nunti akunum teleb ubuka deipsuke.
Aning atonun, Allah arye, ‘Ninye tukwak ninye weik, sik malye winin ning kum daneipnamle’ tenen, like tonok talak aryuk Kristus dopdeibukba, malye nang arye Yesus obika deice arye, nun malye winin ning nirya akunum kilibuka kum kipdeipsuke. Aminyan talak ara, Yesus Kristus ila tuba tonap, tukwak mutuku dam kutukuka tikilyanamle bukni, atalak ara, ‘Malye winin ning, na nong deice deipnikiba kilipnamne,’ tenena ati kum yanamle. Aning kum bukni, bitinye talak yanamle deiyok ara, sikce, ‘Yesus dipkoprop dolyanamsil’ tenen, elti, diba tenebuka, dinauk unyak ninye ati, lyebuka dolyanamsile.
Tonda, amalye winilulnye birye, yuk ninye sik patana ati, uang yo bok areplye talak ara, elce ayupu uk, nyalule. “Na uang yo bok dopropmunce, nati tamubuka, min kum arepmanumunye talak noutamak ara, ‘Yo bok ton tabakuka arepnamnulume,’ nyapnamsin touk, uang yo bok tonap tabakuka, weik arye arepnamnulume. Anggunce na yo bok dopropnulum touk kume. Nara, weik arye tonap tabakuka dolona ati, weik arye arenamnulume,” nyalule. Aning ati ara, amalye wininanye kam pia unamle do? Kume, dipkoprob kam pia kum unamle. Na Allah arye, ‘Aning nirya ara, na pia like,’ tenenune. ‘Aning nirya ara, pia malye,’ tenenirye, anggunti, ‘Winina meme,’ nyapdeiamsise ning ara, elce talye mangkau kibuka winilula anya arye, anye bira dipkoprob wenebuka opnyopura, dipnamlarya. Diplyopura, el ining ara, el kisok deice upnamle. El ining ara, el bidamnye nong deiceuk paleplirye banamle. El malye ulula deice arye, wenebuka opnamna anya arye, el dipna deiyok ara, el bidamnye arya.
Yata ninye do nirya, like winilye sum abasam kwal deipmace ning, dobuka dibicopura, narye wenepnamne. Deiyok ara, ani. Na Allah Yahweh arye, ‘Aning ara, like winilye sum uplyopura, dina meme. Aning ara, pia mambule, ‘Naʼ tenen, ning, teleb koprop ning, lek atonun ning,’ nyabuka, akunum nyapsa ati, kum dinamlulume. Ati, aning diplinye bira, wenebuka opnamne. Anye aning dobuka diplya deice arye, ‘Kume aning ara, talye ning anye,’ tenena atonun winiplya deice arye, yaniptapnilirye, pia malye winilule. Anye arye, el bidamnye ati, kunum malye kipdeipnamle. Winiplyopura, atalenye bira, pia wenebuka bataknamne. Israel yala nang ap, anye ap, neika pia kum unamake. El bai tam yakmunyopura, narye wenebuka opnirye, pia kum danamle.” Allah arye nyabuk.
Ati ara, na Allah Yahweh, aning nirya talibuka, deice tam Pia Mikip Weik Erena Deiyoknye uninye birye, ‘Winipnamne,’ tenepnye touk, wininuna anya arye, narye nyapsine. Se, anggun Israel yala ninye nirya ati, narye yupu bokdeipsinirye, wenepnamsine. Narye dipdesinirye, anggun malye winilamunye ning aupmasilye touk, wenepnamsine. Diksukumuk winilamunye ning aupmasilye touk, teleb kipdeipnamsine. Yatanye do, yata kil do nirya, anggun winilamunye touk, yupu bokeipnamsine. Anggunda, ‘Se nun malye wininyap ning deice arye wenepsilirye, opsilyak’ tenen, anggun malye winilulum ning nirya ara, batakmunce, aminyan tamubuka, yuk teleb bisikuk binamlulume. Winipmanto ning ara, keil yan dum duklirye, opsilyopura, kote saklamak atonun, anggun malye winilulum ning dekna ati, ‘Wenepsinirye, opsinyak’ tenen, nyapsine.
Moropkipyopura, nun ni anda im deice mutuku unmamince kekenamsilyame. Kekepsimince, nun malye un ning ati namin kipsimince, lyelonamsilyame. Na ni ance tukwak mutuku noutam unyak nang nirya ati, nun talima noutam ulye ning ara, an kel ati, teleb do, malye do, ninye arye sik yuk-yuk malye winilamice touk, tonda teleb ulamikce touk, ance yupu bokeipnamsilame. Na ni ancuk ninye ap, sikce deibikce nang ap, tukwak nang nirya, sik talima noutam ulye ning nirya diminyakarye, bikisilyame. Aning ara, ninye yuk nang arye ton kum winiptinge. Aning ara, ancuk winiptume, ati moropkine.
Diplyopura, Israel ninye nirya arye, malye yupu nyabuka engebikirye, tuku luknamake. Weik sisin nang weilamak atonun ubuka, weipnamake. Yerobeam yala nang yuk nang nirya ara, dipnamak bukni, tuku kum luknamake. Bai kam ap, bai buru maka ap arye dinamake. Aning ara talye ati kume. Ara, Yerobeam elce deibukba dadeipdanin balamik ninye nirya kum bukni, ami koprop ara, Allah el si Yahweh arye ami el winilul ning dipdeyukura, teleb ubuka ati ara, elti, kanye deibuka dopropnamle. Allah arye, Israel ninye ati pia kalikuka melilule.
“Seʼ', anggun malye winipmarume. Yata deiyok ati, Israel nang arye, ‘Nun malye winipmapu ning pununa ati, Allah arye biklirye, namin kubuka, kum daneipnamsilʼ tenen, boyanmangu kambing basam nirya ara, uku dongopmarumba, uku dipmale. Awinipmarum ning ara, teleb kume. Teleb ning ara, anggun ton bokuka dopropmatumce, pia teleb sukumuk, Allah el si eren aik urasin tam, pia teleb lek sukum dam bobinmatumce, aning dipmatuma. Deiyok ara, ani. Akambing basam arepmangu ning ara, Allah el kanye ara, ‘Aning ara, pia teleb lek ning ulule,’ tenelule. Tonda, Allah arye, alek ning ara, sik imam nang dinamake. Imam-imam nang arye, akambing tup dipmak deice arye, ‘Israel nang, sik malye wininyak ning kilibuka, sikti, teleb kipdeipnamleʼ tenen, arisulule. Israel nang, aning arepmangua deice arye, ‘Allah arye, nun malye ning ati, wenebuka oplopsutu bukni, aning arebikcopura, punupnamsile. Allah arye nun malye winin ning kilibuka, teleb kipsilirye, lyepdopnamsilʼ tenen, arepmangue.
Aning nirya winibuka deipminyopura, anda an nong kwanim tam kwalipdeipmince, tuku deice mapnulyame. Tuku deice mapminyopura, lak kilina kwang dakna ati, narye sik Israel nang arye, malye winilamik ning nirya, wenena ati ara, an deiceuk deipnamkine. Winibuka an taruk kwanim tam deice mapnalam talak ara, like yupa pia weik, tiga ratus sembilan puluh (390) sum deice arye, ance mapnalame. Tuku deice mapnalam deiyok ara, tonok sum deice arye winibuka mapnalam touk, keting tamun tonok upnamle. Ara, sik Israel yala nang arye, malye ulamikce ning wenena ati, 390 keting tamun deice arye, ikin ning dobuka, sik nong deice deilinamna ara, atonun upnamle. “Ati ara, narye Israel nang ati wenepnamne talak, 390 keting tamun atonun wenepnamne. Anda 390 sum noutam arye, tuku deice mapnalam talak ara, sik malye ulamice ning, an nong deice upnamle. Awinipnalam ning ara, ‘Sik biknamakʼ tenen, lak kina ati,’ ance winipnalame.”
Aning ara, talye ati kum nyapne. Deiyok ara, el anye birye, na Allah Yahweh arye nyapdeiamse yupu ati, yanibuka bataklirye, mandipna kanye bopmalya deice arye, malya kibuka, na Allah Yahweh arye, “Aning winina kume,” nyapdeipsise ning winipmalya atia. Anye bira, el bidamnye, amalye winipmalya dekna ati, wenebuka opniba, dipnamle. El malye upmalye ning ara, kum namin kipnamne. Narye arepneba, ikin ning el nong deice unamlule.
Winipmanto ara, pia ikin weik aulamuk bukni, na batakna kumce, pia diksukumuk winilamik nang, sik punun nang, winilye nang ara, Nuh ap, Daniel ap, Ayub ap nirya ara, amutuku noutam ulamtinga babye, sik awinilye nang, sikce pia teleb dolamika deice arye, sik nong koproba lyepdeiptinye bukni, yuk ning ton teleb kum kipdeiptinye. Yuk nang ap, yuk ning nirya ap, kum kipdeiptinye. Nara Allah Yahweh, pia deice tam erebuka, aning-aning nirya talibuka, Pia Mikip Weik Deiyok ununye birye, nyapsine.
Tonda, ato mutuku ubtu ura, min talak pia diksukumuk winilamik nang ara, Nuh ap, Daniel ap, Ayub ap nirya ara, amutuku yanuka uptinga babye, yuk nang nirya, pia kum lyepdeiptinge. Sik mining mapu babye, kum lyepdeiptinge. Akum bukni, sik tibuk lyepdatinge. Ara, sik nong atibuk narye lyepdeiptinye. Tonda, amutuku noutam unyak nang nirya ara, adiparyuk obuka, sirya daknyopura, dibinauk unamake. Anang arye deiamting mapu silip babye, kum lyepdeiptinge. Amutuku nirya ara, asik oldem upnamle. Nara Allah Yahweh, pia deice tam erebuka, aning-aning nirya talibuka, Pia Mikip Weik Deiyoknye ununa birye nyapsine. Tonda, nara, pia kam ununye birye nyapsin ati, aning nirya ara, dipkoprob nong upnamle.
Bukni, amutuku dam kalikina deiyoknye birye, sik mal olan nang ati, yanganmakiba, eiplye bukni, elce weik lelim nyan ning, terompet kum pong-pong nyaplirye, kum laka nyaplyopura, amutuku nang ara, kum kekebikirye, kanye kum moubikirye, talye kanye bobuka unmakca ani, sik mal olan nang arye yanuka, amutuku nang kan-kan arye, ninye ton opnamake. Obikiba dipnamak nang ara, sik malye tuba ulamik noutam aryuk, obikiba dipnamake. Dipnamak bukni, sik amutuku nang opnamaka deiyok ap, ining ap ara, amutuku kalikina deiyoknye deice arye deipnamne. Ati ara, amutuku nang oplopnamak nang, sik kwang dakna ati ara, na Allah arye, amutuku kalikina deiyoknye, yupu kum laka nyabuknye, el deiceuk deipnamne. Narye elti, ikin ning deipniba dopropnamle.