“Se, anda ninye sirika arye deipkiknye, ance Tirus mutuku ninye deiyoknye biti, laka nyapnulyame. Ara, “Nara Allah Yahweh, aning-aning nirya talibuka, deice tam erebuka, weik erebuka mikip ununye birye, nyapdeipnun yupu ara, ninye deiyoknye Tirus mutuku Raja ati, ayupu laka nyapnulyame. Ara, Tirus mutuku Raja anda, an kanye pum tam erepluma deice arye, nyaplume. Nara, Allah atonunye unune. Narye weik laut mekwen noutam, mekwen dana-dana tam antanap dongobuk mutuku, pulau deice tikniba, talye ninye arye, na si erenamniyake,’ teneplumce, nyapmalum ning ara, talye yupu deice arye nyaplume. Bukni, dipkoprob ning ara, anda, Allah atonunye pia kume, anda talye tukwaknye dem ulyame. Aning moubuka tenipnulyame.
Yehezkiel 16:49 - Eipomek49 Sik Sodom mutuku noutam ulamik nang nirya arye, malye winilamika deiyok ara ani. Ara, diltaknauk ulamik. Tonda, sik din ning yala-yala nirya ara, pia weik tonun, kintinip deiamik ning arye dilamikce, maknya kipdanuka ulamikce, namin arye, talye tunim abuka, kanye deibuka, teleb aryuk, pia dukdongobuka, neika ulamik. Bukni, sik aning-aning nirya, kum uamuk nang, sik pia talye kankan nang ap, aning-aning kum uamukba, pia patanauk ulamuk nang ati, ‘Sik anang ara, dauplye’ tenebuka, bataklamikce, pia kum melilamik. Gade chapit la |
Yehezkiel 16:49
43 Referans Kwoze
Ton deiyok ara ani. Allah Yahweh, anda dipkoprob aning-aning nirya talibuka umince, pia deice tam, mikip weik deiyoknye ulyam bukni, ance nun tukwak mutuku noutam, ikin weik unyap nang ati, bico tenepsimince, tuba bikisilyame. Bukni, sik talima erepdakirye, maknya kintininyak nang nirya ara, yukak aryuk elilyame. Anang dam yanuka, sikti, kum melilyame.
Abram birye, nyabukba, Lot birye, amutuku nirya dana-dana tam dipdeyukce, Yordan mekin ap, Yordan lyuak nirya ara, mek weik binamuka anya arye, pia teleb ubukba, eibuk. Amutuku nirya ara, Allah el si Yahweh arye, minop talak kwepdeiamuk mutuku, Eden mutuku atonun, tonda Mesir mutuku noutamak bukni, teleb mutuku si Soar mutuku urasin atonun ubukba, eibukce, kanye deibuk. (Atalak ara Allah arye, Sodom mutuku ap, Gomora mutuku ap, sik wenena ati, uku dopkwetebukce, min kum omuk talak ati nyapne.)
Anda, Allah im deice ululnye dinmakukak arye, malya kibuka kanye erepdalumce, Allah ati, ‘Na like’ tenen, yaniltalamlume. Winilamlumce, Allah el si eren aik pum tam, deiamikbuk, boyanamik ning, emas arye memebuka deiamik mek makau ara, ance nyaplumba, an mutuku talibuka unyak deiyok ninye ap, an kilapu ap, an tam kili sal ap, sik nirya ara, amakau arye anggur mek kwebuka dinmalume. Winipmalumce, anggun si erelulum minop kwemdina ning, emas ap, perak ap, tembaga ap, yuk kat ning yo ap, keil ap kintinibuka deiamik ning, Isa Mutuku Dongonye urasin atonun ning ara, sik si nyabuka erepmalumce, mot nyanmalum talak ara, ‘Allah dinmasile,’ tenepmalume. Anggunce, Isa Mutuku Dongonye si erelulum minop kwemdina ning ara, asing arye, ton kum elinyake. Tonda, amul arye kum kekebuka, kel bikinyake. Allah aniryuk, dibin ning babye, kam un ning babye, elcuk, ‘Wininamak’ tenen, kintinibuka deibuknye ulul bukni, atalak ara, ance Allah ati, telebe nyabuka, si kum erepmalume. Tonda, Allah aryuk an kam unamlam ning nirya ara, kintinibuka delikulule. Awinikilye ning nirya ara, ance moubuka kum kel kilaluma ati nyapkine.
Tonda, anye birye yuk ninye nirya ati, malye kum ulilule. Atonun, yuk nang arye, el uang yo bok do, yuk ning do, tia talak ati doprobikirye, dabolamica talak ara, elce sikti, ayupu kum nyalule. “Aminyan talak, ‘Dipkoprop aning tamubuka arepnamniak’ tenen, na ning dekna pununa ati, anggun mambul ning arepnululume. Kumopura, na ning tia ati, kum doproptume.” Aning kum nyalul bukni, sik ning dolona kum diparyuk, yuk nang sik patan ning ati, talye mangkau kibuka melilule. Ateleb ululnye birye, ubula kum dololule. Tonda, yuk nang din patapliba, elce melibuka arelule. Yuk nang ara, baju kum ati, nong banang ulamice ninye ati, melibuka arelule. Atonye bira, teleb winilulnye ulule nyapne.
Tonda, yuk bona utotoa talina kum nang arye, anye bira el yo bok do, yuk ning do, tia talak ati doprobikirye, sik patan ning dekuka doprobikirye, dabolamica talak ara, elce sik nong deice, ikin ning weik delilule. Tonda yuk nang ati, ikin pil arukulule. Tia talak ati, el ning doprobikirye, ‘Aminyan talak ara, dipkoprob aning tamubuka arepnamniakce, tenepnamsil’ tenen, el ning dekna pununa ati, areamice ning ara, amalye ululnye birye, ubula dololule. Sikce el ning, tia talak ati dopromice ning, tuba tamubuka arebicopura, elce sik ning tamubuka kum arelule. Tonda, amalye ululnye bira, yuk nang, sik ning talye ubula dololule. Tonda, yuk nang din patana ap, baju kum ati, nong banang una ap, ulamice talak ara, elce melibuka kum arelule. Tonda, anye birye, amutuku unyak Israel ninye arye, Isa Mutuku Dongonye si erebikirye, ‘Nun ni yapu ukirye, melinamsiyak’ tenen, aisa urasin atonun ubuka memamice ning ati, el asing dilamlirye, ‘Aning ara, nati melinamnile,’ tenelule. Atonye bira, pia malye weik ulule. Ati, na Allah arye, ‘Aning ara, na pia like,’ tenenun ninguk, winilule.
Sik amutuku unyak nang arye, kanye erebuka kwalinyak deice arye, tukwak aryuk malye unyake. Sik anang nirya ara, dipkoprob laka deice arye, pia malye unyak talak ara, yuk nang ton, sik urasin eibikcopura, sik malye wininyak ning nirya bikinyake. Ara, ‘Nun malye wininyap ning duknubupe,’ tenena kumce, minop talak Sodom mutuku ulamik nang ara, lak deice noutam arye malye winilamik touk, wininyake. Ati ara, sikda bico! Ikin weik ning, sik nong deice yanamlarya! Ara, sik Yerusalem mutuku unyak nang ap, Yehuda mutuku unyak nang ap ara, sik deiceuk, kanye imun weik ning dobuka deipdayikba, ikin weik unyake.
Ninye ton sik kanye talima erebikirye, kwalibuka ukirye sikce tenebuka, ‘Se, nunda weik teleb nang unyabe,’ tenebuka unyaka deice arye, dipkoprob aminyan talak ara, saknamake. Yuk ninye amu tamuk unamake. Bukni, ninye ton mitang asa arye, kanye talima dakdongobuka ululnye bira, telebuk upnin baliba, yuk ninye nirya eibikirye, elti, kanye delinamake.
Asurat deice arye, “Yuk nang ati, nimalye arye sik amutamak unamlulume,” nyapmasin touk, anggun wisi danana kum arye, kam nang atonun nang ati, ayupu nyapsine. Ara, sik wisi nang amutamak umunce, sik yupu kekebuka nimalye arye unamlulume. Buku Amsal yupu noutamak sekeipsik yupu aupmala ati nyapsine. Ayupu ara ani. ‘Sik kanye erebuka, dildanyak ninye ara, Allah arye aninye ati bataklirye, sik yupu sekelule. Bukni, sik kanye darabuka, talima nimalye arye amutamak unyak ninye ati ara, bico tenepsilirye, talye luba kibuka melisulule.’ (Amsal 3:34) Ayupu tuba awamsuka ati, anggunce yuk ninye nirya ati, anggun bidamnye kanye darabuka, talima nimalye arye teleb ubuka unamlulume.
Anggun Edom tam nang ara, ‘Nunda pia teleb nang unyabeʼ tenen, tilila yupu nyalamluma deice arye, akunum kanye erebuka, maknya kintinililalulume. Ara, anggun weik asik, weik keil mutuku kon deice dobuka deiplumce, mikip kipdeiplume. Winibuka deiamluma ati ara, anggunce, ‘Yo, nunda, yata mutuku nang arye, nunti opsikirye, nun mutuku kon deice unyabak arye dobuka, utam lu mutuku tuku deice deipsiting do? Kume aning ara, kum winipmanto,’ tenemunce, pia maknya kintinibuka, kwalilulume.
An nong bol urasin pia teleb upkuka deice arye, kanye pum tam erebuka kwalilyame. Tonda, an kanye pum tam erebuka, kwalilyama deice arye, ‘Pia urasin teleb ton tabakuka winipnamnarya,’ tenyamlum bukni, malye kipdeipdaluma deice arye, an pia moubuka, kel bikamlum ning nirya ara, akunum pia malye kipdeipdalume. Ati ara, narye an nong tukwak dopkwetepkisiba saklumba, sik mutuku sirya, im sirya nirya unyak Raja ninye deiyok nang, sik asing dinak arye winipkisiba, sik nirya arye, an malye winilamlum ning ara, akunum eibuka bikike.
Winipnamkiyaka ati ara, yuk pera mutuku nang arye, an opnukice ning ati, ance, ‘Kume, nara Allah atonunye unune,’ nyapnalam do? Kume, sikce anti, akunum bikika ati, anti opnamkiyak nang ati, ance, ‘Kume, nara Allah atonun unune,’ nyaptuma babye, sik anang arye dipkoprob akunum bikike. Ara, ‘Elda, Allah atonunye kum bukni, talye tukwaknye ululeʼ tenen, moubuka akunum bikike.
Se, na nabi Yesaya birye nyapsine. Na ap, nun Yehuda tam noutam unyap nang nirya ap, nun kele. Yuk-yuk mutuku nang nirya arye, “Kume, sik Moab noutam unyak nang arye kwalinyake. Tonda, sikce kanye weik arye, eren nang ukirye, yuk mutuku nang nirya ati, malye yupu nyabuka, talye yupu nalinyake. Tonda, sik Moab nang arye, sikti, ara, ‘Nunda dipkoprop, pia teleb nang unyabe. Nunce aning-aning nirya ara, pil teleb kibuka donyabe,’ nyabuka, kanye deibikirye, kwalibikirye erepdakirye, tilila yupu nyanyake. Bukni nun kele, anyanyak yupu nirya ara, talye ninguk ulule. Nyalamikba, akunum kekebuka, biklamupu bukni, sikce talye tilila yupu uk, nyanyake.
Yata ninye do nirya, mitangnye birye el patalamle ning ati, ‘Se, na melipnululume,’ nyabuka, malye nyabuka morolamle ning ati, moubuka kum kekebicopura, amul kunukdongobikirye aminyan talak ara, sikce pia imun kanye bobuka, tuba malye nyanmatinga babye, yuk ninye arye sikti, pia kum melinamake. Batakalongona uk unamake.
Ninye ton el kam ulul talak nirya, kanye talima erebuka kwalilulnye bira, aminyan yuk talak, Allah arye anye biti wenepliba, sakuka opliba, kanye imun weik unamle. Aning atonun, yata ninye do nirya, sik kanye talima erebuka unyak ninye ara, aminyan talak ara, Allah arye aninye nirya ati, weneplirye kum daneipnamle.
Ninye nirya, sik kanya deilin erebuka ukirye, kwalinya nang ara, Allah Yahweh arye, ‘Anang ara na like,’ tenelule. Ara, dipkoprob elce, sik anang ati tenelye ning ara, ton pia luba kum kinamle. Nunda aning pia dipkoprob bikinyabe. Allah arye sik aninye ati, ‘Na like,’ tenelamlya ani, kum daneipnamle. Dipkoprop yuk talak ara, aninye ati weik arye wenebuka oplopnamle.
Allah el ‘Naʼ tenen, ninye, Israel nang ara, aning-aning nirya dilamikba, sik nong nena ara, nong kalimna dongopna arye, weik arye nelamik. Aning-aning telebuk ulamuka ani, sik Israel ninye arye, malye kibuka, minop talak arye, sik kwepdeiamuknye Allah ati, ‘Nun like’ tenen, batakik. Tonda, sikti, lyepdomuknye Allah ara, el si yanibuka bataklamik. Ninye arye, ‘Yu nang arye opsicak’ tenen, tonda, ‘Weik mutuku pala keil leleipnamsil’ tenen, akeil donga duknulbalamik touk, sik lyena deiyoknye Allah ara, weik mutuku yangan keil atonun ulamsuk bukni, sikce elti, bataklamik.
Nyabuka morobuk bukni, Sodom mutuku nang arye, ilil kum asa, yu weik ubukba, yupu weika arye nyabik. “Anda yata ati, ayupu nyapmasilam do? Minopa arye ayalumba, nunce, ‘Telebe, nun mutuku noutamak unalam ara, teleb uka,’ nyabupuba, nun mutuku noutamak neika unyap bukni, wini talak ara, ance nunti, ‘Winiplulume, winiplulume, aning ara, kum winipnamlume,’ nyabuka, yupu kum seksutume. Anda yatato weiknye tenepdalamce, nyapmasilam do? An diamuk uplyame. Kumopura, an ninye asik nang bitinye ati, mitik malye kipdeipnuyap bukni, an kum tunim apminyopura, nunce anti, weik malye kipdeipnukiyabe,” nyabik. Nyabikce, adiparyuk, ‘El bublan mikip arye kukuka talye wekelbinuyap’ tenen, Lot el aik bisik bublan dam binuka borunmek.
Aning ati ara, anggun kanye moubuka unamlulume. Malye-malye winina ap, talye kanye bobuka urdemuk una ap, kanye wangan mek talye dina apura, ‘Nun aik, nun ongon butum, nun dina ap, yata wiripnuyap do?’ tenen, teniltona ap deice arye, anggun kanye talima tenena ning ara, ikin weik upsilirye, mitang yuksilyeura, na pil dopmanto kum ululum ati, kanye pia moubuka unamlulume. Winipmanto ara, kabang bisik balamlya ak wena wemikceura, kabang talye mangkau arye balyeura, youlamla atouk, na yanamne sum mangkau kanye bopmamunye talak winipsilyak ati, kanye pia moubuka unamlulume.
“Ati ara, wini talak ara, na Nebukadnesar birye, im deice ulul ninye deiyoknye Raja ara, Allah el tonoke. El siuk erepnirye, unamne. Ara, urdem ati kume. El pil dolye ning nirya ap, el ulul ning nirya ap, pia dipkoprob diksukum ninguk winilule atia. Tonda, ninye kanye talima erepdakirye, kwalinyak ninye ati ara, Allah elce amu tam kililule,” Nebukadnesar birye nyabuk.
“Allah el si Yahweh, aning-aning talibuka, deice tam erebuka, Pia Mikip Weik Deiyoknye birye, ayupu ton nyapkile. Ara, ninye deiyoknye Raja Mesir biti, ayupu binuka nyapnulyame,” nyapdeipmanile. An Firaun bira, an kanye talima noutam ara, utenelyame. ‘Kume, na mikip pia weiknye, ununa anya arye, weik laut mekwen pum tam ulamle mikip weik ning, Nil mek pum tam malamle yu weik buaya atonun, unune. Nara, aninguk tenebuka nyanune. ‘Kume, weik balamle mek, el si Nil mek ara, naryuk kwepdeipse. Na kanye delina ati, Nil mek kwepdeipse. Nil mek deiyoknye bira natia,’ nyabuka ance nyabuka, an talima erelalyame.
Tonda yuk nang arye, el yo bok do, yuk ning do, tia talak ati doprobikirye, dabolamica talak ara, elce sik nong deice, ikin ning ton kum delilule. Yuk nang ati, ikin pil kum dilule. Tia talak ati, el ning doprobikirye, ‘Aminyan talak ara, dipkoprob aning tamubuka arepnamniak ca, tenepnamsil’ tenen, el bona ning pununa ati, areamikce ning ara, ateleb ululnye birye, ubula kum dololule. Sikce el ning tia talak ati dopromice ning, tamubuka arebicopura, elce sik ning tia talak ati, dadeiamlye ning dobuka, adiparyuk tamubuka arelule. Tonda, ateleb ululnye bira, yuk nang ning, talye ubula kum dololule. Tonda, yuk nang din patapliba, elce melibuka arelule. Yuk nang ton, baju kum ati, nong banang ulamice ninye ati, melibuka arelule. Atonye bira, pia telebnye ulule.
Anggun tukwak mutuku umunye talak nirya ara, ninye kanye delina pia teleb ning nirya talibuka, mutan nang ululume. Winipmanto ning ara ani. Anggunda, ‘Sapi basam owala obuka dipnamape’ tenen, el dina weik arye arilamice bukni, weik neplirye, bol teleb uplyopura, asapi basam arye, ‘Na opnamniak,’ kum tenyamlye bukni, obuka dilamak atonun ululume. Sapi basam arye, ‘Na opnamniak,’ kum tenyamlye atonun, anggun babye, ‘Nun malye winin ning weik upsilyeura, aminyan talak ara, Allah arye wenebuka opnamsile’ tenena kumce, malye kanye kum boluluma ati, nyapsine.
Oploplyopura, abitinye nang sik nong dobuka kum weipnamake. Aning kum bukni, aweik asik domikak, sik Deiyoknye wanwanun yo deice obik mutuku, Yerusalem mutuku noutamak, ninye ban bisik noutam akuk, sik nong asukumuk bataklopmakiba aupnamle. Siria talak ara, Yerusalem mutuku nirya pia malyeuk unamla ati, domon yupu deice ara, el si Mesir ap, Sodom ap si bitinye ton nyanamake.
Se, anggunda Sodom mutuku ap, Gomora mutuku ap, pia malye-malye weik winilamik ninye atonun ululume. Anggun Yerusalem mutuku talibuka umunya deiyok nang ap, anggun amu tam unyak ninye ap nirya ara, Allah el si Yahweh arye nyasilye yupu moubuka kekeplulume. Allah arye peteresilye yupu kekebuka dobolbanamlulume.
Allah Yahweh arye, na Yeremia biti nyapnuk. “Ara minop talak noutam arye, dipdongobuka wini talak babye, sik Moab mutuku nang ara, talye kanye bobuka, nemalyap arye, dakeiam asa ulamik. Winilamik talak ara, ton yuk mutuku nang, sik mal olan nang arye, yanuka opnirye, sik bobuka yuk pera mutuku kum bobinamik. Sik Moab mutuku nang ati, winipmanto yupu nyapnune. Ara, anggur mek weik mek makau pum tam langdibuka deibikceba, makau pum tam lulukna kumce, ur talye delilamle touk ulamik. Tonda, anggur mek el susunga ning ara, amakau mek kwebuka deipmacebuk, susunga ning ara, el makau sibaru dam ulamle touk, sik Moab nang babye, urdem teleb asa ulamik. Atonun ton, anggur mek makau ara, kum kukicopura, el nintong lelul touk ulule. Tonda, elto ning dibiceba, pia tuba teleb ulamle touk, ulamik. Bukni, wini talak ara, aning nirya ara, na Allah arye malye kipdeipnamsine.
An dukul kil ap, elce deibuk kilmapu ap atonun ara, sik Samaria tam ulamik nang, an dam bukni, dabu tam (arah utara) ulamik nang atia. Tonda, aning atonun, an weit kil ap, elce deibuk kilmapu ap atonun ara, sik Sodom mutuku ulamik nang, an dam bukni, iknapye tam (arah selatan) noutam ulamik nang atia.
Aning nirya, kintinibuka deipdikopura, anyaik bai tam arye, ninye yupu weik kekelamik aik koprop ara, kanye pin-pin deice arye, akil dana-dana tam, ninye weik bulubuka yanmekce, ninye yupu weik nyanmekak, kekenmek. Sik anang ara, mek pia kum mutuku, karin mutuku, kata mutuku ulamik buk, ‘Yalulume,’ nyabuka, yukupdikba, yanmekce, sik akilapu bitinye ati, urasin teleb una ati, min karakna ning ap, yan dam bikilina ati koulongon ning ap bobuka, akilapu bitinye ati arebik. Tonda, akilapu sik kisok deice ara, weik nang arye kisok deice kalulamak ning, el si mahkota, pia teleb weik ning ton kalupdeibik.
Anggunce, ‘Aminyan talak yata winipnamsil do?’ tenen, pia kum tenilamluma ati ara, anggun Babel mutuku nang ara, na Allah arye ayupu nyapnusin ning ara, moubuka kekepnamnulume. Se, anggun Babel mutuku ululum nang ara, anggun kanye arye, “Nun kanye deipsilye ninguk teninamabe,’ tenebuka ululume. Anggunda, talye tunim abuka bukmunce anggun asik dobuka ulamlum mutuku ara, ‘Nunda pia mikip weik mutuku nang unyabe,’ tenebuka ulamlume. Tonda, ‘Kume sik yuk mutuku unyak nang nirya ara, nunti kum olyasitinge. Nunda pia telebuk unamabeʼ tenen, anggun talima erepdamunce, ulamlume. Aninguk kum bukni, anggunda, ‘Kume, nunda Allah atonun unyabe. Mikip pia weik unyak nang ton, kum unyaka anya arye, nun uk ara mambul weik nang pia unamnyabe. Anggunce kanye arye, ‘Kume, nunda, yukwak kilapu, sikce deiamik mapu nirya dibikiba, pia utotoa kum kilapu ulamak touk, nunda aning pia kum upnamsile. Nunda pia telebuk unamapca!’ tenelamlume.
Piblisite