Yehezkiel 16:38 - Eipomek

³⁸ Ati ara, narye anggunda. malye pia weik winimunce, talye-talye nang ap yolalamlum ning ap, anggun mapu weik olamlum ning ap ati ara, narye wenebuka, ikin kipdeipnamsine. Ara sal ap, kilapu ap, talye-talye mal olan nang ap, ninye ona deiyok nang ap ati, weik tonun wenebuka olamak touk, narye anggunti, weik tonun wenebuka opnamsine. Ara, na yu upnuk ning ap, ‘Sikda ‘Naʼ tenen nang unyak bukni, yuk ning ati si erenyake’ tenen arye, malye kanye bopse deice arye, anggun tibuk, adiparyuk wenebuka opsinyeba, dipnamlume.

Yehezkiel 16:38 Referans Kwoze

Imamat 20:10

Winipmanto, Israel nang tonoknye birye, el kayapu, yuk nang kil dobuka yoplyeura, anye ap, akil ap ara, adiparyuk obuka bataknamlulume.

Zefanya 1:17

Nyabukopura, ayupu ton dukdongobuka nyabuk. Narye anggun wenena ati, weik ikin ning dobuka, anggun nong deice deipsinyopura, adeice arye, amutuku unyak nang nirya ara, imun kanye bobikirye, walwal uplya ati, asing kun nang arye, dengkepdanin balamak touk, upnamake. Ara, sik babye, na Allah dam malye pia weik ulamak ning dengna ati, narye wenebuka opsiniba, sik aopmace nang, sik ining ara, mek balamle touk, ubuka binamle. Tonda, na dopdeipnamne yu nang arye, sik nong opmakce ning ara, ninye tuku deice deiplomakce touk, sik anang nong ara, sakuka tuku deice poulbikirye, asukumuk talye lyupnamle. Sik anang nong ara, tuku pum tam kum weipnamake.

Yeremia 18:21

Ati, wini talak ara, Allah ance sikti, batakmimba, din patana ap, mal oldana ap deice arye, sik mapu nirya dipna teleb uka. Tonda, oldana deice arye, sik aninye nirya oltakana teleb uka. Tonda, yuk mutuku nang yakirye, sik akanye yapu nirya obikiba, kum dalyopura, sik amutuku noutamak nirya ara, kilapu youwak dem unamake. Tonda, mapu kum delinamake. Tonda wisi-wisi nang ara, weik kanye imun uk, dina deice arye, dibinamake. Sik kam nang ara, mal olan noutamak, ya arye seklobikiba, dibinamake, nyapne.

Kejadian 9:6

Yatanye do nirya atonunuk, sikce yuk nang ak obicopura, yuk nang arye, sik ona deiyok nang ati opnamake. Ara, talye ati kum bukni, Allah arye, el ulye touk, mitik anun el urasin atouk, nun ninye kwepdeipsuk ati, ninye olana pia meme.

Wahyu 16:6

“Aning ara, talye ati kum nyapne. Deiyok ara, amalye winin ninye arye an mapu weik oltakalamik. Ara, ance, ‘Aninye ara na mapu unamak’ tenen, wiamlumba, anti diba tenelamik ninye ap, an yupu lake nyana deiyok nang nabi-nabi nang ap, weika arye oltakalamik. Winibuka malye ulamika ati ara, ance nyapdeipmalamba, sik mek nirya ining mekwen danmalabuk, ining mekuk dinamake. Sikda malye ninye ati, ‘Bita merekuka wenepmalume,’ nyapne.” Mek deiyok talibuka ulamuk malaikat arye nyabukba, kekepse.

Nahum 1:2

Allah Yahweh arye, tenelamuk ning ara, ani. Ara, ‘Tukwak mutuku unyak nang ara, yuk talye ning do, isa si do nirya ara, sikce atalye ning, pia si kum erenamake,’ tenelule. Ati ara, yata nang do nirya elti, ‘Nun likʼ tenen, talye ning si erenyak nang ati, wenelule. Tonda, yupu deice bisinyak nang ati ara, wenebuka ikin ning deipnamle. Ara, elti, malye kanye bobuka, ulamikce nang nirya ara, yu weik arye, pia weik tonun wenepnamle. Sik malye unyak ning ati, ‘Daupmalyeʼ tenen, kum namin kipnamle bukni, elti, yaninyak nang ara, kanye imun ning areplirye, yu weik arye wenepnamle!

Yehezkiel 23:25

Nara, yu weik upnukba, narye anti, yu ning ara, an deice deipnamkine. Sik anang ati bikyeba, sikce anti, yu weik tenebikirye, ‘Winitibye,’ tenekinyak ning ara, an deice dobuka deipnamake. Tonda, an amul ap, an u ap ara, seklopnamkiake. Tonda, an mapu ara, tomobuka, tapu koubikirye, sik mutuku bobinamake. Winibikirye, obikceura, anggun tam nang tuba kam ululum nang ara, dobuka, kam kipman uku dongopnamake.

Yehezkiel 16:40

Sikce yuk nang ati yukubikceba, keil dobukabirye, anggun nong deice donokuka, opnamsiake. Tonda anggun nong nirya, pia yu parang ya arye, sekuka opnamsiake.

Yehezkiel 16:36

“Se, anggun Yerusalem mutuku ululum nang nirya ara, na nyapye yupu moubuka kekeplulume! Ara, na Allah Yahweh, aning-aning nirya talibuka, deice tam erebuka, Pia Mikip Weik Deiyoknye birye, nyapnusin yupu ara, moubuka kekepnamlume. Anggun alye una kumce, adiparyuk, ‘Nun ap, nun mal olan nang ap, neika mapnuyabe’ tenen, anggun baju nirya ara, kwiripmunce, ‘Aning ara, pia tenenamabe’ tenen, asum-asum nirya ara, anggun akunum kintininauk ulamlume. Tonda, anggunce, ‘Se, anang ap, neika maptibye’ tenen, pia patalamuk ninye asik nang ap, sikce talye ning, isa si erena ati, anggunce memebuka deiamlum patung berhala atibuk, si erelamlume. Aning kum bukni, tonda anggun mapu weik tonun obukapmunce, isa arena ati, uku dongopmunce, isa mer berhala-hala, sik siuk erelamlume. Anggun mapu obuka, isa arelamluma deice arye, malye weik ning winimunye atonun, narye weik tonun wenepnamsine!

Bilangan 35:31

Yupu moubuka talipmunyakarye, dipkoprob tonoknye birye, ninye tonok ton oploplyeura, aopmalinye ati, adiparyuk wenebuka onamlume. Yuk ton kume. Yuk nang arye, ‘Kume, nun kwit ona kume. El pununa ati, dekna weik ning uang weik arepya deice arye, sikce anye batakikiba, bindoptue,’ nyabuka morobikca babye, aning ara, kekena pia kume. Aning kum bukni, amalye upmalirye, ninye opmalya ati, adiparyuk wenebuka opmunyeba dipnamlule.

Keluaran 21:12

Allah arye, Musa biti nyabuk. Yatanye do nirya, el yu uplya ati, ninye ton opliba, diplyopura, anye el babye adiparyuk wenebuka obikiba, dipnamlule. Ninye ona deiyoknye, el wenena ati, onamlulume.

Kejadian 38:24

Sik nirya talye daulamika ani, wala winilye ton, akunum kibukura, yuk nang arye Yehuda biti, yanuka laka nyabik. “Amio, an mi arye domuk kil, el si Tamar bira, youwak ulul bukni, yuk nang ap, talye neika malamikba, winira mi akunum bopmala ati, laka nyapkiyabe,” nyabik. Nyabuka laka nyabikba, Yehuda birye nyabuk. “E, aning ara, pia malye weik anya arye, nun winilamap touk, akil dobuka boyamunce, weik uku sekuka dongopmunyopura, uku arye dipnamle,” nyabuk.

Kejadian 38:11

Dibukopura, Yehuda birye Tamar biti, nyabuk. “Wini talak ara, an ni koprop dam, tamubuka bimince, youwak kil kibuka asukumuk unamlame. Narye deipse mi Shela bira, tuba mitik mi unmala ati, mitik tonun ton neplyopura, elce anti dopkutue,” nyabuk. Yehuda birye nyabuka deiyok ara, ‘Na mi Shela babye, diplyak do?’ tenen, ayupu nyabuk. Nyabukura, Tamar birye, Yehuda dam batakuka, el li koprop dam tamubuka binuka ulamuk.

Yehezkiel 23:24

Sik yin talin nang yupa weik, an dam yanuka warikuka ona ati, unamake. Ara, (arah utara) tam arye, Kuda basam bukuka, bobanyak kereta perang ap, tonda yin talin nang, sik bona libuka deibikceba, bobuka tuku deice balamle ning deice, bukuka yanamake. Ninye olan talak, sik nong deice lelina ati, weik ning ap, mitik ning ap boyakirye, ninye on parang ap, kisok lelina kat ning ap, ongobuka mutuku dana-dana tam arye, an dam yanuka wareknamake. Narye sik anang ati biknyeura, sikce anti, ‘Aning-aning winiptinye,’ tenenyak ninguk, yanuka winipnamake.

Yehezkiel 35:6

Ati ara, nara pia dipkoprob kam ununa ati, anyapnusin yupu ara, dipkoprob nong kunupnamle! Nara Allah Yahweh, aning-aning talibuka, deice tam erebuka, Pia Mikip Weik Deiyoknye unune. Narye lo arepnyeura, yuk mutuku nang arye, anggun tam nang ati, weik tonun olyanganamake. Anggun mutuku noutam ap, anggun nong deice ap ara, ining weik banamle. Deiyok ara, anggunce malye-malye winimunya ati, ‘Ninye obibiba, ining banamla ara, teleb ukaʼ tenen, kanye deibuka ulamluma ati, aminyan talak ara, abalul ining ara, anggun doplamsiliba, anggun nong deiceuk banamlarya!

Bilangan 35:16

Bukni, anggun nirya arye moubuka tenenamlume. Winipmanto ara, tonoknye birye besi ning arye do, kat yo arye do, yin arye do, weik keil arye do, ato ning bobuka, el kwit oplyak diplyopura, el atouk akunum winipmalinye bira, ‘Elda ninye onanye ululule,’ tenenamlume. Deiyok ara, el mangkau arye ona kum bukni, yu ubukba, el tenena deice arye yuknye oplobuka atia. Ati ara, elda dipkoprob weik malye unanye ati, el wenena ati, anggun adiparyuk tamubuka wenebuka opmunyeba dipnamle.

Bilangan 35:21

Winipmanto ning ton ani. Tonoknye el taruk arye kintinilirye, yuknye oplyeba diplyeura, el taruk arye ninye opmalnye bira, ‘Elda malye weik winipmal deice, ninye onanye ululule,’ tenenamlume. Aning ati ara, anye bira adiparyuk wenebuka opmunyeba dipnamle. Tonda, oplyeura dipmalinye, el tam nang arye, tamubuka anye eipmunyeura, el winina ati, sikce el wenebuka obikiba dipnamle.

Yehezkiel 36:18

Israel ninye arye, pia malye-malye weik winilamika ati ara, na yu weik ulamnukba, weik wenena ning dobuka, sik anang deice bobuka delilamse. Winibuka wenelamse ning ara, talye ati kume. Ara, amutuku noutamak ulamik nang weika arye olamik ning ap, yuk talye ning ati, ‘Nun ni koproba’ tenen, Isa Mutuku Dongonye si erelamik ning ap ati, narye wenen ning weika arye arelamse. Sik malye winilamik ning dekna ati, wenelamse.