Aning winimunya deice arye, anggun asik noutam, ninye balamikak nirya ara, anggun bidamnye, anggun urasin teleb un ning ara, malye kilamlumce, yuk talye balamik nang ap, ubula yolalamlume. Winimunya talak ara, yata barye nang do nirya, anggun nong atibuk, ninye ton baca epmunyopura, bimunce, ‘Amio, na ap neika maptinimnye do?” nyabuka, moropmunce, anang bobuka bobalamlume. Winimunya deice arye, anggun ap, talye daulamik nang ap, neika ubula malamlum ning ara, tabaklumce, pia weik tonun, malye ulamlume. Anggun ap, talye nang ap, yolanauk ulamlume.
Yehezkiel 16:15 - Eipomek15 Bukni, anggunce anggun bidamnye, urasin pia teleb una ning ati, moubuka tenilalumce, ‘Se, nunda dipkoprob urasin pia teleb unyap’ tenen, anggunce, anggun teleb kweirya dolamlum ati, ‘Diba,’ tenelamlumce, erepdan arye, kwalibuka maknya kintinilalamlume. Anggun Israel kilapu arye, ‘Se, nunda pia dip kilapu unyabe,’ tenelamlume. Winiplum ning ara, yata nang do nirya, talye balamik nang nirya ati, ‘Nun neika ubula doptibye’ tenen, dololamlumce, talye mangkau neika malamlumce, ubula yolalamlume. Winipmanto ara, kilapu arye, sik domikce nang batakikirye, yuk nang ap, talye-talye malamak touk, anggunce na Allah ati, bataklamnulumce, yuk ning deice, anggun kanye delilamlume. Gade chapit la |
Yehezkiel 16:15
34 Referans Kwoze
Allah arye Israel ninye ati nyabuk. Minop talak ara, Mesir mutuku ninye arye, anggun nirya opsikce, tapu koubukapsikce, sik mutuku tamubuka bobinamsikba, ikin weik pil dilamsikba, imun kanye bobuka ulamlum bukni, na Allah arye, lyepropsisirye, teleb mutuku boyanamsise. Bukni, anggunce nati, ‘Kume, Allah nyasilye yupu ara, kum kekenamabe. Allah el piluk dobibirye, el amu tamuk kum unamabe,’ tenelamlumce, nati batakanululume. Tonda, dan mutuku do nirya, anggunda weik arye erebuka, bukuk mutuku konak nirya ap, tonda weik yo dam nirya ap bimunce, talye Isa Mutuku Dongonye ati binuka si erepna arye morolulume. Winipmanto ara, ninye domikce kilapu, sik akanye yapu akilapu lik ati, batakmakibuk, talye nang ap ubula yoldalamak touk, anggunda na anggun ni koprop Allah, nati batakanululume.
Anggunce, ‘Talya yolanamap aik ani, tenepnamak’ tenen, lakin ning sekuka, ayolan aik bublan dam deililulume. Winimunya deice arye, anggunda na Allah ati akunum bataknulume. ‘Anyasik kilapu ap, sal ap, ansinibibirye, neika yolanamap’ tenen, anggun ongolulum baju ara, akunum kwiribuka batakmunce, anggun man amsuna deice wekmunce, ‘Yata kil do, yatanye do, na ap neika mapnimirye, yopdananam’ tenen, kintiniplume. Ton nang ara, ‘Neika mana ati kintinibuka deipmunce, sik dekna ati yo bok akunum aremunce, tuba-tuba yolalulume. Anggunce, sik talye yolalamak kilapu ap, sal ap, yolanmakirye, manyakak ara, anggunce, ‘Se, aning ara, pia patasulula ati, aning winiptibye’ tenen, kanye deililulume. Anggunce, yuk nang ap neika maluluma deice arye, anggun baju ongona kumce, anggun nong bananguk elilalulume. Winimunya nirya ara, pia malye weik ululume.
Akilapu bitinye ara, sik wel talak ara, Mesir mutuku noutam ulamdik. Amutuku ulamdik talak, sikda talye-talye yon kilapu ulamdika ati, ninye weika arye, neika malamik. Adeice arye, sikda wel kilapu ulamaka atonun, kum ulamikba, sal arye sik moum talilamik. Min arye, sal ap neika kum malamdik bukni, atalak ara, sal arye sik moum talilamikce, neika yolalamik deice arye, malye pia weik winilamdik.
Tonda anggunce, ‘Teleb kanye uk bobuka telebuk wininamap’ tenen, anggunce anggun bidamnye atibuk, nyaldalulum yupu ara, ‘Akunuma,’ tenena kume. Anggunce nyaldalulum yupu ara ani. ‘Kume, anyaik ara, Allah Yahweh el si eren aik anya arye, nunda anyaik wekenyapa anya arye, malye ning ton, nun dam yanuka ikin kum upnamsile,’ nyaldalulum bukni, tilila yupu uk nyalulume. Anyaik wekmunya babye, malyeuk winipmunyopura, Allah arye wenepnamsile ati, nyapsine.
Allah Yahweh arye, minopce deiyok koubuka, ‘Israel yala ninye kekenamak’ tenen, nabi Hosea biti, ayupu nyabuk. “Hosea anda Israel ninye noutamak bimince, amutuku talye-talye yoltanyak kil, binuka dopnulyame. Akil binuka dopmince, akil arye deipnamle mapu nirya ara, an mapu kopropba kum unamake. Yuk nang arye, an dopnalam kil ap neika ukirye, talye yoldakiba, akil arye, sik yuk nang mapu ton deipnamle. Amapu ara, talye yoltanyak kilapu arye delinyak ninye, sik yala ton unamake. Wininamluma deiyok ara, ani. Ara, winipmantonye wininamlama atia. Deiyok ara, malye kilapu arye, sik minop dolamik nang batakuka, yuk talye daunyak nang ap, talye-talye yoldalamak touk, na mapu koprop, Israel ninye arye, nati batakaninyake. Batakaninyakce, yuk talye ning ati, ‘Nun ni koprop ani,’ nyabuka, Isa Mutuku Dongonye, si erenyake. Wininyaka deice arye, na Allah ati batakaninyake. Tonda, aisa si erenyaka deice arye, sal ap, kilapu ap, talye yoldalamak touk wininyake. Israel nang babye, atonun wininyake. Sikda diksukum teleb kibuka una kumce, malye-malyeuk wininyakce, nara sik ni koprop Allah Yahweh ati, batakuka bindopnike.” Allah arye, Hosea biti nyabuk.
Akil ara, Mesir mutuku binuka ulamuk talak arye dipdongobuka, wini talak noutam nirya ara, ‘Ninye talye yon kil unamneʼ tenen, patalamuk touk, dipkoprob talye yon kil ulamukce, kum bataklamuk. Kilapu yolamikirye winilamak ning ara, tuba uamuk. Sik talye yolana ati, el mitik talak arye, sal arye el ap neika malamik talak arye, akil el moum talilamikce, sik anang arye, ‘Se, winipnuyabe,ʼ tenelamikce, patalamuk touk winilamika deice arye, akil malye kililamik.
Minop talak Yerusalem mutuku ulamlum ninye nirya ara, ‘Na ka,’ tenebuka tonok kanye bobuka, nati kanye talima dukdongobuka ulamnulum bukni, wini talak ara, na bataknulumce, talye-talye yolalamak kilapu atonun ululume. Minop talak ara, diksukumuk ulamlumce, pia telebuk ulamlume. Ninye ati yupu lipsisikuka bokolilamlumce, teleb yupu uk nyalamlum bukni, wini talak ara, olan ninye uk ululume.
Akil el asok deice sekuka deiyamik yupu ara, ani. “Akil el urasin ara, winipmanto kil ulul bukni, aning nong noutam ara sal arye, ‘Deiyok ara ani’ tenen, min kum biktinge. Weik asik domik mutuku si Babel mutuku tam kil talye-talye yolamak kilapu, sik nin deiyok kil ulule. Tukwak ninye arye pia tenepmanto kum ning, pia malye unyak deiyok kil ulule.” Ayupu dumbarye ara, akil el asok deice sekeiyamik ning laka ubukba, eipse.
Atalak noutam ara, se, na mapu nirya arye, aning akunum winipnamlum talak ara, min talak anggunce, na dam malye winilamnulum ning ati, ton alye kum dakdanamlume. Deiyok ara, aning ati ara, tuba kum wenemnamsina atia. Tonda, anggunce talima erebuka, kwalilamlum talak, narye nyapdeiamsise yupu, yaniplobuka, nati batakamnulumce, malye winin ninguk winilamlum ning ati, alye kum dakalanamlume. Deiyok ara, ani. Ara, anggun unamluma dam arye, anggun talima erepdakirye, pia kwalinauk unyak nang nirya ara, anggun kan-kan arye akunum yaknamne. Winipnyeura, anggun tuba asukumuk unamlum nang ara, na pia teleb lek mutuku dup deice dam ulamluma ara, talima erebuka kum kwalinamlume. Ati, na dam ara, malye winin ning ara, ton ap pia kum wininamluma tia.
Tonda, Yerusalem mutuku noutam unyak ninye nirya ati, yupu lipsisikuka bokolina talak ara, diksukumuk ubuka, yupu kum bokolilulume. Anggun ninye deiyok kibuka, amutuku talilulum deiyok nang nirya arye, sik malye winipmace ninye ati, wenelamtum bukni, aninye arye, “Nun winipmap ning ara, namin kipsilyame,” nyanyake. Ara, yupu sekelana ati, yo bok arebikiba, tilila yupu deice aryuk nyalulume. Aning atonun, Allah el si eren aik noutam talibuka, pil donyak nang, anggun imam-imam nang arye, “Nunda yo bok weik arepsikiba doprobibyopura, amutuku noutam unyak ninye nirya ati peterenamabe,” nyalulume. Tonda, Allah el yupu nyapdeipliba, sik Allah yupu laka len ap, aminyan winipnamle ning ati lak lena ap, ati unyak nang nabi-nabi babye, “Yo bok arepsumunba, dopropmapya deice arye, Allah Yahweh elce nyapmasil ning ara, lak lepnamsiyabe,” nyanyake. Wininyak diparyuk sikce tenenyaka ara, ‘Kume, Allah Yahweh, nun dam ausulula ati, ikin ning nun dam kum yanganamsile. Telebuk unamabe,’ tenekirye nyanyake. Utenenyak deice, Allah arye kanye imun ning dobuka, sik nong deice delinamle.
Tonda, Israel ninye sik din ning nirya ara, dinamak bukni, kum boupnamle. Winipmanto ara, sik talye-talye uk yolalamak kilapu ara, sik talye nang ap, yolanyak deice arye, bona weik talinyake. Bukni, sik akilapu ara, mapu kum deiplilamak touk, Israel yala kilapu nirya, sik mapu ton pia deipmanto kum unamake. Aning nirya ara, urdem ati kum winipnamle. Deiyok ara, na Allah Yahweh, sik ni koproba unun bukni, nati bataknikirye, talye ning ati, ‘Nun ni koproba,’ nyabuka si erenyake. Wininyaka deice arye, yu weik unulula ati ara, anggunti wenebuka bataknamsine.” Allah arye nyabuk.
Ati na Allah arye nyalin yupu akunum nyapdeipse. ‘Na yupu kekebuka talibikirye, diksukumuk ulamice nang ara, lyepdopnamsine. Kam unamlume,’ nyapse. Bukni, min talak telebuk upnin yangalamlinye bira, aminyan talak teleb ning bataklirye, tuba tamubuka deiyok koubuka, malye winin ninguk uplirye, ‘Kume, daupmalye, tuba malye-malye winiptinye. Min talak telebuk winilamse deice arye, Allah arye aning teniplirye, lyepdopnamnil,’ tenebuka, malyeuk wininamlanye bira, na Allah arye dipkoprob kum lyepdopnamne. Aninguk teninamlanye bira, el walwal arye teninamle. El anye min talak, teleb upnin yangalamuk ning ara, narye ton ap kum tenenamne. Anye bira, na yupu yanibuka, aminyan malye-malye uplyopura, el malye tuba unamle talak ara, dipliba, el dekna ara, dibin ninguk dopdopnamle.
Tirus mutuku ara, weik laut mekwen lilun, pia teleb sukumak ulule. Tirus mutuku unyak nang arye, deken ning yuk-yuk ning nirya dobuka, yuk-yuk pera mutuku unyak nang ati, bobinuka dekenyake. Pera mutuku nang babye, yuk laut mekwen lilunak unyak nang, ‘Anang arye, adeken ning deknamak,’ tenena ati, abona bobiceba, anang nirya arye dekenyake. Ati, anggun Tirus mutuku ululum nang ara, moubuka kekenamlume. Na Allah Yahweh, aning-aning nirya talibuka, deice tam erebuka, Pia Mikip Weik Deiyoknye ununye birye, anggun Tirus mutuku nang ati, nyapsine. Anggunda, kwalina pia weik umunce, talye tenen yupu deice arye nyalulume. Anggunce, anggun bidamnye ati, “Nunda urasin, pia telebuk unyabe. Nunda, pia teleb nang unyaba anya arye, pia teleb kanye deibuka unyabe,” akunum nyalulume!
Ayupu nirya, mikip arye nyapse bukni, sikce na nyapse yupu kekena pia kumce, ‘Allah arye nyapsilye yupu kum wininamabeʼ tenen, nati bataknike. Winipnyopura, anggun kan-kan noutam arye, tonoknye babye, sikce si erelamik isa si, patung-patung pia malye winilamik ning ara, kum batikik. Tonda, sikce, ‘Aisa si erenamapʼ tenen, kanye deibuka, delilamik patung-patung nirya babye, pia kum batakamik. Sikce Mesir mutuku noutam ulamik talak arye, isa mer si erelamik ning, el si berhala-hala nirya ara, kum batakamik. Atalye ning kum batakamika ati, narye, ‘Ura, sik Mesir mutuku noutam tuba unmak talak ara, narye sik Israel yala nang wenebuka, pia ikin ning, sik nong deice deipnamne. Sik malye wininyak ning ati, na yu weik unilye ning ara, sik nong deice deipnirye, sikti, weik tonun wenepnamne,’ tenipsirye kintinip deiamse.
Allah Yahweh arye Nyabuk. “Winipmanto, sal tonok ton, kil akunum domlye bukni, ‘Akil bataknun,’ teneplirye akunum batakalule. Winibuka bataklyopura, akil yuk nang doprobikceura, min domlinye birye, tamubuka kum doproptue. Aning winina ara, amutuku nirya malye uptue. Israel nang, yuk kilapu ati weik tonun moun dilalumce, ubula yolalamlum ati ara, wini talak na Allah dam tamubuka yatum do? Aning ara kum winiptume.” Allah arye nyabuk.
Allah arye nyabuk. Anggunda, anggun apu koproba, Yakub birye deiamsukba, dadeipdanin yangalulumce, ululum ninyeo, anggunda moubuka kekepnamlulume. Yakub birye deiamuk nang ati, narye, ‘Sik si ara, Israel yala nang nyapsina anya arye, ninye arye nyanamsiyake. Tonda, minop talak ara, anggun pununanye Yudah birye deiamukba, dadeipdanin yangalamlum nang ululume. Anggunce, nyalin yupu nyaplum talak ara, ‘Nun ni Allah Yahweh, el si deice arye nyapsiyabe,’ nyanamlume. Tonda, ikin upsiliba, ‘Nun ni Allah arye melipnamsilʼ tenen, anggun Israel nang arye, na si erenululume. Aning nirya winibuka nyalulum bukni, dipkoprob ning ara, anggun kanye deice arye, diba tenebuka kum nyalulume. Talye yupu atonun nyabuka, si bambol deice aryuk, nyaltakalulume. Dipkoprop diksukum ubuka, teleb deice arye, kum nyaltaklulume.
Minop talak, Yehuda tam ulamik ninye arye, isa si erelamika ara, Manasye el li Raja Hizkia birye, obuka batakamukce, akunum kum daneiyamuk. Winyamuk bukni, el mi Manasye birye, Raja kina ati tikukabukce, Bahal, aisa si erena ati arelyanganak mesba ara, tuba tamubuka dobukce, memepdeiamuk. Tonda, isa si ton Asyera, aisa si erebuka kina ati, weik cang yo urasin, teleb kibuka puturubukabukce, ikukba, aning dam isa si erelyangalamik. Ara, Israel mutuku noutam, Raja kibuka taleamuknye, Raja Ahab birye, memepdeiamukce, si erelamuk touk ubuka, Manasye babye aning deiamukce, isa si erelamuk. Tonda, Manasye elda, im deice ap, im noutam ap, kam ulamle mikip ning ton, ‘Sikda pia weik mambulʼ tenen, sik si erelamuk.
Ara, weik imun kanye bon ning, Israel tam ulamik ninye deice yayuka deiyok ara, ani. Ara, Asyur mutuku yin talin nang arye, Samaria mutuku ulamik ninye yanuka obikce, amutuku alubikce, sik mutuku Asyur tamubuka bobinamika deiyok ara, talye ati kume. Ara, Israel tam ulamik ninye arye, yuk talye ning, isa mer ati, “Nun ni ani,” nyabuka, isa si erelamik atia. Tonda, min talak ara, Mesir mutuku ninye deiyoknye, Firaun bira, Israel ninye ati taleamukce, ikin weik ning, sik nong deice delilamukba, sik ni Allah Yahweh ulamuka arye, elce sikti, lyepdomukce, Mesir mutuku noutam bobinuka, telebak Kanaan mutuku boyanamuk. Bukni, Israel ninye arye, Allah Yahweh dam, malye winilamikce, amalye winilamik ning ara, Allah si kum erelamikce, talye-talye ning ati, “Nun ni ani,” nyabuka, isa mer siuk erelamik deice ati, Allah arye akanye imun ning, sik nong deice deiamuk.
Winibuka aning nirya teninmoka ani, tenibukopura, yuk nang ap, yupu talipmeka ani, ‘Aning ara winiptinye,’ akunum tenebukce ninye deiyoknye birye, dekna weik kat ning emas doprobukce, sapi urasin atonun puturubuka bitinye kintinip deibuk. Winibukopura, elce amutuku ulamik Israel ninye ati nyabuk. “Anggunda Yerusalem mutuku uk baluluma ara ikin arye, balalum do? Wini talak ara, Israel ninye anggun dipdelulume. Israel ninye anggunti Mesir mutuku noutam arye, lyepsukce boyangalamsuk allah ara, sapi basam urasin atonun ara aupmale,” nyabuk.
Aminyan talak ara, sik Israel yala nang ara, tamubuka Allah Yahweh arye, Aning ara pia malye ning anya arye, aning ara na like,’ tenelul ninguk talibuka ulamik. Ara, sik Israel nang arye, Allah Yahweh ati, tuba kum tenebikce, elti, ton tamubuka, kum si erelamik. Israel nang ara, isa si Bahal, aisa-aisa ap, tonda Asytoret isa ap, aisa uk sik si erelamik. Ara, Sidon mutuku noutam ulamik nang ap, tonda, Siria mutuku noutam ulamik nang ap, tonda, Moab mutuku noutam ulamik nang ap, tonda Amon mutuku noutam ulamik nang ap, tonda Pilistin mutuku noutam ulamik nang ap, anang-anang, sikce si erelamik isa-isa uk, Israel nang babye, aisa si erelamik.
Ulamikce, sik Israel yala nang ara, Kanaan mutuku nang ap, talye dopdanuka ulamik. Israel nang arye Kanaan mutuku kilapu dolamik. Aning atouk, sik Israel yala nang arye delilamik kilapu ara, ‘Sik Kanaan mutuku nang dopnamakʼ tenen, arelamik. Israel nang ap, Israel kilapu ap ara, Kanaan mutuku nanguk dolalamik. Amutuku nang arye, sik si erelamik isa dem, sik babye aisa siuk, erebuka kilamikce, malye weik ulamik.
Winilamika deice arye, sik Israel ninye arye, Allah el si Yahweh ati yaniptabik. Ara, sik apu yapu arye si erelamikba, melilamuk Allah batakike. Tonda, Yahweh arye sik apu yapu Mesir mutuku noutam arye, lyebuka melipnin yangalamukce, winiryuk teleb mutuku bobuka delilyayuknye, Allah ati yanibik. Winilamikce, Kanaan mutuku noutam bukni, amutuku-amutuku binuka ulamika noutamak, amutuku-amutuku ulamik ninye arye, si erelamik ninguk, sik Israel ninye babye, aisa si eren ninguk talibuka si erelamikce, isa piluk dolamikce, amalye pil dobolbalamik. Winilamika ati, Allah el kanye talima yu weik ubukba, Allah eibukce, yu pia weik ubuk.
Allah el ‘Naʼ tenen, ninye, Israel nang ara, aning-aning nirya dilamikba, sik nong nena ara, nong kalimna dongopna arye, weik arye nelamik. Aning-aning telebuk ulamuka ani, sik Israel ninye arye, malye kibuka, minop talak arye, sik kwepdeiamuknye Allah ati, ‘Nun like’ tenen, batakik. Tonda, sikti, lyepdomuknye Allah ara, el si yanibuka bataklamik. Ninye arye, ‘Yu nang arye opsicak’ tenen, tonda, ‘Weik mutuku pala keil leleipnamsil’ tenen, akeil donga duknulbalamik touk, sik lyena deiyoknye Allah ara, weik mutuku yangan keil atonun ulamsuk bukni, sikce elti, bataklamik.
Atalak ara, anggun urasin pia teleb baju, ongolamlum ning ara, ton tam bokuka doproplumce, yuk nang talye ubula yolana ati, yo lakase yekuka, domluma deice tam singipdongoplumce, anang ap neika malamlumce, ubula yolanauk ululume. Se, anggunce, aning winiluluma nirya ara, min talak kum winilamik bukni, anggunda dipkoprob pia malye winilamlume. Aning nirya ara, ninye arye winipmanto kum ning, pia mem ning winiluluma ati, aning kum winipnamtume! Tonda, aminyan talak, aning atonun ton, kum winipnamlume!
Tonda, Israel nang ap, sik kayapu ap, tonok kanye bobuka, anggur mek yu arye, kanye wangalamak mek weik arye dibicopura, sik kanya walwal ulamle. Yu mek weik akunum dibicopura, ‘Talye-talye yolamak kilapu danak unmak do?’ tenen, epra banmaca ani, eibicopura, akilapu ap, neika manyake. Amalye winin ning ara, pia pataliba, ‘Awininyab ning ara, nun alye asa weik unamabe,’ pia kum tenenyake. Tonda, ‘Telebuk uptibiba, yuk mutuku ninye eipsikirye, Israel ninye ara, pia teleb ubuka wininyak ninye ara ani, tenepnamsiyake,’ tenebuka, pia kum tenenyake. ‘Teleb una ara dauplye, malye ubibirye, alye dakdapya babye, ara mambul kume,’ tenenyake. Teleb winin ning ton, pia kum wininyake.
Se, anggun Israel mutuku noutam ululum nango, yuk mutuku noutam nirya unyak nang arye, kanye deibuka ulamak touk, anggunce aning kum wininamlume. Deiyok ara, ani. Na Allah arye anggunti, pia kalekuka melisunun bukni, anggunce nati, ‘Elda nun like,’ tenemunce, batakanululume. Winipmanto ara, ninye arye, sik akunum domice kilapu batakuka, yuk talye yolan kilapu neika ulamak touk, anggunce anggun ni Allah ati, akunum bataknulumce, talye isa ati si erelulume. Tonda, anggun mutuku noutam, ninye arye gandum duk teiklamakak arye, isa el si Bahal dewa uk erelulume. Winiluluma deice arye, sik talye yolan kilapu arye, sik nonguk dekelalamak touk ululume.
Piblisite