Nyabukopura, elce ayupu ton nyapnuk “Anda ninye koprop arye deipkiknye ulyame. Narye Yerusalem mutuku nang dinamak din ning nirya ara, kum kipdeipnirye, sirya dakeipnamne. Winibuka akunum kum kipdeipniba, din yala aning-aning nirya ara, kum kipdeipnamne. Winipniba, sik din ning yala-yala nirya ara, sukdopnamle. Winipliba, sikce, “Se tenena ap, ikin una ap ukirye, sik din ap, mek ap nirya ara, kum kipdeipnamne.
Yehezkiel 14:13 - Eipomek13 Se, anda ninye sirika arye deipkiknye ulyame. Yata mutuku nang do nirya ara, amutuku noutam ulamikce nang nirya arye, malye winilamtingce nati, ‘Elda pia diba kum tenenyaba ati, elce nyapsilye yupu, talibuka pia kum wininamabe’ nyabuka, bataklamniting toura, na adiparyuk amutuku noutam ulamikce nang nirya ati, wenebuka, weik ikin ning, sik deice deipnamne. Aning winipnirye, na taruk mikip arye, adiparyuk wa wilamik ning nirya, kum kipdeipnirye, sik din ning kintinibuka deilinyak ning nirya babye, malye kipdeipnamne. Winipnyopura, kanye imun weik din patan talak arepnyeba, yanamle. Tonda, amutuku nirya malye kipdakceura, amutuku noutam unyak nang nirya, opnyeba dibikceura, sikce taruk talibuka weinyak kam ulye ning nirya babye, obuka sirya daknamne. Winipyeba, atalak ara, yuk mutuku nang babye, amutuku kum yanuka unamake. Amutuku ara, asik oldem upnamle. Gade chapit la |
Yehezkiel 14:13
26 Referans Kwoze
Tonda, anggun din ning pana deiyok ning nirya ara, kum kilinamsine. Winipnyopura, anggun din ning, pia mitika aryuk uplyeura, anggun mutuku kilapu takubarye, kilapu arye, ‘Roti kwaning din ning dapnuyapʼ tenen, pataplyeura, roti bun ning ara, mitika aryuk upnamla ati, roti dana tonok aryuk danamake. Aroti kwaning danmaca ani, akunum dabuka deibikcopura, ‘Ninye nong ikin ulamlye touk, roti kwaning ning ton, dobuka arebibyeura, dinamakʼ tenen, ninye nong ton ikin ati, dipdekirye, din ning bokuka arelenmake. Winipdenamak bukni, timbangan arye kiklibiceba, auplye touk bokuka arebikce babye, din ning mitikuk upmalya ati, din ning kum bounamsile. Din patanauk unamsile.
Amutuku noutam kam tuba unyak Israel yala nang nirya arye, diba kum tenelamnikce, ‘Allah arye nyapsilye yupu nirya ara, pia kum kekebuka talipnamabe,’ tenelamikce, yaninuk ulamnike. Winibuka, malye weik winilamika ati ara, amutuku tuku nirya ara, na taruk deice arye, malye kipdeipnyeba, ninye arye kounyak ning nirya ara, pia kum panamle. Amutuku unyak nang ap, sikce domik asik nirya ara, kum kipdeipnyeba, pia asik oldem upnamle. Nara Allah Yahweh, weik tonun erebuka, aning-aning nirya talibuka, Pia Mikip Weik Deiyoknye unirye, nyapsine. Ati ara, anyapmasin yupu nirya ara, dipkoprob nong upnamle! Allah arye, nabi Yeheskiel biti, ayupu nirya nyabukak, kekebukce sekdeibuk.
Ura, na Allah arye, sik mutuku imun kanye bona uk areptinyeba, ninye nukmanto kum dipting bukni, aning ara, mitik tonun winiptue. Bukni, ninye ara, yupa pia weik, nukmanto kum dipnamtinga ara, ani. Ara, na Allah Yahweh arye, weik tonun erebuka, aning-aning nirya talibuka, Pia Mikip Weik Deiyoknye ununa ati, narye kanye imun wenen ning, dumbarye dopdeiptinyeura, ninye nukmanto kum diptinge. Ara, pia kanye imun ning ara, Yerusalem mutuku noutam adumbarye wenen ning arepnyeba, amutuku noutam unyak nang ap, sikce weinyak kam ning ap, nirya kum kipdeiptinye. Awenen ning ara, ani. Ara, yuk mutuku yu nang wibuka, sik dam arepnyeba, anggunce Yerusalem mutuku noutam ululum nang ati, adiparyuk olyasitinge. Tonda, weik din patana deice arye, ninye weik diptinge. Tonda, yu weik talye bai tam daulul ning arye, ninye weik ton obuka diptinge. Tonda, imun kanye bobuka, Yerusalem mutuku noutam dobuka, deiptinyeba, ninye weika arye diptinge. Winiptinye deice arye, ninye nukmanto kum ap, kam ulye ning ap, weika arye opnirye, kum kipdeiptinye. Dipkoprob ning ara, sik Yerusalem mutuku noutam tuba unyak nang, malye weik wininyaka ati, sik wenena ati, imun kanye nirya bobuka, sik deice deipnamle!
Aning atonun ton. Winipmanto ara, na Allah arye, yu weik upnilyeba, imun kanye bona ara, amutuku noutam arepnyeba, ninye weik nukmanto kum dipmakcebuk, tuba tamubuka, amutuku noutam, ninye ap, sikce talibuka weinyak kam ning ap nirya ara, diptingba, aning nirya kum kipdeiptinye. Winiptinyeba, sik min talak, pia diksukumuk winilamik nang winilye, Nuh ap, Daniel ap, Ayub ap, amutuku noutam ubtinga babye, sikce yuk nang nirya, pia kum lyepdeiptinge. Tonda, sik mining mapu babye, kum lyepdeiptinge. Akum bukni, sik pia diksukum unyak deice arye, sik nong atibuk lyepdatinge. Dipkoprob ning ara, sik nong atibuk, naryuk lyepdeiptinye. Nara, aning-aning nirya talibuka, Pia Mikip Weik Deiyoknye unune. Tonda, na Kam Pia Una Deiyoknye ununa ati, akunum nyapmasin yupu, ‘Winiptue,’ tenipnyopura, dipkoprob aninguk upnamle!
Winiptu ura, telebe. Winipmanto ning ton nyapnune. Aning atonun, arup lak nyapmanu mutuku atonun uptopura, naryuk, “Amutuku noutam ara, ninye ona ati, yu yin nang dopdeipnyeura, amutuku noutam nirya ara, ninye nirya obuka, sirya daknamake. Ara, ninye nirya, sikce weinyak kam ning ap, talye bai tam kam ulye ning ap nirya ara, obuka sirya daktinge.
Ati ara, na Allah ati, anggunce kintinibuka deipnamlum din ning nirya ara, anggun wenena ati, kum kipdeipniba, anggun din ning nirya ara, kum daneipnamne. Weik din patana akunum upsilyopura, winipmanto ara, ninye arye mal lubikiba, urup tatce ulamle ning arye, yuk nang el mun luklamak touk, upnamsile. Winipmanto ara, mal doplyopura, ara talye ati kum bukni, dipkoprob anggun oltakana ap, kum kilina ap ati, winipnamsine. Ati ara, anggunce taliplum mutuku nirya ara, bataknirye, anggun din ning kum kipdeipnyopura, dipkoprob kwaning patan ning weik yanamle. Wininamle talak ara, anggun amutuku ululum nang nirya ara, kwaning patana deice arye, ‘Se’ tenena ap, kwaning patana ap, unamlume.
Ura, wini talak ara, anggunce malye kanye bobuka, ‘Se, nun mutuku ara, pia oldemuk upmasile! Nun mutuku ara, Allah arye lo arebukba, sik Babel mutuku yin talin nang arye yanuka, obuka malye kipsikce, nun mutuku alubuka doprobikce, talibikba, nun mutuku ara, kata sukum atonun ubuk. Ati ninye babye, bai tam talye kam ulamle ning babye, amutuku kum unyake! Wini talak ara, anggunce ayupu nyalulum bukni, narye anggunti nyapsine. Doyanamle talak ara, amutuku nirya tuba tonap, teleb kipdeipnamsine! Wa wibuka koupnamlum ning ara, teleb aryuk libuka dekelamunce, dinamlume.”
Tukwak mutuku nirya loklirye banauk upnamle. Winipmanto ara, yu mek dipmace nang ara, kanye bona kumce, wiring-wareng apdanin balamak touk, mutuku nirya ara loklirye bana uk unamle. Tonda yo taruk arye, mitik dolina aik donmica ani, weik kum yalirye peiyakuka, otam, atam kilirye, lokuka poulbalamle touk upnamle. Tukwak mutuku uluplopnamla ara, ninye arye malye unyaka menenga arye Winipnamle. Tukwak mutuku dakuka bataklyeura, tonap tamubuka ereiplyeba, teleb kibuka yan kum upnamle.
Dipkoprob, Allah Yahweh, elda aning-aning nirya deice tam erebuka, pia mikip weik ulul deiyoknye birye, im deice yin talin malaikat nirya talilirye, mikip weiknye ulule. Elcuk, Yerusalem mutuku weik asik ap, Yehuda tam noutam ap, sik amutuku bitinye noutam unyak nang arye, sik din ning ap, mek ap, bulubuka kintinibuka delilamik ning ara, doproplirye, kum kipdeipnamle. Din patana weik upnamsile.
Bukni, nun malye wininyap ninye ara, Allah ance nunti, “Aning winina meme,” nyapsulum bukni, aninguk tamubuka wininyabe. Tonda, ance, “Aning ara, wininamlulume. Aning ara, pia kum wininamlulume,” nyapsulum yupu yaniltabirye, batakanyabe. Winibya deice arye, an nyapdeiamsulum ning nirya ara, akunum batakupe.
Sik Edom yala nang arye, aning winibika ati, na Allah Yahweh arye, aning-aning deice tam erebuka, Pia Mikip Weik Deiyoknye ununye birye, ayupu ton nyapsine. Na taruk arye, Edom mutuku nang ara, obuka wenepnamne. Narye amutuku unyak nang ap, sikce weinyak ning nirya ara, obuka kum kipdeipnirye, sirya daknamne. Narye amutuku unyak nang ap, sikce talibuka weinyak kam ning ap nirya ara, kum kipdeipyeba, aik oldemuk upnamle. Ara, narye Moab noutam mutuku si, Teman mutuku noutam ap, anyapce dipdongobuka, Moab mutuku bukni, (arah selatan) mutuku si, Dedan mutuku ap nirya ara, anang babye, sikce weinyak ning babye, parang ya ap, mal ap arye opnyeba, dibice deice arye, kum danamle.
Nyabukopura, ayupu ton dukdongobuka nyabuk. Aning nirya ati ara, diba, Yehezkiel anda, ninye sirika arye deipkiknye ulyame. Ati, ance sik Israel yala nang nirya ati, lak nyalbinulyame. Ara, ance, ‘Anggun ni koproba Allah, el si Yahweh arye nyapsilye.' Ura, na Allah Yahweh ara, aning-aning nirya talibuka, deice tam erebuka, pia mikip weik ununye birye nyapsine. Ara, sik Israel yala nang, anggun apu yapu nang arye winilamik ning ton, nati, ‘Allah ara, nun like. El nyapsilye yupu, pia kum kekenamabe,’ nyabuka batakamnikce, malye yupu weik nyalamnik. Sikce na ap, na yupu ap ati, moubuka kum taleamikce, bataklamnik. Na si ati, malye kipdeipnikce, na siuk kum erelamnike. Sikce malye weik winilamik ning ara, ani.
Asipdenmasiba, Allah arye, ayupu ton tamubuka nyapnuke. “Se, sik Israel yala tuba unyak nang ap, tonda Yehuda yala tuba unyak nang ap, sik nirya ara, pia malye-malye ning talibuka winilamik ning ap, tuba malye wininyak ning ap ara, pia weik ulule. Aning ara, nukmanto kume. Sik tuba malye-malyeuk, weik tonun wininyaka anya arye, amutuku-amutuku noutam nirya ap, Yerusalem mutuku weik asik domik noutam ap, ninye olana weik unyakce, ninye ining weik sakalule. Tonda, aning atonun, Yerusalem mutuku noutam nirya babye, atalak unyak nang nirya ara, yuk nang ati, ninye yupu lipsisikuka bokolinyak talak ara, dipsukum yupu uk, kum nyanyake. Tilila yupu nyanyaka deice arye, ninye yupu lipsisikuka bokolina, deiyok kum upmalibuk, ikin ning dobuka, yuk nang nong deice deibicopura, yaninyake. Tonda, sikce nati, tilila yupu deice nyaninyaka ara, ani. ‘Kume, Allah Yahweh ara, Pia Mikip Weiknye ulirye, aning nirya talilul bukni, amutuku noutam ati ara, akunum bataksuke. Allah Yahweh arye, akunum bataksuka anya arye, nunce malye ning talibuka wininyap ning nirya ara, pia kum dinamsile,’ nyanyake.
Yerusalem mutuku unyak ninye nirya ara, sik nong deice malye updeipnamake. Winibikirye, pia malye una ap, yu kanye bona ap, unyake. Minop talak ulamik ning nirya ara, elti, si erelamikce ulamik touk, winina telebe. Wini talak ara, nong bananguk eipmaba deice arye, ‘Nun like’ tenen, batakanyake. Wininyaka babye, el asok nirya lelipdoplye talak ara, ‘Bico,’ teneplyopura, el talima uk dipliba batakalule.
Tonda, na Allah Yahweh arye, Yehuda tam talilul ninye deiyoknye, Raja Yoyakim biti, nyapnamkin yupu babye seknulyame. Ayupu ara, ani. Na Allah Yahweh arye nyapkine. Narye, Yeremia dam mambul yupu nyamsiba, elce Baruk dam nyapdeibukura, sekamuk yupu ara, ance mandipna kanye bobuka, akunum uku daplume. Ara, ‘Abuku dobuka, uku dapnyopura, Allah arye derepnamnil do, kum do?’ tenena kum arye, talye lukparabuka, uku daplume. Tonda ance, ‘Yata deiyok ning ati, Allah arye abuku noutamak ara, Babel mutuku deiyok kibuka taleamuknye biti, mikip arepneba, Yehuda mutuku unyak ninye nirya ap, sik weinyak ning ayala-yala nirya ap, obuka, sirya daknamake,’ nyapsuk do? ‘Aning ara, na like,’ nyaplumce, abuku dobuka, uku daplume.
Sik Israel ninye arye, pia malye weik tuba wininyaka ati ara, na si ara, Allah Yahweh arye nyapsine. Nara, aning-aning nirya deice tam talibuka, Weik Erena Deiyoknye ununa anya arye, narye, ‘Winipnamne,’ tenepnye touk, wininune ati ara, na weik arye wenepnamsine. Nara sikti, lik kanye bobuka, yu weik unulula anya arye, amutuku unyak ninye ap, amutuku ap ati, mikip weik deice arye, wenena ning weik arye arenamsine. Weik mek makau arye, mek kwebikirye, tonok talak aniryuk amek nirya dikiltaklamak atonun, sik deice wenen ning weik arye, aninye ati arenamne. Ara, na si erena ati dobik aik ara, weik yu deice arye, dakuka bataknamne. Tonda, amutuku noutamak unyak ninye ap, amutuku unyak kam ning nirya ap, bai tam palamle yo nirya ap, tonda ninye arye koulamak ning nirya ap, ninye arye weinyak kam ulul ning ayala-yala nirya ap, kum kipdeipnamne. Na yu ara, weik uku dinmalirye, kum tangapmanto ulamle touk, weik uku dopkwetepniba, amutuku noutam ulul ning nirya, uku dinamle. Auku ara, ninye arye kum tangapnamake. Pia dilamlya ani, aning nirya diplyak arye, sirya daknamle. Allah arye, Yeremia biti laka nyabuk.
Narye nyabuka moropse. “Se, na ni Allaho. Diba na ni Allah, nara dipkoprob mambul kanye bopnarye, alye weik upmanile. An morona ati ara, na kisok erebuka an dam dina ara, na pia ilil ati, kum winiptinye. Deiyok ara, nun malye unyap ning ara, pia weik tonun tabaknin basiliba, weik tonun nepnin basilirye weik usulule. Winipmanto ara, nun malye winin ning ati, adiparyuk wenebuka opnamsutum deiyok ning ara, nun kisok bisibuka, im deice binmanto akunum ulule,’ tenepne.
“Ninye tukwak kwepdeibseba, tukwak mutuku noutamak unyak nang ara, kum daneipniba, tukwak mutuku ara, talye lo diamuk upnamle. Tonda, sal diamuk kum bukni, kilapu ap, tuku deice balamle ning, kam un ning ayala-yala nirya ap, kwising ap, kwatima ap, maka ap, aning-aning nirya ap, kum daneipnamne. Aning-aning nirya kwepdeipsa ara, lik weik upnilye ati, malye kanye bopne,” Allah el si Yahweh arye, nyabuk.
Allah Yahweh, elcuk na ati, pia moubuka kalikuka dinulule. Wininilirye, na nong noutamak nirya ara, bol teleb unulule. Tonda, na talima noutam ara, kanye nirya obinapna, ayanapna kibuka, na duk-duk noutamak welebinapna, kouluka yanapna kinulule. Ati nara, akunuma ninye ona atonun unune. Wininirye, ninye dibikirye, balamak aik dam atonun unune.
Winilamika ani, sebelas tahun (11) noutamak bukni, wala dumbarye deice, tanggal sembilan ara, Yerusalem mutuku noutamak, ‘Naʼ tenen, deiamik din nirya ara, sirya dakikba, weik kwaning patana kibuk. Winibuk talak ara, sik Yehuda mutuku ulamik ninye nirya ara, dina pia kum ubuk ati, dina patabukba, imun kanye bobik.
Diba, na Allah arye, na taruk mikip arye, dopkwetepniba, sik unyak mutuku noutam nirya ara, ninye weik tonun obuka kum daneipnamne. Winipniba, kam ulye ning ap, yo ap, aning-aning nirya kum kipdeipnyopura, sik mutuku ara, oldemuk upnamle. Ara, iknapye tam (arah selatan), mek ap, ninye ap pia kumak arye, asukum arye dipdongobuka, dabu tam (arah utara), asukum arye dipdongobuka, Ribla mutuku dam ap, anoutam mutuku nirya ara, aning-aning nirya kum kipdeipnyopura, anggun Israel yala nang nirya ara, nati, ‘Se, elda dipkoprob Allah Yahweh ulule. El mikip ara, pia weik ululnye ati, elce nyalye touk, dipkoprobuk winilule,’ tenen, moubuka kel biknamake.
Piblisite