Yehezkiel 10:2 - Eipomek

² Aning eipse talak ara, Allah Yahweh arye, pia teleb kain baju lenan ongopmoknye biti, nyabuk. “Otam tikmak Kerub-Kerub, sik yan amu tam, aupmal bisik arye wekmince, roda-roda aupmal noutam, binuka weknulyame. Asukum wekminyopura, uku kalum aupmal noutam arye, kalum ton dopropmince, an taruk arye talipnulyame. Akalum dopropminyopura, dobukapmince, amutuku Yerusalem mutuku deice tam, im noutam arye, utam yamupminyeba, Yerusalem asik deice saknamle,” nyabuk. Nyabukba, adiparyuk nyapdeipmok touk, anye birye wininmokba, nara moubuka bita, dinmase.

Yehezkiel 10:2 Referans Kwoze

Wahyu 8:5

Winibukba, amalaikat arye, Allah el si erena ati, siltong teleb ning uku dongonyak, emas meja deice dilamuk uku dobuka, ngolol makau songgol talipmok ning pum tam dongobukba, langdibuk. El ngolol makau langdibukopura, aning nirya mikip arye im deice arye, tukwak mutuku dopkwetebuk. Auku dobuka tukwak mutuku deice dopkwetebukura, liman ap, bebeya lakna ap, weik lelim ap, weik mutuku lulukna ap ubukba kekebuka eipse.

Yehezkiel 1:13

Akam unyak ning, sik nong noutamak arye ubuk ning ara, uku sekmakiba, uku dinmalirye, uku duk lonmalirye, bi paralamle tonun ubukba eipse. Tonda, sik dumbarye bukni, sik kan-kan ara, weisa ubikiba, dirina weik ulamle touk ubukba, narye eipse. Auku buk noutamak nirya ara, dirina weik ubuk. Tonda, auku buk noutamak arye, bebeya lakna weik arye ubukba, mil parabuka bindakuk.

Yehezkiel 10:16

Akerub banmek talak ara, sik nong dam bukni, amu tam uamuk roda, yan serek babye, neik bisikuk banmek. Tonda, atonun, sik Kerub nirya arye, sik pol nirya laklopmekce, banmek talak babye, sik yan dam uamuk yan serek ning babye, melibuka banmek. Mining damuk, neika tonok kibuka unmek.

Yesaya 30:30

Kanye deibuka mot nyapnin banamlum bukni, Allah el mikip weik yupu lelim ara, pia mambul weik ulye ning, ‘Sik nirya kekepnamakʼ tenen, el yupu weik tonun nyapnamle. Tonda, Allah el mikip weik taruk arye, malye unyak nang opnamle ning babye, sik nirya eipnamake. El pia yu weik ubuk ning ara, ninye mutuku sirya im sirya nirya ara, eibikirye el mikip weik kel biknamake. Winipmanto ara, Allah el mikip weik ap, el yu weik ap ara, uku buk arye aning nirya dilamle touk ubuka diplirye sirya daknamle. Tonda, weik mok mikip arye celamle touk upnamle. Tonda, liman ap, weik keil duk-duka moul mok, es ap, kum ap, yangalamle touk ubuka yanamle.

Mazmur 140:10

Na ni Allah, ‘Na mal olan nang arye, maknya kintinibikirye, nati opnikcak’ tenen, ance anang ati, yupu sekenalame! Utenepnarye, moropkine na nio. Teleb ning ara, sik ayu nang arye nati, ‘Anye malye kipdeipnuyabe,’ teninyak ning ara, sik nong deiceuk, tamubuka bitue. ‘Ance anang ati winipnalam’ tenen, moropkine na nio.

Yehezkiel 9:11

Nyabukopura, atalak aryuk, pia namin teleb baju, el si kain lenan ongopmoknye birye, tamubuka yayukce, Allah ati yanuka lak nyabuk. Ara elce, “Na ni Allah, ance, ‘Aning winipnamlame. Aning ton kum winipnalame,’ nyapdeiamuk touk, aning nirya ara, adiparyuk akunum winibuka, sirya dakmane. Tonok babye, kum batakse,” nyabukba kekepse.

2 Raja-Raja 25:9

Nebukadnesar birye, Yerusalem mutuku yayukce, Allah el si Yahweh, el si eren aik domik ning ara, uku dongobuk. Tonda, Yehuda tam ninye deiyoknye el weik aik ton uku dongobuk. Aning atonun, Yerusalem mutuku noutam anyaik-anyaik dolamik ning nirya ton uku dongobukba, anyaik nirya uku dibukce kum dayuk. Aninguk kum bukni, Yerusalem mutuku weik aik nirya uku dongobuka sirya dakik. Tonok ning babye, kum batikik.

Mazmur 18:10

Aning winipkuk talak ara, ance im deice kukuka dinmalumce, tukwak mutuku yalume. Tukwak mutuku yalum talak ara, pia mirin dua ara, an yan amu tam upkukba, adeice arye yalume.

Daniel 7:9

“Wininmok ning anyuk, tuba dinmasiba, ninye deiyok nang bun ning, pia teleb ning ton, yanuka ubukba, eipse. Tuba dinmase talak ara, pia minop talak donirye, Kam Ulamuka ani, Pia Tuba Kam Unamle Deiyoknye yayukce, abun ning deipmeka noutamak arye, tonok ning deice yanuka bukuk. Ayanuka bukuknye bira, el ongopmok baju ap, el potong ap ara, pia teleb ning kurulamle touk ubuk. Ara, ngarye maka potong, pia kurulamle touk ubuk. El ninye deiyok nang bun ning deice, bukmokak ara, uku buk atonun ning, labum-labum abuka pakanmokak eipse. Tonda, el yanuka bukmok ning amu tam ara, el yuk arye balamle ning, yan serek el si roda ton uamuk. Ayan serek ara, yan sirya ara, uku buk labum-labum abuka, pakanmokak eipse.

Keluaran 25:18

Winipmunyopura, malaikat urasin atonun ning, el si Kerub, bitinye memepnamlume. Aning memena ati ara, pia dekna weik kat ning, el si ara emas, darabuka teikikceba, pala teleb uplya deice arye memepnamlume. Tonok ning ara, sirik tam deipnamlume. Ton ning ara, kwanim tam deipnamlume. Abitinye Kerub ara, apeti tirikina ati, deice tam tirikilongonamlum ning ara, aning deice tamuk deipnamlume. Apeti yo pum tirikin ning, el si ara, ‘Penutup Perdamaian,” nyanamlume. Ara, Allah arye anggun Israel nang ati, adiparyuk oplopsutu bukni, weik tonun bico tenesilirye, lyenamsila ati, apeti yo pum, Peti Perjanjian el deice tam bublan ara, el si ara, ‘Penutup Perdamaian,’ nyanamlume.