Ninye weik kel bikamikce nang arye, weik kel kibuka unyaka deice arye, yupu nyan talak ara, yupu canga arye kum nyanyake. Yupu bumang uk nyanyak bukni, sikce nyanyak yupu ara, weik kel bikne ninguk nyanyake. Aning atonun, weik kel kinyak nang ara, sik yupu nyapnuce talak ara, ‘Malye yupu nyapmap do, ara teleb yupu nyapnamap do?’ tenenmakirye, nyabice talak ara, tenipdekirye, nimalye arye nyanyake. Yuk nang arye sikti, malye updeipnamak babye, minopce derena uk kum unyake. Sik kel nang arye, ‘Nun kayapu ati, derebibyap’ tenen, sik nyanyak yupu moubuka kalikildanyake. Sik talima teleb unyak nang anya arye, namin yupu aryuk nyanyake.
Yakobus 1:19 - Eipomek19 Na kayapu, nun du weit atonun ululum ninye, anggun nirya ati, na bico tenesunune. Anyapnusin yupu ara, moubuka kekeplulume. Ninye nirya ara, ninye arye yupu nyabikbuk, ‘Adip aryuk kekenamap’ tenen, kanye kintinilinamlulume. Bukni, yuk nang arye yupu nyanmace bukni, ‘Sik yupu yaniptapnirye, minopce na yupu uk nyapnune,’ tenena kume. Yupu nyapnumunye talak nirya ara, minopce moubuka tenepmunce, yupu moubuka nimalye aryuk nyanamlulume. Tonda, minopce yu pia una meme. Gade chapit la |
Yakobus 1:19
54 Referans Kwoze
Yata nang do nirya, yupu nyana ati, ‘Malye yupu talye lukparabuka, kum nyapnuyap’ tenen, sik sitang ara moubuka kalikdakirye, ‘Yupu weika arye kum nyapnuyabe,’ tenen, mitik anun uk nyanyak nang ara, ikin ning weik sik dam kum yanganamle. Yupu weika arye talye lukparabuka nyanyak nang ara, ikin ning sik dam yanamle.
Weik kel bikamik nang arye, sik yupu nyapnuceura, ‘Nun kayapu nang ati, weik yupu arye talye nyanmapirye, derepnyap’ tenen, kabul nyapnuce talak ara, sik sitang moubuka kalikildakirye, yupu nimalye aryuk nyanyake. Bukni, walwal kanye bobuka malyeuk unyak nang ara, aning atonun kum unyake. Sikda, yupu kabul nyapnuce talak, moubuka tenena kumce, yupu talye-talye uk nyaltakanyak deice arye, minopce yu upliba, sik kayapu nang ati, wana ap, malye ulina ap, unyake.
Anggun nirya kanye mouplulume. Yupu weika arye nyapra bamunya deice arye, dipkoprob malye un ning ton, upra banamlume. Ara, ‘Talye yupu weik nyapra bamunya deice arye, malye winipmunyak’ tenen, nyapsine. Bukni yatanye do, ‘Na mangkau arye malye yupu nyapnyak’ tenen, el sitang moubuka kalikdalirye, nimalya arye nyalulnye bira, dipkoprob pia weik kelnye ulule.
Yata ninye do nirya, ninye arye nyanmace yupu, ayupu nirya min kum kekepmakiryuk, awinipmal ning ati, minopce, “E, ayupu ara nun akunum tenipmapa anya arye, wininamlume, aning ton kum wininamlulume, deiyok ani, ani,” nyabuka, laka nyanyak nang ara, anang arye sikcuk, awinipmalye ning ati, malye yupu nyalinyake. Deiyok ara, awinipmaca ning nirya nong noutam ning min kum kekepmace talak arye, ‘Winiplulume, winipsilyame,’ nyanmaka atia. Aminyan talak ayupu nirya moubuka talikirye, deiyok noutam ning ton, laka nyabikcopura, sik minop talak arye talye lukparabuka nyanmace ninye ara, alye dakaldanamake. Ara, yupu nong noutam ning, kabul nyanmace talak arye, sikcuk malye yupu nyapmaca deice arye, alye dakaldanamake.
‘Na yupu nyapnya deice arye, yuk ninye ati, malye updeipnyak anya arye, moubuka tenepnirye, teleb yupu uk nyanamne,’ teneplirye yupu moubuka nyalulnye bira, el kam unamle talak ara, ouku weik unamle. Bukni, ninye arye yupu nyabikiba, kekeplirye, moubuka tenilena kumce, talye lukparabuka malye yupu ap, yu yupu ap, minopce nyaltakalulnye bira, yuk ninye ati malye kililule. Talye nyaltakalulnye bira, el dam ikin ning tamubuka yaliba dololule.
Nong mikip weik ululnye bira, mitik teleb ulul bukni, weik teleb ning ara nyapnusine. Yata nang do nirya, yu weik upmale bukni, ‘Na adiparyuk ninye wana yupu kum nyapnune. Bataknin banmanya ani, aminyan talak namin yupu uk nyapnamane,’ tenelulnye bira, weik teleb ulule. Yata ninye do nirya, sikce, ‘Kume, nuncuk wininmabirye, malye ubipyak’ tenen, moubuka tenipdekirye, sik bidamnye ati, kalikildanyak nang ara, pia teleb unyake. Tonda, yata mikip weiknye do nirya, elcuk yuk mutuku ninye arye, dolamik weik asik nirya uluplopturye, amutuku ninye nirya obuka daktua babye, aning ara mitik teleb ulule. Bukni, weik teleb ning ara, ‘Malye ubipyak’ tenen, moubuka tenipdekirye, sikce, sik bidamnye ati, kanye talima moubuka kalikildanyak nang uka.
Allah yupu sekamik atonun, anyuk wininamlulume. Ayupu ara, ani. ‘Yu upsilye talak ara, dipkoprop malye kum kililanamlulume.’ (Mazmur 4:4) Tonda, anggunce yuk nang ati, yu upsilye talak ara, minopce lipsisikdanamlulume. Yu tuba upmasilibuk, keting wekelbilirye, kuna daklyopura, pia malye ati, winina meme. ‘Mapmapya ambusum noutam aryuk lipsisiknamap,’ tenena kume. Yu upsiliba, tulum kanye bopdamunye talak ara, minopce lipsisikdanamlulume.
Ninye ton tuba-tuba yu ninguk tenebuka ululnye bira, atenelye deice arye, minopce yu welepliba, yuk nang ap waldana ap, oldana ap uk unyake. Wininyak bukni, ninye ton kanye talima dakdongobuka nimalye arye ululnye bira, elce, ‘Yu yupu nyapnun’ tenen, moubuka tenipdepnin balirye, teleb yupu uk nyalulnye bira, adeice arye, el damak unamak ninye nirya babye, yuk nang ap neika dukdongobuka pia telebuk unamake.
Tonda, yu usilye ning ap, yuk nang malye upsikiba yu usilye ning ap, derelana ap, yupu deice walana ap, anirya ara, batakanamlulume. Tonda, yuk nang arye, ‘Anang ara, malye nang, tenepnamak’ tenen, lulupdeibuka nyalulum yupu ap, yu usiliba, yuk nang ati malye-malye winina ap, nirya ara, batakanamlulume.
Yata nang do nirya, ‘Yupu canga arye nyanamne’ tenen, pataliba weik arye nyanyak nang ara, sik sitang deice arye nyanyak yupu ati, “Dauplye,” nyabuka, kum nyaltakanamake. Yupu weik arye nyanyak ninye ara, ‘Ayupu deiyok ara, nuncuk nyanmaba anya arye, nun deice uk kipnamsila’ tenen, unamake. Aning ara talye ati kum nyapsine. Ninye sitang deice arye nyanyak yupu ara, mikip weik ulul ning anya arye, yuk ninye ayupu kekebiceura, ton nang ara, malye kanye bobikirye, malyeuk upnin banamake. Ton nang ara kanye deibuka telebuk upnin banamake. Ninye arye nyanyak yupu deice arye, ninye nirya lyelona ap, yuk ninye malye ulina ap ulule. Adeiyok bitinya ning ulula ati, ninye nirya arye sik yupu nyapnuce talak nirya ara, moubuka tikikirye nyanamake. Ayupu deiyok ara, sik deice uk upnamle ati nyapsine.
Ara, anggun yuk-yuk ululum bukni, Allah arye, ‘Sikda walana ap, oldana ap, kum aryuk, nong tonok atouk kibuka, talima dukdongobuka, namin arye neika unamake’ tenen, wibuka deiamsuke. Winibuka wipdeiamsuka anya arye, Kristus arye talima dukdongopsukba, nong tonok atonun, kibuka ululuma ati, teleb ubuka neika unamlume. Tonda, anggunce Allah ati tuba-tuba, “Telebe,” nyanamlulume.
Ninye ton weik kel bikilulnye birye nyalul yupu ara, ninye nirya arye kanye deibuka kekebikirye, ‘Se, anye birye nyasulul yupu ara, pia telebe,’ tenebikirye, sik kanye talima lilolibuk, sik babye, ‘Se, nun babye aning kel biktibye’ tenen, pataliba, weik arye tabakuka kel kipnamake. Weik kel deice arye nyalulnye ati, yuk ninye nirya arye elti, kanye delinamake. Bukni, ninye ton walwal kanye bobuka, ululnye birye nyalul yupu ara, moubuka kum tenenmalya deice arye, talye yupu uk nyalule. Elda, yupu canga arye nyalya deice arye, malye yupu weik nyanamle. Atonye bira, talye yupu weik nyaltakalule.
Winipmanto ara, tonok mutuku ninye arye weik asikak domtingce, sik weik cang keil poka domting bukni, sik oldan nang, amutuku yatingce, ‘Amutuku unyak ninye opnuyap’ tenen, akeil poka paklobuka, talye lukparabuka wektingce, amutuku ninye nirya opnamtinge. Winiptingopura, amutuku noutamak ulul ning nirya ara, atu kiploptingce, kum daneiptinge. Amutuku ulamting ninye ap, sik talilamting ning ap nirya ara, kum daneiptinge. Aning atonun, ninye ton elcuk, el bidamnye ati, moubuka kalikildana kum kiamukce, ‘Na malye upnyak’ tenen, kalikdalirye, moubuka kum tenelulnye bira, atonye bira, elcuk el bidamnye atibuk, malye kilil danamle. Elda pia walwalnye ulule.
Ninye ton minopce yu kanye bobice talak ara, tuba-tuba yuk nang ati, derena uk ululnye bira, malye winin ninguk taliplirye, dipkoprob malye un ning ap, walwal un ning ap uk, unamle. Aning atonun, elce yuk nang ati, tenepce arye tilila yupu nyaltakalulnye ulula ati, yuk nang nirya arye, ‘Anye bira, nun like,’ tenenyake.
Bukni, narye nyasunun yupu ara, ani. Yata yuk dib tenen nang do nirya, yuk nang ati, ona kum bukni, deremunye ning babye, Allah arye wenepnamsile. Tonda, sik minop talak ulamik nang arye nyalamik. “Yata yuk dib tenen nang do nirya, pia yu upliba derelakirye, anggun bidam nang ati, ‘Anda pia weik malinye,’ nyapmunyopura, Yahudi yala weik ninye deiyok nang, Sandeheren nang arye wenepnamsiyake,” nyalamik. Bukni, narye nyasunun yupu ara, ani. Yu upsiliba derelamunce, yuk dib tenena nang ati, “Anda pia walwalnye,” nyapmunyopura, anyapmamunye ning ati, Allah arye anggun wenena ati, anggun dobukapsilirye, uku din mutuku dongopsilyak ati, kanye moubuka unamlulume. ‘Aning ara, talya nyapmala,’ kum tenenamlulume.
Winipmanto ara, mek bisik wakibikirye, kukdeibikiba, mek mikip arye balamle atonun, ninye arye kabul deiyok koubuka, derelana unamak talak ara, adiparyuk, adeiyok ning ati, “Dauplye,” nyabuka batakaldongonamlulume. Opdanmanto unyak ninye ati, lyelina telebe. Kumopura, ninye arye derepdakirye, ayu yupu uk tuba nyapdanin, bakibuk weik upnin balyopura, sikce nyaldanamal ning ap, oldanamak ning ap ara, min kum kum daneipnamsile. Ati, yu upliba, deiyok koubice talak aryuk, lyelina telebe. Yu yupu tuba nyaldana kume. “Dauplye,” nyabuka, batakaldongonamlulume.
Yatanye do nirya, elce el bidamnye ati, “Na diba tenepsa ati, diksukumnye unune,” talye nyaltakalul bukni, el nyalye yupu moubuka tenena kum arye, talye luba kibuka nyaplyopura, anye bira tilila yupu uk nyalalule. Atonye bira, el dib tenebuka talibuka ulul ning ara, deiyok kum ubuka ati, nong kum upnamle. Diba tenebuk ning ara, talyeuk ulule.
Ara, nunce Allah el yupu peterelamsupubuk, anggunce kekelamlum talak ara, anggunce ayupu ati, utenelamlume. ‘Kume ayupu ara, talye tukwak ninye arye nyanyak yupu kumde. Ayupu ara, dipkoprop Allah el yupu uka’ tenen, dololamlume. Nunce peterelamsupu yupu ara, dipkoprop Allah el yupu anya arye, teleb winilamlume. Anggunce Allah ati, diba tenelulum ninye anggun talima noutamak arye, Allah el yupu arye pil dosulule. Anirya ati ara, nunce Allah ati, moronyap talak nirya ara, anggunti tenebibirye, Allah ati, “Telebe,” nyabuka morosenyabe.
Ance sikti, bico tenebuka, teleb una ati winilalum ning ara, luba kiyamike. Tonda, sik dam ninye winipmanto kum pil dolalum ning nirya ara, tuba kum tenilamikce, luba kiamik. An nyalalum yupu yanibikce, mandipna kanye bobikce kwalilamikce, ‘Mesir mutuku tuba tamubuka bobisiliba, sik amu tam talye pil don nang unamap’ tenen, sik bidamnye arye, ninye deiyoknye wipdeibik. Malye weik winilamik bukni, Allah anda ninye nirya malye wininyak ning namin kina deiyoknye ulyame. Min pola kum wenesilyamce, an kanye aryuk weik bico tenepsimince, weik arye melisilyame. Bico tenesiminye ning ara, weik arye bico tenesilyame. Winilyama arye, nun apu yapu kum bataklamlume.
Berea mutuku ninye ara, sik Tesalonika ninye mitik teleb ulamika atonun kum ulamik. Sik Berea mutuku ninye ara, Pia telebuk ulamik. Sik talima kintinibuka deililamikce, Paulus arye laka peterebuk yupu teleb kibuka kekelamik. Pia kanye deibuka kekelamikce, ‘Paulus nyanmasil yupu ara, pia dipkoprop do, kum do?’ tenelamikce, asum-asum nirya sik Allah yupu buku doprobik akarye wibuka deililamik.
Ninye ton minopce yu tenebuka derebicopura, elce pia yu unamle. Yu deice arye malye uplyopura, aminyan talak ara, amutuku talina deiyok nang arye, elti, tomobuka tapu koubikirye, “An malye ulamluma anya arye, dekna ning ara, pia weik ning arepsilyame,” nyabuka, wenena aik dongopnamake. Sikce el melina ati ara, ‘Se, nun mi ara, kum wenepnamlulume’ nyabuka, wenena aik pum tam arye loplobuka lyepmunya babye, dipkoprob ami ara, moubuka kum kel kipnamle. Kum kel biknamla anya arye, dipkoprob yuk aminyan talak babye, amalye winilamlye ning ara, tuba tamubuka tonap, tabakuka upnin baliba, tonap tomobuka tapu koubikirye, wenena aik dongobikiba, tuba tamubuka, ton lyelona uk unamlum do, kum do? Aning ara, pia moubuka tenenamlulume.
Nyapnuka ati, adiparyuk ninye wipdeipsirye, ‘An Peterus dobuka boyanamkiak’ tenen, ninye wibuka dopkwetepse. Winira, akunum yanmalama ati, telebe nyapkine. Ati, winira Allah el unmalce dinmasil damuk unmabe. Ara, ‘Allah arye anang nyapnamle’ tenen, nyabukura, kekeplum yupu nirya ara, ‘Nun nyapsiminyeura, kekepnuyabe. Allah arye yata yupu nyapnamsil do?’ tenen, bulubuka wekmabe.” Kornelius arye Peterus ati nyabuk.
Yesus arye wipdeibuk Rasul nang, sik peterelamik yupu kekelamik ning ap, din neika ansinibuka dilamik ning ap, neika Allah morolamik ning ap, bico tenen, melilalamik akarye, sik kanye dukdongobuka neika ulamik. ‘Nun aninguk winiptibye’ tenen, patalamuka ati, yuk ning tenena kum arye aninguk winilamik.
Atalak-atalak nirya ara, Israel tam talyamik deiyok nang, Roma mutuku nang ati, pajak yo bok bulubuka arilamik nang ap, sik yuk nang arye, “Aninye pia malye ninye,” nyabuka tenelamik nang ap, ‘Yesus el yupu nun ton kekepnuyap’ tenen, bulubuka, Yesus dam tonap weik wekelyanganmek. Tonda, amalye-malye ulamik nang nirya ap, Yesus ap neika ansinibuka dina dinmek.
Sik atikmek talak noutam aryuk, Allah arye Musa biti nyalamukba, sekiamuk Mem Yupu noutamak dobuka yininmek. Sik yininmek buku ara, Allah el si Yahweh arye, “Aning ara wininamlulume, aning ara kum wininamlulume,” nyapdeiamukba, sekiamuk yupu yininmek. Keting winilye deice arye winibuka akunum yinibikopura, sik malye winilamik ning ati, keting winilye deice arye, laka nyanmek. Akunum lak nyabikopura, sik ni koprop Allah, el si Yahweh ati, el si erebukabikce, si erebik.
“Daud ayupu nyabuka deice arye, tukwak ninye lyenanye Mesias yanamuknye ati, ‘Mesiasnye bira, na ni kopropa ulule,’ nyabuk. Nyabuka ati, Mesiasnye bira, Daud el mi koprop kum ulule. Daud elce deibukura, dadeipdanin, yangalamuka ani, el yalanye birye deibuk mi ulul bukni, elda dipkoprop im deice yalanye, weiknye ulule. Ninye lyena Mesiasnye bira, talye tukwaknye kum ulule.” Yesus arye anyaik dam wekmek nang nirya ati nyabuk. Weika arye abulubuka wekmek nang nirya, Yesus arye kanye lon yupu nyanmokbuk, kekenmekce, kanye pia deibuka pin-pin ubuk.
Aunmek talak noutam, like tekbarye sum deice ara, Esra bira, Allah arye nyalamuk yupu, Mem Yupu noutam arye yinibuka peterenmok. Ara, Allah arye, Israel nang ati, ‘Wininamlume, aning ara ton kum wininamlume,’ nyapdeiamuk yupu, Mem Yupu buku yokuka yininmok. Atalak noutamak nirya, akwalya kwalilamikce, pin-pin asa arye unmek. Min yuma sum arye dipdongobuka, tekbarye sum ubukopura, sirya sum upnopura, sirya dakalongolamik. Dakalongon sum akunum ubukopura, Allah yupu deice nyalamuk touk, sik nirya tonokak uk bulubukabikce, yupu talipmek.
Winipmok buk, ton bisik bayukopura, ila tuba Allah arye dopreipmok malaikat ara, bisik yanuka lipdongobuka, tikabukba eibukce, akeledai basam ara, lukdanduka kwarabukce, asukumuk kuksibuka malbiyuk. Winibukba, Bileam birye, yu weik ubuka ati nyabuk. “Anda yata ati, winipre banmanilam do?” nyabukabukce, Bileam el kama dobuka, ila tuba akeledai basam kulabuka obuk.
Aning atonun, anggun ton tenipdelulume. ‘Anyapnusin yupu ara, dib do, tilila do? Tonda, anyapnusin yupu ara, teleb ning do, malye ning do?’ tenen, moubuka tenina kumce, talye luparabuka malye yupu uk nyaltakalulnye bira, teleb ning ara lipsisikuka kum petereptume. Lipsisikuka laka nyaptuma babye, anye birye, anggun yupu pia moubuka kum kekenamle. Walwal ululnye bira, moubuka peterepmunyeba, kel kipnamle bukni, moubuka tenena kumce, talye luparabuka minopce yupu nyaltakalulnye bira, kum lipsisikuka petereptume. Anye biti ara, ‘Dauplye’ tenen, batakanamlulume.
Ura, na kayapu, na nyapnusin yupu moubuka kekeplulume. Aning kum tenipmalum do? Sik diba tenena kum arye, talye tukwak ninye nirya arye, ‘E, anang ara, pia talye kankan ninye anya arye, sikda mambul pia kume,’ tenelamsikce nang ara, Allah arye akankan unyak ninye ara, kunum wipbuke. Allah arye wipsuka ara, ‘Dib tenena deiyok ning ara weik arye arepnamne’ tenen, anang wibuk. Deiyok ara, anang ara na Allah ati, ‘Weik arye diba tenenamniyake,’ tenepsuke. Ura, yata winin ning do nirya, Allah elda ikin kum uptue. ‘Aning-aning nirya kanam aniryuk ulule’ tenen, Weika arye diba tenenyaba anya arye, bona weik kum talinyab bukni, bona weik talinan nye atonun akunum kipdeipsuke. Tonda, Allah arye, ‘Na ti, kanye deibuka ulamice nang ara, na im deice talibuka unye ning ara, sirya talak arepnamsine,’ nyapdeiamsuk touk, arepsilibuk dolonamabe. Ati, talye kankan ninye wipsuka ara, kum tenipmalum do?
Na kayapu nang, nun dib tenen nang unyaba anya arye, anggunce anggun kayapu nang ati, minina yupu kum nyalanamlulume. Anggun diba teneplum nang arye, yuk diba tenebik nang ati, malye yupu ap, minina yupu ap nyapmunce, sik nong deice deipmunyopura, ara Allah arye, ‘Wininamlulume, aning ara, kum wininamlulume,’ tenen, nyapsuk yupu yanina atonun ululume. Ara talye ati kume. Anggun babye diba teneplum nang arye, yuk diba tenenyak nang ati, “Anggunda malye nang ululume,” nyabuka, malye yupu nyalalulumopura, ara anggunda yupu bokolina deiyok nang atonun ululume. Aning ara, pia malye winilulume. Allah el yupu deice arye, “Malye yupu kum nyalanamlulume,” nyapsuk bukni, aning akunum winipmunyopura, el yupu akunum yaniplume. Allah arye nyapsuk yupu noutam bukni, ayupu nirya dobolbana kum arye, ton yupu yaniltana, ton yupu kekena kum umunya deice arye, yupu bokolina deiyok nang atonun akunum umunce, el yupu nirya yaniltalulume. Ati aning ara winina meme nyapsine.
Winira nun du weit atonun unyap nang ati, weik mambul yupu ara nyapnusine. Anggunce, “Wininamabe,” nyalulum talak nirya ara, ‘Yuk nang arye diba tenepnamsiyak’ tenen, mambul ning si ap deice arye nyana kume. Tonda, yupu canga arye nyana meme. Ara, yata ning si do nirya, im deice ulul ning si ap, tukwak ulul ning si ap, tabakuka nyana meme. Tonda, ‘Yuk ninye arye, diba tenepnamniak’ tenen, “Nara, talinye birye nyapmakin do?” nyabuka, yupu weika arye nyalamak touk winina meme. Ati, malye yupu nyapmunyebuk, Allah arye wenepsilyak ati, ‘Telebe, aning winipnune,’ tenepmunyopura, “Teleb, aning winipnune,” nyana uka. Aning atonun, “Kume, aning kum winipnune,” tenepmunyopura, lak akarye, “Kume aning kum winipnune,” nyana uka. ‘Yuk nang arye, nun nyanyap yupu diba tenepnamsiyak’ tenen, mambul ning si ap tabakuka nyana meme.
Na kayapu, nun du weit atonun kipdeipsuk nango, yupu ton nyapnusine. Ara yata nang do nirya, Allah el dipkoprop yupu deice nyasilye bisik bindebuka, abisik batakuka, yuk bisik kirikuka bilyopura, yuk nang arye anye dobuka, teleb bisik akuk, yanuka tamubodeibicopura, ara pia telebe. Ati, anyapnusin yupu ara, ila tamubuka tonap tenenamlulume.
Piblisite