Ulangan 8:17 - Eipomek

¹⁷ Ati ara, aning-aning nirya, teleb upsilyopura, anggun kanye talima erepdamunce, ‘E nun bidamang mikip ap, weik kel kiamupe ning ap arye, ateleb ning ayala-yala nirya weik upsile. Ara, nun deice arya,’ tenena pia meme.

Ulangan 8:17 Referans Kwoze

Ulangan 9:4

Nyabukce, ayupu ton dukdongobuka nyabuk. Allah arye, Anakim mutuku ninye obuka yaklopura, anggunce, ‘Ura, nun pia teleb ubuka diksukumuk unyaba ati, Allah arye melipmasilba, amalye nang bindopmakba, wini talak ara, nunce teleb mutuku talibuka unamabe,’ tenelulume. Ara, anggun kanye talima erelanauk umunya ati nyapsine. Dipkoprop ning ara, anggun teleb nang ati kume. Sik yala yuk-yuk ninye ara, pia malye ninye unyaka ati ara, ‘Allah arye, malye kiplirye, amutuku noutamak arye opyaknamlarye’ tenen, laka nyapsine.

1 Korintus 4:7

“Ninye si kum erelinamlulume,” nyapmasina ara, talye ati kum nyapsine. Deiyok aupmal ning ara, nyapnusine. Ura, ninye nirya pia ato touk, kum wininyak bukni, pil dona deiyok ning, yuk-yuk areplibuk, ‘Sik kanam aryuk, pil donamaka ara, yala yuk-yuk unamle’ tenen, kweipdeipsuknye bira, yatanye birye do? Anggun bidamnye arye kume. Aning atonun, anggun taliplum ning nirya ara, elce kum arepsukbuk, anggun bidamnye arye doproplum do? Anggun deice aryuk, aning nirya aupsuk do? Anggun taliplum ning nirya ap, anggun winimunye ning nirya ap, Allah el deice aniryuk arepsukbuk, dopropluma anya arye, ‘Nun deice aryuk usulule,’ tenemunce, dilana ap, kwalina ap, winimunye ning ara, yata ati do?

Daniel 4:30

Wininmokce nyabuk. “Babel mutuku weik asik dobik ning ara, na mikip deice arye dopse. Winipseba na si ap, na mikip ap, atibuk pia si ereninyake. Ninye mutuku nirya arye nati, ‘Elda weik mambulnye,’ nyaninyake.” Ninye deiyoknye, Nebukadnesar birye nyabuk.

Hosea 12:8

Allah Yahweh arye, sik Yakub yala nang ati, nyabuk. “Sik Kanaan mutuku nang arye, talye dungnubuka, bona diripnarye, ubula dololamik touk, anggun babye winilulume. Ara, ‘Abona ara, yata barye kilo ulul do?’ tenen, anggun ikin kiklilen ning, el si timbangan talibuka dipdemunce, tilila yupu uk nyalulume. Ara, ninye arye, ‘Nun bona deknamapʼ tenen, anggun dam yakcopura, anggunce sik bona deiamikirye, yanuka dekelulnye birye, talye yupu deice arye, ‘El ikin ara, ani. Ati, yo bok ara, winibuka arepnamnulume,’ nyabuka, tilila yupu uk nyaplobuka, dipkoprob yupu, el dam kum nyalulume. Winimunya deice arye, yuk nang ati, ikin ning sik nong deice delilulume.

Ulangan 7:17

Yuk sum ara, anggunce aninye ati, ‘Se, nunda yupa mitik tonun ati ara, nun mikip kumce, mitang asa unyap bukni, sikda yupa pia weika arye unyaka ati, yata wiribuka optibirye, sik ning doproptibye do? Kume, aning ara, dipkoprob kum winiptibye,’ tenena kume. ‘Dipkoprop amutuku nirya dopropnamabe,’ tenenamlume.

Habakuk 1:16

Sik laut mekwen pum tam ulul ning, ikan olamak nang ara, Allah ati pia kum tenenyaka anya arye, el mekwen pum ikan tomon ning, el si jala ati, ‘E aning ara, weik mambule’ tenen, aning ati, si erenyake. Aning atouk, sik mekwen pum ikan on ning si ara, ‘Se, aning ara, mambul ning anya arye, nun dina ati, mekwen pum ikan weik talepmalebuk, dobuka weik dinyabe. Kum dinyap ning ara, weik tuba aulula anya arye, aning dekibirye, yo bok weik dolonyabe. Wininyaba deice arye, aning-aning weik aupmasile. Tonda, ayo bok deice arye, yuk yala din ning nirya, pia teleb ning dekuka dinyabe. Ati, nunda kil-kil kanye bobuka, pia telebuk unyabe,’ tenenyake. An Allah ati, pia kum tenikinyake.” Habakuk birye, Allah ati nyabuk.

Hakim-Hakim 7:2

Atalak ara, Allah el si Yahweh arye Gideon biti nyabuk. “An yin talin nang ara pia weik ati ara, narye anggunti melipsinyeba, Midian yala nang minop opnalame. Winipniba, Midian ninye opmunyopura, Israel ninye arye, ‘Kume, Gideon el yin talin nang weik ati ara, nun babye mikip deice arye obuka sirya dakmabe, tenebicak’ tenen ati, nyapsine. Winipmunya deice arye, ‘Na si Yahweh ati kum erepnicake. Sik si diamuk erebikcak’ tenen, ati nyapkine,” Allah arye nyabuk.

1 Samuel 2:7

Aning atonun ton, ninye tonoknye ton, Allah Yahweh elcuk anye biti, ‘Ikin upliba, aning-aning nirya kum talinamle,’ teneplyopura, anye biti, talye bona talina kumnye kililule. Tonda, pia bon utotoa kum ninye ati, ‘Bona talin nang unamake,’ teneplyopura, elcuk aninye ati, teleb kipdeiplyopura, bona talin nang kililule. Tonda talima lamapdongobuka unanye ton, Allah Yahweh arye erepdeiplirye, teleb kipdeipliba, kanye deibuka unamle. Atonun, el talima erebuka ulamlinye biti, Allah arye, anye bira ton, amu tam kipdeipliba, imun kanye bobuka unamle.

Mazmur 44:3

Ara, nunti areamsulum mutuku noutam ara, an Allah ati, kum bikamik nang ulamikce, amutuku nirya talilamik bukni, yuk-yuk yala nang nirya ara, Allah an taruk koproba aryuk, anang yakuka dopkwetalamukba, sik nirya balolamik. Bukni, nun Israel yala nang nirya ara, nun apu yapu arye dobuka, amutuku noutam arye, mikip kipdomunce, asukum diamlume. ‘'Amutuku noutam ara, Allah ance, nun apu yapu teleb kibuka, asukum deiamlum bukni, sik yuk-yuk yala nang nirya ara, sik nong deice, weik imun ning delilamukba, sikda, ‘Se’ tenen, amutuku batakuka bindobik. Winilamlum bukni, nun Israel yala nang nirya ara, lobukapsulumce, lyepropsulume.

Penghotbah 9:11

Tonda, ‘Aning nirya kel biknamneʼ tenen, epra balamse talak ara, tukwak mutuku noutam ulamik nang ati, dipdesirye bikse. Ara bikbik an ning ati, mikip arye bikbik abuka banyak talak ara, mikip weik arye bikbik abuka banman nang arye, atalak nirya kum bisinyake. Aning atonun, yuk-yuk mutuku nang arye mal olan talak babye, sik mikip pia weik nang arye, yuk daunyak mutuku nang ati, adiparyuk kum oltakanyake. Tonda, sik kel weik bikamik nang ara, atalak nirya sikda din ning dobuka kum dinyake. Tonda, ‘Deiyok aniʼ tenen, mambul ning ati, weik tonun akunum kum bikamik nang arye, pil weik donyak bukni, atalak nirya ara sikce sik dengna ati, dengna weik ning ap, bona ap ton kum dolonyake. Aning atonun, pil pia teleb ubuka donyaka deiyok nang ara, sik pil dona deiyok nang arye, sikti, kanye deibuka, teleb ning kum arenyake. Deiyok ara ani. Nunce kum tenipmanto ning, nun dam ikin weik ning yanamsil talak ara, pia kum biktibirye, kum teneptibye. Nun tukwak nang nirya arye, ‘Winipnamabʼ tenen, piriptibye bukni, ikin ning nun dam yalyopura, aning deice arye winipmanto kum usulule.

1 Samuel 30:23

Nyanmekbuk, Daud birye sik anang ati, “Amapo, Allah el si Yahweh arye, nun nirya ati, melibuka arepmasil ning anya arye, ayupu nyana kume. Aning ara, nun olana ati yayik nang, Allah arye kalikuka, melipmasilba, sik yu nang akunum obuka, sirya dakmabe. Amalek mutuku nang kan-kan arye, lyepmasila ati, nyalana meme.

Ayub 31:25

Tonda na pil dobuka dopnin balamsa deice arye, dekuka talilamse ning ap, na dekna weik ning talilamse ning ap ati ara, ‘Nara weik bona talinanye’ tenen, kanye talima ereldalamtinyopura, Allah arye wenebuka opnutue.

Penghotbah 3:6

Tonda elkirikna ap, lik upsiliba, ‘Dauaplye’ tenen, batakalongon talak ap, ‘Naʼ tenen, bulubuka delin talak ap, talibuka sirya dakna talak ap nirya ara, Allah arye tenelye touk, lo arisiliba wininyabe.

Yeremia 9:22

Aning nirya ara, na Allah Yahweh arye nyapmasina ati, anggun kekepmunce, laka nyapnamlume. Ara, sik yuk pera mutuku yu nang, lo arepniba yakirye, sikti, yanuka obikirye, sirya dakanamsiake. Yuk pera mutuku nang arye, yanuka obikiba, dipnamak nang ara, maning palamlak ton, tuku deice saknamake. Dibikirye, sakicopura, yuk nang arye, sik nong dobuka, ninye wein dam kum weilbinamake. Ninye pia weik tonun yanuka opnamaka ati, talye bama ning, talye mutuku donokolbalamak touk unamake. Ara, sikti, yu tenebuka, mal olan nang arye opnamak nang, sik nong ara, mining damuk, tuku deice bataknamake. Yuk nang arye yanuka, adipmakce nang, nong kum dobuka weilbinamake. Winipmanto ara, teikuka el bama lanyak ning, el si gandum duk doprobikirye, el yok ap, bama ap ara, mining dam bulakuka, talye batakikirye, tamubuka kum dololamak touk, wininamake. Ninye obikiba, dipnamak nang sik nong ara, talye kata sukumuk bataknamake. Kum weilbinamaka ati nyapsine. Aning ara, sik yuk mutuku yin talen nang arye, Israel nang pia weik tonun opsikiba, upnamle ning ati, laka nyapsine. Ati, anggunce anggun kayapu nang ati, adiparyuk, sik dam laka nyapnamlume. Allah arye nyabuk.

Yehezkiel 28:5

Aninguk kum bukni, tonda kel weik bikamluma ati, aning-aning nirya dobuka, aning bulubuka, deiplum ning, tuba tamubuka yuk mutuku nang ati, dekeminya deice arye, weik bona talinanye akunum ulyame. Aning nirya winiminya deice arye, ‘Nara weik bona talinanye ununeʼ tenen, an kanye pum tam erelalyame.

Daniel 4:27

Ati ara, na deiyoknye, ance na nyapnye yupu kekepnilyame. Winipmince, ninye bona utotoa talina kum nang ati, sik dam teleb kibuka pil dopmince, sikti noutam wilibuka delinamlame. Aning winipminyeura, Allah arye anti, pia kanye delinamkile. Bukni, narye nyapkise yupu luba kipmince, aning kum winipminyopura, tamubuka kanye ikin upnamkile. Daniel birye, weik deiyoknye Nebukadnesar biti, nyabuk.