Tonda, Allah arye anggunti, asilena ati areamsukba din patalamsuke. Winilamsukba, Allah arye, tuba tamubuka im deice arye, din ning el si manna kwaning, arepsukba dilamlume. Akwaneng ara, anggun apu yapu ap, anggun ap, kum elilamlume. Allah arye winilamuk ning ara, anggun kel bikna ati, peterelamsuke. Deiyok ara, ‘Ninye nirya tukwak kwaninguk dilamak deice arye, kam kum unamake. Allah nyasilye yupu deice arye kam unamap,’ tenebuka, ‘Kel kipnamak’ tenen, Allah arye winilelamsuke.
Ulangan 8:16 - Eipomek16 Tonda, amutuku noutamak ara, wa ap, din ning ap, kum uamuk bukni, Allah el mikip deice, im deice arye manna kwaning areamsukba dilamlume. Akwaneng ara, anggun apu yapu babye, anggun babye, kum kel bikamlume. Allah arye aning-aning nirya, ikin ning babye, teleb ning babye, areamsuka deiyok ara, ‘Asipdeniba, sik talima mitang upliba, teleb updeipnamsin’ tenen, anggunti teleb kililamsuke. Gade chapit la |
Ulangan 8:16
21 Referans Kwoze
Kanye imun ning uplirye, winilelye talak kum batakalirye, pia palibuka pil dolamlenye bira, kanye deibuka telebuk unamle. Ara winildena talak noutam nirya arye, ikin ning weik ulamlye bukni, elda pia darapdongobuka ulamlyopura, el dekna ning dopropnamle atia. Amenenga ning dopropnamle ara, Allah arye, “Na ti kanye deipnice nang ara, winibuka arepnamsine,” nyapdeibuk touk, pia kam una deiyok ning dopropnamle.
Kanye winilden ning usilye ning ara, deiyok nyapnusine. Ara, anggun diba tenebuka, Yesus talibuka umunye ning nirya ara, winilesilyebuk, talima wisipsilye, ‘Dipkoprop pia gat uk, dipkoprop ninguk unamsil’ tenen, yangalule. Dekna weik ning emas ara, ‘Malye ning ubuk ning, kum uptue’ tenen, uku dongopmacebuk, malye ning diplyopura, teleb ubuka delinyak bukni, emas babye kum uptue. Emas ara, dekna weik ning ulul bukni, mitik mambul ninguk ulule. Anggunce diba tenebuka, Yesus talibuka umunye ning nirya ara, weik dekna weik ning atonun, weik mambul ulule. Diba tenelulum ning winilesilyebuk, akunum teleb uplyopura, Allah arye nyapdeiplibuk, Yesus Kristus tamubuka lakak yanamle talak ara, Allah arye telebe nyana ap, si erena ap, weik dirina ap, weik si ap, arepsilirye, erelinamsile.
Tonda, nun ilil arye malye kanye kum bonyaba deiyok ton ani. Ara, kanye imun kanye upsile ning nirya ara, dipkoprop tia talakuk usulule. Tonda, kanamuk usulule. Kanye imun ning usilya deice arye, aminyan pia kam unamabak ara, pia teleb unamsile. Aning ara, weik mambul anya arye, wini talak ikin usilye ning ara, nun kanye ara, ‘Aning nirya ara, dipkoprop pia kanam atonunuk usulule. Aning ara, mambul kume,’ tenenyabe. Weik mambul ning ara, Allah ap neika pia kam unyabbuk, weik mambul ning arenamsil ning ara, kum nukmanto, pia weik arye arenamsile. Ati tukwak mutuku unyap talak, ikin usilye ning ati, ‘Aning ara, mitik mambul uka,’ tenenyabe.
Na kayapo, nun kele. Nunce Allah ati diba tenebuka, nun kanye el deiceuk delinyap ninye nirya ati ara, yata winin ning do nirya, ikin usilye ning babye, kanam usilye ning babye, Allah arye awinisilye ning nirya dobuka, nunti teleb kilisulule. Ikin ning usilye talak babye, kanam usilye talak babye, atalak nirya ara, Allah arye pil dobuka melisilya deice arye teleb ulisulule. Winibuka melisilye nang ara, talye nang ati kum bukni, Allah arye, ‘Na mapu ubikirye, na tenyamse pil teleb kibuka donamake’ tenen, yukusilirye, wibuka deilisilye ninye ati nyapsine.
Malye nyanmekopura, Musa birye ikin kanye bobuka, engebukce Allah el si Yahweh ati morobukba, Yahweh arye Musa biti, yo kama tonok lake kipdeibukce, arebuk. Ayo arebukce nyabuk. “An boplum yo, mekwen pum bisik dongobuka dopropminyopura, amek ara teleb upnule.” Nyabukura, Musa ayo dobuka, amek noutamak dongobukba, amek ara pia teleb kibuk. Winibukba, sik nirya amek dibik. Dibikura, atalak ara Allah el si Yahweh arye sik winipra banamik ning ati, ikin yupu nyapdeibuk. Ara, ‘Winipnamlume’ nyapdeibuk yupu atia. Tonda, Yahweh arye aninye ati asilen yupu ton arebuk.
Nyabuka malye nyanmekba, Allah el si Yahweh arye Musa biti nyabuk. “Dipkoproba nyapne. Im deice din ning, el si ara manna kwaning, na im deice arye mok purwu atonun kibuka dopreipnamane. Winipniba, anggun Israel ninye nirya arye, tonok sum uk dinamak ning ati, bulubuka tonokak deibikirye, dinamalume. Winipnaman deice arye, asipdenamasine. Ara, ‘Israel ninye arye, na nyanye yupu kekebikirye, anyapman touk unamak do, kum do?’ tenen, dipdenirye asipdenamasine.
Moubuka tenenamlulume. Allah el si Yahweh arye, keting tamun yupa weik, empat puluh tahun deice arye, mek pia kum mutuku, mok ap, mek ap kum ati, buppu weik arye ninye kum ulamik mutuku bisik, Allah arye melibuka boyangalamsuk ning nirya ara, luba kina meme. Allah arye anggunce, ‘Sik kanye talima, namin asa arye unamak’ tenen, ikin ning areamsuke. Winilamsuk ning deiyok ara, ani. Ara, Allah arye, ‘Sik kanye talima noutamak ara, yata tenenyak do? Sik talima noutamak ara, narye, ‘Aning ara, wininamlulume. Aning ara, pia kum wininamlulume,’ nyapdeiamse yupu, dipkoprob talibuka wininamak do? Kum do?’ tenena ati, winilelamsuke.
Ayanuka tilila yupu nyanamak nabi nang do, lengdar mabikirye, laka nyanyak nang do, sik tilila nyabice yupu ati, dib tenebuka, pia kum kekenamlulume. Deiyok ara, ani. Anggun ni koproba Allah arye, ‘Na’ tenen ninye arye, nati, ‘Sik kanye talima ap, sik wininyak ning nirya ap adeice arye, nati diba tenebikirye, na siuk pia erenamniyak do, kum do? Sik kanye talima, na deiceuk delinyak do, kum do?’ tenen, asilenamsile. Allah arye winilenamsila ati, sik nabi nang do, lengdar deice arye, kel kibuka aminyan wininamle ning laka nyanyak nang do, anggun dam yacopura, dib tenena meme. Anggun ti nyapnamsiak yupu, pia kum kekenamlulume. Allah arye, anggun winilenamsila anya arye, anggun kanye ap, nong nirya ap moubuka unamlulume.
Bukni, Babel mutuku taleamuk deiyoknye birye, el amu tam nang wibuka dopdeibukba, Hizkia el uk dilamukba, dipmanto ulamuk ning ati, ‘Allah arye kam bukdeiamuk ning ara, bikilin ning arebuk ning ati, asipnamapʼ tenen, yayik. Anang arye, asina ati yayik talak ara, Allah arye Hizkia ati, ‘Elce nati dipkoprob diba tenenulul do? Dipkoprop yupu nyapnamle do, kum do? Elce, ‘Na mikip aryuk teleb unune,’ nyapnamle do? ‘Allah kwetepnuka deice arye, teleb unune,’ nyapnamle do? ‘El talima pum tam ara, yatato tenelulce nyapnamle do?’ tenena ati ara, Allah arye tia ati, Raja Hizkia ati kum wenebukce, ‘Dauplye,’ tenebuk.
Ura, atalak ara, sik kel weik bikuka unamak nang kan-kan, ton tam nang, malye nang arye anang ati, obikcopura dipnamake. Bukni, Allah elti, dipkoprob tenebikce, el tam nang unyaka ati, adipnamaka deice arye, Allah arye anang teleb kipdeipnamle. Allah arye anang ati, malye winina ning pia kum, pia teleb nang kibuka, telebuk kipdeipnamle. Tonda, sik malye nang arye, opnamak kel weik nang ara, Allah arye anang, sik minop talak malye ulamik ning nirya ara, namin kiplirye, pia kum kipdeipnamle. Sik malye nang arye, Allah el mapu opnamak bukni, Allah el tam nang unyaka ati, aning nirya ara, sik mikip kilina ap, ‘Telebuk wininamak do, kum do?’ tenen, asilena ap ati upnamle. Ikin ning yalyeba, asilen ning ara, aminyan sirya daknamle talakuk, Allah arye aning nirya kum kipdeiplirye, el tam nang, tamubuka teleb kipdeipnamle. Tonda, Allah arye, ‘Ikin weik unamle ning ap, aning-aning nirya, kum kipdeipnamak ning nirya ap ara, atalakuk, min kum kum winipnamle,’ akunum tenebuk. Aning-aning kum kipdeipnamle talak ara, kabula. Aning ara, minop talak Allah arye, ‘Atalakuk, aning nirya kum kipdeipnamnarya,’ tenen akunum kintinip deiamukce, tenyamuk touk winipnamle.
Tonda, Ayub minop talak Allah ap neika dukdongobuka, ulamuk anya arye, weik arye meliamukba, mitik bona weik talinanye Ulamuk bukni, atalak arye dipdongobuka, dotalak nirya ara, pia weik arye melilamukba, bona utotoa pia weik talinanye ulamuk. Allah arye tamubuka, aning-aning nirya pununa ati arelamuk. Ara, domba basam yupa weik, odikin barye empat belas ribu (14.000) ap, unta basam yupa weik, enam ribu ap, (6.000), tonda sapi basam dua ribu ap (2.000), tonda keledai basam kil ning, seribu ap (1.000) yupa winibuka arelamuk.
Ninye arye talye tuku ap, keil ap palibuka doprobikirye, ‘Aning nirya noutamak ara, emas ap, perak ap, tabakuka aupmal do?’ tenen, weik uku dinmalyak dongobikiba, uku arye dinmalya ani, malye ning palilamlya ning nirya diplirye, kat ning pia teleb ning batakliba, emas ap, perak ap, nong uk lakak upliba dolonyake. Winilamaka deice, ninye arye emas ap, perak ap ara, uku deice arye, winilinyake. Bukni, ninye tukwak mutuku unyak ninye nirya, sik kanye talima noutamak ulul ning ara, Allah Yahweh arye asipdenamle. ‘Teleb ning ara ani, malye ning ara ani,’ teneplirye lakak uk deipnamsile.
Piblisite