Ati ara, wini talak ara nun Israel nang arye malye winilamububa, ance pil weik dolamsulumce, lyelolamsulum ning ara, ‘Aning ara mambul kume. Aning ara, daopnyake’ tenen, kum bataknamsilyame. Malye winilamupu buk, ance ikin ning delilamsulum ning ara, tuba tenenamsilyame. Ara, nun wini talak unyap nang ikin usilye ning ap, nun ninye deiyok talibuka ulamik Raja nang ati, ikin ulamuk ning ap, nun yupu bokolina deiyok nang ati, ikin ulamik ning ap, an si eren aik pum tam pil dona deiyok nang ap ati, ikin ulamik ning ap, an yupu lak nyana deiyok nang ati, ikin ulamuk ning ap, nun apu yapu ati ikin ulamuk ning ap, tuba tenenamsilyame. Ura an mapu nirya ati, ikin ulamuk ning nirya ara, ‘Aning nirya ara mambul kume,’ kum tenenamsilyame. Sik Asyur mutuku ninye deiyok nang arye, nunti talibuka, ikin ning nun nong deice delilamsikce, anirye dipdongobuka, wini talak babye ikin usulul ning ati, ‘Aning ara ikin kum tenenamsilyam’ tenen, morokinyabe. Nun ni Allah, anda mikip weiknye ulyame. Tonda, anda aning-aning deice tam ululnye ulyame. Tonda, yuk weik ning aupmalebuk, anda weik mambulnye tonok ulyame. Yuk ning nirya ara, mitik mambul uka. Ance bico tenelamsulum deice arye, “Bico tenesununa anya arye, winibuka wininamsine,” nyapdeiamsulum ning nirya ara, dipkoprob winilyame. Tonok ning babye kum batakasilyame. Ance pia tuba melisilyame. Ati nun ikin usulul ning ara, tenepsimince, melinamsilame na nio.
Ulangan 7:21 - Eipomek21 Aning ati, anggunce mutuku-mutuku nirya unyak ninye ati, eipmunce ilil upsiliba, yok sirim talina kume. Anggun ni koproba Allah Yahweh ara, anggun noutamak aulirye mikip weik ap, weik mambulnye ulula anya arye, anggun ilil una meme. Allah elda, weik mambulnye. Elda aning-aning nirya talibuka ululnye biti, ninye tukwak nang nirya arye, elti, ilil ulule. Gade chapit la |
Ulangan 7:21
35 Referans Kwoze
Se, na ni Allah, im deice ulyamnye bira, anda kwelina mikip weiknye ulyame. Anti ara, ninye tukwak nang nirya arye, ‘Se, elda, weik mambule,’ tenekinyake. Ance, “Aning ara wininamlume, aning ara kum wininamlume,” nyapdeiamsulum yupu kekebuka ayupu atonun unyak nang ara, an deice uk sik kanye talima akunum deiamkike. Ati, ance nunti bico tenebuka, weik arye melisilyame. Ati ara, ance, “Na nyanye yupu moubuka kekepminyeura, narye winibuka melipnamsine,” nyabuka, nyalilamsulum yupu dipkoprob winisilyame. Tonok ning babye kum batakasilyame.
Ara, talye ati kume. Deiyok ara ani. Anggun ni koproba Allah, el si ara Yahweh bira, el tonok ulule. Yuk Allah ton kum ulule. Aning-aning nirya ap, ninye nirya ap, aning-aning nirya ap ara, pia el Allah atonun kum unyake. Allah ara, aning-aning nirya talibuka ululce, aning-aning babye, yuk ninye deiyok nang babye, el amu tamuk unyake. Allah ara, mikip weik deiyoknye ulirye, ninye nirya babye, aning-aning nirya babye, elcuk talilule. Ninye nirya arye elti, ‘Se elda pia mambule,’ tenenyake. Tonda, ninye urasin kum elilulce, kanye talima kum wililule. Tonda, ninye urasin elilulce, ‘Bon ninguk arepnicopura, doproptinye,’ kum tenelule. El kanye talima diksukumnye biti, kanye delilirye, yupu bokolilule. Allah ara, pia telebnye ulule. Allah elda, malye ning tonoknye babye pia kum winilule.
“Anggun nirya ara, ‘E, nun ni Allah, kam ululnye bira, dipkoprob nun noutamak tiklirye, bobinamsil’ tenen, kel biknamalume. Tonda, ‘Nun omutuku bibyopura, Allah elce melisilya deice aniryuk, amutuku unyak ninye obuka, sirya daknamabe’ tenen, ‘Kel biknalum’ tenen, nyapne. Ara, sik Kanaan mutuku tam unyak ninye, Het nang ap, Hewi nang ap, Feris nang ap, Girgasi nang ap, Amori nang ap, Yebus nang ap nirya ara, Allah melipsilya deice arye, obuka sirya daknamabe. Tonda, Allah melipsilya deice arye, sik ilil weik upliba, bikbik abuka bindopnamake. ‘Aning biknamlum’ tenen, lak nyalin ning laka nyapnusine,” Yosua birye nyabuk.
Aning nirya moubuka dipdebuka kel biksakarye, tikukapsirye, sik Yahudi ninye deiyok taleamik nang ap, sik mambul weik nang ap, sik talye nang nirya ap ati nyapse. “Anggunda sik yuk nang ati, ilil una kume. Allah atibuk teninamlulume. Allah ara, el mikip pia weik ulirye, ninye arye winipmanto kum pil donanye binya arye, el tibuk tenipmunyeura, ilil kum unamsile. Tonda, ‘Elcuk melinamsil’ tenen, tenipbibirye, anggun yala nang ap, anggun tam nang ap, anggun mapu ap, anggun kilmapu ap, anggun kilapu ap, anggun asik nang ap ati, aning-aning nirya ara, pia pi dobuka unamlulume. Anggun malye nang olana ati, kintinip deipnamlume,” nyapse.
Anggunce Allah yupu lak kibuka peterepmunyopura, dib tenena kum ninye, ayupu kekebikca deice arye, sik talima noutamak malye winibuka, dungnulamice ning ara, laka upliba, kisok talipdanuka malye kanye bobikirye, “Se, Allah ara, aninye sik talima noutamak dipkoprop ulule. Bukni, nunda malye ninye tuba unyabe,” nyabuka, Allah ati, dib tenebikirye, el si erenamake. Na Paulus arye, nyapsine.
Allah Yahweh arye, ninye tukwak ninye nirya ati nyasulule. Anggunce, ngalukuka malye yupu nyamunye ning nirya ara, tunim aplulume. Nara, Allah Yahweh ununa ati, na siuk kel kipnululume. Yata ninye do, mutuku-mutuku nirya, daunyak ninye nirya arye, na siuk kel biknumunce, na siuk erenamnulume. Tonda, mutuku-mutuku nirya ululum ninye arye, na siuk erebuka, si erenamnululume.
Tukwak mutuku-mutuku nirya unyak ninye arye, mal olanmakirye, weik lelim nyapliba, ngaluklamak touk, winibuka ngalukunyake. Ton tam ninye arye, yuk tam ninye ati, obuka sirya dakikiba, kum danalule. Allah arye tenepsilye sum, akunum kiplyopura, el yupu weik arye nyapliba, tukwak mutuku nirya, atu atonun ubuka kum danamle.
Bukni, Allah arye kintinip deibuk mutuku, el unak ara, pia teleb mek, amutuku noutamak pu dobuka biyuke. Winibukce, mek taruk bokukce, dana-dana biyuk mek nirya ara, amutuku unamak ninye eibikirye, kanye delinamake. Amutuku ara, malye ning ton kum ulirye, pia teleb mutuku ati ara, aning-aning deice tam, erepra ulula deiyoknye, Allah ara, amutuku ulule.
Nyabukopura, ayupu ton nyabuk. “Aning ara, talye ati kum nyapsine. Raja Sanherib elda ninye mikip deice aryuk, yanganmal bukni, nunda nun ni Allah Yahweh, el mikip weik deice unamabe. Aning ati ara, Allah Yahweh arye nunti, kalekuka melipsilirye, el mikip deice aryuk melibuka, sik Asyur mutuku yin nang nirya, obuka sirya daknamale,” nyabuk. Yehuda tam mutuku nirya taleamuknye Raja Hizkia birye, ayupu nyabukba, el taleamuk nang nirya kekebikce, sik nirya ara, ‘E, dip nyapmasileʼ tenebikce, ilil una kumce, malye tenebik.
Tonda, nyabik. “Se, dipkoprop, nun ikin upsile. Nunda yatanye birye lyepdopsutu do? Israel ninye arye, ‘Allah atonun ning, mikip weik ning arye, nun obuka sirya daksilyak’ tenen, yatanye birye lyepsutu do? Yuk isa mer nirya ara, ton kum lyepdopsitinge. Nun kele, minop talak ton, Mesir mutuku noutamak omukce, pata mutuku yangalamik talak ara, ninye nirya ati, wenepre yangalamuk Allah ara, nunce kum bisiptibye. Tonda, sik ni koproba Allah arye, Mesir mutuku ulamik ninye ati, kanye imun ning aning-aning nirya arelamuk ning ara, nun ton kekelamupe.
Yakub birye deibukba, dadeipdanin yanganyak ninye ara, Allah tuba kanye delilula anya arye, sikti malye kipdeipliba, imun kanye bon ning kum dopropnamake. Aning atonun, Israel ninye ara, Allah tuba kanye delilula anya arye, sik nong deice, ikin ning kum deipnamle. Sikda ikin kum unamake. Ati, Allah el si Yahweh ara, Israel ninye sikti, pia ululce melilule. Tonda Allah ara, sik ninye deiyoknye, sik noutamak ulamuk touk, tuba ulirye melilula ati, sik pin-pin asa arye, kanye deibuka, yupu mikip deice arye, el si erenyake.
Sik anang nirya, tabakuka adiparyuk, Musa ap, Harun ap, sik dam biyik. Biyikce, nyabik, “Musao, ance tonap kum winipnulyame. Akunum winipmalame. Yata deiyok ati, Israel ninye ara, ‘Malye ning nirya batakmunce, pia lek teleb nanguk unamlume,’ nyabuka, tupa-tupa nyasilyam do? Nun nirya ara, Allah el kanye delin ninye akunum unyabe. Tonda, nun ni koproba, Allah Yahweh, nun kan-kan aulule. El si eren aik ara, nun unyap noutam ulule. Aning ara, anda yata deiyok ati, an bidamnye binyuk, erepdeipdalam do? Aning ara, “Israel ninye nirya, sik deice tam unune. Sikda, mitik mambul bukni, ‘Nara weik mambulnye ununeʼ tenen, erepdalamce, maknya kintinipdalam do? Yuk nang ara, an atonunye kum unyaka ati do?” nyabuka wenebik.
Nun Israel kili sal, Mesir mutuku noutamak arye boyanamsulum bukni, nun opsiminyopura, Mesir mutuku nang kekebikirye, Kanaan mutuku tam unyak klil sal ati, lak nyanamake. Tonda ninye arye nyalamikba, Kanaan tam unyak kili sal akunum kekelamik ning ara, “Allah el si Yahweh ara, Israel ninye dam ulirye meliliba yanganyake. Tonda, Yahweh el winilul ning ara, Israel ninye elinyake. Allah arye meliamukba, Mesir mutuku noutam arye bisik yangalamik talak ara, Allah dua atonun kibukba, sik Israel ninye adua amu tam yanganyake. Tonda, lukunyan talak ara, uku buk paklamle touk, kibuka meliliba adirin deice arye yanganyake. Keting noutam babye, lukunyak talak babye, menekuka banmalebuk, sik eibuka aminyan banyake,” nyabuka nuklamikba, Kanaan mutuku ninye kekenyaka ati nyapkine.
Bukni amapo, nunce Allah Yahweh ati, ‘Nun like’ tenen, yaniptabibirye, malye kum kipnamabe. Tonda, Kanaan mutuku unyak ninye ati, ilil una meme. Ara, Allah el si Yahweh arye, nun dam ulirye melipsilyopura, adiparyuk sik amutuku unyak ninye nirya, obuka sirya daknamabe. Yatanye birye Kanaan tam nang ati melipsetua kume. Allah arye sikti, kalikuka melilamuk bukni, wini talak ara kume. Ati, sik talibuka melipmantonye ton pia, kum ulule. Bukni, nunda nun ni koproba Allah el si Yahweh arye melipnamsile. Ati, Kanaan tam unyak nong cang nang ati, ilil una meme,” nyaprik.
Aning atonun, adua ara tenepne talak uk, Allah el si eren aik deice tam tiklamuk. Ton talak ara, like bitinye sum, winilye ato asukumuk tiklamok bukni, ila tuba tonap tamubuka balamuk. Ton talak ara, like weik tonun arye, tonok mutuku atiklamuk. Atalak noutamak nirya ara, sik Israel ninye arye, amutuku uk ulamik. Ara, Allah el si Yahweh arye nyapdeiamuk touk, anyaik deice tam, dua yanuka teikamna ati, sikda amutuku uk ulamik. Allah arye, “Winira, anggun yuk mutuku binulume,” nyapne talak ara, sik dolamik aik nirya ulubuka balamik.
Nun nirya arye, ‘Yuk nang kekenamak’ tenen, “Allah ara, mikip weiknye ulule,” nyabuka, laka nyanamabe. Tonda, ‘Allah ara, el pia teleb ulye ning ap, el mikip ulye ning ap, ulula deice arye, nun Israel yala nang nirya talisulule. Tukwak arye dipdongobuka, im deice pia deice tam uplyeba, kum nukmanto ulamle touk, tonda, Allah el weik mikip ara, pia kum nukmanto ulule.
Na ni koproba, Allah el si Yahweh ati, moronmase ning ara, ani. “Na ni Allah, anda aning-aning nirya talebuka, deice tam erebuka, pia mikip weik deiyoknye ulyame. Ati ara, nun Israel ninye, nun malye wininyap ning ara, kunusa kum dopnune. Nun malye ning nirya ara, an dam lak nyabuka, lilipdeipkina arye moropkine. Ara dipkoprop, anda Allah, weik erebuka eitamnye, mikip weiknye ulyame. Tonda, ance, “Winipnamsine,” nyabuka, nyalin yupu nyapdeiamsulum ning ara, kum batakasilyame. Adiparyuk anyalisilyam touk, dipkoprob winisilyame. Ati ara, Allah antibuk, dib tenekinyak ninye ara, ance sikti, pia bico tenebuka melilyame. Amelilyam ninye ara, ance, “Aninguk wininamlulume. Aning ara, pia kum wininamlulume,” nyaplumba, ayupu moubuka talibuka wininyak ninye ati, melilyame.
Winbik ati ara, Allah Yahweh arye, Musa biti nyabuk. “Anggun ilil una meme. Narye anggun Israel yin talin nang ati, mikip arepsinyeba, Raja Og ap, el yin talin nang ap ati, anggun Israel yala nang arye, el tam nang opnamalume. Winipmunyeura, el taleamuk mutuku nirya dopropnamlume. Tonda, elce taleamuk nang nirya obuka, sirya daknamlume. Ara min talak, anggunce ninye deiyoknye, Raja Sihon, Hesibon mutuku talibuka, ulamukce, Amori yala nang taleamuk buk, omlum atonun, Raja Og babye opnamlume,” nyabuk.
Anggun asing arye eiplume. Ati ara, angguncuk amutuku bimunce, binuka unamlume. Ara, nun ni Allah Yahweh arye nunti, ‘Amutuku binuka, malye kibukapmunce, amutuku talipmunce, asukumuk unamlume,’ nyabuka, akunum nyapdeiamsuka ati, ‘Yata wiripnuyap do?’ tenen, teniltona ap, ilil una ap, kum upnamlulume. Anggun adiparyuk amutuku binamlume,” nyapdeiamsise.
Anggun mal olan talak upliba, anggun mal olan nang ap, mal olalbanamlum talak ara, anggun mal olan nang ara, yin talin nang pia weika arye, kuda basam balye deice bukuka, yanganamak ning ap, ninye arye kuda basam tapu kirikikiba, libuka tuku deice balamak ning, el si ara kereta kuda perang, aning deice bukikirye, anggun dam olyangasikiba eipmunce, anggun ilil una meme. Aning kum bukni, minop talak anggun ni koproba Allah Yahweh, Mesir mutuku ninye noutamak arye melibuka boyanamsuk Allah arye, anggunti melinamsile. Ati asum-asum nirya, el tibuk pia diba tenebuka unamlume.
Winibikcopura, atalak aryuk, na sikti, yu weik upnamnile. Winipniliba, sikti, bataknamne. Tonda, sik dam, na memepropnirye, sikti, melibuka kum kaliknyopura, yuk nang arye, Israel ninye obuka malye kipnamake. Tonda, weik mambul ning ap, ikin weik ning ap, tuba sik dam anyuk upliba, kanye imun ning, anggun dam deipnamsile. Ikin weik uplye talak ara, winipliba, sikce nyapnamake, ‘Se, weik mambul ning, nun dam usilye ning ara, nun ni koproba Allah ara, nun dam ton kum ulula ati, ikin weik usulul do? Dipkoprop Allah arye bataksuka ati, ikin usulule,’ nyabuka, malye nyabuka engenamake.”
Allah Yahweh arye, Yosua biti nyabuk, “An yin talin nang nirya wibuka dopdeipnulyame. Wibuka dopdeipminyeura, sik ap, Ai mutuku binamalume. Ara, ‘Binun do, kum do?’ tenen, kanye teniltona meme! Moubuka dinamalulume. Na Allah Yahweh arye, anggun mal olan nang ap, olyakna ning ap nirya, anggun deice dobuka deipnyeura, Ai mutuku ninye deiyok Raja nang ap, elce talibuka ulul nang, amutuku unyak nang ap, sikce weik asik donyak ning ap, nirya akunum anggunti arepnusine. Ati aninye ara, sik dam binuka, obuka kum kipdeipnamalume.
Allah an pil donyak malaikat, pia mikip weik nang, im deice unyakce, Allah antibuk ilil ululba, diba tenekinyakce, an siuk erebuka, si erekinyake. Sik im deice unyak malaikat nirya ara, weik mambul nang unyak bukni, nun ni Allah Yahweh anda, pia weik mambulnye ulyame. Sik im deice unyak malaikat nirya ara, an dam anyuk antanap dongobuka unyakce, an siuk erekinyake.
Allah Yahweh el si erenamapa ara, talye ati kume. Deiyok ara, nun ni koprop Allah, el si Yahweh, elda aning-aning nirya deice tam erebuka, talibuka Mikip Weik Deiyoknye ulula anya arye, talye ning bukni, ninye arye, ‘Nun ni,’ nyabuka, si erenyak Isa Mutuku Dongonye ap, isa mer nirya ap, yuk mikip ulul ning, aning-aning nirya ap, el amu tamuk unyake. Allah elda, mikip weik ubuka, aning nirya Deice Tam Erenanye ulule.