Ulangan 7:13 - Eipomek

¹³ “Allah arye anggunti, bico tenepsilirye, anggun dam aunamsile. Tonda teleb kipsilirye, aning-aning weika arye arenamsile. Ara, anggun mapu weik arepsiliba, weika arye dadeipdanin, banamak. Tonda, anggun wa wibuka kounamlum ning weika arye melipsiliba, duk weika arye moulamliba, dakanamlume. Ura, gandum ap, anggur tapu duk ap, anggur mek ap, minyak zaitun yo duk ap, weika arye arenamsile. Tonda, anggun sapi basam ap, domba basam ap, kambing basam ap ara, mi weik delinamak. Ara, Allah arye, ‘Amutuku arepsinirye, aning-aning nirya weika arye arepnamsine,’ nyabuka, nun apu yapu ati nyalilamuk touk, arepnamsil mutuku noutamak arye arenamsile.”

Ulangan 7:13 Referans Kwoze

Yohanes 14:21

Nyabukce ayupu ton dukdongobuka nyabuk. “Yata ninye do nirya, na yupu dobuka kekebikirye, ayupu uk talibuka pia dobolbanyak ninye ara, dipkoprop nati dib tenebuka talima arinyake. Nati, talima arilulnye bira, na Ni Koprop Allah arye anye biti, bico tenebuka, kanye deiplirye, melinauk unamle. Atonun, naryuk anye biti bico tenebuka, kanye deipnirye, melinamne. Tonda, ‘Atonye birye na wininye ning kel biknamnil’ tenen, laka kipdeipnebuk, kel biknamle.” Yesus arye nyabuk.

Yohanes 15:10

Narye anggunti, “Aning wininamlume, aning ara kum wininamlulume,” nyabuka nyasinye yupu nirya kekepmunce, ayupu talibuka dobolbimunyopura, adeice narye anggunti, bico tenebuka melinauk unamsine. Aning atonun, na Ni Koprop Allah arye, “Wininalyame,” nyabuka nyanilye touk, ayupu uk kekebuka dobolbaniba, na ni birye tuba talima arinulule.

Yohanes 16:27

Kume, na ni Allah el kanye aryuk talima aresulule. Ara, anggunce nati, ‘Allah arye Yesus dopdeibukura, yasuke. Elti nun diba tenepmabe’ tenen, diba akunum tenyamnuluma ati, Allah arye anggunti kanye talima aresulule.

Keluaran 23:25

Aning ara, si kum erenamlum bukni, anggun Israel ninye arye, nara anggun ni Allah Yahweh atibuk, si erebuka ulamnumunyopura, narye anggunti, kanye deibuka, teleb ulinamsine. Ara, anggun dinamlum ning nirya ap, mek dinamlum ning nirya ap ara, telebuk deipsiniba, amutuku noutam unamlum talak nirya ara, narye kalikuka melipsiniba, uk disilye ning aning-aning nirya, anggun dam kum unamsile.

Matius 6:33

Aninguk tenebuka, kum unamlum bukni, weik mambul ning ara, Allah arye, ‘Wininamake,’ tenen, nyasilye touk, diksukum winina ap lyepsilirye, nun kanye talima talibuka unamsil ning ap, im deice welepnamlum ning ap, aninguk minopce tenepmunce, pia moubuka talipmunyopura, yuk yala ning nirya babye, elce dipkoprob arenamsile.

Amsal 10:22

Allah Yahweh arye, ninye melina ati, kintinilisulul ning teleb ning ara, dolonyaba deice arye, bona weik talin nang kilisulule. Tonda, Allah arye bona weik talin ning arisilya atonun ning ara, ikin ning ap, kanye imun ning ap, ton tabakuka arisilya ak, ton kum dolanamabe.

Ayub 42:12

Tonda, Ayub minop talak Allah ap neika dukdongobuka, ulamuk anya arye, weik arye meliamukba, mitik bona weik talinanye Ulamuk bukni, atalak arye dipdongobuka, dotalak nirya ara, pia weik arye melilamukba, bona utotoa pia weik talinanye ulamuk. Allah arye tamubuka, aning-aning nirya pununa ati arelamuk. Ara, domba basam yupa weik, odikin barye empat belas ribu (14.000) ap, unta basam yupa weik, enam ribu ap, (6.000), tonda sapi basam dua ribu ap (2.000), tonda keledai basam kil ning, seribu ap (1.000) yupa winibuka arelamuk.

Ulangan 28:11

Allah Yahweh, elce anggun melisilirye, aning-aning nirya telebuk unamsile. Tonok ning ara, anggunce talye mangkau kibuka, mapu weik tonun arepsilyeura, weik upnin banamake. Tonda, anggunce talibuka weinamlum ning, yala-yala nirya babye, weik tonun deibikiba, dadeipdanin bakcopura, pia weik unamsile. Tonda, sik delilamsik nang ati, Allah elce, nyalin yupu nyapdeiamuk ara, “Narye anggun Israel nang ati arepnamsin mutuku ara, aning-aning weik mutuku arepnamsine,” nyapdeiamuk touk ubuka, anggun apia teleb mutuku ulamunce, tuku deice wa wibuka kounamlum ning yala-yala nirya babye, nonguk uplyeura, weik tonun unamsile.

Mazmur 1:3

Allah yupu moubuka tenelulnye bira, el wininamle ning nirya ara, telebuk wininamle. Anye el wininamle ning nirya ara, winipmanto ninye arye mek kup-kup ak yo koubikiba paplirye, bok teleb kibuka paplirye, duk moun talak li nirya ara, batakna kumce, teleb kibuka duk moulule. Tonda ayo bok kolubuka, kum saklamla atonun, Allah ati diba tenelulnye birye, wininamle ning nirya ara, telebuk wininamle. Deiyok ara, Allah arye diksukumuk wininyak ninye ati melilamliba, telebuk wininamake.

Ulangan 7:7

Musa birye, Israel ninye ati nyabuk. “Anggun nirya kekepnululume. Allah arye anggunti, tenebuka wiamsuka deiyok ara, ‘E Israel ninye ara, sikda mutuku-mutuku nirya weik yala unyake’ tenen, kum wipdeipsuke. Aning kum bukni, ‘Ninye ayala-yala nirya ara, weik daunyak bukni, Israel ninye ara, dipkoproba, ninye mitik tonun unyake ati, wipnamne,’ tenyamsuka anya arye, bico tenyamsukce, wipdeipsuke.”

Mazmur 11:7

Aning winipnala deiyok ara, talye ati kume. Deiyok ara, Yahweh el kanye talima noutam ara, pia diksukum winin ninguk winilula ati, ninye arye wininyak ning ereplirye, kanye delilula ati, elce, “Aning ara, wininamlume. Aning ara, pia kum wininamlume,” nyapdeipsuk yupu deice nyasilye touk, wininyak nang ati, el kanye pia delilule. Ati, diksukumuk wininyak nang ara, sirya talak ara, el dam yakirye, el urasin ton eipnamake. Allah arye, sik anang ati, bico teneplirye, kanye deipnamle.

Imamat 26:9

Na Allah ara, anggun damuk bico tenesinirye, anggun dam unamsina ati, narye anggunti melinamsine. Meliamsinya deice arye, anggun mapu babye, weik tonun arenamsine. Ara, anggunce deipmunba, dadeidanen, banamak mapu nirya ara, pia weik unamake. Tonda, narye, “Winibuka unamlume. Winipmunyopura, narye dipkoprob aning ton, aning ton winipnamsine,” nyalin yupu deice nyapdeipsise yupu ara, aning nirya dipkoprob melibuka winipnin banamsine.

Ulangan 13:17

Amalye ning nirya ara, anggunce ton, ‘Naʼ tenen bobinuka deipnuyabe,’ kum tenenamlum, bukni, aning nirya ara, adiparyuk kum kilinamlume. Winipmunyopura, Allah arye anggunti, yu upnamsil ning nirya ara, elce namin kipnamsile. Namin kipsilirye, tamubuka anggunti, Allah arye bico tenepnamsile. Elce anggunti bico uplyopura, anggun yala nang nirya ara, tonap tabakdeipsiliba, weik tonun upnin banamsile. Ara, Allah elce anggun apu yapu ati, ‘Wininamsine,’ nyapdeiamuk yupu atouk, winipnamsile.

Ulangan 30:5

Winipsilyopura, minop talak anggun apu yapu nang talibuka ulamik mutuku, talibuka unamlume. Tonda, anggun amutuku ulamunye talak ara, aning-aning nirya weik arepsiliba, weik upnin banamsile. Aning atonun, amutuku noutamak deipsiliba, ninye weik upra banamlume. Minop talak, anggun apu yapu nang, aning-aning mitik tonunuk talilamikce, ninye mitik anunuk ulamik bukni, anggunda aning atonun kum unamlume. Aminyan atalak, Allah arye, anggun dobuka, amutuku noutamak deipsilyopura, anggunda aning-aning pia weik talipmunce, ninye babye pia weik upnin banamlume.

Mazmur 127:3

Dipkoprop nun ninye arye deilinyab mapu nirya ara, Allah el bidamnye aryuk, talye aresulula anya arye, amapu nirya ara, ‘Allah arye nun mapu nirya ara, dekne ning arelamak touk aresulule,’ tenenamabe.

Mazmur 146:8

Tonda, Yahweh arye sik asing kulamle ninye ati, kweteplirye, tamubuka teleb kipdeipliba, teleb kibuka dinyake. Tonda yata ninye do nirya ikin weik upliba ikin kanye bobuka unyaka ati, ‘Seʼ tenen, nong kanupdongobuka, unyak ninye ara, Yahweh arye aninye dilula ati, elce sikti, tamubuka teleb kililule. Tonda, Allah Yahweh arye, sik diksukum winin ninguk talibuka, teleb wininyak ninye nirya ati, kanye delilule.

Amsal 15:9

Ninye ton Allah Yahweh el ulye touk, tenebuka kum ukirye, malye winin ninguk talibuka wininyak nang ara, Allah Yahweh arye, ‘Na like,’ tenelirye, anang ati, pia yu ulule. Bukni, ninye ton, ‘Allah el ulye touk uptinye’ tenen, pia pi dobuka, kel bikilulnye bira, Allah elce, ‘Winibuka unamake,’ tenelul touk, ululnye ati ara, pia kanye delilule. Atonun unyak nang ara, Allah arye pia bico tenelule.

Ulangan 1:8

“Teneipdelulume. Amutuku-amutuku nirya ara, narye akunum arepmasina ati nyapsine. Allah, na si Yahweh arye anggun apu yapu Abraham ap, Isak ap, Yakub ap ati, ‘Aminyan talak, amutuku nirya arepnamsine,’ nyapdeipsa ati nyapne. Tonda, nyapse. ‘Anggunce deipmunba, anggun mapu arye, dadeipdanin balamica ani, aminyan deipnamak mapu ati, amutuku nirya arepnamsine,’ nyapdeipse. Ati, narye, ‘Anggunda amutuku binuka unamlulume,’ nyapdeipse mutuku uk, wini talak anggun bimunce, talibuka unamlulume,” nyapsine. Allah arye, Musa biti nyabukba, Musa birye Israel ninye ati, laka nyabuk.

Ulangan 28:1

Musa birye, sik Israel nang nirya ati, nyabuk. Anggun Israel nang ara, anggunce si erelulum Allah, el si Yahweh, el tibuk mikip arye talimunce, elce, “Aning ara, wininamlume. Aning ara, pia kum wininamlume,” nyapdeibuk yupu, moubuka kekepmunce, wininamlume. Ati ara, arup narye anggun kekenak laka nyapdeipsin yupu, moubuka talimunce, aninguk dipkoprob winimunyeura, anggun si erelulum Allah, el si Yahweh arye, anggun erepdeipsilyeura, mutuku-mutuku nirya unyak nang arye, anggun si biksikirye, si erenamsiake. Anggunda, yuk mutuku nang nirya ara, sik deice tam unamlume. Sik yuk mutuku unyak nang ara, anggun amu tamuk unamake.

Nehemia 9:32

Ati ara, wini talak ara nun Israel nang arye malye winilamububa, ance pil weik dolamsulumce, lyelolamsulum ning ara, ‘Aning ara mambul kume. Aning ara, daopnyake’ tenen, kum bataknamsilyame. Malye winilamupu buk, ance ikin ning delilamsulum ning ara, tuba tenenamsilyame. Ara, nun wini talak unyap nang ikin usilye ning ap, nun ninye deiyok talibuka ulamik Raja nang ati, ikin ulamuk ning ap, nun yupu bokolina deiyok nang ati, ikin ulamik ning ap, an si eren aik pum tam pil dona deiyok nang ap ati, ikin ulamik ning ap, an yupu lak nyana deiyok nang ati, ikin ulamuk ning ap, nun apu yapu ati ikin ulamuk ning ap, tuba tenenamsilyame. Ura an mapu nirya ati, ikin ulamuk ning nirya ara, ‘Aning nirya ara mambul kume,’ kum tenenamsilyame. Sik Asyur mutuku ninye deiyok nang arye, nunti talibuka, ikin ning nun nong deice delilamsikce, anirye dipdongobuka, wini talak babye ikin usulul ning ati, ‘Aning ara ikin kum tenenamsilyam’ tenen, morokinyabe. Nun ni Allah, anda mikip weiknye ulyame. Tonda, anda aning-aning deice tam ululnye ulyame. Tonda, yuk weik ning aupmalebuk, anda weik mambulnye tonok ulyame. Yuk ning nirya ara, mitik mambul uka. Ance bico tenelamsulum deice arye, “Bico tenesununa anya arye, winibuka wininamsine,” nyapdeiamsulum ning nirya ara, dipkoprob winilyame. Tonok ning babye kum batakasilyame. Ance pia tuba melisilyame. Ati nun ikin usulul ning ara, tenepsimince, melinamsilame na nio.

Ayub 1:10

Tonda, an pil donanye, Ayub el winilul ning ara, talye ati kume. El talilul ning nirya ap, tonda el pil dolul ning nirya ara, ance moubuka kalikimince, aning-aning nirya yamubuka areminyeba talilule. Tonda, el weilul ning weik arye areminyeba, el ulul mutuku nirya langdilule.

Mazmur 107:38

Allah Yahweh arye, sik aninye ati melilamliba, sik mapu delina ati ara, weik tabakuka arepnin baliba, delinamake. Winipnin banamaka deice arye, sik mapu nirya, pia weik deipnin banamake. Tonda, sikce talibuka weinamak kam ning ayala-yala nirya babye, pia weik upnin banamle.