Ulangan 4:34 - Eipomek

³⁴ Aning atonun, anggun kel do? Dan mutuku ninye ati, yuk mutuku ninye talilamika noutamak, Allah arye dalubuka lyebukce, yukak bobiyuk do? Bukni, Allah arye anggun Israel ninye ati, Mesir mutuku noutam arye lyebuka boyanamsuka deiyok ara, ‘Israel nang, ‘Naʼ tenen, ninye unamak’ tenen, winibuk. Kume, yuk ninye nirya ara, ‘Allah arye aning atonun winipsuke,’ kum nyaptinge. Anggun Israel ninye uka. Allah arye aning winibuka deiyok ara, ‘Israel ninye ‘Naʼ tenen, nang unamak’ tenen, winibuk. Tonda, Allah arye anggun Israel ninye ati, Mesir mutuku noutamak arye dalubuka dobukapsukce, lyepsuk talak ara, winilina ap, ninye kum winipmanto ning ap, im deice mambul pil dona ap, ninye olana ning ap, el bidamang mikip weik kina ap, el taruk koproba arye mikip weik pil dolamuk ning ap, anirya deice arye, anggunti dalubuka lyepsuke. Aning babye, weik mambule. Aning-aning nirya ara, anggun ni koproba Allah, Yahweh, el bidamang taruk arye, mikip weik ning winibukba, ninye nirya ilil weik ulamukba, anggun Israel ninye arye, aning-aning nirya ara, anggun bidamang asing arye elilalumce, akunum kel bikamlume. Aning ara, weik mambule.

Ulangan 4:34 Referans Kwoze

Ulangan 26:8

Nun apu yapu arye morolamikba, Allah el mikip weik deice arye, Mesir mutuku noutamak arye, bobuka yangalamsuke. Allah el mikip ara, weik ulula ati, elce ninye winipmanto kum pil ap, ninye kum winipmanto ning ap, weik mambul ning areamuk ning ap, adeice arye, anang nirya arye, ‘Se aning ara, dipkoprob Yahweh aryuk pil donmasile,’ tenebikce, ilil weik ubukba, yok sirim talibuk. Yahweh arye, nun apu yapu lyebukce, dobuka boyasuke.

Ulangan 5:15

Aning wininamluma deiyok ton nyapnusine. Ara, anggunce pia moubuka teninalume. Ara, ‘Minop talak, nunda Mesir mutuku ulamupu talak nirya ara, amutuku nang, sik amu tamuk ulamupuba, ikin weik pil aruklamsik ati, sik talye pil melin nanguk ulamupu ani, nun ni Allah Yahweh, el mikip weik ap, el mikip weik taruk deice arye boyanamsuke,’ tenenalume. Ati ara, narye anggunti, ‘Wininamlume, anggun dikdik sen sum, Sabat sum kintinipnamnulume,’ nyapdeipsise touk, dikdik sen sum, Sabat sum yuk, wibuka kintinipmunce, na Allah ati, si erenamnulume.

Keluaran 6:6

Ati ara, Israel nang nirya ati, nyapnalame. Allah arye nyasulule, “Nara anggun ni koproba Allah, na si Yahweh unune. Na mikip deice arye, Mesir nang anggun nong deice ikin pil weik disinyak noutam ara, lyepdopnamsine. Ara, na mikip ap, mambul weik ning winipnamne deice arye, Mesir nang wenebuka opnirye, lyepnamsine.

Ulangan 7:19

Ara, anggun asing koproba arye elilamlume. Allah arye, Mesir mutuku noutam, sik Mesir mutuku nang ati, pirilen ning weik arye arelamukba, batakdongopsike. Winilamuka deice arye, lyebuka dopropsukce, amutuku boyanamsuka ati, aning atonun tuba tonap wininamle. Ara, ‘Allah el mikip ara, weik mambule, tenenamak’ tenen, ninye kum winipmanto pil dolamuk ning ap, pia mambul uk deiyok ning arebuk ning ap, el mikip deice arye, ikin ning weik, sik nong deice delilamuk. Aning nirya winilamuka deice arye, Allah el mikip deice arye, anggun Israel ninye lyebuka dopropsukce, boyanamsuke. Ati yuk mutuku unyak ninye ati, ilil kum tenenamlulume. Abinamlum mutuku nang ati, ‘Nun ilile,’ tenepmalum bukni, anggun ni koproba Allah, el si Yahweh arye, ato pil doplirye, aninye ati wenebuka opnamle.

Yeremia 32:21

Allaho, an mikip weik deice arye taleplumce, an mapu koproba Israel nang ara, Mesir mutuku noutam, ikin weik ulamikba, bobuka ateleb mutuku tamubuka boyanamsulume. Tukwak nang arye, kum winipmanto pitin-pitin ning ap, tonda ninye arye kum dopmanto pil ap, mikip weik ninye arye winipmanto kum pil ap, dolamluma deice arye, Israel nang lobuka lyepropsulume. Ance, kum winipmanto ning nirya ara, an mikip weik taruk deice arye, pil dolamlumba, sik atalak ulamik nang ara, aning nirya eililamikce, ‘Seʼ tenen, imun kanye bobuka, ilil weik asa ulamik.

Ulangan 6:21

“Kume, minop talak, Mesir mutuku noutamak, sik weik deiyoknye Firaun, el amu tam ulamuburye, talye yangalamik nang atonun ulamupuba, ikin pil weik, nun nong deice delilamsukba, ikin weik ulamupu. Winilamupu bukni, Allah el mikip deice arye lyepsukce, bobuka amutuku boyanamsuke.”

Keluaran 13:3

Nyabukba, Musa tamubuka Israel ninye dam yayukce, ayupu nirya Israel ninye ati, nyabuk. Asum ara, nun ni koprop Allah Yahweh, el taruk mikip deice arye, Mesir mutuku ikin kanye bobuka ulamlum talak arye, akunum lyebuka lopdeiamsuke. Ara, Mesir mutuku ninye arye tapu koubukapsikce, ikin weik pil pia, anggun nong deice delilamsikba, ikin piluk talye dolamlum bukni, Allah arye lyebuka lopdeipsuke. Ati ara, ‘Asum arye aning nirya pia tenenamapʼ tenen, keting tamun nirya ara, asum arye anggunce, ‘Kume nunda Mesir mutuku ulamupu talak ara, ikin weik pil pia weik tonun dolamupubuk, Allah Yahweh el mikip weiknye birye, lyebuka lopdeipsukce, boyanamsuka ati, pia teninamapʼ tenen, wininamlume. Ati, aning ara, asum arye pia tenenamlume. Aning tenina ati, asum arye, roti kwaning nen ning ara, pia kum dinamlume. “Allah arye nyapdeipmasile,” nyabuka, Musa birye, Israel ninye ati nyabuk.

Ulangan 34:12

Tonoknye babye ton, Musa pil dolamuk touk, kum dolamik. Israel ninye noutamak ninye kum winipmanto ning ap, ilil weik kipdeipmanto ning ap, mambul pil kum dolamikba, kum elilamik. Musa ulamuk touk, yuk nang atonun nang ton, pia kum ulamik, ton kum unyake. El tonok ulamuk.

Keluaran 3:10

Wininyaka ati ara, narye dopreipkiniba, Musa ance, Mesir nang deiyoknye, Firaun, el dam bimince, “Allah el mapu, Israel nang bobuka binamne,” nyapnamlyame. Allah arye, Musa biti nyabuk.

1 Peterus 5:6

Aning ati ara, Allah el mikip pia weik ululnye, el amu tam bukuka, anggun kanye darabuka, talima nimalye aryuk unamlulume. Winibuka umunyopura, Allah arye tenepsuk talak akunum uplyopura, anggun dobuka ereipnamsile.

Keluaran 10:7

Musa biyukopura, Firaun el pil dona deiyok nang arye nyabik. “Yata talak arye, anye bira nun noutamak arye, pena youlamle atonun winipnamsil do? Nunce elti, lik weik upsile. Ati ara, Israel ninye ara, ance batakminba, dabinamake. Dabikirye sik Allah, el si Yahweh ati, el si erepnin banamake. Yahweh arye, nun amutuku nirya opmasilba, pia malye upmasil ning ara, kum elilyam do? Kanye imun upsil ning ara, an kum tenepmalam arye do?” nyabik.

Ulangan 29:3

Ara, ‘Mesir mutuku deiyok nang arye, na nyapye yupu kekepnamak do?’ tenen, weik ikin winilen ning ap, tonda, weik kanye imun ning ap, ninye arye kum winipmanto pil ap, ‘Se, dipkoprob Yahweh arye apil dolule, tenepnamakʼ tenen, sirya dakuka, pil dobuk ning ap nirya ara, sik Mesir mutuku ninye dam, Allah elce winyamuk ning nirya ara, anggun babye akunum eiamlume.

Keluaran 7:3

Nyapnamle bukni, narye, ‘Firaun kum kekepnamle’ tenen, talima malye un ning, Firaun biti arepnyopura, el kum kekenamle. Narye ninye winipmanto kum ning, weik mambul ning ap, kanye imun ning ap, weika arye tabakuka, Mesir mutuku deipnamne.

Mazmur 78:12

Diba, anang sik apu yapu tuba kam ulamik talak nirya ara, Allah arye, pia mikip weik ninye dopmankum pil dolamukba, atalak kam ulamik nang, sik asing arye elilamik. Ara, Mesir mutuku noutam bukni, amutuku si ara, Zoan mutuku dam arye, mambul weik ninye dopmankum pil domuk ning babye, kum biklamikce, luba kiamik.

Keluaran 1:9

Anye birye, el amu tam ulamik ninye ati nyabuk. “Anggun ton dipdelulume, Israel ninye, yupa pia weik akunum upmaka ati ara, sik mikip weik ubikca deice arye, nun yanipnamsiyake.

Keluaran 14:30

Asum noutamak ara, Allah el si Yahweh arye Israel ninye lyeprobuk. Ara, Mesir ninye talibuka ulamika noutamak ap, tonda Mesir mutuku yin talin nang arye, ‘Israel ninye tomobuk opnuyap,’ tenebik ning ap, noutamak arye lyeprobuk. Tonda Mesir ninye laut mekwen noutamak dipmikba, sik nong laut mekwen kup-kup upmokak ara, Israel ninye arye eibik.

Ulangan 9:29

“Naio, Israel ninye ara, ance pia tenipnamlyame. Allah ance, ‘Na mapu unamake. Na tenen ninye pia unamak’ tenen, wiamsulumce, Mesir mutuku noutamak, an mikip deice arye bobuka yanamlume. Ati, ‘Anang pia kum opnamlyame’ tenen, moropkine. Na Musa birye Allah ati moropse. “Nyabuka moropsa ati ara, wini talak ara, na Musa birye, anggun Israel ninye ati, ayupu laka nyapsine. Ayupu nyabukapsirye, Allah ati morolamsise. Musa birye Israel ninye ati, laka nyabuk.

Ulangan 11:2

Ura, anggun wini talak ululum Israel nang ara, anggunce deiplum mapu ati, ayupu kum nyapsine. Anggun mapu ara, aning nirya kum elilamikce, kum bikamike. Bukni, akunum wisi danmalum nang anggun nirya ara, akunum elilamlumce, bikamluma anya arye, anggunti nyapsine. Ara, wini talak ara, yata winin ning do, anggun ni koproba Allah arye, anggun dam winilamukba bikamlum ning ara, moubuka teninamlume. Ara, elce peterelamsuk ning ap, el mikip weik deice arye, pil dolamsuk ning ap, el mikip weik taruk deice arye meliamsuk ning nirya ap ara, tuba-tuba tenenamlume. Anggun mapu ara, aning ton kum bikamik bukni, anggun wisi akunum dalum nang nirya ara, anggunce akunum eibuka bikamlume.

Ulangan 33:29

Ati ara, anggun Israel ninye ara, anggunda pia telebuk unamlume. Allah arye, pia teleb kipdeipnamsile. Allah el si Yahweh arye, anggun Israel ninye ati, lyepdeipsukce, wiamsuk bukni, yuk mutuku unyak ninye ati, aning atonun, sikti, ton kum wipdeiamuk. Allah arye, anggunti melisulule. Yin talin nang arye, ‘Mal arye opsicak’ tenen, ting kiniklamik touk, Allah arye anggunti, moubuka kalikisulule. Ninye arye, pia teleb parang ya bobikirye, kalikilalamak touk, Allah arye anggunti, kalikuka melipsilirye, anggun mal olan nang ati, obuka sirya daknamle. Winilula ati, el melipsilyopura, anggun mal olan nang dam bimunyopura, anang arye, ilil weik upliba, kanulongonamake. Winibikirye, ‘Se, nun ona kume, bico tenepsululume,’ nyabuka moropnamake. Anang nirya obuka, sirya dakmunce, sik nong deice yaniptapnamlume. Tonda, sik Isa Mutuku Dongonye, el si erena ati, mutuku deice delilamak ning nirya ara, daklopmunye deice, yanibuka banamlume.

Mazmur 24:8

Weik Ninye Deiyok kina ati, mikip weik ap, pia teleb ap, weik mambul winilulnye bira, yatanye do? Kume, elda yuknye kume, nun ni koproba Allah, el si Yahweh, elcuk, Raja ulule. Elda pia mikip weiknye winilirye, aning-aning nirya talilule. Allah Yahweh winilirye olanmakce, talak nirya ara, el mikip weik ulirye, el mal olan ninye nirya ati, malye kiplirye, obuka sirya dakalilule.

Mazmur 136:12

Ara, el mikip taruk ap, el pia mikip weik ulya deice arye, sik Israel nang dobuka, Mesir mutuku noutam arye, lyebuka bobinamuke. Allah Yahweh arye, nun Israel nang ati, “Pia bico tenesinirye, tuba-tuba melinamsine. Pia telebuk kilinamsine,” nyalin yupu deice arye nyapsuka ati, aning ara, pia kum bataknamsile. Anirya ara, nun nirya arye el tibuk, si erebuka kina ati, ‘Naio nunce anti pia telebe nyabkiabe,’ nyanamabe.

Yesaya 51:9

Allah arye ayupu nyapdeibukba, sik Israel nang arye nyabik. “Se, nun ni Allah Yahweh, an adiparyuk kekepsimince, melibuka lyepsilyame! Na nio, an mikip weik deice aryuk, nun lyepdopsilyame! Minop talak ance nun apu yapu ati, melibuka lyepdonlum touk, nunce, ‘Adiparyuk tikibirye, nun atalak unyap nang ati ton, yanuka lyepdopsutumʼ tenen, moropkiyabe. Ura, nun ni Allah anti, nun apu yapu arye, ‘Nun ni koproba Allah, melipsilyame!’ nyabuka, moropkikba, yu weik ulamuk isa kwatima, akam ulamuk ning, el si Rahab, akunum parang ya arye sekuka omuka deiyoknye birye, yatanye birye do? Kume, yuknye birye kume. An Allah aryuk, weik laut mekwen noutam kam ulamuk kwatima, el si Naga Laut, weik laut mekwen pum tam arye lukuka oplumba, diamuke.

Yeremia 21:5

Dipkoprop nyapsine. Nara Allah, naryuk, anggun Yerusalem mutuku ululum nang ati, opnamsine! Ara, na mikip weik taruk deice aryuk, anggunti yanuka opnamsine. Tonda, tuba-tuba narye anggunti, yu weik unulul ning ara, pia weik tonun, mek langdilamle atonun unulule. Narye anggunti, yu weik unulula ati, derepsinirye, wenebuka oplopnamsine.

Keluaran 10:21

Allah el si ara, Yahweh arye Musa biti nyabuk. “An taruk im deice pukminba, Mesir mutuku noutamak nirya inipnule,” nyabuk. “Winibuka pia inipnamla anya arye, dirina ara, mitik tonun babye kum upliba, ninye arye kum eipdanmanto ubikirye, ilil weik upnuyake,” Allah arye Musa biti nyabuk.

Keluaran 15:11

Yatanye do? Ninye arye, ‘Aning ara Allah atonun’ tenebikirye, yuk ning si erenyak ning nirya ara, an Yahweh uminya atonun kum uptinge. An winilyam touk, yuk Isa Mutuku Dongonye, sik mikip koproba deice arye, kum winiptinge. Tonda, yuk nang nirya ara, an winiminya atonun kum wininyake. An tonok ara, pia diksukumuk ulyame. Pia telebuk ulyame. Pia telebnye, dirina weiknye umince, ninye kum winipmanto ning, mambul pil, ninye winipmanto kum pil weik dolyame. Yata ning do nirya, an winiminya atonun kum wininyake.

Keluaran 19:4

Narye Mesir nang ati wenebukapsirye, oltakalamse ning ara, akunum elilamlume. Tonda anggun babye kele. Narye anggunti, ‘Na tenena ninye’ tenen, Mesir mutuku noutamak lyepsisirye, winipmanto ara, Ambun maka opmanto ning nirya deice lakuka balamle touk, Ambun maka pol deice deibuka na dam boyanamsise.

Bilangan 20:16

Winilamupu buk, aminyan talak Allah ati morobupuba, kekebukce, Allah el im deice pil donanye malaikat tonok wipdeibukba, Mesir mutuku noutam arye, bobuka boyanamsuke. Winilamsuka ani, wini talak ara, nunda Kades mutuku akunum yanuka unmabe. Ara, nun kwit, an taleamlum mutuku sirya, wiliba dam ayanuka unmabe,” nyabuka, Musa el mapu arye, Edom mutuku taleamuk deiyoknye dam, binuka laka nyabik.

Ulangan 1:30

“Anggun ni Allah Yahweh arye, anggunti melibuka bobanamsile. Elce menekuka baliba, nunda el aminyan tamuk melibuka banamabe. El mikip weik deice arye, Amori nang, omutuku unyak nang ati, oplirye, sirya daknamle. Tonda, anggunti, el mikip weik deice arye, moubuka kaliksilirye, bobanamsile. Ara, anggun Mesir mutuku noutam ikin weik daulamlumba, Allah Yahweh el mikip weik arye, pil dopsukce, boyanamsukba, anggun asing arye eiamlum touk, wini talak babye atonun, winipnamasile.

Ulangan 10:21

Anggun ni koproba Allah ati, ‘Telebe,’ nyabuka, el siuk erenamlulume. Allah arye anggunti, mikip weik deice arye, ninye kum winipmanto ning ap, mambul ning ap, melibuka pil dolamsuk ning nirya ara, minop talak arye elilamlume. Wini talak tuba ululba, anggun asing arye elilulume. Ati, ‘Telebe,’ nyabuka, Allah ati kanye deibuka, mot nyanamlume.

Yosua 24:7

Laut mekwen dam yayik talak ara, anggun apu yapu nirya arye, Allah el si Yahweh ati, ‘Se, nun ni Allah melipsilyame,’ nyabuka, weik arye malye nyabuka, ngalukunmekce, moronmek. Wininmekbuk, Israel nang atam, Mesir mutuku yin talin nang otam, anoutam ara, narye kunukne ning arepsiba, inibukopura, Mesir ninye arye, sik Israel ninye ara, kum eipdanmanto kibik. Atalak aniryuk, narye arepsiba, laut mekwen dana-dana kipdobukba, Mesir ninye anoutam bayikba, mekwen arye, Mesir ninye mek ansinipdongobukce, obuka sirya dakuk. Awinyamuk ning ara, anggun bidamang asing arye, aning nirya elilamluma anya arye, akunum kel bikamlume. Winipsukbuk, anggunda mek ap, ninye ap kum mutuku, yini mutuku noutamak bisik, keting tamun yupa weik balamlume. Allah arye nyabuk.