Aninguk kum bukni, anggun Israel nang arye, nati, ‘Elda nun like ati, elce nyapdeipsuk yupu ara, kum kekebuka talinamabe,’ teneplumce, na yupu tuba yaniplopnumunyopura, na Allah arye, anggun unamlum mutuku nirya ara, olana deiyok ning arepnyeba, yuk mutuku yu weik yin talen nang arye, sik parang ya ap, olan ning nirya ap bobikirye, anggun dam yanuka, obuka sirya daknamsiake. Obuka sirya daksikirye, anggun nirya tapu koupsikirye, anggun babye, pera mutuku bobinamsiake. Aning winipsikcopura, yuk pera lo mutuku yu nang arye, anggun Israel nang ara, dana-dana tam mutuku bobinamsiake. Atalak noutam ara, tonok mutuku ak, kum unamlume. Dipkoprob, malye kanye bonamlume. Malye kanye bopmunce, yuk mutuku ninye asik nang ulamak touk unamlum talak ara, anggun wa windam nirya babye, malye kipdeipnamsine. Tonda, anggun unamlum asik, weik kota mutuku nirya ara, batakmunyeba, talye louk uplyeura, dimbulanguk, walang yo uk upnamle ati, nyapsine.
Ulangan 4:27 - Eipomek27 Tonda, malye winipmunyopura, Allah el si Yahweh arye, anggun talye bataksilirye, amutuku noutam arye, yuk mutuku dopkwetepsiliba, anggunda mutuku-mutuku nirya unyak ninye noutamak binuka unamlume. Talye tikilyangan nang atonun unamlume. Yuk mutuku noutamak unamlum talak, ninye pia weika arye dipnamlum bukni, anggun yupa mitik tonun dem kam unamlume. Gade chapit la |
Ulangan 4:27
23 Referans Kwoze
Mesek mutuku ap, Tubal mutuku ap, sik yin talin nang ap, sik amutuku bitinye ulamik nang babye, min arye dipneura, weilamikba, asukumuk yayikce, aunyake. Asukumuk manyaka, dana-dana tam dukdongobuka, diamikak weiamik nang ton, asukumuk unyake. Sik anang nirya ara, mal olanmeka ani, obikak diamik. Sik diamik nang ara, tuku palibuka wiamik bukni, sikda Allah diba kum tenelamikce, pia malye-malye weik winilamik nang ati, Sheol mutuku pia amu noutam binuka deiamik. Sik anang kam tuba ulamik talak ara, amutuku-amutuku noutam ulamikce, yuk ulamik nang ati, yu ubuka, malye weik winilamika ati, sik dana-dana tam ulamik nang nirya ara, sik anang ati, ilil pia weik ulamukba, sik nong sirim talilamuk.
Asipdesibuk, sik anang arye tamubuka, “Persia mutuku nang arye obuka sirya daksikce, sik mutuku bobinamsik nang ara, ton nang ara diamik bukni, ton nang yupa ara, mitik tonun tuba kam ukirye, tamubuka Yerusalem biyike. Sikda, Yehuda tam Yerusalem mutuku dam tamubuka biyik bukni, ikin weik unyake. Unyak buk, yuk mutuku nang arye, anang ati nalinyakba, alye weik ulule. Tonda, Yerusalem mutuku weik keil poka domik ning ara, dakuka uluplobik touk, tuba aubuke. Apoka bublan ara, uku dongobike,” nyapnike.
Winibikopura, aminyan ara nyabik. “Amapuo, winira, weik nang asik dopnamabe. Amutuku noutamak ara, pia cang weik aik dopnin balamipya ani, im dup welepnamle. Winibuka doptibya deice arye, yuk nang nirya arye, nunti, ‘Se, anang ara, weik mambule,’ nyabuka, nunti ereipsikirye, weik nang unamabe. Winibipyopura, aminyan talak ara, yuk-yuk wilibuka tukwak mutuku noutam nirya, yuk-yukak kum bokdanamabe. Asukumuk neika unamabe,” nyabuka yupu talipdanamikce, apil deiyok koubuka dolamik.
Wininmeka ati, Yakub birye Simeon ap, Lewi ap ati nyabuk. “Se, anggun bitinye arye, malye winipmaruma deice arye, amutuku noutamak unyak ninye, sik Kanaan tam ninye nirya ap, sik Peres tam unyak ninye nirya ap arye, nati ara, ‘Tong welelamle ning atonun kipdeipniyake. Nun like,’ tenepnikirye, ‘Nun like,’ nyanamniyake. Ati, na nong deice ikin ning weik deipmanurume. Nun yala ninye ara, mitik anunuk unyap bukni, sikda pia weik unyaka anya arye, sik nirya bulubuka, neika olyasicopura, na ap, na mapu silip nirya ap, obuka malye kipsitinge,” nyabuka wenebuk.
“Allah Yahweh, el yu weik ubukba, aning ara, adiparyuk winilamuk. Tonda, Allah el yu pia weik ubuka deice arye, sik Israel nang amutuku ulamika ani, amutuku noutam arye dobuka, sik yuk ninye asik nang mutuku donoknamuke. Winibukura, sik Israel nang nirya ara, yuk nang mutuku binuka, ulamike,” nyanamake.
Winipmunyopura, anggun ni koproba Allah, el si Yahweh arye, bico tenepnamsile. Winibuka bico tenepsilirye, anggun min arye taleamlum ning, kum dayuk ning nirya ara, tuba tamubuka tonap arenamsile. Tonda, anggunce malye winilalum buk, anggun wenena ati, dobukapsukce, yuk-yuk mutuku nang kan-kan delilamsukba, yuk-yuk mutuku noutamak ulalum bukni, aminyan talak ara, anggun ni Allah arye, dopdeiamsuk noutam arye, tamubuka boyanamsile. Boyasilyopura, min arye kum dasuk ning, teleb ning nirya ara, tuba tonap arepsiliba, weik upnin banamsile.
Tonda, Allah arye nyabuk. “Sik Israel yala nang arye deibikiba, dadeipdanin banamak nang nirya ara, wenepnirye, bokuka yuk-yuk deipnirye, amutuku noutam arye yakniba, sik nirya ara, yuk-yuk mutuku noutam unyak nang kan-kan uk binuka unamake. Tonok teleb mutuku noutamuk, kum unamake,” nyapdeibuk. Winibuka ati ara, Allah arye sik Israel nang nirya bokukce, amutuku noutam arye yakuka, sikda yuk-yuk mutuku ulamik nang kan-kan donokukba, amutuku binuka, anang ap neika ulamik.
Atalak ara, sik Siria tam noutam unyak Israel yala nang ara, mitik tonunuk unamaka ati, Winipmanto ning ton nyapnusine. Ara, gandum duk akunum libikce talak ara, duk mitik tonun ton tukwak saklamle touk upnamake. Tonda, zaitun yo duk mouamlyak, weik tam dakdobikirye, ayo deice tam yo duk sirik ning bataklamaka touk upnamsiake. Ayo deice tam ara, yo duk bitinye atonun, winilye atonun tuba ulamle touk, atalak ara Siria tam mutuku noutam ara, Israel yala nang mitik tonunuk batakikceura, tuba kam unamake. Weik kume. Aning ara dipkoprob upnamle ati, nara Israel yala nang, anggun ni koproba Allah Yahweh arye akunum nyapsine.
Aning winiluluma ati ara, na Allah arye anggun aululum mutuku noutam arye bobinuka, yuk pera mutuku noutam dopkwetepnamsine. Ara, anggun bikina kum mutuku, bobinuka donoknamsine. Tonda, anggun apu yapu babye, amutuku kum bikamik. Anggun yakuka yuk pera mutuku noutam donoknamsine. Amutuku binuka unamlum talak nirya ara, narye anggunti, ‘Bicoeʼ tenena kumce, pia kum melinamsine. Winipnamsina ati, awini talak ara, anggun bikina kum ning, talye isa ati, ‘Nun deiyoknye aulule,’ nyabuka, walwal aryuk, aning si erenamlume. Ara, keting noutam babye, sintam babye, aning atibuk, si erenamlume. Atalak ara, narye anggunti, ton tuba bico pia kum tenenamsine. Allah arye nyabuk.
Anang obuka, kum sirya dakse bukni, sik amutuku noutam ara, padang pasir mutuku tuba unmek talak arye, sikti, nyapse. Dipkoprob, na si deice arye, nyalin yupu arye nyapse. Ara, “Kume, anggun atalak ululum nang nirya ara, yakuka dopkwetepniba, mutuku sirya, im sirya nirya, dana-dana tam unyak nang noutam arye binuka, daunamlume. Yuk-yuk pera mutuku nang ap, neika unamlume. Narye dopkwetepsinyopura, anggunda dana-dana tam mutuku noutamuk, binuka unamlume. Tonok sukum neika kum unamlume,” nyapdeipse
Narye, Yerusalem mutuku ululum nang ara, yakuka donoksinyeba, yuk mutuku nang unyakak binuka unamlume. Tonda, narye wenepnamsin deice arye, yuk mutuku tam noutam ara, dana-dana tam nang unyakak noutam arye, dabinuka unamlume. Winipnamsina deice arye, narye anggun malye winimunye ning nirya, mitik-mitika arye, kum kipdeipnamsine.
Ati, na ni Allah, aning-aning nirya talebuka, pia deice tam erebuka, Pia Mikip Weik Deiyoknye ulyame. Anda dipkopropnye, pia diksukumuk umince, nun dam teleb ninguk ubuka, diksukum piluk dosilyame. Bukni, nunce nun bidamang ati, malye winipdeipdabiba, pia malye weik unyaba ati ara, alye dakalanyabe. Ara, nun nirya, Yehuda yala ninye ap, Yerusalem mutuku noutamak unyap ninye ap, Israel ninye nirya ap, alye dakalaninto unyabe. Tonda, nun yala nang arye, an dam malye weik winilamububa, ance nun yala bokeiplumba, yuk pera mutuku daunyak ninye ap, dam mutuku unyap ninye ap nirya ara, malye wininyap ning ati, alye dakaninto unyabe.
Ura, sikce na yupu nyapdeiamse ning nirya ati, kum kekelamnika ati, sik dekna wenena ati winipse. Winipmanto ara, weik kumanya mikip yalirye, pu aplyeba, aning-aning bobuka, yuk mutuku dana-dana tam bobalamle touk, na mikip weik arye, sik Israel nang nirya ara, dobuka, yuk pera mutuku dopkwetepsiba, yu nang yanuka obikce, tapu koubukabikce, yuk pera mutuku noutam dabinuka deiamikba, ikinuk daulamike. Sikda, ninye asik nang atonun ulamika ati, sik mince kum bikamik mutuku nang kan-kan noutamuk, ikin kibuka daulamike. Narye winilamsa deice arye, anggun mutuku ara, min talak, pia telebuk ulamuk bukni, atalak noutam ara, yuk amutuku tuku noutam, pia teleb sukum tuku uamuk bukni, narye aning nirya ara, kum kipdeipsiba, anggun mutuku ara oldiamuk uamukba, amutuku noutam ara, ninye ton kum ulamikce, abinuka, oyanuka kum winilamikba, amutuku noutam nirya ara, pia malye dem upnin balamuk. Aning nirya ara, na Allah deice uka! Allah arye nyabuk. Allah arye nyabukba, nabi Zakaria kekebukce, sekdeibuk
Anggun ap, anggun deiyoknye ap ara, Allah Yahweh arye bobuka, yuk mutuku nang unyakak ara, anggun walwal mutuku bobinamsiake. Tonda, anggun apu yapu nang babye, sik bikina kum mutuku bobinamsiake. Winipsiliba, amutuku noutam binuka umunce, amutuku nang sikce, keil ap, yo ap dobuka, ninye urasin atouk kibuka, ‘Nun ni aniʼ tenen, talye ning, isa si erelamik touk, anggun babye, atalye ning, isa si erenamlume.
Se, nun ni Allah, ance malye kilisilyama ati, sik yuk pera mutuku nang arye, talye parapkabuka osinyake. Winipmanto ara, domba basam weina deiyok nang arye, ‘Adomba basam obuka dipnuyap’ tenen, sik domba basam wibuka, domba basam ona deiyok nang dam bobalamak touk, ance akunum winibuka tenesimince, bataksiminyeba, yu nang yakirye, talye parapkabuka osinyake. Tonda, ance nun wenena ati, akunum duknubuka dopdeipsulumba, sik yuk-yuk mutuku unyak nang arye, nunti tomopsikirye, sik mutuku bobinuka deipsikiba, sik mutuku noutam, binuka unyabe.
Wini talak, amutuku unyak nang arye, ayupu nyanyaka ati, an Yeheskiel birye, amutuku nang ati, nyapnulyame. Kume, aning-aning nirya talibuka, Pia Mikip Weik Ulul Deiyoknye, Allah ara, ayupu nyapsile. Dipkoprob ning ara, min talak ara, sik yala nang ap, sik kwitcapu ap, weik tonun, yuk pera mutuku, dawangapdanmanto ulamik. Narye sik wenena ati, anang dobuka bobisirye, pia karin, yuk-yuk mutuku noutam deipseba, daulamik. Winilamik bukni, sikda yuk mutuku nang noutam daulamik talak nirya ara, naryuk sik Israel nang nirya ati, pia melibuka kaliklamse. Sik wenena ati, tiya talak, pera mutuku noutam deipseba, daulamik bukni, wini talak ara, sik dobuka, tuba tamubuka, anggun mutuku koproba, boyangasunune.
Allah arye el mapu ati, kanye deiplirye, tuba bicoe kum tenepnamle. Deiyok ara, Allah elce nyalul yupu nirya ara, pia moubuka kum kekelamika atia. Aning winilamika ati, na si erenun Allah, elce sikti, bataknamle. Elce Israel nang akunum bataklyopura, sik anang nirya arye, tonok sukum una kumce, mutuku sirya, im sirya nirya ati, epra banauk unamake. Nabi Hosea birye nyabuk.