Anirya kekepseura, adiparyuk yuk yupu ton kekepse. Kekenmasirye dinmasiba, im deice pil donanye, malaikat-malaikat yupa weik nukmanto kum, pia weik beribu-ribu unmek. Sik yupa ara, 10 ribu kali 10 ribu, 100.000 atonun pia weik unmek. Weik ninye deiyoknye bun ning dana-dana nirya antanapdongobuka tikmek. Sikti kmekak danoutam ara, sik dumbarye kam unyak ning ap, sik 24 wisi deiyok nang ap, tikmekba, sik amalaikat nirya arye mot deice arye ayupu nyanmek.
Ulangan 33:2 - Eipomek2 Allah arye, Sinai mutuku dup yayukce, Seir mutuku deice keting sinarya kutukuka, pata tikilamle atonun yayukba, sik eibikba, sikti yanuka melibuk. Tonda, elda Paran mutuku dup, dirin weik arebukba eibik. Allah el yayuk talak ara, Allah el im deici pil don nang malaikat ara, yupa sepuluh ribu (10.000) malaikat nang ap, weik nukmanto kum arye, neika yayikce, el sirik taruk tam ara, uku buk paklamle atonun, ubukba eibik. Gade chapit la |
Ulangan 33:2
24 Referans Kwoze
Morobukce, ayupu ton nyabukce morobuk. “Se na ni Allah, Teman mutuku arye yanuka lyepsulume. Anda, malye ning tonok ning babye, kum winilyamnye, Pia Teleb Lek Ulyame bira, Paran Mutuku arye yanuka, lyepdopsulume. Atalak ara, nun ikin ati, yanuka meilyamsuluma deice arye, an weik teleb winilyam ning ap, weik dirina ap ara, im noutamak, nirya lak ulamuk. Aning atouk, tukwak mutuku im sirya, mutuku sirya, ulamik ninye arye, an si ati, si erebuka, an si weik arye erelamikce, ‘Allah ara, pia telebe,’ nyalamik. Anda Allah atibuk, winililamkike.
Henok elda, minop talak ulamuk. Adam arye deibukura, dadeipdanin, balamika ani, tekbarinye Henok deibik. Allah arye atilila yupu nyanyak nang wenepnamla ati, Henok arye nyalilamuk yupu ani. “Adilulume, nun ni Allah ap, Allah arye nyapdeiplibuk el pil im deice donyak nang malaikat ap, yupa pia weik beribu-ribu yanamake.
Tonda, anggun Yahudi deiyok nang ara, Allah arye, “Aning winipnamlulume, aning kum winipnamlulume,” nyapdeiyamuk yupu, mem yupu ara, el im deice melina nang, malaikat arye dobuka areamsik yupu ara, talye dopdoplum bukni, kekebuka kum talilulume. Stefanus arye, sik Yahudi yala nang, yupu bokolin nang awekmekce kekenmek ati, ayupu nirya nyabuk.
Anggun weik mutuku kon deice ululum nang ara, yata deiyok ati, Sion mutuku eiplumce, ‘Se, yata ati, Allah arye nun mutuku kum weibuk do?’ teneplumce, malye kanye boplum do? Ara, sikda, Allah el si Yahweh arye, ‘Sion mutuku noutam ara, amutuku akunum kanye deipmana ati, nara amutuku noutam pia-pia aunamne,’ tenebukce, akunum wibuka ati, nun like,’ teneplum do?
‘Tuba kanye moupnamabe,’ nyapmasina ara, deiyok ning ton nyapnusine. Ara, malaikat ara, mitik mambul unyak bukni, Allah arye nyapdeibukba, sik malaikat arye tukwak ninye ati, nyalamik yupu nirya, adiparyuk kekebuka ulamik bukni, ayupu yaniltalamik ninye nirya ati, sik yanilamikce malye winilamik touk Allah arye, wenebuka olamuk. ‘Dauplye’ tenen, batakalongona kumce, adiparyuk aninye nirya ati wenebuka olamuke.
Aning morobika deiyok ara ani. Aweik yupu arye nyabuk. ‘Amutuku ara, pia memak anya arye, sal do, kilapu do? Ura, talye kam ulul ning babye, yata ning do nirya, amutuku dam yakirye, amutuku tuku yanibikcopura, sik yuk ninye nirya arye, adiparyuk keil cobuka anang, sik nong deice cobuka onamlulume, nyabuk.’ (Keluaran 19:12-13)
Winiplyopura, sik kanye imun kanye bomice nang nirya ati ara, ikin usilye ning noutamak arye loplobuka, kanye deipnamsile. Anggunti buk kume, nun babye, kanye lopdeipnamsile. Anyapmasiap ning upnamle talak ara, Allah arye nun Deiyoknye Yesus ati, im deice duknubuka ulyak arye dobuka, lakak kiplibuk, tamubuka yangalye talak ara, weik uku buk dilyebuk, el im deice pil don nang, weik mikip unyak nang, el malaikat ap, neika yanamake. El ap, sik ap yanamak talak ara, ikin usilye ning nirya kum daneipsilirye, kanye lopdeipnamsile.
Ati, ton nang arye asilenyake, “Allah arye, ‘Wininamlulume, aning ara kum wininamlulume,’ nyabuka nyapdeiyamukba Musa arye sekeiyamsuk mem yupu ara, yata ning deiyok ati, aribukba sekamuk do?” nyabuka asinyake. Ati, amem yupu arepsuka deiyok ara nyapnusine. Ara, min talak ulamik ninye nirya malye-malye winilamika deice arye, Allah el yupu yaninauk ulamika anya arye, Allah arye mem yupu nyapdeibukba, Musa arye sekamuk. Allah arye utenebuk. ‘Sik Israel ninye ara diksukum winin ning kum kel kibikirye, malye-malyeuk winibicak’ tenen, amem yupu arepnyopura, ayupu moubuka talibikirye, dobolbalamica ani, aminyan talak ara, Abraham birye deipliba, dadeipdanin balamikca ani, deipnamak Mi, el akunum yalyopura, amem yupu pununa ati, ami arye punupnamle. Musa sekamuk mem yupu ara, Allah arye nyapdeibukba, el im deice melin nang malaikat arye, Musa ati laka nyapdeibikba, Musa kekebuka sekiamuk. Musa elda ninye dana-dana noutamak ansinibuka, teleb ulina deiyoknye ulamuka anya arye, sik amalaikat arye ayupu laka nyalamikba, Musa arye ayupu kekebukce, ayupu dobuka Israel ninye lake nyalamuk.
Winisulul bukni, yata ninye do nirya, sikce, ‘Kume, Musa sekamuk yupu, mem yupu kekebibirye, ayupu moubuka talibibirye, teleb kibuka dobolbanyaba deice aryuk, Allah arye kanye deipnamsile,’ tenenyak ninye nirya ara, sikda bicoe. Allah arye anang ati diksukum kum kilinamle. Aninye ara wenepnamle. Aning deiyok ara ani. Allah yupu sekeiyamik yupu noutamak ara ayupu ton aubuk. ‘Musa sekamuk buku noutamak, mem yupu nirya ara, tonok ning babye batakna kum arye, pia teleb kibuka kekebikirye, kum dobolbanyak ninye nirya ara, Allah arye wenebuka oplopnamle. Allah arye nyabuk.’ (Ulangan 27:26) Allah arye nyabuka ati, ‘Musa yupu kekebuka diksukumuk dobolbabya deice arye, Allah lyepnamsile,’ tenenyak ninye ara, sikda bicoe. Ara, amem yupu nirya moubuka talipnirye, tonok ning babye batakna kum arye, diksukum una ara kum winipmanto ati, Allah arye aninguk talinyak ninye ati wenebuka oplopnamle.
Musa arye mem yupu sekamuk ning ara, ninye arye ayupu nirya kekebuka diksukum kum winipmanto ati, ayupu deice Allah arye winipdesilyopura, dipkoprop dipnamabe. Bukni, aminop talak mem yupu ara, teleb ubuka dirina weik arye yayuke. Winiryuk yangalye yupu ara, Allah arye nun malye wininyap ninye ati, bico tenepsilirye, “Anggun ap, na ap neika una ati, ‘Anggunda diksukum winin ninye ululume,’ nyabuka akunum deipsine,” nyalisulule. Nun malye winin ning kilibuka kum danalisulul ati, el kanye aniryuk ayupu nyasulule. Nyasulula ati, ayupu ara pia teleb ubuka, weik mambul weik ulule. Ati, na kanye ara, minop yupu ara dirina ap, mambul una ap ara, mitika aryuk yayuk. Winiryuk yanmasil yupu ara, weik mambule nyapsine.
Ara na kayapu, anggun ton tenipdelulume. Minop talak Allah arye nyapdeibukba, Musa arye pala keil dobuka, akeil deice mem yupu sekdeibuk ning ara, ninye arye ayupu talibuka pia diksukumuk kum dobol binmanto ulamika ati, ninye dipna ning atonun upsuke. Upsuk bukni, ayupu yayuk talak babye, pia teleb ubuka dirina weik deice arye yayuk. Dirina weik ap, yayuk talak ara, Musa eibukba, el urasin ababye dirina weik ubuk. Dirina weik ubuk bukni, mitik kum danin balamuk talak babye, sik atalak elilamik ninye, Israel ninye arye Musa el urasin dirina weik tuba ulamuka anya arye, tuba-tuba kum elilamik. Deiyok ara, ayupu yayuk talak ara, dirina weik ubukura, mambul weik ulamuka ati, tuba eipmanto kum ulamik. Bukni, aminyan talak ara, Musa el urasin deice ubuk dirina ara, kum danin balamuk.
Ura, ayupu nirya ara, anggun nirya, weik mutuku dup Sinai mutuku dam bulupmalumce, yanuka weklum talak ara, Allah Yahweh arye, anggunti, “Aning wininamlume. Aning ara, pia kum wininamlume,” nyapdeiamsuk ning ara, ani. Ayupu nyapdeiamsuk talak ara, dua kan-kan ap, tonda, weik uku buk dimoka ap, lukunyan atonun bukni, pia kunuknak noutam ap, awinilye ning noutam arye, Allah el yupu ara, liman lelamle touk, weik yupu deice arye nyanmokba, anggun ton kekamlume. Ara, anggun dam, yupu yuk ning ton kum nyapdeiamsuk bukni, anggun dam ara, “Aning wininamlume. Aning ara, pia kum wininamlume,” nyan yupu uk, nyapdeiamsuke. Nyapdeipsuk yupu ara, Allah el taruk arye, keil pala bitinye deice sekdeibukce, na Musa dam areamnuke. Musa birye, sik Israel nang ati, nyabuk.
Ura, aning minop talak ulamuk ning ara, Allah arye, ‘Adeice arye aminyan talak wininamak ninye aning kekebikirye, kel biknamake,’ tenyamuk. Ati, aning nirya ara, winipmanto yupu atonun ulula anya arye, deiyok ton aupmale. Akilapu bitinye ara, diksukum ulamrik bukni, Allah arye akilapu bitinye winilamrik deice arye, ‘Aminyan unamak ninye ara, mambul ning kel kipnamak’ tenen, winipsuke. Aning nong koprop ning ara nyapnusine. Akilapu bitinye ara, Allah arye, ninye lyena ati, “Wininamne,” nyabuka, nyalin yupu bitinye yuk-yuk nyalilamuk ning atonun winilamrik. Allah arye, “Wininamne,” nyalilamuk yupu tonok ning ara, Sinai Mutuku deice Allah arye sik Israel ninye ati, “Aning ara winipnamlume, aning ara kum winipnamlume,” nyabuka, Musa biti nyapdeibukba, Musa kekebukce mem yupu sekeiyamsuk. Ayupu talibuka dobolbalamikce ninye ara, yuk nang arye yo bok deice dekikirye, pil weik aruklamak ninye atonun unyake. Musa sekamuk yupu, mem yupu amu tam bukuka unyak ninye ara, sik nin atonun kil ara, Hagar ulamuk.
Anggun nirya dilulume. Dipkoprob na pil donanye, malaikat tonok dopdeipniba, elce menekuka baliba, anggunda el aminyan melibuka banamlume. Ara, narye anggun Israel ninye ati, ‘Amutuku binamakʼ tenen, akunum kintineip deipsise mutuku bana ati, abisikuk bobisilirye, dadeipsiliba, amutuku uk unamlume. Amalaikat arye erebuka, balirye kaliksiliba, anggunda el amu tamuk kipmunce, el balye bisikuk banamlume.
Ara, Allah arye arelamuk weik dua lobuka balamuk touk, aning elilamikce, adua balamuk touk, sik Israel ninye babye, melibuka balamik. Winibuka winilamika ati ara, adua balamuk touk, sik min arye ulamik mutuku, Sinai mutuku deiyok dam arye panabuka mok kum ati, ninye kum ulamik mutuku noutamak, talye diamuk balamika ani, aminyan talak mok ap, mek ap, kum ati, ninye kum ulamik mutuku, amutuku si Paran mutuku, adua binuka tikmok. Adua binuka tikmokopura, Israel ninye babye, Paran mutuku uk binuka, sik cang kain bol doltakna aik dobikce, amutuku uk ulamik.
Anang nirya adiparyuk Midian mutuku bobiyikce, adiparyuk Paran mutuku biyik. Biyikopura, amutuku arye, ninye yata barye nang atonun, ton melibikba, sik ap Paran mutuku nang ap nirya, ansinibukabikce Mesir mutuku biyik. Biyikce ninye deiyoknye Firaun ap, epdayik. Winibikopura, Mesir mutuku ninye deiyoknye Firaun birye Hadad biti el aik ap, el unamuk mutuku ap, el din ning ap, aning nirya areamuk.
Allah el pia mikip weik ulula ati, winipmanto ara, ninye olyangana ati, kuda basam arye libuka, tuku deice balamle ning, el si ara kereta perang, yupa pia weik ribuan aulula ati, nunce kum nuktibye. Akereta perang ap, Allah ap, Sinai mutuku arye batakuka, Yerusalem mutuku noutam bukni, el pia teleb lek unamle aik dam ara, akunum yanmale. Allah bira aning-aning nirya talibuka, mikip weik ulya deiyoknye ulule.
Piblisite