Ulangan 32:4 - Eipomek4 Nun ni Allah, yuk-yuk kum ulule. Elda keil pala yangalamla atonunuk ulule. Weik keil pia aulye touk, Allah babye, pia aulule. El tenena ap, el winilye ning ap ara, yuk-yuk kum ulule. El pil dolye ning ara, pia telebuk winilule. Tonda, el winilul ning nirya ara, dipkoprob kibuka diksukumuk winilule. Allah el pil dolul ning ara, ‘Ton tam nang, teleb kipnirye, ton tam ara, namin kipnamne,’ kum tenelirye, el nyalul touk, nirya pil dolule. Malye ning tonok babye, ton kum winiptue. El winilul ning nirya ara, yamubuka diksukumuk winilule. Ninye winilamak touk, elce teleb kibuka, yupu diksukumuk bokolisulule. Ati ara, el si erenyabe. Gade chapit la |
Ulangan 32:4
66 Referans Kwoze
Pia ati Allah Yahweh, el tibuk diba tenebibirye, el tibuk talibibirye, el deiceuk nun kanye deilinamabe. Ara talye ati kuma. Deiyok ara, nun ni koproba Allah Yahweh, aning-aning deice tam erebuka, Mikip Weiknye ulula anya arye, pia melibuka kalikisiliba, el amu tamuk unamabe! Winipmanto ara, weik mutuku bukamlye keil, dama duknul bitibirye, pia teleb kibuka utibye touk, Allah aryuk nunti, melibuka kalikisulule. Allah ara, pia kum bataknamsile!
“Ati ara, wini talak ara, na Nebukadnesar birye, im deice ulul ninye deiyoknye Raja ara, Allah el tonoke. El siuk erepnirye, unamne. Ara, urdem ati kume. El pil dolye ning nirya ap, el ulul ning nirya ap, pia dipkoprob diksukum ninguk winilule atia. Tonda, ninye kanye talima erepdakirye, kwalinyak ninye ati ara, Allah elce amu tam kililule,” Nebukadnesar birye nyabuk.
Ara, talye ati kume. Deiyok ara, Allah Yahweh ara, telebuk ulirye, nun ninye ati, bico tenepsilirye, pia tuba melisilya ara, pia kum bataknamsile. Allah arye, “Wininamsine,” nyabuka, nyalina yupu deice nyasilye touk, pia dipkoprob winilule. Minop talak dorapce deibikba, dadeipdanin yanganyap ninye nirya ati, tuba-tuba tenesilirye, melisulule.
Yata teleb ning do nirya, pia teleb diksukum winina ning nirya ara, Allah elcuk arepsilyeura, im deice arye yangasulule. Ara, im deice dirina ulul ning nirya kwepdeibuknye, Allah elcuk pia teleb ning arisulule. Tonda, Allah elda, keting deiplirye, kanya urasin yuk-yuk kinim-kinim alamle touk, pia kum ulule. Allah el pil dobuka ulul ning nirya ara, pia tuba telebuk ulule.
Aning ati ara, anggun ni Allah im deice ululnye birye, ninye nirya ati, bico tenebuka kanye talima talibuka melilul touk, anggun babye ninye nirya ati, kanye talima arenamsile. Anggunda, Allah el mapu ululuma anya arye, anggun ni Allah malye una kum, diparyuk diksukumuk ulye touk, anggun babye atonun, malye winina kum, diparyuk diksukumuk wininamlulume. Yesus arye nyabuk.
Tonda, mek pia kum uamuk mutuku balamikba, mek weik patabukopura, Allah arye, ninye winipmanto kum pil dobuka deice arye, weik mutuku yangan keil noutamak arye, mek panabuka balamukba, nun apu yapu nirya arye, amek kwebuka kikliman dilamik. Aning mana dilamikce, akeil noutamak arye, mek panabuka balamukba, kwebuka dilamika deice arye, kum dibik. Aning nirya winilamuk touk, aning deice arye, winipmanto ning ton kel biktibye. Mutuku yangan keil noutamak arye, mek balamukba mek kwebuka dilamik touk, dipkoprop ning ara, Kristus menekuka balamukce, el pil dolamuka deice arye, nun apu yapu ati melilamukba, sik kum diamik.
Se, na nio, sik teleb wininyak nang ap, malye wininyak ninye ap, likina kumce, talye mangkau arye, oltakana ara, kum winipnalam darebe. Yata deiyok ati, teleb ninye ap, malye ninye ap atonunuk winipnamalam do, tenepne. Tukwak mutuku im sirya, mutuku sirya nirya unyak nang ati, Yupu Bokolina Deiyoknye birye, diksukum ning kum winipnamalam do? Na kanye ara, telebuk winipnalame,” nyabuk.
Aning kum bukni, yata nang do nirya, sikce ‘E, mambul weik ning ani, mambul weiknye bira ani,’ tenenamak talak ara, sikce anyapnusin ninguk tenenamake. Tonda, tukwak mutuku, talye daulye ning nirya ati, ‘Aning ara, mambule,’ pia kum tenenamlume. Aning nirya kum bukni, anggunce na Allah Yahweh ati, diba tenepnulumce, na ap, na wininye ning ap, moubuka biknamnulum nang ara, angguncuk, ‘E, mambul weik ning ara, Allah Yahweh el uka,’ tenepmunce, aning deice aryuk, kanye pia delinamlume. Ara, anggunce na Allah ati, “E, Allah arye bico tenesilirye, elce, ‘Aning ara wininamlume, winipmunyopura, narye melisinirye, pia teleb kipdeipnamsine,’ nyabuka, nyalin yupu deice arye nyapdeipsuka deice arye, teleb kibuka melisulule. Elce winilye ning nirya ara, diksukum una ap, teleb ning winin deice aryuk, ninye yupu lipsisikuka bokosilirye, tuba-tuba melisulule,” nyaptingce, na si erepnitinge. Nara Allah Yahweh arye, anggunti pia bico tenesinirye, pia kum batakasunune. Narye, anggun tukwak mutuku sirya, im sirya nirya ululum nang ati, melisinye ning nirya ara, bico tenena ap, dip yupu nyana ap, malye winin ning pia kumce, diksukum winin deice arye melisunune. Tonda, na Allah arye, ateleb winin ning nirya ap, ‘Diksukum winin ning nirya ap ara, telebe uka’ tenen, na kanye delinune. Aning ara, na si Allah Yahweh arye ayupu nyapsine, nyabuk.
Bukni, ton nangopura tilila yupu deice arye nyanyake. “Kume, nun ninye arye malye winibibya babye, Allah arye bico tenesilirye, namin kipsilyopura, adeice arye, Allah el pia diksukum ulul ning nirya ara, pia lak akuk ululba, ninye nirya arye moubuka kel bikmanto unyake. Ati, nun malye winibibiba, Allah arye nun malye winin ning ati wenepsilyopura, aning ara malye usulule,” nyanyake. Ayupu atonun ubuka nyapsicopura, nunce yata yupu tamubuka nyaptibye do? (Sik diba tenena kum, talye nang arye nyanyak yupu atonun nyapsine.)
Ura, nun nirya kele. Malye winin ning yala-yala nirya talibuka wininyak ninye ati, Allah arye yupu lepsisikuka bokolilirye, amalye wininyak ninye wenenamlanye, Allah elda, pia diksukumuk ulule. Ati, yupu lepsisikuka bokolinamsil ning nirya ara, diksukumuk unamle. Elce nun tukwak mutuku wininyap ninye nirya ati, nyapdeiamsuk touk, ‘Na nyamse yupu nyalul touk, teleb unyak do, malye wininyak do?’ tenen, dipdesilirye, el dipkoprop yupu deice arye wenesulule.
Tomas arye nyabukba, Yesus arye tamubuka nyabuk. “Diksukum Bisik ara, nauk unune. Tonda, Dib Koprop Yupu Nyananye unune. Tonda, Kam Una Deiyoknye bira, na tonok unune. Yata nang do nirya, na Ni koprop el dam bana ati, na deice aryuk binamake. Yuk bisik ton pia kum ulule. Yata ninye do nirya, na deice kum yaicopura, na ni Allah un dam kum binamake.
Yupu nyalamapnye bira, ninye nong atonun dayukce, tukwak mutuku yayukura, nun kan-kan noutamak neika ulamubu. El pia teleb ubuka ulamukba, elilamubu. El pia teleb ulula ara, talye ati kume. Ara Allah el Mi Koprop tonok ululnye bira, el uka. Allah el Mi Koprop ulamukce, el dipkoprop una ap, el dipkoprop yupu nyana ap, el kanye aryuk tukwak ninye ati bico tenebuka, pia melina deiyok ning ap, anye deice weik arye uamuk. Nun ni koprop Allah arye anye bira dopdeipsukba, pia telebuk ulamukak, elilamubu.
Se, na ni koproba Allah Yahweh, narye antibuk, an si erepkinirye, anti si erekunune. Tonda, antibuk, ‘Telebe,’ nyabuka, an siuk erekunune. Deiyok ara, Allah ance min talak arye, ‘Apil dopnamle,’ tenyamlum touk, aninguk ninye winipman kum pil, ance akunum dolyame. Allah ance, ‘Aning ara, winipnamne. Aning ton winipnamne,’ tenyamlum touk, dipkoprob winilyame. Ance pil dolyam ning ara, pia ilil weik ning pil dolyama anya arye, aning nirya ara, pia ati unamle. Tonok babye, min kum kum datue. Aning ebuka kel bikisirye, pia weik tonun si erenamkine.
Wininamlum ning ati ara, Yesaya arye Allah el yupu noutamak nyabuka sekeipsuke. El domon yupu arye nyabuk yupu ara, ani. ‘Allah arye nyabuk. “Anggun dipdelulume, pia mambul keil tonok, Sion mutuku noutamak wibuka deiamsise. Yata nang do nirya, elti, diba tenebuka akeil deice kanye delinyak nang ara, dipkoprop alye kum dakdanamake. Tonda, narye aninye ati, pia kum bataknamne,” Allah arye nyabuk.’ (Yesaya 28:16)
Aninguk kum bukni, nun ni koprop Allah arye ninye mutuku-mutuku nirya ati, ‘Anang ara teleb bukni, anang ara malye wininyak’ tenen, yupu kum bokolisulule. Elce yupu bokolina deiyok pil ara, el Mi Koprop deice akunum deibuk ati, el mi aryuk, ninye yupu bokolisilirye, malye nang ati wenelule. Teleb nang ati dekna arisulule.
Wininalam bukni, na nio, anda malye winin ning ayala-yala nirya ap, malye unyak nang ap ara, kanye deibuka kum elilyame. Anda, pia Teleb koprop, uk ubuka, pung ulyamnye binya arye, an pia teleb asing arye, malye ning ati, kanye deibuka kum elilyame. Aning atonun, malye wininyak nang ara, ance aninye eibuka, ‘Dauplye’ tenen, kum batakalongolyame. Na nio, anyapman touk ulyamnye bukni, yata deiyok ati, wini talak ara, anda malye wininyak nang, sik Kasdim nang ati, kum wenepmalam do? Tuba dinmasemince, bico tenesilyam bukni, yata deiyok ati, sik malye wininyak nang, Kasdim yala nang arye, nun Israel ninye teleb ubuka unyap nang ati, olyanganamsiak do? Habakuk birye Allah ati, malye nyabuka morobuk.
Ati, na Allah Yahweh, aning-aning deice tam unirye, Weik Erena Deiyoknye ununa anya arye, narye, ‘Winipnamne,’ tenenye touk wininune. Narye dipkoprob nyapsine. Narye weik mambul keil tonok Sion mutuku noutam deipne. Akeil ara dipkoprob pia mikip keil deipne. Tonda akeil ara, dekna weik keil deipniba, pia darabuka buknamla ati, yata ninye do nirya, akeil ati diba tenebice ninye ara, alye pia kum dakdanamake.
Allah el dam ara, weik dua ap, kuna ap aulule. Ara, ninye arye, el urasin kum elinamaka ati upnamle. Bukni, Allah arye aning-aning nirya talibuka ulula deiyok ara, diksukum winin ninguk talibuka winilule. Tonda, ninye nirya winilamice touk, akunum elilula ati, elce dipkoprob diksukum kibuka, yupu lipsisikuka bokeipsilirye, dengna arepnamsile.
Ati, anggun kel weik biklum nang ara, na Elihu birye nyapnusin yupu ara, moubuka kekepnululume! Aning-aning nirya, deice tam erebuka, talilul Weik Mikip Deiyoknye Allah ara, malye ning ton winilul do? Kume, ara kum winiptue. Diba Allah arye malye winin ning, tonok ning babye, pia kum talibuka winilule.
Allah el ‘Naʼ tenen, ninye, Israel nang ara, aning-aning nirya dilamikba, sik nong nena ara, nong kalimna dongopna arye, weik arye nelamik. Aning-aning telebuk ulamuka ani, sik Israel ninye arye, malye kibuka, minop talak arye, sik kwepdeiamuknye Allah ati, ‘Nun like’ tenen, batakik. Tonda, sikti, lyepdomuknye Allah ara, el si yanibuka bataklamik. Ninye arye, ‘Yu nang arye opsicak’ tenen, tonda, ‘Weik mutuku pala keil leleipnamsil’ tenen, akeil donga duknulbalamik touk, sik lyena deiyoknye Allah ara, weik mutuku yangan keil atonun ulamsuk bukni, sikce elti, bataklamik.
Allah arye, ‘Ninye nirya wininamak, aning ton kum wininamak’ tenen, yupu deiyok arepsuka Deiyoknye bira, Allah el tonok ulule. Tonda, ninye nirya sik winin ning ati, Yupu Bokolina Deiyoknye bira, el tonok ulule. Allah arye ton ninye ara lyelilulce, ton ninye ara weneplirye, oltakalule. Winilula deiyoknye bira, Allah el uka. Allah el aniryuk winilul bukni, anggunda yatato weik nang umunce, anggun kanye dukdongobuka neika ululum nang ati, “Anda telebe, anda malye,” nyabuka yupu bokolilalulum do? Aning nirya ara, winina meme nyapsine.
Bukni, na kayapo. Anggunce, anggun malye umunye ning nirya ati, batakmunyopura, Allah arye namin kipsilirye, kum wenepnamsile. Bukni, anggun ilil pia kum kanye dobuka, anggun kanye talima kat upliba, anggun malye ning kum batakmunyopura, malye ninguk tuba winimunya deice arye, Allah weika arye tonap tabakuka wenepnamsile. Tuba-tuba malye winimunya deice arye, anggun bidamang arye anggun bidamang ati, malye ulilalulume. Ninye arye sik mambul ning ati, ‘Tonap weik unamsil’ tenen, dokola delilamak touk, anggun malye-malye winiluluma deice arye, anggun bidamang arye, anggun bidamang nong deice ikin ning weik delilanmalume. Allah tenyamuk talak akunum uplyopura, lakak aniryuk ninye nirya ati, lipsisikuka yupu bokeipsilirye, wenepnamsile. Wini talak ara, anggun tuba malye winilulum ninye ati, weik arye wenepnamsile. Anggun malye winin ning batakna kumce, talima kat kibuka, ‘Malye wininupyap tenena kum deice arye, malye umunya ati ara, Allah weik arye wenepnamsile.
Allah arye amalye winin ning talibuka unyak ninye nirya ati nyalamuk. “Aninye atonun ninye nirya ara, weik arye wenebuka opnamne. Winipnyopura, na ap neika pia kum unamabe. Batakniba, sik yuk dadepnamake. Aninye ara, weik arye wenepnamne,” nyapdeiyamsuk yupu ara, akunum kel kiyamik bukni, ‘Aning ara pia mambule,’ tenena kum diparyuk, tuba-tuba talye luparabuka pia malyeuk wininyake. Winikirye, sikce pia malye winilamik touk, aninguk talibuka unyakce, malye ninye ati, sikce “Aning ara telebe uka,” nyabuka si dolakirye erelilanyake.
Ayupu nyapmasina deiyok ara, ani. Ara, Allah arye, ‘Wininamlume, aning ara kum wininamlume,’ nyapdeiamukba, Musa kekebukce sekeiyamsuk mem yupu nirya ara, Musa deice arye areamsuk. Bukni, dipkoprop winina deiyok ning ap, Allah arye el kanye aryuk nunti bico tenesilirye, melibuka lyesulul ning deiyok ning ap, tukwak ninye ati melilana deiyok ning ap, ninye lyena deiyok ning nirya ap ara, Yesus Kristus deice arye arisulule.
Sik pia walwal nang arye, wininyak bukni, dipkoprob Allah, el si Yahweh ulule. Elda kam una deiyoknye ulule. Allah el tonok ara, kam pia ulule. El Allah Yahweh ara, aning-aning talibuka, pia ati, Ninye Deiyoknye Raja unamle. El ap, elce talilul ning nirya ap, pia kume, kum danamle. Pia aupnamle. Tonda, Allah elce, tukwak mutuku ap, tukwak nang ap ati, yu uplyeura, tukwak mutuku nirya ara, weik arye onamle. Tonda, Allah elce, tukwak mutuku unyak nang nirya ati, yu upturye, wenepsutu ura, tukwak mutuku unyak nang nirya ara, darapdongobuka uptinga babye, kum upnamake.
Sik adeiyok nang arye, yuk ninye nirya ati, teleb kibuka melilana uk unamak anya arye, winipmanto ning ara nyapnusine. Ara, pia mikip weik kumanya yaliba, lelimboka tam tikilbalamak touk, wininamake. Tonda, mok cena kum yini mutuku noutamak arye mek pu dobuka batuba, ninye nirya arye kanye deipting touk, wininamake. Tonda, yini mutuku noutamak ara, yo pia kum anya arye, keting tin weik upliba, weik keil deiyok keting koa bulbalamak touk wininamake. Ara, sik diksukum unamak deiyok nang arye, yuk talye ninye nirya teleb kibuka melinamaka ati nyapsine.
Nyabukce, ayupu ton dukdongobuka nyabuk. “Anggun malye winimunye ning ati, kanye imun weik ning yanamsil bukni, na Allah Yahweh arye anggunti, tuba tenesununa ara, ‘Aninye ara bicoe, na kanye aniryuk melibuka lyepsitinye,’ tuba tenesunune. Na Allah arye tenelamsinya ani, ‘Atalak winipnamne,’ tenyamse talak akunum kiplyopura, bico tenepsinirye, melibuka lyepnamsine. Winipnamsitinya ara, talye ati kume. Deiyok ara, Na Allah Yahweh, pia diksukumuk ununye birye nyapsine. Ati, yata ninye do nirya, ‘Allah el dem arye melibuka lyepnamsil’ tenen, diba tenebuka dinauk unyak ninye ara, narye teleb kipdeipnamsine. Winipsinyopura, telebuk unamlume.” Allah arye nyapdeibukba, nabi Yesaya birye sekeipsuke.
Ati ara, na kele. Allah Yahweh ance nati, ‘Anye bira melipniba teleb unamle. Tonda, apil dopnamle, aning ton winipnin banamle,’ tenepnulum ning nirya ara, melipnuluma deice arye, aning nirya dipkoprob nong upnamle. Tonda, aning ton akunum bikamse. Ance nunti, weik tonun bico tenesimince, ‘Winibuka pia teleb kilinamsine,’ nyabuka nyalin yupu deice arye nyasilyam ning nirya ara, pia kum bataklume. Aning nirya, pil donauk ulyame. Weik tonun bico tenesilyam ning ara, pia unamla ati, aning nirya dipkoprob nong upnamle. Ati nun ni Allah morokinyabe. ‘An taruk mikip aryuk kwepdeiamsulum nang nirya ara, tuba tenesimince, pia kum batakasilyame. Melinauk unamsilam’ tenen, morokinyabe na nio.
Tonda, Allah ara, Pia Mikip Weik Deiyoknye, Raja ulule. Tonda, el Allah arye, “Aning ara, wininamlume. Aning ara, pia kum wininamlume,” nyapdeiamsuk yupu nyasilye touk, ninye tukwak nang ati, yupu lipsisikuka bokeipsilirye, dengna aresulule. Elce nyapdeiamsuk yupu ati, kanye delilule. Allah elcuk, ninye yupu lipsisikuka bokolina ati, “Talye yupu ap, nong kum talye nyan yupu ap, minin yupu ap, nyana kumce, diksukumuk ubuka, yuk nang ati, ninye yupu lipsisikuka bokolinamlume,” nyapdeipsuke. Allah arye, “Aning ara wininamlume. Aning ara, pia kum wininamlume,” nyapdeiamsuk yupu nyasilye touk ubuka, nun Israel nang ati, diksukum kibuka, melibuka teleb kilisulule.
Tonda, Allah arye, “Anggun ti, bico weik tenesununa ati, pia melisinirye, pia teleb kilinamsine,” nyalin yupu deice arye, nyapdeipsuk ning ara, akunum lak kibuka peteresulule. Atonun, Allah arye nunti, “Winibuka melinamsine. Anggun ti wininamsine,” nyasilye yupu atonun, batakna kumce, aninguk dipkoprob, tuba wininamsile. Ati ara, mutuku sirya, im sirya daunyak nang nirya ara, Allah arye, lyelosulul ning ara, akunum laksukum arye elinyake. Diba, nun Israel nang arye, si erenyap Allah ara, elce melibuka lyelamsuk ning ara, yuk mutuku nang nirya elilamikce, akunum biknamike.
Tonda, yu nang arye nati, ‘Anye bira, opnuyap’ tenen, ninye onak akunum kintibikce, ninye on ning, el si jaring, dungnubuka deibika noutam arye, ‘Ance lobuka lyepnamnilam’ tenen, moropkine na nio! Aning ara, talye ati, kum morokunune. Kume, ‘Na on nang arye, opnikcak’ tenen, an damuk yanuka unune. Tonda, anda, na Lyena Deiyoknye unilyama ati, antibuk morokunune na nio.
Allah el si Yahweh arye, “Aning wininamlulume. Aning ara, pia kum wininamlulume,” nyapdeipsuk yupu nirya ara, pia telebuk ulule. Ayupu moubuka kekebipyopura, nun kanye ap, talima ap kam kilisulule. Ikin usilye talak ara, kanye talima kwa disulule. Allah Yahweh arye ninye ati, “Teleb winin bisik ani,” nyapdeiamsuk yupu nirya ara, pia diksukum yupu ulula ati, nunce, ‘Ayupu ara, dib do, tilila do?’ tenen, kanye kum bokoltonamsile. Allah arye ayupu nyalamuk touk, nong dipkoprob upra banamla ati ara, ayupu nirya ara, moubuka diba tenepnamabe. Walwal nang babye, Allah arye anyapdeiamsuk yupu, pia moubuka kekebikirye, talibibyopura, sik kel kibuka bakirye, aminyan talak, sik babye kel ninye unamake.
Tonda, nun ap, yuk mutuku nang ap, mal olan talak ara, sikce, ‘Se, yata wiriptibye do? Kume’ tenen, ilil weik ubukba, sik talima dakalsakanauk ulamuk. Sikda, ‘Anye birye opsilyak’ tenen, ilil weik ubukba, ‘Yuk mutuku nang arye yanuka, opsicak’ tenen, cang keil poka domikce, ulamik asik noutam arye batakuka, na dam yanuka, sik nong sirim talinauk ulamuk.
Sik mutuku sirya, im sirya nirya, yala yuk-yuk unyak nang nirya ara, ‘Ninye opnamap’ tenen, kintinibik ning ara, aning sik nong deiceuk tamubuka yanamle. Winipmanto ara, ninye arye ‘Kam ning opnuyap’ tenen, tuku palyamikca pum tam bukni, mangkau kanye bobuka, banmalya ani, sik mining lukamice tuku pum tamuk sakuka olanyake. Atonun, ninye arye ton, ‘Bai basam do? Yua basam do? Youpnamleʼ tenen, tapu dungnubuka welamak touk, ayu nang babye, sikce yuk nang ati, malye ning dobuka deilinyak nang ara, tamubuka yalirye, sik nong deiceuk upnamle!
Ati ara, Ayub ance mania kanye bobuka, pia talye-talye yupu nyaminya deice arye, “Allah ara kum elinune. Na dam yanuka kum melinulule. Tonda, nara ikin weik ununa ati, ‘Allah arye, dan talak aning nirya eibuka, na melibuka lyana ati, na dam yanuka melipnamnil do?’ tenen, tuba-tuba dinauk unune. Tonda, dan talak, Allah arye na dam yanuka, diksukum ubuka, yupu bokeipnilirye, tonap teleb kilinamnil do?” nyabuka, malye nyalyame. Ati moubuka tenipnulyame. Sik talima erepdakirye, maknya kintinibuka wininyak nang arye, Allah ati morotinga babye, sik malye un ning ati kum kekelule. Sikda mitikto malye wininyake. Bukni, ance pia malye yupu nyalyama ati, anda malye weik winilyame.'’ Ati, ance Allah ati pia talye-talye yupu ara, tuba-tuba nyalyam bukni, dipkoprob Allah arye, pia kum kekenamkile.
Allah arye, Israel ninye ati, bico tenebuka meliamuknye bira, nati nyapnuke. Ara, mutuku yangan keil lelilamsil touk, Allah arye Israel ninye ati, pia melibuka kaliklamuk. Elce nyapdeipnuke. “Yatanye do, Allah ati, ilil ulya deice arye, ninye talina deiyoknye kina ati, malye winina kum aryuk, pia diksukum ulamlirye, Raja ululnye bira winilule.
Tonda, Allah Yahweh el lek koprop, pia teleb ulye touk, yuk nang ton atonun, pia kum unyake! Aning ara, Allah elcuk, nati melin ning ara, pia tuba arenulule. Ninye arye, ‘Nun mal olan nang arye opsikcakʼ tenen, weik mutuku bulamle keil dam, keil deia pum, binuka duknunyak touk, Allah elcuk erebuka deice tam ulirye, el mikip deice arye kalikisiliba, el amu tamuk unyabe.
“Ati ara, anggun adiparyuk moubuka teneipdemunce, kel kipnamlulume. Pia tenenamlulume. Allah el si ara Yahweh, anggun ni koproba Allah, el tonok ulule. Yuk ton kume. Allah arye nyalilamuk yupu nirya ara, dipkoprob ulule. El nyalisilye yupu ara, tonok ning ara, kum batakalule. Yata ninye do nirya, sikce el deiceuk, sik kanye deibikirye, elce, ‘Aning wininamlulume,’ nyabuka nyasilye yupu, moubuka talibicopura, Allah arye sikti, tuba-tuba melilule. Elce sikti, ‘Wininamsine,’ nyalisulul yupu nirya ara, tonok ning babye kum bataknamle. Nirya awininamle. Ato ninye ati ara, sikce mapu deibikiba, dadeipdanin, banamak nang yupa ara, pia kum nukmanto, pia weik upre balamlya babye, pia melinamle. Sikce, mapu deibikiba, dadeipdanin banamak ninye yupa ara, ninye nel punun nang, generasi yupa weik, seribu kali lipat upre banamak ninye ati ara, Allah arye pia melinamle. Kum bataknamsile.”
Allah arye Musa tikmokak urasin tam yayukce nyabuk. “Na si ara Yahweh, Allah unune. Narye ninye ati bico tenebuka, weikto arye melinune. Malye ubica babye, min pola arye yu kum unulule. Tonda min pola aryuk kum wenesunune. Aning kum bukni, narye, ‘Wininamsine,’ nyapsise touk, ninye ati bico tenena ap, batakna kum diparyuk melina ap, weik unune.
“Ati ara, ayupu bokuka nyanamlum talak ara, Allah el si Yahweh ati, ilil tenalume. ‘Aning ara, winipnuyap do, yuk ning winipnuyap do, kum do?’ tenen, moubuka teininamlume. Deiyok ara, nun deiyoknye Allah el si Yahweh aryuk, yuk nang nirya ati, dipkoprob sik ulamikce touk yupu lipsisikuka bokolilule. Ton tam nang ati, ‘Na kanye deipne,’ tenebuka, yuk tam nang ati, ‘Aning ara na like,’ tenena kumce, atouk teleb kibuka yupu bokolilule. Elce ninye mutuku sirya, im sirya nirya ati, malye kum kilule. Tonda, ‘Aning ara, na like,’ tenena kumce, ton tam nang ati, ikin kipdeiplirye, ton dana tam nang ati, cakman ning kum arelule. Moul ning dolona kumce, ninye nirya ulamikce touk tenebuka, yupu lipsisikuka bokolilule. Sikda, el tonok apil talebuka donamluma ati, sik babye, el ulye touk kibuka, teleb yupu lipsisikuka bokolin pil dona deiyok ning talebuka, pil teleb don nang unamlume,” nyabuk.
Allah ara, ninye wenena ati, talye-talye ubuka, tilila yupu deice arye bokeipsilirye, wenesulul do? Tonda, aning-aning deice tam erebuka, pia mikip weiknye birye, diksukumuk ululnye ulula ati, el Allah arye, ninye wenesulul talak ara, pia kwalin bisik banmalirye, wenesulul do? Kume, aning ara, kum winipmanto. Deiyok ara, elda malye winin ning ton pia kum ululnye biti, pia diksukumuk ulule.
Sik ikinuk ulamik talak ara, ‘Se, dipkoprob Allah ara, nun mikip arisululnye ap, nun melibuka kalikina deiyoknye usulule,’ tenelamik. ‘Winipmanto ara, Allah arye weik mutuku bulamle keil atonun usulula ati, el damuk teleb uptibye,’ tenelamik. Tonda, sikce, ‘Kume, Allah ara, aning-aning deice tam, Pia Mikip Weik Deiyoknye ulule. Ati, Allah elcuk, nunti, lyepsilirye, tamubuka teleb kipdeipsutuba, telebuk uptibye,’ tenelamikce, Allah ati morolamik.
Israel nango, anggun nirya kekeplulume! Na Allah arye, aning nirya winipnamsina ara, talye ati kuma. Deiyok ara, ani. Allah arye anggun nirya lyepromsuk deiyoknye bira na uka. Tonda, na Allah arye anggunti tuba melilamsirye, nara weik keil mutuku dup erebuka buklyeba, ninye arye, ‘Yu nang arye opsicakʼ tenen, akeil deice welebikirye duknulamak touk, ulamsise. Naryuk anggunti, pia melibuka kaleklamsise. Bukni anggunce nati akunum lubakipnulume. Aning ati ara, anggunce sik isa si erena ati, ‘Nun isa arye melipnamsiakʼ tenen, urasin teleb yala ning dobuka, wa wibuka koululume. Aning atonun, teleb pamlye ning taruk ton sekmunce, aning isa si erena ati tuba koululume.
Na ni Allah Yahweh, anda mikip weiknye minop talak arye, aning-aning min kum kwepdeialum talak arye, an akunum aulalume. Tonda, anda kam pia unalame. An siuk erekunune. Anda, Pia Malye Ning Winina Kumnye, Pia Teleb Leknye ulyame. Ati, narye moropkine. ‘Nun Yehuda tam unyap Israel nang ara, lyepsutumba, nun kum dipnamabe’ tenen, moropkine. Na nio, ancuk nunti, yupu bokeipsutumce, nunti wenepsutum bukni, dipkoprob sik Kasdim nang ara, ance, ‘Wininamake’ tenen, wipdeipluma anya arye, sikce nunti, wenepnamsiyake. Anda, weik mutuku yangan keil atonun ulyama anya arye, an amu tam lelipdongopsutumce, kaliksutum bukni, ance tenealum touk, Kasdim mutuku nang wipdeipmunba, sikce nunti, wenebuka olyanganamsiake.
Yerusalem mutuku ninye deiyok nang arye, tuba malye wininyak bukni, Allah Yahweh, elda aweik asik dobuka, unyak mutuku noutam tuba aulule. Allah elcuk tuba-tuba teleb kibuka, pia diksukumuk ulule. Elce, malye winililan ning, pia tonok babye, kum winilule. Dipkoprob asum-asum nirya ara, beren tam talak babye, sintam babye, Allah arye diksukum winin ninguk, pil dolul bukni, amutuku ati, ninye deiyok kibuka talinyak nang ara, diksukum winin ning ara, pia kum bikinyak nang anya arye, sikda, ‘Se, malye winimabeʼ tenen, alye una kumce, tuba malye-malyeuk wininyake.
Abraham wipdeipluma deiyok ara, anti dib tenelamkukce, pia kum bataklamkukba elilaluma ati, wipdeiplume. Winiplumce, Abraham biti, “Ance deipminba, dadeipdanin banamak nang ati, teleb mutuku arepnamsine,” nyapdeiamlumce nyalin yupu areplume. Abraham biti, ‘Amutuku-amutuku nirya arepnamsine,’ nyapdeiamlum mutuku, amutuku unyak nang sik yala si ara, Kanaan mutuku nang ap, Het mutuku nang ap, Amori mutuku nang ap, Feris mutuku nang ap, Yebus mutuku nang ap, Girgasi mutuku nang ap, ulamik. Ance Abraham biti, “Ayala nang nirya, sik talibuka unyak mutuku-mutuku nirya dobuka, an mapu ati arepnamne. Ara, ance deipminba, dadeipdanin banamak mapu ati, arepnamne,” nyapdeiplume. Allah anda, pia diksukum ulyamnye binya arye, ance nyamsulum touk akunum winipmasilame. Sik Lewi yala nang arye nyabik.
Allah el yupu deice arye nyasilye yupu nirya ara, dipkoproba uk ulule. Elce nunti, “Wininamsine,” nyabuka nyalisilye touk, aning nirya, pil dobuka, telebuk winisulula ati ara, elce nyasilye yupu nirya ati ara, diba pia tenenyabe. Allah elce wibuka deiamsuk ninye ara, pia kum batakasulul bukni, elce nyasilye touk, pil dobuka usulule.
Allah Yahweh, ance tenebuka, winiminye ning nirya ara, pia diksukumuk winilyame. Malye winin ning tonok babye, pia kum winilyame. Ninye nirya sik wininyak atonun, moubuka tenemince, diksukum yupu uk, nyabuka lipsisikuka bokolisilyame. Tonda, tukwak ninye nirya ap, kam ulul ning nirya ap, Allah ance kwepdeialum ning nirya ati, Allah ance pil dosilyame. Winisiminye ning nirya ara, ance pia bico tenesiminya deice arye, teleb ubuka pil domince, melisilyame.
Anyapdeiamuk touk, keting tamun tekbarye akunum mabukopura, Nebukadnesar Allah ati morobukba, el kanye ara, ninye kanye bolamak atonun tamubuka, arebukba doprobuk. Doprobukce, Allah ati morobuk. “Se, na ni Allah, ance teleb kel kin ning arepmanilame. Winipmanilama ati, narye an kam pia unamlamnye, siuk erepkinirye, antibuk kinamkine. Na ni Allah, anda ninye deiyoknye Raja umince, taliplum ning nirya ara, pia kam tuba aupnamle. An babye, pia kam unamlame. Aning nirya ara, pia kume kum danamle,” nyabuka morobuk.
Piblisite