Allah Yahweh, elcuk kam bulina ap, dibina ap, delina ap, anirya ara, elcuk winililule. Ara, Allah Yahweh elcuk ninye ati, ‘Kam unamle,’ teneplyopura, anye bira kam unamle. Tonda atonun, yuknye biti, ‘Elcuk dipnule,’ teneplyopura, adiparyuk dipnule. Tonda, Allah elcuk, diplinye bira, dibin ninye unyak dam, asukum el si ara Sheol mutuku dolkwetelule. Atonun, elcuk, ‘Kam buknamle,’ teneplyopura, tonye bira, weik kanye imun uk dipliba, dipmanto upmalya babye, Allah aryuk teleb kibuka wetepdeipliba, kam tuba pia unamleʼ. Dipmalya babye, kam bukeipliba, tamubuka telebuk unamleʼ.
Ulangan 32:39 - Eipomek39 Wini talak ara, anggun nirya arye, na kel biknululume. Dipkoprop anggun ni Allah ara, na tonok unune. Yuk Allah ton, pia kum ulule. Ati ara, naryuk kam una deiyok ap, dipna deiyok ap, aresunune. Aning atonun, teleb winina ap, malye winina deiyok ap nirya ara, naryuk aresunune. Narye, ‘Opnamsine,’ tenepnyopura, opnamsine. ‘Kwetepnamsine,’ tenepnyopura, aninguk wininune. Yata ning do nirya, ‘Naryuk talibuka wenepnamne,’ tenepnyopura, yatanye birye lyepsutu do? Kume, yuk nang arye ton, yupu kum seknitingce, kum lyepsitinge. Gade chapit la |
Ulangan 32:39
41 Referans Kwoze
Nabi Hosea birye, sik Israel ninye ati, nyabuk. Ara, na kayapu, anggun Israel ninye ati nyapsine. Wini talak ara, nun nirya arye, nun malye wininyap ning batakuka, tuba tamubuka, nun ni koprop Allah Yahweh, el damuk binuyabe. Nun malye wininyap ning wenena ati, weik arye wenyamsuke. Bukni, nun malye wininyap ning batakibirye, el dam tamubuka bibyopura, Allah arye kanye deipsilirye, kwetelinamsile. Tonda, nun wenena ati, pia kanye imun weik suse areamsukba, suse dilamsuk ning nirya babye, elcuk suse kweten ning arye likdongobuka, kitipdongopnamsile. Winipsilirye, nun suse kwetelinamsile.
Aning ara, urdem ati kum nyapsine. Deiyok ara ani. Allah arye nun dam ikin ning deilisulul bukni, tamubuka telebuk kilisulule. Ara, ‘Adeice winipniba, sik malye wininyak ning ara, bataknamak’ tenen, wenena ati, ikin ning aresulule. Tonda, el taruk arye bokuka wenesulul bukni, tamubuka bico tenen lyesulule.
Minop talak donirye dipdongobuka, wini talak babye, nara Allah pia unamne. Na taruk deice arye pil donamne ning ara, yatanye birye yupu seknutu do? Yatanye birye nati bisipnutu do? Narye talinye ning ara, yatanye birye doproptu do? Narye pil akunum dopnyopura, yatanye birye, kum kipdeiptu do? Kume aning nirya ara, ninye arye kum winiptinge.” Allah arye nyabuk.
Nara, anggun deiyoknye Allah unune. Ununce, melilamsinya ani, wisi danamlume. Aning atonun pia melilamsinibuk, kul potong tiknamsile. Na Allah arye anggunti pia tuba-tuba bico tenesununce, kalikuka melisunune. Narye kwepdeiamsise ati, narye anggun melibuka bobinamsine. Minop talak arye melibuka lyepdopsise touk, tuba anggun patapsilye ning arelamsinirye, lyenamne.”
Na Allah Yahweh arye nyapsine. “Allah naryuk im babye, im deice ulul ning babye kwepdeipse. Nara Allah tonok unune. Winipsirye, tukwak kwepdeipsiba pia darabuka abukuk. Atukwak mutuku, mutuku-mutuku nirya kwepdeipsa ara, ‘Talya urdemuk aunamle’ tenen, kum kwepdeipse. Aning kum bukni, ‘Aning-aning ayala-yala nirya unamle’ tenen, kwepdeipse. Winipsinye bira, Allah na tonok unune. Yuknye ton kum ulule nyapne.
Nun nirya arye, nun ni Allah Yahweh aning-aning nirya talibuka, weik mikip ulya deiyoknye ulule. Tonda, nun mal olan nang arye, ‘Opsikcak’ tenen, Allah arye nun nirya ati, lobuka lyelosulule. Ati na ning ara, Allah Yahweh ati, “Naio anda pia telebuk ulyame,” nyabuka, el si uk erenamabe. Tonda, Allah arye asum-asum nirya, nun ikin usulul ning ati, eibuka, melisulule.
Aning nirya ara yatanye tenelamuk touk apil dipkoprob donamle do? Yatanye birye aning-aning min kum uamuk tam arye dipdongobuka, anoutam talak nirya ara, ‘Ayala ninye ara, unamake. Sik yuk yala ninye ara, wininamak,’ tenelamuk touk, keting tamun, keting tamun nirya arepliba, tukwak unyak ninye nirya elce tenelye touk, dipkoprob aninguk unyak do? Anye bira, yatanye do? Na dipkoprob nyapsine. Nara, Allah, na si Yahweh unune. Aning-aning nirya min kum kwepdeamse talak ara, minop talak na akunum ulamse. Tonda, aning-aning nirya ati, sirya nirya dakne talak kum uplyopura, na pia aunamne. Nara Pia Kam unanye birye, amambul pil nirya donirye, pia donamne.
Anggunce na Allah ati, ‘Elda bataknyabe. El ti kum tenenamabe’ tenen, pia lubakipnulum nang nirya ara, moubuka kekepnululume! Narye akunum nyapsise yupu ap, wini talak nyapsin yupu ap, moubuka kum kekepmunce, aninguk talibuka kum wininamlum nang nirya ara, wenebuka opsinirye, sice buklopnamsine! Winipyeura, yuknye tonok babye, anggun melina ati, yanuka kum lyepsitinge.
Tonda, Allah arye minop talak, el mikip deice arye winipra yangalamuk ning nirya babye, wini talak winilul ning nirya, yupu nyasilye ning nirya deice arye, akunum laka nyamsukce, tuba nyasulule. Ara, ‘Nun ni koproba Allah, el si ara Yahweh, el tonok ulule. Yuk Allah ton pia kume. Yuk Allah ton kum unyake, el uka,’ tenepmunce, ‘Kel kinamlulumeʼ tenen, mambul pil weik dolamsuke.
Asekmok ning ara, Israel nang sik deiyoknye birye akunum yinibukopura, “Se, na ilil upnil. Nara Allah mikipnye atonunye ununa ati, asurat sekuka dopdeipmanil do? Nara Allah atonunye kum ati ara, dipmatunye ap, uk dinmatunye ap ara, pia kam kum bukeiptibye. ‘Anye Naaman el barye suse kwetepnamle,’ tenepmanilce, na dam dopdeipmanil ara, kum winiptinyopura, yu upliba olyanamnile, tenepne. Na kanye ara, elce tenepmanila ara, ‘Anye obuka sirya daknamne,’ tenepmanilce, yu kipdeipmanil, tenepne,” nyabuk. Nyabukce, ilil kanye bobukce, el ongolamuk baju yu asa arye, kwiliklobuk.
Ance kwepdeiamlum ning yala-yala nirya ara, malye ulamika ani, aminyan sirya talak ara, kum danamle. Bukni, an tonokuk ara, pia ati kamuk tuba, pia telebuk unamlame. Ance kwepdeiamlum ning yala-yala nirya ara, kum upnamle. Winipmanto ara, ninye arye winyak baju ara, aminyan talak lyulamle touk, ance kwepdeiamlum ning nirya babye, kum kipnamlarya. Winipmanto ara, ninye arye minop baju batakikirye, winiryuk baju ongolamak touk, ance aning-aning nirya, kwepdeiamlum ning nirya ara, sirya talak arye kum kipdeipmince, punubuka, winiryuk ning ton, kwepdeipnamlame.
Dipkoprob anda akunum kel bikamnulume. Nara, namin arye unirye, malye winin ning ton, pia kum wininune. Malye winina kumce, nara diksukumuk ununa ara, an kele. Bukni, Allah ance, ‘Anye talipnirye, wenebuka opnamne,’ tenepniminyopura, yata tonye birye, yupu sekturye, nati melibuka lyepnutu do? Kume, kum ulule.
Ninye Mi Koprop Atonunye birye nyapnuke. “Yohanes, ance Semirna mutuku diba tenenyak ninye, sik melin malaikat ati, ayupu sekuka dopdeiplyame. Dopdeipnulam yupu ara, ani.” Aning-aning nirya min kum uamuk talak ara, na akunum ulamse ati, nara Deiyok Kina Deiyoknye unune. Tonda, aning-aning nirya akunum kum uplye talak babye, na pia kam unamne anya arye, nara Sirya Dakna Deiyoknye unune. Na dipse bukni, ila tuba tonap kam buksirye, pia kam unune. Narye anggun Semirna mutuku ninye ati nyapsine.
Allah arye nyabuk. “Se, anggun Israel yala nang ara, na nyapnusin yupu moubuka kekepnululume! Tonda, anggun apu koproba Yakub birye deiamukba, dadeipdanin yangalamlum nang ara, anggunti yupu nyapsisirye, ‘Naʼ tenen, ati wibuka deipsisa anya arye, na nyapnusin yupu kekepnululume! Nara anggun ni koproba Allah pia ati unune. Pia aununye bira, nauk aunune. Aning-aning min kum uamuk talak ara, na akunum ulamse. Tonda, aning-aning akunum kum uplyopura, na uk tuba kam unamne! Nara aning-aning nirya deiyok kina ap, sirya dakna ap, weik deiyoknye birye, na uk unune. Yuk ning ton pia kum ulule.
Arup ara narye anggunti, ‘Anggun malye ululum ning noutamak aryuk dipnamlume,’ nyapmasine. Tonap ayupu ton nyapsine. Narye anggunti, ‘Na aunune,’ nyabuka, na bidamnye ati laka nyasinye yupu kekepmunce, diba kum tenepnumunyopura, dipkoprop anggun malye ululum ning noutamak aryuk dipnamlume.” Yesus arye Yahudi deiyok nang ati nyabuk.
‘Cang baju dobuka kitilamak touk, tukwak mutuku ulul ning ap, im noutamak ulul ning nirya ap, aulamle ning nirya ara, ketina atonun upmince, winiryuk ning kwepdeipmince, aning yala-yala nirya punupnamlame. Minop baju kwiribuka batakikirye, winiryuk ning ongolamak touk, winiryuk tukwak mutuku im sirya, mutuku sirya nirya ap, winiryuk im ap, kwepdeipnamlame.’ ‘Aning nirya ara, punubuka memepnalam bukni, an tonok ara pia kume. Wini talak uminye touk, pia doupnamle talak babye, tuba kamuk unamlame. Anda dipmanto kumnye anya arye, anda pia kum tunimapnalame.’ (Mazmur 102:25-27) Allah arye, el Mi Kopropa ati nyabuk. Nyabuka ati, el Mi Kopropa ara weik mambul ulul bukni, sik malaikat ara, sik mitik mambuluk unyake.
Kekepsiba, Allah arye nyapnuk. “An kekepnulam ning ap, eipnulam ning ap nirya ara, moubuka seklyame. Surat sekminyopopura, Asia tam noutamak diba tenenyak ninye ati, mutuku si tekbarye dopdeipnulyame. Amutuku si ara, ani. Efesus ap, Semirna ap, Pergamus ap, Tiatira ap, Sardis ap, Piladelpia ap, Laodikia ap, ulule,” nyabuk.
Winibukba, Allah arye Musa biti nyabuk. “Ura, ila tuba tonap, an taruk an baju pum bisik dongoplyame,” nyabuk. Nyabukura, Musa anyapmok touk, taruk dongobukba, el taruk adiparyuk barye suse atonun ning, el si ara kusta, kum dayukce, el nong nirya teleb kibuk touk, ila tuba tonap el taruk babye, telebuk kibuk.
Atalak ara, Allah, el si Yahweh arye Israel ninye ati ayupu nyabuk. “Anggunda na Yahweh arye nyapnusin ning nirya ara pia wininamlulume. Ara, narye nyasunun yupu moubuka kekepmunce, na tenenye touk diksukumuk winipnamlulume. Ara, narye anggunti, ‘Aning ara winibuka-winibuka unamlume,’ nyabuka deipnirye, aresunun yupu nirya, moubuka kekepmunce, dobolbanamlume. Aning atonun narye anggunti, ‘Aning kum unamlume’ nyasunun yupu mem yupu nirya kekepmunce, aning nirya kum winipmunyopura, narye melinamsine. Ara, Mesir ninye anggun ona ati, weik kanye imun ning ap, uk deiyok ning ap arepse touk, anggun Israel ninye ati ara, pia kum arepnamsine. Auk ara, aning-aning nirya kum dipnamsile. Ara, nara anggun ninye deiyoknye, Allah ununa ati, na Yahweh arye anggunti kwetepsinirye, lyebuka kam bukuka deipnamsine,” Allah el si Yahweh arye Israel ninye ati nyapdeibuk.
Se, Allah ance winilyam ning nirya ara, pia diksukumuk winilyame. Ance pil dolyam ning ara, malye ning tonok babye kum ulule. Teleb winin ninguk winilyame. Tonda, Allah Yahweh ance, “Winipnamne, winibuka teleb kilinamsine,” nyabuka, nyalin yupu deice arye nyasilyam yupu nirya ara, dipkoprob nong upnamle. Tonok babye kum batakalyame. Yata nang do nirya, sikce anti, ‘Allah elcuk melibuka lyepnamnil’ tenen, an damuk yanuka unyak nang ara, ance anang ati, pia melibuka kalikinalyame. Winipmanto ara, anda nun nong lelin ning, el si ara perisai atonun usilyama ati nyapne.
Bukni, na ni Allah, ance nati teneniminya ara, ‘Tuba malyeuk kilya babye, nong bol deiceuk, teleb winin ning tenena kume. Bukni, ‘Ninye kanye talima pum tam arye, pia diksukum winin ninguk tenebuka patapliba, pia telebuk unamle,’ tenenilyame. Utenemince, ‘Weik kel bikna deiyok ninguk wininamle,’ teneniminye touk, aninguk na kanye talima pum tam arepniminba, moubuka kel biknirye, telebuk unamne.
An siuk erenamkiaka deiyok ara, ani. Ara, ance pia teleb pil, weik tonun ninye dopman kum pil dominye talak nirya ara, ninye nirya arye, ‘Se, aweik mikip pil ara, ouku weikto uptu do?’ tenen, ilil weik upliba, sik kanye deibikirye, pin-pin asa unyake. Dipkoprop, Allah an tonok ulyame, yuknye ton kum ulule.
Allah Yahweh arye Mesir mutuku nang, sik malye un nang ati obuka wenepnamle. Akunum obuka weneplyeura, elcuk tamubuka sikti, ila tamubuka teleb kiplirye kweteipnamle. Mesir mutuku nang ara, tamubuka Allah damuk yanuka moropnamake. Sikce Allah ati, ‘Naio, melipsilyame,’ nyabuka moropnamak talak ara, elce sik melina ati, sik ikin ning kum kipdeiplirye, sikti, kwetelinamle.
Aninguk kum bukni, atalak babye, wala el dirina ara, keting dirina ulamle touk upnamle. Keting el dirina ara, minop talak arye dirina ulamuk touk tuba kum upnamle. Atalak ara el dirina ara, pia weik upnamle. Aketing dirina pia weik upnamle ara, tonok sum keting duk-duk noutam ara, keting dirina atonun bukni, tekbarye tabaklya deice arye, dirina pia weik upnamle. Ara, Allah Yahweh, el mapu koprop ati, olamikiba dila weik ulamlye ning ati, lipdongoplirye, kweteipnamle. Allah arye sik wenena ati, ikin ning areamukba, sik dila uamuk ning nirya kwetepliba, nipdopnamle.
“Se, na mapu anggunda na unun ning ati, laka nyan nang ululume. Tonda, ‘Na mambul pil melibuka donamle’ tenen, wipdeipsinye ap, anggun ap arye laka nyapmunyopura, anggunce kel biknamnulume. Ara, ‘Dipkoprop, Allah elda tonok ulule,’ tenebuka kel kipnamlume. Allah nara pia min yuma talak ap, atalak ap, aminyan doryanamle talak ap nirya ara, nara pia aunune. Yuk Allah ton pia kum ulule. Ati, yuk nang arye, ‘Allah min kum ulamuk talak ara, nun si erenyap ning akunum uamuk,’ kum nyaptinge. Tonda, na pia aunamne ati, yuk nang arye, ‘Allah akunum kum danamle talak ara, nun si erenyap ning apia unamle,’ kum nyaptinge. Nara, pia min kum winipmantonye ununa atia. Min talak babye, aminyan doryanamle talak babye, na uk ulamse touk, pia aunamne. Allah ara na tonoka.
Atalak ara, Allah el si Yahweh arye, nati nyapnuke. “Se, anda ninye sirika arye, deiamkiknye anya arye, ance tenipdenulyame. Aselal lebuka nyelelul ninye yok nirya ara, ‘Tamubuka kam buklulume,’ nyaptibyopura, kam bukting do, kum do?” nyabuka asipdenuk. Nyapnukba, narye tamubuka nyapse. “Allah Yahweh aning-aning nirya, talibuka deice tam Weik Erena Deiyoknye umince, ‘Winipnamne,’ tenelyam touk, wininilyama ati ara, ance asipdenilam ning ara, pia dipkoprob an tonok ara kele. Nara, na walwale,” nyapse.
Winibuka nyanyaka ati, narye nyapnukin yupu dobuka, ‘Naʼ tenen, ninye, sik Israel ninye ati, laka nyapnalyame. Ayupu nyapnalyame. “Na Allah Yahweh, aning nirya talibuka, deice tam Weik Erenanye unirye, ‘Winipnamne,’ tenepnye touk wininuna anya arye, anggun diplamlumba, tuku palibuka weilamsika nirya ara, bublan kukuka, kam bukeipnamsine. Na Allah arye, ‘Naʼ tenen, ninye ati, aunyak noutamak arye dobuka, anggunti areamsise mutuku noutamak, tuba tamubuka bobisinirye, deipnamsine. Amutuku tuba tamubuka arepsiniba, anggun amutuku noutamuk unamlume.”
“Ati ara, anggun adiparyuk moubuka teneipdemunce, kel kipnamlulume. Pia tenenamlulume. Allah el si ara Yahweh, anggun ni koproba Allah, el tonok ulule. Yuk ton kume. Allah arye nyalilamuk yupu nirya ara, dipkoprob ulule. El nyalisilye yupu ara, tonok ning ara, kum batakalule. Yata ninye do nirya, sikce el deiceuk, sik kanye deibikirye, elce, ‘Aning wininamlulume,’ nyabuka nyasilye yupu, moubuka talibicopura, Allah arye sikti, tuba-tuba melilule. Elce sikti, ‘Wininamsine,’ nyalisulul yupu nirya ara, tonok ning babye kum bataknamle. Nirya awininamle. Ato ninye ati ara, sikce mapu deibikiba, dadeipdanin, banamak nang yupa ara, pia kum nukmanto, pia weik upre balamlya babye, pia melinamle. Sikce, mapu deibikiba, dadeipdanin banamak ninye yupa ara, ninye nel punun nang, generasi yupa weik, seribu kali lipat upre banamak ninye ati ara, Allah arye pia melinamle. Kum bataknamsile.”
“An adiparyuk tamubuka, na mapu Israel ninye, sik deiyoknye Raja Hizkia dam bimince, anyapmakin yupu ara, binuka laka nyapnulyame. Ara, “Nara, Allah Yahweh, an apu Raja Daud birye, si erelamnuknye ununa anya arye, an tenipmalamce, asing maka deice arye, nati moropmanilam ning ara, akunum kekepmakine. Ati, narye anuk dikulul ning ara, akunum kwetepdeipmakine. Ati, mapmaminya berekliba, daunmaminya ani, like winilye sum ton akunum uplyopura, narye kwetepnamkine. Kweteipkinyopura, anda na Allah Yahweh si eren aik dam binulyame.
Tonda, sik Israel ninye arye, nyabik. Yahweh an tonok ara, dipkoprob Allah ulyame. Yuk ton kum ulule. Ancuk im deice kwepdeiplume. Ancuk im deice ulul ning kurya ap, wala ap, keting ap, aning-aning nirya kwepdeiplume. Tonda, laut mekwen ap, laut mekwen noutamak ulul ning ap, tukwak mutuku ap, tukwak mutuku noutamak ulul ning ap, nirya ara, ancuk kwepdeiplume. Winiplumce, aning-aning nirya kam una ati, isin areplumce, meliminba, tuba kam unyake. Ati ara, im deice yin talibuka unyak malaikat nirya arye, an si erena ati, kisok kanupdongobuka si erekinyake.
Winilamnulum bukni, wini talak ara, na akunum tenipmane. An kanye pum tam ara, nati adiparyuk dungnubuka, ‘Ikin deipnyeba, Ayub birye dopropnamlarya,’ tenelamnulume. Minop talak ara, aning nirya duknulamlum bukni, wini talak ara, ance nati, ‘Anye biti winipnamne, winipnamne,’ tenyamlum ning ara, akunum kel bikmane.
Anggunda yuk ning ap, isa si ap, deiyok kibuka min kum erelamlum talak ara, na minopce ulamse. Nara peterena ap, lak lena ap, ninye lyena ap, teleb ulina ap deiyoknye bira, na aunune. Yuk ning ton kum ulule. Anggunda na yupu lak len ninye ululume. Anggun kel bikimunce, laka nyalulume. Nara Allah Yahweh unune.
Aning ara, urdem ati kum nyapsine. Winipmanto ara, bai tam nong weik ulul kuse, yu kuse el si ara, singa kuse arye, kam ulamle ning oploplirye, dilamle atonun, narye anggun nirya ati, wenebuka opsinirye, sirya daknamsine. Winipsinya deice arye, lo arepneba, yuk pera mutuku ninye, yu ninye arye, anggun dam yakirye, malye kibikirye, tapu koubuka, sik mutuku tamubuka bobinamsiake. ‘Winipnamak’ tenen, na Allah arye, lo akunum arepneba, yuk mutuku ninye nirya arye, anggunti kum lyepsitinge. Narye akunum bataksinirye, pia memepdopniba, nara anggun dam kum unamne.”
Piblisite