Ulangan 32:22 - Eipomek

²² Aning nirya winipnamana deiyok ara, ani. Na yu ara, uku buk dilamle atonun kibuka, dipra balamlya ani, akunum dibuka binamik nang mutuku, tukwak amu tam babye, dipra banamle. Na yu, uku buk atonun ning ara, tukwak mutuku nirya babye, ninye koulamikce ning nirya babye, ninye talinyak ning nirya babye, dipnamle. Ton ning ara, weik mutuku nirya, tuku pum tam babye, uku diplirye, sirya dakuka anirya dipnamle. Ara, ninye arye, ‘Amambul ning min kum winipmanto ning,’ tenenyak ning nirya ara, narye kum kipdeipnamne. Allah arye nyabuk.

Ulangan 32:22 Referans Kwoze

Ratapan 4:11

Israel nang arye pia malye weik ulamik ati, Allah el yu pia weik ubukura, ‘Sion mutuku ap, amutuku unyak nang nirya ap ara, tonok ning babye kum bataknune,’ tenebukce, lo arebukba, sik mal olan nang arye, uku dinibikba, amutuku nirya uku arye dibuka sirya dakuk. Asukum nirya ara, ‘Nun aik mikip kipnamsileʼ tenen, sik aik amu tam deiamik keil babye, uku dibukba, sice uk buklobuk.

Yeremia 15:14

Narye anggun mal olan ninye ati, lo arepneba, yanuka opsikirye, kam tuba unamak nang ara, tapu koubuka, sik mutuku tamubuka bobinamsiake. Anggunda kum bikamlum ninye, pera mutuku yu ninye noutamak, bobuka deipsinyopura, ninye asik nang atonun ulamunce, anggunda amutuku nang ati, talye pil dobuka melina nanguk ulamunce, sik amu tamuk ikin kanye bobuka, unamlume. Anggunce, ‘Se, yata ning ati, ikin unmasil do?’ kum tenenamlume. Ara, na yu ara, uku buk dilamle atonun unulula ati, nyapne. Auku buk dininto unmalye ning ara, yatanye birye tangap dongoptu do? Pia kume. Weik uku pia dilamle touk, na yu ara, kum kum danamle. Allah arye nyabuk.

Zefanya 3:8

Ati ara, anggun amutuku ululum nang ara, narye anggun dam, yanuka nyapnamsin sum ati, moubuka dinamlulume! Deiyok ara, narye anggun malye weik winilulum ning ati, tukwak arye laka nyananye unamsina ati, anggunce, ‘Se, Allah ara, dan talak arye, nun malye wininyap ning ati, yanuka laka nyaplirye, wenepnamsil do?’ tenen, moubuka dinauk unamlume. Aning ara, talye ati kum nyapsine. Deiyok ara, ani. Ara, narye tukwak nang mutuku sirya, im sirya nirya ukirye, ninye ayala-yala nirya ara, sik malye winin ning ati, yu weik arye wenepnamsine. Winapnamne ati, ninye deiyok kibuka, talinyak mutuku nirya ap, weik nang ap, narye akunum bulupdeipsinyopura, anggunti wenepnamsine. Tonda, anggun malye winin ning ati, na yu teninun ning ara, weik uku buk dilamle atonun unulula ati, aning nirya ara, anggun deice deipnyopura, tukwak mutuku im sirya, mutuku sirya nirya, unyak nang ara, uku arye dibuka, sirya daklamle touk, winipsilirye, obuka, sice buklopnamsina atia.

Mika 1:4

Winibuka tikilyanganamla talak ara, amutuku nirya, weik arye luluklirye, mutuku nirya, atu atonun kiplopnamle. Winipmanto ara, lilin dobuka, uku dinipdongobikiba, uku buk dilirye, mek balamle touk upnamle. Ara, nun ulamepye mutuku deice tikilyaliba, mek kutuklirye, tokna donamle. Tonda, mutuku deice arye, mek kutuklirye, tokna pakuka balirye, opnin banamlya ani, lu mutuku obuka, dalalbalamle touk, upra binamle.

Yeremia 17:4

Narye, ‘Sik amutuku pia unamakʼ tenen, teleb mutuku akunum bokuka, areamsise ning ara, tuba dobuka, anggun mal olan nang arepnamne. Tonda, narye anggun dopropsinirye, anggun mal olan nang deice deipsiniba, sik anang arye, anggun Israel mutuku nang bobuka, anggun bikina kum mutuku bobisikirye, ikin pil dipsikiba, donamlume. Aning nirya winipnamsina deiyok ara, anggun malye winimunya dengna atia. Na yu ara, akunum uku buk dilamle atonun unulule. Auku dilamle touk unulul ning ara, auku kum tangapmanto ulula ati, pia dinamlarya! Ati ara, ‘Winipnamsine,’ nyapmasin ning nirya ara, dipkoprob anggun wenena ati, narye anggun dam deipnamsine. Allah arye nyabuk.

Mazmur 86:13

An siuk erenamkina deiyok ara, ani. Ara, ance nati, ‘Pia weik tonun bico tenekinirye, pia teleb kibuka winilinamkine’ nyapdeiamnulum ning ara, nukman kumto ulule. Tonda, minop talak akunum dipmanto ulamse talak ara, dipmatinirye, akunum diamik nang unyakak, amutuku si ara, Sheol mutuku, akunum binuka unmatinye bukni, wini talak ara, ancuk kwetepnulumba, kum dipsa ati, kam tuba unune.

Bilangan 16:35

Tonda atalak uk, Allah Yahweh arye, uku buk dopkwetebukba, Korah tam nang, ninye yupa ara, dua ratus lima puluh (250) nang babye, uku arye dibuka, sirya dakuk. Ara, sik anang ara, siltong teleb nyan ning ati, ‘Dupa uku dongopnamapʼ tenen, kintinipmek nang nirya babye, sik nong nirya, uku arye dibuk.

Ibrani 12:29

Nun Ni Kopropa Allah ara, weik uku ina ibikiceba, aning-aning nirya diplirye, kum ulamle touk, elda aning atonun ululnye birye, malye winin ning nirya ati, yu upliba, kum daneipnamle anya arye, ‘Elda mambule’ tenen, ilil usilirye, el siuk erenamabe.

2 Tesalonika 1:8

Tonda, ayanamle talak ara, yata ninye do nirya, ‘Allah ara nun like’ tenen, dib tenena kum arye, Allah el ap, nun Deiyoknye Yesus ati, el laka teleb yupu, ninye lyena yupu ap ati, batakuka yaninyak ninye nirya ara, weik arye wenebuka, sik nong deice weik ikin ning deipnamle.

Matius 23:33

Ninye on kwatima duknupmalya, ninye mangkau bakiba, eiplirye, si tolamle touk, ululume. Anggunda pia malye nang ululuma anya arye, Allah arye uku din mutuku dopkwetepnamsilak ara, yata wiribuka lyepdana bitum do?

Matius 18:9

Tonda, anggun asing eipmunce, malye winipmunyopura, dana tam asing duk lukuka bataklulume. Teleb ning ara, tonok asing dem aryuk Allah arye ninye weik lyeplirye, sik kanye talima talinamlak, im deice binamlume. Ara telebe. Bukni, asing bitinye dimunce, malye tuba winipmunyopura, Allah weneplirye, uku din mutuku dopkwetepnamsil ati, pia mambule. Aning ara, dipkoprop ikine. Ati winina kume nyapsine. Yesus arye nyabuk. Nyabukce, ayupu tonap nyabuk.

Matius 10:28

Ninye kanya kum opsitinge bukni, nong ara opnamsiyak nang ati, ilil una kume. Bukni, ninye malye-malye weik unyakba, weneplirye, uku din mutuku dongoplirye, ninye nong ap, kanya ap, obuka sirya daknamsilanye, elti, ilil unamsile. Ara urdem ati, kum nyapsine, ‘Allah arye wenebuka opsilyak’ tenen, elti, ilil unamsile.

Habakuk 3:10

Winiplum talak ara, Allah an yalumopura, mutuku-mutuku nirya luluklamukba, amutuku arye elilamik. Tonda, tukwak mutuku balamuk mek ap, laut mekwen ap nirya ara, anti ilil ubukba, mek nirya longteng-longteng abuk. Winilamuk talak ara, mek nirya obuka balamukce, weik lelim nyabuka balamuk. Laut mekwen deice tam ara, anti dilamkukce, mekwen longteng-longteng abuka, mek keit weik arye welebuk.”

Yehezkiel 36:5

Ati, na Allah Yahweh, aning-aning nirya talibuka deice tam, Pia Mikip Weik Deiyoknye birye, nyapnusin yupu kekeplulume. Ara, na weik arye, yu upniliba, sik Israel mutuku dana-dana unyak ninye nirya ap, tonda Edom mutuku unyak ninye nirya ap, anggun nirya ati, yu kanye bobuka nyapsine. Ara, anggun nirya wenebuka opnamsine. Derebuka opnamana deiyok ara, ani. Amutuku ninye nirya ap, Edom mutuku ninye ap arye, ‘Israel yala ninye talinyak mutuku nirya ara, maning teleb ubuka, palamle mutuku anya arye, nun kambing ap, nun domba ap arye, aning dinamaka ati, sik Israel ninye malye kibuka obibyopura, nuncuk amutuku nirya, dobuka talipnamabe’ tenen, kanye deiamikce, yupu sirikamika ani, Israel ninye taleamik mutuku, dalubuka dopromik.

Ratapan 2:3

Ati, nun Israel nang nirya ara, min talak mikip ulamupu bukni, wini talak ara, Allah arye yu ubukura, uapsuka deice arye, nun Israel nang ara, mitang kipdeipsuke. Tonda, nun Israel nang ona ati, nun mal olan nang arye ona ati, warikilyangasikce talak babye, Allah elce kum melisulule. Winipmanto ara, el sirik tam taruk, mikip weik winilye ning ara, min talak ara, aning arye kaliklamsuk bukni, wini talak ara, akunum bataksukce, kalekuka kum melisulule. Tonda, nun apu koproba, Yakub birye deipsukba, deipdanin yanga birye unyap nang deice ara, Allah el yu ara, nun deice deipsukba, uku dilamle atonun usulule. Auku buk weleplirye, nun un ning yala-yala nirya ap, nun tam nang ap, nun dam ulye ning nirya ap ara, uku dibuka sirya dakalye touk kibuka, el yu deice arye akunum kum kipdeipsuke.

Yeremia 4:4

Anggunce na anggun ni koproba Allah dam, nyalin yupu nyapdeiamuk ning moubuka talipnamlume. Tonda se, sik Yehuda yala nang ap, Yerusalem mutuku ululum nang ati, ayupu nyapsine. Anggunce, ‘Nara Allah el ninguk wininune,’ tenenamlume. Aning kum winipmunyopura, na yu, uku buk dilamle touk unilye ning ara, anggun deice deipnamsine. Winipsinyeba, uku buk dilamle touk unamle ning ara, ninye yuk nang arye, tangapmanto kum upnamake. Winipnamak ning nirya ara, anggun malye un deice aryuk, ikin anggun dam yanganamsile.

Yesaya 54:10

Ati pia weik mutuku bukuka ap, mitik-mitik mutuku kon bukuka ap nirya lokturye, sakuka kum datua babye, narye anggunti se tenesununa ati, kum luba kipnamsine. Narye anggunti pia tuba teninamsine. Bico tenesununce, narye anggunti yu upniliba, ikin ning anggun dam kum delinamsine. Tonda, narye anggunti, ‘Anggun ap, na ap teleb kibuka neika unamabe,’ nyapdeiamsise yupu ara, kume kum datue. Ara, na si Allah Yahweh arye nyapsine. Narye anggunti bico tenesununye birye nyapsine. Allah arye Israel ninye ati nyabuk.

Yesaya 30:33

Dipkoprop minop talak ara, Allah arye Asyur mutuku ninye deiyoknye, Raja Asyur biti, ‘Anye opnirye, el nong dobuka uku dongona ati ara, akunum kintinip deiamuk. Dipkoprop aninye deiyoknye Raja Asyur mutuku nang ati, auku dinamlak akunum kintinip deiamuk. Asukum ara, tuku pum palibuk ning ap, uku dinamlak pala ap, el uku dan yo toubuka deibuk ning ap, akunum weik tonun kintinip deibuk. Aning nirya akunum kintinip deibuka anya arye, atalak ara, Allah Yahweh el yu deice arye, el si mikip arye pong nyapliba, pito weik tonun welepmalya deice arye, auku seklyopura, uku buk weik tonun dinamle.

Yesaya 24:6

Tukwak nang arye, pia malye unyakak ati, Allah arye atukwak mutuku sirya im sirya nirya ara akunum subukce malye kipdeibuk. Winibuka ati, amutuku unyak nang, sik malye ulamik ati, akunum Wenebukba, ikin weik unyake. Sik tukwak nang nirya ara, akunum dibinyaka ati, tukwak mutuku nang sirya dakalula ati, wini talak ara, ninye mitik tonunuk tuba kam unyake.

Mazmur 144:5

Se, nun ni Yahweh, ‘Anda im deice bisik bublan kukeipmince, tukwak mutuku koulukmince, nun dam yanuka melipsutum’ tenen, moropkiabe. Tonda, ance, ‘Cang weik mutuku kon talipminyopura, weik uku diplirye, tulum weik tonun welepnamle. ‘Winipnamlam’ tenen ati, moropkine na nio.

Mazmur 97:3

Winipmanto ara, Allah arye yupu lipsisikuka bokeipnamsil talak ara, weik uku buk diplirye, aning-aning nirya dibuka, sirya daklirye, sice bultakalamle touk, winipnamle. Ara Allah elti, ‘Elda nun lik ati, el daupmalye,’ tenenyak nang ati, Allah arye anang nirya ara, obuka sirya daknamle!

Mazmur 83:14

Se, na ni Allah, nun Israel nang ati olyangasikce nang nirya ara, ance opmince, sice buklopnamlame. Winipmanto ara, weik kum peiyang nyabuka yalirye, sesal selamle tuku butbuta bobalamle, kum anya ulye touk, anang babye, kum kipdeipnamlyame na nio! Tonda, ninye arye, sik gandum du tekeinmace talak ara, kum arye talye balamle ning, dobuka bolamle touk, an Allah arye, ayu nang nirya ara, kum kupdeipnamlyame na nio!

Mazmur 46:2

Nun ikin usilye talak nirya ara, nun ni Allah ance melisimince, mikip arisilyame. Allah ance lelilongosilyame. Allah anda ninye kanye imun upsilye ning babye melisilyamnye.

Mazmur 21:9

Ati, an Allah arye, nun mal olan nang nirya, eipmince, bikminyopura, an mikip deice arye, anang obuka, sirya daknamlame. Aning atonun, anda Allah ati, ‘Nun lik, elti, nun lik’ tenen, yanikinyak nang nirya ara, an mikip weik sirik taruk deice arye, sik anang nirya ara, adiparyuk wenebuka oplopnamlyame.

Ulangan 29:20

Anyalin yupu akunum kekepmalya babye, yata nang arye do, malye un ning winiplinye bira, Allah arye, ‘Anye bira, namin kiplirye, teleb kipdeipnune,’ pia kum tenenamle. Bukni, atouk winiplinye bira, Allah yu weik uplyeura, ikin ning tamubuka, el nong deice delinamle. Ara, “Anggunce, malye winipmunye nang ara, aikin weik ning, anggun dam yanganamsile,” nyapdeipsiba, abuku noutam sekeibik touk, ubuka yasiliba, donamlume. Adeice arye, amalye winin nang nirya ara, Allah arye sik malye winin nang ati, namin kina kumce, obuka sirya daknamle.

Imamat 26:20

Winipnyopura, anggun mikip aryuk, pil domunce, wa wibuka koulenamlum bukni, anggun pil talyeuk donamlume. Ati ara, anggunce wa wibuka kounamlum tuku noutam nirya ara, teleb kibuka, nong ton pia kum unamsile. Aning atonun ton, yo duk moulamle yo yala yuk-yuk ning nirya babye, papnamle bukni, duk ton pia kum mounamle. Yo duk yuk-yuk ning nirya, kum libuka dinamlume.

Bilangan 16:33

Sik aninye ara, tuku likdobukba, kam kipman atuku pum bisik wekikce, diplamik nang ulamikak, amutuku si Sheol biyik. Tonda, sik talibuka ulamik ning babye, adiparyuk tuku pum bisik wekikba, kum dayuk. Sik aninye tikmek tuku likukba, sik aninye tuku pum bisik wekikopura, atuku ara tamubuka ansinipdongobukce, dibuka kum dayuk. Atalak aryuk, Israel ninye daulamik mutuku noutam arye kum dayikba, tuba tonap, anang ton pia kum eibik.

Yehezkiel 38:19

Na pia yu weik deice arye, ‘Se, ‘Naʼ tenen, nang ara bicoe. Sikda na talima nang ati, sikti, kanye delinune. Ati, yata ati, Gog birye, opmal do?’ tenen, Gog elti, mal pipnirye wenepnamne. Ara, wini talak, weik mutuku lulukna ap, kanye imun upnamle ning ap, sik Israel mutuku noutam unyak nang kan-kan winipnamle.

Amos 7:4

Allah Yahweh elda aning-aning nirya talibuka, deice tam Pia Mikip Weik Deiyoknye ululnye birye, na Amos biti, lak kipdeipnukba, narye eipse. Eipse ning ara, ani. Ara, el mapu Israel ninye, sik wenena ati, ‘Weik uku arepnamne’ tenen, kintinibuk. Akintinibuka deipmokba, eipse ning ara, uku ara weik laut mekwen deibukak ara, uku sakukce, asukum arye deiyok koubuka, amekwen nirya ap, tukwak mutuku-mutuku nirya ap ara, ‘Uku arye dibuka sirya daknamle’ tenen, akunum kintinip deibukce, dopkwetepnuyuka ati, kintinipmokba eipse.

Ratapan 2:2

Tonda, Allah arye, aning-aning nirya talilirye, pia mikip weiknye ulule. Elce, nun apu koproba Yakub, elce deibukba, dadeipdanin yangalamika ani, deibikba, Yehuda tam ulamik nang, amutuku noutam ulamik nang, sik aik dolamik ning ara, bico kum tenebukce, yu ubukura, sik aik tonok babye, ton kum batakuk. Sik aik nirya ulubuka, sice buklobuk. Ara, Allah el yu pia weik ubukura, uapsuka deice arye, amutuku asik dolamuburye ulamupak nirya ara, ulubuka bataksuke. Winipmanto ara, ninye arye, ‘Yu nang ati, malye kipsicak’ tenen, sik asik dana-dana tam, cang keil poka dobuka dolamik bukni, yin talin nang arye, aning nirya ulubuka bataklamaka touk, nunda teleb ulamupu bukni, Allah arye tonok aik babye, ton kum batakuk. Anirya ulubuka batakuk. Allah elce Yehuda yala ninye ati, ninye deiyok nang kibuka ulamik Raja nang ap, sik amu tam yuk-yuk pil ati, deiyok kibuka ulamik nang ap ati, nun amutuku nang nirya ati ara, ‘anggun malye,’ tenepsukce, amu kipdeipsuk.

Ratapan 2:4

Nun mal olan nang arye, sik mal ara, yin deice deibuka, nun marana ati, kintinibikce touk kibuka, Allah arye nun menenga ati, akunum wenebuka kum kilisulule. Ura, Yerusalem mutuku ukceba, nunce anggunti, weik arye bico tenenyap nang, nun mapu silip nirya ara, Allah elce anang nirya obuka, sirya dakeipnamsile. Ara, Allah arye nunti, yu uplyeba uapsilirye, Yerusalem mutuku unyap nang ara, wenebuka sirya dakasulule. Ara uku buk beleplirye, aning-aning nirya diplirye, kum kililamle touk uplirye, Yerusalem mutuku deice, weik ikin ning akunum arepsilyeba, dibuka sirya dakmasile.

Yehezkiel 19:12

Aninye deiyoknye birye, el weik kama talebuka ulamuk bukni, aning anggur tapu nirya ara, Allah el yu weik ubukba, elcuk aning anggur tapu palibuka, tuku pum tam arye, anggur tapu ap, el yating ap welebukce, erebuka tuku deice poubuk. Tuku deice poubuka dopkwetebukba, atalak ara, weik kumanya, keting yangan tam arye, puabuka deice arye, anggur tapu yo deiyok ap, duk pia teleb ning nirya ara, koulubuka, tuku deice sakuk. Winibuk talak ara, anggur tapu yo taruk nirya ap, duk nirya ap ara koulubuk. Winibukopura, anggur tapu yo ap, duk ap, koulubuk ning ara, uku arye yanuka, dibuka sirya dakuk. Allah arye, Yeheskiel biti nyabuk.

Yehezkiel 22:21

Dipkoprob, narye sik nirya ara, tamubuka Yerusalem mutuku uk, deipnyopura, narye anggunti yu unilyeba, uku buk ulamle touk unulul ning ara, anggun deice deibuka wenepnamsine. Winipmanto ara, kat ning dobuka, uku dongobiceba, malye wamlye ning dilolamle atonun, kibuka winipnamsine.

Amos 5:6

Ati ara, anggun Israel ninye nirya ara, tonap tuba tamubuka, na Allah Yahweh damuk yanamlulume. Yamunyopura, anggun pia tuba kamuk unamlum bukni, na dam tamubuka kum yamunyopura, Allah na yu ara, uku dilamle atonun unulula ati, anggun apu koprop, Yusup arye deiamukba, dadeipdanin yangalamik nang, anggun Israel yala ninye nirya, sirya daknamsine. Winipmanto ara, uku dibuka sirya daklamle touk, anggun wenena ati, kum daneipnamsine. Tonda, Betel mutuku unyak nang babye, auku arye diplirye, sirya daknamle. Adinamle uku ara, yatanye birye tangap dongopturye, aninye lyeptu do? Pia kuma ati, ‘Allah arye wenepsilyak’ tenen, nyapsine ati, anggun kanye mouplulume, nyapsine.

Zefanya 1:18

Allah Yahweh, el yu ulul ning ara, tukwak uplyeba, aweik ikin upnamle sum areplyopura, sik bona weik talin nang arye, talinyak dengna weik ning emas ap, perak ap arye, amutuku nang ati, pia kum melinamle. Abona weik talenyak nang ara, sikce sik dengna weik talenyak ning arye, pia kum lyepdanamake. Allah el yu ara, weik uku dilamle touk ulirye, tukwak mutuku nirya ap, tukwak mutuku nang ap, nirya wenepnamle deice arye, malye kiplirye, bataknamle. Aning ara, ninye arye kum tenipnamak buk, sik mangkau kibikce talak, Allah minopce tukwak mutuku kam unyak ning yala-yala nirya ap, tukwak nang im sirya, mutuku sirya nirya ap, opsilirye sirya daknamsile! Tonok ning babye, pia kum bataknamle.