Winipnamak ning laka nyapnusine. Ara, narye anggun apu yapu nang ati, ‘Pia teleb mutuku arepnamsine,’ nyamse mutuku wekelbana ati, aninye bobuka bobinamne. Amutuku ara, aning-aning weik mutuku, pia teleb mutuku ati, ninye wein ning weik ulul mutuku anya arye, sapi basam ap, kambing basam ap, domba basam ap, aupmala ati ara, moum yung susu mek weik ulule. Tonda, mong ulul anye arye, mong mek ap pia weik ulule. Teleb ning yamubuka arepneba, sik patalamle touk weik dibikiba, bouplyopura, sik nong kalimna weik unamle. Bukni, kanye deibuka telebuk akunum ubicopura, sikce nati batakukba, Isa Mutuku Dongonye siuk erebikirye, kinamake. Isa siuk erenamake. Winibikirye, narye, ‘Wininamsine, wininamsine,’ nyabuka nyapse ning yupu ara, yanibikirye, nati like tenepnamniyake,” Allah arye nyabuk.
Ulangan 32:15 - Eipomek15 Allah el ‘Naʼ tenen, ninye, Israel nang ara, aning-aning nirya dilamikba, sik nong nena ara, nong kalimna dongopna arye, weik arye nelamik. Aning-aning telebuk ulamuka ani, sik Israel ninye arye, malye kibuka, minop talak arye, sik kwepdeiamuknye Allah ati, ‘Nun like’ tenen, batakik. Tonda, sikti, lyepdomuknye Allah ara, el si yanibuka bataklamik. Ninye arye, ‘Yu nang arye opsicak’ tenen, tonda, ‘Weik mutuku pala keil leleipnamsil’ tenen, akeil donga duknulbalamik touk, sik lyena deiyoknye Allah ara, weik mutuku yangan keil atonun ulamsuk bukni, sikce elti, bataklamik. Gade chapit la |
Ulangan 32:15
41 Referans Kwoze
Pia malye mutuku noutam ulamlumce, ikin weik ulamlum bukni, naryuk anggun patalamsuk touk, anggun din ning dobuka arelamsise. Arelamsiseba, aning dobuka, weik arye dilamlumba, boulamsuke. Din ning dipna arye boupsinopura, atalak arye tuba tamubuka tonap, anggun bidamnye ati, kanye deipdana arye, dipdanuka kwalipdana arye ulamlume. Kwalipna arye ulamlum talak ara, na si yaniptapnin arye, nati luba kilamnulume.
Deiyok ara ani. Anang ara, sik talima kat akunum ubuka ati, ‘Ayupu kekebibyak’ tenen, amul kunukdongobuka unyake. ‘Nun dina like’ tenen, asing kulamak atonun unyake. Ara sik asing kum kuptingatoura, asing arye teleb kibuka eiptinge. Sik amul kum kunuktingtoura, amul arye teleb kibuka kekeptinge. Winiptingura, sik kanye talima noutamak tenena ara, teleb kibuka kel biktinge. Winiptinyeura, na tam kipdongobuka, narye sikti, kwetepnirye lyepnamsine. Allah arye nyapdeibukura, Yesaya arye sekuk. (Yesaya 6:9-10)
Nyabukce, ayupu ton nyabuk. “Tonda, narye Israel ninye ati, ‘Ining ning obuka, na si eren aik pum tam, arenamnululume,’ nyalamse ning nirya ara, anggunce, ‘Aning ara, mambul kume, aning ara, talye ning uka,’ tenelulume. Awinimunye ning deiyok ara, yata ati do? Israel nang arye, aning dobuka yanuka arebikceba, eipmunce, ‘Nun dem aryuk dipnuyabe,’ teneluluma ara, yata ati do? Winiluluma deice arye, na Allah ati yaninululume. Tonda, yata ning ati, Eli an mapu malye winirikce ning ati, ance namin kilyam bukni, na nyalamsise ning ap, na bidamang nong ap ati, ‘Mambule,’ kum tenenilyam do? Winilyame nyapmakina deiyok ara, ani. Ara, ‘Naʼ tenen, ninye Israel nang arye, na si erena ati, yanuka areninyak ning, an mapu bitinye arye eipdikirye, teleb-teleb ninguk dobuka, sik ap dirikceba, sik nong galemna weik nerurake. Apia malyeuk winiminya ara, yata ati do? Winilyama deice arye, an mapu ati weik arye erelyam bukni, na ati ara, anggun amu tam kilinilyame. Winilyamce, malye wininilyame,” Allah arye, Eli biti nyabuka wenebuk.
Nun ni Allah, yuk-yuk kum ulule. Elda keil pala yangalamla atonunuk ulule. Weik keil pia aulye touk, Allah babye, pia aulule. El tenena ap, el winilye ning ap ara, yuk-yuk kum ulule. El pil dolye ning ara, pia telebuk winilule. Tonda, el winilul ning nirya ara, dipkoprob kibuka diksukumuk winilule. Allah el pil dolul ning ara, ‘Ton tam nang, teleb kipnirye, ton tam ara, namin kipnamne,’ kum tenelirye, el nyalul touk, nirya pil dolule. Malye ning tonok babye, ton kum winiptue. El winilul ning nirya ara, yamubuka diksukumuk winilule. Ninye winilamak touk, elce teleb kibuka, yupu diksukumuk bokolisulule. Ati ara, el si erenyabe.
Sik amalye wininyak nang ara, telebuk kibuka ukirye, sik nong pou weik unyake. Sik urasin babye, pia teleb unyake. Bukni, sik anang arye, malye wininyak ning ara, pia tenipmanto kum ning wininyakce, pia kum batakmanto unyake. Pia malye-malye aupto babye, sik tenepce touk, talye luparabuka wininyake. Sik anang arye, talye kwaknamne mapu ati ara, ‘Aminyan ara, amapu teleb kibuka unamakʼ tenen, diksukum kibuka, teleb winin ning arye kum melinyake. Amapu ati, yupu bokikce talak ara, diksukum kibuka kum nyanyake. Tonda, aning atonun, talye kankan uk unyak nang, aning-aning kum talenyak nang ati, yu nang arye malye winipnuce talak ara, anang arye, ‘Anggun bataksue, akankan nang ati, malye kilina kume,’ nyabuka, yupu kum sekenyake. ‘Sikda, dauplye,’ tenebikirye, yupu nyabuka, kum melinyake.
Aninye ara, ‘Sik kanye talima kat unamle’ tenen, na yupu kum kekepmanto una deiyok ning arepnyopura, sik kanye talima katauk unamle. Aning atonun, amul kunukna deiyok ning arepneba, sik amul arye teleb kibuka, kum kekepmanto unamake. Tonda, sik asing kuna deiyok ning arepneba, asing kupliba, narye mambul pil donamne ning ara, bita kum eipnamake. Aning-aning nirya ara, sik wenena ati, kum winipnyopura, sik asing arye eibikirye, sik amul arye kekebikirye, sik kanye talima pum tam moubuka tenebikirye, kel kibikcopura, pia ilil kanye bobuka, unyak ning nirya, batakikirye, ‘Na dam tamubuka yacak’ tenen, nyapne. Ara, na dam tamubuka yatingopura, narye sik malye ning ati, kilipnirye, teleb kipdeiptinye bukni, sik malye-malye weik wininyaka ati, ‘Aning kum winipnamak’ tenen, talima kat una deiyok ning arepneba, kum kekepmanto una deiyok ninguk, talibuka pia unamake. Allah arye, ayupu nyapdeibukba kekepse.
Ati, sik malye wininyak ninye ara, bicoe. Sik donirye deipdanin yangalamik ninye arye, malye ning weik tonun winipra yangalamikce, na yupu yaniltalamnike. Aning atonun, sik mapu babye, malye-malyeuk wininyake. Na Allah Yahweh, aning-aning nirya talibuka, deice tam Weik Eitam Ununye birye, na nyanun touk unune. Nara, pia telebnye, malye una kumnye birye, Israel ninye ati, pia kalikuka melinun bukni, sikce batakaninyake. Sik nirya ara, na dam kum unyakce, nati donga aninyakce, yuk pera sukumuk unyake.
Nun nirya ara, kil-kil kanye deibuka, nun ni Allah Yahweh elti, mot nyabibirye, el siuk erenamabe. Allah elda, nun lyelosulul anya arye, weik yupu deice arye mot sebuka, el si teleb yupu deice arye erenamabe. Mutuku yangan keil, mikip weik arye bulamle atonun, Allah el babye, aning atonun, mikip weik arye lyesulule.
Sik malye wininyak ninye, sik talima pum tam ara, malye winin ninguk langdipliba, alye una kum diparyuk, sikce, ‘Malye winin ninguk talibuka, talye lukparabuka wininamabe. Nun tenebibye touk, wininamabe,’ tenebikirye, adeice arye, malyeuk wininyake. Sikce, ‘Malye winin ninguk wininamabe,’ tenenyaka ara, pia weik ulula ati ara, kum nukmanto ulule.
Israel nang arye, amutuku weik keil poka dona ati, keil dikuka deipwelepna arye, antanap dongobuka dolamikce, weik aik alapdobik. Tonda, teleb wa tuku ap, teleb tuku ap, binuka alapdobik. Tonda, bona utotoa talin nang arye, talibuka ulamik aik ap, aik noutamak talibuka delilamik ning ap, teleb ning ap, binuka doprobik. Tonda, amutuku nang arye, palyamik mekwen ap, sik talilamik mek pu ap, anggur tapu wa tuku ap, zaitun yo koulamikba duk moulamuk mutuku ap, yuk yala yo duk moulamuk yo ap, binuka talye parapkabuka doprobik. Alubuka doprobikce, dilamikba, sik nong teleb nelamikce, sik teleb kanye bobuka ulamik. Ance nun apu yapu weik arye meliamlumba teleb arye pin-pin kanye bobuka ulamik.
Nyabukopura, ayupu ton nyabuk. Israel ninye ati kalikuka melilul Allah ara, el atonunye ton, pia kum ulule. El tonoka. Sik yuk yala ninye yuk-yuk Isa Mutuku Dongonye si erenyak ning ara, talye ninguk. Israel yala ninye, sik si erenyak Allah, elda pia teleb, mikip weiknye ulule. Sik ni koproba Allah arye, ‘Israel ninye melipnamne’ tenen, im ap, dua ap, deice arye, yanuka melisulule.
Allah, el si Yahweh arye anggunti, teleb asa arye meliamsuk bukni, anggunda elti, tamubuka amalye winiplum ning ara, yata ati do? Amalye winiplum ning ara, teleb do? Anggunda, pia walwal nang atonun, kanye tenelina kumce, kel kum bikmanto ninye atonun winiplume. Anggun ni koproba Allah arye, anggun Israel ninye ati, ‘Na tenena ninye unamak’ tenen, kum kwepdeipsuk do? Elda Israel ninye kwemdina deiyoknye kum ulul do?
Winibuka noutamak arye, Allah el si Yahweh arye, yupu tonok Musa biti nyabuk. “An dipnalam talak, akunum dam kipmala ati ara, an apu yapu diamik touk dipminba, sik ton weiamik sukumuk, tuku lukicopura, sik ap dikdik senamlume. Dipminyopura, Israel ninye talipluma batakminyopura, sikce nati, ton bataknikiba, sik binamak mutuku unyak ninye arye si erenyak Isa Mutuku Dongonyeuk, talibuka si erenamake. Na atibuk, ‘Nun ni koproba Allah,’ kum tenenamniyake. Winibicopura, narye sikti, ‘Dipkoprop wininamsine, aning ton wininamsine,’ nyapdeiamsise yupu ara, batakuka yanipnamake. Yuk ning siuk erepnamake atia.
Nyapseba, Allah el si Yahweh arye, ayupu nyabuk. Anggunda, pia malye weik winilulum ati, na mapu koproba, yata deiyok ning deice arye, anggun malye winilulume ning ati, biksitinirye, kum kipdeiptinye do? Anggun amutuku ululum nang ap, anggunce deiplumba, dadeipdanin yanganyak nang nirya arye, na akunum bataknulumce, yuk talye ning ati, ‘Nun ni ani,’ nyabuka, isa si erelulume. Narye, anggun din ning ap, anggun patan ning ap, pia weika arye areamseseba, diluluma deice arye bousulul bukni, anggunda pia malye-malye weik winilume. Ara, anggunce akunum domlum kilapu batakuka, yuk nang arye domik kilapu, talye yalalulume. Tonda, ninye talye-talye yolon nyak kilapu, sik unyakak ton, dilbalamlumce, amutuku ninye weika arye, akilapu sik dam bimunce, akilapu ap, yolalulume.
Allah el si Yahweh arye anyapdeipmasile. Sik apu yapu arye na Allah dam malye ulamik ning ara, yata deiyok ati do? Tonda, narye yata ning malye winipseba, sik apu yapu arye na bataknik do? Na bataknikce, sik malye ulamik ning ara ani. Sikce, ‘Nun ni koprop unamsil’ tenen, ulamik ning ara, nong una kum ning atibuk talye, ‘Nun ni koprop unamsil’ tenen, ‘Nun deiyok isa ara anye,’ nyabuka, el aisa si erelamik. Winilamika deice arye, sik bidamnye nong uk malye ulilamik.
Amalye tilila yupu nyaninyak ninye nirya ara, teleb winin ning moubuka kum kel bikamikca arye, sik kanye talima noutamak, ‘Teleb ning ani, malye ning ani,’ kum tenepmanto ninye unyake. Bukni ance, “Aning ara, wininalulume. Aning ara, pia kum wininamlulume,” nyapdeiamsulum mem yupu nirya ati ara, kanye deipnirye, na talima noutamak deibuka unamne.
Tonda, nun ap, yuk mutuku nang ap, mal olan talak ara, sikce, ‘Se, yata wiriptibye do? Kume’ tenen, ilil weik ubukba, sik talima dakalsakanauk ulamuk. Sikda, ‘Anye birye opsilyak’ tenen, ilil weik ubukba, ‘Yuk mutuku nang arye yanuka, opsicak’ tenen, cang keil poka domikce, ulamik asik noutam arye batakuka, na dam yanuka, sik nong sirim talinauk ulamuk.
Aminyan talak ara, sik Israel yala nang ara, tamubuka Allah Yahweh arye, Aning ara pia malye ning anya arye, aning ara na like,’ tenelul ninguk talibuka ulamik. Ara, sik Israel nang arye, Allah Yahweh ati, tuba kum tenebikce, elti, ton tamubuka, kum si erelamik. Israel nang ara, isa si Bahal, aisa-aisa ap, tonda Asytoret isa ap, aisa uk sik si erelamik. Ara, Sidon mutuku noutam ulamik nang ap, tonda, Siria mutuku noutam ulamik nang ap, tonda, Moab mutuku noutam ulamik nang ap, tonda Amon mutuku noutam ulamik nang ap, tonda Pilistin mutuku noutam ulamik nang ap, anang-anang, sikce si erelamik isa-isa uk, Israel nang babye, aisa si erelamik.
Anang ara, weik mambul nang, mikip weik nang ulamik bukni, Israel nang, sik deipkirikrop nang arye, si erelamik Allah, elce, ‘Winipnamlume, aning ara, pia kum winipnamlume,’ nyapdeiamuk yupu, moubuka talina kumce, Allah ati, balye tam kibuka batakamik. Winyamika ara, Kanaan tam nang, min talak arye amutuku ulamik nang, sikce talibuka si erelamik isa si ati, Israel nang babye, aning ati, ‘Nun ni,’ tenen, atalye ning si erelamik. Ara, Allah elce yakuka donokamuk nang, sikce si erelamik isa si atibuk, Israel nang babye, si erelamikce, malye weik winilamik.
Uzia birye, amutuku noutam mikip weik tonun ton ap tabakdeibukce, amutuku taleamuk ati, el talima erebukce, maknya kintinildalamuk deice arye, el winilamuk ning nirya ara, pia malye kipdayuk. Elce Allah Yahweh arye, “Wininamlume, aning ara, pia kum wininamlume,” nyapdeiamuk yupu atouk talebuka kum ulamuk. Ati, Raja Uziah bira, imamnye kum ulamuk bukni, el kanye aryuk, Allah Yahweh si eren aik pum tam, Teleb Lek Aik wekuka, Allah el morona ati, kinggin tong teleb len ning uku dongona ati, uku dalamik sukum binuka, elcuk uku dongobuk. Winibuka deice arye, malye weik ubuk.
Nara, anggun ni koproba Allah, na si Yahweh unune. Na siuk erenululume. Anggun Mesir mutuku noutam, ikin weik ulamlum talak ara, na Allah aryuk lopdeipsiseura, yuk teleb mutuku bobinamsise. Ati, aminyan talak nirya babye, anggun patapsilye ning ati, din ning do, yuk ning do nirya ara, ‘Melibuka arepsilyame,’ nyabuka, moropnumunyopura, narye anggun patapmasilye ning nirya arenamsine.
Se wini talak ululum Israel nango, anggunce na anyapmasin yupu moubuka kekepnululume. Narye anggunti ara, mek kum ati ninye kum ulamik mutuku atonun ubuka, ikin ninguk deipsisa ati, bataknulum do? Akumopura, anggun ululum mutuku ara, kuna daklamle atonun, dirina ap, kel bikna deiyok ning ap, kum arelamsisa ati, bataknulum do? Aning kum winipsisa ati do? Anggun ti narye, teleb kibuka kalikuka melilamsise. Bukni, anggunce nyanululume. ‘Kume, nunda talyeuk ubirye, nun tenenyap ninguk wininamabe. Allah el amu tam bukuka kum unamabe. El nyasilye yupu ara, pia kum kekenamabe. Tonda el dam ara, tamubuka kum banamabe,’ nyanululume. Aning ara, yata deiyok ati do?
Raja Rehabeam ninye deiyok kibuka Yehuda tam taleamuk talak ara, mikip weik kipdeiamukba sik amutuku noutam ulamik Israel yala ninye ap, el ap, Allah Yahweh arye, ‘Aning ara winipnamlume, aning ara pia kum winipnamlume. Aning ara pia meme,’ nyapdeiamuk yupu ara, sikce ayupu ara talye yupu,’ tenebuka ulamikce, dip yupu ara, yanilamikce pia malye weik winilamik.
Aning-aning nirya telebuk ulamuk bukni, nun apu yapu arye, an nyalalum yupu nirya ara, bisibuka yanibikce, ‘Allah nyasulul yupu ara nun like, aning kum wininamabe,’ tenelamikce, malye ninguk winilamike. Ance, ‘Wininamlulume,’ nyabuka, Mem Yupu nyalalum ning atonun, pia ton kum dukdongobuka winilamik. Winilamik ati ara, an yupu lak nyan nang arye, “Nun malye winilamap ning ara, batakibirye, nun ni koproba Allah, el yupu uk kekebuka unamabe. El dam tuba tamubuka bibirye, el ap talima dukdongobuka unamabe,” nyalamik nang nirya, obuka bataklamik. Tonda an ap, an si ap ati, pia malye yupu nyabuka, weik malye kilamikce, ance, ‘Aning ara na lik ati, pia kum wininamlume,’ nyapdeiamsulum ning ara, aning ton winilamike.
Tonda, nun moubuka tenepnamnyabe. Allah el si Yahweh ululnye bira, Allah tonok ulule. Allah elcuk, nun tukwak mutuku ninye nirya kweipdeipsuk. Kwepdeipsukce, nun nirya ara, Allah el ninguk unyaba ati, elcuk moubuka talisulule. Domba deiyok nang arye, sik domba basam bobuka, mutmuta palamle mutuku, telebak deibikirye, kalikuka dilamak touk, Allah Yahweh arye, nunti, bico tenepsilirye, melibuka kalikisulule.
Allah arye Israel ninye ati nyabuk. “Anggun malye winilamlumba, wenepsise bukni, winipsisa babye tuba moubuka kum tenelulume. Bukni, wini talak ara, nara Allah Yahweh arye nyapsine. Na aryuk, anggun apu koproba Yakub wipdeipsirye, kintinip deiamsiba, elce deibukba, dadeipdanin yangalamlum ninye, ‘Naʼ tenen, ninye ululume. Anggun Israel ninye ara, naryuk anggunti kintinip deiamsise. Ati, anggun ilil una meme. Ara, urdem ati kum nyapsine. Kume, narye, ‘Wininamne,’ akunum tenelamse ning ara, anggun malye ululum ning ati, wenebuka opsitinye bukni, bico ati anggun malye ning namin kipnirye, lyepropnamsine. Narye anggun si akunum kel kiamsisirye yukupsisa ati, anggunda na mapu koproba ululume. Anggunda ‘Naʼ tenen, ninye ululume.”
Winipmanto ara, wel kil el kweirya dopmalye luba kilul do? Atonun, taruk morupnamace kilapu, ongolamak teleb baju ap, kweirya ning ap, taruk morupnuce talak ara, luba kiplirye kum ongolul do? Kume, ara kum winipmanto. Bukni, ‘Anggunda, ‘Naʼ tenen, ninye’ tenen, wipdeiamsise ninye arye, na Allah ati, pia akunum luba kipnulum talak nirya ara, keting tamun kum nukmanto, pia weik ubuk.
Winibuka nyapdeipnamne deiyok ara, ani. Ara, Israel yala nang kan-kan arye, isa si erelamik nang arye, wininyak ning deice, na dam arye kisikdakuka, yukak wininyake. Na dam yanuka, na siuk kum ereninyake. Wininyaka ati, isa si erenyak nang arye, na nabi nang dam yanuka moropnikceura, na nyanamne yupu deice arye, isa dam ara, narye na mapu koproba dobuka, kisikdakuka yukak deipnamne. Winipye deice arye, na mapu koproba, sikcuk ara, isa mer ati talibuka unyak ning ara, batakikirye, tuba tamubuka, na damuk deipnyeba, na tamuk yanganamake.
Na si eren aik pum tam, pil dona deiyok nang arye, weik tonap tabakuka malye wininyaka deice arye, Israel ninye weik arye, tonap na dam malye weik wininyake. Deiyok ara, anggun imam nang aryuka. Israel ninye nirya arye, malye weik wininyaka deice arye, talye ning Isa Mutuku Dongonye si erenyake. Ara, Isa Mutuku Dongonye si erenyaka deice arye, nati batakaninyake. Sikce mapu deibikirye, dadeipdanin balamica ani, weik upnin balamak touk, sikce malye winin ning pia weik tabakuka malye winipnin banyake. Ati nara teleb ubuka ununye mambulnye birye, weik dirina unun bukni, sikce nati batakaninyaka anya arye, sik wenena ati narye sikti, weik arye kanye delilamse ning ara, tamubuka yu upmanile. Allah arye nyabuk.