Ulangan 30:1 - Eipomek

¹ Musa birye, Israel ninye ati nyabuk. Wini talak ara, anggunti, akunum laka nyapmasine. Aminyan talak, Allah arye teleb ning ton arenamsile. Ton talak ara, kanye imun un ning ton arenamsile. Ati, anggun moubuka tenenamlulume. Aminyan talak ara, anggun ni Allah, el si Yahweh arye, anggun dopropsilirye, yuk-yuk mutuku nang kan-kan delinamsile. Deipsiliba, anggun yuk-yuk unamlum talak noutamak nirya ara, ‘Allah arye, nun wenena ati, kanye imun un ning arepmasil do? Teleb winibibiba, teleb un ning diamuk arepmasil do?’ Aning ara, anggunce moubuka tenenamlume.

Ulangan 30:1 Referans Kwoze

Ulangan 30:15

Ati ara, anggun kekepnululume. Arup arye anggunce wipnamlum ning ara, akunum laka nyapdeipsine. Ara, teleb winina ap, pia kam una ning ap, wipnamlum do? Malye winina ap, dipna ning ap wipnamlum do? Tenipdemunce, wipnamlulume.

Ulangan 30:19

Wini talak ara, anggunce anggun ni koproba Allah, el si Yahweh arye, nyapdeiamsuk ning ara, kam una deiyok ning do, dipna deiyok ning do, tonda teleb winina deiyok ning do, ikin ning dolona ati minilongona deiyok ning do, aning nirya ara, narye akunum laka nyapmasina ati, anggunce wipnamlulume. Aminyan talak anggunce nati, ‘Aning kum laka nyapsulume,’ nyapnumunyak tenen, wini talak ara, narye im deice kam ulul ning ap, tukwak mutuku kam ulul ning ap yukupniba, anggun wipnamlum ning ara, eipnusine. Ati ara, “Kam un ninguk wipnamlulume,” nyapsine. Kam un ning wipmunyopura, anggun ap, anggunce deipnamlum mapu ap, kam unamlume. ‘Wininamlum’ tenen, nyapsine.

Ulangan 29:28

“Allah Yahweh, el yu weik ubukba, aning ara, adiparyuk winilamuk. Tonda, Allah el yu pia weik ubuka deice arye, sik Israel nang amutuku ulamika ani, amutuku noutam arye dobuka, sik yuk ninye asik nang mutuku donoknamuke. Winibukura, sik Israel nang nirya ara, yuk nang mutuku binuka, ulamike,” nyanamake.

Lukas 15:17

Ikin weik ubuk talak ara, kanye moubuka tenebukopura, utenebuk. ‘Se, na yata ning deiyok ati, malye ulamse do? Na ni el pil talye melinyak nang ara, din ning weik dinmaca ani, bouplyopura, sirya ara batakanyak bukni, na tonok ara din ning kum upnuka deice arye, dipmanto unune,’ tenebuk.

Yehezkiel 18:28

Ara, urdem ati kum nyapsine. Deiyok ara, el malye winilamlye ning nirya bataklirye, dib teneplyopura, yuk talak babye, pia diksukumuk wininamle anya arye, anye bira, kum dipnamle. El malye winin ning batakuka, teleb winin ninguk, wininamle deice arye, kam pia unamle.

Yesaya 46:8

“Ati, Se, anggun malye umunce, na yupu yaniltanululum ninye nirya ara, moubuka tenilenamlulume. Na Allah arye nyapnusin yupu ara, anggun asok deice deipmunce, pia tenenamlulume.

Ulangan 28:64

Tonda, Allah Yahweh arye anggunti, amutuku noutam arye yakuka donoksiliba, ninye yuk mutuku nang unyaka noutam, binuka unamlume. Tukwak mutuku noutam, mutuku-mutuku nirya binuka unamlume. Amutuku binuka umunye talak ara, sik amutuku unyak nang arye, talye keil ap, yo ap, yuk teleb ning ap, dobuka memebukabikirye, sikce, ‘Nun ni aniʼ tenen, talye ning atibuk, si erenamake. Atalye ning ara, anggun babye, anggun apu yapu babye, kum bikamlum ning buk, talibuka, isa si erenamlume.

Yeremia 8:3

Tonda, sirya talak weik arye wenepnamsin talak ara, na Allah arye, min talak, ton tam nang yakuka, yuk pera mutuku nirya akunum donokse nang bukni, wini talak tuba kam unamak nang ara, ikin weik unamake. Sik anang arye, imun kanye bobikirye, ‘Se, teleb ning ara, nunda dipnauk uptibye. Pia ikin weik unyaba ati, kam una ara, nun like,’ tenenamake. Nara Allah Yahweh, im deice unyak yin talin malaikat nirya, sik deiyoknye ununa ati, mikip weiknye unune. Ati, naryuk ayupu akunum nyapmasina ati, aning nirya nong upnamlarya! Allah arye, sik Israel nang upnamuk ning ati nyabuk.

Kejadian 4:14

Asum arye, ‘Amutuku noutamak ara kum unalame,’ nyabuka, talye buru mutuku yakdonoknilama ati, an uminyak ara, neika kum unaname. An ap kum elananame. Kanye bokoltolamniliba, tukwak mutuku im sirya, mutuku sirya nirya, talye balamneba, yata ninye arye do, eipnicopura, talye mangkau arye oplonamniyake,” nyabuk.

Ulangan 32:36

Allah el si Yahweh arye, el mapu sik malye ning ati, yupu lipsisikuka, wenenamle bukni, sik mikip kum daliba, anang akunum kum danin bacopura, ila tuba tonap, bico tenepnamle. El mapu, yuk nang amu tam unyakce, talye piluk donyak nang babye, ura, sik bidamang kanye aryuk, pil donyak nang babye, kum dacopura, Allah eiplirye, bico tenepnamle. Bico teneplirye, el amu tam unyak nang, Israel ninye ati, tuba tonap, kanye namin upliba, bico teneplirye, lyepnamle.

Yeremia 3:13

Ance moubuka, ‘Se, nara, Allah Yahweh dam malye winilamse,’ tenepnulyame. Tonda, Na ni koproba Allah arye nyapdeiamuk yupu, kum kekelamse,’ tenepmince, na damuk yanamlame. Tonda, an babye, ‘Se, na ni Allah ati, kum si erelamsirye batakuka, weik yo tikamuka amu tam balamsirye, yuk mutuku nang arye, si erelamik isa ati, “Na deiyok ning,” nyabuka, atalye ning si erelamsirye, na ni Allah ance nati, “Aning-aning wininamlyame,” nyapdeiamnulum ning ara, akunum yanyamse,’ tenepnalame. Ayupu ara, na Allah Yahweh arye, akunum nyapdeipmasina ati, aning nirya ara, dipkoprob upnamle.

Yeremia 29:14

Dipkoprob nyapsine. Dipkoprob epnumunyopura, narye anggunti, lo arepsinyeba, na unye ning eibuka biknamlume. Tonda, wini talak ara, anggun ikin weik ululum bukni, aminyan talak ara, narye anggun tamubuka pia teleb kipdeipnamsine. Tonda, wini talak ara, anggun malye winilamlum ning wenena ati, akunum bataksisirye, donoksiseba, yuk-yuk mutuku, dana-dana tam ulamikce nang yuk-yuk yala nang kan-kan, dabinuka winilamunya babye, aminyan talak, narye anggun boyanuka, anggun mutuku koproba, tonap tamubuka boyanuka deipnamsine. Ayupu ara, na Allah Yahweh arye akunum nyapmasina ati, aning ara dipkoprob kunupnamle!

Ulangan 28:28

Tonda, Allah Yahweh arye, anggun deice ara, motona talin ning arepnamsile. Tonda, asing kuna arepnamsile. Winipsilya deice arye, aning nirya moubuka kum elinamlume. Aning eipmunce, bita kum bikinamlume. Tuba walwal yupu nyana ap, walwal una apuk unamsile.

Ulangan 29:27

Deiyok aning ati, “Allah el si Yahweh arye, el mapu ati, yu weik ubukba, kanye imun ning nirya bobuka, sik deice deibukura, ikin kanye bobuka unyake,” nyanamake. Tonda, aikin ning arebukura, doprobik ning nirya ara, abuku deice sekuka deibike,” nyanamake.

1 Raja-Raja 8:34

Yanuka moropkipyopura, an im deice arye, aning kekepsimince, Israel nang nun malye ning adiparyuk namin kipsimince, lyenamsilyame. Tonda, winipmince nun apu yapu ati areamlum mutuku uk, yuk mutuku nang arye nunti sirya obuka daksikirye, yuk mutuku bobisicopura, ‘Aminyan talak ance nun Israel ninye lyepsimince, tuba tamubuka boyasimince, amutuku tamubuka arepnamsilam’ tenen, moropkine.”

2 Tawarikh 30:9

Anggun tamubuka, Allah Yahweh el dam yatumce, elce, “Wininamlume,” nyasilye touk, umunyeura, teleb uptume. Winiptum toura, anggun kayapu nang ap, anggun mapu ap nirya ara, anggun mal olan nang arye tapu koubukabikce, tomobuka wenen aik dongobikak, unyak nang nirya ara, abobinuka deibik nang, sik talima Allah arye pil doptuba, sikce tapu koubik nang ati, bico uptuba, tamubuka lopdeipsitingba, sik mutuku tamubuka asukumuk yanganamake. Anggun ni Allah el si Yahweh ara, ninye ati bico teneplirye, nun melina ati, teleb kilina deiyoknye ulule. Anggunce Allah el dam yatumura, elce anggun kum bataksutue. Dipkoprop dopropsilirye, melinamsile.” Raja Hizkia birye nyapdeibukba, ayupu nirya ara, surat deice arye sekik.

Nehemia 1:9

Bukni, winipnamsina babye, anggunce tamubuka na dam yamunce, narye, ‘Aning ara wininamlulume, aning ara kum wininamlulume,’ nyapse atonun kekebuka winipmunyopura, yuk mutuku nang arye obisipsikirye, pia yukak bobinamsitinga babye, anggun kwit capu mutuku sirya, im sirya, daunamting nang babye, narye bulubuka, tonokak deipnamsine. Ara, ‘Aunamlume,’ tenen, wibuka kintinip deiamsisak uk umunce, na si erenamnulume. Ara, ‘Na si asukum unamle’ tenen, ‘Kintinipse mutuku ati nyapsine,’ nyabuka, nyapdeipsulum yupu ati nyapkine na nio.” Nehemia birye nyabuk.

Yehezkiel 6:9

Yuk pera mutuku nang arye, anang tomobuka bobinuka, deipnamakak ara, amutuku-amutuku unamak Israel yala nang arye, dabinuka unamak talak ara, sikce nati kanye moubuka teninamake. Tenipnikirye, moubuka biknamniyak ara, ‘Se, Allah arye nunti, wenepsuk ning deiyok ap, elce nunti, talima uk dilamukba, ‘Na like,’ tenelamsuk ning ap, adeiyok ara, nun tia.’ Ara, nunce, nun talima noutam, Allah ati kanye pia kum deiamuba ati, el batakamuburye, talye isa ati wibuka, aning si erelamupu. Tonda, nunce pia malye un ning talibuka, winilamupu ning ara, dipkoprob malye ninguk winilamupu. Tonda, Allah arye, ‘Aning ara, na pia like. Aning nirya ara, mem ning anya arye, pia kum wininamlume,’ nyabuka, lak nyapdeiamsuk bukni, nunce amalye ninguk talibuka, winilamupa deice arye, Allah Yahweh arye wenepsukce, bataksuke. ‘Aning nirya ara, ila tamubuka teninamak’ tenen, winipsuke

Zakaria 10:9

Na tenen ninye arye, malye weik winilamikba, aminyan talak sik wenena ati, lo arepneba, yuk mutuku ninye arye yanuka obikirye, tapu koubuka, sik Israel ninye tonok-tonok bokuka, yuk pera mutuku noutam dadelilbinamake. Winibuka bobikiba, yuk pera mutuku noutamak daunamak talak babye, sikce nati luba kum kipnamniyake. Tuba tenena uk unamniyake. Tonda sik ap, sikce dadeipdanin banamak mapu ap, natibuk tuba tenenamniyake. Winipnamna ara, yuk mutuku ninye arye, ‘Naʼ tenen, ninye kum obuka sirya dakanamake. Tuba aunamak talak ara, sikce mapu weik deipnamake. Winibicopura, minop talak ninye yupa weik ulamik touk, ila tuba tonap dukdongobuka pia weik upra banamake. Winibicopura, aminyan talak, narye sikti, lyepsinirye, tamubuka sik mutuku koproba boyanamne.