Ulangan 3:17 - Eipomek

¹⁷ Sik mutuku ara, Araba tam ton nyalamik ning arepse. Ara, weik laut mekwen el si Laut Mati outam mutuku (ara selatan) uamuk. Amutuku wilinak pia eitam, deice tam ara, Laut Mati keting kumulban tam uamukak, anyapce dipdongobuka, binamuka ani, deice tam ara (ara utara), Yordan mek dara tam yangalirye, Laut Mati wekelule. Tonda, anyapce ubuka, keting panalyangan tam ara, weik mutuku dup, el si Pisga mutuku bukamuk, tonda amutuku uk bukni, el si ati Nebo mutuku ton nyalamik mutuku bukamuk. Asukum bukni, utamna (ara selatan) uamuk mutuku, atam nirya dipdongobuka balamuka ani, Laut Mati dara tam, anyaba ubuka, outam ton (ara selatan) uamuk mutuku nirya ara, aning ton bokuka arepsiba doprobik.

Ulangan 3:17 Referans Kwoze

Yosua 12:3

Tonda Yordan mek banak diprongobuka, otam keting panalyangan tam arye diprongobuka, Galilea mekwen kup-kup tam arye ubuka, eitam Bet-Yesimot mutuku ton doprobik. Bet-Yesimot mutuku ara, anyak arye diprongobuka, keting panalyangan tam mutuku ara, weik laut mekwen, el si ara Laut Mati, deiamukak nirya, anyapce diprongobuka, weik mutuku, el si Pisga mutuku, amu tam nirya ara, doprobik.

Kejadian 14:3

Ura sik Bera ap, Birsya ap, Sinab ap, Semeber ap, Bela mutuku taleamuknye ap, sik nirya arye, ‘Yuk tam taleamik deiyok nang ati, neika olbinamap’ tenen, Sidim lyu mutuku bulubik. (Sidim lyu mutuku, el si ton, ‘Ua Laut Mekwen mutuku,’ ton nyalamik.)

Yosua 3:16

Winibukopura, mek deice yaribuka balamuk ning ara, baprongobukba, itam arye yangalamuk mek ara, eitam mutuku kilbiyuk. Mutuku si Adam bukni, ton mutuku si ara, Sartan mutuku dam ara, pia cang weik tonun tikukabukce, asukumuk tunim abuk. Winibukura, ton ning ara, utam mek ara, mekwen si ara, Garam Laut mekwen dam balamuk mek ara, bokukabukce, outam kilon, eitam kilon kibuk. Amek nirya ceprobukba, Israel nang nirya, amek balamuk bisik bukni, mikdopmok deice uk, keting yangan tam arye, Yordan mek koubuka, otam keting wekelbalamle tam, Yeriko mutuku tam biyik.

Ulangan 4:49

Tonda, sik Israel nang arye talibuka ulamik mutuku bukni, Yordan mek koubuka, otam keting panalyangan tam nirya ap, anyapce dipdongobuka, outam (arah selatan) tam ara, weik laut mekwen deiamukak, el si Laut Mati, asukum arye dipdongobuka, otam keting panalyangan tam ton, Pisga mutuku dana-dana arye yanuka, dipdongamuk mutuku biyikce, amutuku nirya talibuka ulamik.

Yosua 18:19

Asukum arye, deice tam, utam dabu mutuku tam bukdanin, biyuk mutuku lilun nirya arye, dipdongobuka, binamuka ani, Bet-Hogla mutuku biyuk. Tonda, anyapce ubuka sik tuku sirya ara, utam dabu tam bukni, weik laut mekwen bana kumce, pia aubuk laut mekwen dam tam, Yordan mek duman ara, mek binuka dalyayukak arye, binuka sekdobuk. Selatan tam tuku wilinak ara, amutuku noutam arye bokdeibik.

Yosua 15:5

Atonun, sik mutuku tuku wililamik otam, keting panalyangan tam ara, weik mekwen ikan kam una kum mekwen ati, el si ara, Laut Mati nyanyak. Alaut mekwen dam arye, dipdongobuka yayuk. Tonda utam ara, Yordan mek dara tam arye, binuka wilipdongobuk.

Yosua 15:2

Iknapye tam sirya ara, weik laut mekwen, el si Ikan Kam Una Kum Mekwen dam arye, dipdongobuka, iknapye tam biyik. Aliptam ara, el si ton, Laut Mati nyabuka, tuba nyanyake.

Yosua 13:27

Tonda, ninye deiyoknye Raja Sihon, elce amutuku-amutuku taleamuk talak ara, Hesyebon mutuku noutam ulamuk. Amutuku ara, Musa birye doprobukce, mitik tonunuk, bokuka arebuk. Amek kup-kup ara, asik si Bet-Haram mutuku ap, atouk Bet-Nimra asik ap, Sukot asik ap, tonda Zafon asik babye, bokuka arebukba, Kat yala nang arye doprobik. Tonda, Kat yala nang arye, doprobik mutuku bukni, keting kumulban tam ara, Yordan mek ton ounmok bukni, amutuku wililamik, eitam (tonda utam) mutuku ara, weik mek kwen Galilea ton deiamuk. Anyapce dipdongobuka, otam keting panalyangan tam ara, wililamik mutuku ton uamuk.

Bilangan 23:14

Nyabukopura, Balak birye Bileam inibukce, Pisga mutuku deice weleprik. Amutuku ara, ninye si Zopim, el wa win dam birik. Asukum ara, keil pala lelebuka, yuk-yuk yangabuka, tekbarye kintinip deiprik. Winiprika ara, yim sapi basam tonok ap, yim domba basam tonok ap, obukabikce, ayangap deipmekak nirya, yuk-yuk tonok-tonok deibik. Atekbarye keil pala lelebuka, yangeipmek deice, tonok-tonok uku sekdongobre banmeka, deipra banmarikba, aning nirya uku dinmok.

Kejadian 13:10

Abram birye, nyabukba, Lot birye, amutuku nirya dana-dana tam dipdeyukce, Yordan mekin ap, Yordan lyuak nirya ara, mek weik binamuka anya arye, pia teleb ubukba, eibuk. Amutuku nirya ara, Allah el si Yahweh arye, minop talak kwepdeiamuk mutuku, Eden mutuku atonun, tonda Mesir mutuku noutamak bukni, teleb mutuku si Soar mutuku urasin atonun ubukba, eibukce, kanye deibuk. (Atalak ara Allah arye, Sodom mutuku ap, Gomora mutuku ap, sik wenena ati, uku dopkwetebukce, min kum omuk talak ati nyapne.)

Lukas 5:1

Tonok sum ara, Yesus Genesaret mekwen, weik mekwen lilun tikuka peterenmok talak ara, ninye pia weik arye, ‘El yupu kekepnuyap’ tenen, el dam wekelyanganmekce, tiklim daraldanmekak Allah yupu peterenmokura, kekenmek.

Yosua 19:35

Weik keil poka dobukabikce dolamik asik ara ani. Zidim mutuku ap, Zer mutuku ap, Hamat mutuku ap, Rakat mutuku ap, Kineret mutuku ap,

2 Raja-Raja 14:25

Yerobeam Bitinyanye birye, mitik tonun teleb winibuk ning ara, ani. Ara, Israel tam ulamik ninye, sik ulamik mutuku ara, outam dabu tam, Hamat bisik ban sukum arye, dukdongobuka binamuka ani, iknapye tam, arah selatan tam, weik laut mekwen deiamuk ning ara, alaut si ara, ‘Kam Una Kum Laut mekwen,’ nyalamik. Amek dam arye binuka sekdomuk. Ara, Israel ninye, sik ni Allah Yahweh arye, el yupu nyapdeipniba, laka nyananye, el si Yunus deice arye nyabuk touk winibuk. Yunus bira, Gad-Hefer mutukunye, el si Amitai birye deiamuk mi ulamuk. Minop talak ara, Allah Yahweh arye, nabi Yunus dam yayukce, “Daunamle talak ara, winipnamake,” nyamuk talak winipnamuk yupu ati, anyapdeiamuk touk, yuk mutuku yu nang arye, amutuku obuka malye kibukce, tia talak noutam arye, amutuku taleamik nang, Yerobeam Bitinyanye birye, amutuku tonap tamubuka doprobukce, Israel tam noutamak ton lipsisikuka dobuka teleb kipdeibuk.

Yehezkiel 47:8

Eipseura, malaikat birye nyapnuk. “Amek ara, pu dobuka, keting panalyangan tam mutuku balule. Ara, amutuku noutam arye deiyok koubukce, outam ara, mutuku si Araba mutuku biyuke. Ara, Yordan mek koubuka, otam arye, atam ara, weik asik Yerusalem mutuku domik sukum ubuk. Anoutam arye, amek kebuka balamukce, Yordan mek dukdongamukce, karin sukum outam (arah selatan) ara, weik laut mek, el si Laut Mati, akunum min arye deibuk mek damuk balamukak eipse. Ura, aminyan min arye deibuk laut mek, Laut Mati noutam akunum balamuk ning ara, amek Laut Mati mek deiamukak, yu min-min nyalamuk ning ara, tonap tamubuka, teleb mek kipdeipnamlarya,” nyapnuk.